20.2 C
Sri Lanka
3 October,2022

ජනාධිපති ගෙදර යායුතුයි! ඔවුහු එකහඬින් කියති

Must read

■ අමන්දිකා කුරේ

බලයට පත් වූ දූෂිතම ජනාධිපතිවරයා
කථිකාචාර්ය ප්‍රියංකර රත්නායක


ජනාධිපතිවරයා දැන්වත් මුළු රටම ඉල්ලන දේ සිදු කළ යුතුයි.


රාජපක්ෂ පවුලෙත් ගෝඨාභය රාජපක්ෂ තමයි ඒක නරකම තැනට ගෙන ආවේ. ඒක පටන් ගන්නේ ජනාධිපතිවරණයටත් පෙර සිටම සිදු කරපු අපරාධවලින්. ඒ අපරාධවල ප්‍රතිඵල තමයි දැන් ඇවිල්ලා තියෙන්නේ. රාජපක්ෂ පවුලට අනිවාර්යයෙන් ම ඒකට දඬුවම ලැබෙන්න ඕනෑ.
ඒ නිසා මම කියන්නේ ජනාධිපති ඉල්ලා අස් වෙලා මදි. ඉල්ලා අස් වෙලා ගෙදර යන්න නෙවෙයි එයා ඉල්ලා අස් වෙලා කරපු වැරදිවලට දඬුවම් ලබන්න හිරේට යන්න ඕනෑ. මිනිස්සු මරපු, ජනමාධ්‍යවේදීන් මරපු ඉතිහාසයක් ඔහුට තිබෙන්නේ. මහජන මුදල් වංචා කරපු ඉතිහාසයක් ඔහුගේ පවුලට තිබෙනවා. නඩු 35ක් ඔහුට තිබුණා. ජනාධිපති පදවියට මුවා වෙලා ඒවා ඒවා වහ ගත්තා. මම හිතන්නේ ඔහු තමයි මේ ඉතිහාසයේ බලයට පත්වුණු දූෂිතම ජනාධිපතිවරයා. ඒ නිසා මේ තිබුණු දූෂිත තත්වය උච්ඡතම තැනකට ගෙන ආව ගෝඨාභය වහාම ඉල්ලා අස් විය යුතුයි. ඒ වගේ ම ඔහුට එරෙහි චෝදනා ගොනු කරලා ඔහුට දඬුවම් ලබා දිය යුතුයි.

ජනාධිපති බලයේ සිටීම සදාචාර විරෝධීයි
සරත් ඉද්දමල්ගොඩ පියතුමා


ජනාධිපති ඇතුළු මුළු ආණ්ඩුවම ඉවත් විය යුතුයි කියන එකයි මගේ මතය. ජනතාවගේ මූලික අවශ්‍යතාවන් සපයන්න ජනාධිපති ඇතුළු ආණ්ඩුවට නොහැකි නම් ඒ පාලකයන්ට පවතින්න සදාචාරාත්මක අයිතියක් නෑ. ඒ නිසා දැන් ඔවුන් බලයේ රැඳී සිටීම සදාචාර විරෝධී කටයුත්තක්. දැණ් මුළු රටම පිළිගන්නවා මේ රාජපක්ෂ පවුල රටේ සම්පත් පැහැරගත්තා කියලා. මිනිස්සු පාරට එන්නේ තමන්ට තියෙන නැතිබැරිකම කියන්න. නිරායුධ මිනිස්සුන්ට වෙඩි තැබීම තුච්ඡ ක්‍රියාවක් කියලා මම හිතන්නේ. ඒ නිසා වහාම ජනාධිපති ඇතුළු ආණ්ඩුව ඉල්ලා අස් වෙලා අලුත් පාලනයක් පිහිටුවිය යුතුයි.

කළමනාකරණය බැරි නම්ගෙ දර යන්න
ලේඛක මොහාන් රාජ් මඩවල


ජනාධිපතිවරයාට පවතින ව්‍යවස්ථානුකූල බලතල අනුව ඔහුට තව අවුරුදු දෙකක් බලයේ සිටිය හැකියි. නමුත් ඉතිහාසයේ කවරදාකවත් නොවූ පරිදි හැම ක්ෂේත්‍රයකින් ම රට පිරිහිලා තිබෙනවා. ආර්ථිකය සම්පූර්ණයෙන් ම බංකොලොත්. තව ඉස්සරහට මිනිස්සුන්ට කන්න පවා නැතිවෙයි. මහා අඳුරු යුගයක් පටන් ගත්තා පමණයි. මේ තත්වය තවත් වර්ධනය වන තත්වයක් තමයි තියෙන්නේ. ජනාධිපති ඇතුළු ආණ්ඩුවට මේ තත්වය කිසිසේත්ම කළමනාකරණය කරගන්න බෑ කියන එක පැහැදිලියි. ජනාධිපති ඇතුළු ආණ්ඩුව තවත් බලයේ ඉන්න ඇයි කියන එක ප්‍රශ්නයක්. ඉල්ලා අස් වෙලා යන්න තරම් මේක සදාචාරාත්මක ආණ්ඩුවක් නෙවෙයි. නමුත් මගේ අදහස නම් ජනාධිපතිවරයා ඇතුළු මුළු ආණ්ඩුවම වහාම ඉල්ලා අස් විය යුතුයි කියන කාරණය.

පරමාධිපත්‍යයට ගරුකර බැස යන්න
නීිතිඥ නුවන් බෝපගේ


ආණ්ඩුක්‍රම ව්‍යවස්ථාවේ 38 වන වගන්තියේ පැහැදිලිවම දක්වලා තිබෙනවා ජනාධිපතිවරයා ඉල්ලා අස් වෙන්න ඕනෑ විදිහ. ඊට පස්සේ පාර්ලිමේන්තුවට පුළුවන් වැඩිම විශ්වාසයක් තිබෙන කෙනාව අනුප්‍රාප්තිකයෙක් විදිහට පත් කරගන්න. අගමැති මහින්ද රාජපක්ෂ දෙවරක් ජනාධිපති ධුරය දරපු නිසා ඔහුට හැකියාවක් නෑ නැවත ජනාධිපති වෙන්න. ජනතා හඬට ඇහුම්කන් දීලා ඉල්ලා අස් වෙන්න අවශ්‍ය ප්‍රතිපාදන ඉතා හොඳින් ආණ්ඩුක්‍රම ව්‍යවස්ථාවේ තිබෙනවා. එහෙම නොකර මිනිස්සුන්ට වෙඩි තබමින් තවත් බලයේ සිටීම ජනතා පරමාධිපත්‍යයට හානි කිරීමක්. අපේ රටේ පරමාධිපත්‍යය තිබෙන්නේ මහජනතාවට. ඒ නිසා අවුරුදු පහකට ද දහයකට ද කියලා අදාල නෑ, කොච්චර කාලයකට බලය ගත්තත් ජනතාව යන්න කියනවා නම් ඔවුන්ට ජනතා පරමාධිපත්‍යය නෑ. ඒ නිසා ඔවුන් වහාම ඉල්ලා අස් විය යුතුයි.

ජාතිවාදය, අධික බලය ජනාධිපති සමග ගෙදර යන්න
සත්‍යවේල් පියතුමා


ජනාධිපතිවරයා මේ මොහොතේ ජනතාවගේ හඬට සවන්දිය යුතුයි. මම ජනාධිපතිට ගෙදර යන්න කියන එක හේතුවක් තමයි මේ ආර්ථික කඩා වැටීම. ජනතාවගේ කුසගින්න ජනාධිපතිවරයාට තේරෙන්න ඕනෑ. ඒ වගේම දැන් ඇති වෙලා තිබෙන්නේ දිගු කාලීන දේශපාලන ප්‍රශ්නයක්. ජනාධිපතිවරයා ඉලා අස් නොවී ඒ දේශපාලන අර්බුදයට විසඳුමක් සොයාගන්න බෑ. දැන් තරුණයො පාරට බැහැලා කියන්නේ අපි ළඟ ජාතිවාදය ආගම්වාදය නෑ කියලා. මේ ආණ්ඩුව බලයට ආවේ ඒවා පාවිච්චි කරලා. ගෝඨා ගෙදර යන්න කියන එක පසුපස තිබෙන්නේ ඔහුත් සමගම ජාතිවාදය හා ආගම්වාදයටටහ් යන්න කියන එක. ජනාධිපතිවරයා ඉල්ලා අස් වෙනවා සමගම අධික විධායක බලයත් අහෝසි කරන්න ඕනෑ. ඒ නිසා ජනාධිපති ඇතුළු රාජපක්ෂ පවුල ජනතා හඬට ඇහුම්කන් දීලා බලය අත්හැරිය යුතුයි.

ජනාධිපතිගේ පොරොන්දු පත්‍රය කඩ වෙලා
මාධ්‍යවේදී දුමින්ද සම්පත්


ජනතා ඡන්දයෙන් පත් වුණත් පාලකයන් ජනතාව වෙනුවෙන් වැඩ කරන්නේ නැති නම් ජනතාව පාරට බැහැලා යන්න කියනවා නම් ඒ පාලකයන් අස්වෙලා යා යුතුයි. වෙනත් රටවල නායකයන් ඒ විදිහට ඉල්ලා අස් වූ අවස්ථා ඕනෑ තරම් තිබෙනවා. දැන් ලංකාවේ ජනාධිපතිත් ඉල්ලා අස් වෙලා යන්න ඕනෑ. ජනාධිපතිවරයා මේ වන විට රටට ඔප්පු කරලා ඉවරයි තවදුරටත් මේ රට ඔහුට කළමනාකරණය කරගන්න බෑ කියන එක. ජනාධිපති විදිහට ගෝඨාභය රාජපක්ෂ මහතා පත්වන විට ජනතාව සමග ඇතිකරගත් සම්මුතිය දැන් බිඳ දමලා ඉවරයි. ඒ සම්මුතිය කැඩුණු නිසා තමයි ඡන්දය දීපු ජනතාවත් පාරට බැහැලා ඔහුට යන්න කියන්නේ. ඒ නිසා දැන් ඔහු කළ යුත්තේ ජනතා හඬට කන් දීලා ඉල්ලා අස් වෙන එක.

ගෞරවයෙන් බැස යන්න
ආචාර්ය අතුල විතානවසම්


රටේ ජන අරගලය තුළින් ජනාධිපතිවරයාව බිත්තියට ම හේත්තු කරලා ඉවරයි. ජනාධිපතිවරයා ධුරය අත්හැරීම මිසක් වෙන කරන්න දෙයක් නෑ. ඔහුගේ බලයේ සුජාතභාවය දැනටම ගිලිහිලා තිබෙන්නේ. ඒ නිසා ඔහුට අලුතෙන් දෝෂාභියෝගයක් ගෙන එන්න අවශ්‍ය නෑ. ජනතාව විසින් ඔහුට දැනටමත් දෝෂාභියෝගයක් ගෙනැවිත් තිබෙන්නේ. දැන් ඉන්න විපක්ෂය තේරුම් නොගත්තාට දෝෂාභියෝගයක් ගෙන ඒම ඉතාම අපහසු වෙන විදිහට තමයි අපේ ව්‍යවස්ථාවේ ඊට අදාල ප්‍රතිපාදන සකස් කරලා තියෙන්නේ ම. නමුත් දැන් ජනතාව ඔවුන්ගේ පරමාධිපත්‍ය බලයට අනුව මහජන දෝෂාභියෝගයක් ජනාධිපතිවරයාට විරුද්ධව ගෙනැවිත් තිබෙනවා. ඒ තුළ බලවත් චෝදනා අඩංගු වෙනවා. ඒ නිසා ජනාධිපතිවරයා ජනතා පරමාධිපත්‍යයට ගරු කරමින් වහාම ඉල්ලා අස් විය යුතුයි. ජනාධිපතිට ඉල්ලා අස් වෙනවා නම් කතානායකට ඉදිරිපත් කරන සරල ලියුමකින් ඉල්ලා අස් වෙන්න තියෙන්නේ. ඒ නිසා ඒ සරල ක්‍රියාමාර්ගය අරන් දැන් ම තිබෙන ගෞරවය හෝ රැකගෙන ජනාධිපතිවරයා ධුරයෙන් ඉල්ලා අස් විය යුතුයි. එසේත් නැතිනම් තව ටික කාලයකින් ජනතාව විසින් ම ඉතාම නින්දිත විදිහට ඔහුව බලයෙන් පහකරාවි.

ශිෂ්ට සම්පන්නව ඉවත් වෙන්න
චිත්‍රපට අධ්‍යක්ෂ අශෝක හඳගම


දැන් රට නිල වශයෙන් ම බංකොලොත්. සාමාන්‍යයෙන් ශිෂ්ට දේශපාලනයේ දී එවැනි වේලාවක රාජ්‍ය නායකයා ඉල්ලා අස් වෙනවා. මීට වඩා සුළු සිද්ධිවලටත් වෙනත් රටවල වගකිව යුතු පාලකයන් වගකීම භාරගෙන ඉල්ලා අස් වෙලා තිබෙනවා. 1953 හර්තාලය වෙලාවේ අගමැති ඩඩ්ලි සේනානායක ඉල්ලා අස් වුණා. ඒක තමයි ශිෂ්ට දේශපාලන ක්‍රමයක විදිහ. ඒ නිසා ජනාධිපතිවරයා මේ වගකීම භාර අරන් වහාම ඉල්ලා අස් විය යුතුයි.

ආණ්ඩුවත් එක්කම ගෙදර යන්න
චිත්‍රපට අධ්‍යක්ෂ ප්‍රසන්න විතානගේ


මේ ජනාධිපතිවරයා ඇතුළු ආණ්ඩුව තම ගජමිතුරන්ට උපරිම වාසි ලබා දෙන අතරතුර පීඩිතයාව තවත් දුප්පතුන් බවට පත් කළා. කෘෂි අර්බුදයක් ඇති කරලා ආදායම් මාර්ග නැති කළා. මේ අර්බුද ගණනාවක් නිසා තමයි ජනතාව ජනාධිපතිවරයාගේ ඉල්ලා අස් වීම ඉල්ලන්නේ. දැන් ඒ මහජන මතය ජනාධිපතිවරයාට ඉල්ලා අස් කිරීමට බලකරන ව්‍යාපාරයක් දක්වා වර්ධනය වෙලා තිබෙනවා. නමුත් අපට ජනාධිපතිවරයාගේ ඉල්ලා අස් වීමෙන් පමණක් සෑහීමකට පත් වන්න බෑ. ජනාධිපති සමග මේ අසාර්ථක රජයත් ඉල්ලා අස් විය යුතුයි. ව්‍යවස්ථාදායකය තුළ මහජන මතය නියෝජනය කරන අය මේ රජය පරාජය කරන්න කටයුතු කළ යුතුයි. ඒ වගේ ම බලය වැඩිකරගත් ප්‍රතිපාදනත් ඉවත් කළ යුතුයි.

පවුල පිටින් ගෙදර යන්න
චිත්‍රපට අධ්‍යක්ෂ විමුක්ති ජයසුන්දර


මේ මොහොත වන විට රාජපක්ෂලා ගෙදර යා යුතුයි කියන එක තහවුරු වෙලා ඉවරයි. ඒ ගැන විවාදයක් නෑ. ඡන්දෙ දීපු ජනතාවත් විරුද්ධ වෙලා තිබෙනවා. ලංකාව කියන්නේ පොඩි රටක්. ඕනෑම කෙනෙක්ට බලලා ජනමතය තේරුම් ගන්න පුළුවන්. නමුත් මේ රාජපක්ෂලා සූදානම් නෑ ඒ යථාර්ථය තේරුම් ගන්න. නමුත් ඔවුන්ට කිසි වැඩපිළිවෙළක්වත් නෑ. නැවත වැඪපිළිවෙළක් ගෙනාවත් රාජපක්ෂලාව අපට පිළිගන්න බෑ. ඒ නිසා මුළු රාජපක්ෂ පවුලම ගෙදර යා යුතුයි.

යන්න බැරි නම් එළවිය යුතුයි
රංගන ශිල්පිනි දීපානි සිල්වා


රටේ නායකයෙක්ට ගරුත්වයක් තිබිය යුතුයි. මොන තරම් විවේච තිබුණත් ඕනෑම මනුෂ්‍යයෙකුට ගරුත්වයක් තිබිය යුතුයි. නමුත් දැන් අපේ රටේ නායකයා විදිහට ඉන්න කෙනා අහන්න තියෙන හැම වචනෙකින් ම ජනතාවගෙන් අපහාස විඳලා ඉවරයි. ජනාධිපති කියලාවත් මිනිස්සු දැන් ඔහුට ගරු නොකරන්නේ ඔහුගේ අසාර්ථක ක්‍රියාකලාපය නිසයි. ඔවුන් දන්නවා ඔවුන් මොනවා ද කළේ කියලා මේ රට විනාශ කරන්න. කලාකරුවෙක් හැටියටත් මට කියන්න තියෙන්නේ මේ ජනාධිපතිවරයා කලාවට කරපු දෙයකුත් නෑ. මහජනතාවට කරපු දෙයකුත් නෑ. ඒ නිසා මම මහජනතාවට කියන්නේ මොවුන් යන්න සූදානම් නැතිනම් තවත් ඉවසන් ඉන්නේ නැතිව පාරට බැහැලා මොවුන්ව එළවන්න එකතු වෙමු කියලා.

ජනාධිපති ධුරයම අහෝසි කළ යුතුයි
නීතීඥ නිශාම් කාරියප්පර්


ශ්‍රී ලංකා මුස්ලිම් කොංග්‍රසය විදිහට අපේ ස්ථාවරයත් ජනාධිපතිවරයා ඉවත් විය යුතුයි කියන එක. ආණ්ඩුක්‍රම ව්‍යවස්ථානුකූලව ජනාධිපතිවරයා දැන් ඉල්ලා අස් වෙන්න සූදානම් කියන පණිවුඩය දෙන්න ඕනෑ. පසුව අන්තර්වාර පාලනයක් පිහිටුවා ගත යුතුයි. එහෙම ඉවත්වෙන්නේ නැතිනම් ජනාධිපති ධුරය අහෝසි කිරීමේ ක්‍රියාවලියකට දැන් යා යුතුයි.

ජනතා අවශ්‍යතාව ඉටු කරන්න
පාර්ලිමේන්තු මන්ත්‍රී ශානකියන් රාසමාණික්කම්


ජනාධිපතිවරයා ඇතුළු ආණ්ඩුවේ අය දකුණේ මිනිස්සුන්ට තුවක්කු දිගු කරගෙන කරන දේවල් අපට අලුත් දේවල් නෙවෙයි. අපි හැමදාම මේ තත්වයන්ට මුහුණ දුන්නා. එක එක හේතු කියලා මේ ජනාධිපති බලයට ආව කාලයේ ඉඳන් මිනිස්සු මැරුවා. ඒ නිසා දැන් ජනාධිපතිතුමා ඉලා අස් වෙන්න ඕනෑ. විශ්වාසය නැතිවෙලා තිබෙන්නේ මේ ආණ්ඩුවේත්. ඒ නිසා ආණ්ඩුවත් ගෙදර යන්න ඕනෑ. ඒ වගේ ම ජනාධිපති ධුරයේ බලතල කප්පාදු කරන්න ඕනෑ. දැන් ජනතාවගේ අවශ්‍යතාව ජනාධිපතිතුමා ඉල්ලා අස් වෙලා යන එක. අපිත් අද දකුණේ ජනතාවත් එක්ක එකතු වෙලා ජනාධිපතිතුමාට කියන්නේ ඒක.

විනාශය නවතන්න
ලේඛිකා ශාන්ති දිසානායක


ජනාධිපතිව මහජන ඡන්දයෙන් තෝරා පත් කරගත්තත් ඔහුට මහජන අභිලාෂයන් ඉටු කරන්න බැරි වෙලා තිබෙනවා. ධුරයේ වැඩකටයුතු පටන් ගත්ත කාලයේ පටන් ම රටට අත් කර දුන්නේ අසාර්ථකත්වය. කාබනික වගාව, බදු මුදල් අහිමිකරගැනීම වගේ විශාල විනාශකාරී ක්‍රියා ඔහු විසින් සිදු කළා. ඔහු ඒ කරපු විනාශය දැන් නවත්වන්න කාලය හරි. හමුදා මානසිකත්වයක් එක්ක තමයි මේ ජනාධිපතිවරයා කටයුතු කරන්නේ. ඒ විදිහට ගත්ත තීරණත් අසාර්ථක වෙලා තිබෙනවා. ඒ නිසා සිදුකරන විනාශය නවත්වලා වහාම ජනාධිපතිවරයා ඉල්ලා අස්විය යුතුයි.

ජනාධිපති යවමු! ක්‍රමයත් පෙරළමු!
දේශපාලන විචාරක විදර්ශන කන්නන්ගර


මේ මොහොතේ දී ගෝඨාභය රාජපක්ෂ ඇතුළු රාජපක්ෂ නඩයේ වියරු පාලනය එරෙහි ජනතා විරෝධය සංධිස්ථානමය මොහොතකට ඇවිත් තිබෙනවා. රාජපක්ෂ ආණ්ඩුවේ මර්දන උපකරණ ඉතාම බිහිසුණු ලෙස ජනතාව වෙත එල්ල වෙලා තිබෙනවා. කලින් තිබුණු පාලනයේ වියරු බව නිසා තමයි රාජපක්ෂලාට 2015 දී ගෙදර යන්න සිදු වුණේ. ඒ වෙනකොට සිංහල බෞද්ධ බහුතරය රාජපක්ෂලාට පක්ෂපාතීව තිබුණේ. නමුත් දැන් මිනිස්සු එකාවගේ කෑ ගහලා කියන්නේ මේ වියරු පාලකයන්ට ගෙදර යන්න කියලා. ආර්ථික වශයෙන් පහළ මාලයේ සිටි ජනතාවගේ විරෝධය දැන් සමාජයේ හැම කොටසකටම පැතිරිලා ගිහින් ඉවරයි. ඒ නිසා ජනාධිපතිවරයා ඇතුළු ආණ්ඩුව ඉල්ලා අස් වෙන්න ඕනෑ. ඒ වගේ ම ඔවුන් සමගම ඒ ක්‍රමයත් ගෙදර යවන්න ඕනෑ.

ප්‍රජාතන්ත්‍රවාදයට ගරු කර යන්න
ජ්‍යේෂ්ඨ කථිකාචාර්ය විශාකා සූරියබණ්ඩාර


සෘජු මහජන ඡන්දයෙන් පත්කරගත් ජනාධිපතිවරයාට මහජනතාව එළියට බැහැලා දැන් කියනවා ගෙදර යන්න කියලා. ආණ්ඩුක්‍රම ව්‍යවස්ථාවට අනුව, රාජ්‍යයේ, ආණ්ඩුවේ ප්‍රධානියා වගේම සේනාධිනායකයා වන්නේ ජනාධිපතිවරයා. ඒ නිසා රාජ්‍ය පාලනයේ යම් වරදක් සිදුවෙනවා නම් ජනාධිපතිවරයා ඊට වගකිවයුතුයි. ළඟදී කරපු කතාවක දි ජනාධිපතිවරයා පිළිගත්තා ඔහු ගත්ත යම් යම් තීරණ වැරදුණා කියලා. ඒ වැරදුණේ ඔහුට පමණක් නෙවෙයි මුළු ජාතියටමයි. ඔහුගේ අදූරදර්ශී ක්‍රියාකලාපයන් තමයි මේ රට මේ අර්බුදයට ඇද දැම්මේ. ඔහු තමන්ගේ ඥාතීන්ට 75%කට වඩා ජාතික ධනයේ තීරණ ගැනීමේ බලය දුන්නා. මේ වෙලාව වෙනකොට ජනාධිපතිවරයා බලයේ රැඳී සිටිමින් අණ දෙමින් කරන්නේ සාපරාධී ක්‍රියාවක්. මේ වෙලාවේ ජනතා පරමාධිපත්‍යය හිමි ජනතාව පාරට බැස්සාම ඔවුන්ට විරුද්ධව අවම බලය කියලා දැවැන්ත මර්දනයක් ක්‍රියාවට නංවලා තිබෙනවා. ඒ නිසා ජනාධිපතිවරයා දැන් පරමාධිපත්‍ය බලය අවබෝධකරගෙන ඉවත් විය යුතුයි. නැතිනම් ඔහු බලයේ සිටිය යුතු ද නැතිද කියලා ප්‍රජාතන්ත්‍රවාදී විදිහට ජනමත විචාරණයක් හෝ පැවැත්විය යුතුයි. මේ මොහොතේ දෝෂාභියෝග ගෙන ඒම පහසු නෑ. ඒ නිසා ජනාධිපතිවරයා ප්‍රජාතන්ත්‍රවාදයට ගරු කර වහාම ඉවත් විය යුතුයි.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි