No menu items!
27.5 C
Sri Lanka
29 March,2024

ගෝඨාභය රාජපක්ෂ දැන සිටි ගන්සයිඞ් සංහාරය

Must read

නාවික හමුදා කප්පම් කල්ලියක් පැහැරගත් සහ පසුව ඝාතනය කළ තරුණයන් පස්දෙනා ඇතුළු එකළොස්දෙනා පිළිබඳව හිටපු ආරක්ෂක අමාත්‍යාංශ ලේකම් ගෝඨාභය රාජපක්ෂ ද දැනුවත්ව සිට ඇති බව පසුගිය ඔක්තෝබර් 09 වෙනි දා කොළඹ කොටුව මහේස්ත‍්‍රාත් අධිකරණයට අපරාධ පරීක්ෂණ දෙපාර්තමේන්තුව ඉදිරිපත් කළ කරුණුවලින් අනාවරණය වෙයි. ඔහු වර්තමානයේ විනයගරුක රටක් හදන්නට වේදිකාවක් වේදිකාවක් ගානේ කෑගසන පොදුජන පෙරමුණේ ජනාධිපති අපේක්ෂකයා ය. මෙම සාහසික මනුෂ්‍ය සංහාරය පිළිබඳ තොරතුරු එම ඝාතනයන් ත‍්‍රිකුණාමලයේ ගන්සයිඞ් හමුදා කඳවුර තුළ සිද්ධවෙන විටත් ඒ පිළිබඳව එවක ආරක්ෂක අමාත්‍යාංශ ලේකම්වරයා දැනුවත්ව සිට ඇත. එම කරුණ අනාවරණය වන්නේ ඔහුගේම සුවච කීකරු ගෝලයෙකු වන හිටපු නාවික හමුදාපති වසන්ත කරන්නාගොඩ අපරාධ පරීක්ෂණ දෙපාර්තමේන්තුවට කරන ප‍්‍රකාශයක් හරහා ය.

වසන්ත කරන්නාගොඩගේ ප‍්‍රකාශය

පසුගිය කාලයේ මේ සාහසික අපරාධය පිළිබඳව ප‍්‍රකාශයක් සටහන් කරගන්නට නාවික හමුදාවේ හිටපු නීති උපදේශක ශවේන්ද්‍ර ප‍්‍රනාන්දුට දෙපාර්තමේන්තුවට එන්න යැයි අපරාධ පරීක්ෂණ දෙපාර්තමේන්තුව කිහිප අවස්ථාවකදීම කීවේය. එහෙත් ඔහු ආවේ නැත. ඔහු නාවික හමුදාවේ නීති උපදේශක මෙන්ම නීතිපති දෙපාර්තමේන්තුවේ සිටි නියෝජ්‍ය සොලිසිටර් ජෙනරාල්වරයෙකුද වන බව මතක තබා ගත යුතුය.


මෙම මගහැරීම නිසාම අධිකරණය හිටපු නීති නිලධාරියාට නියෝග කළේ අපරාධ පරීක්ෂණ දෙපාර්තමේන්තුවට ගොස් ප‍්‍රකාශයක් ලබා දෙන ලෙසය. ඒ අනුව ඔහු එම ආයතනය වෙත ගොස් ප‍්‍රකාශයක් ලබාදෙන අතර එයින් අනාවරණය වන්නේ සම්පත් මුණසිංහ මහතා පිළිබඳව පැමිණිල්ල දාන්නට ප‍්‍රථම වසන්ත කරන්නාගොඩ මහතා සහ ශවේන්ද්‍ර ප‍්‍රනාන්දු මහතා අතරවූ සාකච්ඡුාවේදී හිටපු නාවික හමුදාපති වසන්ත කරන්නාගොඩ යම් යම් සිදුවීම් සඟවා කතාකර ඇති බවය. ඒ අනුව එම ගැටලූව ලිහා ගැනීමට අපරාධ පරීක්ෂණ දෙපාර්තමේන්තුව නැවත් ප‍්‍රකාශයක් ලබා ගැනීමට පැමිණෙන්න යැයි හිටපු නාවික හමුදාපතිවරයා දැනුවත් කරන්නේ ය.


ප‍්‍රථමයෙන් එම දැනුවත් කිරීම ¥රකථන මාර්ගයෙන් කර ඇත. එයට වසන්ත කරන්නාගොඩ මහතාගේ ප‍්‍රතිචාරය වී ඇත්තේ තමන් ප‍්‍රකාශයක් ලබාදීම සඳහා නොපැමිණෙන බවය. හිටපු නාවික හමුදාපතිවරයෙකු සහ හිටපු නියෝජ්‍ය සොලිසිටර් ජෙනරාල්වරයෙකු නීතිය හමුවේ හැසිරී ඇති ආකාරය එහෙමය.


අවසානයේ අපරාධ පරීක්ෂණ දෙපාර්තමේන්තුව පෙර පරිදිම අධිකරණයෙන් නියෝගයක් ලබාගෙන ඇත. ඒ 2019/09/25 දිනයේ දීය. එය දෙන්නට එදිනම අංක 99/03, උතුර පාර, බැද්දගාන, පිටකෝට්ටේ යන වසන්ත කරන්නාගොඩ මහතාගේ නිවසට ගිය විට එම නිවසෙන් කිසිදු ප‍්‍රතිචාරයක් ලැබී නැත. ඒ අනුව ලැමිනේට් කරනු ලැබූ නියෝගයේ පිටපතක් අපරාධ පරීක්ෂණ දෙපාර්තමේන්තුව එම මහතාගේ නිවසේ ගේට්ටුවේ අලවා ඇත. එයටද ප‍්‍රතිචාරයක් නොමැති තැන අපරාධ පරීක්ෂණ දෙපාර්තමේන්තුව එම දිනවල ඔහු නේවාසිකව සිට ඇතැයි කියන වැලිසර නාවික හමුදා රෝහල වෙත ගොස් ඔහුගේ අතටම එම නියෝග ලබාදී ඇත. එම නියෝගයට අනුව පසුගිය සැප්තැම්බර් 26 සහ 27 යන දින තුළ ඔහු පැමිණ අපරාධ පරීක්ෂණ දෙපාර්තමේන්තුව වෙත ප‍්‍රකාශයක් ලබා දී ඇත.


එම ප‍්‍රකාශයෙන් අනාවරණය වූ තොරතුරු අපරාධ පරීක්ෂණ දෙපාර්තමේන්තුව අධිකරණයට වාර්තා කර ඇත. එයට අනුව වසන්ත ජයදේව කරන්නාගොඩ මහතා ප‍්‍රකාශ කර ඇත්තේ තමන්ගේ ශරීර ආරක්ෂකයා සේ කටයුතු කළ සම්පත් මුණසිංහ මහතා ගැන තමන්ට වාර්තාවී තිබුණු පුද්ගල පැහැරගැනීම් පිළිබඳ කරුණු සහ ඔහුගේ කාමරය පරීක්ෂා කිරීමේදි ලද සාක්ෂි මත ඉදිරි ක‍්‍රියාමාර්ග ගැනීමට, එවක ආරක්ෂක අමාත්‍යාංශ ලේකම් ගෝඨාභය රාජපක්ෂ වෙත, ඒ පිළිබඳව කරුණු වාර්තා කළ බවය. ඒ අනුව ඔහුගෙන් ලැබුණු උපදෙස් අනුව යමින් හිටපු නියෝජ්‍ය පොලිස්පති අනුර සේනානායකට මේ පිළිබඳව පැමිණිල්ලක් ඉදිරිපත් කළ බවය. මෙම ප‍්‍රකාශයට අනුව ගෝඨාභය රාජපක්ෂ මහතාගේ උපදෙස පැහැදිලිය. එහෙත් නැවත් ඔවුන්ගේ මේ ක‍්‍රියාවන් සැකයට බඳුන් වෙන්නේ එම පැමිණිල්ල තුළ කරුණු සඟවන නිසා ය. ගන්සයිඞ් ගැන පැමිණිල්ලේ නැත. දරුවන් පස් දෙනා පිළිබඳව පැමිණිල්ලේ නැත. මෙම සාහසික සංහාරයේ ප‍්‍රධාන සැකකරුවා වන ලූතිනන් කොමදෝරු හෙට්ටිආරච්චි ගැන ඒ පැමිණිල්ලේ කිසිවක් නැත. ඒ සැඟවීමත් ගෝඨාභය රාජපක්ෂ මහතාගේ උපදෙස් අනුවද? අපට සැක සිතෙයි.


ඒ පිළිබඳව වසන්ත කරන්නාගොඩ මහතාගෙන් අපරාධ පරීක්ෂණ දෙපාර්තමේන්තුව ප‍්‍රශ්න කළ විට ඔහු දෙන්නේ මෙවැනි පිළිතුරක් ය.
‘සම්පත් මුණසිංහගේ මේ කප්පම් ගැනීම ගැන තොරතුරු කොමදෝරු බණ්ඩාර සහ කපිතාන් ජේ ජේ රණසිංහගෙන් ලැබුණාට පස්සේ මම එවක නැගෙනහිර නාවික ආඥාපති විදිහට කටයුතු කරපු සුසිත් වීරසේකට කිව්වා පුද්ගලිකවම ගිහිං ගන්සයිඞ් පරීක්ෂා කරන්න කියලා. ඔහු ගිහිං බලලා කිව්වා එහෙම කිසි දෙයක් නැහැ කියලා’.


වසන්ත කරන්නාගොඩ මහතා කියන ලෙස මෙම පරීක්ෂා කිරීම සිදුකර ඇත්තේ 2009/05/10 දිනයේ හෝ ඊට ආසන්න දිනකදී ය. ඔහුම කියන ලෙස පැමිණිල්ල යොමුකිරීමට අදාළ සාකච්ඡුාවේදී එවක නාවික නීති උපදේශක ශවේන්ද්‍ර ප‍්‍රනාන්දුට ඔහු මෙම සිදුවීම පිළිබඳව තොරතුරු පවසා ඇත. එහිදී අපරාධ පරීක්ෂණ දෙපාර්තමේන්තුව විමසා ඇත්තේ 2009/05/28 පොලිසිය හමුවේ ගොනුකරන පැමිණිල්ල තුළ මේ පිළිබඳව කිසිවක් අන්තර්ගත නොවුණේ ඇයි කියා ය. ‘එම ළමයින් පස්දෙනා ඒ කියපු ස්ථානයේ හිටියේ නැති නිසා නැති දෙයක් පැමිණිල්ලට දැම්මාම ඒක නිසා නීතිමය ප‍්‍රශ්නයක් එයි කියලා ශවේන්ද්‍ර ප‍්‍රනාන්දු හිතන්න ඇති.’ මේ විදිහට ඔහු එම ප‍්‍රශ්නයෙන් පැනගොස් ඇත!!


එලෙස පිළිතුරු ගොනුකරන වසන්ත කරන්නාගොඩ තවත් මතභේදයට තුඩුදෙන ප‍්‍රකාශයක් කර ඇත. මෙම සංහාරය තුළ ඝාතනයට ලක්වූ රජීව් නාගනාදන්ගේ මව වන සරෝජනී නාගනාදන් මේ පිළිබඳව අධිකරණයේ විභාග වන හබයාස්කෝපුස් නඩුවකට අදාළව දී තිබෙන දිවුරුම් ප‍්‍රකාශකට අනුව රජීව් නාගනාදන් 2009/04/24 දිනයෙන් පසුව නිවසට කතා කර නැති බව කියා ඇතැයි වසන්ත කරන්නාගොඩ මහතා අපරාධ පරීක්ෂණ දෙපාර්තමේන්තුවට ප‍්‍රකාශ කරන්නේ ය. ඒ මහතා මේ නොකියා කියන්නේ කුමක්ද? මේ කියන්නේ වෙන දෙයක් නොව තමන් මේ පිළිබඳව ක‍්‍රියාත්මකවූ මැයි මාසයට ප‍්‍රථම මේ දරුවන් අපේ‍්‍රල් මාසයේදී මරා දමන්නට ඇතැයි කියා ය. එනිසා තමන්ගේ අතේ ලේ පැල්ලම් ගෑවී නැති බව ඔහු නොකියා කියයි.

තමන්ට මෙම සිද්ධිය ආරංචි වන විට සියල්ල අවසන්වී තිබුණ බව කියා, ඔහුට තමන්ගේ දෑතේ තැවරී තිබෙන ලේ පිසදා ගන්නට පුළුවන්ද? මෙම අවසන් ඇමතුම ආ දිනය පිළිබඳව වසන්ත කරන්නාගොඩ මහතා කරන ප‍්‍රකාශ පිළිබඳව අපරාධ පරීක්ෂණ දෙපාර්තමේන්තුව සරෝජනී නාගනාදන් මහත්මිය නැවත අපරාධ පරීක්ෂණ දෙපාර්තමේන්තුව වෙත ගෙන්වා ප‍්‍රශ්න කර, ප‍්‍රකාශයක් සටහන් කරගෙන ඇත. ඇය ඒ ගැන කියන්නේ කුමක්ද?

සරෝජනීගේ ප‍්‍රකාශය

තම පුතා නාවික හමුදාව පැහැර ගත් පසුව 2008 දෙසැම්බර් 31 දා සිට 2009 මාර්තු මැද වන තෙක් කොළඹ කොටුව චෛත්‍ය පාරේ නාවික හමුදා කඳවුර් සිට ¥රකථනයෙන් කතාකළ බවත් පසුව 2009 අපේ‍්‍රල් මුල සිට මැයි 21 දක්වා ත‍්‍රිකුණාමලයේ ගන්සයිඞ් කඳවුරේ සිට ¥රකථනයෙන් කතාකළ බවත් මෙම ප‍්‍රකාශ තුළ සරෝජනී නාගනාදන් මහත්මිය පවසන්නීය. එහිදී ඇය කියන්නේ හබයාස්කෝපුස් නඩුවට අදාළව තමන්ගේ දිවුරුම් ප‍්‍රකාශය තුළ 2009 අපේ‍්‍රල් 24 ලෙස සටහන් වී තිබෙන්නේ නම් එය යතුරු ලියනය කරනවිට වූ වැරැුද්දක් විය හැකි බවය. ඇය ප‍්‍රකාශ කරන ආකාරයට රජීව් අවසන් වරට සිය මවට ත‍්‍රිකුණාමලය සන්සයිඞ්හි සිට කතාකර ඇත්තේ 2009 අපේ‍්‍රල් 24 දා ය.

එම දිනය ඔහු ඝාතනයට ලක්වූ දිනය විය හැකි බව අපරාධ පරීක්ෂණ දෙපාර්තමේන්තුවේ අදහසයි. එවක නාවික හමුදාපතිවරයාගේ පුද්ගලිකවම සොයා බලන්න යැයි උපදෙස එන්නේ 2009 මැයි 10 දා ය. ඒ අනුව එම සොයා බැලීම කරන විට ද රජීව් නාගනාදන් සහ පිරිස එම භූගත කඳවුරේම ජීවග‍්‍රහයෙන් සිට ඇත. ඒ බව සරෝජනීගේ ප‍්‍රකාශයෙන් තහවුරු වෙයි. ඒ අනුව වසන්ත කරන්නාගොඩ මහතාගේ මෙන්ම හිටපු ආරක්ෂක අමාත්‍යාංශ ලේකම් ගෝඨාභය රාජපක්ෂගේ දෑත්ද මේ අපරාධයෙන් කිලිටි වෙන්නට පුළුවන්ය.

මෙම ප‍්‍රකාශය දෙමින් තමන්ගේ පුතා එම භූගත කඳවුරේ සිට ඔහුට අත්දකින්නට වූ දේවල් ¥රකථන මාර්ගයෙන් විස්තර කළ බව ඇය අපරාධ පරීක්ෂණ දෙපාර්තමේන්තුවට පවසන්නී ය.


‘අම්මේ අවුරුදු 20, අවුරුදු 30 විතර ගැහැනු ළමයි, පිරිමි ළමයි, මෙතනට ගෙනල්ලා වෙඩි තියලා මරනවා. මාවත් එහෙම මරයිද අම්මේ?’ රජීව් නාගනාදන් තම මවට එලෙස ¥රකථනයෙන් පවසා ඇත. ඇය කියන ලෙස රජීව්ට මෙම ඝාතනයන් දැකගන්නට ලැබී ඇත්තේ වැසිකිළි යනවිටය. ‘ලේ දැකලා බයවෙලා තමයි පුතා මට කතා කළේ’ ඇය එහිදී පවසා ඇත. රජීව් නාගනාදන් දැක්කා යැයි කියා කියන මේ ඝාතනයන් ඇත්ත නම් සංහාරයේ තරම සිතාගත හැකිය.

පිට්ටු බම්බුව

කොළඹ කොටුව චෛත්‍ය පාරේ පිට්ටු බම්බුව යන ස්ථානයේ නාවික හමුදා මූලස්ථානය තුළ ලූතිනන් කොමදෝරු හෙට්ටිආරච්චි ප‍්‍රමුඛ ඝාතකයන් රැුඳවුම් ස්ථානයක් පවත්වාගෙන ගොස් ඇති බව සහ ඝාතනයට ලක්වූවන් එම ස්ථානයේ මඳ කාලයක් රඳවාගෙන සිට පසුව ඔවුන් ත‍්‍රිකුණාමලයේ ගන්සයිඞ් වෙත රැුගෙන ගොස් ඇති බව අපරාධ පරීක්ෂණ දෙපාර්තමේන්තුව කරුණු අනාවරණය කරගෙන ඇත. එම කරුණ නාවික හමුදා මූලස්ථානයේ රැුඳවුම් ස්ථානයේ රඳවා සිටින විට රජීව් නාගනාදන් තම මවට දුන් ¥රකථන ඇමතුමක් නිසා ද සනාථ වී ඇත. එයින් හෙළිවී ඇත්තේ පැහැරගැනීමට ලක්වූ ජෝන් රීඞ් සහ ඔහුගේ පියා ද එම ස්ථානයේම රඳවා සිට ඇති බවය. එම කරුණ අනාවරණය කරමින් ජෝන්ගේ නිවසට මේ පිළිබඳව දැනුම් දෙන ලෙස ඔහු මවගෙන් ඉල්ලා ඇත.


නාවික හමුදා මූලස්ථානය තුළ මෙවැනි රැුඳවුම් ස්ථානයක් නාවික හමුදාපතිවරයාගේ අනුදැනුමෙන් තොරව පවත්වාගෙන යන්නට බැරි බව අපරාධ පරීක්ෂණ දෙපාර්තමේන්තුවේ අදහස ය. එම අදහසට අනුවත් පෙනෙන්නේ වසන්ත කරන්නාගොඩ මහතා මුල සිටම මෙම සංහාරික මෙහෙයුම දැන සිට ඇති බවය. වසන්ත කරන්නාගොඩ මහතා දැන සිට ඇති නම් ගෝඨාභය රාජපක්ෂ මහතා නොදැන සිටින්නටද විදිහක් නැත!!


මෙහිදී අපරාධ පරීක්ෂණ දෙපාර්තමේන්තුව ලූතිනන් කොමදෝරු ක‍්‍රිශාන්ත වෙළගෙදර ලබාදුන් ප‍්‍රකාශයක් උපුටමින් ප‍්‍රකාශ කරන්නේ එවක ත‍්‍රිකුණාමලය නාවික කඳවුරේ සේවය කළ ඔහු, එහිදී ඝාතනයට ලක්වූ රජීව්, අලී සහ ජෝන් යන පුද්ගලයන් දැක ඇති බවය. පසුව මෙම පුද්ගලයන් එම පරීශ‍්‍රය තුළදීම ඝාතනයට ලක්වූ බව දැනගන්නට ලැබුණේ යැයි එම ප‍්‍රකාශය තුළ වෙළගෙදර මහතා ප‍්‍රකාශ කර ඇත. තමන් එම මළසිරුරු පරීක්ෂා කරන්නට පැමිණියත් එම සිරුරු පොලිතින් උරවල බහා කැබ් රථයක නංවාගෙන කඳවුරු පරිශ‍්‍රයෙන් පිටතට රැුගෙන යනු තමන් දැක්ක බව එම නිලධාරියා ප‍්‍රකාශ කළ බව අපරාධ පරීක්ෂණ දෙපාර්තමේන්තුව අධිකරණයට කරුණු වාර්තා කර ඇත.


ගන්සයිඞ් සිරමැදිරි තුළ රඳවා සිටි රජීව් නාගනාදන් ඇතුළු පිරිස එම ස්ථානයේ රඳවා සිට පසුව ඝාතනයට ලක්වී ඇතැයි යන්න තහවුරු කරන ප‍්‍රබල සාක්ෂියක් වෙළගෙදරගේ සාක්ෂිය බව ප‍්‍රකාශ කරන අපරාධ පරීක්ෂණ දෙපාර්තමේන්තුව, සැක පහළ කරන්නේ රජීව් නාගනාදන් තම මවට පවසා ඇති ආකාරයේ ඝාතන වැලක් පිළිබඳ තොරතුර ඇත්තක් විය හැකි බවය. මෙය ඇත්ත නම් මෙලෙස කීදෙනෙකු මෙම ස්ථානයේදී ඝාතනය කරන්නට ඇතිද? 28 දෙනෙකු පිළිබඳ තොරතුරු ඇති බව අපරාධ පරීක්ෂණ දෙපාර්තමේන්තුව දෙසින් එන ආරංචි කියන්නේ ය. එම ප‍්‍රමාණය ඊට බොහෝ වැඩි විය හැකිය. ඒ පිළිබඳව පරීක්ෂණ කළ යුතුය. එහෙත් මේ වනවිට දැනගන්නට තිබෙන්නේ මෙම සිද්ධියට අදාළ පරීක්ෂණ අවසන් බවය. ඒ අනුව මෙම පරීක්ෂණ ගොනු හෙට අනිද්දාම නීතිපති ළඟට යැවෙනු ඇත. ඊට පසුව පරීක්ෂණ තවත් ඉදිරියට යන්නේ ද නැතිනම් නඩු පැවරීම් කරන්නේද යන්න නීතිපතිවරයා තිරණය කරනු ඇත.


එහෙත් ගෝඨාභය රාජපක්ෂ මහතා මීළඟ ජනාධිපති බව ජනතාව තීරණය කළහොත් නඩුද පරීක්ෂණද සියල්ල මුහුදට විසිවෙනු ඇත.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි