අග්‍රාමාත්‍ය මහින්ද රාජපක්ෂ කොළඹ නවලෝක රෝහලට පසුගිය දා ඇතුළත් ව සිටි බව දැන් කවුරුත් දන්නා රහසකි. එහෙත් ඔහුගේ ජ්‍යෙෂ්ඨ පුත්‍රයා වන අමාත්‍ය නාමල් රාජපක්ෂ, මාධ්‍යවලට කියා සිටියේ, පියා නවලෝක රෝහලට ඇතුළත් ව නොසිටි බවත්, රෝගියකු බැලීම සඳහා පමණක් එහි ගිය බවත්, මවගේ උපන්දිනය වෙනුවෙන් සියල්ලන් තම නිවසේ එක්ව සිටි බවත් ය.
ඊට අමතරව ඔහු තවත් දේ ද කීවේ ය. ‘වෛද්‍යවරුන් පවා රෝගියකුට රෝගයක ඇත්ත තත්වය නොකියන බවත්, කිසිවකුගේ රෝග තත්වයක් එළිදරව් කිරීම සදාචාරයට පටහැනි බවත්’ ආදි ලෙස ය.
ඇමතිවරයා මේ කෙටි ප්‍රකාශයෙන් බොහෝ දේ වරදවා කියයි.
එකක්, අගමැතිවරයා නවලෝක රෝහලට ගියේ ලෙඩෙකු බැලීමට පමණක් බව ය. ‘මාධ්‍ය ලෙඩා මාරු කරගෙන’ යැයි ද ඔහු කීය. එසේ වුවත්, ජනවාරි 26 වැනි දා ‘ඩේලි මිරර්’ පුවත්පත මුල් පිටුවේ ප්‍රවෘත්තියක් පළ කරමින් කියා සිටියේ අගමැතිවරයාගේ කොඳු ඇට පෙළේ ශල්‍යකර්මයක් නවලෝක රෝහලේ දී කර ඇති බව ය. පැයක පමණ කාලයක දී ලැම්නෙක්ටොමි නම් වූ සුළු ශල්‍ය කර්මය ඔහුට කරන ලද්දේ විදේශතව සිටින ශ්‍රී ලාංකික වෛද්‍ය විශේෂඥයකු වන මහාචාර්ය හිලාලි නූර්දීන් බව ද එහි සඳහන් වෙයි. මහාචාර්යවරයා ලංකාවට මෙවර පැමිණි විට අගමැතිවරයා ඇතුළු ජ්‍යෙෂ්ඨ දේශපාලකයන් කිහිප දෙනකු ද ඔහුගෙන් ප්‍රතිකාර ලද බව ප්‍රවෘත්තිය කියයි. මේ ප්‍රවෘත්තිය රාජපක්ෂ අගමැතිවරයාගේ පාර්ශ්වයෙන් සාවද්‍ය යැයි කියා නැති නිසා, එයින් නාමල් රාජපක්ෂ ඇමතිවරයාගේ ප්‍රකාශය අසත්‍යයක් යැයි ඔප්පු වේ.
වෛද්‍යවරුන් රෝගීන්ට ඇත්ත තත්වය නොකියන බව ද ඇමතිවරයාට අනුව නියමයකි. එහෙත්, සියල්ලන් දන්නා කාරණය නම්, වෛද්‍යවරුන් විශේෂ අවස්ථාවල දී හැර රෝගියාට තම රෝගයේ ඇත්ත තත්වය හෙළිදරව් කළ යුතු බව ය. එය රෝගියාගේ අයිතිවාසිකමකි. නාමල් රාජපක්ෂ වරදා කියූ දෙවැනි කරුණ එයයි.
තුන්වැනි කරුණක් ද තිබේ. මාධ්‍ය මගින් පුද්ගලයකුගේ සෞඛ්‍ය තත්වය එළිදරව් කිරීම සාදාචාරාත්මක වරදක් බව ය. ඇත්තකි. සාමාන්‍ය පුද්ගලයකුගේ සෞඛ්‍ය තත්වය ජනමාධ්‍ය මගින් එළිදරව් කිරීම සදාචාරාත්මක වරදකි. එහෙත් මහජන යහපත සඳහා යම් කිසිවකුගේ සෞඛ්‍ය තත්වය එළිදරව් කළ යුතු අවස්ථාවක දී එසේ එළිදරව් කිරීමට වෘත්තීය ආචාර ධර්මවලින් ම ජනමාධ්‍යවලට අවසර දී තිබේ.
උදාහරණයක් හැටියට, යම් මහජන ධුරයක් හොබවන, ඒ කියන්නේ රාජ්‍ය නායකයන්, රජයේ නිලතල හොබවන්නන් ඇතුළු මහජනතාවගේ ජීවිත සමග එදිනෙදා ගැට ගැසී ඇති පුද්ගලයන්ගේ සෞඛ්‍ය තත්වය ගැන තොරතුරු එළිදරව් කිරීමට අවසරය ජනමාධ්‍යවලට ඇති අතර, එය මහජන යහපත වෙනුවෙන් මෙන් ම මහජනතාවගේ අයිතියට ගරු කිරීමක් ද වෙයි.
තමන්ගේ ඡන්දයෙන් පත් කර ගන්නා පුද්ගලයන් මෙන් ම රාජ්‍ය යාන්ත්‍රණයේ වගකිව යුතු තනතුරු හොබවන පුද්ගලයන් ද ඒ මහජන තනතුරු හෙබවීමට තරම් සෞඛ්‍යවත් අය ද යන්න ගැන දැන ගැනීමට මහජනතාවට අයිතියක් තිබේ. එනයින් අගමැති ධුරය තව දුරටත් දැරීමට මහින්ද රාජපක්ෂ මහතා සුදුසු සෞඛ්‍ය තත්වයක සිටී දැයි දැනගැනීමට ලංකාවේ ඔහුට ඡන්දය දුන් සහ නොදුන් සියලු දෙනාට ම අයිතියක් තිබේ. ඇයි ද යත්, ඔහු මේ රටේ දෙවැනි පුරවැසියා නිසා ය. අගමැතිකම මහජන ධුරයක් නිසා ය.
නාමල් රාජපක්ෂ මහතා සඟවන්නට උත්සාහ කළත්, ලෝකයේ හැම දියුණු රටක ම පාහේ මහජන ධුර දරන්නවුන්ගේ සෞඛ්‍ය තත්වය ඒ ඒ රජය විසින් ම ජනතාවට එළිදරව් කිරීම ප්‍රතිපත්තියක් හැටියට ම අනුගමනය කෙරේ. එසේ නොවන අවස්ථාවලදී ඒ කරුණු හඹා ගොස් හෙළිදරව් කිරීමට ද ජනමාධ්‍ය උත්සාහ කරයි. අමෙරිකාවේ ජනාධිපතිවරයා වසරකට වරක් නිල වශයෙන් ම එරට රජය විසින් පවත්වනු ලබන වෛද්‍ය පරීක්‍ෂණයකට ලක් විය යුතු ය. එහිදී ලැබෙන තොරතුරු මහජනතාවට විවෘත ය. මෑත දිනයක කම්ලා හැරිස්ට මුල් වරට අමෙරිකාවේ ජනාධිපතිකමට පත් කාන්තාව වීමට, පැය එකහමාරකට ඉඩ ඇබුණේ ජනාධිපතිවරයාගේ ඒ වෛද්‍ය පරීක්‍ෂණය නිසා ය. අපේ ඇමතිවරුන් සිතන්නේ නූතන ලෝකය ගැන කිසිවක් නොදන්නා මෝඩයන් පිරිසක් ලංකාවේ සිටින බව ද?.■
