චීන-ඇමෙරිකානු සම්බන්ධතාවලට අදාළව කටයුතු කරන චීන හිටපු විදේශ අමාත්‍ය යැන්ග් ජියෙචි ශ්‍රී ලංකාවේ සංචාරයක් සඳහා ඔක්තෝබර් 08 වැනිදා පැමිණ ඇති අතර, ජනාධිපති ගෝඨාභය රාජපක්ෂ සහ අගමැති මහින්ද රාජපක්ෂ හමුවීමට නියමිතය.
වසංගත තත්වය නිසා ඔහු ජනාධිපතිවරයා සහ අගමැතිවරයා පමණක් මුණගැසෙන බවත්, ඔහු ගමන් කරන ස්ථාන විශේෂයෙන් සෞඛ්‍යාරක්ෂිතව සූදානම් කරන බවත්, සෞඛ්‍ය අමාත්‍යාංශයේ විශේෂ නිරීක්ෂණ මත හමු සංවිධානය කරන බවත් විදේශ කටයුතු අමාත්‍යාංශය නිවේදනය කර ඇත. මේ පිළිබඳ විදේශ කටයුතු අමාත්‍යාංශය නිකුත් කළ නිවේදනයේ දැක්වෙන්නේ මෙම සංචාරයේ අරමුණ වෙළඳ සබඳතා ශක්තිමත් කිරීමත්, වසංගත තත්වය හමුවේ ආර්ථිකය යථාතත්වයට පත් කිරීම පිළිබඳ සාකච්ඡා කිරීමත් බවය.
යැන්ග් ජියෙචි චීන කොමියුනිස්ට් පක්ෂයේ ඉහළම රාජ්‍යතාන්ත්‍රික නිලධාරියා ලෙස හඳුන්වයි. 2020 ජුනි මස පැවැත් වූ, ඇමෙරිකානු රාජ්‍ය ලේකම් මයික් පොම්පෙයෝ සමඟ චීන-ඇමෙරිකානු සම්බන්ධතා පිළිබඳ සාකච්ඡා පවත්වා තිබුණේද යැන්ග් ජියෙචිය. එම සාකච්ඡාව ඇමෙරිකානු-චීන සම්බන්ධතා පිළිබඳ විශේෂ අවස්ථාවක් ලෙස ජාත්‍යන්තර මාධ්‍ය වාර්තා කර තිබුණි.
ඔහු චීනය සහ ඇමෙරිකාව අතර පවතින වෙළඳ ගැටුම පිළිබඳ රාජ්‍යතාන්ත්‍රික වශයෙන් කටයුතු කරන ඉහළම පෙළේ නිලධාරියා ලෙස ඇසෝසියේටඞ් ප්‍රෙස්, ද ඩිප්ලොමැට්, සවුත් චයිනා මෝනිං පෝස්ට් ඇතුළු ජාත්‍යන්තර මාධ්‍ය ගණනාවක් වාර්තා කර ඇත. ඇමෙරිකානු-චීන සම්බන්ධතා අතර දෝලනය වන රටවල සංචාරය කරමින්, එම රටවල් සමඟ සබඳතා ශක්තිමත් කරගැනීම යැන්ග් ජියෙචිගේ ප්‍රධාන කාර්යභාරයක් බව එම මාධ්‍ය වාර්තාවල සඳහන්ය.
සැප්තැම්බර් මාසයේ මුල යැන්ග් ජියෙචි ග්‍රීසිය සහ ස්පාඤ්ඤය යන රටවල්වල සංචාරයක නිරත විය. එම අවස්ථාවේ සවුත් චයිනා මෝනිං පෝස්ට් ආයතනය වාර්තා කර තිබුණේ යැන්ග් ජියෙචිගේ යුරෝපා සංචාරයේ අරමුණ, යුරෝපා රටවල් සමඟ ඇමෙරිකාව පවත්වන සම්බන්ධතාවලට ප්‍රතිපක්ෂව චීන සබඳතා ශක්තිමත් කරගැනීම බවය. ග්‍රීසිය සහ ස්පාඤ්ඤය ආරක්ෂක ප්‍රතිපත්තිවලදී ඇමෙරිකා එක්සත් ජනපදය සමග සම්බන්ධතා පවත්වන නමුත්, චීනය සමග වෙළඳ සබඳතා පවත්වන බව එහිදී වාර්තා කර තිබුණි.■
අනුරංග ජයසිංහ
