No menu items!
27.5 C
Sri Lanka
29 March,2024

බණ්ඩාරණායක මාවතට වෛරසය ආවේ කොහොමදැයි හරියටම දන්නේ නැහැ

Must read

වෛද්‍ය ඩබ්ලිව්. කේ. චන්දපාල

සෞඛ්‍ය වෛද්‍ය නිලධාරී – කොළඔ නගර සභාව

අපේ‍්‍රල් 21 වනවිට බණ්ඩාරණායක මාවතෙන් කොවිඩ්-19  ආසාදිතයන් කී දෙනෙක් වාර්තා වෙලා තියෙනවාද?

රෝගීන් 62 ක් වාර්තා වෙලා තියෙනවා.

කීදෙනෙක්ව කොවිඩ් 19 පරීක්ෂණයට යොමු කරලා තියෙනවාද?

අපි මේ වෙනකොට 240 කට ආසන්න ප‍්‍රමාණයක් පරීක්ෂණ වලට යොමු කරලා තියෙනවා. ඒ අතරින් තමයි පුද්ගලයන් 62 ක් මේ වන විට කොවිඩ් 19 රෝගය වැළදී ඇති බවට තහවුරු වෙලා තියෙන්නේ.

කොවිඩ් 19 රෝගය වැළදී ඇති අයට වෛරසය ආවේ කොතැනින්ද කියා හරියටම හඳුනාගන්න පුළුවන් වුණාද? නැතිනම් තව තියෙන්නේ අනුමානයක්ද?

පළවැනි රෝගියා අපි හඳුන ගත්තේ අපේ‍්‍රල් 15 වෙනිදා. එදින සිට මුල් රෝගීයා වාර්තා වුණ වත්තෙන් තවත් කොවිඩ් 19 ආසාදනය වුණ පුද්ගලයන්  57 දෙනෙක් වාර්තා වුණා. ඉන්පස්සේ ඒ වත්තෙන් එම රෝගීන් 57 දෙනා ඉවත් කරගෙන අපේ‍්‍රල් 20 වන දින නැවත අපි අවට වතු වලින්  තවත් 90  කණ්ඩායමකට කොවිඩ් පරීක්ෂාව සිදු කළා. ඒ පරික්ෂාවන් වලින් තමයි ඉතිරි රෝගීන් 5 දෙනා වාර්තා වුණේ. ඒ ඒ අයට වෛරසය වැළඳුණේ කොහොමද කියා තවම හරියටම කියන්න බැහැ.

මුලින් වාර්තා වුණ පළවෙනි රෝගියා සහ ඉන්පසුව වාර්තා වුණ රෝගීන් අතර ඥාති සම්බන්ධතා හෝ ඔවුන් එම නිවෙසට ගොස් ඇති බව වාර්තා වුණාද?

නැහැ, එහෙම කිසි ඥාති සම්බන්ධතාවයක් තිබුණා කියලා අපිට වාර්තා වුනේ නැහැ. මුලින්ම කොවිඩ් 19 තිබුණා කියලා වාර්තා වුණ රෝගීන් 57 දෙනා අනෙක් නිවෙස් වලට යන්න එන්න ඇති. ඒ විදියට අනුමාන කරන්න පුළුවන්. ඒක සාමාන්‍යයෙන් වෙන  දෙයක්. ඒ විදියට නිවෙස් වලට ගිය නිසා ඒ අවට සිටි අය කොවිඩ් 19 වෛයිරසය ආසාදනය වෙන්න ඇති. ඒක තමයි අපට තියෙන අනුමානය.

බණ්ඩාරනායක මාවතේ කොවිඩ් ආසාදය වී ඇති බවට තහවුරු වුණ පුද්ගලයන් එම මාවෙත් පිට බාහිර පුද්ගලයන් සමඟ සම්බන්ධතා පවත්වා තිබෙන්න ඇති නේද? ඒ සියළු සම්බන්ධතා හඳුනාගෙන තියෙනවාද?

පිට අයත් එක්ක සම්බන්ධතා පවත්වලා තියෙනවා. අපි මේ වෙනකොට බණ්ඩාරනායක මාවතේ සිටි ආසාදිතයන් සමඟ ගනුදෙනු කළ ග‍්‍රෑන්ඩ්පාස්,කොටහේන, වැල්ලම්පිටිය, කොලොන්නාව, කොළඔ 12 ප‍්‍රදේශවල සිටින පුද්ගලයන් 10 ක්ව හඳුනාගෙන ඒ අයව නිරෝධායනය මධ්‍යස්ථාන වලට යවලා තියෙන්නේ. ඊට අමතරව ග‍්‍රෑන්ඩ්පාස් ප‍්‍රදේශයේ 11 දෙනෙක්ව සහ නීතීපති දෙපාර්තමේන්තුවේ සේවය කළ ආරක්ෂක නිලධාරීන් 06 ක්ව නිරෝධායන මධ්‍යස්ථාන වලට යවලා තියෙන්නේ.

හමුවූ කාන්තාව ඉන්දියාවෙන් පැමිණ නිරෝධායනයට ලක්වුණ කාන්තාවක්. එහෙත් ඇයට රෝගය ඇතැයි තහවුරු වුණේ ඉන්දියාවෙන් ඇවිත් මාසයකට පසුව. ඒ අනුව ඇයට රෝගය ඉන්දියාවෙන් වැළඳුණු බවත්, ඇගෙන් අනෙක් අයට බෝ වුණත් නිශ්චිතව කියන්න බැහැ නේද?

ඒ කාරණාව සම්බන්ධයෙන් ගැටළු කිහිපයක් මේ වන විට මතු වෙලා තියෙනවා. පළවෙනියාට අපි අඳුනගත්ත, ඔය කාන්තාවගේ ගෙදර සාමාජිකයන් හතරදෙනාට කොවිඩ් ආසාදනය වෙලා තියෙනවා කියලා වාර්තා වුණේ හතර වතාවකදී. මුලින්ම කාන්තාව, ඉන්පස්සේ ඇගේ බාල පුත‍්‍රයා, ඉන්පස්සේ ඇගේ සැමියා සහ ඇගේ තවත් පුතෙක්. ඊට අමතරව තවත් දරුවෙක් ඉන්නවා. මේ පවුල එක්ක සම්බන්ධකම් පැවැත්වූ ඒ දරුවාට කොවිඩ් 19 ආසාදනය වෙලා නැහැ. ඔවුන්ගේ නිවස අසලම තවත් පවුලකට කොවිඩ් 19 හැදිලා තියෙනවා. ඒ පවුලේ සාමාජිකයන් 12 ක් සිටින පවුලක්. නමුත් කොවිඩ් ආසාදනය වෙලා තියෙන්නේ පුද්ගලයන් 10 ක්ට පමණයි.

අපි හොයා ගත්ත තොරතුරු අනුව අපේ මූලික සැකය තියෙන්නේ ඉන්දියාවේ ගිහින් ආපු කාන්තාවගෙන් රෝගය ආ බව. එහෙත් අපට තවත් සැකයක් තියෙනවා. සාමාජිකයන් 10 ක් හමුවුණ පවුලට මුලින්ම ආවාද කියන සැකය තමයි තියෙන්නේ. ඔවුන්ගෙන් බෝ වෙලා ඉන්දියාවේ සිට ආපු කාන්තාවට වැළඳුණාද කියා අපි දන්නේ නැහැ. මේ කාරණා අපට තවම හරියටම ඔප්පු කරගන්න බැහැ. මුලින්ම හඳුනාගත්තේ ඉන්දියාවේ සිට ආ කාන්තාව වුණත්, එයින් කියැවෙන්නේ නැහැ මුලින්ම ආසාදනය වුණේ ඇයට කියලා. ඒ නිසා බණ්ඩාරණායක මාවතට වෛරසය ආවේ කොහොමද කියා අපි හරියටම දන්නේ නැහැ.

කොවිඩ් 19 ආසාදිතයන් පිළිබඳව සොයා බැලීමට සිටින සෞඛ්‍ය සේවකයන් ප‍්‍රමාණවත්ද?

කොළඔ නගරයේ මට පැවරිලා තියෙන භූමි ප‍්‍රමාණයේ 140,000 කට ආසන්න ප‍්‍රමාණයක් ජනගහණය ඉන්නවා.ඒ 140,000 ටම ඉන්න එකම සෞඛ්‍ය වෛද්‍ය නිලධාරියා මම විතරයි. ඒ සියළුම ජනතාව පරික්ෂා කරන්න ඉන්නේ මහජන සෞඛ්‍ය නිලධාරීන් 10 ක් පමණයි. සංඛ්‍යාත්මකව අපි බැලූවොත් එක වෛද්‍ය නිලධාරියෙකුට මේ තරම් ජනතාවක් පරික්ෂා කරන්න අමාරුයි. ප‍්‍රයෝගික හැකියාවක් නැහැ. අපේ මහජන සෞඛ්‍ය පරික්ෂක  මහත්වරු 10න් එක්කෙනෙක් 14,000 කට ආසන්න  මිනිස්සු  ප‍්‍රමාණයක් බලා ගන්න  ඕනෑ. නමුත් අපි මේ සියළු අඩුපාඩුකම් මඟහැරලා වැඩ කටයුතු කරගෙන යනවා.

හඳුනාගත් ආසාදිතයන් කොවිඩ් රෝග ලක්ෂණ පෙන්නුම් කළාද?

නැහැ, අපිට හම්බවුණ කොවිඩ් ආසාධිතයන් 62 කුගෙන් එකම පුද්ගලයෙක් පමණයි රෝග ලක්ෂණ පෙන්වුවේ. ඔහු බාබර් රැකියාව කරන පුද්ගලයෙක්. ඔහුට දවස් 7 ක් පමණ උණ තිබුණා. මුල්ම කොවිඩ් ආසාදනය වුණ  කාන්තාවටත් කොවිඩ්-19 රෝග ලක්ෂණ පෙන්නුම් කලේ නැහැ. ඇය කිවේ පපුවේ අමාරුවක් තියෙනවා කියලා විතරයි. රෝග ලක්ෂණ නොපෙන්වුවත් අපි රෝගීන් රෝගීන් හඳුනාගත්තා. අපි කළේ අපිට සැක හිතෙන සියළු දෙනාවම පරීක්ෂාවට යොමු කිරීම. ඒ නිසා අපිට කාර්ය මණ්ඩලය මදි වුනා කියලා අපෙන් කිසිම අඩුපාඩුවක් සිදුවෙලා නැහැ. අපි රෝගය අනෙක් අයට පැතිරෙන්න කලින් ආසාදිතයන්ව සොයා ගත්තා.

බණ්ඩාරනායක මාවත මෙන් තවත් අවදානම්  ප‍්‍රදේශ තියෙනවාද?

දැනට නැහැ. මේ ආකාරයෙන් අනාරක්ෂිත වේවියැයි අවදානමක් ගන්නට බැරි නිසා අපි අද දවසේ සොයා ගත්ත ආසාදිතයන් නිරෝදායන මධ්‍යස්ථානවලට අපි යැවුවා. නිරෝධායනයට යැවුවාට පස්සේ ඒ ප‍්‍රදේශවල අනෙක් අයට කොවිඩ් වෛරසය පැතිරි යෑමට ඇති ඉඩ කඩ නැති වෙලා යාවි.

බණ්ඩාරනායක මාවතේ පවුල් සහ ඒ පවුල්වලට අයත් පුද්ගලයන් කොතරම් සිටිනවාද?

අපේ‍්‍රල් 19 වන දින රාත‍්‍රියේදි බණ්ඩාරනායක මාවතේ 146 කියන වත්තෙන් අපි මුලින්ම පවුල් 52 කට අයක් පුද්ගලයන් 221 ක් අපි නිරෝදායන මධ්‍යස්ථාන වලට පිටත් කළා. අපේ‍්‍රල් 21 වෙනි දිනයේ දී පවුල් 242 කට අයත් පුද්ගලයන් 1010 ක් නිරෝදායන මධ්‍යස්ථාන වලට අපි පිටත් කළා. හෙට දිනයේ දී බණ්ඩාරනායක මාවතේ ඉතිරි වතුවල සිටින පවුල් පරික්ෂා කරන්න බලාපොරොත්තු වෙනවා. 

- Advertisement -

පුවත්

1 COMMENT

  1. Definitely
    He can’t be so adamant in this situation
    Medical fraternity and other employees in different sectors are really sacrificing. So he has to oblige the view of the vaux populie

Leave a Reply to Sanath De silva Cancel reply

Please enter your comment!
Please enter your name here

- Advertisement -

අලුත් ලිපි