‘ජනාධිපතිතුමා මාව බේරාගත්තා. අපිට ඕනෑනම් මේවා ඇතුළේ විසඳන්නත් පුළුවන්. එළියේ විසඳන්නත් පුළුවන්.’
ඌව පළාත් සභාවේ ඇමතිවරයෙකු සහ මහියංගණයේ සහල් මෝල් හිමි ප්රසිද්ධ ධන කුවේරයෙකු වන අනුර විදානගම විසින් මේ කතාව කීවේ මහියංගණය නගරයේ පැවැත්වූ ප්රසිද්ධ රැුස්විමකදීය. ඒ පසුගිය පළාත් පාලන මැතිවරණ ව්යාපාරයේදීය. අඩු වැඩි වශයෙන් මේ කතාවම ඔහු ප්රාදේශීය සභා භූමියේදීද ජනතාව ඉදිරියේදී වතාවක් කියා ඇත.
ඔහුගේම වචනවලට අනුව මෙවර අනුර විදානගමගේ බේරාගෙන ඇත්තේ වත්මන් ජනාධිපති මෛත්රිපාල සිරිසේනය. අනුර විදානගමගේ බේරාගෙන ඇත්තේ කුමන චෝදනාවකින්දැයි සොයා බැලිය යුතුය. මේ සටහන අනුර විදානගමගේට ඇති චෝදනාව විමසා බැලීමකි.
දේශපාලන බලය මත ලංකාවේ මෑත ඉතිහාසය තුළ සිදුවූ බරපතළ මූල්ය වංචා සම්බන්ධයෙන් පත්කළ විශේෂ ජනාධිපති විමර්ශන කොමිසම විසින් පැවැත්වූ විමර්ශන 34ක් අතරින් වාර්තා 5ක පරීක්ෂණ අවසන් කොට පසුග ිය ජනවාරි මාසයේ නීතිපතිවරයා වෙත යොමුකර තිබිණි. එසේ යොමුකර තිබුණේ ඉදිරියේදී සම්බන්ධයෙන් අධිකරණ ක්රියා මාර්ග ගැනීම හෝ වෙනත් පියවරක් ගැනීම පිළිබඳ උපදෙස් ලබාගැනීම සඳහාය.
මෙම විමර්ශන වාර්තා අතරින් දෙවනියට සඳහන් වන්නේ මහියංගණ නගරයේ රජයේ ඉඩම්වල හා පොළ භූමියේ වෙළඳ සංගමය නැමති සංවිධානයක් විසින් දියත් කළ නගරය හා ඒ ආශ්රිතව පැවති කඩකාමර 177ක් ඉදිකොට බදු දීමේ ව්යාපාතියක් පිළිබඳ කතාවකි. එම ව්යාපෘතියෙන් රුපියල් මිලියන 700කට ආසන්න මුදලක් වංචා කිරීම සම්බන්ධ චෝදනාවක් ඒ පරීක්ෂණ වාර්තාවෙහි තිබුණි. අනුර විදානගමගේ මෙම වංචාව සම්බන්ධයෙන් චෝදනා ලබා සිටින්නෙකි. විදානගමගේට බේරෙන්නට තිබුණු උවදුර වන්නේ මේ චෝදනාවයි. ජනාධිපති බේරාගත් බව කීවේ මේ චෝදනාවෙනි. ඒ කතාවේ ඇත්ත නැත්ත කෙසේ වෙතත් ජනවාරි මාසයේදි නීතිපති දෙපාර්තමේන්තුවට යවා තිබුණු පරීක්ෂණ වාර්තා සම්බන්ධයෙන් තවම උපදෙස් ලැබී නැත.
මේ කඩකාමර ඉදිකර ඒවා බදු දී තිබුණේ මහියංගණය ප්රාදේශීය ලේකම් කාර්යාලයට හෝ තැපැල් කාර්යාලයට හෝ මහියංගණය ප්රාදේශීය සභාවට හෝ වෙනත් කිසිදු රජයේ ආයතනයකට නෛතික බැඳීමකින් සම්බන්ධ නොවූ මහියංගණය වෙළඳ සංගමය නම් වූ සංවිධානයක් විසින්ය. එහෙත් කඩකාමර නිර්මාණය කර තිබුණේ රජයට අයිති ඉඩම්වලය. කඩකාමර තැනූ ඉඩම් අයිතිවන්නේ මහියංගණය තැපැල් කාර්යාලය, ප්රාදේශීය ලේකම් කාර්යාලය සහ ප්රාදේශීය සභාව යන ආයතනවලටය.
මහියංගණ නගරයේ සිට පදියතලාව මාර්ගයේ කඩ කාමර 16ක්, බදුල්ල මාර්ගයේ කඩ 40ක්, මහියංගනය පොදු ක්රිඩාංගණයට යාබද ඉඩමේ කඩ 40ක්, බස්නැවතුම්පළේ කඩ 40ක්, කාගිල්ස් ෆුඞ්සිටියට යාබදව කඩ 31ක් වශයෙන් ඉඩම් බදු දී තිබුණි.
ඇතැම් පුද්ගලයන්ට කඩ ලබාදී ඇත්තේ කිසිදු ටෙන්ඩර් කැදවීමකින් තොරවය. කඩ ලබාදීමේ පොරොන්දුව මත කඩ ඉදිකිරීමට පෙර වෙළඳුන්ගෙන් හා ව්යාපාරිකයන්ගෙන් ලක්ෂ හතහමාරේ සිට ලක්ෂ 18- 20 දක්වා මුදල් ලබාගෙන ඇත. තවත් ව්යාපාරිකයන් පිරිසකගෙන් ලක්ෂ 12ක 15ක ද්රව්යමය ආධාර ලබාගන ඇත. කඩ ඉදිකරන්නේ ඒ ප්රතිපාදන මතය.
මේ තොරතුරු වෙළඳ සංගමයේ ඇති ලේඛනවල සදහන්ය. එහෙත් එසේ ලබාගෙන තිබුණු ද්රව්ය මොනවාද යන්න වෙළඳ සංගමයේ ලේඛනවල සටහන්ව නැත.
මෙම කඩකාමර ඉදිකිරීමට වෙළඳ සංගමය මගින් මහියංගණයේ ව්යාපාරිකයන්ගෙන් පමණක් එකතුකර ඇති මුදල රුපියල් මිලියන 436කි. එහෙත් මේ වෙද්දී මුදල් දැමූ ගිණුම්වල ඇත්තේ රුපියල් 4000කට ආසන්න මුදලක් පමණි. ඉතිරි මිලියන ගණනක මුදල්වලට සිදුවූ දෙය දන්නේ වෙළඳ සංගමය නැමති නමකින් මුදල් ලබාගත් පුද්ගලයන්ය.
මේ වෙළඳ සංගමය මෙහෙවීම සම්බන්ධයෙන් චෝදනා ලබා ඇත්තේ අනුර විදානගමගේ ඇතුළු පිරිසක්ය. අනුර විදානගමගේ වෙළඳ සංගමයට සම්බන්ධ වෙන්නේ වෙළඳ සංගමයේ ඇති ලිපිලේඛන හරහා නොවේ. මේ ව්යාපෘතියෙන් අගතියට පත් වූ අය ජනාධිපති විමර්ශන කොමිසම වෙත සාක්ෂි ලබාදෙමින් කියා ඇත්තේ මෙම ව්යාපෘතිය අනුර විදානගමගේ විසින් මෙහෙයවූ බවයි. ඒ අනුව ජනාධිපති විමර්ශන කොමිසම විසින් අනුර විදානගමගේ සාක්ෂි සඳහා ගෙන්වා ඇත.
අප සමඟ නිර්නාමිකව අදහස් දැක්වූ කඩහිමියෙක් මෙසේ පැවසීය.
‘අපට කඩ තිබුණා. ඒ කඩ කාමර කඩලා අලූත් කඩකාමර හදන බව කිව්වා. වෙළඳ සංගමයෙන් මේ වැඬේ කරන්නේ, කඩකාමර ඕනෑ අය කඩ හදන්න ගිණුමකට සල්ලි දාන්න කියලා උපදෙස් ලැබුණා. ඇත්තටම මහියංගණ වෙළඳ සංගමය කියලා නමක් තිබුණාට එහෙම සංගමයක් නෑ. අපිට වෙළඳ සංගමයෙන් කඩ හදනවා කියලා ගිණුමකට සල්ලි දාන්න කිවුවා. අනුර විදාගමගේ ඇමතිතුමාගේ නියෝජිතයන් විදියට එයාලා පෙනීහිටපු නිසා තමයි අපි සල්ලි දැම්මේ. අපෙන් කඩ කාමරයකට ලක්ෂ හතහමාරක් ගත්තා. කඩ කාමර ලැබුණත් ඒවා සම්බන්ධයෙන් කිසිම නීතිමය ලියැවිල්ලක් අපට දීලා නැහැ. මේ කඩ කාටද අයිති කියලා අපිවත් දන්නේ නෑ. බදු ගිවිසුමක් නෑ. එනිසා ප්රාදේශීය සභාවෙන් බදු ගන්නේ නෑ. ප්රාදේශීය ලේකම්තුමා මේ ගැන කිසිම දෙයක් කියන්නේත් නෑ.’
කඩකාමර හිමියන්ද අනවසර ඉඩම්වල නිර්මාණය කළ කඩකාමර වෙනුවෙන් හිතුමතේ මුදල් යට කර ඇත. අනුර විදානගමගේ සතු දේශපාලන බලය මත ලක්ෂ හතහමාරකට තමන්ගේ නොවන ඉඩමක තිබුණු කඩකාමරයක් ලබාගැනීමේ වංචාසහගත බලාපොරොත්තුව ඔවුන්ටත් තිබෙන්නට ඇත. මේ වංචාවේ අනෙක් කොටස්කරුවන් වන්නේ ඔවුන්ය.
මහියංගණය ප්රාදේශීය සභාව මේ කඩවලින් බහුතරයක් බදු අය නොකර අත්හැර දමා ඇත. ප්රාදේශීය සභාවේ ඉහළ නිලධාරියෙකුගෙන් ඒ ගැන විමසූ කල ලැබුණු පිළිතුර වූයේ දැනට මෙම කඩ 50කින් පමණක් බදු අය කර ගන්නා බවයි. සෙසු කඩ 127න් බදු අය නොකිරීමට හේතුව පැහැදිලි කිරීමට ඔහු අපොහොසත්ය. පසුගිය වසර ගණනක කාලය තුළ බදු අය නොකිරීමෙන් සභාවට සිදුව ඇති පාඩුව සම්බන්ධයෙන් ඔහුට පිළිතුරක් නැත. ඒ සියල්ලට ඔහුගේ පිළිතුර වන්නේ ඉදිරි කාලයේදී මෙම කඩවලින් ප්රාදේශීය සභාව බදු අයකර ගැනීමට පියවර ගනු ඇති බව පමණකි.
මෙම ඉදිකිරීම් සම්බන්ධයෙන් මහියංගණය ප්රාදේශීය ලේකම් සුනිල් දිසානායක අප වෙත අදහස් පළකළේ මෙසේය.
‘විස්වාස කරන්න, කිසිම නීතිමය කාරණයකට ප්රතිපත්තියකට යටත්ව නෙමේ මේ ඉදිකිරීම් කරලා තියෙන්නේ. අඩුම වශයෙන් සැලැස්මක්වත් පාස් කරලා නෑ. මේ කඩවලින් ප්රාදේශීය ලේකම් කාර්යාලයට අයිති වෙන්නේ කඩ 24ක් පමණයි. හදපු කඩවලට අමතරව ප්රාදේශීය සභා නිවාඩු නිකේතනය පිටුපස ඉදිකිරීමට ලක්ෂ 50ක් වියදම් කරලා තියෙනවා. කවුරු මොනවට හැදුවද කියලා. හදපු අයවත් දන්නේ නෑ. අදටත් ඒ ගොඩනැගිලි වහලා දාලා.’
ප්රදේශයේ ඉහළ නිලධාරීන් පෙන්වාදෙන ආකාරයට 2011 වසරේ සිටම මහියංගණ නගරයේ කඩ ඉවත් කිරීමත් නැවත ඉදිකිරීමත් ඒ සදහා රජයේ ආයතනවල ඉඩම් පවරාගැනීමත් කිසිදු නීතිමය ක්රමවේදයකට හෝ පිළිගත් ප්රතිපත්තියකට අනුව කර නැත. එමෙන්ම ටෙන්ඩර් කැදවීමකින් තොරව කොන්ත්රාත් ලබාගත් කොන්ත්රාත්කරුවන් සොයාගැනීමටවත් නොහැකිය.
මෙලෙස ඉදිකළ කඩ කාමර 177ට අමතරව මහියංගණ නගරයේ අදාල වෙළඳ සංගමය විසින් ඉදිකිරීම් ආරම්භ කළ කඩ කාමර 64කින් යුත් සුපිරි වෙළෙඳ සංකීර්ණයක වැඩ කටයුතුද 2015 ජනවාරි ආණ්ඩු පෙරළියෙන් පසුව අත්හිටුවා තිබිණි. එහි කොන්ත්රාත්කරු වශයෙන් කටයුතු කර ඇත්තේ බීඑස්පී බෝවතුර නම් අයෙකි. පහත පළවන ඔහු අපට කළ ප්රකාශයෙන් හෙළිවන්නේ මෙම ඉදිකිරීම් සම්බන්ධයෙන් කොතරම් අවිධිමත් හා පිළිගත් නීතියට පටහැනිව කටයුතු කර තිබේද යන්නය.
‘මමත් දෙවරක් මේ කඩ හැදීම සම්බන්ධයෙන් විශේෂ ජනාධිපති කොමිසමට සාක්ෂි දෙන්න ගියා. ඒ අය මගෙන් ඇහුවේ මෙම ඉදිකිරීම් කළේ ඔබද කියායි. මම කිවුවා සුපිරි වෙළඳ සංකීර්ණයේ කොන්ත්රාත්තුව ගත්තේ මම බව. මේ කොන්ත්රාත්තුව ලැබුණ විදිහත් ප්රශ්න කළා. අනුර විදානගමගේ ඇමතිතුමාව කුඩා කාලයේ පටන් මම අඳුනනවා, දවසක් මට එතුමා රැුස්වීමකට එන්න කිවුවා. මම එතනට ගියා. එතන පළාත් සභාවේ සහ ප්රාදේශීය ලේකම් කාර්යාලයේ නිලධාරීන් පිරිසක් ඇවිත් හිටියා. ඇමතිතුමා එයාලට මාව හඳුන්වලා දුන්නා. ඊට පස්සේ මේ කොන්ත්රාත්තුව මට ලැබුණා. මම කොන්ත්රාත්තුව කළා මිසක් වෙන දෙවල් හොයන්න ගියේ නෑ. මටත් යම් මුදලක් අයවෙන්න තිබෙනවා. මට ඉදිකිරීම්වලට සල්ලි ගෙවුවේ වෙළඳ සංගමය. වෙළඳ සංගමය කිවුවාට ඇමතිතුමාගේ ගෝලයෙක් හිටියා විජිත කියලා එයා තමයි සල්ලි දුන්නේ.’
මෙම කොන්ත්රාත්කරු අඩක් පමණක් නිම කළ සුපිරි වෙළෙඳ සංකිර්ණය නැවත මහියංගණ ප්රාදේශීය සභාවට පවරාගැනීමට පසුගිය පළාත් පාලන මැතිවරණයෙන් බලයට පත්වූ මහියංගණ ප්රාදේශීය සභාව විසින් 2018/6/3 දින යෝජනාවක් සම්මත කර ඇත. එහෙත් ඌව පළාත් සභාව ජනාධිපති ලේකම් කාර්යලයෙන් ලැබුණු ලිපියක් උපයෝගී කර ගනිමින් නැවතත් එම ඉදිකිරීම් කටයුතු මහියංගණ වෙළද සංගමයටම පවරා ඇත. ඒ 2018/7/4 දින කැදවු රැස්වීමකදීය.
මේ ආකාරයෙන් 2015 ජනවාරි 8 දින නවතා දැමුණු දුෂිත දේශපාලනයේ ඇතැම් කොටස් නැවත ආරම්භ කිරීමට අනුර විදානගමගේලාට හැකිවී නම් මෙවැනි වංචා හා සොරකම් විමර්ශනය සඳහා යෙදවූ මුදල් හා අවංකව ඒ වෙනුවෙන් කාලය කැපකළ රාජ්ය නිලධාරීන්ගේ ශ්රමයට වග කියන්නේ කවුදැයි අපි නොදන්නෙමු.
ඌව පළාත් සභා අමාත්ය අනුර විදානගමගේගෙන් අපි මේ පිළිබඳව විමසුවෙමු. ඔහු මෙසේ පිළිතුරු දුන්නේය.
‘කවුද ඔයාලට ඕක මගෙන් අහන්න කිවුවේ. ඇයි මාධ්යවලින් දන්නේ නැද්ද අපිව නිදහස් කළානේ. ජනාධිපති කොමිසමේ පංච පුද්ගල විනිසුරු ම`ඩුල්ලක් තමයි මේ නඩුව ඇහුවේ. මම ගියේ සාක්ෂි දෙන්න විතරයි. එතැනදි කව්ද මගේ නමත් කියලා තිබුණු නිසයි මම ගියේ. ඉතාම විනිවිදභාවයක් සහිතව මේ ඉදිකිරීම් කරලා තියෙනවා. ඒවා කළේ වෙළෙඳ සංගමය. මගේ කිසිම සම්බන්ධයක් නෑ. මගේ හිතවත්තු කියලා කවුරුවත් නෑ. මගේ ඡුන්දදායකයන් සේරම අපේ හිතවත්තු තමයි. මෙතන කිසිම වංචාවක් නෑ. ජනාධිපතිතුමා මාව බේරාගත්තා කියලා කවුද කිවුවේ. එතුමාලා අවේ හොරු අල්ලන්නනේ. ඉතිං අල්ලයි. අපි නම් වරදක් කරලා නෑ. ඒකනේ මේ අපි නිදහසේ ඉන්නේ. මම දන්න තරමට දැන් ඔය සුපර් මාකට් එකත් හදන්න වෙළෙඳ සංගමයට භාර දීලා තියෙන්නේ. ඒ ගැන ඌව පලාත් සභාවේ ප්රධාන ලේකම්තුමාගෙන් අහන්න.’
අනුර විදානගමගේ මහතා කියන්නට උත්සාහ කරන්නේ ජනාධිපති විමර්ශන කොමිසම කළ පරීක්ෂණය නඩු කටයුත්තක් බවයි. එහි හිටපු අධිකරණ විනිසුරුවරුන් සිටින නිසා එය අධිකරණ කටයුත්තක් ලෙස ඔහු අර්ථකථනය කරයි. ඔහු අධිකරණයෙන් නිදහස් වූ බවත් කියන්නට උත්සාහ කරයි. ඔහු මහියංගණයේදීද කියන්නේ මෙවැනි ව්යාජ කතාන්දරමය.
තවමත් අධිකරණය ඉදිරියේදී වරදකරුවකු නොවූ අනුර විදානගමගේට තමන් චෝදනාවෙන් නිර්දෝෂී බව නැවත නැවතත් කියන්නට අයිතියක් ඇත. එහෙත් ඒ බව ඔප්පු කරන්නට නම් මේ චෝදනාව අධිකරණය ඉදිරියට ආ යුතුය. අධිකරණයට නොපැමිණි මේ චෝදනාව නීතිපති දෙපාර්තමේන්තුවේ සිරවී තිබීමම සැකයක් ඇති කරවන්නකි. මහින්ද රාජපක්ෂ මහතා එකල කී කුප්රකට ‘මගේ ළඟ ෆයිල් තියෙනවා’ කතාව වත්මන් ජනාධිපති මෛත්රීපාල සිරිසේනටද ගැළපෙන බව වැටහෙන්නේ මෙවැනි සිදුවීම් නිසාය.
ධම්මික ප්රියදර්ශන