පොලිස් දෙපාර්තමේන්තුව මාසයක කාලයක් දක්වා ජනාධිපති මෛත්‍රීපාල සිරිසේන යටතේ තබාගැනීමට එක්සත් ජාතික පක්ෂය ඉඩ දී ඇතත්, මාසයකට වැඩි කාලයක් ජනාධිපතිවරයා යටතේ පොලීසිය තබාගතහොත් ඒ සම්බන්ධයෙන් පියවරක් ගන්නා බව එක්සත් ජාතික පෙරමුණේ ප්‍රබලයෙක් අනිද්දා සමග කීය.
ආණ්ඩුක්‍රම ව්‍යවස්ථාවට අනුව ජනාධිපතිවරයාට යම් ආයතනයක් ළඟ තබාගත හැක්කේ අගමැතිවරයාගේ එකඟතාව මත පමණක් වන අතර වත්මන් ජනාධිපතිවරයාට ආණ්ඩුක්‍රම ව්‍යවස්ථාවේ විශේෂ විධිවිධාන යටතේ මහවැලි, පරිසර හා රාජ්‍ය ආරක්ෂාව යන විෂයන්ට අයත් ආයතන තබාගැනීමේ හැකියාවක් ඇත.
ඒ අනුව අගමැතිවරයාගේ අනුමැතිය තිබෙන තාක් කාල් පමණක් පොලිස් දෙපාර්තමේන්තුව ජනාධිපතිවරයාගේ යටතේ තබාගත හැකි බව අනිද්දා සමඟ අදහස් දැක්වූ එක්සත් ජාතික පෙරමුණේ ප්‍රබලයා කීය.
ජනාධිපතිවරයා ඝාතනය කිරීමට කුමන්ත්‍රණයක් ඇතැයි පවසා ඇති නිසා, එම ඝාතන සිදුවීම සම්බන්ධයෙන් මූලික පරීක්ෂණයක් අවසන් වන තෙක් පොලීසිය ජනාධිපතිවරයා යටතේ තබාගැනීමට එක්සත් ජාතික පෙරමුණ එකඟ වී ඇත.■

අනුරංග ජයසිංහ

ආණ්ඩුක්‍රම ව්‍යවස්ථා සභාව විසින් අනුමැතිය ලබාදී ඇති ජාතික ප්‍රසම්පාදන කොමිෂන් සභාවේ නව සාමාජිකයන් ජනාධිපතිවරයා විසින් පත්කර නැතැයි වාර්තාවේ.
පසුගිය ඔක්තෝබර් මාසයේදී ජාතික ප්‍රසම්පාදන කොමිසමේ සාමාජිකයන්ගේ ධුරකාලය අවසන් වී ඇති අතර ඒ සඳහා නව සාමාජිකයන් පත්කිරීම සඳහා ඉදිරිපත්වූ නම්වලට ව්‍යවස්ථා සභාව අනුමැතිය ලබා දී ඇත්තේ ඒ අනුවය.
නව සාමාජිකයන් පත්කරන තෙක් ජාතික ප්‍රසම්පාදන කොමිසමේ වත්මන් සාමාජිකයන්ම තවදුරටත් කටයුතු කරන අතර නව සාමාජිකයන් පත් කිරීමෙන් පසු වත්මන් සාමාජිකයන් ධුරවලින් ඉවත් වී යනු ඇත.
රජයේ ටෙන්ඩර් කටයුතු ජාතික ප්‍රසම්පාදන කොමිසමේ මාර්ගෝපදේශයන්ට අනුව සිදුකළ යුතු අතර එම ටෙන්ඩර්වල අක්‍රමිකතාවන් ඇතොත් ජාතික ප්‍රසම්පාදන කොමිසමට පැමිණිලි කළ හැකිය.
එසේ පසුගිය ඔක්තෝබර් මාසයේදී ජාතික ප්‍රසම්පාදන කොමිසමට පත් කිරීම සඳහා ව්‍යවස්ථා සභාව විසින් යවන ලද නම් මේ වසරේදීත් පත්කිරීමට හැකියාවක් නැති අතර ඊට හේතුව ජනාධිපතිවරයා තායිලන්තයේ පෞද්ගලික සංචාරයක නිරතවීමයි.■

මඩකළපුවේ වව්නතිව් ප්‍රදේශයේදී පොලිස් නිලධාරින් දෙදෙනෙකු ඝාතනය කිරීමට එල්ටීටීඊ සංවිධානයේ සාමාජිකයන්ව සිටි පුද්ගලයන් දෙදෙනෙකු සම්බන්ධ යැයි මාධ්‍ය වාර්තා කළද, එම පුද්ගලයන් ඝාතනය සිදු කළ බවට ප්‍රමාණවත් සාක්ෂි ලැබී නැතැයි අපරාධ පරීක්ෂණ දෙපාර්තමේන්තු ආරංචි මාර්ග පවසයි.
අදාළ ඝාතන නොවැම්බර් 30 දින සිදු වූ අතර කිලිනොච්චිය ධර්මපුරම් ප්‍රදේශයේ පදිංචි අජන්තන් නැමැති අය සිද්ධිය වූ දිනයේම අත්අඩංගුවට ගෙන ඇත. එදිනම කිලිනොච්චි වට්ටකච්චි ප්‍රදේශයේ පදිංචි රාසනාගම් සර්වනන්දන් නැමැති පුද්ගලයා සොයා ඔහුගේ නිවසට පොලිසිය පැමිණ ඇතත් ඔහු නිවසේ සිට නැත. පසුව තමන් සොයා ආ කාරණය පිළිබඳව ඔහු විසින් පොලිස් ස්ථානයට ගොස් විමසීමක් කර ඇති අතර එම අවස්ථාවේදී ඔහු අත්අඩංගුවට ගෙන ඇති බව වාර්තා වේ.
අදාළ ඝාතනයට සම්බන්ධ යැයි සැක කරන මෝටර් සයිකල් දෙකක් පිළිබඳවද මේ වන විට පරීක්ෂණ ආරම්භ කර ඇත.
මේ පිළිබඳව අනිද්දා කළ විමසුමකදී පොලිස් මාධ්‍ය ප්‍රකාශක රුවන් ගුණසේකර ප්‍රකාශ කළේ අදාළ පුද්ගලයන් දෙදෙනා මෙම ඝාතනයට සම්බන්ධ දැයි සාක්ෂි තවමත් ලැබී නැති බවත් පරීක්ෂණ කටයුතු තවදුරටත් සිදු කරමින් පවතින බවත්ය.■

ලිට්රෝ ගෑස් සමාගමෙන් සහ සැලසිනේ ආයතනයෙන් තමාට මුදල් සහ වෙනත් අනුග‍්‍රහ ලබා දී ඇතැයි සිය කීර්තිනාමයට හානි වන ආකාරයට සාපරාධී ප්‍රකාශ කිරීම සම්බන්ධයෙන් පාර්ලිමේන්තු මන්ත්‍රී කාංචන විජේසේකර, පූජ්‍ය ඉත්තෑකන්දේ සද්ධාතිස්ස, පූජ්‍ය මාගල්කන්දේ සුදත්ත සහ ‘සති අග අරුණ’ පුවත්පතට එරෙහිව ගාමිණී වියන්ගෙ ාඩ මහතා විසින් එන්තරවාසි යවා ඇත.
මෙම අපහාසයට ඉහත සඳහන් පුද්ගලයන්ගෙන් රුපියල් මිලියන 500 බැඟින් වන්දි මුදලක් ඉල්ලා සිය නීතීඥයන් මාර්ගයෙන් ගාමිණී වියන්ගොඩ විසින් එන්තරවාසි යවා ඇත. එම මුදල සති දෙකක කාලයක් තුළ ලබා නොදුනහොත් එය අයකරගැනීම සඳහා අධිකරණය හමුවේ නඩු පවරන බව දැනුම් දී ඇත.
ආණ්ඩුවේ විවිධ ව්‍යාපෘති හරහා ද, වෙනත් රහස්‍ය ගිණුම් හරහා ද ගාමිණි වියන්ගොඩ මහතා විසින් මුදල් සහ වෙනත් ආධාර ලබා ඇති බවට අදාළ පාර්ශවයන් විසින්
මඩ
විවිධ අවස්ථාවලදී කරන ලද ප‍්‍රකාශයන් සම්පූර්ණයෙන් අසත්‍ය සහ පදනම් විරහිත වන බවත්, ද්වේෂ සහගත වන බවත්, යහපාලන ආණ්ඩුව යටතේ කිසිම ආයතනයකින් කිසිදු ආකාරයක හෝ මූල්‍යමය හෝ මූල්‍යමය නොවන කිසිදු ගෙවීමක් හෝ අනුග‍්‍රහයක්, සෘජුව හෝ වක්‍්‍රාකාරයෙන් තමා කිසිදු ආකාරයකින් ලබාගෙන නැති බවත් ගාමිණී වියන්ගොඩ මහතා එම එන්තරවාසිය මඟින් අවධාරණය කර ඇත.■

හංසි මානවඩු

ශ්‍රී ලංකා රූපවාහිනී සංස්ථාව විසින් සුනාමියෙන් හානිවූවන්ට සහන සැලසීම සඳහා ආරම්භ කර තිබූ සුනාමි අරමුදලේ රුපියල් මිලියන ගණනක මුදල් එම අරමුදලේ අරමුණුවලට පැටහැණීව විවිධ කටයුතු වෙනුවෙන් වියදම් කර අවභාවිත කර ඇතැයි රූපවාහිනී සංස්ථා ආරංචි මාර්ග ප්‍රකාශ කරයි.
එම අරමුදලෙන් ඩලස් අලහප්පෙරුම අමාත්‍යවරයා ආරම්භ කර තිබු උතුරු දුම්රිය ව්‍යාපාතියට රුපියල් මිලියන 40ක පමණ මුදලක්ද, කැලණිය විශ්වවිද්‍යාලයේ දෘශ්‍ය කලා පීඨයට හා චිත්‍රපට අධ්‍යක්ෂක බූඩී කිර්ති සේන මහතාට තවත් මිිලියන ගණනක මුදලක් ලබාදී ඇති බවත් එම ආරංචිමාර්ග ප්‍රකාශ කරයි.
රූපවාහිනී සංස්ථාවේ සේවය කළ සේවකයන් පිරිසක් ද සුනාමි ව්‍යසනයෙන් අවතැන්ව ඇතත් එම සේවකයන්ට හෝ අදාල අරමුදලෙන් කිසිදු ආධාරයක් කර එසමයෙහි ලබා දී නැත.
අදාල අරමුදලට සිදු වුයේ කුමක් දැයි රූපවාහිනී සංස්ථාවේ ගිණුම් අංශයෙන් අනිද්දා කළ විමසීමකදී එහි නිලධාරියෙකු පැවසුවේ තුන්වන පාර්ශ්වයකට අදාළ තොරතුරු ලබා දිය නොහැකි බවත් ලිඛිතව ඉල්ලු‍ම් කරන ලෙසත්ය.■

උතුරේ හට ගත් ගංවතුර තත්වයෙන් අවතැන්ව සිටින කිලිනොච්චි දිස්ත්‍රික්කයේ එක් පුද්ගලයෙකුට එක් දිනයක් සඳහා ආපදා කළමනාකරණ මධ්‍යස්ථානය විසින් වෙන් කර ඇති මුදල රුපියල් 65 ක් වන අතර මුලතිව් දිස්ත්‍රික්කයේ එක් පුද්ගලයෙකුට දිනක් සඳහා වෙන්කර ඇති මුදල රුපියල් 138 කි.
දෙසැම්බර් 21 වන දින ආරම්භ වූ අදාළ ගංවතුර තත්ත්වය දින හතක් පැවතුණ අතර මේ වන විට කිලිනොච්චිය දිස්ත්‍රික්කයේ පුද්ගලයන් 54688ක් අවතැන් වී ඇත. දෙසැම්බර් 27 වන දින වනවිට අදාළ පුද්ගලයන්ට ආපදා කළමනාකරණ මධ්‍යස්ථානය විසින් වෙන් කර ඇති මුදල රුපියල් මිලියන 25කි.
මුලතිව් දිස්ත්‍රික්කයේ පුද්ගලයන් 26815ක් අවතැන් වී සිටින අතර දෙසැම්බර් 21 වන දින සිට 27 දක්වා කාලය තුල අදාළ පුද්ගලයන්ට ආපදා කළමනාකරණ මධ්‍යස්ථානය විසින් වෙන් කර ඇති මුදල රුපියල් මිලියන 26කි.
මේ පිළිබඳව විමසුමකදී ජාතික ආපදා කළමනාකරණ මධ්‍යස්ථානයේ අධ්‍යක්ෂ ජෙනරාල් එස්. අමලනාදන් පවසා සිටියේ මුලතිව් සහ කිලිනොච්චි යන දිස්ත්‍රික්කවලට අදාල මුදල් ලබා දී ඇති බවත් සෞඛ්‍ය අමාත්‍යංශයෙන් අදාළ ප්‍රදේශවල ළිං පිරිසිදු කිරිම් සහ ජලය සපයා දීම් ආරම්භ කර ඇති බවත් නිවාස අමාත්‍යවරයා විසින් නිවාස හානිවූවන්ට රුපියල් 10,000 චෙක්පත් ලබා දී ඇති බවත් ගංවතුරෙන් උතුරේ අනෙක් දිස්ත්‍රික්කවලට සුළු හානී වීම් සිදු වී ඇති බවත්ය.■

කඩුගන්නාව මාවනැල්ල, පේරාදෙණිය යන ප්‍රදේශවල බුද්ධ ප්‍රතිමාවලට හානි කිරිමේ සිදුවීම් අන්තවාදී කැළඹීම් දක්වා වර්ධනය කිරීමේ උත්සාහයක් බව පොලිස් ආරංචි මාර්ග ප්‍රකාශ කරයි.
දිවයින ඇතුළු පුවත්පත් කිහිපයක්ද, ජාතිකවාදී දේශපාලන පක්ෂ හා සංවිධානවල සාමාජිකයන්ද, වෙබ් අඩවි කිහිපයක්ද මෙම සිදුවීම් පිළිබඳව පුවත් පළ කර තිබුණි. එම පුවත්වල බුදුපිළිම කැඩීමට සම්බන්ධයැයි කියන පුද්ගලයන් අන්‍යාගමිකයන් බව ඉස්මතු කර තිබුණි. ඊට අමතරව හෙළ බොදු සවිය නම් සංවිධානයක් විසින් ජනාධිපතිවරයාට ලිපියක් යවා තිබුණු අතර එම ලිපියෙන්ද බුදුපිළිම කැඩීමට මුස්ලිම් ජාතිකයන් සම්බන්ධ බව සඳහන් කර තිබේ. එසේ වුවද එම සිදුවීම් සම්බන්ධයෙන් අත්අඩංගුවට ගෙන ඇති සියලු පුද්ගලයන් මුස්ලිම් ජාතිකයන් නොවන බව පොලිස් ආරංචි මාර්ග පවසයි.
මීට අමතරව සමාජ මාධ්‍ය හරහාද ජාතිකවාදී ක්‍රියාකාරිකයන් පිරිසක් විසින් බුදුපිළිම කැඩීමට එරෙහිව අදහස් දක්වා තිබුණු අතර එය ජාතිවාදී සිදුවීමක් ලෙස අර්ථකථනය කර තිබුණි.
දෙසැම්බර් 26 වන දින අලු‍යම මාවනැල්ල පොලිස් වසමට අයත් මාලිම්බඩ ප්‍රදේශයේ බුදු පිළිමයකට හානි සිදු කළා යැයි සැක පිට පුද්ගලයන් 4ක් අත්අඩංගුවට ගෙන ඇති අතර මේ වන විට අදාළ පරීක්ෂණ කටයුතු අපරාධ පරීක්ෂණ දෙපාර්තමේන්තුව වෙත භාර දී ඇත.
මේ පිළිබඳ අනිද්දා කළ විමසීමකදි පොලිස් මාධ්‍ය ප්‍රකාශක රුවන් ගුණසේකර ප්‍රකාශ කළේ අදාළ පරීක්ෂණ කටයුතු මේ වන විට ආරම්භ කර ඇති බවයි.■

ජනාධිපති මෛත්‍රීපාල සිරිසේන විසින් තමාට අයත් නොවන ආයතන ළඟ තබාගැනීමට එරෙහිව හා ඔහු විසින් ව්‍යවස්ථාව උල්ලංඝනය කර ජනාධිපති ධුරය දැරීමට එරෙහිව මූලික අයිතිවාසිකම් පෙත්සම් දෙකක් ශ්‍රේෂ්ඨාධිකරණය ඉදිරියේ ගොනු කිරීමට එක්සත් ජාතික පෙරමුණට හිතවත් නීතිඥවරුන් කණ්ඩායමක් සූදානමින් සිටින බව එජාපෙ ආරංචි මාර්ග පවසයි.
ජනාධිපති සිරිසේන රාජ්‍ය මාධ්‍ය ආයතන කිහිපයක් හා පොලිස් දෙපාර්තමේන්තුව ඇතුළු ආයතන කිහිපයක් තමන්ගේ අමාත්‍යාංශ යටතේ තබාගනිමින් අමාත්‍ය මණ්ඩලයේ විෂය ක්ෂේත්‍ර පිළිබඳ ගැසට් පත්‍රය නිකුත් කිරීමට සූදානමින් සිටින බව වාර්තා වෙයි. ජනාධිපතිවරයාට ආණ්ඩුක්‍රම ව්‍යවස්ථාව අනුව ළඟ තබාගත හැක්කේ හැක්කේ පරිසර, මහවැලි හා රාජ්‍ය ආරක්ෂක යන විෂය ක්ෂේත්‍ර තුනට අයත් ආයතන පමණි. පළමු මූලික අයිතිවාසිකම් පෙත්සම ඉදිරිපත් කිරිමට සූදානමින් සිටින්නේ එම ක්‍රියාවට එරෙහිවය. ඊට අමතරව ජනාධිපති සිරිසේන විසින් ව්‍යවස්ථාව උල්ලංඝනය කර ඇතැයි ශ්‍රේෂ්ඨාධිකරණය විසින් තීන්දුවක් ලබාදී ඇති පසුබිමක, ජනාධිපතිවරයා තවදුරටත් ජනාධිපති ධුරය දැරීමට නුසුදුසු බව ප්‍රකාශ කරන ලෙස ඉල්ලමින් දෙවැනි පෙත්සම ඉදිරිපත් කිරීමට නියමිතය.
මීට අමතරව එම නීතිඥවරුන් විසින් තොරතුරු දැනග ැනීමේ පනත යටතේ තොරතුරු ඉල්ලු‍ම්පත්‍රයක් යොමුකර ජනාධිපතිවරයාගේ වත්කම් පිළිබඳව තොරතුරු ලබාගැනීමටත්, ජනාධිපතිවරයා ඇතුළු ඔහුගේ පවුලේ සාමාජිකයන්ගේ වත්කම් පිළිබඳව රැස් කර ඇති තොරතුරු අල්ලස් හෝ දූෂණ චෝදනා විමර්ශන කොමිෂන් සභාව වෙත ඉදිරිපත් කර එම වත්කම් සොයාගත්තේ කෙසේද යන්න පිළිබඳව පරීක්ෂණයක් සිදු කරන ලෙස ඉල්ලීමටත් තීරණය කර ඇත.■

අනුරංග ජයසිංහ

පළාත් සභා හා පළාත් පාලන ආයතනවල මන්ත්‍රීවරුන් වන ශ්‍රී ලංකා නිදහස් පක්ෂයේ ආසන සංවිධායකවරුන් 45 දෙනෙකු පමණ එක්සත් ජාතික පෙරමුණ සමඟ එක්වීම පිළිබඳව සාකච්ඡා කර ඇතැයි වාර්තා වෙයි.
එම ආසන සංවිධායකවරුන් අතරින් 15 දෙනෙකු පමණ අමාත්‍ය රාජිත සේනාරත්නව මුණගැසී දෙසැම්බර් 26 වැනිදා සාකච්ඡාවක් පවත්වා ඇති අතර, එහිදී ආසන සංවිධායකවරුන් 45 දෙනෙකු ශ්‍රීලනිපයෙන් ඉවත්ව එජාපෙ සමඟ එක්වෙන බව පවසා ඇත. මීට අමතරව ශ්‍රීලනිපයේ වෘත්තීය සමිතිවල සාමාජිකයන් හා ශ්‍රීලනිප භික්ෂු පෙරමුණේ සාමාජිකයන් පිරිසක්ද එක්සත් ජාතික පෙරමුණ සමඟ එක්වීමට සාකච්ඡා කර ඇත.
දෙසැම්බර් 24 වැනිදා පවත්වා තිබුණු ශ්‍රීලනිප ආසන සංවිධායකවරුන්ගේ රැස්වීමේදී ශ්‍රීලනිපය මේ වනවිට කටයුතු කරන ආකාරය පිළිබඳව එම ආසන සංවිධායකවරුන් විසින් දැඩි විරෝධය පළ කර තිබුණි. එම රැස්වීම විශාල මතභේද හා ගැටුම්කාරී තත්ත්වයක් සමග අවසාන වී තිබුණි. එම රැස්වීම අවසානයේදී මාධ්‍ය වෙත අදහස් දැක්වූ අවස්ථාවේ ආසන සංවිධායකවරුන් අතරද මත ගැටුම් ඇතිවී තිබේ.■

කුරුණෑගල දිස්ත්‍රික් පාර්ලිමේන්තු මන්ත්‍රී මහින්ද රාජක්ෂ ඇතුළු පිරිසක් විසින් ශ්‍රී ලංකා පොදුජන පෙරමුණේ සාමාජිකත්වය ගැනීම මඟින් ඔවුන්ට මන්ත්‍රීධුර දැරීමට නීත්‍යනුකූල හැකියාවක් නැති බවට ක්වෝ වොරොන්ටෝ ආඥාවක් නිකුත් කරන ලෙස ඉල්ලා ශ්‍රීලනිප පාර්ලිමේන්තු මන්ත්‍රීවරුන් පිරිසක් අභියාචනාධිකරණයේ පෙත්සමක් ගොනු කිරීමට සූදානමින් සිටින බව වාර්තා වෙයි.
එය ශ්‍රීලනිපය විසින් පක්ෂයක් ලෙස ගත් තීරණයක් නොවන බවත් පක්ෂයේ මන්ත්‍රීවරුන් පිරිසක් විසින් ගත් තීන්දුවක් බවත් වාර්තාවන අතර එම මන්ත්‍රීවරුන් විසින් ඒ සම්බන්ධයෙන් නීති ප්‍රවීණයන් කිහිපදෙනෙකුගෙන් උපදෙස් ලබාගෙන ඇත.
ශ්‍රීලනිප මධ්‍යම කාරක සභාව විසින් ශ්‍රීලනිපයෙන් වෙන්වූ පාර්ලිමේන්තු මන්ත්‍රීවරුන් ඇතුළු මහජන නියෝජතයන් පිළිබඳව විනය පියවර ගත යුතුයැයි තීන්දුවක් ගෙන ඇතත්, විනය පියවර ගැනීමේ ක්‍රියාවලිය හා නිශ්චිතව කුමන් පුද්ගලයන්ට එරෙහි විනය පියවර ගන්නේද යන්න පිළිබඳව තවමත් තීන්දුවක් ගෙන නැතැයි අනිද්දා කළ විමසීමකදී ශ්‍රීලනිප මධ්‍යම කාරක සභිකයෙක් පැවසීය. මීළඟ මධ්‍යම කාරක සභාවේදී ඒ පිළිබඳව තීන්දු කළ යුතු බවද ඔහු කීය.
බොහෝවිට ශ්‍රී ලංකා පොදුජන පෙරමුණට ගිය කණ්ඩායමට එරෙහිව තීන්දුවක් නොගෙන, ආණ්ඩුව සමඟ එක්වූ ශ්‍රීලනිප මන්ත්‍රීවරුන්ට එරෙහිව පමණක් විනය පියවර ගනු ඇතැයි එම මධ්‍යම කාරක සභිකයා කීය.
ජනාධිපති මෛත්‍රීපාල සිරිසේන මහින්ද රාජපක්ෂ ඇතුළු පිරිස ආරක්ෂා කිරීමේ ප්‍රතිපත්තියක සිටින බවත්, ඒ නිසා රාජපක්ෂ ඇතුළු කණ්ඩායමේ මන්ත්‍රීධුර අහෝසි කිරීමට නම් අධිකරණයට යෑමට සිදුවනු ඇති බවත් ක්වෝ වොරොන්ටෝ ආඥාව ඉල්ලීමට බලාපොරොත්තුවන මන්ත්‍රී කණ්ඩායමේ මතය වී ඇත.