No menu items!
26.1 C
Sri Lanka
28 March,2024

එමිල් රංජන්ගෙන් කොණ්ඩ අමිලට මරණ තර්ජන

Must read

 

අරුණ ජයවර්ධන
පසුගිය සතියෙන්

වැලිකඩ බන්ධනාගාරය තුළදී 2012 නොවැම්බර් 9 වැනිදා රාත‍්‍රියේ, එහි රඳවුවන් 27 දෙනකු ඝාතනය කිරීමේ චෝදනාව යටතේ පොලිස් මත්ද්‍රව්‍ය නාශක කාර්යාංශයේ පොලිස් පරීක්‍ෂක නියොමාල් රංගජීව හා එවකට මැගසින් බන්ධනාගාරයේ අධිකාරි එමිල් රංජන් ළමාහේවා මේ වන විට පසුවන්නේ රක්‍ෂිත බන්ධනාගාරයේය.
බන්ධනාගාර නීතිරීතිවලට සපුරාම පටහැණිව, එස්ටීඑෆ් හා යුද හමුදාව ආයුධ සන්නද්ධව වැලිකඩ බන්ධනාගාරයට කඩා වැදී ඇති කළ අවුල අවසන් වුණේ බන්ධනාගාර රඳවුවන් 27 දෙනකු ඝාතනය කරමිනි. ඒ 27 දෙනාගෙන් සමහරුන් යුද හමුදාව සමග ඇතිවුණු ගැටුමේදී මියගියත්, 11 දෙනකු ඝාතනය කර ඇත්තේ. ඔවුන් නිරායුදව සිටියදී, අත් පිටුපසට තබා බැඳ, බිත්තියකට හේත්තු කොට, දණගස්වා ඉතා සමීපයේ සිට ඔවුන්ට වෙඩි තැබීමෙන් බව ඒ ඝාතන සම්බන්ධයෙන් පවත්වන ලද පශ්චාත් මරණ පරීක්‍ෂණවලදී පැහැදිලිවම හෙළිදරව් වී තිබේ. එම පුද්ගලයන් අතරින් 5 දෙනකුම නියොමාල් රංගජීව මහතාගේ මත්ද්‍රව්‍ය නඩුවල විත්තිකරුවන් බවද වැඩිදුරටත් හෙළිදරව් වී තිබේ.
හමුදාව බන්ධනාගාරයට ඇතුළුවී ගැටුම්කාරී තත්ත්වය යම් ආකාරයකට සන්සුන් කිරීමෙන් පසුව, බන්ධනාගාරයට පිවිසි පොලිස් පරීක්‍ෂක නියොමාල් රංගජීව ඇතුළු පිරිසක් මුල්වී මෙසේ රඳවුවන් ඝාතනය කර ඇති බවට, බන්ධනාගාර නිලධාරීන්ගේ මෙන්ම රඳවුවන්ගේද ප‍්‍රකාශවලින් එළිදරව් වී තිබේ.
මහින්ද රාජපක්‍ෂ ආණ්ඩුව පැවති කාලය තුළදී මේ සමූහ ඝාතනය සම්බන්ධයෙන් කිසිම පිළිගත හැකි පරීක්‍ෂණයක් සිදු නොකළ අතර, ඒ ආණ්ඩුව විසින් වරින් වර පත්කරන ලද කොමිටි විසින් කරන ලද විමර්ශනද පක්‍ෂග‍්‍රාහී හෝ අඩාළව අවසන්වුණු ඒවා විය. අපරාධ පරීක්‍ෂණ දෙපාර්තමේන්තුව ආරම්භ කළ විමර්ශනයද පක්‍ෂග‍්‍රාහී බවට චෝදනා එල්ලවිය.
වර්තමාන ආණ්ඩුව බලයට පත්වුණු පසුව 2015දී ඒ සම්බන්ධයෙන් සෙවීම සඳහා හිටපු මහාධිකරණ විනිසුරු නිමල් නම්බුවසම් මහතාගේ ප‍්‍රධානත්වයෙන් ත‍්‍රිපුද්ගල කමිටුවක් පත්කරන ලද අතර, එහි වාර්තාව දැන් නිකුත්වී තිබේ. එම වාර්තාව අනුව යමින්, නැවතත් සිය විමර්ශන කටයුතු ආරම්භ කළ අපරාධ පරීක්‍ෂණ දෙපාර්තමේන්තුව, මේ වන විට පොලිස් පරීක්‍ෂක නියොමාල් රංගජීව හා මැගසින් බන්ධනාගාර හිටපු අධිකාරි එමිල් රංජන් ළමාහේවා අත්අඩංගුවට ගෙන රක්‍ෂිත බන්ධනාග ාරගත කොට තිබේ. විමර්ශනය අවසන් කොට වාර්තාව නීතිපති දෙපාර්තමේන්තුවටද යවා තිබේ.
පසුගිය සති තුන තුළ නියොමාල් රංගජීව ඇතුළු පිරිස බන්ධනාගාරයට ඇතුළු වූ අන්දමත්, නිරායුද රඳවුවන්ගේ නම් ලැයිස්තුවක් බලා කතාකරමින් පසෙකට කැඳවාගෙන ගොස් ඔවුන් ඝාතනය කළ අන්දමත් ගැන තොරතුරු අපි ලීවෙමු. ඒ තොරතුරු සියල්ලම පාහේ විමල් නම්බුවසම් කමිටුව ඉදිරියේ එවකට බන්ධනාගාර නිලධාරීන් හා රඳවුවන් දිවුරුම් පිට දෙන ලද සාක්‍ෂිවලින් එළිදරව් වුණු ඒවාය.
නියොමාල් රංගජීව අත්අඩංගුවට පත්වුණු වෙලාවේ, ‘දිවයින’ පුවත්පත ඔහුගේ නිර්දෝෂිභාවය හා වීරත්වය වෙනුවෙන් කතුවැකියක් පළකළ අතර, ඔහු ජාතික වීරයකු බවට පත්කරමින් ලිපියක්ද ලියා තිබුණි. එහෙත්, නියොමාල් රංගජීව යනු මත්ද්‍රව්‍ය නාශක කාර්යාංශයේ සිය අවුරුදු 18ක අඛණ්ඩ සේවා කාලය තුළ විවිධාකාර චෝදනාවන්ට ලක්වූවෙකි. එකම පොලිස් කාර්යාංශයක අවුරුදු 18ක් එක දිගට සේවයේ යෙදීමද සාමාන්‍යයෙන් පොලිස් සේවය තුළ සිදු නොවන්නකි. එසේම, ඔහුගේ වත්කම්ද සැකකටයුතු බවට තොරතුරු තිබේ. කඩුවෙල ප‍්‍රදේශය ආශ‍්‍රිතව ඔහුට අයත් නිවාස ප‍්‍රමාණය පමණක් පහකි. ටිපර් රථ හා බස්රථද ඔහුට අයත් බවට තොරතුරු තිබේ. මත්ද්‍රව්‍ය නාශක කාර්යාංශයේ සාමාන්‍ය පොලිස් නිලධාරියකු සතුව මේ තරම් වත්කමක් තිබීම සැකයට තුඩුදෙන්නක් බව අලූතෙන් කිවයුතු නොවේ. මේ තත්ත්වයන් මත කාලයකට පෙර, ඔහුට විරුද්ධව පොලිසිය තුළින් ම චෝදනා පත‍්‍රයක් ඉදිරිපත්ව ඇති නමුත් කුමන හේතුවක් නිසා හෝ එම පරීක්‍ෂණ කටයුතු ඉදිරියට ගියේ නැත.
නියොමාල් රංගජීව බරපතළ ලෙස තුවාල ලැබූ පිළියන්දල වෙඩිතැබීම ගැනද තිබෙන තොරතුරු රංගජීවගේ ගෞරවයට හේතුවන ඒවා නොවේ. එම සිදුවීමේදී, මත්ද්‍රව්‍ය රැුගෙන එන බව පවසා රංගජීව එතැනට ගෙනගිය ඔත්තුකරු සමග ඔහු පැවැත්වූ සම්බන්ධතාව පොලිස් මත්ද්‍රව්‍ය නාශක කාර්යාංශයේ ඇතුළු අනෙකුත් ජ්‍යෙෂ්ඨ පොලිස් නිලධාරීන්ගේ සැකයට භාජනය වී තිබේ. වැදගත්ම කාරණය, රංගජීවට වෙඩි තැබිමෙන් පසු මේ ඔත්තුකරු ඉන්දියාවට පලායෑමයි. බෝට්ටුවෙන් ඔහුට එසේ පලායෑම සඳහා පොලිස් මත්ද්‍රව්‍ය නාශක කාර්යාංශයේම සමහර නිලධාරීන්ගෙන් ආධාර හා අනුබලය ලැබුණු බවට තොරතුරු තිබේ.
කොහොම වුණත් රංගජීව අත්අඩංගුවට ගැනීම ගැන පොලිස්පතිවරයාත්, ජනාධිපතිවරයාත් ඉන්නේ නොසතුටෙන් බව නම් සටහන් කළ යුතු තවත් වැදගත් කාරණයකි. ඒ ඔවුන්ද රංගජීව ජාතික වීරයකු හැටියට සලකන නිසා විය යුතුය.
පසුගිය සති තුනේදී රංගජීව ගැන තොරතුරු කියු අපි අද, මැගසින් බන්ධනාගාර හිටපු අධිකාරි එමිල් රංජන් ගැන වාර්තාවී ඇති තොරතුරු එළිදක්වන්නට බලාපොරොත්තු වෙමු.
බන්ධනාගාර ඝාතන සිදුවීමේදී සමහර රඳවුවන් එමිල් රංජන් විසින් තෝරාගෙන ඝාතනයට ඉඩ සැලසීයැයිද, ඝාතනය වුණු නිරායුද රඳවුවන්ගේ මළසිරුරු අසල ටී56 තුවක්කු දමා, ඔවුන් අවි ගැටුමක් අතරතුර ඝාතනය වුණු බවට වැරදි චිත‍්‍රයක් හදන්නට එමිල් රංජන් කටයුතු කළේයැයිද චෝදනා තිබේ.
මේ ඊට අදාළ එක් කතාවකි.

කොණ්ඩ අමිලගේ කතාව
මැගසින් බන්ධනාගාරයේ සැකකරුවකු හැටියට නේවාසිකව සිටි එම් මලික් සමීර පෙරේරා හෙවත් කොණ්ඩ අමිලට මැගසින් බන්ධනාගාර අධිකාරි එමිල් රංජන් ළමාහේවාගෙන් සිදුවන මරණ තර්ජන සම්බන්ධයෙන් ඔහුගේ බිරිඳයැයි කියන බී ටානියා දුලාරි ජයවීර 2012.05.16 දින සවස 4.50ට පමණ බොරැුල්ල පොලිසියට පැමිණිලි කර ඇත. (තොරතුරු සටහන් පොත ෂෂෂ, පිටුව 354, ඡෙදය 214*
ඒ සම්බන්ධයෙන්, එනම් මැගසින් බන්ධනාගාරයේ රඳවා සිටින සැකකරුවකුට එහි බන්ධනාගාර අධිකාරිවරයා මරණ තර්ජන කිරීම පිළිබඳව, එවකට බොරැුල්ල පොලිසියේ සුළු පැමිණිලි අංශයේ ස්ථානාධිපති උපපොලිස් පරීක්‍ෂක ප‍්‍රියදර්ශන කොළඹ අංක 2 මහේස්ත‍්‍රාත් අධිකරණයට කරුණු වාර්තා කර ඇත. ඒ බී988/2/2012 යටතේය. එහිදී කර ඇති ඉල්ලීම අනුව, බන්ධනාගාරය තුළට ගොස් බන්ධනාගාර අධිකාරි එමිල් රංජන්ගෙන් හා සැකකරු අංක 3419 මලික් සමීර පෙරේරා හෙවත් කොණ්ඩ අමිලගෙන් ප‍්‍රකාශ සටහන් කරගැනීමට අධිකරණය නියම කර ඇත. එම නියෝගය පරිදි, පොලිස් කොස්තාපල් 81532 බණ්ඩාර 2012 මැයි 21 ඉහත කී දෙදෙනාගේ ප‍්‍රකාශ සටහන් කරගෙන තිබේ. මුල් බී වාර්තාව ඉදිරිපත් කිරීමෙන් පසු දින 14න් 14ට අධිකරණයට වැඩිදුර කරුණු වාර්තා කර ඇති නමුත්, කිසිම විශේෂ පියවරක් ගැනුණේ නැත.
2012 ඔක්තෝබර් මාසයේදී උපපොලිස් පරීක්‍ෂක ප‍්‍රියදර්ශන අම්පාරට ස්ථාන මාරුවක් ලබාගැනීම නිසා ඇතිවුණු පුරප්පාඩුවට අනුයුක්ත කරන ලද්දේ පොලිස් පරීක්‍ෂක යසේන්ද්‍ර නාලකය. ඔහු එහි පැමිණියේ වීරඟුල පොලිසියේ සිටය.

අධිකරණයෙන් නොතීසි
2012 නොවැම්බර් 9 වැනිදා, වැලිකඩ බන්ධනාගාරය තුළ සමූහ ඝාතනයේදී ඉහත කියූ, කොණ්ඩ අමිල හෙවත් මලික් සමීර පෙරේරාද ඝාතනය විය. ඒ කතාව ඉදිරියේදී කියමු.
එම ඝාතන සිදුවීමෙන් පසු, 2012 දෙසැම්බර් 18 දින මේ නඩුව, එනම් ළමාහේවා විසින් කොණ්ඩ අමිලට මරණ තර්ජන කිරීම පිළිබඳ නඩුව, නැවතත් අධිකරණයේදී කැඳවිණි. කොණ්ඩ අමිල බන්ධනාගාරය තුළ ඝාතනය වීම නිසා, ඒ සම්බන්ධයෙන් ගතයුතු පියවර ගැන පොලිසිය එදින අධිකරණයෙන් උපදෙස් පැතීය. ඒ සම්බන්ධයෙන් කරුණු විමසීම සඳහා බන්ධනාගාර අධිකාරි එමිල් රංජන් අධිකරණයට කැඳවීමට මහේස්ත‍්‍රාත්වරිය නියෝග කළ අතර, ඒ සඳහා නොතීසියක් එමිල් රංජන් වෙත නිකුත් කිරීමටද එදින අධිකරණය උපදෙස් දෙන ලදි.
2012 දෙසැම්බර් 18 දින එම නොතීසිය ඔහුට නිකුත් කරන ලද්දේ, 2013 ජනවාරි 15 වැනි දින අධිකරණයේ පෙනීසිටින ලෙසය. එමිල් රංජන්ට නිකුත් කළ නොතීසිය ඉල්ලා ගොනුකළ, 2012 දෙසැම්බර් 18 දින දරන බී වාර්තාව අත්සන් කළේ යසේන්ද්‍ර නාලක නම් ඉහත කී පොලිස් පරීක්‍ෂකවරයාය. ඔහුට එසේ අත්සන් කරන්නට සිදුවුණේ, ඒ අවස්ථාවේ බොරැුල්ල පොලිස් ස්ථානාධිපතිවරයා රාජකාරියේ නොසිටි නිසාය. එමෙන්ම ඒ සඳහා අධිකරණ නියෝගයක් තිබුණු නිසාය.
කොහොම නමුත්, 2013 ජනවාරි 15 වැනි දින එමිල් රංජන් මහතා අධිකරණය ඉදිරියේ පෙනීසිටියේ නැත.
අනුර සේනානායකගෙන් දොස්
එහෙත්, 2013 පෙබරවාරි 15 වැනි දින පොලිස් පරීක්‍ෂක යසේන්ද්‍ර, එවකට බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති අනුර සේනානායකගේ කාර්යාලය වෙත කැඳවා තිබුණි. (අනුර සේනානායක, තාජුදීන් ‘ඝාතනය’ විනාඩි ගණනක් තුළ ‘හදිසි අනතුරක්’ බවට පත්කළ පොලිස් නිලධාරියාය. ගෝඨාභය රාජපක්‍ෂගේ සමීප හිතවතෙකි.* යසේන්ද්‍රට අමතරව, තවත් පොලිස් කොස්තාපල්වරුන් කිහිප දෙනකුද, කොළඹ අපරාධ කොට්ඨාසයේ අධ්‍යක්‍ෂ ජ්‍යෙෂ්ඨ පොලිස් අධිකාරි රණවීර, ජ්‍යෙෂ්ඨ පොලිස් අධිකාරි පේ‍්‍රමලාල් රණගල, සහකාර පොලිස් අධිකාරි රොෂාන් ඩයස්ද මෙලෙස කාර්යාලයට කැඳවා තිබුණි.
පොලිස් පරීක්‍ෂක යසේන්ද්‍ර එදින උදේ 9.30ට අනුර සේනානායකගේ කාර්යාලයට යන විට කාර්යාලය තුළ මැගසින් බන්ධනාගාර අධිකාරි එමිල් රංජන් ළමාහේවාද වාඩිවී සිටියේය.
එහිදී, එමිල් රංජන්ට අධිකරණයේ පෙනීසිටින ලෙස නියෝග කරන ලද 2012 දෙසැම්බර් 18 දින දරන බී වාර්තාව, 2013 ජනවාරි 15 වැනි දින තමා අත්සන් කළේ ඇයිදැයි අනුර සේනානායක යසේන්ද්‍ර නාලකගෙන් විමසීය. කොණ්ඩ අමිල බන්ධනාග ාරය තුළ ඝාතනයට ලක්වූ පසුව මෙම බී988 දරන නඩුව ඉල්ලා අස්කරගෙන සී4 අක්‍ෂරගත කළ හැකිව තිබියදී (සී4 අක්‍ෂරගත කිරීම යනු, යම් හේතුවක් නිසා නඩුවක් ඉදිරියට ගෙන නොයන බැවින් එහි ගොනුව පසෙක බහා තැබීමයි.* එය නොකර එමිල් රංජන්ට නොතීසි ලබාගැනීමට ක‍්‍රියාකිරීමෙන්, ඔහු අපහසුතාවට පත්කරන්නට වුවමනාවෙන්ම බොරැුල්ල පොලිස් ස්ථානාධිපතිවරයාගේත් අනුදැනුමත් ඇතිව, යසේන්ද්‍ර නාලක ක‍්‍රියාකර ඇති බවට අනුර සේනානායක චෝදනා කළේය. සේනානායක එය හැඳින්වූයේ පොලිස් පරීක්‍ෂකවරයා තම සේවය පැහැර හැරීමක් ලෙසය.

ක්‍ෂණිකව වැඩ තහනම් කරයි
සිදුවුණේ කුමක්ද? තමා යසේන්ද්‍ර නාලක පොලිස් පරීක්‍ෂකවරයාගේ වැඩ ඒ මොහොතේම තහනම් කරන බව අනුර සේනානායක පැවසීමයි.
තමා ක‍්‍රියාත්මක කළේ අධිකරණය විසින් දුන් නියෝගය පමණක් බව පොලිස් පරීක්‍ෂකවරයා කෙතෙක් කීවද අනුර සේනානායක තීරණය වෙනස් කළේ නැත. පොලිස් පරීක්‍ෂකවරයාට කිසිම චෝදනා පත‍්‍රයක්වත් ඉදිරිපත් නොකර, නිදහසට කාරණා කියන්නට අවස්ථාවක් නොදී, තමන්ගේ පොලිස් නිලධාරියකුගේ වැඩ තහනම මෙතරම් අත්තනෝමතික ලෙස අනුර සේනානායක කළේ, මැගසින් අධිකාරි එමිල් රංජන්ගේද ඉදිරිපිටය.
එයින් සති තුනකට පසුව 2013 මාර්තු 7 වැනි දින නැවතත් සේවයට වාර්තා කරන ලෙස යසේන්ද්‍ර නාලකට අනුර සේනානායක වෙතින්ම ලිපියක් ලැබුණි. ඒ පොලිස් පරීක්‍ෂකවරයා කළ අභියාචනයක් පදනම් කොටගෙනය. යම් හෙයකින් අදාළ නොතීසියට වෙනත් පොලිස් නිලධාරියකු අත්සන් කර තිබුණා නම්, අනුර සේනානායක අතින් වැඩ තහනමට ලක්වන්නේ ඒ පොලිස් නිලධාරියාය.
එහෙත්, 2014 සැප්තැම්බර් 5 වැනිදා, අනුර සේනානායක නියෝජ්‍ය පොලිස්පතිවරයා යසේන්ද්‍ර නාලකට චෝදනා තුනකින් යුත් චෝදනා පත‍්‍රයක් ඉදිරිපත් කර තිබේ. එහි දැක්වෙන්නේ, අපකීර්තිදායක හැසිරීම, අණට අකිකරු වීම හා රාජකාරි පැහැරහැරීම යන චෝදනාය. තවදුරටත් චෝදනාවල දැක්වෙන්නේ, 2012 මැයි 16 වැනි දින ටානියා දුලාරි ජයවීර කොණ්ඩ අමිලට බැන මරණ තර්ජන කිරීම සම්බන්ධයෙන් කළ පැමිණිල්ලේ කිසිම තැනක මැගසින් අධිකාරි එමිල් රංජන් ගැන නමින් සඳහන් නොවන බවයි. එසේ තිබියදී පොලිස් ස්ථානාධිපතිවරයාගේ අත්සන නොමැතිව බී වාර්තාව අධිකරණයට ඉදිරිපත් කිරීම තවත් චෝදනාවකි. එහෙත්, අනුර සේනානායකගේ ඒ චෝදනා බොරුය.
දුලානි ටානියා කළ පැමිණිල්ලේ, තර්ජනය කරන ලද්දේ මැගසින් බන්ධනාගාර අධිකාරි බව පැහැදිලිවම සඳහන්කොට තිබුණි.
‘මම ඊයේ විසිට් එකට කෑම දෙන්න ගිය වෙලාවේ මගේ මහත්තයා (කොණ්ඩ අමිල* මට කිව්වා, අධිකාරිතුමාගේ කාමරයට කැඳවලා, ඊයේ උදේ එනම්, 2012.05.15 දින කුණුහරුපෙන් බැනලා එළියට යන්න හැදුවා කියලා බිත්තියට තියලා වෙඩි තියනවා. වැඩියෙ දඟලන්න එපා, මම හිතන දේ තමයි මම කරන්නේ. මට එහෙම කරන්න පුළුවන්. එළියට එන්න බැරිවෙන්න තව කාලයකට නඩු දානවා. ඇතුළේ ප‍්‍රශ්න ඇති කරනවා, කුඩු විකුණනවා කියලා නඩු දානවා කියලා තර්ජනය කළා කියලා මගේ මහත්තයා මට කිව්වා. ඒ තර්ජනය කරලා තිබුණේ බන්ධනාගාර අධිකාරියි…’ ඒ දුලානි ටානියා පෙරේරා 2012 මැයි 16 වැනිදා දුන් ප‍්‍රකාශයේ ඒ ගැන සඳහන් වන ආකාරයයි.
එවකට එහි අධිකාරි එමිල් රංජන් ළමාහේවාය. ඊට අමතරව, ඇගේ පැමිණිල්ල ගැන පසුව කොණ්ඩ අමිලගෙන් ප‍්‍රකාශයක් සටහන් කරගනිද්දී, ඔහු පැහැදිලිව කියා ඇත්තේ තර්ජනය කළේ එමිල් රංජන් බවයි. අනෙක් අතට, යසේන්ද්‍ර නාලකට බී වාර්තාව අත්සන් කිරීමට සිදුවුණේ ස්ථානාධිපතිවරයා අදාළ දිනයේ පොලිස් ස්ථානයට නොපැමිණි බැවිනි.
මැගසින් බන්ධනාගාර අධිකාරි එමිල් රංජන්ගේ මරණ තර්ජනයට ලක්වුණු කොණ්ඩ අමිල, 2012 නොවැම්බර් 9 වැනිදා නිරායුදව සිටින විට වැලිකඩ බන්ධනාගාරය තුළදී ඝාතනයට ලක්වන්නේය. ඒ මොහොතේ එමිල් රංජන්ද සිටියේ වැලිකඩ බන්ධනාගාරය තුළය.

ඒ ගැන විස්තර ලබන සතියේ කියවන්න.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි