20.5 C
Sri Lanka
25 September,2022

අරාජකභාවය නැතිවන්නේ ගෝඨාභය-මහින්ද ඉල්ලා අස්වීමෙනි

Must read

‘රට අරාජික වීමට කිසිසේත් ඉඩ නොතබන බවත් රටේ දේශපාලන ස්ථාවරභාවය පවත්වාගෙන යාම සඳහා ගන්නා තීරණ සමඟ කටයුතු කිරීමට සූදානම් බවත් අග්‍රාමාත්‍ය මහින්ද රාජපක්ෂ මහතා පැවසීය. පූජ්‍ය ඕමල්පේ සෝභිත ස්වාමීන්වහන්සේ ප්‍රධාන මහා සංඝරත්නය 26දා පස්වරුවේ අරලියගහ මන්දිරයේ දී හමු වූ අවස්ථාවේ අගමැතිතුමා මේ බව කියා සිටියේය.
අන්තර්වාර පාලන ආණ්ඩුවක් පිහිටුවීම සම්බන්ධයෙන් මෙහිදී මහා සංඝරත්නය සිය අදහස් පළ කළහ. අන්තර්වාර පාලන ආණ්ඩුවක් පිහිටුවීමට අවශ්‍ය නම් ඒ සම්බන්ධව මහා නායක ස්වාමීන්වහන්සේලා ප්‍රධාන ආගමික නායකයින්ගේ සහ සියලු පක්ෂ නායකයින්ගේ එකඟතාව ලබා ගැනීමට කටයුතු කරන ලෙස අග්‍රාමාත්‍ය මහින්ද රාජපක්ෂ මහතා මෙහිදී මහා සංඝරත්නය හමුවේ ප්‍රකාශ කළේය.


රටේ ආර්ථිකය යථා තත්ත්වයට පත් කිරීම සඳහා දේශපාලන ස්ථාවර භාවය වැදගත්වන බවත්, ඒ හේතුවෙන් කිසිම මොහොතක රට අරාජික වීමට තමන් ඉඩ නොතබන බවත් අග්‍රාමාත්‍ය මහින්ද රාජපක්ෂ මහතා මෙහිදී අවධාරණය කළේය.’


ඉහත දැක්වෙන්නේ ඕමල්පේ සෝභිත හිමි ඇතුළු භික්‍ෂූන් පිරිසක් අගමැතිවරයා හමුවූ අවස්ථාව ගැන අගමැති මාධ්‍ය ඒකකය නිකුත් කළ නිවේදනයෙහිය.


මේ හමුවෙන් පසු මාධ්‍ය හමුවේ අදහස් දැක්වූ ඕමල්පේ හිමි, මෙසේ පවසා තිබේ.

‘අග්‍රාමාත්‍යවරයා කියනවා මා ඉල්ලා අස්වෙන්නම් කිසිම ප්‍රශ්නයක් නැහැ. ඉල්ලා අස්වීමට මම සූදානම්. එහෙත් ඒ ඉල්ලා අස්වීමෙන් පසුව ඇතිවන හිඩැස පිරිවීමට කල්ගත වුණාම රටට, රාජ්‍ය පාලනයක් නැති වෙනවා කියලා. මෙන්න මේ හිඩැස පුරවන්න කොච්චර කාලයක් යනවාද? ඒ කාලසීමව තුළ රට සම්පූර්ණයෙන් අරාජික වෙනවා කියලා.


අපි කිව්වා ජනාධිපතිවරයාට තියෙන විධායක බලතල යටතේ රටේ පරිපාලනය මෙහෙයවා ගන්න පුළුවන් කියලා. අගමැතිවරයා දිගින් දිගටම කිව්වා ජනාධිපතිවරයාගේ බලතල යටතේ රට පවත්වාගෙන යන්න බැහැ. අගමැතිවරයා ප්‍රධාන අමාත්‍ය මණ්ඩලය ඉවත්වන විට රට අස්ථාවර වෙනවා කියලා.


අස්ථාවර වුණොත් මේ තියෙන තත්ත්වය භීෂණයක් බවට පත්වෙයි. තවත් අර්බුද පහළවෙයි. ඒ නිසා මා ඉල්ලා අස්වෙනවා කිසිම සැකයක් නැහැ ඒකාන්තයි. පාර්ලිමේන්තුවේ අනෙක් සියලු‍ම පක්ෂ එකතුකරගෙන ඊළඟ පියවර තබන හැටි ස්ථිරවම තීරණය කරන්න කළාට පස්සේ කියලා.’


අගමැති මහින්ද රාජපක්‍ෂ මහතා දැන් සිටින්නේ ශාරීරික වශයෙන්, මානසික වශයෙන් දුර්වල අඩියක වගේම, තමාගේ අගමැති ධුරයෙහි ගතකරන අවසාන කාලයෙහිය. තව ඉතාමත් කෙටි කාලයකින් ඔහුගේ ආණ්ඩුවට පාර්ලිමේන්තුවේ බහුතර බලය නැතිවී යාමට නියමිත අතර, එසේ වූ විට අගමැති පුටුවෙන් ඉවත්වීමට ඔහුට සිදුවෙයි. එහෙත් ඒ අවසාන මොහොත දක්වා තමා ශක්තිමත්ව අගමැති පුටුවේ වාඩිවී සිටින බව පෙන්වීමට ඔහු ඉතාමත් දුප්පත් ලෙස උත්සාහ ගනිමින් සිටියි.


ඔහුගේ උත්සාහය කොපමණ දුප්පත්දැයි කියනවා නම්, මේ දිනවල ඔහු කරන්නේ රට පුරා සිටින ප්‍රාදේශීය සභා මන්ත්‍රීවරුන් වැනි පහළම ස්තරය වරින් වර අරලියගහ මන්දිරයට ගෙන්වාගනිමින් ඔවුන් ලවා අගමැතිතුමා ඉවත් නොවී දිගටම තනතුරේ සිටිය යුතුය කියන යෝජනා සම්මත කරගැනීමත්, ‘මම යන්නේ නැහැ, පුළුවන් නම් යවන්න’ වැනි බොරු පුරසාරම් කතා ඔවුන් ඉදිරියේ කීමත්ය. එහෙත් අවාසනාවකට මෙන්, ඔහු ධුරයේ සිටිය යුතුයැයි යෝජනාවක් පාර්ලිමේන්තු මන්ත්‍රී කණ්ඩායම තුළ අත්සන් කිරීමට පටන් ගත්තත්, අත්සන් 46කට වඩා එකතු කරගන්නට නොහැකි වුණු බව වාර්තා වෙයි.


එහෙත්, ඕමල්පේ සෝභිත හිමිට ඔහු කියා ඇත්තේ ඉවත්ව යන්නට සූදානම් බවත්, එහෙත් ඉන් පසු ඇතිවන අරාජිකභාවය නැති කරන ක්‍රමයක් කිව්වොත් පමණක් ඉවත් වන බවත්ය. රට අරාජිකභාවයට පත්කිරීමට තමා ඉඩ නොදෙන බවද ඔහු කියයි.


තමා ධුරයෙන් ඉවත් වුවහොත් රට අරාජික වන්නේ යැයි කීම ඔහු විසින්ම ගොතන ලද බොරුවකි. ‘මං ගියොත් රටට මහා විනාසයක් වෙන්නේ. ඒ නිසා යන්නේ නැහැ’ ඔහුගේ ප්‍රකාශයේ අර්ථයයි. එහෙත්, දැන් කවුරුත් පසක් කරගෙන ඇති ඇත්ත වන්නේ, රට අරාජිකත්වය කරා ඇදී යමින් තිබෙන්නේ ඔහුත් ඔහුගේ සොහොයුරු ගෝඨාභය රාජපක්‍ෂත් දිගින් දිගටම තනතුරුවල රැඳී සිටින නිසා බවයි.


අද මහින්ද රාජපක්‍ෂට තනතුර හැර යන ලෙස කියන්නේ ඔහුගේ ආණ්ඩුවේම සිටි මන්ත්‍රීවරුන් ඇමතිවරුන්ය. මහින්ද සුළඟ නිර්මාණය කරමින්, පරාජය වී සිටි මහින්ද නැවතත් දේශපාලන ලෝකයේ ඔසොවා තැබූ විමල් වීරවංස, උදය ගම්මන්පිල ඇතුළු සියලු දෙනාම ඔහු තනතුරෙන් ඉවත් විය යුතු බව කියති. ඩලස් අලහප්පෙරුම, චරිත හේරත්, අරුන්දික ප්‍රනාන්දු ඇතුළු ආණ්ඩු පක්‍ෂයේ බහුතර පිරිසක් ඍජුව හෝ වක්‍රව ඒ බව කියා තිබේ. ඒ නිසා, අද මහින්ද යනු තමාට හිමි නැති කිරුළක් පැළඳගෙන සිටින්නට තැත් දරන කබල් දේශපාලකයෙකි. සංඛ්‍යා මගින් ඔහුට බලයක් නැති බව තවම පෙන්වා නැති නමුත්, නිසැකවම ඔහුට පාර්ලිමේනක්තුව තුළ බලයක් නැත.


ජනාධිපතිවරයා පත්කර ඇත්තේද ළමා ළපටින්ගෙන් යුක්ත ඇමති මණ්ඩලයකි. කන්කෙඳිරි ගාන තරමට, තර්ජනය කරන තරමට තව තවත් ඇමති තනතුරු අලුතෙන් දීම තාමත් සිදුවෙයි. හැබැයි, ඒ කිසිම දෙයකින් රට වැටී තිබෙන අර්බුදයට විසඳුම් නොලැබෙන බව කවුරුත් දනිති. මේ ඇමති මණ්ඩලය සමග රට පාලනය කළ නොහැකි බව ජනාධිපතිද දනියි. වෙනත් ඇමති මණ්ඩලයක් පත්කළ නොහැකි වන තරමටද ඔහු බෙලහීනය.


එවැනි තත්වයක් යටතේ, තමා අගමැතිධුරයෙන් ඉවත් වුවහොත් අරාජිකභාවයක් ඇතිවේයැයි මහින්ද රාජපක්‍ෂ කියන්නේ බොරුවක් මවා පාන්නටය. ඔහු පමණක් නොව, ඔහුගේ සොහොයුරු ගෝඨාභය රාජපක්‍ෂ ජනාධිපති ධුරයෙන් ඉවත් වුණත් රටේ අරාජිකභාවයක් කිසිසේත් ඇති නොවේ.


ඊට එක හේතුවක් නම්, දැනටමත් ඔවුන් රට පාලනය කරන්නේ නැතිවීමය. දැනටත් නැති පාලනයක් යළිත් ‘නැති වුණොත්’ රට අරාජිකභාවයට පත්වෙන්නේ කෙසේදැයි ප්‍රශ්නයකි. දෙවැන්න, ඔවුන් ඉවත් වුණොත් සිදුවන දේශපාලන වෙනස්කම් දැනටමත් ගණන් හැදිය හැකි ඒවා නිසාය. ඒ කියන්නේ පාර්ලිමේන්තුවේ පක්‍ෂ අතර ඒ ගැන විවිධ එකඟතා ඇතිවී සහ ඇතිවෙමින් පවතින නිසාය. ඒ නිසා, කළ යුතු හොඳම දේ වන්නේ, ජනාධිපතිත් අගමැතිත් ධුරවලින් ඉවත්වී රට අරාජකභාවයට පත්වීම වැළැක්වීමය.


ජනාධිපතිවරයාට කථානායකවරයා වෙත යවන ලියුමකින් ඉල්ලා අස්විය හැකිය. එවිට කිසිම අරාජිකත්වයක් ඇති නොවේ. ඔහුගේ ඉතිරි ධුර කාලය වෙනුවෙන් පාර්ලිමේන්තුව විසින් වැඩි ඡන්දයෙන් හෝ ඒකමතිකව අනුප්‍රාප්තික ජනාධිපතිවරයකු පත්කරගත යුතුය. විමල් වීරවංස මෙහිදී කියන්නේ, පාර්ලිමේන්තුවෙන් බැසිල් රාජපක්‍ෂ ජනාධිපති හැටියට පත්විය හැකි බවය.
ගෝඨාභය රාජපක්‍ෂ තවදුරටත් ජනාධිපති තනතුරේ තබාගැනීමට වීරවංස එසේ කියතත්, පාර්ලිමේන්තුව තුළින් තවදුරටත් රාජපක්‍ෂ කෙනෙකු ජනාදිපතිධුරයට පත්වන්නට ඉඩක් නැත. බහුතර බලයක් ඔහුට ලැබෙන්නට ඉඩක් නැත. යම් හෙයකින් එසේ සිදුවේ නම්, එය පරාජයක් වන්නේද විමල් වීරවංසලාගේමය. ආණ්ඩුවෙන් එළියට බට ගමන්ම ඔවුන් පුරසාරම් දෙඩුවේ ආණ්ඩුවේ බහුතරය නැති කරන බවටය. එහෙව් කතා කී වීරවංසම, පාර්ලිමේන්තුවේ වැඩි ඡන්දය අරගෙන බැසිල් ජනාධිපති වනු ඇතැයි කියන විට, අප එය කෙත්රුම් ගත යුත්තේ වීරවංසලාගේ බැරි බැරියාවක් හැටියට නොවේද? ඉන් පෙනෙන්නේ වීරවංසලාගේ පුරසාරම්වලට පාර්ලිමේන්තුවේ වැඩි බලයක් නැති බව නොවේද?


මුළු රටම රාජපක්‍ෂ පවුලම ගෙදර යායුතු යැයි කියන මේ වෙලාවේ, වෙනත් රාජපක්‍ෂ කෙනකු අනුප්‍රාප්තික ජනාධිපතිධුරයට පත්කරගන්නා පිස්සුවක් පාර්ලිමේන්තුවට ඇතැයි සිතිය නොහැකිය. ඒ නිසා ගෝඨාභය රාජපක්‍ෂ තනතුරෙන් ඉල්ලා අස්වුණොත්, පාර්ලිමේන්තුවේ වැඩි කැමැත්ත ඇති මන්ත්‍රීවරයා අනුප්‍රාප්තික ජනාධිපති හැටියට පත්කළ හැකිය. අගමැති ඉවත් වුවහොත් ද ඒ විදියටම පාර්ලිමේන්තුවේ වැඩි කැමැත්ත හිමි අය අගමැති කරගත හැකිය. උදාහරණයකට, ගෝඨාභය ඉවත් වුණොත්, කරු ජයසූරිය වැනි ප්‍රධාන දේශපාලන පක්‍ෂ ප්‍රවාහයෙන් වෙන්වී සිටින, කාටත් පිළිගත හැකි කෙනකු අනුප්‍රාප්තික ජනාධිපති හැටියට පත්කළ හැකිය. එහෙත් ඊට පෙර ඔහු පාර්ලිමේන්තුවේ අසුන්ගත යුතුය. ඒ සඳහා මයන්ත දිසානායක පාර්ලිමේන්තු මන්ත්‍රීවරයා තමන්ගේ ජාතික ලැයිස්තු අසුන ලබාදීමට සූදානම් බව දැනගන්නට තිබේ. ඔහු ඉල්ලා අස්වීමත්, කරු ජයසූරිය පාර්ලිමේන්තුවේ අසුන් ගැනීමත්, ඉන්පසු ඔහු අනුප්‍රාප්තික ජනාධිපති හැටියට තෝරා ගැනීමත්, කෙටි කලකින් කළ හැකි දේවල්ය. කරු ජයසූරිය වැන්නකු අනුප්‍රාප්තික ජනාධිපති වීමෙන්, ආණ්ඩුව තුළ අලුත් ගතිකයන් වැඩ කරන්නට පටන් ගනු ඇති අතර, ඔහුගේ මැදිහත්වීමෙන් පාර්ලිමේන්තුවේ දේශපාලන පක්‍ෂවල සම්බන්ධතාව සහ එකට වැඩකිරීමේ ලක්‍ෂණය වැඩි දියුණු වනු ඇත. අනෙක් අතට, කරු ජයසූරිය, දේශපාලන වුවමනාවකින් ආණ්ඩුක්‍රම ප්‍රතිසංස්කරණ න්‍යාය පත්‍රයක් සඳහා පෙනීසිටින්නෙකි. එවැන්නකු රටේ ජනාධිපති වීම එම ප්‍රතිසංස්කරණ න්‍යාය පත්‍රය ඉදිරියට ගැනීමටද අගනා අවස්ථාවකි.


මේ විදියට අලුත් ජනාධිපති කෙනකු අගමැති කෙනකු කෙටිකාලීන ආණ්ඩුවකටට පත්වුණොත් ආණ්ඩුවේ මුහුණුවර සම්පූර්ණයෙන්ම නිසැකවම වෙනස් වෙයි. එය ගෝඨාභය -මහින්ද ජනාධිපතිකමේ අගමැතිකමේ තියාගෙන හදන අච්චාරු පාරාජිකා ආණ්ඩුවක් මෙන් නොවනු ඇත. මේ ක්‍රියාවලිය, වෙනසක් සඳහා දැනටමත් පෙරට පැමිණ සිටින පාර්ලිමේන්තුවේ මන්ත්‍රීවරුන් සහ වෙනත් විශේෂඥයන්ගේද දායකත්වයෙන් සිදුවිය හැකි බැවින්, සැලසුම්සහගත ලෙස එකක් පසුපස එකක් වෙනස්කම් කළ හැකිය. එකඟත්වයෙන් කෙරෙන එවැනි බල හුවමාරුවකදී, අරාජිකභාවයක් ඇති නොවන්නට හොඳින්ම වගබලා ගත හැකිය.


ඒ අතර ජනාධිපතිවරයා, ආණ්ඩුවේ පක්‍ෂ නායකයන් වෙත යැවූ ලිපියකින් අගමැතිත් වර්තමාන ආණ්ඩුවත් ඉල්ලා අස්වූ පසු සර්ව පාක්‍ෂික ආණ්ඩුවක් හැදීමට තමා එකඟ බව දන්වා තිබේ. එහි තේරුම අගමැතිගේ ඉවත්වීම ජනාධිපතිවරයා ද බලාපොරොත්තු වන බවය. එහෙත්, ඔහු කිසිවිටෙක ඉවත්වන්නයැයි සිය වැඩුමහල් සහෝදරයාට නොකියනු ඇත. අතින් අල්ලාගෙන පොහොට්ටු වේදිකාවට ගෙනැවිත් තමා ජනාධිපති අපේක්‍ෂක හැටියට හඳුන්වා දුන් දේශපාලනයේ ලොකු අයියාට ඉවත් වන්නට යැයි කීම ඔහුට අපහසු දෙයක් වන්නට ඇත. මහින්ද රාජපක්‍ෂද මේ බව දනියි. තවමත් ගෝඨාභය තමාට ඉල්ලා අස්වන්නට කියා නැති බවත්, ඉදිරියටද නොකියනු ඇති බවත් මහින්ද රාජපක්‍ෂ කියන්නේ ඒ ලේ බැම්ම ගැන තිබෙන විශ්වාසය නිසාය. එහෙත්, රට මෙතැනින් ඉදිරියට යන්නට නම් මහින්ද අගමැතිකමෙන් ඉවත් විය යුතුය. ගෝඨාභය රාජපක්‍ෂත් ඉවත් විය යුතුය. ඉන් රටේ තත්වය යහපත් වනු ඇත.
මහින්ද රාජපක්‍ෂ අගමැතිධුරයෙන් ඉවත් නොවීමට හේතුව ඇත්තේ අන් තැනකය. තමාගේ පුත්‍රයාට දේශපාලන අනාගතය සුරක්‍ෂිත කර දීම සඳහා තවදුරටත් අගමැතිධුරයේ සිටියු යුතු බවට ඔහුග් පවුලෙන් විශාල පීඩනයක් ඇතිකර ඇතිවාට සැකයක් නැත. මහින්ද ඇතුළු සියලු රාජපක්‍ෂලා, සියලු දේශපාලන තීන්දු ගන්නේ රට වෙනුවෙන් නොව පවුලේ යහපත වෙනුවෙනි. ඇමති ධුරයෙන් ඉවත්වීමෙන් පසු නාමල් රාජපක්‍ෂ දැන් සිටින්නේ දේශපාලන අඳුරකය. රට පුරා නැගෙන රාජපක්‍ෂ විරෝධය නිසා ඔහුගේ අනාගත දේශපාලනයද ඒ තරම් සුවපහසු නොවනු ඇත. ඒ නිසා ඔහුට ආවරණයක් ආරක්‍ෂාවක් ලබාදීමට නම්, මහින්ද තාත්තා තවදුරටත් අගමැතිකමේ සිටිය යුතුය.


එහෙත්, මේ රාජපක්‍ෂ වුවමනාවන් පරාජය කළ යුතුය. එය කළ හැක්කේ ජනතාවටය. ඒ සඳහා රාජපක්‍ෂවරුන් ඉවත් වීමෙන් කිසිසේත් රට අරාජකභාවයට පත් නොවන බවත්, ඒ වෙනුවට එය වඩාත් ආරක්‍ෂිත හා ස්ථායි වනු ඇති බවත් මහජනතාවට තේරුම් කරදීම අවශ්‍යය. ■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි