22.9 C
Sri Lanka
27 September,2022

දේශපාලනය සඳහා වසංගතය
අපයෝජනය කිරීම

Must read

කොවිඩ් වසංගතය මර්දනය පිළිබඳ සෞඛ්‍ය ක්‍ෂෙත්‍රයේ ප්‍රධාන බලතල හිමි නිලධාරියා හැටියට සැලකෙන සෞඛ්‍ය අධ්‍යක්‍ෂ ජෙනරාල්වරයා දැන් ආණ්ඩුව අතේ නැටවෙන රූකඩයක් බඳු ය.

මෙවැනි වසංගත තත්වයක දී එය මර්දනය කිරීම සඳහා අදාළ නියමයන් කිරීමට හා නියෝග නිකුත් කිරීමට නීතියෙන් බලය ඇති එක ම සහ ප්‍රධානතම නිලධාරියා වන ඔහු මේ විදියට ආණ්ඩුවේ රූකඩයක් බවට පත්ව තිබීම, එක පැත්තකින් පළපුරුදු හා ජ්‍යෙෂ්ඨ සෞඛ්‍ය පරිපාලන නිලධාරියකු හැටියට පෞද්ගලික ව තමා අත්පත් කර ගත් සියල්ලට කර ගන්නා අවමානයකි. ඊට වඩා, සෞඛ්‍ය අධ්‍යක්‍ෂ ජෙනරාල්වරයා කියන ගරු නාමයට කරන අවනම්බුවකි. ඊටත් වඩා, මෙවැනි මොහොතක, මහජනතාව විශ්වාසය තැබිය යුතු ප්‍රධාන සෞඛ්‍ය බලධාරියා, මහජනයාගේ අවමානයට හා අගෞරවයට පාත්‍ර වීමකි. ඔහු ඉතිහාස ගත වනු ඇත්තේ, මෙවැනි ව්‍යසනකාරී තත්වයක දී පවා, ආණ්ඩුවේ දේශපාලන වුවමනා එපාකම්වලට තම ධුරයේ ගෞරවය පාවා දුන් කොන්ද පණ නැති රාජ්‍ය නිලධාරියකු හැටියට ය.

ආණ්ඩුවකට පක්‍ෂ දේශපාලන අරමුණු තිබේ. එහෙත් සෞඛ්‍ය අධ්‍යක්‍ෂ ජෙනරාල් වැනි ගෞරවනීය තනතුරකට පක්‍ෂ දේශපාලනයක් තිබිය නොහැකිය. එනිසා ආණ්ඩුව කියන දේශපාලන නියෝගවලට අවනත නොවී සිටීමට රාජ්‍ය නිලධාරීන්ට කොන්දක් තිබිය යුතු ය. එහෙත් සෞඛ්‍ය අධ්‍යක්‍ෂ ජෙනරාල්වරයා ඒ මොහොතේ වැටී සිටියේ කොන්දක් නැති අසරණයකුගේ තත්වයට ය. ආණ්ඩුවේ වුවමනාවට එරෙහි වනවා නම් ඔහු කළ යුතුව තිබුණේ පුද්ගලිකව ඔහුගේත්, නිලයක් ලෙස සෞඛ්‍ය අධ්‍යක්‍ෂ ජෙනරාල් ධුරයේත් ගෞරවය මුළුමනින්ම රකිමින් ධුරයෙන් ඉල්ලා අස්වීමයි. එවැන්නක් කළ හැකි රාජ්‍ය නිලධාරීන් ඉන්නේ කීයෙන් කී දෙනා ද?

රටේ ප්‍රධාන විපක්‍ෂය විසින් සංවිධානය කරන ලද මහජන උද්ඝෝෂණයකට බාධා කිරීම සඳහා සෞඛ්‍ය අධ්‍යක්‍ෂ ජෙනරාල්වරයා ලවා, ඊට දිනයකට පෙර අලුත් සෞඛ්‍ය මාර්ගෝපදේශ නිකුත් කරන්නට ආණ්ඩුව පියවර ගත්තේ ය. එම අලුත් ම මාර්ගෝපදේශවල සඳහන් වුණේ, මහජන රැස්වීම්, හමු ආදිය නොවැම්බර් 15 වැනි දා සිට 30 දක්වා තහනම් කර ඇති බවයි. ඊට දින කිහිපයකට පෙර නිකුත් කළ මාර්ගෝපදේශවල එවැන්නක් අඩංගු නොවී ය.

එහෙත් ඒ වන විට, සෞඛ්‍ය අධ්‍යක්‍ෂ ජෙනරාල්වරයා පාසල්වල ප්‍රාථමික අංශ පටන් ගන්නට අවසර දී තිබුණේ ය. ඉන් පසු උසස් පෙළ හා සාමාන්‍ය පෙළ පන්ති පටන් ගන්නට අවසර දුන්නේ ය. නොවැම්බර් 16 වැනි දා සිට උසස් පෙළ සහ සාමාන්‍ය පෙළ උපකාරක පන්ති පටන් ගන්නට ද අවසර දී තිබුණේ ය. සිනමා ශාලා ද සීමිත තත්වයන් යටතේ වුව ද පටන් ගන්නට අවසර දී තිබුණේ ය.

සෑහෙන කාලයකට පෙර සෞඛ්‍ය සේවා අධ්‍යක්‍ෂ ජෙනරාල්ගේ නියමය පරිදි පටන් ගත් පොදු ප්‍රවාහන සේවාවල ජනතාව ආවේ ගියේ කිසි ම සෞඛ්‍යාරක්‍ෂක රීතියකට අනුගතව නොවේ. ඔවුන්ට කළ හැකි ව තිබුණු එකම ආරක්‍ෂාව වූයේ මුව වැස්මක් පැළඳ සිටීම පමණකි. එහෙත් ඒ කිසි ම තැනක සෞඛ්‍යාරක්‍ෂක නීති අනුගමනය කරනවා ද යන්න ගැන සොයා බැලීමක් වත්, ඒවා කඩ කරන අයට විරුද්ධව පියවර ගැනීමක් කළ බවක් වත් දැනගන්නට නැත.

තත්වය එසේ තිබිය දී, සමගි ජන බලවේගයේ මහජන උද්ඝෝෂණයට පෙර දින අධ්‍යක්‍ෂ ජෙනරාල්වරයා ඊට බාධා වන අයුරින් සෞඛ්‍ය මග පෙන්වීම් කළේ කුමන අරමුණකින් ද යන්න ඉතා පැහැදිලි ය.

ආණ්ඩුව කිව්වේ, විපක්‍ෂයේ පක්‍ෂ කොරෝනා වසංගතය යොදා ගෙන දේශපාලනය කරනවා කියා ය. එහෙත් ඒ සමග ම පෙනෙන්නේ ආණ්ඩුව ද තමන්ගේ දේශපාලනය සඳහා කොරෝනා වසංගතය යොදා ගන්නවා කියා ය.

මේ මොහොතේ කොරෝනා වසංගතය මැඬලීම සඳහා වගකීම තිබෙන්නේ ආණ්ඩුවට ය. ආණ්ඩුව එය කළ යුත්තේ, මහජනතාවගේ විශ්වාසය රැකෙන අයුරින් ය. ආණ්ඩුව නිකුත් කරන සෞඛ්‍යාරක්‍ෂක මග පෙන්වීම් පවා පිළිපැදීමට ජනතාවගේ පෙළඹවීමක් ඇති වන්නේ එවැනි විශ්වාසයක් දිනා ගන්නට ආණ්ඩුවට හැකි වන්නේ නම් පමණකි. ආණ්ඩුව කොරෝනා වසංගතය පාවිච්චි කරන්නේ තමන්ගේ දේශපාලන අරමුණු මුදුන් පත් කර ගැනීමට බව පෙනේ නම්, සෞඛ්‍ය රීති පවා පිළිපදින්නට මහජනතාව කැමති නොවෙති. රටේ ආර්ථිකය කඩා වැටෙන විට රට නැවත විවෘත කර මහජනතාවගේ පොදු හැසිරීම් ධෛර්යවත් කරන ආණ්ඩුව, තමන්ට විවේචනයක් නැගෙන්නට ඉඩ ඇති තැන්වලට බාධා කිරීමට ඒ මහජනතාව ම බියට පත් කිරීම දෙබිඩි හැසිරීමකි.

කළ යුතුව තිබුණේ වගකීමෙන් යුක්ත ව උද්ඝෝෂණ කිරීමේ හැකියාව උද්ඝෝෂණකරුවන්ට ලබා දීමයි. ඒවා කඩ කළහොත් වන විපාක පිළිබඳ වගකීම ඒවා සංවිධානය කරන දේශපාලන නායකයන්ට පැවරීමයි. එය නොකර, ආණ්ඩුවේ නායකයන් හැසිරුණු වෛරී ආකාරයෙන් පෙනෙන්නේ වසංගතය ආණ්ඩුව වසන්තයක් කර ගෙන තිබෙන බවයි.

වසංගතයක් රටේ තිබෙන විටෙක, උද්ඝෝෂණ පැවැත්වීම භයානක වෙනවා වගේ ම ආණ්ඩුව වසංගතය තමන්ගේ වුවමනාවන් වෙනුවෙන් පාවිච්චි කිරීම ද භයානක ය. ■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි