20.5 C
Sri Lanka
25 September,2022

සාහිත්‍ය කෘතියක් ටෙලිනාට්‍යයකට හැරවීම
විශාල අභියෝගයක්
අඳුන්ගිර ටෙලිනාට්‍ය අධ්‍යක්ෂ
ඉන්දික ධර්මතිලක

Must read

■ අමන්දිකා කුරේ

ටෙලිනාට්‍ය අධ්‍යක්ෂවරයෙකුගේ කාර්යභාරය ඔබ දකින්නේ කුමනාකාරයෙන් ද?


රූපවාහිනිය මාධ්‍යයෙන් කොයි තරම් දේවල් කරන්න පුළුවන් ද කියන එක අපිත් පෙන්නලා තියෙනවා සහ අපිත් දැකලා තියෙනවා. අපි කරන නිර්මාණයක් ඇතුළේ අධ්‍යක්ෂවරයාගේ දැක්ම කියන එක ගොඩක් බලපානවා. දේශපාලනික කාරණා, සංස්කෘතික කාරණා සහ සමාජීය කාරණා රසවින්දනය වැඩිකරමින් ප්‍රේක්ෂකයා අතරට ගෙන ඒම කරන්න සිදුවෙනවා ඔහුට. ඒ කරුණු රසවින්දනාත්මකව ඇතුළත් කිරීමත් අධ්‍යක්ෂවරයාගේ කාර්යභාරයක්. ඒකට නළුනිළියන් යොදාගන්නේ කොහොමද කියන එක ගැනත් මනා අවබෝධයක් තිබිය යුතුයි.

සාහිත්‍ය කෘතියක් ටෙලිනාට්‍යයකට හැරවීම මොන වගේ අභියෝගයක්ද?


සාහිත්‍ය කෘතියක් ටෙලිනාට්‍යයක් බවට පත්කිරීමේ දී ඒ තුළ තිබෙන රසය පවත්වාගෙන ප්‍රතිනිර්මාණය කළ යුතුයි. කෘතියක් විදිහට රසවිඳීම හා ටෙලිනාට්‍යයක් විදිහට රසවිඳිනවා කියන්නේ දෙකක්. කෘතියක් විදිහට ලියා පළ කර තිබෙන නිර්මාණයක් ටෙලිනාට්‍යයකට ගේන විට විශාල වගකීමක් තිබෙනවා අධ්‍යක්ෂවරයාට. ඒ, කෘතියේ රස බිඳින්නේ නැතිව ඊට වඩා රසවත් ලෙස නිර්මාණය ප්‍රේක්ෂකයන් අතරට ගෙන යන්නේ කොහොමද කියන අභියෝගය. අපි දැකලා තියෙනවා සමහර නිර්මාණ ටෙලිනාට්‍යයකට ගෙනෙන විට ඒ නිර්මාණයේ තිබුණු රසය නැති කළ අවස්ථා. ඒ වගේම මුල් කෘතියට වඩා හොඳට කළ ටෙලි නිර්මාණත් අපි දැකලා තියෙනවා.

ශාන්ති දිසානායක රචනා කළ අඳුන්ගිර කෘතිය ටෙලිනාට්‍යයකට නිර්මාණය කරන විට ඔබට මුහුණ දෙන්න වුණු අභියෝග මොන වගේ ද?


අඳුන්ගිර 1970 දශකයේ සිට 1990 දශකය දක්වා අවුරුදු 30ක කාල පරාසය තුළ සමාජයේ දේශපාලන වශයෙන්, සංස්කෘතිකමය වශයෙන් හා ආගමික වශයෙන් සිදුවුණු වෙනස්කම් ගැන කතාකරන ගමක සිදුවුණු දේවල් නිරූපණය කරන නිර්මාණයක්. 1970 සිට 1990 දක්වා ඒ කාල පරාසය ගැන දර්ශන තල ගොඩනගාගැනීම ඉතාම විශාල අභියෝගයක් වුණා. දැන් දුෂ්කර ගම්මානයකට ගියත් ඒ වගේ කාලයක තිබුණු දර්ශන තල සොයාගන්න අමාරුයි. එවැනි අවස්ථාවල අපට අවශ්‍ය දර්ශන තල අලුතෙන් සකසා ගන්න සිදුවෙනවා. මෙවැනි නිර්මාණ කරන විට විශාල පිරිවැයක් දරන්න සිදුවෙනවා. පිරිවැය දරනවා වගේ ම නිර්මාණයෙන් පිරිවැය සපුරා ගන්න හැකිවේවිද කියන ප්‍රශ්නයත් වර්තමානයේ බොහෝ නිර්මාණකරුවන් මුහුණ දෙන අභියෝගයක්.

අඳුන්ගිර නාට්‍යයේ වර්ණ සංයෝජනයේ විශේෂත්වයක් දැකිය හැකියි.


ඔව්, මම හිතුවා 1970 සිට 1990 දක්වා එන කාල පරාසය කොටස් තුනකට කඩලා වර්ණ සංයෝජනය කරන්න. මුල් කාල පරිච්ඡේදයට යොදලා තියෙන්නේ දුඹුරු පාට මිශ්‍ර වුණු වර්ණ. ටික ටික ඒ වර්ණ වර්ණවත් වෙන විදිහට තමයි නිර්මාණය කළේ. 1990 වන විට හොඳට වර්ණවත් වන ආකාරයෙන් වර්ණ සංයෝජනය කළා. 1970 තිබුණු දරිද්‍රතාවයෙන් හා සමාජීය කරණාවලින් මිදිලා වර්තමානයට පැමිණෙමින් තිබෙනවා කියන එක තමයි එයින් නිරූපණය කළේ. ප්‍රේක්ෂක ප්‍රතිචාරත් විවිධ විදිහට ඒ වර්ණ සංයෝජනය සම්බන්ධයෙන් ලැබිලා තිබුණා.

ඔබේ අලුත් නිර්මාණ දෙකකුත් මේ වන විට එළිදැක්වීමට නියමිතයි නේද?


අඳුන්ගිරට අමතරව ‘යාදින්නී’ සහ ‘රැහැයියෙක්’ කියලා ටෙලිනාට්‍ය දෙකක් එන්න නියමිතයි. රූගත කිරීම් බොහෝ දුරට අවසන්. රැහැයියෙක් කියන්නේ වෙනස් ම නිර්මාණයක් මට අධ්‍යක්ෂණය කරන්න ලැබුණු. අඳුන්ගිර වගේම එයත් වෙනස් ම නිර්මාණයක් වේවි කියලා මම බලාපොරොත්තු වෙනවා.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි