No menu items!
29.7 C
Sri Lanka
29 March,2024

රේගුවේ හමුදා ලොක්කාගෙන් කන්ටේනර් මුදාහරින්න නියෝග

Must read

විමර්ශන කටයුතු සඳහා රේගු විමර්ශන අංශය රඳවාගත් කුප්‍රකට වෙහිකල්ස් ලංකා පෞද්ගලික සමාගමට අයත් කන්ටේනර් 4ක් රේගු භාරයෙන් පිටතට ගෙනයෑම සඳහා රේගු අධ්‍යක්ෂ ජෙනරාල් විශ්‍රාමික මේජර් ජෙනරාල් විජිත රවිප්‍රිය අවසර දී ඇත.

වාහන අමතර කොටස් ගෙන්වන මුවාවෙන් කෑලි කර වාහන ගෙන්වා රජයට අයවිය යුතු නියමිත බදු නොගෙවා එම වාහන එකලස් කර විකිණීම වෙහිකල්ස් ලංකා සමාගමට ඇති චෝදනාව වේ.

රේගු අධ්‍යක්ෂ ජෙනරාල්වරයා වෙහිකල්ස් ලංකා හිමිකරුගේ මිනුවන්ගොඩ කර්මාන්තපුරයේ පිහිටි අංගණයට ගෙනගොස් මෙම කන්ටේනර් පරීක්ෂා කරන ලෙස නියෝග කර තිබේ.

රේගු විමර්ශන සඳහා රඳවාගත් වාහන අඩංගු කන්ටේනර රේගු භාරයෙන් පිට ස්ථානයක පරීක්ෂා කිරීම නීති විරෝධී වන අතර මීට පෙර ශ්‍රී ලංකා රේගුව හා වලාන දූෂණ මර්දන පොලිස් ඒකකය අත්අංගුවට ගත් එකී ආයතනයටම අයත් වාහන 28ක් සීල් තබා එම අංගණයේදී තිබියදී එහි හිමිකරු සීල් කඩා වාහන 18ක් අස්ථානගත කිරීම සම්බන්ධයෙන් ශ්‍රී ලංකා රේගුව මිනුවන්ගොඩ මහේස්ත්‍රාත් අධිකරණය දැනුවත් කර ඇත.

එමෙන්ම මෙම කන්ටේනර් රඳවා ගැනීමෙන් පසු ඒ සම්බන්ධයෙන් විමර්ශන කිරීම සඳහා අවශ්‍ය නිවැරදි ලිපිලේඛන ආනයනකරු රේගුවට ලබා දී නැත. මෙම කන්ටේනර් සම්බන්ධ රේගු සටහන් පත්‍රවල  වාහන අමතර කොටස් ලෙස සඳහන් වුවද, ඊට අදාළ නැව්භාර පත්‍රවල සඳහන්ව ඇත්තේ එම කන්ටේනර් තුළ වාහන තිබෙන බවය.

මෙම කන්ටේනර් රේගු පරිශ්‍රයෙන් මුදා හැරීමට නියෝග කිරීම සම්බන්ධයෙන් රේගු අධ්‍යක්ෂ ජෙනරාල් විශ්‍රාමික මේජර් ජෙනරාල් විජිත රවිප්‍රියගෙන් කරන ලද විමසීමේදී ප්‍රකාශ කළේ එවැනි මුදාහැරීමකට අනුමැතිය ලබාගැනීමට තමා දක්වා ආ යුතු නැති බවත්, තමාට පහළ නිලධාරීන් එම කටයුතු කරන බවත්ය.

කන්ටේනර් මුදාහැරීම සඳහා නියෝග කර ඇත්තේ ඔහු බවත් ඊට අදාළ සියලු ලේඛන අප සතු බවත් වැඩිදුරටත් ප්‍රශ්න කිරීමේදී ඒ පිළිබඳ සොයාබලා පිළිතුරක් ලබාදෙන්නම් යැයි කියා දූරකථන සංවාදය ඔහු අවසන් කළද, පුවත්පත මුද්‍රණයට යන තෙක් ඔහු අප ඇමතුවේ නැත.

විශ්‍රාමික මේජර් ජෙනරාල් විජිත රවිප්‍රිිය රේගු අධ්‍යක්ෂ ජෙනරාල් ධුරයට නම් කිරීමෙන් පසු ඊට රේගු හා පරිපාලන සේවා සංගමය විරුද්ධත්වය ප්‍රකාශ කළ අතර ඒ පිළිබඳ කළ සාකච්ඡාවලදී ජනාධිපති ගෝඨාභය රාජපක්ෂ කියා තිබුණේ ඔහු එම තනතුරෙන් ඉවත් නොකරන බවයි.■

 

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි