No menu items!
29.7 C
Sri Lanka
29 March,2024

ජනාධිපතිගේ ආශීර්වාදයෙන් සභාපතිනියගේ අධ්‍යක්‍ෂණයෙන් ජාතික රූපවාහිනිය යළිත් නක්‍ෂත‍්‍රකාරයන්ට වේදිකාව හදයි දොර හරියි

Must read

‘‘ජාතික රූපවාහිනියෙ අපි කාලයක් තිස්සෙ මේ වගේ වැඩසටහන් නවත්වන්න කියලා සටන් කළා. ආරියරත්න ඇතුගල මහතා සභාපතිවරයා ඉන්න කාලයේදී රූපවාහිනියට ජ්‍යෝතිෂවේදීන් ඇවිල්ලා මිනිස්සුන්ගෙ ඔළුවලට මිථ්‍යාව පුරවන වැඩසටහන් විකාශය කළා. නූතන ඉතිහාසය පුරාවට කළේ ඒක. ඒත් 2015 ජනවාරි 08 වැනිදා ආණ්ඩු වෙනසෙන් පස්සෙ අපි කාලයක් තිස්සෙ කරපු ඉල්ලීම් සඵල වුණා. ජාතික රූපවාහිනියේ සභාපතිවරයා ලෙස පත්වුණ සෝමරත්න දිසානායක මහතාගේ මැදිහත්වීමෙන් ජාතික රූපවාහිනිය ජ්‍යෝතිෂය ප‍්‍රවර්ධනය කරන වැඩසටහන් නැවැත්වූවා. එවැනි වැඩසටහන් නවත්වන්න තරම් නිර්භීත තීරණයක් ගත්ත ලංකාවෙ සිංහල භාෂාවෙන් විකාශන කටයුතු කරන එකම රූපවාහිනී නාළිකාව තමයි ජාතික රූපවාහිනිය. එතැනින් පස්සේ මේ වෙනතුරුම ඒ වැදගත් තීරණය අනුව ජාතික රූපවාහිනිය කටයුතු කළා. දැන් මේ උත්සාහ කරන්නෙ ජාතික රූපවාහිනිය ආයෙමත් ආපස්සට ඇදගෙන යන්න.’ ජාතික රූපවාහිනියෙහි සේවය කරන ප‍්‍රවීණ මාධ්‍යවේදියෙක් නිර්නාමිකව අනිද්දා සමග අදහස් පළකරමින් එසේ පැවසීය.

ඔහු එසේ අදහස් ප‍්‍රකාශ කළේ ජාතික රූපවාහිනී නාළිකාවේ සැප්තැම්බර් 12 වැනිදා විකාශය වූ ‘චක‍්‍රාවාටය’ නම් වැඩසටහන පිළිබඳවය. වැඩසටහනට ගෙන්වා තිබුණේ ජ්‍යෝතිෂවේදීන් යැයි කියාගත් කේ.ඒ.යූ. සරචත්චන්ද්‍ර, ඉන්දික තොටවත්ත, එස්.ජේ. සමරකෝන් යන පුද්ගලයන්ය. වැඩසටහන ආරම්භ කරද්දී වැඩසටහන් ඉදිරිපත් කරන්නා මෙසේ කීය.

‘‘ ඕනෑම සමාජයක පැවැත්ම සඳහා මිනිස්සු විහින් සම්මත කරගත්ත නීති, රීති, ඇදහීම්, විශ්වාස භාවිත කරනවා. එක එක සමාජයෙන් සමාජයට එය වෙනස් වෙන්න පුළුවන්. ආගම දහමේ සිටම අපි අනුගමනය කරන ඇදහීම් විශ්වාස පිළිගන්නවා වෙන්නත් පුළුවන්. ප‍්‍රතික්ෂේප කරනවා වෙන්නත් පුළුවන්.’’ එම අදහස් පළකිරීම අනුව මෙම වැඩසටහන සමාජයේ ඇති විවිධ විශ්වාසයන් පිළිබඳවය. වැඩසටහන ඉදිරිපත් කරන ජාතික රූපවාහිනිය එම අදහස් පිළිගැනීමක් හෝ ප‍්‍රතික්ෂේප කිරීමක් කරන්නේ නැත.

එහෙත් වැඩසටහනට කැඳවා තිබුණේ එම අදහස් නියෝජනය කරන පුද්ගලයන් පමණි. ජාතික රූපවාහිනිය මධ්‍යස්ථ කණ්ණාඩිය දමාගෙන උත්සාහ කරන්නේ නැවතත් ජ්‍යෝතිෂය ප‍්‍රවර්ධනය කිරීමට බව එයින්ම පැහැදිලි වෙයි. එසේ සිදුකිරීමට හේතු රැසකි.

සෝමරත්න දිසානායක මහතා ජාතික රූපවාහිනියේ සභාපතිධුරය දැරූ සමයේදී ජ්‍යෝතිෂය ප‍්‍රවර්ධනය කරන වැඩසටහන් නැවැත්වූවා පමණක් නොව, ඉන්පසු සභාපති පදවියට පත් රවි ජයවර්ධන මහතා ජ්‍යෝතිෂය වැනි විශ්වාසයන් පිළිබඳ ඇත්ත නැත්ත සෙවීම සඳහා ‘යථාරූප’ නම් වැඩසටහනක්ද ආරම්භ කර තිබුණි. එම වැඩසටහන සම්බන්ධයෙන් ජ්‍යෝතිෂවේදින් දැඩි විරෝධය දක්වා තිබුණු අතර අවස්ථා කිහිපයකදී ජනාධිපති මෛත‍්‍රීපාල සිරිසේන මහතා ඇතුළු දේශපාලනඥයන්ද ජාතික රූපවාහිනි නාලිකාවේ එම ප‍්‍රතිපත්තිය විවේචනය කර තිබුණි.

යථාරූප
යථාරූප වැඩසටහන ජ්‍යෝතිෂය පිළිගන්නා පුද්ගලයන්ට සහ එය ප‍්‍රතික්ෂේප කරන පුද්ගලයන්ට විවෘත වේදිකාවක් විය. එම වැඩසටහනේදී ප‍්‍රසිද්ධියේ ජ්‍යෝතිෂයට අභියෝග එල්ල විය. ඒ නිසාම කල්ගත වෙද්දී ජ්‍යෝතිෂය විශ්වාස කළ එය එම වැඩසටහනට සහභාගී නොවී මඟහරින්නට වූහ. ඔවුන් විවිධාකාරයෙන් මෙම වැඩසටහන නැවැත්වීමට උත්සාහයන් ගෙන තිබුණි. එහෙත් 2018 මුල් කාලයේදී එම වැඩසටහන නැවැත්වීමට වැඩසටහනේ නිෂ්පාදකවරයා වූ දුමින්ද තිලකසේන මහතාම තීරණය කර තිබුණි. ඒ ජ්‍යෝතිෂවේදීන් වැඩසටහන මඟහැරීම නිසා යථාරූප ආරම්භ කිරීමට පදනම් වූ සැබෑ අරමුණ ඉටු නොවූ නිසාය.

කෙසේ වෙතත් අපට වාර්තාවන ආකාරය නැවත ජ්‍යෝතිෂය ප‍්‍රවර්ධනය කරන චක‍්‍රාවාටය නම් වැඩසටහන ආරම්භ වී තිබුණේ දේශපාලන බලපෑම් සහ ජාතික රූපවාහිනියේ වත්මන් සභාපතිනි ඉනෝකා සත්‍යාංගනී මහත්මියගේ වුවමනාව නිසාය. ඇය පැහැදිළිවම ජ්‍යෝතිෂය ප‍්‍රවර්ධනය නොකර සිටීමේ වසර තුනක ජාතික රූපවාහිනී ප‍්‍රතිපත්තිය කඩ කරන්නට තීරණය කර තිබුණි.
ඉනෝකා සත්‍යාංගනී මහත්මිය ජාතික රූපවාහිනියේ සභාපතිනිය ලෙස වැඩකටයුතු භාරගැනීමද සිදුකර තිබුණේ සුබ නැකතටය. ඇය පෞද්ගලිකවම ජ්‍යෝතිෂය පිළිගන්නා බව පැහැදිලි කාරණයකි. ඉනෝකා සත්‍යාංගනී මහත්මිය තමන් ගත් තීරණය ගැන මෙසේ අදහස් දැක්වීය.

මම කාන්තාවක් නිසා
‘‘මම ජාතික රූපවාහිනියේ සභාපතිනිය ලෙස පත්වෙන්න මාස කිහිපයකට කලින් තමයි යථාරූප වැඩසටහන නවත්වලා තියෙන්නේ. මීට කලින් මේ ආයතනයට විවිධ සභාපතිවරුන් පත්වෙලා තියෙනවා. ඒ කිසිම සභාපතිවරයෙකුටවත් කිසිම පුද්ගලයෙක් කිසිම චෝදනාවක් නගලා නැහැ. නමුත් කාන්තාවක් මුල් පුටුවට ආවාම ඒක ඉවසගන්න බැරි අය තමයි මාව ඉලක්ක කරලා මේ විධියට මට චෝදනා කරන්නේ. වැඩසටහන නවත්වන්න තීරණය කරලා තිබුණේ එම වැඩසටහන නිෂ්පාදනය කරපු දුමින්ද තිලකසේන මහතා. ඔහු එය නවත්වලා තිබුණේ පසුව ඊට වඩා හොඳ වැඩසටහනක් කිරිමේ අරමුණෙන්. පසුව ඒ කාලසීමාවේ සෙයිලම කියලා වැඩසටහනක් කළා. ඒ වැඩසටහන නතර කළාම චක‍්‍රාවාටය කියලා වැඩසටහනක් ආරම්භ කළා. ඒ වැඩසටහන පටන්ගත්තේ අරමුණක් ඇතිව. සමාජයේ වැරදි මතයක් පළවෙලා තියෙනවා. අපි චක‍්‍රාවාට වැඩසටහන මගින් මිථ්‍යාව වපුරනවා කියලා. මේ වැඩසටහන මිථ්‍යාව වපුරන වැඩසටහනක් නෙවෙයි.

සමාජයේ ජ්‍යෝතිෂයට පක්ෂ පිරිසක් සහ විපක්ෂ පිරිසක් ඉන්නවා. විපක්ෂ මිනිස්සු මේ වැඩසටහනට විරුද්ධව කථාකරනවා. පක්ෂ අය මේ වැඩසටහන හොඳයි කියනවා. චක‍්‍රාවාටය කියන්නේ සමාජයේ තියෙන විවිධ ආන්දෝලනාත්මක කරුණු සාකච්ඡුාවට ගන්න වැඩසටහනක්. ඒ පිළිබඳව විමසීමක් කරන එක. මේ බ‍්‍රහස්පතින්දා ඔය චෝදනා කරන අයට බලන්න පුළුවන් චක‍්‍රාවාටය කියන්නේ මොනවාද කියලා.
මිථ්‍යාවට පක්ෂ අය වෙනුවෙන් අපි පෙනීසිටින්නේත් නැහැ. විපක්ෂ අය වෙනුවෙන් පෙනීසිටින්නේත් නැහැ. අපිට අරමුණක් තියෙනවා. අපි ඒ අරමුණට වැඩසටහන කරගෙන යන්නේ. වෙනත් රූපවාහිනි නාළිකාවල ජ්‍යෝතිෂවේදීන් ගෙනල්ලා හඳහන් බලනවා. වැඩසටහන් කරනවා. කවුරුවත් ඒ වැඩසටහන්වලට විරුද්ධ වෙන්නේ නැහැ. ඇයි මේකට විරුද්ධ වෙන්නේ.’’

චක‍්‍රාවාටය වැඩසටහනේදී පැහැදිලිවම කෙරුණේ ජ්‍යෝතිෂවේදීන් පමණක් ගෙන්වා එය මහා විද්‍යාවක් ලෙස සලකමින් ඒ පිළිබඳව ප‍්‍රශ්න කිරීමය. ඒ නිසා ඇය යළි යළිත් මතු කරන්නට උත්සාහ කරන මධ්‍යස්ථ බව චක‍්‍රාවාට ය වැඩසටහනෙහි නැත.

ජනපතිගේ විශ්වාසය
පසුගිය සතියේ මාධ්‍ය ආයතන ප‍්‍රධානීන් හමුවූ අවස්ථාවේදී ජනාධිපති මෛත‍්‍රීපාල සිරිසේන උපදෙස් තිබුණේ ජාතික රූපවාහිනියෙහි ජ්‍යෝතිෂ වැඩසටහන් විකාශනය නොවන බවත්, ජ්‍යෝතිෂයෙහි බලයක් ඇති බව තමා අත්දැකීමෙන් දන්නා නිසා එවැනි වැඩසටහන් විකාශය කරන ලෙසත්ය. කෙසේ වෙතත් ඒ උපදෙස් දෙන මොහොත වෙද්දීත් ජාතික රූපවාහිනිය චක‍්‍රාවාට වැඩසටහනට ජ්‍යෝතිෂවේදීන් ගෙන්වීමට සැලසුම් සකස් කර තිබී ඇත. කෙසේ වෙතත් චක‍්‍රාවාට වැඩසටහනෙන් ආරම්භ කෙරුණු ජ්‍යෝතිෂයට ඉඩ විවෘත කිරීමේ ප‍්‍රතිපත්තිය ඉදිරියටත් ක‍්‍රියාත්මක වනු ඇත. ජනාධිපතිවරයාගේද උපදෙස් අනුව ඉදිරියේදී කේන්දර කියවන වැඩසටහන් පවා ජාතික රූපවාහිනියේ ආරම්භ කිරීමට ඉඩහසර විවෘත වී ඇත.

එහෙත් ජ්‍යෝතිෂවේදීන්යැයි කියාගන්නා පුද්ගලයන් විද්වතුන් ලෙස සලකා ඔවුන්ට සාමාන්‍ය ජනතාවගේ ජීවිත පාලනය කරන්නට ඉඩදෙන අන්දමේ වැඩසටහන් විකාශය කරවීම ජාතික රූපවාහිනිය ඉහළට ගෙනඒමක් නොව පහළට ඇද දැමීමකි. ඉනෝකා සත්‍යාංගනී මහත්මිය කියන ආකාරයට වෙනත් රූපවාහිනී නාලිකා එවැනි වැඩසටහන් විකාශය කිරීම ගැන කතා නොකර සිටීමේ ප‍්‍රතිපත්තියක් අප වැනි මාධ්‍ය ආයතනවලට හෝ මිථ්‍යාව ප‍්‍රවර්ධනය කිරීමට එරෙහිවන සමාජ කොටස්වලට නැත. එහෙත් එවැනි පෞද්ගලික ආයතනවලටත් එහා ගොස් රාජ්‍ය මාධ්‍ය ආයතනයකින් මෙසේ කිරීම බරපතළ ගැටලූ‍වකි.

ජාතික රූපවාහිනියේ සභාපතිවරයා හැටියට පත්වුණු වහාම එහි ජ්‍යෝතිෂ්‍ය වැඩසටහන් නවතා දැමීමේ තීරණය ගත්තේ ආචාර්ය සෝමරත්න දිසානායක මහතාය. ඔහු මෙසේ අදහස් දැක්වීය.

මිථ්‍යාව ප‍්‍රවර්ධනය ගැන කනගාටුයි
‘‘යථාරූප කියන්නෙ නැවැත්විය යුතු වැඩසටහනක් නෙවෙයි. තව වර්ධනය කරලා මහජනතාව දැනුවත් කරන්න තිබුණු වැඩසටහනක්. එහෙම ඒවා නවත්වලා ඊට ප‍්‍රතිවිරුද්ධ මතයක් ගෙනඒම සමාජය ආපස්සට ඇදගෙන යෑමක් විදියට මම සලකන්නේ. එහෙම නෙවෙයි. අපි සමාජ ප‍්‍රගමනයට දායක වෙන වැඩසටහන් ජාතික නාළිකාවෙන් විකාශය කළ යුතුයි. අපි නැවත ගල් යුගයට යා යුතු නැහැ. රූපවාහිනියේ මෙවැනි අවගමනයක් මම බලාපොරොත්තු වුණේ නැහැ. එය කාගේ යෝජනාවක්දැයි මම දන්නේ නැහැ. යථාරූප වැඩසටහන නැවත පටන්ගන්න කියලාත් ඉල්ලා සිටියා. මම කියන්නේ නෑ ඒ වැඩසටහනෙන් එක මතයක් විකාශය කරන්න කියලා. විවිධ මතධාරීන් ගෙන්වන්න. එතකොට බලාගෙන ඉන්න ජනතාව තීරණය කරයි සත්‍යය සහ අසත්‍යය මොකක්ද කියලා. යථාරූප වැඩසටහන ඕනෑම කෙනෙකුට අභියෝග කරන්න අවස්ථාව ලබාදීලායි පවත්වාගෙන ගියේ. යථාරූප ආරම්භ කරන්න මගේ කාලයේදි තමයි පදනම දැම්මෙ. හැබැයි මම ඉවත් වුණාමයි ඒක විකාශය වුණේ. මිථ්‍යාව ප‍්‍රවර්ධනය කරන වැඩසටහනක් ආරම්භ කිරීම ගැන මම කනගාටු වෙනවා. ආත්ම විශ්වාසයක් නැති, ගස් ගල් කෙරෙහි, යක්ෂයෝ කෙරෙහි විශ්වාසයක් තියාගෙන ඉන්න සමාජයක් හදන්නද මේ උත්සාහය කියන ප‍්‍රශ්නය මට එනවා. සමාජයට වගකිව යුතු වැඩිහිටියන් හැටියට දරුවන්ට කියලා දෙන්න ඕනෑ මිථ්‍යාවද විද්‍යාවද කියන ප‍්‍රශ්නය තමයි මට තියෙන්නේ.

මිථ්‍යාව අදහන කෙනෙකුට පෙනෙනවා යථාරූප වැඩසටහන මිථ්‍යාවට එරෙහිව යන එකක් කියලා. එහෙත් මේ වැඩසටහන සැලසුම් කරද්දී මගේ අරමුණ වුණෙත් මෙම වැඩසටහනේදී සියලූ‍දෙනාටම අවස්ථාව දෙන්න. ඒත් ඒ වැඩසටහන විවිධ මිථ්‍යා මතධාරීන් මඟහැරියා. ඔවුන් තේරුම්ගත්තා විද්‍යාවේ ශක්තිය සමඟ තරග කරන්න බැහැ කියලා. ඒ නිසායි ඔවුන් කිව්වෙ මේ වැඩසටහන ඒකපාක්ෂික එකක් කියලා. ඒත් අපි කළේ පේ‍්‍රක්ෂකයා ඉදිරියේ විවෘතව මත ගැටීම්වලට ඉඩ සැලසීමයි.

රූපවාහිනිය වගේ ජාතික මාධ්‍ය ආයතනයකින් අපි බලාපොරොත්තු වෙන්නෙ ජනප‍්‍රිය වැඩසටහනක් නෙවෙයි. රටේ වැඩි පිරිසක් කැමති විදියේ වැඩසටහන් කරන්න ඕනැ කියලා කෙනෙක් තර්ක කරනවා නම් ඒක වැරදියි. මේ වගේ ආයතනයකින් කළ යුත්තේ ජනතාවගේ බුද්ධිය වර්ධනය කරන වැඩසටහනක්. සත්‍යාවබෝධය දක්වා යා යුතු වැඩසටහනක්.’’

ජ්‍යෝතිෂය විශ්වාස කරන ජනාධිපති මෛත‍්‍රීපාල සිරිසේන හෝ සුබ නැකැත් බලන ඉනෝකා සත්‍යාංගනී මහත්මිය හෝ සියලූ‍දෙනාට අවස්ථාව ලැබෙන වැඩසටහනක් කරනවා නම් කළ යුත්තේ ජ්‍යෝතිෂය ප‍්‍රශ්න කරන පුද්ගලයන්ට සහ පිළිගන්නා පුද්ගලයන්ට විවෘතව ගැටෙන්නට ඉඩ සැලසෙන අන්දමේ වැඩසටහනක් සංවිධානය කිරීමය. ජ්‍යෝතිෂය පිළිගන්නා අය පවා එය සත්‍යයැයි විශ්වාස කරනවා නම් එහි සත්‍ය බව ඔප්පු කරන්නට ඇති හොඳම අවස්ථාව එවැනි වැඩසටහනකි. එය කරන්නට ශක්තිය තිබුණේ සෝමරත්න දිසානායක මහතාටය.

රංගන ශිල්පී ඩබ්ලිව් ජයසිරි මේ ගැන මෙසේ අදහසක් දැක්වීය.

ඇමතිලාටත් දැක්මක් නැහැ
‘‘යථාරූප වැඩසටහන නිෂ්පාදනය කළේ අජිත් තිලකසේනගේ පුතා දුමින්ද තිලකසේන. ඒ වැඩසටහනට ආවා හොඳ වෛද්‍යවරයෙක්. එම වෛද්‍යවරයා මාතලේ සිට බස්රියෙන් ඒ වැඩසටහනට ආවා. ඔවුන් මේ වැඩසටහන වෙනුවෙන් ඉතාම කැපවුණා. මමත් සහභාගි වුණා. යථාරූප වැඩසටහන නැවැත්වීම ඉතාම අමනෝඥ මෝඩ වැඩක්. ඔය තැන්වලට කවුරු පත්කළත් රජය කියන හැටියට තමයි වැඩ කරන්න වෙන්නේ. මංගල සමරවීර ඇමතිවරයානේ රූපවාහිනිය බාරව ඉන්නේ. ඔහු ලෝකය ගැන පුළුල් දැක්මක් තියෙන මනුස්සයෙක් කියලා අපි හිතනවා. මේ වගේ වැඩවලින් පෙනෙනවා ඔවුන්ට එහෙම අවශ්‍යතාවක් නැහැ කියලා. මිනිසුන්ගේ චින්තනය පුළුල් කරන්නයි රාජ්‍ය මාධ්‍ය ආයතන වැඩකරන්න ඕනෑ. ඒත් ඔය ආයතනවල මුල් පුටුවලට පත්වෙන අයත්, ඒ ඇමති ධුර දරන අයත් ඒ ගැන අවංක වුවමනාවක් තිබෙන අය නෙවෙයි. ඒ බව මෙයින් පැහැදිලි වෙනවා.’’

යථාරූප වැඩසටහන ඍජුවම ඉලක්ක කරමින් එයට විවේචන එල්ල කිරිමට චක‍්‍රාවාට වැඩසටහනේ පාළුගෙයි වළං බිඳීමට පැමිණි ජ්‍යෝතිෂවේදීන්යැයි කියාගන්නා පුද්ගලයන් කටයුතු කර තිබුණි.

මේ තිදෙනාම මීට පෙර ජාතික රූපවාහිනියේදීම යථාරූප වැඩසටහනේදි පිළිතුරු නැතිව අසරණ වූ පුද්ගලයන්ය. හත්පොළේ ගාගත් පුද්ගලයන්ය. ඔවුන් වීරයන් බවට පත්කරන්නට ජාතික රූපවාහිනිය, එම ගුවන් කාලයේදීම කටයුතු කිරීම රටෙහි ගමන්මඟ සංකේතවත් කරන ඛේදවාචකයකි.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි