ලසන්ත රුහුණගේ/ අමන්දිකා කුරේ
වත්මන් ආණ්ඩවේ කැබිනට් මණ්ඩලය අනුමත කර ඇතැයි සඳහන් වන 21 වන ආණ්ඩුක්‍රම ව්‍යවස්ථා සංශෝධනයට සහයෝගය ලබා නොදීමට ශ්‍රී ලංකා පොදුජන පෙරමුණ හෙවත් පොහොට්ටු පක්ෂයේ මන්ත්‍රීවරුන් තීරණය කර ඇතැයි වාර්තාවේ.
එම තීරණය සඳහා හේතුව වශයෙන් සඳහන් වන ප්‍රධාන කරුණ වන්නේ 21 වන ව්‍යවස්ථා සංශෝධනයේ ඇති ද්විත්ව පුරවැසියන්ට පාර්ලිමේන්තුව නියෝජනය කළ නොහැකි බවට වන යෝජනාවයි. එම යෝජනාව සම්මත වුවහොත් පොහොට්ටු පක්ෂයේ නිර්මාතෘවරයා වශයෙන් සැළකෙන බැසිල් රාජපක්ෂට පාර්ලිමේන්තුව නියෝජනය කිරීමේ වරම් අහිමි වේ.
මේ තත්වය මත 21 වන ආණ්ඩුක්‍රම ව්‍යවස්ථා සංශෝධනයට තුනෙන් දෙකක පාර්ලිමේන්තු අනුමැතිය ලබා ගැනීම අසීරූ වනු ඇතැයි පැවසෙන අතර පාර්ලිමේන්තුව තුළ මේ වනවිටත් බහුතර මන්ත්‍රීවරු සංඛ්‍යාවක් සිටින්නේ ශ්‍රී ලංකා පොදුජන පෙරමුණටයි. ආණ්ඩුවෙන් වෙන්වී දැනට පාර්ලිමේන්තුවේ ස්වාධීනව කටයුතු කරන විමල් වීරවංශ මන්ත්‍රීවරයා ප්‍රකාශ කරන ආකාරයට දැනට ආණ්ඩුව වශයෙන් කටයුතු කරන ශ්‍රී ලංකා පොදුජන පෙරමුණට ඇත්තේ මන්ත්‍රීවරුන් 103ක බලයක් පමණය. එම මන්ත්‍රීවරුන්ගෙන් 75කට වැඩි සංඛ්‍යාවක් 21 වන සංශෝධනයට විරුද්ධ වුවහොත් එම සංශෝධනය සඳහා පාර්ලිමේන්තුවේ තුනෙන් දෙකක් හෙවත් මන්ත්‍රීවරුන් 150කගේ සහාය ලබා ගැනීම අසීරු වනු ඇත.
ආණ්ඩුක්‍රම ව්‍යවස්ථා සංශෝධන ගෙන ඒමේදී පුද්ගලයන් ඉලක්ක කරගනිමින් දේශපාලන අරමුණු ඉටු කරගැනීමට යම් පාර්ශවයක් කටයුතු කරන්නේ නම් සිය පක්ෂය ඒ පිළිබඳව සාකච්ඡා කර තීරණයක් ගනු ඇති බවට ශ්‍රී ලංකා පොදු ජන පෙරමුණේ පාර්ලිමේන්තු මන්ත්‍රී මධුර විතානගේ පවසයි.
යෝජිත 21 වැනි ආණ්ඩුක්‍රම ව්‍යවස්ථා සංශෝධනය හරහා ද්විත්ව පුරවැසියන්ට පාර්ලිමේන්තුව නියෝජනය කිරීමට නොහැකි බවට වගන්තියක් ඇතුළත් නිසා එයින් බැසිල් රාජපක්ෂ මහතාට පාර්ලිමේන්තු මන්ත්‍රීධූරය අත් හැරීමමට සිදුවේදැයි අප විමසූ විට මන්ත්‍රීවරයා ඒ බව පැවසුවේ ය.
ඊට අමතරව විවිධ කොමිෂන් සභා හරහා කාලය නාස්ති කිරීමක් සිදු නොකර සෘජුව නීතිය ක්‍රියාත්මක කළ හැකි සංශෝධනයක් ගෙන ආ යුතු බවත් ඔහු පැවසුවේ ය.
ජනාධිපතිවරයා එක් තීරණයකත් අගමැතිවරයා තවත් තීරණයකත් සිටිය හැකි දෙපැත්තට අදින සංශෝධන මේ මොහොතේ ගෙන නොආ යුතු බවට ද ඔහු වැඩි දුරටත් පැවසුවේ ය.
එම ව්‍යවස්ථා සංශෝධන ලියවිල්ල තමාට ලැබුණේ මැයි 26 දින බවත් ඉදිරියේ දී පක්ෂය සමග සාකච්ඡා කර එයට සහය දෙන්නේ දැයි තීරණය කරන බවත් ඔහු පැවසුවේ ය.
අප කළ විමසීමක දී පාර්ලිමේන්තු මන්ත්‍රී පියල් නිශාන්ත ද පැවසුවේ ඒ පිළිබඳව තවමත් ශ්‍රී ලංකා පොදුජන පෙරමුණේ මන්ත්‍රීවරුන් අතර සාකච්ඡාවක් නොපැවැත්වුණු බවයි.
මේ තත්වය අනුව දැනට විපක්ෂය ලෙස නිල වශයෙන් කටයුතු කරන මන්ත්‍රීවරුන්ගේත්, ස්වාධීන වී ආණ්ඩුවට එක්වී නැති මන්ත්‍රීවරුන්ගෙත් සහාය ලබා ගැනීමට අමතරව ශ්‍රී ලංකා පොදුජන පෙරමුණේ මන්ත්‍රීවරුන් 25කට අධික සංඛ්‍යාවක සහාය ලබා ගැනීමට සිදුවේ.■
