■ අමන්දිකා කුරේ
පාස්කු ප්‍රහාරයත් සමග ඇතිවුණු බෝම්බ භීතිකාවත් සමග පසුගිය කාලයේ පෞද්ගලික රෝහලකින් බෝම්බයක් හමුවූ පුවතක් වාර්තා විය. නැවතත් සමාජය තුළ බෝම්බ සම්බන්ධයෙන් සාකච්ඡාවක් මතුව ආවේ පසුගිය ජනවාරි 11 වන දින බොරැල්ල සියලු ශාන්තුවරයන්ගේ දේවස්ථාන පරිශ්‍රයේ තිබී බෝම්බයක් සොයා ගැනීමත් සමගය. හඳුන්කූරක් සමග අටවා තිබූ එය හඳුන්කූර දැවී අවසන් වූ පසු පිපිරී යන ලෙස අටවා තිබූ බව පොලිසිය නිකුත් කළ මාධ්‍ය නිවේදනයක දැක්වුණි.
ඒ අනුව පොලිසිය විසින් සැක පිට පල්ලියේ අත් උදවු සඳහා යෙදී සිටි අයෙකු අත් අඩංගුවට ගනු ලැබූ අතර පසු දින එනම්, ජනවාරි 12 වන දින මැල්කම් රංජිත් කාදිනල් හිමියන් විසින් මාධ්‍ය සාකච්ඡාවක් කැඳවා පොලිසිය පවසනවාට වඩා වෙනස් කතාවක් හෙළි කරන ලදි.
පොලිසිය විසින් සීසීටීවී කැමරා දර්ශන හරිහැටි නිරීක්ෂණය කිරීමකින් තොරව මෙම සිද්ධිය විමර්ශනය කිරිම සිදු කරන බැවින් ඒ පිළිබඳව සෑහීමකට පත් විය නොහැකි බව කාදිනල් හිමි එහිදී පෙන්වා දෙන දුන්නේය. පොලිසිය ලබා ගෙන තිබුණේ ජනවාරි 11 වන දින සවස තුනෙන් පසු සීසීටීවී දර්ශන පමණක් බවත් සැකකරු ඊට පෙර පැමිණ බෝම්බය තබා යන ආකාරය ඇතුළත් සීසීටීවී දර්ශන එහිදී කාදිනල්තුමන් විසින් මාධ්‍යයට ලබා දෙන ලදි. එහිදී සැකකරුවා වශයෙන් අත්අඩංගුවට ගත් පුද්ගලයා පල්ලියේ සේවකයෙකු වන බවත් ඒ වෙනුවට සත්‍ය සැකකරුවා අත්අඩංගුවට ගන්නා ලෙසත් එම මාධ්‍ය හමුවේදී පොලිසිය වෙත දෝෂාරෝපණයක් එල්ල විය.
ඊට පිළිතුරු වශයෙන් පොලිසිය භාර ඇමති සරත් වීරසේකර විසින් මාධ්‍යයට පවසනු ලැබුවේ අත්අඩංගුවට ගනු ලැබූ පුද්ගලයාගේ කාමරයේ තිබියදී සෙලෝටේප් එකක් සොයා ගත් බවත් ඊට අමතරව ඔහුගේ කාමරයේ තිබූ ගිනිපෙට්ටියේ කූරු අඩුව තිබූ නිසාත් එම පල්ලියේ සේවකයා අත් අඩංගුවට ගනු ලැබූ බවයි.
කෙසේවුවත් පසුදින ම සීසීටීවී දර්ශනවල සිටි පුද්ගලයාව ඇඹිලිපිටිය පනාමුරේ ප්‍රදේශයේ දී අත්අඩංගුවට ගනු ලැබූ අතර කොළඹ අපරාධ කොට්ඨාසය හරහා මෙහි පරීක්ෂණ සිදු කරන බව පොලිසිය නිවේදනය කර තිබුණි. සිදුකළ ප්‍රශ්න කිරීම්වලදී එය ඔහුගේ වුවමනාවට නොව වෙනත් අයෙකුගේ වුවමනාවට සිදු කරන ලද්දක් බවට සැකකරු පවසා තිබුණි.
එම 65 හැවිරිදි සැකකරුගේ සාක්ෂි මත පසුව පිළියන්දල ප්‍රදේශයේ පදිංචි විශ්‍රාමික වෛද්‍යවරයෙකු මේ සිදුවීම සම්බන්ධයෙන් සැකපිට අත් අඩංගුවට ගන්නා ලදි. කොළඹ දකුණ අපරාධ විමර්ශන කාර්යාංශය විසින් මෙම විශ්‍රාමික වෛද්‍යවරයා අත්අඩංගුවට ගෙන තිබූ අතර දේවස්ථානයේ බෝම්බය තැබූ සැකකරු පවසා තිබුණේ මෙම වෛද්‍යවරයාගේ පෞද්ගලික සායනයේ ඔහු මුරකරුවෙකු වශයෙන් වසර ගණනක් සේවය කළ බවත් ඔහු තමාට මුදල් ලබා දී එම බෝම්බය දේවස්ථානයෙන් තබන ලෙස උපදෙස් දුන් බවත් ය. මෙම විශ්‍රාමික වෛද්‍යවරයාගේ නිවස තුළ තිබී ආයුධ කිහිපයක් සොයාගත් බවට පොලිසිය නිවේදනය කර තිබුණි. ඒ අතර වායු රයිෆල්, ටී 56ට සමාන හඳුනා නොගත් ගිනි අවියක් සහ රම්බෝ පිහියක් තිබී ඇති බව පොලිසිය පවසයි.
මෙම වෛද්‍යවරයාගේ පුත්‍රයා ජනවාරි 19 වන දින මාධ්‍ය හමුවක් කැඳවා තිබුණි. මෙම වෛද්‍යවරයා පසුගිය මහමැතිවරණයේ දී එක්සත් ජාතික පක්ෂයෙන් තරග කළ අපේක්ෂකයෙකු වන ඕශල හේරත් මහතාගේ පියා ය. ඕෂල හේරත්ගේ දේශපාලනය 2015ට පෙර මහින්ද රාජපක්ෂ පාලනයට සහයෝගය දැක්වූ එකක් වූ අතර පසුව 2015 යහපාලන ආණ්ඩුව ගෙන ඒමේදී සමාජ මාධ්‍ය හැසිරවීම පිළිබඳව කටයුතු කළ අයෙකි. පසු කාලීනව ඔහු හිටපු ජනාධිපති මෛත්‍රීපාල සිරිසේන මහතාගේ සම්බන්ධීකරණ ලේකම්වරයෙකු වශයෙන් ද කටයුතු කර තිබේ.
එම මාධ්‍ය හමුව කැඳවා තිබුණේ ඕෂල හේරත් මහතා විසින් ය. එහිදී ඔහු දැක්වූයේ මෙවන් අදහසකි. “17 වැනිදා රෑ 7.30ට විතර අපේ ගෙදරට විශාල පිරිසක් එක පාරම ඇවිල්ලා දොරවල් අරින්න කිව්වා. ගේට්ටු විවෘත කරන්නේත් නැතිව පොලිසිය වත්තට ඇතුළු වෙලා තිබුණා. මටත් පියාටත් සාලෙ පුටු දෙකක වාඩි වෙන්න කිව්වා. පසුව මාවත් උඩ තට්ටුවට යවලා පියා එක්ක විතරක් කතා කරන්න ඕනෑ කිව්වා. සහෝදරියන්ට කාමරවලම ඉන්න කිව්වා. සේවකයන්ට කුස්සියෙන් ඉන්න කිව්වා. ගෙදර පරීක්ෂා කරන්න ඕනෑ කිව්වා. සියලු දුරකථන දෙන්න කිව්වා. ඒ වගේම සියලු ඉලෙක්ට්‍රොනික් භාණ්ඩ දෙන්න කිව්වා. මගේත් සහෝදරියගේත් ලැප්ටොප් පරිගණක ගත්තා. මගේ කාමරය පරීක්ෂා කරන විට මගේ පුතා වතුර දාලා සෙල්ලම් කරන මැෂින් ගන් එකකට සමාන සෙල්ලම් තුවක්කුවක් ඒගොල්ලෝ ගත්තා. ඊට අමතරව මම තරුණ
කාලයේ ඉලක්කයට වෙඩි තියන්න මම එකතු කරපු වායු රයිෆල් වගයක් තිබුණා. ඊට අමතරව සිහිවටන විදිහට ලැබිලා අපේ ගෙදර ප්‍රදර්ශනයට තබලා තිබුණු විසිතුරු කැටයම් කරපු කඩු දෙකක් සහ ගෙදර තිබුණු වෙනත් පිහියක් පොලිසිය භාරයට ගත්තා ආයුධ කියලා. ඊට පස්සේ අපේ තාත්තාව එළියට එක්කගෙන ගියා. මම ඇහුවාම කිව්වා සියලු ශාන්තුවරයින්ගේ දේවස්ථානයේ බෝම්බය තියපු කෙනා කිව්වා කියලා අපේ තාත්තා තමයි බෝම්බය තියන්න කිව්වේ කියලා.“
මෙලෙස එම විශ්‍රාමික වෛද්‍යවරයා අත්අඩංගුවට ගෙන ගොස් තිබෙන අතර පොලිසිය විසින් ඕෂල හේරත් මහතාට පවසා තිබෙන්නේ ඔහුගේ පියාට මානසික ව්‍යාධි තත්වයක් තිබෙන බවයි.
“අපේ අම්මා මාස 6කට විතර කලින් නැතිවුණා. පොලිසිය කියනවා අම්මා නැතිවුණු තරහට තාත්තා සමාජය ගැන තරහකින් මානසික ප්‍රශ්නයක් නිසා මේවා කරනවා කියලා. තාත්ත ඒවා ප්‍රතික්ෂේප කළා. තාත්තාව අරන් ගියාට අපට අත්අඩංගුවට ගත්තා කියලා කිසි ලියවිල්ලක්වත් අපේ බඩු පිළිබඳව ලියවිල්ලක්වත් දුන්නේ නෑ. මංකොල්ලකාරයෝ ටිකක් ඇවිත් ගියා වගේ වැඩක් වුණේ. එකම සාක්ෂිය තිබුණේ ගෙදර සීසීටීවී පද්ධතියේ මෙහෙම මේ පිරිස ඇවිත් තාත්තාව අරන් ගියා කියලා රූගත වෙලා තිබුණු එක. මගේ ෆෝන් ලැප්ටොප් පහුවෙනිදාම දෙනවා කියලා අරන් ගියේ. නමුත් තවම ලැබුණේ නෑ. මම දේශපාලන සමාජ ක්‍රියාකාරිකයෙකු නිසා විපක්ෂයට හා ආණ්ඩුවට වැදගත් වෙන දේශපාලනික තොරතුරු ජංගම දුරකථනවල තිබෙනවා. මේ දේවල් භාරගත්තා කියලා ලැයිස්තුවක්වත් දුන්නේ නෑ.“
සිය පියාව පොලිස් භාරයට ගනු ලැබුවද මේ වන තෙක් ඔහුව බැලීමටවත් අවස්ථාවක් ලබා නොදුන් බව ඕෂල හේරත් මහතා පවසයි.
“මම රෑ පොලිසියට කතා කළාම පහුවදා උදේ පොලිසියට ඇවිත් තාත්තාව බලන්න පුළුවන් කිව්වා. අපට එන්න කිව්වේ කොල්ලුපිටිය පොලිසියට. මම නීතිඥවරුන් සමග උදේ 9ට එතැනට ගියා. කොල්ලුපිටියෙන් මුලින් ම කිව්වා එහෙම එකක් දන්නේ නෑ. එහෙම කෙනෙක් ගෙනැල්ලා නෑ කියලා. පැය ගානක් ගියාට පස්සේ තමයි කිව්වේ තාත්තා ඉන්නවා කියලා. නීතිඥවරු තාත්තාට කතා කරන්න අවස්ථාව ඉල්ලුවා. තාත්තාට දෙන්න මාළු පාන් ගෙඩි දෙකක් අරන් ගියා, ඒකවත් දෙන්න දුන්නේ නෑ. පැය ගානක් ගියාට පස්සේ තමයි ඒකත් දෙන්න දුන්නේ. අපි දැක්කේ නෑ තාත්තාව. තාත්තාව කොල්ලුපිටියේ පොලිසියේ උඩ තට්ටුවට අරන් යනවා අපි දැක්කා. ඒ වෙලාවේ නීතිඥවරු කතා කරන්න උත්සාහ කළත් කතා කරන්න දුන්නේ නෑ. එතනට ආව ඉහළම නිලධාරියා නියෝජ්‍ය පොලිස්පති තෙන්නකෝන්. නීතිඥවරු ගිහින් ඔහුගෙන් විමසුවා සේවාදායකයාට කතා කරන්න ඕනෑ කියලා. ඔහු කිව්වා තව ටිකකින් ගිහින් කතා කරන්න හැබැයි, මෙයාට කතා කරන්න දෙන්න බෑ කියලා මාව පෙන්නුවා. මගේ ගැනත් ප්‍රශ්න තියෙනවා කිව්වා. නමුත් මගෙන් කට උත්තරයක්වත් ගත්තේ නෑ.“
සිය පියා හමුවීමට අවස්ථාවක් නොලැබුණු තැන සවස 3ට පමණ මානව හිමිකම් කොමිසමේ පැමිණිල්ලක් දැමීමට ඕෂල හේරත් මහතා කටයුතු කර තිබෙන අතර මානව හිමිකම් කොමිසමෙන් පොලිසියෙන් ඒ පිළිබඳව විමසන විට එවැනි පුද්ගලයෙකු අත්අඩංගුවේ නොමැති බවට පවසා තිබේ. නැවතත් පැමිණ සිටින නීතිඥවරුන් සහ පැමිණිලිකරු ඔහුගේ පියා කොල්ලුපිටිය පොලිසියේ රඳවාගෙන සිටින බවට දැක තිබෙන බව පවසා විමසූ විට එවැනි පුද්ගලයෙකු අත්අඩංගුවට ගෙන තිබෙන බවට පිළිගෙන ඇති පොලිසිය ඔවුන්ට විනාඩි 15කින් සැකකරු හමුවීමට අවස්ථාව ලබා දෙන බව පවසා ඇති බැවින් නීතිඥවරුන් සවස 5.30ට නැවත කොල්ලුපිටිය පොලිසියට ගොස් තිබේ.
කෙසේවුවත් තවමත් පියා හමුවීමට නීතිඥවරුන්ට අවස්ථාව ලබා දී නොමැති බවට ඕෂල හේරත් මහතා චෝදනා කරයි.
ඔවුන් මානව හිමිකම් කොමිසමේ රැඳී සිටින අතරවාරයේ නිවසට පැමිණි පොලිස් කණ්ඩායමක් නිවසේ සීසීටීවී පද්ධතිය ගලවාගෙන ගොස් තිබෙන අතර ඕෂල මහතාගේ සොයුරියගෙන් කට උත්තරයක් ද ලබාගෙන ඇත. නිවසේ සේවකයෙකු ලවා මෙම පද්ධතිය ගලවාගෙන ඇති අතර සොයුරියගෙන් ලබා ගත් කට උත්තරය අවසානයේ සීසීටීවී පද්ධතිය ඇයගේ කැමැත්තෙන් රැගෙන යන බවට අත්සන් ලබා ගෙන ඇත. ඕෂල මහතා පෙන්වා දෙන්නේ රැගෙන ගිය ඉලෙක්ට්‍රොනික් උපාංග හා භාණ්ඩ රැගෙන යාමට අදාලව තිබූ එකම සාක්ෂිය ද නැති වී ඇති බවයි. නිවසේ සේවකයන් දෙදෙනාවද පොලිසිය විසින් රැගෙන ගොස් ඇති අතර ඕෂල මහතාගේ බිරිඳ, සොයුරිය හා දරුවා යන තිදෙනා ඥාති නිවසකට රැගෙන යාමට උත්සාහ කිරීමේ දී ඔවුන්ට එලෙස පිට වීමට අවසර නැති බවට නිවසේ ගේට්ටුව අසල රඳවා සිටි පිළියන්දල පොලිසියේ නිලධාරීන් විසින් බාධා කර ඇත. ඔවුන් එසේ රඳවා තබා ගැනීමට අදාළව රැඳවුම් නියෝගයක්වත් මේ වන තෙක් නිකුත් කර නොමැත.
විශ්‍රාමික වෛද්‍යවරයා අත්අඩංගුවට ගැනීමට අදාල රැඳවුම් නියෝගයක් තවම නීතිඥයන්ට පොලිසිය ඉදිරිපත් කර නොමැත. වායු රයිෆල් හමුවූයේ තම කාමරයෙන් බවත් මේ වන තෙක් ඒ සම්බන්ධයෙන් තමගෙන් කට උත්තරයක් ලබා නොගෙන සිය පියා අත්අඩංගුවට ගත්තේ මන්දැයි ඕෂල මහතා ප්‍රශ්න කරයි.
පොලිසිය මුල සිටම පරීක්ෂණවල ව්‍යාකූල තත්වයක් ප්‍රදර්ශනය කළ අතර මුල දී සැකපිට අල්ලා ගත් පල්ලියේ සේවය කළ 14 හැවිරිදි දරුවා විසින් එම බෝම්බය තැබූ බව මුල් අවස්ථාවේ ප්‍රකාශ කරන ලදි. පසුව කාදිනල් හිමියන්ගේ ප්‍රකාශයෙන් මාධ්‍ය හමුවේ සිදු කළ විවේචනාත්මක අනාවරණයෙන් පසුව පොලිසිය කාදිනල් හිමියන් ප්‍රදර්ශනය කළ සීසීටීවී දර්ශනවල සිටි පුද්ගලයා අත්අඩංගුවට ගත් බව කියුවත් ඔහුගේ කිසිදු විස්තරයක් නිකුත් කර නොමැත.
අප කළ විමසීමක දී පොලිස් මාධ්‍ය ප්‍රකාශක නිහාල් තල්දුව පැවසුවේ ඒ පිළිබඳව තොරතුරු තමා නොදන්නා බවයි. මේ වන විට කී දෙනෙකු මේ සිද්ධියට අදාළව අත්අඩංගුවේ සිටින්නේ දැයි විමසූ විටද ඔහු ඒ බව නොදන්නා බව පැවසුවේ ය. එසේ නම් තොරතුරු දැනගත හැක්කේ කෙසේදැයි විමසූ විට ඔහු පැවසුවේ කොළඹ අපරාධ කොට්ඨාසයෙන් පරීක්ෂණ අවසන් වී වාර්තාවක් ලැබුණු පසු තොරතුරු ලබා දිය හැකි බවයි.
දේවස්ථානයේ බෝම්බය තැබූ පුද්ගලයා සිය පියාගේ ආරක්ෂක නිලධාරියෙකු වශයෙන් කිසි දිනක කටයුතු කර නොමැති බවත් මේ හරහා සම්බන්ධයක් සාදා සිය පවුල බොරැල්ල බෝම්බයේ බිල්ලක් බවට පත් කිරීමට ආණ්ඩුව කටයුතු කර ඇති බවත් ඕෂල හේරත් මහතා පවසයි. බෝම්බයක් තැබීමට සිය පියාට හේතුවක් නොමැති බැවින් ඔහුට මාසික ආබාධයක් ඇති බවට කතාවක් ගොතන බවද ඔහු පෙන්වා දෙයි. කතෝලික සභාව ද මීට පෙර ප්‍රකාශ කළේ පොලිසිය විසින් සිදු කරන පරීක්ෂණවල විශ්වවසනීයත්වය පිළිබඳව ප්‍රශ්නයක් ඇති බවයි. මේ වන විටත් බෝම්බය තැබූ පුද්ගලයා පිළිබඳව තොරතුරු සොයා යනවා වෙනුවට පරීක්ෂණ වෙනත් අතකට හරවා ඇති බවක් පෙනෙන්නට තිබේ. පාස්කු බෝම්බ ප්‍රහාර සිදු වීම හා ආණ්ඩුව සම්බන්ධයෙන් කාදිනල් හිමිගේ පටන් විවිධ පාර්ශ්ව ආන්දෝලනාත්මක අදහස් දක්වමින් සිටි අවස්ථාවක මෙවැනි බෝම්බ සිදු වීමක් සිදු වීමද විමතියට කරුණකි. එම සිදුවීම පිළිබඳව ද සිදු කෙරෙන පරීක්ෂණවල ව්‍යාකුලභාවයන් නිරීක්ෂණය වීම ඊටත් වඩා විමතියට කරුණකි.■
