20.9 C
Sri Lanka
3 October,2022

රාජපක්ෂවරුන් ගෙදර යෑමෙන් තොර විසඳුමක් නැත

Must read

■ පුරවැසියා

රටේ භාවිතයට ගත හැකි විදේශ විනිමය සංචිතය ඇමරිකානු ඩොලර් මිලියන 50ක් වැනි සොච්චම් අගයකට වැටී ඇති බව මුදල් අමාත්‍ය අලි සබ්රි මැයි 04 වැනිදා පාර්ලිමේන්තුවේදී ප්‍රකාශ කර ඇත. මේ වූ කලී රටක් වශයෙන් ගත්කළ ඉතාම ශෝචනීය තත්වයකි. රට තවදුරටත් ඉදිරියට යන්නේ කෙසේද යන්න පිළිබඳ භයානක අනතුරු ඇඟවීමකි. ඩොලර් මිලියන 50ක් වැනි දෙයකින් කළ හැක්කේ ප්‍රමාද ගාස්තු ගෙවීමට සිදුනොවන යම් ගෑස් ආනයනයක් වැනි සුළු දෙයක් කර ගැනීම පමණය. වත්මන් තත්වය අනුව එම මුදලින් සතියකට සරිලන ඉන්ධන තොගයක්වත් ගෙන්වාගත නොහැකිය. ඉන්දීය ණය ආධාර යටතේ ලබාදෙන ඉන්ධන හා බෙහෙත් අවසන් වූ පසු හා චීනය ඇතුළු තවත් රටවල් ලබාදෙනවා යැයි කියන සහනාධාර අවසන් වූ පසු රටට අත්විය හැකි ඉරණම සිතා ගැනීමට පවා අපහසුය. ඒ අනුව අප ඉදිරියේ ඇත්තේ දරුණු ආහාර හා අත්‍යවශ්‍ය භාණ්ඩ හිඟයක් ඇතිවී ජනතාව එම අවශ්‍යතා සපුරා ගැනීම සඳහා කෙසේ හැසිරේදැයි අනුමාන කළ නොහැකි තත්වයකි.


ආර්ථික වශයෙන් රටේ තත්වය එසේ වුවද දේශපාලනික වශයෙන් රටේ තත්වයේ වෙනසක් වන අයුරක් මෙතෙක් දක්නට නැත. ආණ්ඩුවෙන් ස්වාධීන වූ ශ්‍රී ලංකා නිදහස් පක්ෂය හා අනිකුත් පක්ෂ ජනාධිපතිවරයා සමඟ අන්තර්වාර පාලනයක් සඳහා සාකච්ඡා කළ බව කීවද එහි ප්‍රතිඵලයක් මෙතෙක් නැත. විපක්ෂයේ සිටින පක්ෂවලටද ජනාධිපතිවරයා සර්ව පාක්ෂික ආණ්ඩුවකට ආරාධනා කිරීමේ සාකච්ඡාවක් ලබාදී නැත. එමෙන්ම ආණ්ඩුවෙන් ස්වාධීන වූ කණ්ඩායම හා විපක්ෂයේ ප්‍රධාන පක්ෂය වූ සමගි ජන බලවේගයේ යම් කණ්ඩායමක් අතර සභාග හෝ අන්තර්වාර පාලනයක් ගැන සාකච්ඡා කළා යැයි කීවද එහිත් ප්‍රතිඵලයක් නැත. තවද අගමැති මහින්ද රාජපක්ෂ ඇතුළු කැබිනට් මණ්ඩලය ඉවත් වී අන්තර්වාර පාලනයකට ඉඩ දෙනවා යැයි කීවද එය සිදුවන පාටක්ද පෙනෙන්නට නැත. අගමැතිවරයා ප්‍රසිද්ධියේම කියන්නේ ජනාධිපතිවරයා ඔහුට ඉල්ලා අස්වන ලෙස දැනුම් දී නැති බව හා එසේ ඉල්ලා අස්වන ලෙස දැනුම් නොදෙනු ඇති බවයි. එමෙන්ම ඔහු තවත් විටෙක කියන්නේ පාර්ලිමේන්තුවේ බහුතර බලය පෙන්වා ඔහුව ඉවත්කර පෙන්වන ලෙසයි. වත්මන් ආණ්ඩුවේ සභානායක දිනේෂ් ගුණවර්ධන මැයි 04 දින පාර්ලිමේන්තුවේදී කියා ඇත්තේ මහින්ද රාජපක්ෂ අගමැති ධුරයෙන් ඉල්ලා අස්නොවන බවයි. මහානායක හිමිවරු ජනාධිපතිවරයාගෙන් ඉල්ලා තිබෙන්නේ අගමැතිවරයා ප්‍රමුඛ ආණ්ඩුව ඉල්ලා අස්වී සර්ව පාක්ෂික ආණ්ඩුවක් පිහිටුවීමට ඉඩ ලබාදෙන ලෙසයි. එම ඉල්ලීමට තමා එකඟ බව ජනාධිපතිවරයා කියා ඇත. එහෙත් මේ කිසිවක් මහ පොළවේ යථාර්තයක් වන පාටක් පෙනෙන්නට නැත. දිනෙන් දින පෙනෙන්නට ඇත්තේ විසඳුමක් නොලැබෙන ආකාරයය. ඉන් සිදුවන්නේ මුදල් අමාත්‍ය අලි සබ්රි පාර්ලිමේන්තුවට ප්‍රකාශ කළ රටේ ආර්ථිකයේ භයානක තත්වය තවදුරටත් වර්ධනය වීමය.


විපක්ෂයේ ප්‍රධාන පක්ෂය වන සමගි ජන බලවේගයත්, ජනතා විමුක්ති පෙරමුණත් මේ වනවිට ප්‍රකාශ කර ඇත්තේ ජනාධිපති ගෝඨාභය රාජපක්ෂ සමඟවත් ඔහු සමඟ ආණ්ඩුකරණයේ නියැලුණු කා සමඟවත් ආණ්ඩු කිරීමට සූදානම් නැති බවය. එම තර්කය දේශපාලනික වශයෙන් අප බාරගත යුත්තකි. ඊට හේතුව රටේ වත්මන් සමාජ ආර්ථික හා දේශපාලන කඩා වැටීමට ජනාධිපති ගෝඨාභය රාජපක්ෂ ඇතුළු සියලු රාජපක්ෂවරුනුත්, ඔහුන් සමඟ එකපතේ කමින් ආණ්ඩුකරණයේ නියැලුණු දැන් ස්වාධීන යැයි කියා ගන්නා පිරිසත් එකසේ වගඋත්තරකරුවන් වන බැවින්ය. එවැනි තත්වයක් තුළ වගඋත්තරකරුවන් සමඟ තවත් ඉදිරි ගමනක් තිබිය නොහැකිය. අප පිළිගත යුතු යථාර්තය එයය. ඒ නිසාම මහනායක හිමිවරුන් අදේශපාලනිකව මොනවා කීවත් තවදුරටත් මෙම ප්‍රශ්නවල මේ මොහොතේ ප්‍රධාන වගඋත්තරකරුවා වන ජනාධිපති ගෝඨාභය රාජපක්ෂ සමඟ යායුතු හෝ යාහැකි ඉදිරි ගමනක් කිසිවකුට තිබිය නොහැකිය.


මහමඟට බැස විරෝධතා පවත්වමින් ජනතාව ඉල්ලා සිටින පරිදිම මෙම සමාජ ආර්ථික හා දේශපාලන ප්‍රශ්න විසඳීම සඳහා ආරම්භයක් ගැනීමටවත් හැකි වන්නේ ජනාධිපති ගෝඨාභය රාජපක්ෂ ඇතුළු මේ පාලනයම ඉල්ලා අස්වී ගෙදර යාමෙන් පමණය. ඉන් එහා විසඳුමක් පෙනෙන්නට නැත. ඔවුන් තවදුරටත් බලයේ සිටීම යනු මෙම ප්‍රශ්න විසඳෙනවා වෙනුවට තවදුරටත් උග්‍ර කිරීමකි.


රාජපක්ෂවරුන් බලයේ සිටින්නේ නම් නිල මාර්ග ඔස්සේ රටට මුදල් නොඑවන බවට මේ වනවිටත් විදෙස්ගත ශ්‍රී ලාංකිකයින් පවසා ඇත. එමෙන්ම රටේ සිටින අපනයනමුඛ ව්‍යාපාරිකයින්ද දිරියෙන් එම කටයුතු සිදුකර රටට විදේශ මුදල් ගෙන ඒවි යැයි කිව නොහැකිය. ඔවුන් බොහෝ විට විදේශගතව එම මුදල් රැස්කරනු ඇත. ජාත්‍යාන්තර ප්‍රජාව ගත්කළද වත්මන් පාලනය ගැන ඔවුන්ගේ පැහැදීමක් ඇති බව පෙනෙන්නට නැත. ජාත්‍යන්තර මූල්‍ය අරමුදල පවා ආණ්ඩුවට කියා ඇත්තේ යම් ණය මුදලක් හෝ ලබාදීමට රටේ ණය ගෙවීමේ වැඩපිළිවෙළක් ඉදිරිපත් කරන ලෙසය. මේ ඇත්තේ වැඩපිළිවෙළක් නැති එදා වේළ ටුවර්ස් ආණ්ඩුවකි. ඉතිං එවැනි ආණ්ඩුවකට තවදුරටත් ඉදිරියට යා නොහැකිය. අප තේරුම් ගත යුතු යථාර්ථය වන්නේ එයය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි