22.9 C
Sri Lanka
27 September,2022

දේශපාලනය දන්නෙ නැතිව රටක් පාලනය කරන්න බැහැ
හිටපු රාජ්‍ය අමාත්‍ය නීතිඥ
සුසිල් ප්‍රේමජයන්ත

Must read

■ ඇන්තනී වෙරංග පුෂ්පික

දෙල්කඳ ඉරිදා පොළට ගිහිල්ලා ගත්ත ස්වීප් එක දවස් දෙකක් යන්නත් කලින් ඇදිලා තිබෙනවා කියල වගේ තමයි පේන්න තියෙන්නේ.


මම පොළට යන එක පොඩි කාලෙ ඉඳන්ම කළේ ගෙවල් කිට්ටුව තමයි පොඩි දවස්වල ඉදන්ම ඉරිදා පොළ තිබුණේ. දැන් පොළ කරන ඉඩමත් ගන්න මම සම්බන්ධ වුණා. තාම ඉඩම ගත්ත මිනිස්සුන්ට වන්දි ගෙවලාත් නැහැ. නමුත් 2014 මහින්ද රාජපක්ෂ ජනාධිපතිතුමාත් එක්ක අපි ඕක විවෘත කළා. ඕක අපේ ගමේ පොළ. අද වෙළෙන්දො සිය ගණනක් සහ පාරිභෝගිකයො දහස් ගණනක් ඒ සේවාව ලබා ගන්නවා. පොඩි කාලෙ පුරුද්දට මම කොළඹ ඉන්නවා නම් ඉරිදා පොළට යනවා සතියකට ඕන කරන එළවළු ටික, තුනපහ ටික අරගෙන එන්න. එදත් ගිය වෙලාවෙදි මාධ්‍ය සහෝදරයෙක් මම දන්නෙත් නැහැ එතන ඉඳලා වෙන වෙන වෙළෙන්දන්ගෙන් තොරතුරු ගන්නවාත් එක්ක මගෙනුත් ඇහුවා. අමුමිරිස් කිලෝ එකක් රුපියල් 1200යි. ඔබතුමා ඒ ගැන මොකද්ද කියන්නෙ කියලා. මම කිව්වෙ එළවළු ඵලදාව අඩු වෙන්න හේතුව පොහොර නැති වීම, කෘමි නාශක වල්පැළ නාශක නැති වීම. ඒකෙන් එළවළු ඵලදාව අඩු වෙලා වෙළඳපොළට ලැබෙනකොට ඉල්ලුමත් එක්ක මිල වැඩි වෙනවා. ඒක තමයි මේ වෙලා තියෙන්නෙ සීසන් එක නොවන කාලෙකදි. එහෙම නම් ඇහුවා මේකට වගකියන්න ඕන කවුද කියලා. මම කිව්වා විෂය භාර ඉන්න ඇමතිවරු ඇතුළු නිලධාරීන් ඒකට වගකියන්න ඕන කියලා. කෘෂිකර්ම වෙළඳ, ආහාර ඔන්න ඔය වගේ විෂයන් තිබෙන අය. මම කිව්වෙ ජනතාවගේ ප්‍රශ්නයක්. පොළේදි මට කියන්න බැහැනෙ නෑ එහෙම නෑ මේක වෙන හේතුවක් කියලා. එහෙම බොරු කියන්න බැහැනේ. මම ඇත්ත ජනතාව වෙනුවෙන් ප්‍රකාශ කළා. ඕක තමයි එදා මම කරපු දේ.

එතකොට ජනතාව වෙනුවෙන් ඇත්ත කතා කිරීම තමයි රාජ්‍ය ඇමති ධුරයෙන් ඉවත් කරන්න හේතු වෙලා තිබෙන්නේ..


කෘෂිකර්මය පිළිබඳව ප්‍රතිපත්ති තීන්දුව වැරදියි. ජනාධිපතිතුමා නෙමෙයි, කවුරු ඒ තීන්දුව ගත්තත්. කෘෂිකර්මය සම්බන්ධව කාබනික පොහොර යොදවනවා කියන එක ප්‍රතිපත්ති තීන්දුවක්. ඒක හරියි කියමුකෝ පරිසර හිතකාමී දෙයක් නිසා. ප්‍රශ්නෙ තියෙන්නේ ඒක ක්‍රියාත්මකවීම සම්බන්ධව තිබුණ අඩුපාඩුකම්නෙ. ගොවීන් දැනුවත් වෙලා නැහැ. කාබනික පොහොර සූදානමක් නැහැ. වෙලාවකට නැනෝ ගේනවා, වෙලාවකට චීන පොහොර ගේනවා, චීන පොහොර ආපහු ප්‍රතික්ෂේප කරනවා. අවසාන වශයෙන් මේ ගත්ත තීන්දුවල රරට පෙනෙන්න ප්‍රතිඵලයක් තිබෙනවානේ. කිසිම ප්‍රතිඵලයක් නැති දෙයක්නේ අවසාන වශයෙන් සිද්ධවෙලා තියෙන්නේ.

ඇමති ධුරය ඉවත් කරන්න කලින් දවසෙත් ඔබ ගැන කැබිනට් එකේ දී කතාවෙලා තිබෙනවා.


ඔව්. කැබිනට් මණ්ඩලයෙත් සාකච්ඡාවෙලා තිබෙනවා. මම ගැන විතරක් නෙමෙයි තවත් අය ගැනත් මේ විදිහටම සාකච්ඡා වෙලා තිබෙනවා. ඕලෙවෙල් පාස් නැති වුණාට ආණ්ඩු පක්ෂ සංවිධායකවරු දැන් ලොකු චරිතයක් වෙලානේ. මේගොල්ල තමයි ආණ්ඩුවේ ප්‍රතිපත්ති තීරණ ගන්න සහාය දෙන්නෙ. මට කනගාටුයි, මහින්ද රාජපක්ෂ මැතිතුමා 2005 ජනාධිපතිවරණයට ඉල්ලනකොට එතුමාව පරද්දන්න වැඩ කරපු අය තමයි දැන් මහ ලොකුවට කතා කරන්නේ. ඒක නිසා මම සැලෙන්නෙ නැහැ. ඒගොල්ලොන්ට වඩා මම දේශපාලනිකව ඉහළින් ඉන්නේ.

ඒ කියන්නේ තව අය ගැනත් කතාවෙලා තියෙනවා..


එදා කැබිනට් රැස්වීමේදි තව කිහිපදෙනෙක් ගැන කතාවෙලා තියෙනවා. ඉස්සරහට යද්දි ඒ කවුද කියලා දැනගන්න ලැබෙයි. මම මගේ යුතුකම් කොටස ඉටු කරලා තිබෙනවා. මම කටයුතු කරන්නේ ජනතාව වෙනුවෙන් ඉතින් ඒක නිසා මට මේක ප්‍රශ්නයක් නැහැ. රාජ්‍ය ඇමතිධුරයක් කියන්නෙ මොකද්ද, මම කැබිනට් ඇමති කෙනෙක් විදිහටම අවුරුදු කීයක් හිටියද?

රාජ්‍ය අමාත්‍ය ධුරයෙන් ඉවත් කිරීම සම්බන්ධව ඔබට හේතුවක්වත් කිව්වෙ නැද්ද?


කිසිම හේතුවක් කිව්වෙ නැහැ. ජනාධිපතිතුමාට බලය තිබෙනවා ඇමතිවරු පත් කරන්නයි, ඉවත් කරන්නයි. ඒ අනුව ජනාධිපති ප්‍රතිපාදන අනුව ඔහු කටයුතු කරලා තිබෙනවා. හවස මට රාජ්‍ය අමාත්‍ය ධුරයෙන් ඉවත් කළා කියලා ලිපියකින් දැනුම් දීලා තිබෙනවා. ඒකේ හේතුවක් සඳහන්වෙලා නැහැ. විධායක ජනාධිපති බලතල අනුව ඉවත් කළා කියල තමයි සඳහන් වෙලා තිබෙන්නේ.

අගමැතිතුමාවත් කෝල් එකක් දීලා කතා කළේ නැද්ද?


අගමැතිතුමා නම් මට හවස දුරකථන ඇමතුමක් දුන්නා. ඉතින් මම එතුමා එක්ක බොහොම සුහදව කතා කරලා, මම කිව්වා ඔබත් එක්ක අපි අවුරුදු ගණනාවක්ම වැඩ කළා, මේ විදිහෙ ප්‍රශ්න නම් ඇති වුණේ නැහැ. මේ පෙන්නලා තිබෙන්නේ දේශපාලනය සම්බන්ධ දැනුම පිළිබඳ ප්‍රශ්නයක් කියලා මම අගමැතිතුමාට කිව්වා.

අපි දැක්කා පහුගිය ටිකේම ඔබ වැනි ජ්‍යෙෂ්ඨ පාර්ලිමේන්තුවේ දීර්ඝ කාලයක් හිටිය මන්ත්‍රීවරු සහ සමහර ඇමතිවරුම ගොඩක් කළකිරීමෙන් ඉන්නේ.


මගේ හා සමාන මතයක් දරන මන්ත්‍රීවරු සහ ඇමතිවරු සෑහෙන්න පිරිසක් ඉන්නවා. දේශපාලනය වෙනුවෙන් ජීවිත කාලයම කැප කරලා ජනාධිපතිවරු හදන්න ආණ්ඩු හදන්න කටයුතු කරපු පිරිස් ඉන්නවා. ඒ අයටත් අද වෙලා තිබෙන්නේ එකම ඉරණම.

දැන් ආණ්ඩුව පැත්තෙන් ඔබ සාමූහික වගකීන්මෙන් කටයුතු කළේ නෑ කියලාත් කියනවා.


සාමූහික වගකීමක් තිබෙන්නේ කැබිනට් ඇමතිවරුන්ට විතරයි. රාජ්‍ය ඇමතිවරුන්ට ඒක අදාළ වෙන්නේ නැහැ. ව්‍යවස්ථාවෙන්ම ඒක සඳහන් කරලා තිබෙනවා. දැන් ඔය කතා කරන්නෙ ව්‍යවස්ථාව ගැනවත් දන්නේ නැති මිනිස්සූ.

රෝහිත අබේගුණවර්ධන ඇමතිතුමා ඔබගේ රාජ්‍ය අමාත්‍ය ධුරය ඉවත් කිරීමෙන් පසු බරපතළ ප්‍රකාශයක් කරනවා ඔබ ආණ්ඩුවෙ ඇතුළේ ඉඳගෙනම ඩබල් ගේමක් ගැහුවා කියලා..


අපි කවදාවත් ඩබල් ගේම් ගහලා නෑ. අනේ රත්තරනේ කියලා තමයි කියන්න වෙන්නෙ ඒ අයට. ඒ අයට කියන්න තියෙන්නේ අධිකරණවල නඩු වැටිලා තිබෙන්න හේතුව පොඩ්ඩක් රටට කියලා කතා කරන්න කියලා තමයි. මේ අය ප්‍රාදේශීය සභාවෙ ඉන්නකොට මම මහ ඇමති. දැන් ලොක්කො වෙලා හිටියාට කොලේකුයි පෑනකුයි දීලා මම කියන වචන පහක් සිංහලෙන් ලියා ගන්න බැරි අය. මේ අය හැම තිස්සෙම කියන්නේ බැරි නම් යන්න කියලා. අඩුම තරමේ සාමාන්‍ය පෙළවත් සමත් වෙලා තියෙනවා නම් ජනතාව හිතයි යමක් තේරෙනවා කියලා.

මේ ආණ්ඩුව ආවේම උගත් බුද්ධිමත් පුද්ගලයොත් එක්ක වැඩ කරනවා කියාගෙනනේ..


මේ ආණ්ඩුවට උගත් බුද්ධිමත් අය අවශ්‍ය නැහැ. මම ගිය සුමානේ මේ පත්තරේටම කියපු විදිහට වැඩිය දැනුමක් තියෙන අය පාලනය කරන්න අමාරුයිනේ. ඒක නිසා මේ ආණ්ඩුවට කියන දේ අහගෙන යස් සර් කියාගෙන ඉන්න පිරිසක් තමයි අවශ්‍ය. ඒ කට්ටියත් එක්ක තමයි අද වැඩ කරගෙන යන්නේ.

රාජ්‍ය අමත්‍ය ධුරයෙන් ඉවත් කරන්න ප්‍රධාන චෝදනාවක් විදිහට කියන්නේ ආණ්ඩුවේ වැඩපිළිවෙළ විවේචනය කළා කියලනේ. නමුත් ඊට වඩා බරපතළ විවේචන ආණ්ඩුවේම ඉන්න කැබිනට් ඇමතිවරු කරලා තිබෙනවා. කැබිනට් තීරණයක් සම්බන්ධයෙන් අධිකරණයටත් ගිහිල්ලා තියෙනවා..


ඉස්සරහට තව ගොඩක් දේවල් වෙයි. මේ ආණ්ඩුව ගමන් කරන්නේ අර්බුදයෙන් ගොඩ එන්න නෙමෙයි අර්බුදයෙන් තවත් අර්බුදයකටම යන්න.

පහුගිය දවස්වල අලුත් ව්‍යවස්ථාවක් ගැන සාකච්ඡාවක් තිබුණා. ඔබම තමයි පාර්ලිමේන්තුවේදි කිව්වෙ අපි ලයිට් කණු වෙන්න සූදානම් නැහැ කියලා. එතකොට දැන් ඒ අයට ඕනෑ විදිහකට ව්‍යවස්ථාවක් හදාගන්න කියලා පැත්තකට වෙලා බලන් ඉන්නවාද?


අපි ජනතාවගෙ ඡන්දයෙන් පාර්ලිමේන්තුවට ගියේ ජනතාව වෙනුවෙන් පෙනී ඉන්න. ඒ කාර්යභාරය ඉදිරියටත් ඉටු කරනවා. දැන් වෙලා තියෙන්නේ ව්‍යවස්ථාවට වඩා මේ රටේ ජනතාව ජීවත්වීමේ ප්‍රශ්නය. ගෑස් පුපුරයි ද කියලා බයෙන් තොරව ජීවත් වෙන්න පුළුවන් නිවසක් තියෙන්න ඕනෑ. අද බලශක්තිය පිළිබඳ ප්‍රශ්නයක් තියෙනවා. කොයි වෙලාවෙ ලයිට් කපයි ද තෙල් නැති වෙයි ද මේ ආදි වශයෙන් බරපතළ අවිනිශ්චිතතාවකට රටේ ජනතාව මුහුණපාලා තිබෙන්නේ. ඉතාම ඛේදනීයයි මේ තත්වය. ජනතාවට ජීවත්වෙන්න බැරි තත්වයක් උදාවෙලා තිබෙනවා. ඒ නිසා අපි ඒ වෙනුවෙන් පෙනී සිටිනවා.

ඊයේ පෙරේදා බැසිල් රාජපක්ෂ මුදල් ඇමතිතුමා ඉදිරිපත් කළ සහන මල්ලෙන් මේ අර්බුදය වහ ගන්න පුළුවන් වෙයිද?


අය වැය විවාදය ඉවර කළේ දෙසැම්බර් 12 වෙනිදා. දන් මේ 2022 ජනවාරි. එතකොට දැන් අයවැයේදී ඉදිරිපත් කළ යෝජනා ගැන මොකද්ද කියන්නේ. අය වැයේදී දෙන්න තිබුණනේ ඔය සහන මල්ල. කොහොමද මේ අවුරුද්දෙ අලුතෙන් ඩොලර් බිලියන 229ක් හොයාගන්නෙ? හැබැයි ප්‍රශ්නෙ තියෙන්නෙ සහන මල්ලෙ නෙමෙයි එතනින් ඇතිවන මිල උද්ධමනය. ඒ නිසා මේක සාර්ව ආර්ථිකයක් හැටියට හිතනවා මිසක් හුදෙක් තමන්ගෙ තිබෙන අඩුපාඩුකම් වසා ගන්න, ජනතාවට යම් ආකාරයක සහනයක් ලැබුණා යැයි පෙන්වන්න මතයක් ඇති කරන්න කරන වැඩෙන් මම හිතන්නේ තවත් ආර්ථික ප්‍රපාතයකට යන එක. තව දුරටත් මේ රටේ ජනතාව මේ වගේ දේවල්වලින් රැවටෙන්නෙ නැහැ.

දේශපාලන පරිණතභාවයක් ඇති නායකත්වයක් නොමැතිවීමද ඔබ හිතන්නේ මේ තත්වයට හේතුව?


දේශපාලනය ගැන දැනගෙන ඕනෑ රටක් පාලනය කරන්න. දේශපාලනය ගැන දන්නෙ නැතුව රටක් පාලනය කරන්න බැහැ. ඒක අද සක්සුදක් සේ පැහැදිලිවෙලා තියෙනවා. ගෙදර ඇතුළේම ආදර්ශයක් තිබියදී ඒ ආදර්ශය නොගැනීම කනගාටුවට කාරණාවක්. මහින්ද රාජපක්ෂ අගමැතිතුමා සමඟ ඔහු ජනාධිපති ලෙස සිටිය දී අවුරුදු11ක් කටයුතු කළා. හැබැයි මේ වගේ ප්‍රශ්න ඇති වුණේ නැහැ.

ඔබ මේ ගැන දැනගෙන නෙමෙයිද 2019 ඡන්දෙදි උදවු කරලා පොහොට්ටුවෙන්ම තරග කළේ?


ඒවා අපි දැනගෙන හිටියා. නමුත් මහින්ද රාජපක්ෂ මැතිතුමාගේ පෙරමුණ ගැනීමත් සමග අපි එතුමාට ගරු කිරීමක් වශයෙන් තමයි ඒ සහයෝගය ලබා දුන්නේ.

පාර්ලිමේන්තුවෙ තුනෙන් දෙක තිබෙන නිසා ආණ්ඩුවට කිසිම ප්‍රශ්නයක් වෙන්නෙ නෑ කියලා තමයි හිතාගෙන ඉන්නේ.


එහෙම හිතාගෙන හිටියා 2015 මහින්ද රාජපක්ෂ ජානාධිපතිතුමා පරදිනකොටත්. එතකොට මීට වඩා පිරිසක් හිටියා. නමුත් පැරදුණා. පළාත් සභා නවයෙන් අටක්ම අපි දිනලා තිබුණේ. ඒත් පැරදුණා. මේ දේශපාලනය නොදැන කරන කතා ගැන අපිට තියෙන්නේ උපේක්ෂා සහගතව බලන් ඉන්න එක.

තෙල් ටැංකි ගැන නැවත සාකච්ඡාවක් ඇවිත් තිබෙනවානේ. මොකද්ද මන්ත්‍රීතුමා තෙල් ටැංකි ගැන තියෙන ඇත්ත කතාව?


තෙල් ටැංකි අපි කවදාවත් කාටවත් දුන්නේ නැහැ. එහෙම ගිවිසුමකුත් නැහැ. ගිවිසුමක් තිබුණත් ඒක දැන් අවලංගුයි. දැන් තෙල් ටැංකි ඉන්දියාවට දෙන්න ඕනෑ වෙනකොට විවිධ කතා කියනවා. මේක ඉන්දියාවත් එක්ක රාජ්‍ය තාන්ත්‍රිකව විසඳාගත යුතු ප්‍රශ්නයක්. අපට අවාසිසහගත ලෙස විසඳා ගැනීම සඳහා දරන ප්‍රයත්නය ගැන ගැටලුවක් තිබෙනවා.

ඒ වගේම මේ ආණ්ඩුව ගෙනියන විදේශ ප්‍රතිපත්තියත් ප්‍රශ්නසහගතයි.


මේ රටේ තිබුණෙ නොබැඳි විදේශ ප්‍රතිපත්තියක්. අනම්‍ය විදේශ ප්‍රතිපත්තියක් පවත්වාගෙන යාමට නොහැකි වීමෙන් එක එක රටවලට කොන්ද නවන තැනකට මේ ආණ්ඩුව පත්වෙලා තියෙනවා.

ඉදිරියේදී ඔබ මොනවගේ දේශපාලන ගමනක්ද යන්න හිතාගෙන ඉන්නෙ?


දැනට පක්ෂයක සාමාජිකයො හැටියට පාර්ලිමේන්තුවේදි එකඟ වෙන්න පුළුවන් කරුණුවලට එකඟ වෙලා අපේ සහයෝගය ලබා දෙනවා. හැබැයි අපිට අනන්‍ය වූ වඩපිළිවෙළකට අපිට යන්න කිසිම බාධාවක් නැහැ.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි