No menu items!
20.9 C
Sri Lanka
29 March,2024

තවත් පක්ෂයකකොටසක් වෙන්න බැහැ

Must read


ශ්‍රීලනිප ජාතික සංවිධායක දුමින්ද දිසානායක

ඉදිරි ජනාධිපතිවරණය වෙනුවෙන් ශ්‍රීලනිපය තීරණාත්මක තීන්දුවක් ගැනීමට සූදානම් වෙන බව කියනවා. මේ වෙද්දී ශ්‍රීලනිපය තීන්දුවක් අරගෙන අවසානද?
ජනාධිපතිවරණයටත් තව යම් කාලයක් ඉතිරිවෙලා තියෙනවානේ. සැප්තැම්බර් තුන්වැනිදා සියලු දේවල් කියන්නම්. සැප්තැම්බර් තුන්වැනිදා ශ්‍රී ලංකා නිදහස් පක්ෂයේ ජාතික සම්මේලනය තියෙනවා. එක් කාරණයක් පැහැදිළියි. මීළඟ ජනාධිපතිවරයා තීන්දු කරන්නේ ශ්‍රී ලංකා නිදහස් පක්ෂයෙනුයි.

ශ්‍රීලනිපය තවත් පක්ෂයක් සමඟ සන්ධානගතවීමේ ඉඩක් තියෙනවාද?
අපි යම් පක්ෂයක් එක්ක සන්ධානගත වෙනවාද නැද්ද කියන එක ගැන දැන්ම කියන්න බැහැ. ඒත් සන්ධානගත වීම ගැන අපි සලකා බලමින් ඉන්න බව කියන්න පුළුවන්. ජනාධිපතිවරණය වෙනුවෙන් පොදුජන පෙරමුණ සාමාජිකත්වය දරන සන්ධානයේ පාර්ශ්වකරුවෙක් වෙන්නත් අපි කැමතියි. ඒත් ඒක නිසි ක්‍රමවේදයට වෙන්න ඕනෑ. අපිත් පක්ෂයක් විදියට ඒ සන්ධානයේ පාර්ශ්වකරුවෙක් වෙන්න ඕනෑ. අනෙක් පක්ෂවලටත් ඒ සන්ධානයේ පාර්ශ්වකරුවන් විදියට ඉන්න පුළුවන්. ඒත් අපි ප්‍රශ්නය විදියට පෙන්වුවේ ශ්‍රීලනිපයට තවත් පක්ෂයක කොටසක් වෙන්නට බැරි බවයි. එවැනි ක්‍රියාවලියක් තුළ ශ්‍රීලනිපය දිය කරන්න හෝ විනාශ කරන්න අපි ඉඩ දෙන්නේ නැහැ.

ශ්‍රීලනිපය තීන්දුවක් ගනිද්දී වැඩිපුරම සලකා බලන කාරණාව මොකක්ද?
ශ්‍රී ලංකා නිදහස් පක්ෂයේ අනන්‍යතාව ආරක්ෂා කරන්න ඕනෑ. අපේ පක්ෂයේ මන්ත්‍රීතුමන්ලාගේ හා ආසන සංවිධායකවරුන්ගේ අනන්‍යතාව ආරක්ෂා කරන්න ඕනෑ. ගෞරවය ආරක්ෂා කරන්න ඕනෑ. ඒ නිසා ශ්‍රී ලංකා නිදහස් පක්ෂය දිය කරන්න හෝ විනාශ කරන්න අපි ඉඩ දෙන්නේ නැහැ. ශ්‍රී ලංකා නිදහස් පක්ෂයේ අනන්‍යතාව ආරක්ෂා කරගනිමින් අපේ ඉන්න සංවිධායකයන්ගේ හා මන්ත්‍රීවරුන්ගේ තත්වය රැකගනිමින් තීන්දුවක් ගන්නට අපි සියලුම දේ කරන්න ඕනෑ.

ශ්‍රීලනිපය ආවත් නොආවත් මේ වෙද්දී ශ්‍රීලනිපය ඉන්නේ තමන් ළඟ බව ඇතැම් පොදුජන පෙරමුණු මන්ත්‍රීවරුන් කියා තියෙනවා. ඔවුන් කියන්නේ ඩාලි පාරේ කාර්යාලයත්, පක්ෂ ලකුණත් හැර සම්පූර්ණ ශ්‍රීලනිපයම දැන් ඉන්නේ පොහොට්ටුවේ බවයි.
අපි දේශපාලන අඳබාලයන් කියන දේවල්වලට උත්තර දෙන්න ඕනෑ නැහැ. ඔය සංවාදය අපේ මට්ටමේ තියෙන එකක් නෙවෙයි. ඔය කතාව කීවේ හරියටම කවුද කියලා බලන්නකෝ. ඒවා සැලකිල්ලට ගන්නවාද කියා එතකොට වැටහේවි. වගකීමක් තියෙන අය ඔය කතා කියන්නේ නැහැ. ඒ පක්ෂයේ නායකයන් ශ්‍රී ලංකා නිදහස් පක්ෂයේ වැදගත්කම දන්නවා. ඒ පක්ෂයෙන් නම් කරලා තියෙන ජනාධිපතිවරණ අපේක්ෂකයාත් ඒක දන්නවා. ඔවුන් උත්සාහ කරන්නේ කෙසේ හෝ ශ්‍රී ලංකා නිදහස් පක්ෂය තම කණ්ඩායමට එකතු කරගන්නයි. ඒත් මේ කිසිදෙයක් නොදන්න අය ඉන්නවා. ඇත්තටම කිව්වොත් අපේ කරුමෙට පාර්ලිමේන්තුවට තේරීපත්වූ කිහිපදෙනෙක් ඉන්නවානේ. එයාලා පාර්ලිමේන්තුවටවත් එන්නේ නැහැ. හදිසියේ ඕක මහින්ද රාජපක්ෂ මහත්තයා හෝ ගෝඨාභය රාජපක්ෂ මහත්තයා කීවා නම් අපට පුළුවන් උත්තර දීම ගැන සලකලා බලන්න. අඩුම තරමේ විපක්ෂයේ ප්‍රබලයෙක් කීවා නම් අපට ඕක බරපතළ ප්‍රකාශයක් විදියට සලකන්න පුළුවන්.

ශ්‍රීලනිපයත් පොහොට්ටුවත් අතර සන්ධානයක් ඇතිකර ගැනීම පිළිබඳ දැන් තත්වය මොකක්ද?
ජනාධිපති මෛත්‍රීපාල සිරිසේන මැතිතුමායි විපක්ෂ නායක මහින්ද රාජපක්ෂ මැතිතුමායි සාකච්ඡා කරන්න ඕනෑ. ඒ කටයුත්ත තමයි දැන් ඉතිරිවෙලා තියෙන්නේ. අපි බලාගෙන ඉන්නවා ඔවුන් සාකච්ඡා කරනතුරු. ඔවුන්ට පුළුවන් වේවි එකඟතා සඳහා පදනමක් ඇති කරගන්නට. ඒ සාකච්ඡාවලින් පසුව අපි සලකා බලනවා ශ්‍රී ලංකා පොදුජන පෙරමුණ එක්ක අපට සන්ධානගත වෙන්න පුළුවන්ද කියලා.

එතකොට පක්ෂ දෙකේ නියෝජිත කණ්ඩායම් අතර සාකච්ඡාවලට වෙන්නේ මොකක්ද?
ජනාධිපතිතුමා එතුමාගේ සාකච්ඡාවල ප්‍රතිඵල අපට කියාවි. අනෙක් පැත්තෙන් විපක්ෂනායකතුමා ඒ පැත්තේ කණ්ඩායම සමග කියාවි. ඉන් පස්සේ තාක්ෂණික කාරණා ගැන අපේ කණ්ඩායම්වලට සාකච්ඡා කරන්න සිද්ධවේවි.

පොදුජන පෙරමුණ බොහෝ තීන්දු ගනිද්දී, මහින්ද රාජපක්ෂට තීන්දුව ගැනීම බාරදෙනවා. ශ්‍රීලනිපයත් කරන්න උත්සාහ කරන්නේ ඒ වගේම ජනාධිපතිවරයාට තීන්දු ගන්න දීලා බලාගෙන ඉඳීමද?
මෙතැන වෙන්නේ එහෙම දෙයක් නෙවෙයි. සාකච්ඡා සඳහා මධ්‍යම කාරක සභාවෙන් විධිමත් විදියට ජනාධිපති මෛත්‍රීපාල සිරිසේන මැතිතුමාට බලය දුන්නා. එහෙම කළේ සාකච්ඡා අවසානයක් දක්වා ගෙනයෑමට ඒක පහසුවක් වෙන හින්දා පමණයි. එහෙත් තීන්දුව ගැනීම සිද්ධවෙන්නේ ශ්‍රී ලංකා නිදහස් පක්ෂයේ මධ්‍යම කාරක සභාවෙනුයි. අපේ පක්ෂයේ අභ්‍යන්තර ප්‍රජාතන්ත්‍රවාදය තියෙනවා.

ඔය කියන විදියට ජනාධිපතිවරයාගේ මතයට වෙනස් වූ තීන්දුවක් ගැනීමේ හැකියාවක් වුව මධ්‍යම කාරක සභාවේ තියෙනවා නේද?
ශ්‍රී ලංකා නිදහස් පක්ෂය බොහොම ප්‍රජාතන්ත්‍රවාදී පක්ෂයක්. අපි මධ්‍යම කාරක සභාව එක්ක සාකච්ඡා කරනවා. සාකච්ඡාවෙන් පස්සේ තමයි තීන්දුව ගන්නේ. ජනාධිපතිතුමාගේ අදහස්වලට අපි වැදගත් තැනක් දෙනවා. ඒ වගේම එතුමා අපේ අදහස්වලටත් වැදගත් තැනක් දෙනවා.

මේ වෙද්දී පොදුජන පෙරමුණෙන් අපේක්ෂකයෙක් නම් කර තිබීම සාකච්ඡාවලට ප්‍රශ්නයක් වේවිද?
අපට ඒක ප්‍රශ්නයක් නැහැ. ශ්‍රීලනිපයෙනුත් අපේක්ෂකයෙක්ව නම් කරලා තියෙනවානේ. අපේ මධ්‍යම කාරක සභාව තීරණය කරලා තියෙනවා අපේ පක්ෂයෙන් ජනාධිපතිවරණ අපේක්ෂකයෙක් ඉදිරිපත් කරන්න ඕනෑ කියලා. ඒ මෛත්‍රීපාල සිරිසේන ජනාධිපතිතුමා වෙන්න ඕනෑ කියලත් අපි එකඟ වෙලා තියෙනවා. ඉතින්, අපට පුළුවන් ඒ පැත්තේ අපේක්ෂකයා සහ අපේ පැත්තේ අපේක්ෂකයා ගැන සාකච්ඡා කරන්නට. ශ්‍රී ලංකා පොදුජන පෙරමුණෙන් ගෝඨාභය රාජපක්ෂව නම් කළා. සමහරවිට දිනේෂ් ගුණවර්ධන මහතාගේ පක්ෂයෙන් අපේක්ෂකයෙක්ව නම් කරන්නත් ඉඩ තියෙනවා. විමල් වීරවංශලාගේ පක්ෂයෙන් තවත් අපේක්ෂකයෙක්ව නම් කරන්න ඉඩ තියෙනවා. එතකොට අපට පුළුවන් ඒ ඒ අපේක්ෂකයන් ගැන සාකච්ඡා කරන්න. අන්තිමේදී තෝරාගන්නේ ශ්‍රීලනිපයේ අපේක්ෂකයා නොවෙන්න පුළුවන්. ඒ වගේම ගෝඨාභය රාජපක්ෂ නොවෙන්නත් පුළුවන්. දිනේෂ් ගුණවර්ධන මහතාගේ පක්ෂයේ අපේක්ෂකයාව තෝරාගන්නත් ඉඩක් තියෙනවා. ප්‍රජාතන්ත්‍රවාදී රාමුවක් ඇතුළේ සාකච්ඡා සිද්ධවෙනවා නම් වෙන්න ඕනෑ ඒකයි. අපි බලාපොරොත්තු වෙන්නේ ඒ විදියට සාකච්ඡා කරන්නයි.

ගෝඨාභය රාජපක්ෂගේ පුරවැසිභාවය පිළිබඳ තිබෙන ප්‍රශ්න ගැන සලකනවාද?
ඒ ගැන සලකන්න ඕනෑ අපි නෙවෙයිනේ. මේ රටේ ජනාධිපතිවරණයට ඉල්ලන්න අවශ්‍ය මූලික සුදුසුකම් ටික අපේ රටේ ව්‍යවස්ථාවේ තියෙනවානේ. යම්කිසි පුද්ගලයෙක් ඒ සුදුසුකම් නැතිව ජනාධිපතිවරණයට ඉල්ලීමට බලාපොරොත්තු වෙන්න ඉඩ තියෙනවා. එහෙම වෙන්න පුළුවන්. ඒත් එහෙම කෙනෙක් තමන්ගේ නුසුදුසුකම් ඉවත් කරගන්න ඕනෑ. නුසුදුසුකම් ඉවත් කරගැනීම විතරක් ප්‍රමාණවත් වෙන්නේත් නැහැ.
ඔහු මුළු ලංකාවේම ජනාධිපති වෙන්නයි යන්නේ. ඔහු එක් පක්ෂයක ජනාධිපති වෙන්න නෙවෙයිනේ උත්සාහ කරන්නේ. ඔහුට ඡන්දය දෙන උදවිය ඔහු සුදුසු කෙනෙක් බව විශ්වාස කරන්න ඉඩ තියෙනවා. ඒත් ඒ බව විශ්වාස නොකරන පිරිසකුත් ඉන්නවානෙ. තමන්ට ඡන්දය නොදෙන අයව පවා සෑහීමට පත් කිරීමේ වගකීමක් ඔහුට තියෙනවා. ලංකාවේ පුරවැසියන් ඉදිරියේ තමන් මූලික සුදුසුකම් සපුරා තියෙන අපේක්ෂකයෙක් බව ඔප්පු කරන එක ඕනෑම අපේක්ෂකයෙකුගේ වගකීමක්.

තමන් සුදුසු බව අවශ්‍ය වෙලාව මැතිවරණ කොමිෂන් සභාවට පෙන්වන බව ගෝඨාභය රාජපක්ෂලා කියනවා නේද?
යම්කිසි අපේක්ෂකයෙක් සුදුසු නැතැයි චෝදනා එල්ලවෙලා තියෙනවා නම් එහෙම කෙනෙකුට රටේ ජනතාවට තමන් සුදුසු කෙනෙක් බව ඔප්පු කරන්නට විශේෂම වගකීමක් තියෙනවා. ඒක මැතිවරණ කොමිසමට විතරක් පෙන්වන බව කියලා හරියන්නේ නැහැ. තමන්ගේ කණ්ඩායමට විතරක් හෝ කෑගහන අයට විතරක් පෙන්වන එක ප්‍රමාණවත් නැහැ. රටේ කෝටි ගණනක ජනතාවගේ නායකයා වෙන්න උත්සාහ කරනවා නම් ඒ සියලුදෙනාටම ඔබේ නායකයා වෙන්න මා සූදානම් බව පෙන්වන්න ඕනෑ. ඔහු තේරුම් ගන්න ඕනෑ තමන් රාජ්‍ය නායකයා වෙන්නට උත්සාහ කරන බව. තවමත් එතුමා තමන්ගේ සියලු ලිපිලේඛන ජනතාවට ඉදිරිපත් කරලා නැත්තේ ඇයිද කියන එක ප්‍රශ්නයක්. පුරවැසිභාවය ගැන මටත් සැකයි. තවම එතුමාට සියලු ලිපිලේඛන ලැබිලා නැතිද, ඒවා ලැබෙන්නට නියමිත තත්වයේ තියෙනවාද වගේ ප්‍රශ්න මට විතරක් නෙවෙයි තියෙන්නේ. රටේ අතිබහුතරයක් ඒ සැකයෙන් ඉන්නවා. ඒත් ඒක ගැන සත්‍යය ඔප්පුකිරීම අපේ වගකීමක් නොවෙයි. ඒක ඔහුගේම වගකීමක්.

චන්ද්‍රිකා බණ්ඩාරනායක මැතිනිය පසුගිය සතියේ ඩාලි පාරේ ශ්‍රීලනිප කාර්යාලයට ආ බව ප්‍රවෘත්ති පළවුණා. ඇය ඉදිරි තීන්දුවලට සම්බන්ධ වේවිද?
එතුමියට ඩාලි පාරට ඕනෑම වෙලාවක එන්න පුළුවන්. ඒක විශේෂ සිද්ධියක් නෙවෙයි. ශ්‍රී ලංකා නිදහස් පක්ෂ කාර්යාලයට එන්නට ඕනෑම නිදහස් පාක්ෂිකයෙක්ට අයිතිය තියෙනවා. හිටපු ජනාධිපතිතුමියක් හා හිටපු නායිකාවකට විතරක් නෙවෙයි, සාමාන්‍ය පාක්ෂිකයෙකුට පවා ඒ අයිතිය තියෙනවා. ඒක මහා ලොකු සිද්ධියක් විදියට සැලකිය යුතු නැහැ. එතුමිය පක්ෂයේ තමන්ට හිමි බලය අනුව තීන්දු ගැනීමේ ක්‍රියාවට අඩු වැඩි වශයෙන් සම්බන්ධ වීමත් පුදුමයක් නොවෙයි.

එහෙත් ඇය අමනාප වී සිටි බව ප්‍රවෘත්ති පළවුණා නේද?
එතුමිය කුමන වෙලාවකවත් ශ්‍රී ලංකා නිදහස් පක්ෂයත් එක්ක අමනාප වෙලා හිටියේ නැහැ. එතුමිය ශ්‍රී ලංකා නිදහස් පක්ෂය සමඟ හැමදාම හිටියා. අදත් ඉන්නවා.

ඇගේ නම ශාන්ත බණ්ඩාරගෙන් පුරප්පාඩු වූ ජාතික ලැයිස්තු මන්ත්‍රීධුරයට යෝජනා කළ බවට ප්‍රවෘත්ති පළවෙනවා..
අපිත් එක්ක එහෙම දෙයක් ගැන කවුරුවත් කතාකරලා නැහැ.

මේ වෙද්දී අපට තොරතුරු ලැබෙන විදියට ශ්‍රීලනිපය වෙනම ජනාධිපතිවරණ අපේක්ෂකයෙක් ඉදිරිපත් කිරීම සඳහා සැලසුම් සකස් කරමිනුයි ඉන්නේ. ශ්‍රීලනිපය කැරැල්ලක් ගැසීමේ සූදානමෙන් ඉන්න බව ආරංචියි. එහෙම තත්වයක් තියෙනවාද?
ඔව්, ඒ ආරංචි හා තොරතුරු පරෙස්සමෙන් තබාගන්න. සිද්ධවෙන්නේ මොකක්ද කියලා අපි ඔබතුමාලාට තුන්වැනිදාට කියන්නම්. එදාට ඔය සේරටම උත්තර ලැබෙනවා.

සමහරු කියන්නේ ශ්‍රීලනිපයට පොහොට්ටුව හා එක්වීම හැර වෙන කිසිදු විකල්පයක් නැති බව නේද?
ශ්‍රි ලංකා නිදහස් පක්ෂයට තමයි සියලුම තෝරාගැනීම් තියෙන්නේ. අපි නැතිව කාටවත් ඡන්දවලට එන්න බැහැ. අපට තියෙන ඡන්ද ප්‍රමාණය ගැන දැනටමත් දන්නවානේ. ඒ ඡන්ද ප්‍රමාණය නැතිව බැරි බවත් දන්නවානේ. ඒ නිසා අපේ තෝරාගැනීම හරිම වැදගත්. හැමෝම බලාගෙන ඉන්නේ අපේ තෝරාගැනීම දිහායි.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි