මැයි 06 වැනිදා පවත්වන හර්තාල් ව්‍යාපාරයේ ඉල්ලීම් සම්බන්ධයෙන් ජනාධිපතිවරයා හා ආණ්ඩුව ප්‍රතිචාර නොදක්වා ගතයුතු පියවර නොගන්නේ නම් මැයි 11 වැනිදා සිට අඛණ්ඩ හර්තාල් ව්‍යාපාරයක් පැවැත්වීමට හර්තාල් සංවිධායකයින් තීරණය කර ඇත.
රාජපක්ෂ පවුල් පාලනය ඇතුළු ජන පීඩක, ජන ඝාතක ආණ්ඩුව පන්නමු හා ජන සටන දිනවමු යනුවෙන් වෘත්තීය සමිති සහ බහුජන සංවිධාන මෙම හර්තාලය කැඳවා ඇති අතර ඒ වෙනුවෙන් රටේ සියලු ජනතාවට මෙන්ම ආගමික නායකයින්ටද ආරාධනා කර ඇත.
මැයි 06 දින හර්තාලයේදී නිවෙස්වල, කාර්යාලවල, වෙළඳසැල්වල හා කර්මාන්තශාලාවල කළු කොඩි ඔසවන ලෙසද, කඩසාප්පු හා වෙළඳසැල් වසා විරෝධතාවට එක්වන ලෙසද, කළු ඇඳුමින් සැරසී කළු කොඩියක් ඔසවා තමන්ට ආසන්නතම නගරයේ හෝ මංසන්දියේ විරෝධතාවලට එක්වන ලෙසද, දූෂිත ආණ්ඩුවට එරෙහිව සටන් පාඨ පුවරු හා බැනර් හැකි තරම් ප්‍රදර්ශනය කරන ලෙසද, දුම්රිය, ලංගම බස්රථ හා පෞද්ගලික බස්රථ ධාවනයෙන් ඉවත්ව අරගලයට එක්වන ලෙසද, රාජ්‍ය, අර්ධ රාජ්‍ය, පෞද්ගලික හා වැවිලි ක්ෂේත්‍රයේ සේවක සේවිකාවන් වැඩවරා හර්තාලයට එක්වන ලෙසද හර්තාල් සංවිධායකයින් ජනතාවගෙන් ඉල්ලා ඇත.■
