එය රෙස්ලින් ඉතිහාසය වෙනස් කළ මොහොතක්. 2019 මැයි 25 වැනිදායි ඒ මොහොත උදාවුණේ. රෙස්ලින් වෙනස් කරන විප්ලවකාරී ගමනක පළමු ගියරය ලෙස එය හැඳින්විය හැකියි. ඒ මොහොත යළි සිහියට නඟාගැනීමෙන්ම කතාවට පිවිසිය හැකියි.
ක‍්‍රිස් ජෙරිකෝ හා කෙනී ඔමේගා කිසිදා අවසන් නොවනු ඇතැයි සිතන්නට සිදුවන ආකාරයේ සටනක. දැනටමත් කෙනී මේසයක් උඩට පතිත වී හමාරයි. දෙදෙනාම වෙහෙසට පත්ව, ක‍්‍රමයෙන් වේගය අඩුවෙනවා. එහෙත් මහා හඬක් නඟමින් එකිනෙකාගේ සිරුර මතට එකිනෙකාගේ පහරවල් පතිත වෙනවා. කෙනී ඔමේගා දණහිසෙන් එල්ලකරන ප‍්‍රහාරවලට ප‍්‍රසිද්ධයි. වයසින් වැඩි නිසා වැඩිපුර වෙහෙස වී සිටින ජෙරිකෝ මතට එවැනි දණහිස් පහරවල් ගණනාවක් එල්ලකර හමාරයි. උද්දාමයට පත් පේ‍්‍රක්ෂකයන් ‘ෆයිට් ෆොරෙවර්’ හෙවත් හැමදා සටන් කරන්නයැයි කියමින් ඔල්වරසන් නඟනවා.
එක්වරම ජෙරිකෝ ක්රියාත්මක වෙනවා. ඔහුගේ ‘කෝඞ්බ්‍රේකර්’ නම් පහර එල්ලවී ඔමේගා බිම වැටෙනවා. ඉන්පසුව ‘ජුදාස් ඉෆෙක්ට්’ නම් භයානක වැලමිටි පහර ඔමේගාට එල්ලවෙනවා. ඔමේගාගේ නහය බිඳීගොස් ඇති බව පෙනෙනවා. ‘එකයි, දෙකයි, තුනයි.’ තරගය අවසානයි. ජෙරිකෝ ජයගත්තා.
තරගය අවසාන වූ පසුව ජෙරිකෝ අසීරුවෙන් නැඟී සිටිමින් මයික‍්‍රෆෝනය අතට ගත්තා. ඔහු වචනයක් දෙකක් කතාකරද්දීම එක් කොණක සිට පේ‍්‍රක්ෂකයන් යටිගිරියෙන් බෙරිහන්දෙන හඬ ඇසෙන්නට පටන්ගත්තා. ක‍්‍රම ක‍්‍රමයෙන් පේ‍්‍රක්ෂක කෑගැසීම් වැඩිවුණත් රූපවාහිනියෙන් හෝ අන්තර්ජාලයෙන් නරඹන පේ‍්‍රක්ෂකයන්ට කිසිවක් වැටහෙන්නේ නැහැ. ටික මොහොතකින් පේ‍්‍රක්ෂකාගාරය මැද්දට කැමරාව ගියා. පේ‍්‍රක්ෂකාගාරය මැද්දෙන් ඔහු වළල්ලට පියමනිමින් ඉන්නවා. නිවෙස්වල සිටින පේ‍්‍රක්ෂකයන්ද විස්මයෙන් කෑගසන්නට පටන්ගන්නේ එය දකිද්දීයි. ලියුම්කරුද නිවසේදී එලෙස විස්මයෙන් කෑගැසූ අය අතරින් කෙනෙක්.
ඔහු තමයි ජෝන් මොක්ස්ලි. ලොව පුරා බොහෝ රෙස්ලින් රසිකයන් ඔහු දන්නේ ඞීන් ඇම්බ්‍රෝස් යන නමෙන්. ඒ නම ඔහුට දුන්නේ ඩබ්.ඩබ්.ඊ. ආයතනයෙන්. මේ ඩබ්.ඩබ්.ඊ. ආයතනයේ තරගයක් නොවෙයි. මොක්ස්ලි ඩබ්.ඩබ්.ඊ. ආයතනයෙන් එළියට බැස අලූත් රෙස්ලින් කැරැුල්ලක ඉදිරි පෙරමුණේ සිටගත් මොහොත එයයි. පසුවදා ඇමෙරිකානු ක‍්‍රීඩා වෙබ් අඩවි, මාධ්‍ය ආයතනවල ප‍්‍රධානම ප‍්‍රවෘත්තිය වුණේ මොක්ස්ලිගේ මේ පියමැනීමයි. මේ මොහොත විස්තර කරන්නට පසුබිම් කතා කිහිපයක් කිව යුතුයි. එක්වරක් හෝ රෙස්ලින් නරඹා ඇති අයෙකුට මේ මොහොත විශේෂ විය හැකියි.
රෙස්ලින්
ක‍්‍රීඩාව යන්නට ඉතා පැහැදිලි අර්ථකතනයක් දුන්නොත් වෘත්තීයමය රෙස්ලින් (ප්‍රොෆෙෂනල් රෙස්ලින්* හෙවත් ප්‍රෝ රෙස්ලින් ක‍්‍රීඩාවක් ලෙස සලකමින් අත්හරින්න සිද්ධවෙනවා. හේතුව සරලයි. ප්‍රෝ රෙස්ලින් තරගයකදී ඇත්තෙන්ම තරගයක් නැහැ. ඒ වෙනුවට කලින් සැලසුම් කළ පිටපත් අනුව සියල්ල සිද්ධවෙනවා.
එහෙත් ප්‍රෝ රෙස්ලින් ඇමෙරිකාවේ හෝ මෙක්සිකෝවේ බිහිවුණේ ක‍්‍රීඩා රසිකයන් වෙනුවෙනුයි. ප්‍රෝ රෙස්ලින්වලදී ක‍්‍රීඩකයන් සිදුකරන සියල්ල මවාපෑම් නොවෙයි. ඒවා ඔවුන් සැබෑ ලෙසම සජීවී පේ‍්‍රක්ෂකයන් ඉදිරියේදී කරනවා. වළල්ලේදී හැම පහරකෑමකම පාහේ වේදනාව ක‍්‍රීඩකයන් සජීවීව විඳිනවා. සදාකාලික ආබාධයට ලක්වූ අයත් ඉන්නවා. ඒ නිසා ප්‍රෝ රෙස්ලින් බොරුවක් ලෙස සැහැල්ලූවෙන් බැහැර කළ නොහැකියි. එය ද්වන්ද්ව සටන් සහිත වෙනත් ක‍්‍රීඩාවලින් ලැබෙන රසය නොඅඩුව ලැබිය හැකි අර්ධ ක‍්‍රීඩාමය රසවින්දනාත්මක මාධ්‍යයක්. ඕනෑම ක‍්‍රීඩාවකදී මෙන් ක‍්‍රීඩකයන්ගේ ජවය, ශක්තිය, වේගය රසවිඳින්නට එහිදීද අවස්ථාවක් ලැබෙනවා.
ඩබ්.ඩබ්.ඊ.
එහෙත් රෙස්ලින් රසවින්දනය සපයන ලොව දැවැන්තම ආයතනය වන්නේ ඩබ්ලිව්.ඩබ්ලිව්.ඊ. (වර්ල්ඞ් රෙස්ලින් එන්ටර්ටේන්මන්ට්* ආයතනයයි. ලංකාවේ බොහෝදෙනෙකු රෙස්ලින් නරඹනවායැයි නරඹන්නේ ඩබ්.ඩබ්.ඊ. ආයතනයේ රෙස්ලින් වැඩසටහන් පමණයි. ඒ ආයතනය රෙස්ලින් වැඩි වශයෙන් ක‍්‍රීඩාමය රසයක් ලබාදෙන මාධ්‍යයක් වෙනුවට රියැලිටි වැඩසටහන් පැත්තට බර රසවින්දනයක් ලබාදෙන මාධ්‍යයක් බවට හරවා වසර විසිපහකට වැඩි කාලයක් තිස්සේ රෙස්ලින් වැඩසටහන් නිෂ්පාදනය කරමින් ඉන්නවා.
නළු නිළියන් වැනි රෙස්ලින් තරු බිහිකරමින්, විශේෂයෙන්ම කාන්තා රෙස්ලින් තරු ලෙස නිරූපණ ශිල්පිනියන් යොදාගනිමින්, රෙස්ලින් තරුවල ශාරීරික ක‍්‍රීඩාමය හැකියාවන් වෙනුවට රියැලිටි තරුවලට ගැළපෙන ලක්ෂණවලට වැඩි අවධානයක් යොමුකරමින් ඩබ්.ඩබ්.ඊ. නිෂ්පාදන කාලයක් තිස්සේ සමාජගත කරනු ලබනවා. කාන්තා සිරුරු පෙන්වමින් ඔවුන් පේ‍්‍රක්ෂකයන් ඇදගන්නට උත්සාහ කළා. මරණයෙන් නැගිට ආ මිනිසුන්, මිනිසුන් පණපිටින් වැළලීම, රිය අනතුරු වැනි අතාර්කික රියැලිටිමය සිදුවීම්වලින් රෙස්ලින් රූපවාහිනී ලෝකය පිරෙව්වා. ඒ නිසා ක‍්‍රීඩාමය රසය රෙස්ලින් ලෝකයෙන් ටිකෙන් ටික ඈත්වුණා. ක‍්‍රීඩාව වෙනුවට යථාර්ථයෙන් ඈත්වූ යමක් පෙන්නුවා. ඒ වැඩසටහන් ගැන ලොව පුරා තදබල රෙස්ලින් රසිකයන්ගේ නුරුස්නා හැඟීමක් තිබුණා. රෙස්ලින් නැරඹූ ලියුම්කරුටත් තිබුණේ එවැනි නුරුස්නා හැඟීමක්. මෙතැන ක‍්‍රීඩාව කොහිදැයි ගැටලූවක් තිබුණා.
මේ හැඟීම නිසාම මෑත කාලයේදී ලොව පුරා රෙස්ලින් රසිකයන් ක‍්‍රමයෙන් ඩබ්.ඩබ්.ඊ. ආයතනයේ රෙස්ලින් වැඩසටහන්වලින් ඈත්වී සිටිනවා. රේටින්වලින් ඩබ්.ඩබ්.ඊ. වැඩසටහන් ඉතිහාසයේ ලොකුම කඩාවැටීම්වලට මුහුණදෙමින් සිටින කාලයක් මේ. එහෙත් රෙස්ලින් රසිකයන් රෙස්ලින්වලින් ඈත් වෙන්නේ නැහැ. ඈත්වෙන්නේ ඩබ්.ඩබ්.ඊ. වෙතින් පමණයි. ඔවුන් ඒ වෙනුවට ක‍්‍රීඩා රසයක් ලබාදෙන අන්දමේ වෙනත් සමාගම්වල රෙස්ලින් නරඹන්නට යොමුවෙමින් සිටිනවා.
ස්වාධීන රෙස්ලින්
මේ රෙස්ලින් සමාගම් සහිත ඩබ්.ඩබ්.ඊ. සමාගමෙන් පිට රෙස්ලින් ලෝකය ‘ස්වාධීන රෙස්ලින්’ ලෝකය ලෙස හැඳින්වුවා. එහෙත් ඩබ්.ඩබ්.ඊ. තරම් දැවැන්ත නිෂ්පාදන වියදමක් දරන්නට ඔවුන්ට හැකියාවක් නැහැ. දැවැන්ත ආයෝජකයන් ඔවුන්ට නැහැ. රෙස්ලින් ක‍්‍රීඩකයන්ට විශාල වැටුප් ගෙවන්නට ඔවුන්ට බැහැ. වැඩසටහන් නිෂ්පාදනය අතිනුත් ඔවුන් ඉන්නේ පසුපසින්.
අඩු තරමේ සජීවී පේ‍්‍රක්ෂාගාරයකට පේ‍්‍රක්ෂකයන් 10,000ක්වත් පුරවාගන්නට තරම් බලයක් ඒ සමාගම්වලට තිබුණේ නැහැ. ලොකුම ප‍්‍රශ්නය වුණේ ඔවුන්ට ඒ සඳහා ආයෝජනය කරන්නට තරම් ප‍්‍රමාණවත් මුදල් නොතිබීමයි. විශේෂයෙන්ම කුඩා සමාගම්වල විසිරී සිටින විශිෂ්ට ක‍්‍රීඩකයන්ට වැටුප් ගෙවමින්, ඔවුන් එකතු කරන්නට තරම් ධනවත් ආයෝජකයෙක් නොසිටීමයි. ඒ නිසා මේ කුඩා සමාගම්වලින් ඩබ්.ඩබ්.ඊ. රෙස්ලින් අධිරාජ්‍යයට ප‍්‍රමාණවත් බලපෑමක් සිද්ධවුණේ නැහැ.
ලොව වැඩිම පිළිගැනීමක් ලත් රෙස්ලින් මාධ්‍යවේදියා සහ රෙස්ලින් ඔබ්සර්වර් සඟරාවේ කතුවරයා වන ඬේව් මෙල්ස්ටර් 2017 දී මේ තත්වය විග‍්‍රහ කරමින් කීවේ, රෙස්ලින් ලෝකයේ කුඩා සමාගම්වලට සාපේක්ෂව වැඩි පේ‍්‍රක්ෂකයන් පිරිසන් සිටියත් ඒ කිසිදු සමාගමකට සජීවී පේ‍්‍රක්ෂකයන් 10,000ක් සිටින රෙස්ලින් වැඩසටහනක් සංවිධානය කළ නොහැකි බවයි. එය කුඩා සමාගම්වලට ඬේව් මෙල්ස්ටර් කළ අභියෝගයක්ද වුණා. ඒ මොහොතේ තිබුණු තත්වය හැටියට මෙල්ස්ටර්ගේ මේ අභියෝගයද කිසිවෙකුට බාරගත නොහැකි එකක් ලෙස දැනුණා. එහෙත් එක් රෙස්ලින් ක‍්‍රීඩකයෙකු අභියෝගය බාරගත්තා. ඔහු තමයි කෝඩි රෝඞ්ස්.
ඕල් ඉන්
අප පෙර කී මාධ්‍යවේදී ඬේව් මෙල්ස්ටර්ගේ අභියෝගය එල්ලවුණේ කෝඩි ඩබ්.ඩබ්.ඊ. සමාගමෙන් පිට රෙස්ලින් ලෝකය කළඹමින් සිටියදීයි. කෝඩි සමග ඒ වෙද්දී ස්වාධීන රෙස්ලින් ක‍්‍රීඩකයන්ව සිටි මැට් ජැක්සන් හා නික් ජැක්සන්ද සංවිධාන කටයුතුවලට සම්බන්ධ වුණා. ලොව දක්ෂතම රෙස්ලින් ක‍්‍රීඩකයා ලෙස සැලකෙන කෙනී ඔමේගාද වැඩකටයුතුවලට උදව් වුණා.
ඒ වෙද්දී ඩබ්.ඩබ්.ඊ. සමාගමෙන් පිටි ස්වාධීන රෙස්ලින් ක‍්‍රීඩකයන් සියලූදෙනාවම පාහේ එකතු කරමින්, ‘ ඕල් ඉන්’ නමින් දැවැන්ත රෙස්ලින් වැඩසටහනක් කෝඩි 2018 සැප්තැම්බර් 1 වැනිදා සංවිධානය කළා. එය ස්වාධීන රෙස්ලින් ලෝකයේ දැවැන්තම රෙස්ලින් වැඩසටහන වුණා. 11,263 දෙනෙකු සහභභාගී වූ එය 1993 න් පසුව ඩබ්.ඩබ්.ඊ. සමාගම හැර වෙනත් සමාගමක් සංවිධානය කළ දැවැන්තම වැඩසටහන වුණා. පුදුමය වුණේ විනාඩි 30ක් ඇතුළත ඒ සියලූ ටිකට්පත් විකිණී අවසාන වීමයි. ඒ තනි වැඩසටහනෙන් රෙස්ලින් ලෝකය කම්පනයකින් ඇළලී ගියා.
එහෙත් 10,000ක් යනු ඩබ්.ඩබ්.ඊ. ආයතනයට සාපේක්ෂව කුඩා පිරිසක්. ඩබ්.ඩබ්.ඊ. සමාගමේ විශාල වැඩසටහනකට සාමාන්‍යයෙන් 50,000ක් පමණ සහභාගි වෙනවා. ඔවුන්ගේ දැවැන්ත වැඩසටහන් 70,000 ඉක්මවනවා. ඒ නිසා මෙය ඩබ්.ඩබ්.ඊ. සමාගමට ලොකු අභියෝගයක් නොවෙයි.
ඕල් එලීට්
එහෙත් කෝඩි රෝඞ්ස්, මැට් ජැක්සන්, නික් ජැක්සන් හා කෙනී ඔමේගා යන සිව්දෙනා අලූත් රෙස්ලින් සමාගමකට ආයෝජකයෙක් සොයමින් සිටින බවත් ආරංචි පැතිරුණා. 2019 ජනවාරියේදී ආරංචි සියල්ලම නැවතුණා. හේතුව ආරංචි සියල්ල සැබෑවක් වීමයි. ජැක්සන්විල් ජගුවර්ස් නම් ඇමෙරිකන් පාපන්දු කණ්ඩායමේ හා ලන්ඩන්හි ෆුල්හැම් පාපන්දු කණ්ඩායමේ හිමිකාරීත්වය දරන ඇමෙරිකාවේ දැවැන්තම ධනවතෙක් වන ෂාහිඞ් ‘ෂැඞ්’ ඛාන්ගේ පුත් ටෝනි ඛාන් කෝඩි රෝඞ්ස්ලාට ආයෝජකයෙකු ලෙස සම්බන්ධ වෙන්නට කැමැත්ත පළ කර තිබෙන බව නිල වශයෙන් ප‍්‍රකාශයට පත්වුණා. ඕල් එලීට් රෙස්ලින් හෙවත් ඒ.ඊ.ඩබ්ලිව් නමින් ඔවුන් සමාගම ප‍්‍රකාශයට පත්කළා. පුත් ටෝනි ඛාන් හා ඔහුගේ පියා ෂැඞ් ඛාන් සමාගමේ සමආයෝජකයන් වුණා.
ඩබ්.ඩබ්.ඊ. ආයතනයේ සිටි ප‍්‍රසිද්ධම හා ලොව මිල අධිකම රෙස්ලින් ක‍්‍රීඩකයෙක් වූ ක‍්‍රිස් ජෙරිකෝ ඒඊඩබ්ලිව් සමාගම සමග ගිවිසුම් අත්සන් කළ බව නිල වශයෙන් ප‍්‍රකාශයට පත්වුණා. ඊට අමතරව අප පෙර කී සිව්දෙනාද සමාගමේ ක‍්‍රීඩකයන් ලෙස ගිවිසුම් අත්සන් කළා. ඊට අමතරව ඇඩම් පේජ්, පැක්, ලූචා බ‍්‍රදර්ස්, ක‍්‍රිස්ටෝපර් ඩැනියෙල්ස් ඇතුලූ ස්වාධීන රෙස්ලින් ලෝකයේ ජනප‍්‍රියම තරු ගණනාවක් ඕල් එලීට් සමග ගිවිසුම් අත්සන් කළා.
මැයි 25 වැනිදා ඔවුන් ‘ඩබල් ඕ නතින්’ නම් අප මුලින්ම කී වැඩසටහන සංවිධානය කළා. එහි ටිකට්පත් අලෙවි වුණේ විනාඩි කිහිපයක් ඇතුළතයි. ඉන්පසුව ඔවුන් සාපේක්ෂව කුඩා වැඩසටහන් දෙකක් පැවැත්වුවා. ඔවුන්ගේ ඊළඟ දැවැන්ත වැඩසටහන චිකාගෝ ඉල්නොයිහිදී ‘ ඕල් අවුට්’ නමින් පැවැත්වීමට නියමිතයි.
ඒ අතර වෝනර් මීඩියා නම් ඇමෙරිකාවේ දැවැන්ත සමාගමේ කොටසක් වූ ටීඑන්ටී රූපවාහිනී ආයතනය ඕල් එලීට් සමග ගිවිසුම් අත්සන් කළ බව නිල වශයෙන් ප‍්‍රකාශයට පත්කළා. ඒ අනුව 2019 ඔක්තෝබර් සිට ටීඑන්ටී ප‍්‍රධානම රූපවාහිනී නාලිකාවෙන් සතිපතා ඕල් එලීට් වැඩසටහනක් විකාශය කිරීමට නියමිතයි. 2001 න් පසුව ඩබ්.ඩබ්.ඊ. හැර වෙනස් සමාගමක් මෙතරම් දැවැන්ත ජාතික රූපවාහිනී නාලිකාවකින් සතිපතා රෙස්ලින් විකාශය කරන්නේ පළවැනි වතාවටයි.
ඩබ්.ඩබ්.ඊ. ඒකාධිකාරය යටතේ රෙස්ලින් බාල රසවින්දන මාධ්‍යයක් බවට හැරෙමින් තිබුණා. අප පෙර කී බාල උපක‍්‍රමවලට අමතරව ජාතිවාදය වැනි පසුගාමී ආකල්ප පවා ඩබ්.ඩබ්.ඊ. පසුබිමේ තිබුණා. බොහෝවිට විදේශීය රෙස්ලින් තරු ඇමෙරිකන් විරෝධී චරිතවලට සීමා කළා. අදටත් ඩබ්.ඩබ්.ඊ. ආයතනය ජාතිවාදයට හෝ දක්ෂිණාංශික ක‍්‍රිස්තියානි ආකල්වලට එරෙහි ක‍්‍රියාමාර්ගවලට යොමුවෙන්නේ අඩුවෙන්. සරල උදාහරණයක් කීවොත්, කළු ජාතික රෙස්ලින් ක‍්‍රීඩකයන්ටත් ඩබ්.ඩබ්.ඊ. ආයතනයේදී ලැබෙන්නේ අඩු අවස්ථාවක්. ඒ නිසා අන්ත දක්ෂිණාංශික ලක්ෂණ සමඟ නවීන ඇමෙරිකාවට නොගැළපෙන ලක්ෂණවලිනුත් ඩබ්.ඩබ්.ඊ. ආයතනය වෙලාගෙන තියෙන බව පැහැදිලියි.
ඒ සියල්ල මැද ඕල් එලීට් ආයතනයට ඒ අඩුපාඩු සම්පූර්ණ කළ හැකි බව දැනටමත් පෙන්වා හමාරයි. ඕල් එලීට් වෙත ආයෝජනය කරන ඛාන් පවුල පාකිස්ථානු සම්භවයක් ඇති පවුලක්. එපමණක් නොව ඕල් එලීට් ප‍්‍රධාන නිලධාරිනියක් හා කෝඩිගේ බිරිඳ වන බ‍්‍රැන්ඩි රෝඞ්ස් කළු ජාතික සම්භවයක් ඇති කාන්තාවක්. අනෙක් අතට ඛාන් පවුල ඇමෙරිකන් පාපන්දු ක්ෂේත‍්‍රයේ වැඩිපුර වැඩ කළ නිසා ඔවුන් ක‍්‍රීඩා රසයක් ලැබෙන වැඩසටහනක් නිෂ්පාදනය කරන්නට වැඩි කැමැත්තක් දක්වනවා. ටෝනි ඛාන් දැනටමත් සම්මුඛ සාකච්ඡුාවලදී කියා ඇති පරිදි රියැලිටි වැඩසටහනක් වෙනුවට ක‍්‍රීඩාමය නැඹුරුවක් ඇති ආකාරයට වැඩසටහන් නිෂ්පාදනය කිරීම ඕල් එලීට් ආයතනයේ ප‍්‍රධානම අරමුණයි. ඒ නිසා ඩබ්.ඩබ්.ඊ. ආයතනයේ අඩුපාඩු මකා ක‍්‍රීඩාමය රෙස්ලින් රසිකයන් ලබාදෙන්නට ඕල් එලීට් සමාගමට හැකිවනු ඇතැයි රෙස්ලින් රසිකයන් විශ්වාස කරනවා. දැනටමත් ඔවුන් සංවිධානය කළ වැඩසටහන් ඒ බවට සහතික කර තිබෙනවා.
අප මුලින්ම කී අවස්ථාව උදාවුණේ ඔවුන් සංවිධානය කළ ඩබල් ඕ නතින් වැඩසටහනේ අවසාන මොහොතේදීයි. ජෝන් මොක්ස්ලි නම් අතිශය ජනප‍්‍රිය තරුව පේ‍්‍රක්ෂකාගාරය මැද්දෙන් ආවේ ඕල් එලීට් දැවැන්ත යමක් පේ‍්‍රක්ෂකයන්ට සපයන බව සහතික වෙමිනුයි. ඉන්පසුව ඕල් එලීට් කණ්ඩායම කියමින් ඉන්නේ තමන් රෙස්ලින් ලොව විප්ලවයක් කරමින් සිටින බවයි.
පේ‍්‍රක්ෂකයන් 10,000ක් පුරවාගැනීමට නොහැකිව තිබුණු ඩබ්.ඩබ්.ඊ. ආයතනයෙන් පිට රෙස්ලින් ලෝකයට ජාතික මට්ටමේ සතිපතා රූපවාහිනී වැඩසටහනක් සැපයීම යනු දැවැන්ත විප්ලවයක් තමයි. ක‍්‍රීඩාව රසවිඳින්නට කැමති අයට යා හැකි තවත් නවාතැනක් බවට අනාගතයේදී ඒඊඩබ් වැඩසටහන් පත්වනු ඇතැයි විශ්වාස කළ හැකියි.
අනුරංග ජයසිංහ
