20.6 C
Sri Lanka
6 October,2022

ඉන්ධන නැතිව රාජ්‍ය සේවයත් කප්පාදු කරන රටේ යුද හමුදාවේ ඉහළ නිලධාරීන්ට නාස්තිකාර වාහන සැප

Must read

■ වර්ෂයකට ඉන්ධන ලීටර් 2,703,520ක්
■ කාර් කුලිය මිලියන 1330ක්
■ දරුවන්ට පාසල් යන්න, මැඩම්ට මාර්කටින් යන්න හමුදාවෙන් වාහන, රියැදුරු සමග සහායක

රට තුළ පවතින ඉන්ධන අර්බුදය හේතුවෙන් ඉන්ධන පාවිච්චිය අඩුකර ගැනීම සඳහා පසුගිය මැයි 20 වැනිදා අත්‍යවශ්‍ය රාජ්‍ය සේවකයින් හැර අනෙකුත් රාජ්‍ය සේවකයින් සේවයට නොකැඳවන්නැයි රාජ්‍ය ආයතනවලට උපදෙස් ලැබුණි. ඒ අනුව බොහෝ රාජ්‍ය සේවකයින්ට එදින නිවාඩු දිනයක් බවට පත්වූ අතර පාසල්වලට පවා නිවාඩු දෙනු ලැබීය. මෙම ඉන්ධන අර්බුදය හමුවේ රජයේ අවධානය යොමු වී ඇත්තේද කාර්යාලවලට කැඳවිය යුතු අත්‍යවශ්‍ය රාජ්‍ය සේවකයින් පමණක් කැඳවා ඉතිරි රාජ්‍ය සේවකයින්ට නිවසේ සිට රාජකාරි කිරීමට අවස්ථාව සලසා දීමටය. පොදු ප්‍රවාහනයේ ගමනාගමනයේ යෙදෙන ලෙස ජනතාවගෙන් ඉල්ලා සිටීම, පෞද්ගලික වාහනවල එක් අයකු පමණක් ගමන් නොකරන ලෙස ඉල්ලීම් කිරීම ආදිය රජය පාර්ශ්වයෙන් මේ වනවිට කෙරී ඇත.


මහමඟ යනෙන විට පෙනෙන දිගු ඉන්ධන පෝලිම්වලට හේතු වූ සත්‍යය හා මේ ඉල්ලීම් හා කරුණු කාරණාවලින් පෙනෙන්නේ රට තුළ ඇතිවී ඇති ඉන්ධන අර්බුදයේ භයංකර තත්වය මිස වෙනකක් නොවේ. මහමඟදී දුටුවහොත් යම් ප්‍රවාහන පහසුකමක් ලබාදෙන ලෙස මේ දිනවල ආරම්භ වී ඇති අපොස සාමාන්‍ය පෙළ විභාගයට පෙනී සිටින ශිෂ්‍ය ශිෂ්‍යාවන් වෙනුවෙන් කර ඇති ඉල්ලීමෙන්ද පෙනෙන්නේද ඉන්ධන අර්බුදයේ ඇති භයානක ස්වරූපයයි.


අප මේ මතු කරන්නට යන කරුණද එම ඉන්ධන අර්බුදයට සම්බන්ධ කරුණකි. ඊට අදාළ කරුණු ගෙනහැර දැක්වීමට පෙර එහි ප්‍රවේශයට අදාළ කරුණක් ගැන කීවොත් මෙසේය.
රටේ උතුරු හා නැගෙනහිර පළාත්වල දශක කිහිපයක් තිස්සේ පැවති යුද්ධය අවසන් කිරීමේ ආණ්ඩුවේ විජයග්‍රහණයේ සැමරුම පැවැත්වූයේ පසුගිය මැයි 19 වැනිදාය. ඊට සමගාමීව යුද හමුදාපතිවරයා විසින් නිවේදනය කරනු ලැබූයේ එම යුද ජයග්‍රහණයේ සැමරුම වෙනුවෙන් යුද හමුදා නිලධාරීන් 396 දෙනෙකුට හා සෙසු නිලයන් 8110කට මැයි 18 සිට ක්‍රියාත්මක වන පරිදි උසස්වීම් ලබාදුන් බවය.


උසස් වීම් ලබාදීමේදී යුද හමුදා නිලධාරීන් සම්බන්ධයෙන් ඔවුන්ට අධිකාරි ලත් පත්වීම් ලබාදෙන ජනාධිපතිවරයා සෘජුවම එම උසස් කිරීම් සිදුකරන අතර සෙසු නිලයන් සම්බන්ධයෙන් ජනාධිපතිවරයාගෙන් විමසා යුද හමුදාපතිවරයා එම උසස් වීම් ලබාදීම සිදුකරයි. අප මෙහිදී මතු කරන අතුරු කාරණයක් වන්නේ යුද හමුදාපතිවරයා මෙවර මෙන්ම මීට පෙරද ධුරයට පත්වීමෙන් පසු ලබාදුන් උසස්වීම් නීත්‍යනුකූලද යන්නයි. ඒ සඳහා හේතුව වන්නේ වයස අවුරුදු 55 සම්පූර්ණ වීමෙන් පසු හිටපු ජනාධිපති මෛත්‍රීපාල සිරිසේන මෙන්ම වත්මන් ජනාධිපති ගෝඨාභය රාජපක්ෂ ඔහුට ලබා දුන්නා යැයි කියන සේවා දීර්ඝවලට අදාළ කිසිදු ගැසට් පත්‍රයක් සොයා ගැනීමට නොහැකි නිසාය. ඔහුගේ ධුරයේ රැඳී සිටීම ඒ අනුව නීත්‍යනුකූලදැයි ප්‍රශ්න කරමින් අපි මීට පෙර වාර්තා කළෙමු.


ඊට අමතරව ඔහුගේ සේවා දීර්ඝයන්ට අදාළ ගැසට් නිවේදනවල විස්තර ඉල්ලමින් ලියුම්කරු පෞද්ගලිකවම තොරතුරු දැන ගැනීමේ අයිතිවාසිකම් පනත යටතේ යොමු කරන ලද ඉල්ලීම්වලට මෙතෙක් ලැබී ඇත්තේ සාර්ථක පිළිතුරු නොවේ. එම තොරතුරු ඉල්ලා යුද හමුදාවට, ආරක්ෂක අමාත්‍යාංශයට හා ජනාධිපති කාර්යාලයට ඉල්ලීම් ඉදිරිපත් කළද ඉල්ලීම ලැබුණ බවට පිළිතුරක් හෝ ලැබුණේ යුද හමුදාවෙන් හා ජනාධිපති කාර්යාලයෙන් පමණය. යුද හමුදාව අපගේ 2022 අප්‍රේල් 14 දින ඊමේල් මගින් යොමු කරන ලද තොරතුරු ඉල්ලීමට අප්‍රේල් 21 දින සහිතව (ලිපිය ලැබුණේ ඊට දින ගණනාවකට පසුය. එම ලිපියේ ලියාපදිංචි කරන ලද දිනය ඇත්තේ අපේ්්‍රල් 25 ලෙසය.) පිළිතුරක් ලබාදෙමින් සඳහන් කර ඇත්තේ තොරතුරු ඉල්ලීම ලැබුණ බව හා ඒ සම්බන්ධයෙන් වූ ඉදිරි පියවර දින 14ක කාලයක් තුළ අපට දන්වන බවයි. මේ ලිපිය ලියන මැයි මස 25 දින වනවිටත් එම දින 14ක කාලය යුද හමුදාවට උදාවී නැත.


එමෙන්ම ජනාධිපති කාර්යාලයද අපගේ තොරතුරු ඉල්ලීමට අප්‍රේල් 22 දින සහිතව පිළිතුරක් එවමින් සඳහන් කර ඇත්තේද දින 14ක කාලයකදී එම තොරතුරු ඉල්ලීම සම්බන්ධයෙන් ඉදිරි පියවර දැනුම් දෙන බවය. යුද හමුදාවට මෙන්ම ජනාධිපති කාර්යාලයටද තවම දින 14ක කාලය උදාවී නැත.


පිළිතුරු තිබේ නම්, හෙවත් යුද හමුදාපති ශවේන්ද්‍ර සිල්වාගේ සේවා දිගුවලට අදාළ ගැසට් නිවේදන පිළිබඳ තොරතුරු තිබේ නම් මේ තරම් කල් ඇදීමේ හෝ තොරතුරු ලබා නොදීමේ වුවමනාවක් එම ආයතනවලට ඇති වන්නේ නැති බව පැහැදිලිය.


ඉහත සඳහන් කළ පරිදි ඉන්ධන අර්බුදය සමඟ සාකච්ඡා කිරීමට අදාළ කරුණට යළි පිවිසුණහොත් එය මේ ආකාරයට පැහැදිලි කළ හැකිය.


යුද හමුදාව එහි පළමු ශ්‍රේණියට පත්වන නිලධාරීන් සඳහා වාහන පහසුකමක් හෙවත් කාරයක් ලබාදීම සිදුකරයි. ඒ රියැදුරකු හා සහායකයකුද සමඟය. යුද හමුදාව තුළ අනුගමනය කරන ක්‍රමවේදය අනුව ලුතිනන් කර්නල් නිලයට පත්වන නිලධාරීන් පළමු ශ්‍රේණියට පක්වන අතර ඊට අමතරව ඊට පහළින් ඇති මේජර් නිලයේ ජ්‍යෙෂ්ඨ නිලධාරීහු කිහිප දෙනෙක්ද පළමු ශ්‍රේණියට සුදුසුකම් ලබති. මේ පහසුකම ගුවන් හමුදාවේ මෙන්ම නාවික හමුදාවේද අනුගමනය කරන්නක් වන අතර එය වැරදි හෝ එපා යැයි අප කියන්නේ නැත.


එහෙත් අප කියන්නට යන කරුණ වන්නේ ගුවන් හමුදාවේ හා නාවික හමුදාවේ නොවන ආකාරයට යුද හමුදාවේ මෙම තත්වයට පත්වන නිලධාරීන් එම පහසුකම අවභාවිත කරමින් සිටින බවයි. එම අවභාවිතය සිදුවන්නේ එකී කාරය සමඟ රියැදුරු හා සහායක පහසුකම් ලබාගනිමින්ම යුද හමුදා වාහන සංචිතයේ ඇති වාහනයක්ද පළමු ශ්‍රේණියට පත්වූ නිලධාරීන් අති බහුතරය භාවිත කිරීම මගින්ය. එම අතිරේක වාහනය බොහෝ විට ඔවුන් අනුයුක්ත රෙජිමේන්තුව හෝ හමුදා මූලස්ථානයෙන් ලබා ගන්නක් වන අතර ඒ සඳහාද රියැදුරකු හා සහායකයකු ලබා ගැනීම සිදුකරයි. මෙය පසුගිය යුද්ධයත් සමඟ ඇති වී ඇති තත්වයක් වන අතර එම නිලධාරීන්ට ලබාදෙන කාරයට අදාළ රාජකාරි කටයුතු යුද හමුදාව තුළ හාස්‍යයෙන් හඳුන්වන්නේ ‘ ‘ස්කූල් ඩීටේල්’ හා ‘මැඩම්ගේ මාර්කටින් ඩීටේල්’ වශයෙන්ය. එහි තේරුම වන්නේ එම කාර් එම නිලධාරීන්ගේ ළමයින්ගේ පාසල් කටයුතු සඳහා හා බිරින්දෑවරුන්ගේ කටයුතුවලට භාවිත කරන බවය. ඒ අනුව එම කාර්වල රියැදුරාට හා සහායකට සිදුවන්නේ නිලධාරියාගේ පවුලේ එකී කටයුතු සිදුකිරීමටය. නිලධාරියාට ඔහුට ලබාදුන් කාරය නැතිවීම ප්‍රශ්නයක් නොවේ. මන්ද ඔහු යුද හමුදා වාහන සංචිතයේ ඇති ජීප් හෝ කැබ් රථයක් තවත් රියැදුරකු හා සහායකයකු සමඟ භාවිත කරන බැවිනි.


මේ කාරයක් වෙනුවෙන් මාසිකව රුපියල් ලක්ෂයක පමණ මුදලක් කුලී වශයෙන් ලබාදෙන අතර එකී නිලධාරීන් ඔවුන්ගේ කාර්ම ඒ සඳහා භාවිත කරති. ඊට අමතරව මෙම කාරයක් සඳහා කාර්තුවකට හෙවත් මාස තුනක කාලයකට ඉන්ධන ලීටර් 610ක් ලබාදෙයි.


2022 වසර ආරම්භ වනවිට යුද හමුදාවේ ජ්‍යෙෂ්ඨත්ව ලැයිස්තුව අනුව යුද හමුදාපතිවරයාගේ සිට ලුතිනන් කර්නල් නිලය දක්වා සිටින නිලධාරීන් ගණන 1108කි. ඒ ජෙනරාල්වරයකු වශයෙන් යුද හමුදාපතිවරයා හැරුණු විට මේජර් ජෙනරාල්වරු 56ක්, බි්‍රගේඩියර්වරු 181ක්, තාවකාලික බි්‍රගේඩියර්වරු 37ක්, කර්නල්වරු 98ක්, තාවකාලික කර්නල්වරු 149ක්, ලුතිනන් කර්නල්වරු 522ක් හා තාවකාලික ලුතිනන් කර්නල්වරු 64ක් වශයෙන්ය. මේ සියල්ලෝම හමුදාවේ පළමු ශ්‍රේණියට ජ්‍යෙෂ්ඨත්වය ලැබූවෝය. මීට අමතරව තවත් ජ්‍යෙෂ්ඨ මේජර්වරු පිරිසක්ද ඒ අතර සිටිති. ඉහත සඳහන් කළ නිලධාරීන්ගේ උසස්වීම්, යම් නිලධාරීන් පිරිසක් විශ්‍රාම යෑමේද සම්භාවිතාවක් තිබෙන බැවින් අමතක කර, ගණනයේ පහසුව සඳහා ඉහළ සිට පහළට ලුතිනන් කර්නල් දක්වා වූ පළමු ශ්‍රේණියේ නිලධාරීන් සංඛ්‍යාව ගත් කල ඔවුන්ගේ කාර් වෙනුවෙන් (පෞද්ගලික පරිහරණයට) වර්ෂයකට ලබාදෙන ඉන්ධන ලීටර් ප්‍රමාණය 2,703,520කි. එය පෙට්‍රල් මෙටි්‍රක් ටොන් 1946ක් පමණ වේ. වර්තමාන පෙට්‍රල් ලීටරයක මිල වන රුපියල් 420 සමඟ සැසැඳීමේදී ඒ සඳහා වැයවන මූල්‍ය පිරිවැය ආසන්න වශයෙන් රුපියල් මිලියන 1135කි.


මැයි මාසයේ රාජ්‍ය සේවකයින්ට වැටුප් ගෙවීමට මුදල් අච්චු ගසන්නට සිදුවේ යැයි අගමැති රනිල් වික්‍රමසිංහ කියූ ආකාරයේ රටේ ඇති මූල්‍ය අර්බුදය සමඟ ගත්කල, මේ එක් කාරයක් වෙනුවෙන් මාසයකට රුපියල් ලක්ෂයක් කුලී වශයෙන් වැය කිරීම ගණනය කළ විට, ඒ සඳහා වර්ෂයකට ආසන්න වශයෙන් රුපියල් මිලියන 1330ක මුදලක් වැයවේ. ඊට අමතරව මේ පෞද්ගලික පරිහරණයට ගන්නා කාර් වෙනුවෙන් යොදවන රියැදුරා හා සහායකගේ වැටුප් සඳහා වැයවන වියදමද අප ගණනය කළ යුතුය. සාමාන්‍යයෙන් නිල ඇඳුම් දීමනා නොමැතිව මේ එක් අයකුට රුපියල් 75,000ක පමණ මුදලක් ලැබෙන බව වාර්තාවන අතර ඒ අනුව දෙදෙනාගේම ගෙවීම්වල එකතුව රුපියල් 150,000කි. එම රියැදුරන්ගේ හා සහායකයින්ගේ වැටුප් සඳහා වාර්ෂිකව වැයවන මුදල ආසන්න වශයෙන් රුපියල් මිලියන 1994කි. යුද හමුදාවේ පළමු ශ්‍රේණියේ නිලධාරීන්ගේ කාර් අවභාවිතය නිසා ඒ අනුව නාස්තිවන මුදල ආසන්න වශයෙන් රුපියල් මිලියන 4459කි.


මේ රටකට දරාගත නොහැකි මට්ටමේ හමුදාවක් නඩත්තු කරමින් එහි එක් අවභාවිතයක් වෙනුවෙන් අප කරගෙන ඇති දේය. ඉන්ධන ප්‍රශ්නයට විසඳුම් වශයෙනුත් රටේ මූල්‍ය ප්‍රශ්නයට විසඳුම් වශයෙනුත් අවශ්‍ය නම් ඉහත පෙන්වා දුන් කරුණ සම්බන්ධයෙන් පියවරක් ගෙන ජනාධිපතිවරයාටත් යුද හමුදාපතිවරයාටත් රටට ආදර්ශයක් ලබාදිය හැකිය.


මන්ද රටට දරාගත නොහැකි තරමට වැඩි වී ඇති රාජ්‍ය සේවය හා අර්ධ රාජ්‍ය සේවය ගැන අප කතා කළද එසේ දරාගත නොහැකි යුද හමුදාව ගැන අප කතා නොකරන හෙයිනි.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි