20.6 C
Sri Lanka
6 October,2022

මහින්දගේ කුස්සියට
ජනපති කාර්යාල මුදල්

Must read

පාර්ලිමේන්තුවේ අනුමැතියකින් තොරව හා මූල්‍ය රෙගුලාසි කඩකරමින් ජනාධිපති කාර්යාලය සඳහා අයවැයෙන් වෙන්කරන ලද මුදල් භාවිත කරමින් අගමැති මහින්ද රාජපක්ෂ පදිංචිව සිටින කොළඹ විජේරාම මාවත නිවසේ මුළුතැන්ගේ නවීකරණය කර ඇත.


කොළඹ 07 විජේරාම මාවතේ අංක 117 නම් වූ අගමැති මහින්ද රාජපක්ෂ පදිංචි නිවස ඒ ආකාරයට ජනාධිපති කාර්යාලයේ මූල්‍ය ප්‍රතිපාදනවලින් නවීකරණය කර ඇති බව සඳහන් වන්නේ ජනවාරි 19 වැනිදා පාර්ලිමේන්තුවට ඉදිරිපත් කර ඇති ශ්‍රී ලංකා නාවික හමුදාවේ 2020 වර්ෂයට අදාළ වාර්ෂික වාර්තාවේය.


එම වාර්තාවට අනුව ශ්‍රී ලංකා නාවික හමුදාවට ජනාධිපති කාර්යාලයෙන් රුපියල් 3,400,000 හා රුපියල් 3,177,000 ලෙස 2020 වර්ෂයේ අවස්ථා දෙකකදී මුළු මුදල රුපියල් 6,577,000ක් වශයෙන් ප්‍රතිපාදනයන් දෙකක් ලැබී ඇති අතර ඒ ඉහත සඳහන් කරන ලද විජේරාම මාවතේ අගමැතිවරයා පදිංචිව සිටින නිල නිවසේ මුළුතැන්ගේ නවීකරණය කිරීම සඳහාය.


මේ සම්බන්ධයෙන් අනිද්දා හිටපු අමාත්‍යාංශ ලේකම්වරයකු වූ ටී අශෝක පීරිස් මහතාගෙන් කරන ලද විමසීමකදී ඔහු පැවසුවේ ඇමතිවරුන් හා රාජ්‍ය නිලධාරීන් පදිංචිව සිටින නිල නිවාස ගොඩනැගිලි දෙපාර්තමේන්තුව යටතේ පවතින බවත් ඒවායේ යම් අලුත්වැඩියාවක් කරන්නේ නම් එම දෙපාර්තමේන්තුව මගින් කරගත යුතු බවය. එහෙත් අලුත්වැඩියාවේ හදිසි අවශ්‍යතාවක් පවතී නම් එම නිල නිවස පරිහරණයට ලබාදී ඇති අමාත්‍යාංශයේ වැය ශීර්ෂය තුළ ඇති නිවාස හෝ ගොඩනැගිලි අලුත්වැඩියාව සඳහා වෙන්කර ඇති ප්‍රතිපාදනයකින් රාජ්‍ය පරිපාලන අමාත්‍යාංශයේ අවසරය යටතේ එකී අලුත්වැඩියාවන් කරගත හැකි බවය.


එහෙත් වැය ශීර්ෂයට අදාළ නොවන වෙනත් අමාත්‍යාංශයක් හෝ ආයතනයක් යටතේ ඇති නිල නිවසක් අලුත්වැඩියා කිරීමට මූල්‍ය රෙගුලාසි අනුව බලයක් නැති බව ඔහු පැවසීය. ඒ අනුව ජනාධිපති කාර්යාලය යටතේ පවතින නිල නිවාස සඳහා වෙන්කර ඇති මූල්‍ය ප්‍රතිපාදනවලින් අගමැතිවරයා පදිංචිව සිටින නිල නිවාසය අලුත්වැඩියා කිරීම මුදල් රෙගුලාසිවලට පටහැනි බව ඔහු අවධාරණය කළේය.


අශෝක පීරිස් මහතා වැඩිදුරටත් විස්තර කළේ මූල්‍ය රෙගුලාසිවලට පටහැනිව කටයුතු කිරීමේ ක්‍රමවේදය හඳුන්වා දුන්නේද ගෝඨාභය රාජපක්ෂ මහතා ආරක්ෂක අමාත්‍යාංශ ලේකම්වරයා ලෙස කටයුතු කළ සමයේදී බවත්, කොළඹ ෂැංග්‍රිලා හෝටලය සඳහා යුද හමුදා ඉඩම විකිණීමේදී ඒ සඳහා ලැබුණ මුදල් ඒකාබද්ධ අරමුදලට බැර නොකර අකුරේගොඩ හමුදා සංකීර්ණය ඉදිකිරීමට වෙනම ගිණුමක තැන්පත් කළ බවය. රජය වෙත ලැබෙන ඕනෑම මුදලක් ඒකාබද්ධ අරමුදලට බැරවී ඉන්පසු අවශ්‍ය කාර්යය සඳහා ලබාගත යුතු බවද ඔහු පැවසීය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි