28.3 C
Sri Lanka
30 June,2022

ගෝල්ෆේස් මැර ප්‍රහාරය සැලසුමකි

Must read

■ මහින්ද, ගෝඨාභයද දැනුවත්?
■ ශවේන්ද්‍ර, හමුදාව දැනුවත්?

තමාව තවදුරටත් අගමැති ධුරයේ තබා ගැනීම සඳහා මැයි 09 වැනිදා අරලිය ගහ මන්දිරයට කැඳවූ රැස්වීමේත්, එම රැස්වීමට පැමිණි පිරිස් අරලිය ගහ මන්දිරය අසල මයිනා ගෝගමට පහරදීමේ හා ගෝල්ෆේස්හි ගෝටා ගෝ ගමට පහරදීමේ සිද්ධියේත් නිර්මාතෘවරයා මහින්ද රාජපක්ෂ බව දැන් ඉතිහාසයට එක්වී හමාරය.


එම මැර ප්‍රහාරයන් සම්බන්ධයෙන් වූ දීර්ඝ විස්තර කිරීම් අප පුවත්පතේ වෙනත් විශේෂාංග ලිපිවල සඳහන් වනු ඇත. මෙම ලිපියේදී අවධානය යොමු කරන්නේ එම මැර ප්‍රහාරයේ වගකීම මහින්ද රාජපක්ෂට පමණක් බැරවනවාද නැද්ද යන්න හා එම වගකීම බැරවිය යුතු තවත් පුද්ගලයින් සිටියාද යන්න හා එම පුද්ගලයින් කවුද යන්න ගැන සාකච්ඡා කිරීමය. එසේම එම මැර ප්‍රහාරය සැළසුම් සහගතද යන්න හා ඒ පිළිබඳ දැන සිටි පුද්ගලයින් සිටියාද යන්න සාකච්ඡා කිරීමය.


අපට ලැබී ඇති තොරතුරු අනුව හා මෙම සිදුවීම පෙළගැසුණු ආකාරය අනුවද මෙම නින්දිත මැර ප්‍රහාරය සැළසුම් සහගත එකකි. ඒ පිළිබඳව පොලීසියේ ප්‍රධානීන් මෙන්ම ආරක්ෂක අංශ ප්‍රධානීන්ද දැන සිට ඇත. ඒ අනුව ජනාධිපතිවරයාද මේ පිළිබඳව දැන සිට ඇති බව බැහැර කළ නොහැකිය.


මහින්ද රාජපක්ෂ සිය පාක්ෂිකයින්ගේ බලවත් ඉල්ලීම මත අගමැති තනතුරෙන් ඉවත් නොවීම, එසේ ඉවත් නොවන්නැයි ඔහුට බල කි්රීම සඳහා අරලිය ගහ මන්දිරයට සංවිධානාත්මකව පිරිස් කැඳවීම, එසේ කැඳවූ පිරිස් වෙනුවෙන් නායකත්වය ලබාදුන් පිරිස් එම කැඳවීම් දිනයට පෙර හා එදින කළ ප්‍රකාශ, ඒ සම්බන්ධයෙන් පොලීසියේ හැසිරීම මේ සඳහා අපට පෙන්වාදිය හැකි කරුණුය. එසේ අප කියන්නේ පහත පෙළ ගස්වන තොරතුරු අනුවය.


මහින්ද රාජපක්ෂ කැඳවූ මෙම රැස්වීමට පෙරම එහි කැඳවුම්කරුවන් කියා සිටියේ උද්ඝෝෂකයින්ට මහින්ද රාජපක්ෂට හෝ ගෝඨාභය රාජපක්ෂට ගෙදර යන්නැයි කියන්නට බැරි බවය. 69 ලක්ෂයේ ජනවරම තවමත් අහෝසි නැති බවත්, අවශ්‍ය නම් 69 ලක්ෂය පාරට ගෙනැවිත් උද්ඝෝෂණකරුවන්ට එරෙහිව පෙන්විය හැකි බවත්ය. සරළව ඔවුන් කීවේ එම රැස්වීම කැඳවූ දිනයේ මහින්ද රාජපක්ෂ වෙනුවෙන් පැමිණෙන පිරිස් සමඟ ගොස් ගෝල්ෆේස්හි එම බලය පෙන්වන බවය.


ඒ අනුව ඉහතින් සඳහන් කළ මෙම මැර ප්‍රහාරකයින්ගේ අදහස් දැක්වීම් පොලීසිය නොදන්නා වූ රහසක් නොවීය. ඒ තුළ එක් පැහැදිලි දෙයක් තිබුණි. ඒ ගෝල්ෆේස් සාමකාමී විරෝධතා කරුවන්ට මෙම මැර පිරිස් වෙතින් යම් ප්‍රහාරයක් එල්ල විය හැකි බවය. නැතහොත් එම මැරයන් ගෝල්ෆේස් යෑමෙන් යම් ගැටුමක් ඇතිවිය හැකි බවය. එවන් ගැටුමක් නැවැත්වීමට පොලීසියට කළ හැකිව තිබුණ එක් සරළ කාර්යක්ව තිබුණේ ඒ සම්බන්ධයෙන් අධිකරණයට කරුණු වාර්තා කර එම මැරයින් ගෝල්ෆේස් වෙත පැමිණිම වැළැක්වීමට නියෝගයක් ලබා ගැනීමය. එහෙත් ආණ්ඩුවට එරෙහි විරෝධතාවලදී මෙන් පොලීසිය එය කළේ නැත. එමෙන්ම ගෝල්ෆේස් වෙත එම මැරයින් ඇතුල්වීමට පෙර එම මැරයින් ලෙහෙසියෙන් වැළැක්වීමට තිබූ ගෝල්ෆේස් වටරවුම අසලින් ඔවුන් නැවැත්වීමට කටයුතු කළේද නැත. ගෝල්ෆේස් වෙත ඉතා පහසුවෙන් එම මැරයින්ට ඇතුල්වීමට ඉඩදී සාමකාමී විරෝධතාකරුවන්ට පහරදීමට ඉඩ සැළැස්වූයේය. ඉස්තාලය හැර දැමුවාට පසු අවසානයේ පොලීසියේ කදුළු ගෑස් හා ජල ප්‍රහාර මුලින්ම හා වැඩියෙන්ම එල්ල වූයේ සාමකාමී විරෝධතාකරුවන්ටය. අඩුවේ මැර ප්‍රහාරකයින්ට කඳුළු ගෑස් හා ජල ප්‍රහාර එල්ල වූයේ දෙවන අවස්ථාවේ හා අඩුවෙන්ය.


මෙවැනි හැසිරීමක් පොලීසිය නිකම් රඟදක්වන්නේ නැත, ඔවුන් එසේ රඟ දැක්වීම් කරන්නේ ඉහළ අණ අනුවය. පොලිස්පති ගැන අපි දනිමු, ඔහු රාජපක්ෂවරුන්ගේ අණ ක්‍රියාත්මක කරන්නෙක් පමණය. පොලීසිය බාර ඇමතිවරයා ලෙස කටයුතු කළ ප්‍රසන්න රණතුංග ගැනද අපි දනිමු. ඔහු රාජපක්ෂලාගේ සෙරෙප්පු සුප් පවා බොන්නට සූදානම් බැතිමතෙකු පමණය. එම අමාත්‍යාංශය බාර ලේකම්වරයාද පරිපාලන නිළධාරියකු නොවන ජනාධිපතිවරයාගේ හිතේෂියකු වන ඔහු මෙන්ම ගජබා රෙජිමේන්තුවේ සිටි විශ්‍රාමික මේජර් ජෙනරාල් ජගත් අල්විස්ය. ඉතිං මේ කිසිවකුත් රාජපක්ෂලාට ඕනෑ ලෙස මිස නීතියට අනුව පොලීසිය මෙහෙයවන්නේ නැත. එය හොඳින්ම පෙන්නුම් කළේ රාජපක්ෂවරු වෙනුවෙන් ඇත්ත නැත්ත කිරීමටත් නැත්ත ඇත්ත කිරීමටත් නොපැකිළෙන බස්නාහිර ප්‍රදේශය බාර ජේෂ්ඨ නියෝජ්‍ය පොලිස්පති දේශබන්දු තෙන්නකෝන් මහින්ද රාජපක්ෂගේ එම නීති විරෝධී රැස්වීම අවසානයේ මැර ප්‍රහාරයට පෙර මැර ප්‍රහාරකයකු වූ පාර්ලිමේන්තු මන්ත්‍රී සනත් නිශාන්ත සමඟ සිටින ඡායාරූප පවා දක්නට ලැබීමේ තත්වය තුළය.


ඉහත සඳහන් කළ සිදුවීම් අනුව පෙනෙන්නේ පොලීසිය දැනුවත්ව මෙම මැර ප්‍රහාරයට ඉඩදුන් බවය. ඒ අනුව මෙම මැර ප්‍රහාර සැළසුම පොලීසියේ ප්‍රධානීන් දැන සිටි බව සැඟවිය නොහැකිය. එය තවත් සනාථ වන්නේ මෙම මැර ප්‍රහාර අවස්ථාවේදී රඹුක්කනදී එල්ල කළාමෙන් නොවුණත් අවම බලය වන බැටන් ප්‍රහාරයක්වත් මැරයින්ට එරෙහිව එල්ල කරන්නට පොලීසිය උත්සාහ නොදැරීමය.


ගෝල්ෆේහි ගෝටා ගෝ ගමත් ඒ අනුව යමින් රටපුරා ඇතිවෙමින් යන ගෝටා ගෝ හෝම් විරෝධතා ගම්මානත්, මහජනතාවගේ අනෙකුත් විරෝධතාත් පැවතියේ ජනාධිපතිවරයාට හිසරදයක් වෙමින්ය. පොලීසියට අමතරව ඔහුගේ හමුදා හිතේෂිවන්තයා වන අනුරාධපුරයේ ඥානක්කා හමුවීමට යන සගයාද වන යුද හමුදාපති ශවේන්ද්‍ර සිල්වා ඒ සඳහා පිඹුරුපත් සකසමින් සිටියේය. මුලින්ම යුද හමුදාපතිවරයාගේ අණ දීම යටතේ පවතින සීගිරියේ ස්ථාපිත කර තිබූ 53 වැනි සේනාංකයේ ගුවන් සංක්‍රමික බලඇණිය ඇතුළු එම සේනාංකයට සම්බන්ධ බලඇණි කිහිපයක් කොළඹට කැඳවනු ලැබීය. එවැනි කැඳවීමක් කිරීමේ විශේෂ වුවමනාවක් කොළඹ තිබුණේ නැත. රටේ සාමාන්‍ය තත්වයකදී රෙජිමේන්තුවක සූදානමින් තබන්නේ සමාජිකයින් 25-30 අතර ප්ලැටූනයක්ය. කොළඹ හා ඒ අවට හෝමාගම යන ප්‍රදේශවල ස්ථාපිත රෙජිමේන්තු ගත්කළ ඒ ආකාරයේ සූදානම්ව පවතින්නේ 300ක පමණ පිරිසක්ය. එහෙත් මේ වනවිට කොළඹින් පිට ස්ථාපිත කර ඇති රෙජිමේන්තුවල ප්ලැටූන්ද කැඳවා කොළඹ ආශ්‍රීතව 3500ක පමණ පිරිසක් සුදානම් තත්වයේ තබා ඇත. මේවා යුද හමුදාපතිවරයා සිදුකළේ නිකම් නොවේ. අවශ්‍ය අවස්ථාවලදී ජනාධිපතිවරයාගේ නියෝග අනුව කටයුතු කිරීමටය.


මේ සියලු කටයුතුවලට අවශ්‍ය පසුබිම සලසාදීම සඳහා ජනාධිපතිවරයා කිසිඳු පිළිගත හැකි හේතුවක් නොමැතිව හදිසි නීතිය පැනවූයේය. අපකියන්නට යන කතාවක් එන්නේ ඉන්පසුවය. කෝපායිහි යුද හමුදා ප්‍රජා මධ්‍යස්ථානය විවෘත කිරීම සිදුවී තිබුණේ මැයි 08 වැනිදාය. එදින එම උත්සවයේ ප්‍රධාන අමුත්තා වශයෙන් සහභාගි වී තිබුණේ යුද හමුදාපති ශවේන්ද්‍ර සිල්වාය. එම උත්සවයෙන් පසු යාපනය ආරක්ෂක සේනා මූලස්ථානයේදී රාත්‍රි සාදයක් පැවැත්වී ඇත. ඒ සඳහා යාපනය ආරක්ෂක සේනා ආඥාපති මේජර් ජෙනරාල් සෙනරත් යාපා, 51 වැනි සේනාංකාධිපති මේජර් ජෙනරාල් චන්දන වික්‍රමසිංහ ඇතුළු ඉහළ හමුදා නිලධාරීන් පිරිසක් සහභාගි වී ඇත. එහිදී සිය හමුදා නිලධාරීන් සමඟ රටේ පවතින වත්මන් විරෝධතා ව්‍යාපාර ගැන අදහස් දක්වමින් යුද හමුදාපති ශවේන්ද්‍ර සිල්වා විශ්වාශයෙන් කියා ඇත්තේ ඉදිරි දින කිහිපයේදී විරෝධතා සියල්ල අවසන් කරන බවය. එසේ විරෝධතා අවසන් කිරීමේ සැළසුම වී තිබුණේ ගෝල්ෆේස් මැර ප්‍රහාරයෙන් පසු හදිසි නීතිය යටතේ හමුදාව මැදිහත් වී සියලු විරෝධතා ස්ථාන ඉවත් කිරීමද? එහෙත් ජනාධිපතිවරයා, යුද හමුදාපතිවරයා ඇතුළු ඒ සඳහා තීරණ ගත් පිරිසේ ගණන් බැලීම් නිවැරදි නොවුණු කිසා එය ව්‍යාර්ථ වී ගියේද? රටපුරා ජනතාවගේ ප්‍රතිවිරුද්ධ ප්‍රතිචාරය ඊට වඩා බලවත් වීමෙන් තීරණය හකුලා ගන්නට ඔවුන්ට සිදුවීද?


මැයි 09 වැනිදා ගෝල්ෆේස් මැර ප්‍රහාරයෙන් පසු එම සැළසුමට අදාල තවත් කරුණක් අපට පෙන්වනු ලැබුයේ ශ්‍රී ලංකා පොලීසියේ එස්ටීඑෆ් සෙබළුන්ට අමතරව ගජබා රෙජිමේන්තුව නියෝජනය කරන හමුදාපති ශවේන්ද්‍ර සිල්වාගේ සෘජු අණ යටතේ ක්‍රියාකරන සීගිරියේ සිට කොළඹට කැඳවනු ලැබූ ගුවන් සංක්‍රමික බලඇණියේ සෙබළුන් ගෝල්ෆේස් වෙත කැඳවීමය. කොළඹට සම්බන්ධ රෙජිමේන්තුවල සූදානම් තත්වයේ සාමාන්‍ය ලෙස තබා ඇති ප්ලැටූන් ඕනෑ තරම් තිබියදී ගුවනින් ගොස් ගොඩබැස විශේෂ මෙහෙයුම් සිදුකරන එම බලඇණිය එහි කැඳවූයේ ඇයිද යන්න ප්‍රශ්නයකි.


යාපනයේ එම රාත්‍රී උත්සවයට පෙර ආරක්ෂක අමාත්‍යාංශයේදී මෙම විරෝධතා අවසන් කරන්නේ හෝ මර්ධනය කරන්නේ කෙසේද යන්න පිළිබඳ සාකච්ඡාවක් පැවැත්වී ඇති අතර එහිදී යුද හමුදාවේ ප්‍රධාන මාණ්ඩලික ශාඛාවේ අධ්‍යක්ෂ ජනරාල් මේජර් ජෙනරාල් නිශාන්ත මානගේ ප්‍රකාශ කර ඇත්තේ විරෝධතාකරුවන්ට එල්ල කරන ජල ප්‍රහාර සඳහා කළවම් කර පහර දීමට පොලිස් ජල ප්‍රහාර රථවලට අසූචි බවිසර් ලබාදිය හැකි බවය. එම මේජර් ජෙනරාල්වරයාව එම අදහස් දැක්වීමත් සමඟම වැදගත් වන්නේ ඊට දින කිහිපයකට පෙර රටපුරා ප්‍රදේශ බාරව කටයුතු කරන මේජර් ජෙනරාල්වරුන්ට ඔහු ලබාදී ඇති උපදෙසක් නිසාය. ඔහු ප්‍රදේශබාරව කටයුතු කරන මේජර් ජෙනරාල්නරුන්ට දැනුම් දී තිබුණේ විරෝධතා සම්බන්ධයෙන් පොලීසිය ආණ්ඩුව ලබාදෙන නියෝග ක්‍රියාත්මක නොකරන බැවින් එම විරෝධතා සම්බන්ධයෙන් කටයුතු කිරීමට ඒ ඒ ප්‍රදේශවල හමුදාව සූදානමින් තබන ලෙසය. ආණ්ඩුවේ නියෝග පොලීසිය පිළිනොපදින්නේ ආණ්ඩු පෙරළියක් සිදුවේ යැයි අනුමාන කිරීම නිසා බැවින් එසේ හමුදාවට නියෝග ලබාදීම සිදුවී ඇත.


යුද හමුදාව යනු ආරක්ෂක අමාත්‍යාංශය යටතේ පවතින්නකි. එම අමාත්‍යාංශයේ ලේම්වරයාද පරිපාලන නිලධාරියකු නොවන ජනාධිපතිවරයා බලයට පත්කිරීමට රට වටේ රැස්වීම් පවත්වාගෙන ගිය ගජබා රෙජිමේන්තුව නියෝජනය කළ විශ්‍රාමික ජෙනරාල් කමල් ගුණරත්නය. ආරක්ෂක ඇමතිවරයා ජනාධිපතිවරයාය. ජනාධිපතිවරයා නොදැනුවත්ව ඉහත සඳහන් කළ ආකාරයේ සැළසුම් කතා කීමේ හා නියෝග නිකුත් කිරීමේ හැකියාවක් හමුදාපතිවරයාට හෝ යුද හමුදාවට තිබිය නොහැකිය.


ඒ නිසා මැයි 09 වැනිදා සිදුවූ ගෝල්ෆේ මැර ප්‍රහාරය වූ කලී හුදු මහින්ද රාජපක්ෂගේ නිර්මාණයක් පමණක් නොවේ. එය ජනාධිපතිවරයා ඇතුළු රාජපක්ෂ කල්ලියේ නිර්මාණයකි. සිදුවුණේ එම නිර්මාණ සැළසුම ජනතාවගේ ප්‍රතික්‍රියාව මිලිටරි බලයටත් යටකිරීමට නොහැකි තරමට උත්සන්න වීම නිසා ව්‍යාර්ථ වී යෑමය. ඒ නිසා අප තේරුම්ගත යුතු සත්‍යය වන්නේ ජනතා විරෝධතානලට එරෙහි එවැනි නිර්මාණාත්මක සැළසුම් යුද හමුදාපතිවරයාගේද දායකත්වයෙන් වෙනත් ස්වරූපවලින් යළි කරලියට පැමිණිය හැකි බවය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි