විදෙස්ගතව සිට මෙරටට පැමිණෙන ශ්‍රී ලාංකිකයන්ගෙන් විශාල පිරිසක් කොවිඞ් ආසාදිතයන් බවට තහවුරු වීම නිසාත් නිරෝධායන මධ්‍යස්ථානවල ඉඩකඩ නොමැති නිසාත් විදෙස්ගත පිරිස් මෙරටට ගෙන්වා ගැනීම සීමා කර ඇති බව වාර්තා වේ.
මේ පිළිබඳ විමසීමකදී කොවිඞ් 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානයේ මාධ්‍ය අධ්‍යක්ෂ ලුතිනන් කර්නල් පී. හෙට්ටිආරච්චි පැවසුවේ නිරෝධායන මධ්‍යස්ථානවල ඉඩකඩ නොමැති නිසා විදෙස්ගතව සිටින ශ්‍රී ලාංකිකයන් මෙරටට ගෙන්වා ගැනීම සීමා කර ඇති බවත් දිනකට එක් ගුවන් යානයක් පමණක් විදෙස් ශ්‍රී ලාංකිකයන් මෙරටට ගෙන්වා ගැනීමට පිටත් කරන බවත්ය.
යුද හමුදාව යටතේ පාලනය වන රට පුරා ඇති නිරෝධායන මධ්‍යස්ථාන 59ක විශාල පිරිසක් නිරෝධායනය වන බවත් යම් කිසි කණ්ඩායමක් තම නිරෝධායනය කාලය අවසන් වී ගිය පසුව එම නිරෝධායන මධ්‍යස්ථානය දින 5ක් වසා දමා එහි ඇතුළත විෂබීජහරණය කරන බවත් ඔහු කීය.■
