දෙහිවලදී පැහැරගත් ළමුන් පස්දෙනා ඇතුළු පුද්ගලයින් 11 දෙනෙකු පැහැරගෙන ගොස් අතුරුදන් කිරීමේ සිද්ධියට සැක නාවික හමුදා නිළධාරීන් රැසක් ගෝඨාභය රාජපක්ෂ මහතාගේ ජනාධිපතිවරණ ඡන්ද ව්‍යාපාරයේ කටයුතු කරමින් ඇතැයි වාර්තා වේ.
මෙම නාවික හමුදා නිළධාරීන්ට විරුද්ධව පරීක්ෂණ පැවති අතර ඔවුන් රිමාන්ඞ් බන්ධනාගාරගත කර තිබුණි. එහෙත් ඔවුන්ට නාවික හමුදාව තුළ තවදුරටත් කටයුතු කිරීමේ හැකියාව ලැබුණු අතර ඔවුන් කිසිවිටක වැඩ තහනමට ලක් නොවුණි. එම නිළධාරීන් සමහර දෙනෙකුට නාවික හමුදාව විසින් උසස්වීම්ද ප‍්‍රධානය කර ඇත. මෙම අපරාධයට සැක නාවික නිළධාරීන් අතරින් කිහිප දෙනෙක් ත‍්‍රිකුණාමලය ප‍්‍රදේශය තුළ ක‍්‍රියාත්මක වෙමින් ගෝඨාභය රාජපක්ෂගේ මැතිවරණ ව්‍යාපාරයට දායක වෙමින් සිටින බව වාර්තා වේ.
මෙම සිද්ධියට අදාළව 15 දෙනෙක් නාවික සෙබලූ‍න් අත්අඩංගුවට පත්වූ අතර එයින් 10වෙනි සැකකරු පමණක් රිමාන්ඞ් බන්ධනාගාරයේ සිටී. අනෙක් බොහෝ දෙනෙක් සැකකරුවන් මේ වනවිට ඇප ලබා සක‍්‍රීය සේවයේ නිරත වේ.
