No menu items!
19.6 C
Sri Lanka
29 March,2024

තලඑළලු කියන්නේ ඉතාම ලස්සන වර්ණයක් – රංගන ශිල්පිනි යශෝධා රසඳුනි

Must read

ඔබ පසුගිය දවස්වල ඔබේ අඳුරු ඡවි වර්ණය හොඳින් ඉස්මතු වෙන විදියේ කළු සුදු ආලේඛ්‍ය ඡායාරූප එකතුවක් ප්‍රසිද්ධ කළා. ඔබේ රූපය ප්‍රබල විදියට එහි දකින්න ලැබුණා..

කොවිඞ්-19 වසංගත සමයේ මට ආ අදහසක් අනුව තමයි මේ ඡායාරූප ගන්න හිතුණේ. අඳුරු හමක් තියෙන හොලිවුඞ් නළුනිළියන්ගේ ජායාරූප කිහිපයක් අධ්‍යයනය කළාට පස්සේ මට හිතුණා, ඒ විදියට මගේ රූපය කැමරාවක සටහන් වුණොත් කොහොම වේවිද කියලා. ඒ අදහස මට එන්නේ චිත්‍රපටි අධ්‍යක්ෂ සත්‍යජීත් මාඉටිපේ මේ ගැන මගෙත් එක්ක කතා කළ නිසායි. සමේ වර්ණය අඳුරු පැහැති කාන්තාවන් සහ පිරිමින් කළු සුදු පින්තූරවලට පෙනී සිටි විට තියෙන්නේ වෙනම ලස්සනක්. බහුතරය මේ ලස්සනට අකමැති වෙන්න පුළුවන්. මගේ හම අඳුරු පැහැයකින් යුක්ත නිසා මට හිතුණා මගේ හමේ තියෙන ලස්සන බාහිර සමාජයට පෙන්වන්න පුළුවන් හොඳම විදිය සහ සමේ අඳුරු පැහැය ඉස්මතු කරන්න පුළුවන් හොඳම විදිය මේක කියලා.

අනෙක් කාරණය, ප්‍රේක්ෂකයන් නිතරම මාව දකින්නේ ගම්බද චරිතවලින්. ඒ නිසා එයින් මිදෙන්නත් මට ලොකු වුවමනාවක් තිබුණා. ඉන්පස්සේ ජායාරූප ශිල්පි අචින්ත දහනායක සහ රූපලාවණ්‍ය ශිල්පි ගීත් රත්නායක එක්ක කතාකළා. රතු, සුදු සහ කළු වර්ණ ඉස්මතුවෙන ආකාරයෙන් තමයි මේ ඡායාරූප ගත්තේ. ඡායාරූප අන්තර්ජාලයට මුදා හැරියාට පසු අපි හිතපු නැති විදියේ වෙනස්ම ධනාත්මක ප්‍රතිචාරයක් ලැබුණා. කවුරුත් හිතලා තිබුණේ නැහැ මා ඒ විදියට දකින්න.

 

ඔබ චිත්‍රපටිවල සහ ටෙලිනාට්‍යවල ප්‍රධාන චරිතවලට තෝරාගත් අවස්ථා ගණනාවක් තිබුණා. කාන්තාවකගේ සුන්දරත්වය කියන සංකල්පය සුදු වීම වටේට හැදිලා තියෙන පසුබිමක, ලස්සන වීම කියන්නේ සුදු වීම කියලා හිතන පසුබිමක, ඔබේ අත්දැකීම කොහොමද?

රඟපෑමට යොමුවෙද්දී ප්‍රධාන චරිත ලැබෙයි කියලා මම හිතුවේ නැහැ. මුලින්ම ප්‍රධාන චරිතයක් ලැබුණාම මට හිතුණේ ඒ සම්ප්‍රදාය නැති වෙලා ගිහින් කියලා. දැන් මේ වෙනකොට අඳුරු සම පිළිබඳව කතාබහක් ඇතිවෙලා. කෞශල්‍යා ප්‍රනාන්දු සහ නදී කම්මැල්ලවීර වැනි රංගන ශිල්පිනියන්  සිනමාව තුළ මතක හිටින චරිත කරලා තියෙනවා. මා හිතන විදියට මේ වෙනකොට ප්‍රේක්ෂකයන් රංගන ශිල්පීන්ගේ සමේ පැහැය ගැන නෙවෙයි, ඔවුන්ගේ රංගන හැකියාව ගැන තමයි සැලකිලිමත් වෙන්නේ.

 

හොලිවුඞ් සහ බොලිවුඞ්වල පවා අඳුරු සමක් තියෙන අයට ආකර්ෂණයක් ලැබිලා තියෙනවා. ඔබේ අත්දැකීම් කොහොමද?

මම රංගනයෙන් දායක වුණු චරිත මිනිස්සු අතරට ගියා.  අපි රඟපාන චරිතය මිනිස්සුන්ගේ හදවතට දැනෙන්නට කරන්න පුළුවන් නම් හමේ වර්ණය මිනිස්සුන්ට ප්‍රශ්නයක් වෙන්නේ නැහැ. මා විතරක් නෙවෙයි, උමාරියා සිංහවංශ ගායන ශිල්පිනිය අඳුරු පැහැති සමක් තියෙන කාන්තාවක්. ඇගේ සමේ පැහැය ගැන කවුරුත් කතා කරන්නේ නැහැනේ. හැමෝම අගය කරන්නේ ඇගේ කටහඬ.

 

එහෙත් අඳුරු හමක් තියෙන නිරූපිකාවන් හා රංගන ශිල්පිනියන් තමන්ගේ හමේ වර්ණය සුදු කරගන්නට උත්සාහ කරන අවස්ථා තියෙනවා නේද?

මම නම් සමේ පැහැය වෙනස් කරන්න ක්‍රීම් සහ ඉන්ජෙක්ෂන් වගේ කෘත්‍රිම දේවල් පාවිච්චි කරනවාට විරුද්ධයි. ඒත් ඒ අයගේ කැමැත්ත සුදු පැහැති සමක් එක්ක ජීවත් වීම නම් අපිට ඒකට බලපෑම් කරන්නත් බැහැ. ඒත් කෘත්‍රිමව සමේ වර්ණ වෙනස් කළාම ඒක පෙනෙනවා.

 

අඳුරු සමක් තියෙන තරුණියන් රැකියාවකට යනකොට, විවාහ වෙනකොට තමන්ගේ හමේ වර්ණය ගැන කල්පනා කරනවා..

සමේ වර්ණය අඳුරුයි කියන එකට ලංකාවේ අපි කියන්නේ තලඑළලු කියලා. තලඑළලු සමට අකැමැතියි නම්  ඒකට ප්‍රධාන හේතුව ඉපදුණු දවසේ ඉඳලා ඒ කෙනාගේ ඔළුවට සුදු පැහැති සම තමයි ලස්සන කියන වැරදි මතය ඒත්තුගන්වා තිබීම. අපේ රටේ සමහර ගීත කළු යැයි සම්මත සම අගය කරමින් හැදිලා තියෙනවා. කළු කෙල්ල ගැන වර්ණනා කළ ගීත ඕනෑ තරම් තියෙනවා. අපි ඒ ගීත පවා අගය කරනවා. ඒත් බහුතරයක් කැමති  දෙයට තමයි අපි කැමැත්ත දැක්විය යුත්තේ කියන සම්ප්‍රදාය අපේ තවම තියෙනවා. ඒ සම්ප්‍රදාය වර්ණ, දේශපාලනයට සහ එදිනෙදා ජීවිතයටත් බලපානවා.

මුලින්ම තමන් මේ කාරණා පිළිබඳ හිතන විදිය වෙනස් කරගන්න ඕනෑ. තලඑළලු සමක් තියෙන කෙනෙක් මුලින්ම තමන්ගේ සම පිළිගන්න ඕනෑ. ඉන්පස්සේ අපි බලන්න ඕනෑ ලෝකේ අනෙක් තළෙළු සමක් තියෙන ගායක ගායිකාවන්, රංගන ශිල්පීන් සහ නිරූපිකාවන් තමන්ගේ සමේ පැහැයට සරිලන විදියට ඇඳුම් තෝරාගන්නේ කොහොමද සහ රූපලාවණ්‍ය කරන්නේ කොහොමද කියලා. තලඑළලු වර්ණය ගැන ඍණාත්මකව හිතන අයට  උපදෙසක්  විදියට මම කියන්නේ තලඑළලු සමක් ඇති බොහෝ අය කරන විලාසිතා සහ ඒවාට ලැබෙන ප්‍රතිචාර කොතරම් ධනාත්මකද කියලා හොයලා බලන්න කියලයි. තලඑළලු කියන්නේ ඉතාම ලස්සන වර්ණයක්, ඒක ලේසියෙන් වයසට යන්නේ නැති සමක්, සුදු අයට වඩා සමේ අංගලක්‍ෂණ පෙනෙනවා.

 

අඳුරු සම සමහර නාට්‍යවල දුෂ්ට චරිතවලට තෝරා ගන්නවා..

මෙගා ටෙලිනාට්‍යවල මේ වගේ සිද්ධි බොහෝ දුරට වෙනවා. ආයතනයක පිළිගැනීමේ නිලධාරිනිය විදියට ගන්නේ ලස්සන යැයි සම්මත සුදු කාන්තාවන් වගේ මේ වගේ දුෂ්ට චරිතවලට ගන්නේ අඳුරු පැහැ සමක් තියෙන අය. මේ විදියේ ඒකාකෘතික තෝරා ගැනීම් ගැන අපිට දෙවිදියකට කතා කරන්න පුළුවන්. යම් අවස්ථාවල ඒ චරිතයට ගැළපෙන්නේ අඳුරු සමක් තියෙන කෙනෙක් නම් ඒ චරිතයට ගැළපෙන කෙනෙක් ගැනීම ගැන මගේ අකමැත්තක් නැහැ. අපි ඒ වගේ චරිත කළ යුතුයි. එසේ නොවන අවස්ථාවල විරුද්ධ විය යුතුයි. අපි දැකලා තියෙනවා අඳුරු සමක් තිබුණ අපේ ක්ෂේත්‍රයේ ප්‍රවීණ ශිල්පීන් සහ ශිල්පිනියන් සමේ පැහැය වෙනස් කරගෙන පැහැපත් වෙලා ඉන්න බව. අපිට වඩා ඒ අයට අඳුරු සමට සලකන විදිය ගැන හඬක් නගන්න පුළුවන්.

 

රූපලාවණ්‍ය ශිල්පීන් සමඟ තියෙන අත්දැකීම මොන වගේද?

මට මුණගැහිලා තියෙන රූපලාවණ්‍ය ශිල්පීන්ගෙන් අපේ සමේ වර්ණය ඒ ආකාරයෙන්ම පිටතට පෙනෙන විදියට තබමින් රූපලාවණ්‍යය කරන්නේ කිහිපදෙනෙක් විතරයි. අපේ අතේ පාටට ගැළපෙන විදියට මුහුණේ පාට ගන්න කියලා ඔවුන්ට කීවත්, සමහර රූපලාවණ්‍ය ශිල්පීන් ඒකට කැමති නැහැ. සමහර රූපලාවණ්‍ය ශිල්පීන් අපි සුදු කරලා, අත සහ පිට ඒ පාටට ගැළපෙන විදියට වර්ණ ගන්වනවා. අඳුරු සම ගැන බාහිර සමාජයේ කොතරම් කතා කළත් තවමත් සමාජය තුළ සුදු වීම සුදුසුයි කියන හැඟීම තියෙනවා.

ගොඩක් අවස්ථාවල මම කියන්නේ මගේ මේකප් එක අඩුවෙන් දාන්න කියලායි. මට ස්වාභාවික විදියට ඉන්න ඕනෑ. සමහර රූපලාවණ්‍ය ශිල්පීන් හා ශිල්පිනියන් ස්වාභාවිකව පෙනෙන්න මේකප් කරන්න කැමති නැහැ. සමහර අය අපිට කියන්නේ, ඔවුන් ගාවට එන බොහෝ කාන්තාවන් ඔවුන්ගෙන් සුදු වෙන්න මේකප් කරන්න කියලා ඉල්ලන බව.

මේකප්  කරනවා කියන්නේ ෆවුන්ඬේෂන් තට්ටු ගහලා  සමේ පැහැය විකෘති  කිරීම නෙවෙයි. ඒකෙන් වෙන්නේ තමන්ගේ මුහුණට වෙස් මුහුණක් දැමීමක්. මගේ මුහුණේ කුරුලෑ තියෙනවා. ඒත් මට මේකප් දාලා කුරුලෑ වහන්න ඕනෑ නැහැ. එහෙම වුණොත් බලන කෙනෙක්ට හොඳට පෙනෙනවා මේකප් තට්ටුවක් දාගෙන ඉන්නේ කියලා. මේකප්වලින් කරන්න ඕනෑ මුහුණේ තියෙන ලක්‍ෂණ ඉස්මතු කරලා ගැනීම විතරයි. ඒත් අපි දැන් දකින්නේ අත්වලටත් මේකප් කරලා, පිට ප්‍රදේශයටත් මේකප් කරන බව.  යම් වෙලාවක ඇඳුම එහෙට මෙහෙට වෙලා මේකප් නොකළ තැනක් පෙනුණොත් ඒක  අවලස්සනයි.

 

අඳුරු සමට ගැළපෙන විලාසිතා සහ මේකප් ගැන ඔබේ අදහස කුමක්ද?

අපේ සමටලා වර්ණයෙන් යුත් ඇඳුම් වැඩිපුර ගැළපෙනවා. ඒත් අතේ සල්ලි තියෙන විදියටනේ අපිට ඇඳුම් ගන්න වෙලා තියෙන්නේ. මම නම් වැඩිපුර මිලදී ගන්නේ අඳුරු පැහැයෙන් යුතු ඇඳුම්. ඒ ඇඳුම් තෝරා ගන්නේ හිතාමතාමයි. ඒ ඇඳුමට ගැළපෙන විදියට තමයි මම මේකප් කරන්නේ.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි