23.4 C
Sri Lanka
14 August,2022

ඉහළින් ආ නියෝගයෙන් පොලිසිය නිහඬයි විජේගුණරත්නට ඇප

Must read



රක්ෂිත බන්ධනාගාරගත කළ ත්‍රිවිධ හමුදා මාණ්ඩලික ප්‍රධානී අද්මිරාල් රවීන්ද්‍ර විජේගුණරත්නට දෙසැම්බර් 05 වෙනිදා කොටුව මහේස්ත්‍රාත් අධිකරණය ඇප ලබා දුන්නේ රහස් පොලිසිය ඊට සිය විරෝධය පළ නොකිරීම හා කොටුව පොලිසිය සාක්ෂිකරුවෙකුට කළ බලපෑම පිළිබඳව නිසි විමර්ශනයක් සිදු නොකිරීම නිසා බව වාර්තා වෙයි.
මෙම සැකකාර හමුදා නිලධාරියාට ඇප ලබාදීමට රහස් පොලිසිය කරුණු දැක්වූවේ නම් හෝ නාවික හමුදා සාක්ෂිකරු ගලගමගේ ලක්සිරිට මේ සැකකාර නිලධාරියා තර්ජනය කර බලපෑම් කිරීම පිළිබඳ පැමිණිල්ල නිසි ලෙස විමර්ශනය කර අධිකරණයට කරුණු වාර්තා කළේ නම් රවීන්ද්‍ර විජේගුණරත්නට ඇප ලබාගැනීමට මහාධිකරණය වෙත යෑමට සිදුවෙන අතර පොලිසියේ ඉහත හැසිරීම නිසා එය වැළකී ගොස් ඇත. ඒ අනුව ඔහුට කොටුව මහේස්ත්‍රාත් අධිකරණයෙන් ඇප ලබාගන්නට හැකිවිය.
පොලිසියේ මෙම හැසිරීම පිළිබඳව අදහස් දැක්වූ ඉහළ පොලිස් නිලධාරියෙකු අනිද්දා වෙත ප්‍රකාශ කළේ කොටුව පොලිසියේ පරීක්ෂණවලට සහ රහස් පොලිසියේ කරුණු දැක්වීමට රජයේ ඉහළින්ම සිටින පුද්ගලයෙකුගෙන් බලපෑම් එල්ලවී ඇති බවය.
මෙහිදී කොටුව පොලිසියේ ක්‍රියාකලාපය පිළිබඳව සිය අප්‍රසාදය දැක්වූ කොටුව මහේස්ත්‍රාත්වරයා බස්නාහිර පළාත් ජ්‍යෙෂ්ඨ නියෝජ්‍ය පොලිස්පතිවරයාට නියෝග කර සිටියේ මෙම විමර්ශන කොටුව පොලිසියෙන් ඉවත්කර වෙනත් පොලිස් නිලධාරියෙකු යටතට පත්කරන ලෙසය.
අපරාධකරුවෙකුට නවාතැන් සැපයීම, රජයේ සේවකයෙකුට අසත්‍ය තොරතුරු සැපයීම සහ නිල කටයුත්තක යෙදී සිටි රාජ්‍ය නිලධාරියෙකුට බාධා කිරීම ආදි චෝදනා මත සැකකාර අද්මිරාල්වරයා අත්අඩංගුවට ගත් අතර පසුව ඔහුට චෝදනා එල්ලකළේ මෙම සිද්ධියේ ප්‍රධාන සාක්ෂිකරුවෙකුට බැන තර්ජනය කර ඔහු පැහැරගන්නට මෙම සැකකාර අද්මිරාල්වරයා කටයුතු කර ඇති බවය.
මේ අතර අධිකරණ නියෝගයට අනුව කොටුව පොලිසියට නාවික සාක්ෂිකරු ගලගමගේ ලක්සිරි කළ පැමිණිල්ලට අදාළ විමර්ශනය වෙනත් පොලිස් ස්ථානයකට භාර දී ඇති දැයි පොලිස් මාධ්‍ය ප්‍රකාශක රුවන් ගුණසේකරගෙන් අනිද්දා කළ විමසීමේදී ඔහු පවසා සිටියේ ඉදිරියේදි වෙනත් විශේෂ කණ්ඩායමකට මෙම විමර්ශනය භාර දීමට කටයුතු කරන බවය.■

කේ. සංජීව / රේඛා නිලු‍ක්ෂි හේරත්

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි