No menu items!
26.1 C
Sri Lanka
28 March,2024

මාවනැල්ලේ වෙඩිතැබීම ගැන දිවයිනේ මුග්ධ මාධ්‍ය භාවිතය

Must read


‘බුදුන්ට එරෙහි වූවන්ට එරෙහි වූ තස්ලීම්ට වෙඩි තැබූවන් නිදැල්ලේ’ යනුවෙන් දිවයින පුවත්පතේ ලිපියක් පළවී තිබුණි. එම ලිපියේ සිරස්තලය බැලූ බැල්මට වෙඩි තැබීමට ලක්වූ එම්.ආර්.එම්. තස්ලීම් නම් 37 හැවිරිදි මාවනැල්ලේ ප‍්‍රදේශවාසියා බුදුන් වෙනුවෙන් පෙනී සිටි නිසා වෙඩි ප‍්‍රහාරයට ලක්ව ඇත. ඒ නිසා එය බුද්ධාගමට දැඩි හානියක් බව ලිපිය බලන්නෙකුට හැඟී යනු ඇත.


බුදුපිළිම කැඞීමත්, එයට එරෙහි වූ මුස්ලිම් ජාතිකයෙකුට වෙඩි තැබීමත් එකට සම්බන්ධ කරගනිමින් සමාජය තුළ දැනටමත් ඇති ඉස්ලාමෝෆෝබියානු අදහස් වර්ධනය විය හැකිය. එහෙත් සැබෑ ලෙසම මෙම ලිපියට මුල් වූ මුස්ලිම් ජාතිකයා වන තස්ලීම්ට වෙඩි තැබීමේ සිදුවීමත් බුදුපිළිම කැඞීමේ සිදුවීමත් අතර ඍජු සම්බන්ධයක් ඇතැයි පොමේ ලිපියට පොලීසිය හෝ කිසිදු පරීක්ෂණ අංශයක් නිල වශයෙන් කියා තිබුණේ නැත. එමෙන්ම මෙම සිදුවීම් දෙක අතර සම්බන්ධයක් නැති බව පැහැදිළිව පොලිස් මාධ්‍ය ප‍්‍රකාශකවරයා විසින් ප‍්‍රකාශයක්ද සිදුකර තිබුණි. එහෙත් දිවයින පුවත්පතේ න්‍යායපත‍්‍රයට පොලීසියේ නිල තොරතුරු අදාල නොවේ. ඔවුන් මාර්තු 11 වැනිදා පුවත්පතේ ප‍්‍රධාන පුවත ලෙස මෙම සිදුවීම පළ කර තිබුණි.ිබුදුපිළිම කැඩූ අන්තවාදීන්ට එරෙහි වූ තස්ලීම්ට වෙඩි තියලා’ යන්න එම පුවතෙහි සිරස්තලය විය.


මාවනැල්ල දනාගම ප‍්‍රදේශයේදී යතුරු පැදියකින් පැමිණි නාඳුනන පුද්ගලයන් දෙදෙනෙකු විසින් තස්ලීම් නම් ප‍්‍රදේශවාසියෙකුට වෙඩිතබා තිබුණි. මේ වෙඩිතැබීමට සැකපිට සටහන ලියැවෙන මොහොත තෙක් කිසිවෙක්ව අත්අඩංගුවට ගෙන තිබුණේ නැත. එසේ වුව තස්ලීම් නමැත්තා අපරාධවලට එරෙහිව පොලීසිය සමඟ සහයෝගයෙන් කටයුතු කළ අයෙකු බවත් වෙඩිතැබීම එවැනි සිදුවීමක් නිසා කළ එකක් විය හැකි බවත් පමණක් මේ වනතෙක් හෙළිව ඇති කරුණුය. එහෙත් ඒ කරුණු ටික මත පදනම්ව දිවයින විසින් සිය අන්තවාදයට ගැලපෙන අන්දමේ දීර්ඝ ලිපියක් ලියා තිබුණි.


‘සමාජ සත්කාර යෙදෙමින් දේශපාලකයන්ටද රාජ්‍ය නිලධාරීන්ටද සහාය වෙමින් සිටින සමාජ සේවකයකුගේ කාර්යය භාරය දරා නොසිටිය හැකි වූයේ කාහටද? සතියකට ආසන්න කාලයකදී වූ මෙම සිදුවීමට අදාළ යැයි කිසිදු සැකකරුවෙක් මේ වනතුරු අත්අඩංගුවට ගැනීමට නොහැකි වූයේ කාගේ හෝ බලපෑමක් ඇති නිසාද’ යනුවෙන් ඉරිදා දිවයිනෙහි පළවූ ලිපියෙහි ලියා තිබුණි. පොලීසිය භාරව සිටින්නේ නම් ජනාධිපති මෛත‍්‍රීපාල සිරිසේනය. පොලීසිය හිතාමතා පරීක්ෂණ ප‍්‍රමාද කරන බව කියන්නේ නම් එයට වගකිවයුත්තේ ජනාධිපතිවරයා බව අතුරු කාරණයක් ලෙසලියා තැබිය යුතුය.


‘රටම අනුමාන කරන පරිදි තස්ලිම්ට වෙඩි තැබූයේ, ඉකුත් දෙසැම්බර් මස විසිතුන්වැනි දින මධ්‍යම රාත‍්‍රියේ සිට අන්තවාදි ලෙස, සෙසු ආගම් වෙත ගරහන තරුණ කැළක් විසිහතර විසිපහ යන දිනයන්හිදී අමනෝඥ ලෙස හැසිරෙමින් එම අදම කටයුත්තක් සිදු කළෝය.’ යනුවෙන්ද එම ලිපියෙහි තිබුණි. දිවයිනෙහි වගකීම් සහගත බවේ තරම ඒ ප‍්‍රකාශයෙන්ම පැහැදිළි වෙන්නේය. කාගේ හෝ අනුමානයන් පත්තරවල ලිවීම වගකීම් සහගත මාධ්‍ය භාවිතයක් නොවන බව අමුතුවෙන් කිව යුතු නැත.

සැබෑ ලෙසම තස්ලීම් මහතා ඒ ප‍්‍රදේශයේ විවිධාකාර කටයුතුවලට අදාලව පොලීසිය සමඟ සමීපව සම්බන්ධතා පවත්වා තිබුණි. ඔහු තමන්ගේ සම්බන්ධතා මත පොලීසියට විවිධාකාර නීතිවිරෝධී කටයුතු සම්බන්ධයෙන් තොරතුරුද ලබාදී තිබුණි. එහෙත් ඔහු මාවනැල්ලේ බුදුපිළිම කැඞීමේ සිදුවීමට අදාලව කර තිබුණේ සිංහල – මුස්ලිම් ගැටුමක් ඇතිවීමට ඉඩ නොදී එම තත්වය සමනය කිරීමට උත්සාහ කිරීම පමණි. සැකකරුවන්ව අල්ලාදී තිබුණේ ඔහු නොවේ. බුදුපිළිමය කැඩූ අවස්ථාවේදී ගම්වාසීන් විසින් අල්ලා පහරදී, පොලීසියට බාරදුන් තරුණයාගේ ප‍්‍රකාශ මත අනෙකුත් පුද්ගලයන්ව අත්අඩංගුවට ගෙන තිබුණි. ඒ නිසා බුදුපිළිම කැඞීම ගැන පොලීසියට ඔත්තු සැපයූ නිසා තස්ලීමට වෙඩි තැබුවායැයි දිවයින විසින් සමාජගත කරන්නට උත්සාහ ගන්නා අදහසට පදනමක් තිබිය නොහැකිය. එය සම්පූර්ණයෙන්ම පදනම් විරහිත අදහසක් වීමේ ඉඩක් ඇත. එම අදහස සැබෑවක් බව පසුව සාක්ෂි ඇතිව පසුව හෙළිවුණායැයි සිතමු. එහෙත් එවැන්නක් පිළිබඳ සාක්ෂි නැති මොහොතක අතිශය බරපතල කතාවක් කීම අතිශයින් වගකීම් විරහිත ක‍්‍රියාවකි.

මෙවැනි ලිපිවලින් ඔවුන් අවුළුවන ගිනිජාලාව කෙතරම් භයානකදැයි අවබෝධයක් නැතිව හෝ, තමන් අවුලවන ගිනිජාලාව පිළිබඳව හොඳින්ම දැනගෙන දිවයින විසින් මෙවැනි ලිපි ලියනවා විය යුතුය. ජාතීන් අතර ප‍්‍රශ්ණ ඇතිවීමේ ඉඩකඩක් ඇති සිදුවීමක් ගැන ප‍්‍රවේශමෙන් වාර්තා කිරීම ගැන කිසිදා දිවයින සැලකිලිමත් වෙන්නේ නැත.

පසුගිය සතියේදී නවසීලන්තයේ සුදු අන්තවාදියෙකු විසින් කළ වෙඩිතැබීම වැනි සිදුවීම් ඉබේම සිදුවන්නේ නැත. දිවයින වැනි වගකීමකින් තොර මුග්ධ මාධ්‍යවල ක‍්‍රියාකලාපයන් විසින් මෙවැනි සිදුවීම් සඳහා පොහොර එකතු සපයන්නේය. ලංකාවේද ඉස්ලාමෝෆෝබියාව මත භයානක සිදුවීම් කිහිපයක්ම සිදුවී ඇත්තේය. මතක තබාගත යුත්තේ මුස්ලිම් අන්තවාදයයැයි කිවහැකි එකු සිදුවීමක්වත් වෙන්නට පෙර ලංකාවේ මුස්ලිම් ජනතාවට එරෙහිව බෞද්ධ අන්තවාදීන්ගෙන් ප‍්‍රහාර එල්ලවී තිබෙන බවය. ඒ ප‍්‍රහාරවලින් මුස්ලිම් ජනතාවගේ ආරක්ෂාව පිළිබඳ හැඟීම අනතුරේ දමා තිබෙන බවය. පදනම් සහගත චෝදනා නැතිවම බෞද්ධ අන්තවාදීන්ව උසිගන්වන්නට සිංහල ජාතිවාදීන්ට හැකිව තිබෙන්නේ දිවයින වැනි පුවත්පත්වල මෙවැනි වගකීම් විරහිත මාධ්‍ය භාවිතාවන් බොහොමයක් එකතුවීමෙන්ය. දිවයින වැනි මුග්ධ මාධ්‍ය ආයතන කිසිදා මේ කාරණාවලට සංවේදි නොවන නිසා, මෙවැනි පුවත්පත් කියවන සාමාන්‍ය ජනතාව ප‍්‍රවේශම් විය යුතු බවත්, මේවා ගැන සාමාන්‍ය ජනතාව අවධානයෙන් සිටිය යුතු බවත් අපගේ අදහසය.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි