■ ඉඳුවර බණ්ඩාර
ඛනිජ තෙල් ලබා ගැනීම සඳහා ඉන්දියාවේ එක්සිම් බැංකුව ශ්‍රී ලංකාවට ඇමරිකානු ඩොලර් මිලියන 500ක් ලබාදීමේ ගිවිසුම පෙබරවාරි 02 වැනිදා අත්සන් තබා ඇත.
එම අවස්ථාවට ශ්‍රී ලංකා මුදල් අමාත්‍ය බැසිල් රාජපක්ෂ හා ශ්‍රී ලංකාවේ ඉන්දීය මහා කොමසාරිස් ගෝපාල් බාග්ලේ සහභාගිවූ බව ඉන්දීය මහා කොමසාරිස් කාර්යාලය නිවේදනය කරයි.
එම ගිවිසුමට ශ්‍රී ලංකාව වෙනුවෙන් මුදල් අමාත්‍යාංශ ලේකම් එස්ආර් ආටිගල හා ඉන්දීය පාර්ශ්වය වෙනුවෙන් එක්සිම් බැංකුවේ සාමාන්‍යාධිකාරි ගෞරව් භණ්ඩාරි අත්සන් තබා ඇත.
ශ්‍රී ලංකාවේ හදිසි අවශ්‍යතාව සඳහා ප්‍රතිචාර දක්වමින් ඉන්දියාවෙන් ඉන්ධන ආනයනය කිරීම සඳහා ශ්‍රී ලංකාවට සහයෝගය ලබාදීමක් වශයෙන් මෙම ණය මුදල ලබාදී ඇත. මෙම පහසුකම ලබාදී ඇත්තේ ඉන්දීය විදේශ කටයුතු අමාත්‍යවරයා හා බැසිල් රාජපක්ෂ මහතා අතර ජනවාරි 15 දින අන්තර්ජාලය ඔස්සේ පැවති සාකච්ඡාවක ප්‍රතිඵලයක් වශයෙන් බවත්, ඉන්දියාව ශ්‍රී ලංකාවට ලබාදී ඇති ඇමරිකානු ඩොලර් 900ක විදේශ මුදල් සහයෝගය තවදුරටත් පවත්වාගෙන යන බවත්, ඉන්දියාව ශ්‍රී ලංකාවට ලබාදී ඇති සංවර්ධන සහයෝගය ඇමරිකානු ඩොලර් බිලියන 4කට ආසන්න වන බවත් එම නිවේදනයේ වැඩිදුරටත් දැක්වේ.■
