මාදුළුවාවේ සෝභිත නාහිමි අපවත්ව තෙවසරක් ද පිරෙන මේ මොහොතේ රට ප‍්‍රජාතන්ත‍්‍ර විරෝධී, ව්‍යවස්ථා විරෝධී ආණ්ඩු මංකොල්ලයකින් ගොඩඒමට උත්සාහ කරමින් සිටී.
1978 ආණ්ඩුක‍්‍රම ව්‍යවස්ථාව යටතේ පත්වූ සියලූම ජනාධිපතිවරුන් තම විධායක බලය අවභාවිත කිරීමේ ශීඝ‍්‍රතාව එන්න එන්නම වැඩිවී ඇති බව මීට පෙරද ලියා ඇත්තෙමි. ජේආර් ඔහුටම අනන්‍ය වූ ක‍්‍රමයකට බලය අවභාවිත කළේය. ආර් පේ‍්‍රමදාස, චන්ද්‍රිකා බණ්ඩාරනායක හා මහින්ද රාජපක්ෂද එසේය. (ඞීබී විජේතුංග මහතාගේ සුළු කාලය එසේ නොවීය).
මේ වන විට විධායක ඛේදවාචකයෙන් රට ගලවා ගන්නට පෙරමුණ ගත් යතිවරයාගේ ආශීර්වාදය මත තේරී පත්වූ හා ආණ්ඩුක‍්‍රම ව්‍යවස්ථාවට එක්කළ 19 වැනි සංශෝධනය හරහා විධායක බලය අඩු කිරීමකටද ලක්වූ පසුව පවා සිරිසේන ජනාධිපති අන් කවරෙකුටවත් අලගු තියන්නට බැරි ලෙස බලය අවභාවිත කර රටම අස්ථාවර තත්වයකට පත් කර ඇත. විධායක ජනපති ක‍්‍රමය ගෙනඒමට පසුබිම් වූ එක් මූලික හේතුවක් වූයේද රට තුළ ස්ථායිභාවයක් ඇති කරලීමයි. එහෙත් එය හරහාම එයට ප‍්‍රතිවිරුද්ධ දෙයක් සිදු කරනු ලැබ තිබීම උත්ප‍්‍රාසයකි. විධායක ජනාධිපති ක‍්‍රමය පිළිබඳව නව ගෝලීය කථිකාවතකට වුව හොඳම උදාහරණයක් ලංකාව සපයා ඇති බව ද මින් පෙනේ.
විධායක ජනාධිපතිවරුන් සියලූ දෙනාම කටයුතු කර ඇති ආකාරය නිරීක්ෂණය කළහොත් තම පුද්ගල චරිතවලට ආවේණික ගතිගුණත්, පවුල්, පක්ෂ ආදියේ අව‍ශ්‍යතාත් පදනම් කරගෙන ජනාධිපතිධුරයේ කටයුතුද බොහෝ විට කර ඇති බව පෙනේ. එහි නින්දිතම, අපරිණතම හා වියරු උදාහරණය සිරිසේන ජනාධිපතිවරයා තුළින් අපි දකිමින් සිටින්නෙමු. මෙම තත්වය හෙට අනිද්දා වන විට තවතවත් වැඩිවනු ඇත. පුද්ගලයා කවුරු වුවද රටේ රාජ්‍ය නායකයා ලෙස ඒකමතිකව කටයුතු කිරීමට පවතින විධායක ජනාධිපති ක‍්‍රමය හරහා නොහැකි නම් එම උරචක‍්‍රමාලය රටෙන් ගලවා දැමිය යුතු බව කියන්නට මීට වඩා වෙනත් උදාහරණයක් නැත.
මෙම තත්වයෙන් රට ගලවා ගැනීමේ වගකීම මේ මොහොතේ ඇත්තේ මහජන ඡන්දයෙන් පාර්ලිමේන්තුවට පත්කර යවන ලද 225 දෙනාටය. මේ සියලූ දෙනාටම කිසියම්ම වූ ආකාරයේ දේශපාලන අවබෝධයක් ද ආණ්ඩුක‍්‍රම ව්‍යවස්ථාව හා 19 වැනි සංශෝධනය පිළිබඳව හා එහි පසුබිම පිළිබඳව අවබෝධයක්ද තිබෙන බව අපට විශ්වාසය. එනිසා අඩුම තරමේ 113කගේ අත්සන් සහිත කඩදාසියක්වත් අතේ නොමැතිව අංජනමින් බලා ජනාධිපතිවරයා ගෙන ඇති තීරණයට හෘදය සාක්ෂියට එකඟව සහාය පළකිරීමට හැකි දැයි ඔවුන් විමසා බැලිය යුතුය.
සිරිසේන ජනාධිපතිවරයාගේ මෙම මුග්ධ ක‍්‍රියාකලාපය නිසා ඉදිරි ජනාධිපතිවරණයකට ශ‍්‍රීලනිප හා ශ‍්‍රීලපොපෙ එක්ව සැදෙන සන්ධානයක ජනපති අපේක්ෂකයා වීමට තිබූ ඔහුට තිබූ විභවයද නැති කරගෙන විධායක ජනාධිපති ක‍්‍රමයද අන්තිමටම පාරාජිකා කර ඇත. එනිසා මෙම අවස්ථාව රටේ යහපතට කළමනාකරණය කර ගැනීමට ඔහු හා මහින්ද රාජපක්ෂ මහතා නියෝජනය කරන දේශපාලන පක්ෂ හා බලවේග ද කටයුතු කළ යුතුය. එක්සත් ජාතික පෙරමුණ, දෙමළ ජාතික සන්ධානය ජනතා විමුක්ති පෙරමුණ, මුස්ලිම් කොන්ග‍්‍රසය වැනි පක්ෂවල නායකයන් මේ අවස්ථාවේ වගකීමෙන් යුතුව කටයුතු කරන වග පෙනේ. මහින්ද රාජපක්ෂ මහතාද සිරිසේන ජනාධිපතිවරයා කළ ක‍්‍රියාව අනුමත නොකරන වග පාර්ලිමේන්තු වටරවුමේ පැවති රැලියේදී ඔහු කළ කථාවෙන් හා ඉඟිවලින් අවබෝධ කරගත හැකිය. මේ අනුව බලන විට පාර්ලිමේන්තු ප‍්‍රජාතන්ත‍්‍රවාදය පිළිබඳව විශ්වාසය තබා කටයුතු කළ යුතු තැනකට රට පත්ව ඇත. එනිසා වගකිවයුතු පුරවැසියන් ලෙස අප අපගේ ඡන්දයෙන් පත්වූ ජනතා නියෝජිතයන්ගෙන් ඉල්ලා සිටින්නේ දේශපාලන ගණිකාවන් ලෙස කටයුතු නොකරන ලෙසටය.
කථානායකවරයාගේ 2018 නොවැම්බර් 05 දිනැති නිවේදනය අනුව 2018 ඔක්තෝබර් 26 වැනි දින පැවති තත්වයට පාර්ලිමේන්තුව නැවත පත්ව ඇති හෙයින් ඒ අනුව කටයුතු කර ඉදිරි මැතිවරණයක් තෙක් රට අස්ථාවර නොවී පවත්වාගෙන යාමට කටයුතු කිරීමේ වගකීම ම‍න්ත‍්‍රීවරුන් සතුය. පාර්ලිමේන්තුව තුළ ප‍්‍රකාශ විය යුත්තේ දැනුවත්භාවයෙන් යුතු ජනතා නියෝජිතයන්ගේ අව්‍යාජ කැමැත්ත අකමැත්තය. ඒ සඳහා ඉඩකඩක් විවර කළ හැකි නම් මහින්ද රාජපක්ෂටද ප‍්‍රජාතන්ත‍්‍ර‍වාදියෙකුගේ හැඩරුව ගත හැකිය.
අපට හැඟීයන ආකාරයට මහින්ද මහතා හා පොදුජන පෙරමුණද විධායක ජනාධිපති ක‍්‍රමය අහෝසි කිරීමට කැමතිය. එනිසා ඉදිරි මාස කීපය තුළ රට ගැන සිතා සියල්ලන්ම කටයුතු කළහොත් අප දිනුම්ය. රටේ විධායක ජනාධිපතිවරයා විසින්ම නිර්මාණය කරන ලද අවුලක් මනා ලෙස කළමනාකරණය කර ඒ හරහා මතු වූ විභවය තුළින් විධායක ජනාධිපති ක‍්‍රමයද අහෝසි කරගත් ජාතියක් බවට අප පත්වනු ඇත.
සෘජු ජනතා ඡුන්දයෙන් පත්කළ ජනාධිපතිවරයා තමාට එම වරම මේ වන විට නොමැති බව තම පක්ෂය තුන්වැනි බලවේගය බවට පත්ව ඇතැයි ප‍්‍රකාශ කිරීමෙන්ම පිළිගෙන ඇතැයි කීවාට වරදක් නැත. එනිසා නීති සම්පාදකයන් ලෙස ජනතාව පත්කළ අයගෙන් ජනතාව අපේක්ෂා කරන්නේ වඩා ජනතාවාදී හා ප‍්‍රඥාගෝචර ප‍්‍රවේශයක්ය. එනිසා මෙම සිදුවීම වෙස්වලාගත් ආශීර්වාදයක් ලෙස සලකමින් සියල්ලන්ම මාදුළුවාවේ සෝභිත හිමියන්ගේද බලාපොරොත්තු ඉටු කෙරෙන ලෙස මේ වන විට පාරාජිකා කර ඇති විධායක ජනාධිපති ක‍්‍රමය අහෝසි කිරීමේ වැඩපිළිවෙළකට යාම සඳහා ඉදිරියේදී කටයුතු කළ යුතු බව පෙනේ.
පි‍්‍රයදර්ශනී ආරියරත්න
