පාස්කු ඉරිදා ප‍්‍රහාරය මෙන් ප‍්‍රහාරයක් දේවස්ථානවලට එල්ලවිය හැකි බවට තොරතුරක් ලැබී ඇතැයි කොළඔ අගරදගුරු කාදිනල් මැල්කම් රංජිත් හිමියන් දන්වා ඇති නමුත් එවැනි ප‍්‍රහාරයක් පිළිබඳව තවමත් තොරතුරු ලැබී නොමැති බව හමුදා මාධ්‍ය ප්රකාශක බි‍්‍රගේඩියර් සුමිත් අතපත්තු මහතා අනිද්දාට පැවසීය.
පාස්කු ඉරිදා සිදුවු ප‍්‍රහාරයෙන් අනතුරුව ත‍්‍රිවිධ හමුදාව මේ වන තෙක් සැලකිලිමත්ව කටයුතු කරන බවත් දිවයිනේ ඇති ආගමික ස්ථාන, පාසල්, පොදු ප‍්‍රවාහන ස්ථාන සහ ජනතාව ගැවසෙන ස්ථානවලට ආරක්ෂාව මේ වන තෙක් සපයා තිබු බවත් කාදිනල් හිමිගේ අදාල ප‍්‍රකාශයත් සමඟ එම ආරක්ෂාව තවත් තර කර ඇති බවත් බි‍්‍රගේඩියර් සුමිත් අතපත්තු මහතා පැවසීය.
සැප්තැම්බර් 30 වන දින කාදිනල් හිමිපාණන් ජනාධිපතිවරයාට ලිපියක් යොමු කරමින් දන්වා ඇත්තේ ඔක්තෝබර් 15 වන දිනත් 26 වන දිනත් අතර අදාල ප‍්‍රහාර එල්ලවීමට ඉඩකඩ ඇති බවත් එම තොරතුරු තමන්ට ලැබුණු ආකාරය ගැන කිසිවක් හෙළිනොකරන බවය.
මෙම තොරතුරු සම්බන්ධයෙන් වැඩබලන පොලිස්පතිවරයා සහ පොලිස් දෙපාර්තුමේන්තුවේ ප‍්‍රධානීන් අතර සැප්තැම්බර් 30 වන දින විශේෂ සාකච්ඡුාවක් පොලිස් මුලස්ථානයේදී පවත්වා තිබූ අතර ආරක්ෂක අමාත්‍යංශයේදී විශේෂ ආරක්ෂක හමුවක්ද ඔක්තෝබර් 01 වන දින පවත්වා ඇත. කාදිනල් හිමියන් පවසන ආකාරයේ ප‍්‍රහාරයක් පිළිබඳව කිසිදු තොරතුරක් බුද්ධි අංශ වෙත එතෙක් ලැබී නොමැති බව වැඩිදුරටත් වාර්තා වේ.
