No menu items!
26.1 C
Sri Lanka
28 March,2024

ගොරකා දඩමස් කරපු පොලිසිය

Must read

සීගිරිය පොලිසියට බොහෝ වැදගත් කාර්යක් පසුගි යදා පැවරිණි. ඒ පිදුරංගල රජමහා විහාරයේ දායක සභාවේ යැයි කියාගන්නා ලියන ගෙදර අබේසිංහ නැමැත්තෙක්, පිදුරංගල විහාරයට කොල්ලෝ වගයක් පස්සා පැත්ත හරවා ඡායා රූප ගෙන ඒවා මුහුණු පොතට දමා, එම රහතුන් වැඩසිටි පින්බිමට අපහාසයක් කරා යැයි පැමිණිල්ලක් කිරීම නිසා ය. මේ පිදුරංගල ඉන්නේ සිගිරි අප්සරාවන් දෙස උදේහවා නෙත් යෝමාගෙනය. එහෙයින් එම ක‍්‍රියාව යම්හෙයකින් අපහාසයක් නම් මේ සිගිරි චිත‍්‍රද කටුගා දැමිය යුතු බව මුලින්ම කිව යුතුය. බොහෝ සිදුවීම් අරභයා භාවනානුයෝගීව සිටින පොලිසිය මෙම පැමිණිල්ල හමුවේ සහ මේ පිළිබඳව සමාජ මධයේ ගිය ඝෝෂාව අබිමුව නිහඩව නොසිටියේ ය. මේ ඝෝෂාවේ මැදට පැන්න අගමැති රනිල් වික‍්‍රමසිංහද මේ පස්සා පැත්ත හරවා නිරුවත් පස්සවල් ඡායා රූප ගෙන ඒවා මුහුණු පොතට මුදාහල දරුණු අපරාධකරුවන් වහාම සොයන්න යැයි පොලිසියට උපදෙස් දුන්බව මාධ්‍ය වාර්තා කළේය.

ඒ අනුව පොලිසිය ගලේවෙල ප‍්‍රදේශයේ ජීවත්වන තරුණයින් පස්දෙනෙකු පිළිබඳව පරීක්ෂණ පවත්වා ඇත. එහිදී දීමන්ත සපුමල් බණ්ඩාර, චමිත දිල්සාන් අබේවික‍්‍රම, චන්දික පියුමාල් යන තිදෙනෙක් අත්අඩංගුවට පත්වෙන අතර අනෙක් දෙදෙනෙක් රජයේ සාක්ෂිකරුවන් වී ඇත. ඔවුන් නම් ඉෂාර ලංකා සමරවීර, රවිදු කාංචන රණසිංහ යන අයයි. මොවුන් පස්දෙනාම 19වැනි වියේ පසුවෙන මිතුරන් ය. ඔවුන් පස්දෙනා පසුගිය සැප්තැම්බර් මාසයේ 23 වැනි දින පිදුරංගල කන්ද නැග ඇත. එහිදී වුණා යැයි කියන සිද්ධිය එක් සාක්ෂිකාර මිත‍්‍රයෙක් පොලිසියට කියන්නේ මෙවැනි කතාවක් ය. ඔහු ඉෂාර ලංකා සමරවීරය. ඔහු කියන්නේ පස්වරු 2.30ට පමණ ඔවුන් පස්දෙනා පිදුරංගල නැග්ග බවය. එහිදී සංජු නොහොත් චන්දික පියුමාල් කලිසම ගලවා පස්ස පැත්ත පෙන්වා පොටෝ එකක් ගන්නට සපුමල් ට යෝජනා කළ බවය. එහිදී එයට තමන් සහ රවිදු කාංචන විරුද්ධ වූ බවය. පසුව ඔවුන් දෙදෙනා ගලෙන් පහළට බැස එම පොටෝ ගත් බව තමන් දැක්ක බවය. මෙළෙස දෙදෙනෙකු සාක්ෂි ලබාදෙන අතර එම සාක්ෂිකරුවන් දෙදෙනා අතර සිගිරිය පොලිසියේ ස්ථානාධිපතිවරයාගේ හිතවතෙකුගේ දරුවෙක්ද වනබව දැනගන්නට ලැබේ.

මේ කියන සිද්ධියට අදාළව එක පස්සා පැත්ත නිරුවත් ඡුායා රූපයක් පොලිසිය අධිකරණයට ඉදිරිපත් කර ඇත. එහි සිටින්නේ තරුණයින් දෙදෙනෙක් පමණි. එම ඡුායා රූපයද ඔරිජිනලයන් නොවෙන අතර එයද මුහුණු පොතින් බාගත කරනු ලැබූ එකකි.. මේ අනුව පසුගිය සැප්තැම්බර් 26 වැනිදා සීගිරිය පොලිසිය තරුණයින් තිදෙනෙකු අත්අඩංගුවට ගෙන දඹුල්ල අධිකරණයට ඉදිරිපත් කරන අතර එහිදී පොලිසිය නින්දිත ලෙස මෙම තරුණයින්ට ඇප ලබාගැනීමට නොහැකිවෙන පරිද්දෙන් පුරාවිද්‍යා පනත් යටතට ගැනෙන 1940 අංක 09, 1998 අංක 24 හි 31 වගන්තිය යටතේ සහ 2005 අංක 12 දරන දඩමුදල් සංශෝධන පනත යටතේ සහ 1983 අංක 22 දරන අසභ්‍ය ප‍්‍රකාශන සංශෝධිත පනත යටතේ චෝදනා ගොනුකර ඇත. ඒ මේ පස්ස පැත්ත පෙන්නු කොල්ලන්ට ඔවුන්ගේ තාරුණ්‍යට හොද පාඩමක් උගන්නන යැයි සිතාගෙන විය යුතුය.

එහෙත් ඔවුන් පස්ස නිරුවත් කර එය පිදුරංගල දෙසට හරවා මුහුණු පොතේ තිබෙන ඡුායා රූපය පරිදි ඡුායා රූප ගෙන නැති බවද දැනගන්නට ලැබෙන්නේ ය. එය එසේනම් පොලිසිය ලියා ඇත්තේ බොරු සාක්ෂිද නැතිනම් මේ සාක්ෂිකාර යාළුවන් පොලිසියට පවසා ඇත්තේ බොරුද?.. තත්ත්වය කුමක් උවත් තරුණකමට මුහුණු පොතේ අගියෝගයක් වෙනුවෙන් මේ කරපු ක‍්‍රියාවට මෙලෙස බරපතල දඩුවමක් ලබාදීම යුක්තිසහගත නැත. රටේ සැමටම එකම නීතියක් ක‍්‍රියාත්මක නොවෙන තත්වය තුළ මෙය නරි නාටකයක් ය. අනෙක් පැත්තෙන් මෙය පුරාවිද්‍යා ස්ථානයක් සේ ගැසට් කළ ස්ථානයක් බව කියන්නේ කවුරුන්ද ඒ සදහා ලිඛිත සාක්ෂි තිබෙන්නේ ද? පොලිසියට සොයාබලන්නට තිබුණි. එහෙත් ආගමික උමතුව සහ දේශපාලකයින්ගේ බහට රැුවටුන පොලීසිය හතර අතේ අසූචි තවරාගත් බව පෙනෙන්නේ ය.

මේ පිළිබඳව අදහස් දක්වන මෙම ළමයින් වෙනුවෙන් පෙනීසිටින නීතිවේදී උදුල් පේ‍්‍රමරත්න කියන්නේ පොලිසිය දේශපාලන අවශ්‍යතා මත මෙම ළමුන්ට ඇප ලබාගන්නට නොහැකිවන ලෙස මේ නඩුව ගොනුකර ඇති බවය. මෙම ඡුායා රූපයට අදාළ ඔරජිනලය වත් පොලිසියට සොයාගන්නට බැරිවී ඇතිබව කියා සිටින ඒ මහතා වැඩිදුරටත් කියන්නේ මෙම ස්ථානය පුරාවිද්‍යා ස්ථානයක් ලෙස ගැසට් මගින් ප‍්‍රකාශයට පත්කළ ස්ථානයක්ද යන්නවත් පොලිසිය නොදන්නා බවය. මෙලෙස පුරාවිද්‍යා පනත යටතේ නඩු පවරන්නේ නම් නීතිපති උපදෙස් ලබාගත යුතු බවද අදාළ ස්ථානය පුරාවිද්‍යා ස්ථානයක් ද යන්න පුරාවිද්‍යා කොමසාරිස්වරයාගෙන් සහතික කරගත යුතු බවද ඔහු කියන්නේය. පොලිසිය මේ කිසිවක් සපුරා නැත. ඒ අනුව අදාළ ස්ථානය පුරාවිද්‍යා ස්ථානයක්දැයි අධිකරණයට වර්තකරන්න යැයි දඹුල්ල මහේස්ත‍්‍රාත්වරයා පොලිසියට නියෝග නිකුත් කරන අතර අදාළ ළමුන් නිකරුණේ ඔක්තෝම්බර් 3 වෙනිදා දක්වා රිමාන්ඞ් බන්ධනාගාර ගතකරන්නේය. ඒ මේ පනත යටතේ මහේස්ත‍්‍රාත් අධිකරණයට ඇප ලබාදිය නොහැකි නිසාය. ඉන්අනතුරුව ඔක්තෝම්බර් 3 වැනි දින නඩුව නැවත කැදවන අතර, එහිදීද මෙම ස්ථානය පුරාවිද්‍යා ස්ථානයක් දැයි පොලිසිය අධිකරණයට කරුණු කියන්නේ නැත. එහිදී මහේස්ත‍්‍රාත්වරයා පොලිසියට පවසා ඇත්තේ පුරාවිද්‍යා කොමසාරිස්වරයා දුරකථනයෙන් අමතා හෝ විස්තර ලබාගන්නා ලෙසය. ඒ අනුව පසුගිය 3 වැනිදා මෙම නඩුව මදකට කල්තබුනු ලැබූ බවද දැනගන්නට ලැබේ. එහිදීද පොලිසියට අදාළ කරුණ පුරාවිද්‍යාවෙන් තහවුරු කරගන්නට නොහැකිවී ඇත. ඒ අනුව නැවත මෙම නඩුව ඔක්තෝම්බර් 10 වැනිදා දක්වා කල් දමා ළමුන් නැවත රක්ෂිත බන්ධනගාර ගතකර ඇත.

මාතලේ දිස්ත‍්‍රිකයට අයත් පුරාවිද්‍යා ස්ථාන පිළිබඳ දත්ත පිරිස්සිමේදී මෙම සිද්ධිය සිදුවුණා යැයි කියන පිදුරංගල මෙම ස්ථානය පුරාවිද්‍යා ස්ථානයක් සේ ගැසට් කරනැති බව දැනගන්නට ලැබේ. එය එක කාරණයකි. මෙම ළමුන් පිදුරංගල මේ ස්ථානයේදී කලිසන් ගලවා ඡායාරූපවලට පෙනී නොසිට ඇති බව

අනෙක් කාරණයයි. ඒ අනුව මෙම මුහුණු පොතේ පළවූ පින්තූරය ඡුායා රූප සංස්කරණ මෘදුකාංගයක් මගින් සංස්කරණය කරනු ලැබූ පින්තූරයක් බවද දැනගන්නට ලැබේ. ඔවුන් එය මුහුණු පොතේ පළවූ අභියෝගයකට ප‍්‍රතිචාර ලෙස සංස්කරණය කර පළකරනු ලැබූ ඡුායා රුපයක් නම්? ඒ අනුව මේ කරුණු සත්‍යනම් පොලිසිය මේ ළමුන්ට බරපතල අපරාධයක් කර ඇත. පොලිසිය මේ ළමුන්ගේ මානව හිමිකම් කෙලෙසා ඇත. ඔවුන්ගේ මූලික අයිතිවාසිකම් උල්ලංගණය කර ඇත. ඒ නිකරුණේ බොරු චෝදනාවකට පටලවා රිමාන්ඞ් කිරීම හරහා ය.
මෙම සිද්ධියට අදාළ නඩුව කැදවූ පසුගිය ඔක්තෝම්බර් 3 වැනිදා උදුල් පේ‍්‍රමරත්න ප‍්‍රමුඛ නීතිවේදීන් අධිකරණයෙන් මෙම ළමුන්ට ඇප ඉල්ලා සිටිමින් කියා ඇත්තේ පුරාවිද්‍යා ස්ථානයක්ද යන වාර්තාව ලැබෙන තුරු මෙම ළමුන්ට ඇප ලබාදෙන්න කියා ය. එහෙත් අධිකරණය එහිදී ද ප‍්‍රකාශ කර ඇත්තේ ඒසදහා මහේස්ත‍්‍රාත් අධිකරණයට බලයක් නොමැති බවය. මේ අතර මෙම පැමිණිල්ල දැමුවා යැයි කියන දායකයා සිටින පන්සලේ හිමිනම ප‍්‍රකාශ කර ඇත්තේ මේ ළමුන්ට ලිහිල් දඩුවමක් ලබාදී ඔවුන් නිදහස් කළ යුතු බවය. එහෙත් දැන් පොලිසියට එහිමිගේ හඩට කන්දී දඩමස් ගොරකා කරන්නට බැරිය. ගොරකා දඩමස් කරන්නට ප‍්‍රථම පොලිසියට ඒ ගැන හිතුවානම් මේ ළමුන්ද, ඔවුන්ගේ දෙමාපියන්ද, මෙතරම් කරදරයට හිරහැරයට පත්වන්නේ නැත. මේ නඩුව පිළිබදව කටයුතු කරන නීතිවේදීන් කියන්නේ මේ සිද්ධිය අරබයා ඉදිරි දින කිහිපයේදී පොලිසියට විරුද්ධව මූලික අයිතිවාසිකම් නඩුවක් ගොනුකරන බවය. මේ අනුව දැන් පෙනෙන්නේ දේශපාලන සහ ආගමික උවමනාවන් වෙනුවෙන් කඬේ ගිය පොලිසිය අමාරුවේ වැටී ඇති බවය.

සමාජයේ ඉහලින් වැජබෙන ධනය සහ බලය තිබෙන මිනිසුන් යම්යම් වැරදිවලට හසුවූ විට ඔවුන්ට ලේසියෙන්ම ඇප ලබාගැනීමට පුළුවන් වෙන විදිහට චෝදනා ගොනුකරන පොලිසිය, සමාජයේ පහළින් සිටින පීඩිතයින් ඉදිරියේදී හැසිරෙන්නේ මෙහෙමය. රටේ අගමැතිවරයා ද තාජුදීන්, එක්නැළිගොඩ, ලසන්ත වැනි අය පිළිබදව කෙරෙන පරීක්ෂණ දිරිගන්වන්නට කතා කරන්නේ නැත. එහෙත් කොල්ලෙක් කොලූ‍කමට පස්ස පැත්ත පෙන්නා අඩ නිරුවත් ඡුායාරූපයක් මුහුණු පොතට දැමුවිට අගමැතිවරයටද නීතිය මතක් වෙන්නේ ය. පොලිසියට උපදෙස් දෙන්නට මතක් වෙන්නේ ය. මේවාට අප කොහෙන් සිනාසිය යුතුද? යහපාලකයෝ එය කියා දිය යුතුය

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි