No menu items!
26.1 C
Sri Lanka
28 March,2024

රවින්ද්‍ර විජේගුණරත්නගේ නාටකය අවසන්!!

Must read

 

 

ශ්‍රී ලංකා රාජ්‍යයේ උසස්ම හමුදා නිලය හෙබවූයේ ඔහුය. ඒ ත්‍රිවිධ හමුදා මාණ්ඩලික ප්‍රධානී ධුරයයි. ඔහු අද්මිරාල් රවින්ද්‍ර විජේගුණරත්නය. මේ හමුදා නිලධාරියා පසුගිය කාලයේ මාධ්‍යයට ප්‍රමුඛ ප්‍රවෘත්ති සපයන්නෙක් විය. ඒ නීතිය සමග ඔහු චෙස් ක්‍රීඩාවක නිරතවීම නිසාය. ජනාධිපති සිරිසේනද හිටපු ආරක්ෂක ලේකම්වරුන්ද යොදාගනිමින් ඔහු කාලයක් මේ ක්‍රීඩාව හොඳට කළේය. පසුගිය කාලයේ ඔහුට එරෙහිව නැගුණ ප්‍රධාන චෝදනාව වූවේ 2008/2010 කාලයේදී නාවික හමුදා කප්පම් කල්ලියක් පුද්ගලයන් 11 දෙනෙකු (ඇත්තට නම් 28 දෙනෙකු) පැහැරගෙන ගොස් වධහිංසා පමුණවා කප්පම් ගෙන ඝාතනය කිරීමේ සිද්ධියේ ප්‍රධාන සැකකරුවෙකු වන ලු‍තිනන් කොමදෝරු හෙට්ටිආරච්චි නැමති නාවික හමුදා නිලධාරියාට රැකවරණ සැපයීම සහ ඔහු ආරක්ෂිතව නැවක පටවා රටෙන් පිටකිරීමය. ඒ මේ කියන රවින්ද්‍ර විජේගුණරත්න නාවික හමුදාපති ලෙස කටයුතු කරන සමයේය. මේ කියන හෙට්ටිආරච්චි පොලීසිය අත්අඩංගුවට ගන්නට සොයන විටදී ඔහු නාවික හමුදාපතිවරයා විසින් ආරක්ෂා කිරීම බරපතළ වරදක්‍ ය. මෙම පිටමං කිරීම පිළිබඳ සියලු‍ තොරතුරු රහස් පොලීසිය සොයාගන්නා අතරම ඒවා ඔවුහු අධිකරණයටද වාර්තා කරන්නෝය. එහිදී අධිකරණය අවස්ථා කිහිපයකදී කියන්නේ මේ කියන හමුදා ප්‍රධානියා ඔහුගේ හමුදා පට්ටම නොසලකා අත්අඩංගුවට ගන්නා ලෙසය. ඔහු අත්අඩංගුවට ගන්නට සියලු‍ දේවල් ලකලෑස්ති වනවිට ඔහු ත්‍රිවිධ හමුදා මාණ්ඩලික ප්‍රධානිය. මෙම අත්අඩංගුවට ගැනීමේ ක්‍රියාන්විතය සඳහා පොලීසිය දෙසින් සියල්ල සිදුවනවිට ජනාධිපති සිරිසේන ඝෘජුව මැදිහත්වෙමින් මෙම හමුදා නිලධාරියා විදෙස් සංචාරයක යවන අතර එයින්ද නොනැවතී ඔහු පොලිස් ප්‍රධානීන්ට නියෝග නිකුත් කරන්නේ රවින්ද්‍ර විජේගුණරත්න අත්අඩංගුවට ගන්න එපා කියලාය. මේ අතර කාලයේ රවින්ද්‍ර විජේගුණරත්න මෙම පරීක්ෂණ භාර විමර්ශන නිලධාරියා වන අයිපී නිශාන්ත සිල්වාට විරුද්ධව සැලසුම්සහගතව කොටි ලේබලය අලවන්නේය. එම කොටි ලේබල් ඇලවීමේ මෙහෙයුමේ අවසානය ලෙස පසුගිය දා ජනාධිපතිවරයාගේ සෘජු නියෝග මත නිශාන්ත සිල්වා රහස් පොලීසියෙන් මීගමුව පොලීසියට මාරුකරන්නේය. එහෙත් ඒ සමග නැග ආ ජනතා විරෝධය හමුවේ නැවත එම මාරුකිරීම අවලංගු කරන්නේය. ඒ සමගම පොලිස්පතිවරයා වෙත, රහස් පොලීසියේ ප්‍රධානි රවී සෙනෙවිරත්න වාර්තාවක් යොමුකරමින් කියා සිටින්නේ තමා යටතේ සිටින මෙම විමර්ශන නිලධාරියා කොටි සංවිධානය සමග කිසිම සම්බන්ධතාවක් පවත්වා නැති බවය. මේ චෝදනාව අදාළ පරීක්ෂණයට කළ බාධාවක් බවය. සිදුවීම් මෙලෙස පෙළගැසෙන අතර සැකකාර හමුදා නිලධාරියා පසුගිය නොවැම්බර් 28 වෙනිදා කොටුව මහේස්ත්‍රාත් අධිකරණයට භාර වන්නේය. ඒ සිය නිල ඇඳුමින් සැරසී අධිකරණයට පැමිණෙමින්ය.

අත්අඩංගුවට
රටේ රාජ්‍ය පාලකයා සිරිසේන සමග එකතුවී පසුගි ය කාලයේ රවින්ද්‍ර විජේගුණරත්න නැටූ නාඩගම බෙරේ පලු‍වක්ද නොමැතිව මෙදින අවසන් වන අතර කොටුව මහේස්ත්‍රාත් රංග දසනායක මේ සැකකාර හමුදා නිලධාරියා දෙසැම්බර් 5 වෙනිදා දක්වා රක්ෂිත බන්ධනාගාරගත කරන්නේය. මෙහිදී උසාවියේදී ද ඉන් පිටතදී ද කැප්ටන් හැඩොක් පන්නයේ රංගනයක් ඉදිරිපත් කරන්නට රවීන්ද්‍ර විජේගුණරත්න සමත්විය. ඒ ඔහුගේ අනුගාමිකයන්ගේද ඔහු වටා සිටින දේශපාලකයන්ගේද නොමඳ අනුග්‍රහයෙන්‍ ය.

මෙහිදී මෙම උසස් නිලධාරියා පොලීසිය මගහැර කට්ටි පැනීමද, ජනාධිපතිවරයා සහ දේශපාලකයන් සමග එකතුවී ඔහු මෙම පරීක්ෂණවලට බාධා කළ ආකාරයද, පොලීසිය අධිකරණයට වාර්තා කර ඇත.

ඉන් අනතුරුව රහස් පොලීසිය අධිකරණයට කරුණු දක්වා ඇත්තේ මෙම සැකකාර හමුදා නිලධාරියා මෙම සිද්ධියේ ප්‍රධාන සැකකරුවෙකු වෙන ලු‍තිනන් කොමදෝරු ගලගමගේ ලක්සිරි යන අයට පසුගි ය 26 වැනිදා නාවික හමුදා මූලස්ථානයේදී ගිනි අවි පෙන්වා තර්ජනය කර පැහැරගෙන යාමට උත්සාහ දරා ඇති බවය. එම සිද්ධිය සම්බන්ධයෙන් නාවික නිලධාරියා කොළඹ කොටුව පොලීසියට පැමිණිල්ලක් කරැ’ති බවද රහස් පොලීසිය අධිකරණයට කරුණු වාර්තා කරන්නේය. ඒ අනුව කොළඹ කොටුව පොලීසියේ, පොලිස් ස්ථානාධිපතිවරයා අධිකරණයට කැඳවන අතර ඔහු පැමිණෙන තෙක් අධිකරණයේ කටයුතු දහවල් 2.30 දක්වා කල් තබන්නේය. මේ සමග සැකකාර රවින්ද්‍ර විජේගුණරත්න අධිකරණයෙන් පිටතට පැමිණෙන්නේය. ඒ ඔහු මෙම සිද්ධිය සම්බන්ධයෙන් දෙවන සැකකරු ලෙස නම් කර තිබියදීය. මේවා සුවිශේෂ සිදුවීම් ය. නීතිය නමන නැමිලිය.

මාධ්‍යයට ප්‍රහාරයක්
රවීන්ද්‍ර විජේගුණරත්න මෙලෙස අධිකරණයෙන් පිටතට පැමිණ තම රථයෙන් ආපසු යන අතර ඔහුගේ සහායට පැමිණි සිවිල් ඇඳුමින් සැරසුණ නාවික හමුදා නිලධාරීහු (බොහෝ දෙනෙක් නාවික බුද්ධි නිලධාරීන්) මාධ්‍යයට තර්ජනය කරන්නෝය. මෙහිදී ජීකේඒ සිල්වා නැමති නාවික බුද්ධි නිලධාරියෙකු මාධ්‍යවේදීන්ට ප්‍රහාරයක් එල්ලකර ඇත. එහිදී ‘දෙරණ’ ආයතනයේ මාධ්‍යවේදීන් ප්‍රහාරයට ලක්වීම සුවිශේෂය. මෙම හමුදා නිලධාරියා පොලීසිය විසින් අත්අඩංගුවට ගෙන ඇත. රවින්ද්‍ර විජේගුණරත්න මාධ්‍ය ඉදිරියේදී හම්බන්තොට වරාය පරීශ්‍රයේදී හැසිරුණු අයුරු අපට අමතක නැත. ඔහුගේ ගෝලයන්ද ගුරා වැනිම නොවුණහොත් පුදුමය.

කැත කුමන්ත්‍රණ
රවින්ද්‍ර විජේගුණරත්න අධිකරණයට භාර වන්නේ එදිනම ඇප ලබාගැනීමේ පූර්ව සැලසුම් අනුවය. එම කාර්යය සාර්ථකව කළ යුතු බව රජයේ ඉහළ පුද්ගලයන් දෙදෙනෙකු අදාළ අමාත්‍යාංශයේ උසස් නිලධාරියාට උපදෙස් ලබාදී ඇත. නීතිපති දෙපාර්තමේන්තුවද මේ උපදෙස් අනුව යමින් සැකකාර රවින්ද්‍ර විජේගුණරත්නට පසුගි ය 28 වැනිදාම ඇප ලබාගන්නට විශේෂ මහන්සියක් ගෙන ඇත. එය එම ආයතනයට කරන ගෞරවයක් ලෙස සඳහන් කළ යුතුය.

පොලිස් කරුණු දැක්වීම්
ඉහත කුමන්ත්‍රණ සියල්ල සුන් කරලීමට පොලීසියේ කරුණු දැක්වීම ප්‍රමාණවත් වී ඇත. එය යුක්තිය අගයන ජනතාව සතුටු විය යුතු කාරණයක් ය. මෙහිදී අධිකරණයට පැමිණි කොටුව පොලිස් ස්ථානාධිපතිවරයා ප්‍රකාශ කර ඇත්‍තේ නාවික නිලධාරී ලක්සිරිගේ පැමිණිල්ල සම්බන්ධයෙන් තවමත් විමර්ශන සිදුවන බවය. මෙහිදී අනාවරණය වී ඇත්තේ අදාළ විමර්ශන කටයුතු සඳහා නාවික හමුදා මූලස්ථානයට ඇතුළුවීමට නාවික හමුදාව ඉඩ නොදෙන බවය.
ඉන් අනතුරුව රහස් පොලීසියේ මෙම විමර්ශන භාර ප්‍රධාන නිලධාරියා වන නිශාන්ත සිල්වා අධිකරණයට පොලිස්පතිවරයාගෙන් ලැබුණු රහස් ලිපියක් ඉදිරිපත් කර ඇත.

මෙම ලිපිය ඉදිරිපත් කිරීමෙන් අනතුරුව නිශාන්ත සිල්වා අධිකරණයට ප්‍රකාශ කර ඇත්තේ සැකකාර හමුදා නිලධාරියා පොලිස්පතිවරයාට දූරකථනයෙන් අමතා තමන් කොටි සංවිධානයට සම්බන්ධ බවට ප්‍රකාශ කර ඇති බවය. එම නිසා තවදුරටත් මෙම පරීක්ෂණවලට අදාළ පොලිස් නිලධාරියා දායක නොකරගන්නා ලෙසද පොලිස්පතිවරයාට බලපෑම් කර ඇති බව අධිකරණයේදී අනාවරණය වී ඇත. මෙම තත්ත්වය තුළ ආරක්ෂක මාණ්ඩලික ප්‍රධානි රවින්ද්‍ර විජේගුණරත්න රහස් පොලිස් විමර්ශන නිලධාරී නිශාන්ත සිල්වා ස්ථාන මාරු කිරීමට කටයුතු කර ඇති බවද මෙහිදී පොලීසිය අධිකරණයට කරුණු දක්වා ඇත. ඊට අමතරව පොලීසිය අධිකරණයට කරුණු වාර්තාකර ඇත්තේ මෙම සැකකාර හමුදා නිලධාරියා අත්අඩංගුවට ගන්නට යෑමේදී අධිකරණයට කරුණු හෙළිකළ නොහැකි මට්ටමේ විශාල බලපෑම් රැසක් එල්ලවූ බවය.

මේ සියලු කරුණු සැලකිල්ලට ගත් මහේස්ත්‍රාත්වරයා විමර්ශන නිලධාරීන්ට නිදහසේ රාජකාරි කිරීමට බාධා වන ලෙස ස්ථාන මාරු කිරීමට උත්සාහ දැරීම, විමර්ශනයේ සාක්ෂි ඇති ස්ථානවලට ඇතුළුවීමට බාධා කිරීම, නඩුවේ සාක්ෂිකරුවෙකුට බලපෑම් කිරීම සහ එම විමර්ශනයට බාධා කිරීම යන කරුණු යටතේ හමුදා නිලධාරී රවින්ද්‍ර විජේගුණරත්නගේ ඇප අයැදුම ප්‍රතික්ෂේප කරන බවය.

මේ අනුව ජනාධිපතිවරයාගේද, ආරක්ෂක ලේකම්වරයාගේ ද, නීතිපති දෙපාර්තමේන්තුවේද කුමන්ත්‍රණකාරී හැසිරීම් අබිබවා යුක්තිය සාධාරණයට ටික කලකට හෝ ඉඩ ලැබුණි. දැන් මේ නිලධාරියා සිටින්නේ බන්ධනාගාරයේය. එහෙත් ඔහුට අද හෙටම රෝගයක් වැළදෙන්නට පුළුවන්‍ය. එය එසේ වුවහොත් ඔහු හෙට අනිද්දා සිට අධිකරණ රෝහලේ සුවපහසුව මඳ කලක් විවේක සුවයෙන් පසුවෙනවා ඇත.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි