No menu items!
27.4 C
Sri Lanka
29 March,2024

අවශ්‍ය වන්නේ පුද්ගලයන් නොව වැඩපිළිවෙළක්ය

Must read

■ පුරවැසියා

රටේ වත්මන් තත්වය ගැන අවබෝධයක් ඇති දේශපාලනය පිළිබඳ උනන්දුවක් ඇති හා නැති බොහෝ පුද්ගලයන්ගේ මේ දිනවල මාතෘකාව බවට පත්වී ඇත්තේ රටේ ඊළඟ නායකත්වයට පත්කර ගන්නේ කවුද යන්න හා ඒ සඳහා සුදුසු කවරෙක්ද යන්නය.

එමෙන්ම ඒ සඳහා සුදුස්සෙක් සිටීද යන්නය. පුරවැසියාගේ මතය නම් මෙම ප්‍රශ්නය කල් වේලා වැඩි ප්‍රශ්නයක් මෙන්ම එතරම්ම අදාළ නොවන ප්‍රශ්නයක් බවය. එයට හේතුව රට තුළ මීටත් වඩා දරුණු තත්වයක් ඉදිරියේදී ඇති වූවත් බලය අතහැර යෑමේ සංස්කෘතියක් නැති ශ්‍රී ලංකාව තුළ ඊළඟ සුජාත දේශපාලන බල හුවමාරුව සඳහා තවත් වසර තුනත කාලයක් අපට ඉවසා සිටීමට සිදුවීමය. සමාජ මාධ්‍ය ජාලාවල හා විපක්ෂ දේශපාලන ක්‍රියාකාරීන් අදහස් දක්වන ආකාරයට ජනාධිපති ගෝඨාභය රාජපක්ෂ නියමිත කාලයට පෙර කිරුළ බිම තබා අයැදුම්කර ඉල්ලාගත් ඇමරිකා දේශයට නොයනු ඇත. ඒ වෙනුවට උපරිම කාලයම බලයේ රැඳී සිටිමින් ඔහු ඇත්තටම කිරීමට ආ වැඩකටයුතු කරනු ඇත. ජනාධිපතිවරයාගේ මැතිවරණ ප්‍රතිපත්ති ප්‍රකාශනය වන සෞභාග්‍යයේ දැක්ම ඒ සඳහා පටලවාගත යුතු නැත. මන්ද එහි ඇති කිසිවක්ම මෙතෙක් ඔහු කර නැති නිසාය. ඔහු ක්‍රිියාත්මක කරනු ඇත්තේ ඔහුගේ හෝ රාජපක්ෂ පවුලේ සැඟවුණු න්‍යාය පත්‍රයය. විකිණීම හා ඒ මගින් ලැබෙන අතයට වරදාන එහි ප්‍රධාන හුය වනු ඇත. නැවත බලයට ඒම අවිනිශ්චිත තත්වය තුළ උපරිමයෙන් කරනු ඇත්තේ එයය.


රාජපක්ෂලාගේ මේ ඇත්ත කෙසේ වෙතත් රට අර්බුදයට යෑම දකින ප්‍රධාන දේශපාලන ධාරාවන් හා ඒවාහි ප්‍රකාශකයන් මේ වනවිට සමාජය තුළ කරමින් පවතින්නේ රටේ ඊළඟ නායකත්වයට මම සුදුසුයි හා රටේ ඊළඟ නායකත්වය මට ලබාදෙන්න යන්න සෘජුව හා වක්‍රව කියාපාමින් ජනතාව සමඟ දේශපාලන ගනුදෙනුවකට අරඇඳීමය. ඒ හැමටම කිව යුත්තේ තවම ඒ සඳහා කල් වැඩි බවය. ගෝඨාභය රාජපක්ෂ නැමැති මේ රට ගොඩගැනීමේ මැජික් බලයක් ඇතැයි සිතූ පුද්ගල නායකත්වයක් තෝරාගෙන දැන් ජනතාව හොඳටම විඳවමින් සිටින බවය.


පුද්ගලයන් ගැන කොහොමත් අපට විශ්වාසය තැබිය නොහැකිය. එය ගෝඨාභය රාජපක්ෂ අපට පෙන්නුම් කර තිබේ. අවශ්‍ය වන්නේ රට ගොඩගැනීමේ වැඩපිළිවෙළක්ය. එය 2015 යහපාලනය බලයට ගෙන ඒමේදී පෙන්නුම් කළේය. එදා විරුද්ධ වූ වත්මන් ආණ්ඩුවේ ප්‍රකාශකයන්ට පවා එදා යහපාලනයේ යහපත් ප්‍රතිසංස්කරණ අද හොඳ වී ඇත. එදා යහපාලනය කියන්නේම පුද්ගල සාධකයක් නොව වැඩපිළිවෙළක් දිනවීමකි.

මෛත්‍රීපාල සිරිසේන යනු එම වැඩපිළිවෙළ සඳහා වූ ප්‍රකාශකයා පමණය. එදා ඒ වෙනුවෙන් ඡන්දය දුන් කිසිවකු මෛත්‍රීපාල සිරිසේනගේ විශේෂ නායකත්ව ගුණයක් දුටුවේ නැත. ඔහුගෙන් දුටු එකම දේ වූයේ පැවති ආණ්ඩුවෙන් කැඩී ඒම පමණය.

මෛත්‍රීපාල සිරිසේන හා රනිල් වික්‍රමසිංහ බල තණ්හාවෙන් ගේම් නොගසා පොරොන්දු වූ වැඩපිළිවෙළ ක්‍රියාත්මක කළේ නම් අද මේ රට බොහෝ ඉදිරියට ගොස්ය. එසේ වූවා නම් රාජපක්ෂවරු නැවත බලයට පත්වන්නේද නැත.


ඒ මගින් නැවත අපට කියාදෙන පාඩම වන්නේ අවශ්‍ය වන්නේ පුද්ගල නායකත්වයන් නොව වැඩපිළිවෙළක් බවය. ජනතාවට වුවමනා හා විශ්වාස කළ හැකි වැඩපිළිවෙළක් බවය. එහි ප්‍රකාශකයා 2015 වාගේම අවසන් මොහොතේ මතුකරගත හැකිය. ඒ සඳහා වර්තමානයේ මම සුදුසුයි කියා කවුරුත් දැඟලිය යුතු නැත. මන්ද අප රටට ඇත්තේ පුද්ගල සාධකයක් මගින් ජයගත හැකි අර්බුදයක් නොවන නිසාය.


ප්‍රධාන දේශපාලන පක්ෂවල අනුගාමිකයන් සම්පූර්ණයෙන්ම හෝ බහුතරයක් වශයෙන් වෙනස් කළ නොහැකිය. එය ඉතිහාසය පුරාම ඡන්ද ප්‍රතිඵල අපට කියා දී ඇත. සෑම තීරණාත්මක මැතිවරණයකදීම විශේෂ කාර්යභාරය කරනු ලබන්නේ පාවෙන ඡන්දදායකයා හෙවත් ප්‍රධාන දේශපාලන ධාරාවන් සමඟ අත්හරින්නට බැරි සම්බන්ධතාවක් පවත්වාගෙන යන පිරිස නොවේ. 2015 දී මෙන් අප ආමන්ත්‍රණය කළ යුත්තේ ඔවුන්ටය. ඒ පුද්ගල සාධක උලුප්පා නොව වැඩපිළිවෙළක් අතැතිවය.


ඒ නිසා මේ මොහොතේ විපාක්ෂික දේශපාලන බලවේග කළ යුත්තේ මුහුද හත් ගව්වක් තියා පුද්ගලයන් ඉස්මතු කරමින් අමුඩ ගැසීම නොව රටට අවශ්‍ය ප්‍රතිසංස්කරණ සම්බන්ධයෙන් යෝජනා ඉදිරිපත් කිරීමය. ඒවා මහජනයා අතර සංවාදයට භාජනය කිරීමය. සියල්ලන්ටම එකඟ විය හැකි ප්‍රතිසංස්කරණ සම්බන්ධයෙන් එකඟ වී එක වේදිකාවකට පැමිණීමය. ඉදිරි මැතිවරණයකදී යම් පුද්ගලයකු පවතින ක්‍රමය යටතේ එම ප්‍රතිසංස්කරණ ක්‍රියාත්මක කර ගැනීම සඳහා බලයට පත්කළත්, එම පුද්ගල සාධකය අබිබවා එම ප්‍රතිසංස්කරණ ක්‍රියාත්මක කරගැනීම් වෙනුවෙන් එකතුවූ බලයක් ලෙස ක්‍රියා කිරීමය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි