මේ වන තෙක් කිසිම සාක්කියක් හමුවී නැහැ
දූරකථන සංවාද 531කත් කිසිම තොරතුරක් නැහැ

දූෂණ විරෝධී බලකායේ මෙහෙයුම් අධ්‍යක්ෂ යැ’යි කියන නාමල් කුමාර යුද හමුදා පුහුණුවෙන් පලා ගිය පුද්ගලයකු බවට ජනවාරි 2 වැනිදා කොටුව මහේස්ත්‍රාත් අධිකරණයේදී කරුණු හෙළිදරව් විය. එපමණක් නොවේ, ඔහු යුද හමුදාවේ සහ ගුවන් හමුදාවේ සේවයට බැඳීම සඳහා ව්‍යාජ අධ්‍යාපන සහතික ඉදිරිපත් කර ඇති බවත් අපරාධ පරීක්‍ෂණ දෙපාර්තමේන්තුව හෙවත් සීඅයිඩීය අධිකරණයට දැනුම් දුන්නේය.
2002 සාමාන්‍ය පෙළ විභාගයේදී අධිසම්මාන 2ක් සහ සම්මාන 3ක් සහිතව විෂයන් 10ම සමත් වූ බවට යුද හමුදාවට සහ ශ්‍රී ලංකා ගුවන් හමුදාවට නාමල් කුමාර ඉදිරිපත් කළ අධ්‍යාපන සහතික අනුව පෙනීගොස් තිබුණත්, ඒවා සම්බන්ධයෙන් සිදුකළ විමර්ශනවලදී තහවුරු වී ඇත්තේ ඔහු සාමාන්‍ය පෙළ විභාගයේ සමත්වී ඇත්තේ විෂයයන් 3ක් පමණක් බවයි. ව්‍යාජ අධ්‍යාපන සහතික ගුවන් හමුදාවට සහ යුද හමුදාවට ඉදිරිපත් කිරීම සහ ගුවන් හමුදාවෙන් හා යුද හමුදාවෙන් පැනයාම ගැන නාමල් කුමාරට එරෙහිව නීතිමය පියවර ගැනීමට සීඅයිඩීය අපේක්‍ෂා කරන බවද අධිකරණයට දැනුම් දුන්නේය.

කුමන්ත්‍රණය බොරුවක්
අරුම පුදුම ලෙස මාධ්‍ය ඉස්මත්තට ආ නාමල් කුමාර පසු ගිය කාලයේ කී ආකාරයට, ජනාධිපති මෛත්‍රීපාල සිරිසේන හා ගෝඨාභය රාජපක්‍ෂ ඝාතනය කිරීමට කුමන්ත්‍රණයක් තිබුණියැයි කියන කතාව සම්පූර්ණ බොරුවක් නැතිනම් ප්‍රබන්ධයක් බවට දැන් කරුණු හෙළිවෙමින් තිබේ. වෙනත් විදියකින් කිවහොත්, මෛත්‍රීපාල සිරිසේන හා ගෝඨාභය රාජපක්‍ෂ ඝාතනය කිරීමේ කුමන්ත්‍රණයක් ගැන තහවුරු වන කිසිම තොරතුරක් සොයාගන්නට ඒ පිළිබඳ පරීක්‍ෂණ පවත්වන අපරාධ පරීක්‍ෂණ දෙපාර්තමේන්තුව හෙවත් සීඅයිඩීයට මේ වන තෙක්ම නොහැකි වී තිබේ. ඒ නාමල් කුමාරගේ හෙළිදරව්වෙන් පසු මාස 4කුත් ගතවන්නට නියමිතව තිබියදීය.
නාමල් කුමාර මුලින්ම මහනුවරදී මාධ්‍ය හමුවක් පවත්වමින් ජනාධිපති සිරිසේන හා ගෝඨාභය රාජපක්‍ෂ ඝාතන කුමන්ත්‍රණයක් ගැන කියන්නේ 2018 සැප්තැම්බර් 12 වැනිදාය. පොලිස් ත්‍රස්ත විමර්ශන කොට්ඨාසයේ අධ්‍යක්ෂ නියෝජ්‍ය පොලිස්පති නාලක සිල්වා ගැන විශේෂ හෙළිදරව්වක් කිරීම සාකච්ඡාවේ අරමුණ විය. නාමල් කුමාර එහිදී චෝදනා කළේ, නියෝජ්‍ය පොලිස්පති නාලක සිල්වා වෙනත් පොලිස් නිලධාරීන්ට එරෙහිව කුමන්ත්‍රණකාරී වැඩපිළිවෙළක් ක්‍රියාත්මක කරන බවටය. ඔහු කිව්වේ, අගමැතිවරයාට ලකුණු වැටෙන විදියට යම් වැඩක් කිරීමට නියෝජ්‍ය පොලිස්පතිවරයා ඉල්ලීමක් කළ බවයි. එහිදී, පාතාල නායක මාකඳුරේ මදුෂ් මාර්ගයෙන් ජනාධිපතිවරයා හෝ ගෝඨාභය රාජපක්ෂ ඝාතනය කිරීමට නාලක සිල්වා සැලසුම් කර තිබූ බවද නාමල් සඳහන් කළේය. මාස දෙකකට ඉහතදී සිදුවුණු ඒ සාකච්ඡාව තමා හෙළිකරන්නේ ජාතික ආරක්ෂාව වෙනුවෙන් බවත් ඔහු කිව්වේය. එහෙත්, ජනාධිපති ඝාතනයට සම්බන්ධ සංවාද ඇතුළත් නිශ්චිත පටිගත කළ සංවාද කිසිවක් ඔහු එම මාධ්‍ය හමුවේදී ඉදිරිපත් කළේ නැත.
එහෙත් ඒකාබද්ධ විපක්‍ෂයට මෙය සිහිනෙන් ගෑ සුවඳක් බවට පත්විය. සැප්තැම්බර් 13 වැනිදාම, මාධ්‍ය හමුවක් කැඳවූ ඔවුහු, ජනපති හා ගෝඨාභය රාජපක්ෂ ඝාතන උත්සාහය ගැන නාමල් කුමාර කළ හෙළිදරව්ව පිළිබඳව විශේෂ පරීක්ෂණයක් පවත්වන මෙන් ඉල්ලුවෝය. එදිනම නාමල් කුමාරද ජාතික පොලිස් කොමිසමට මේ ගැන පැමිණිලි කර, තමා කරන චෝදනා ගැන විශේෂ විමර්ශනයක් කරන ලෙස ඉල්ලුවේය.
එහෙත්, නාමල් කුමාරගේ චෝදනා නියෝජ්‍ය පොලිස්පතිවරයා ප්‍රතික්ෂේප කර තිබූ අතර අදාළ පටිගත සංවාද ව්‍යාජ බව ඔහු පොලිස් ප්‍රධානීන්ට පවසා තිබුණි. පොලිස්පති පූජිත් ජයසුන්දර ඒ පිළිබඳ පරීක්ෂණ පවත්වන මෙන් සැප්තැම්බර් 13දාම පොලිස් විශේෂ විමර්ශන ඒකකයට නියෝග කළත්, ජනාධිපතිවරයාගේ නියෝගයක් මත පරීක්ෂණය ඊට පසුදා සීඅයිඩීයට භාරදෙන ලදි.
14වැනිදා උදේ මාධ්‍ය ප්‍රධානින්ගේ හමුවක් කැඳවූ ජනාධිපතිවරයා, ‘‍අද හෙට සීඅයිඩීය ඒ ගැන මූලික වාර්තාවක් හදලා, පරීක්ෂණය කරනු ඇති බව’ කීවේය. සීඅයිඩීය 14වැනිදා රාත්‍රියේම නාමල් කුමාරගේ නිවසට ගොස් ඔහුගෙන් පසුදින පාන්දර වනතුරු ප්‍රකාශයක් සටහන් කරගත්තේය. ඉන් අනතුරුව ඔහුගේ ජංගම දූරකථනය භාර දෙන මෙන් කළ ඉල්ලීමට ප්‍රතිචාර වශයෙන් සැප්තැම්බර් 17 උදේ ඔහු පොලිසියට පැමිණ තිබේ. පරීක්ෂණය පැවැත්වෙන තෙක් නාලක සිල්වා පොලිස් තාක්ෂණ අංශයට මාරුකරන ලදි.
මේ විදියට පටන්ගත් නාමල් කුමාරගේ විකට නාට්‍යය වරින්වර විවිධාකාර ජවනිකා හරහා ඇදී ගියේය.
නාමල් කුමාර කිව්වේ, නි. පොලිස්පති නාලක සිල්වා ජනාධිපති සිරිසේනත්, ගෝඨාභය රාජපක්‍ෂත් ඝාතනය කිරීමේ කුමන්ත්‍රණයේ ඉන්නා බවය. ජනාධිපති සිරිසේන ඝාතනය කර රනිල් වික්‍රමසිංහ ජනාධිපති වුණොත්, තමාට පොලිස්පති වියහැකියැ’යි නාලක සිල්වා කියූ බවටද නාමල් කුමාර මාධ්‍ය හමුවලදී කිව්වේය. ඒ අනුව, කතාවක් ගොතන ලදි. ‘නාලක සිල්වා ජනාධිපති ඝාතනය කරයි. ඉන්පසු රනිල් අගමැතිවී නාලක සිල්වා පොලිස්පති වන්නේ නම්, මේ කුමන්ත්‍රණය පිටුපස සිටින්නේ රනිල් වික්‍රමසිංහය. ඒ ඔහුට ජනාධිපති වීමට අවශ්‍ය නිසාය.’

සීඅයිඩීයෙන් පරීක්‍ෂණ
කොහොම වුණත්, සීඅයිඩීය මේ මහා ජනාධිපති ඝාතන කුමන්ත්‍රණය ගැන පරීක්‍ෂණ ආරම්භ කළේය. නාමල් කුමාරගේ දූරකථනයෙන් පටිගත කරන ලද දෙබස් සීඅයිඩීය භාරයට ගන්නා ලදි.
ඒ දූරකථන සංවාදවලට නැවතත් කන් දුන් සීඅයිඩීයට පෙනීගියේ, ඒ කිසිම දූරකථන සංවාදයක ජනාධිපති හෝ ගෝඨාභය රාජපක්‍ෂ ඝාතනයක් ගැන වචනයකින්වත් සඳහනක් නොවන බවයි.
මේ නිසා, ජනාධිපති ඝාතන තැතක් ගැන නාලක සිල්වා අත්අඩංගුවට ගැනීමට කිසිම හේතුවක් සීඅයිඩීයට නොවීය. තත්ත්වය මෙසේ තිබියදී, නාලක සිල්වා අත්අඩංගුවට ගැනීමට ප්‍රමාද වන බව පවසමින් ඒ වන විටත් ‘දිවයින,’ ‘මව්බිම’ ඇතුළු ජාතිවාදී හා රාජපක්‍ෂවාදී පත්තර ඇතුළු මාධ්‍ය මහා කලබැගෑනියක් කළෝය. රාජපක්‍ෂ බල කඳවුරද හැකි සෑම අවස්ථාවකම මේ කුමන්ත්‍රණ කතාවට හුළං පිම්බේය. ජනාධිපතිවරයා ඝාතනය කිරීමට කුමන්ත්‍රණයක් තිබුණු බව හෙළිවී තිබෙද්දීත්, රනිල් වික්‍රමසිංහගේ ආණ්ඩුවේ පොලිසිය භාර ඇමති නිසි උද්යෝගයකින් ඒ විමර්ශන නොකරන බව ඔවුහු නිතර දෙවේලේ මතුළෝය. ඔවුන්ගේ අරමුණ පැහැදිලිය. ‘රටේ අගමැතිවරයා, ජනාධිපතිවරයා ඝාතනය කිරීමේ කුමන්ත්‍රණයක යෙදී සිටියාය යන්න ඉස්මතු කිරීමෙන්, සභාග රජයේ නායකයන් දෙදෙනා අතර දැනටමත් ඇති විරසකය වර්ධනයවී ආණ්ඩුව අනතුරේ වැටෙනු ඇත.’ ඒ ගණන් බැලීම සියයට සියයක්ම නිවැරදි විය. ජනාධිපති සිරිසේන ඒ ලණුවත් කෑවේය. ඒ අනුව තමා මරා දමන්නට යූඑන්පීය කුමන්ත්‍රණය කරන බවට ජනාධිපතිවරයා නිතර දෙවේලේ හිතන්නට ඇත.

රනිල් එයිද?
ඝාතන කුමන්ත්‍රණය ගැන සිතමින් මරණ බියෙන් ඔද්දල් වුණු සිතින් දවස් ගෙවන ජනාධිපතිවරයාට, ආණ්ඩුක්‍රම ව්‍යවස්ථාවේ තිබෙන ප්‍රතිපාදනද සිහිවන්නට ඇත. ව්‍යවස්ථාවේ අනුව, තමා මළහොත්, ඊළඟට අනුප්‍රාප්තික ජනාධිපතිවරයා තෝරාගන්නේ පාර්ලිමේන්තුවෙනි. අනිවාර්යයෙන්ම එවිට පාර්ලිමේන්තුවේ වැඩි බලයක් ඇති රනිල් වික්‍රමසිංහ අනුප්‍රාප්තික ජනාධිපති (ඔහුට ධුරය දැරිය හැක්කේ මියගිය ජනාධිපතිවරයාගේ ධුර කාලයෙන් ඉතිරි වී ඇති කොටස සඳහා පමණි.) හැටියට අනිවාර්යයෙන්ම පත්වනු ඇත. මේ බියකරු සිහිනය අවසන් වුණේ දින 51ක අඳුරු කාලයකට රට හෙළුෑ දුෂ්ට නායකයා බවට ජනාධිපති සිරිසේන පත්වීමෙනි.

නාලක අත්අඩංගුවේ ඉන්නේ
මෛත්‍රී ඝාතනය ගැන නොවේ
එහෙත්, වෙනෙකකු ඝාතනය කළ යුතු යැ’යි කියා නම්, නාමල් කුමාරගේ දූරකථන සංවාදවල සඳහන් විය. ඒ අනුව, නාලක සිල්වා අත්අඩංගුවට ගන්නා ලදි. හැබැයි, ඒ මෛත්‍රීපාල සිරිසේන හා ගෝඨාභය රාජපක්‍ෂ ඝාතනය කරන්නට කුමන්ත්‍රණය කළාය යන තොරතුරු මත නොවේ. ජ්‍යෙෂ්ඨ පොලිස් අධිකාරි ප්‍රසන්න අල්විස් ඝාතනය කරන්නට කුමන්ත්‍රණය කළේය යන චෝදනාවටයි.
ඒ අනුව, නාලක සිල්වා අත්අඩංගුවේ සිටින්නේ ජනාධිපති සිරිසේන හෝ ගෝඨාභය රාජපක්‍ෂ ඝාතනය කිරීමට කළ කුමන්ත්‍රණයක් නිසා නොවේ. මේ ඇත්ත බොහෝ මාධ්‍යවලින් මහජනතාවට වුවමනාවෙන්ම වසං කරනු ලැබේ. ජනවාරි 2වැනිදා මේ නඩුව කැඳවූ අවස්ථාව ගැන මාධ්‍ය ආයතනවලින් එවන එස්එම්එස් ඇලර්ට්වල පවා තිබෙන්නේ, ‘වීඅයිපී ඝාතනයක් ගැන රිමාන්ඞ් බාරයේ සිටින නාලක සිල්වා’ කෙනකු ගැනය. මේ සැලසුම් සහගත මාධ්‍ය මෙහෙයුම් නිසා, මහජනතාව සිතාගෙන සිටින්නේ, නාලක සිල්වා ජනාධිපති ඝාතනය කරන්නට තැත් කළ නිසා රිමාන්ඞ් බන්ධනාගාරයේ සිටින බවය. එය අමූලික බොරුවකි. බල ලෝභය සඳහා හොඳින් නඩත්තු කරන ව්‍යාජ ප්‍රවාදයකි.
ප්‍රසන්න අල්විස් ඝාතනය කරන්නට නාලක සිල්වා කුමන්ත්‍රණය කළේ ඇයිදැයි යන්නට පිළිතුරක් තිබේ. නාලක සිල්වා විදේශයකින් ලබාගත් උපාධියක් මත පොලිසියේ තනතුරු ලබාගෙන තිබේ. ප්‍රසන්න අල්විස් පසුගිය කාලයේ, මේ උපාධිය නීත්‍යනුකූල එකක් නොවන බව හෙවත් හොර එකක් බව පොලිසියේ අදාළ බලධාරීන්ට පැමිණිලි කළේය. මේ නිසා, අනාගතයේ පොලිසියේ ඉහළට යෑමේ, හෙවත් අනාගත පොලිස්පති වීමේ නාලක සිල්වාගේ සිහිනය බිඳවැටෙන්නට ඇත. මේ පොලිසියේ උසස්වීම් සඳහා තිබෙන මීපොරයේ එක් ප්‍රකාශනයකි. පොලිස් ආරංචි මාර්ග කියන විදියට, 2023 පමණ වන විට, පොලිස්පති තනතුර සඳහා සමාන සුදුසුකම් ඇති තරගකරුවෝ දහයක් දොළහක් සිටිති. මේ සියල්ලන්ටම අවශ්‍ය පොලිස්පති වන්නටය. ඒ නිසා ලජ්ජා සහගත නමුත් බිහිසුණු තරගයක් පොලිසියේ ඉහළ නිලධාරීන් අතර ඇතිවී තිබේ. නාලක සිල්වාද ඒ තරගයේ තරගකරුවෙකි.

දෙබස් පුනරුත්පාදනය කිරීම
කොහොම වුණත්, තමාගේ දූරකථනයේ ඇති ඉතිරි දෙබස් මකා දැමූ බව නාමල් කුමාර කීවේය. මේ නිසා සීඅයිඩීය කළේ අධිකරණ නියෝගයක් ලබාගෙන ඒ දූරකථනයේ මකා දමා ඇති දෙබස් පුනර්-උත්පාදනය කිරීමට පියවර ගැනීමයි. රජයේ රස පරීක්‍ෂක දෙපාර්තමේන්තුව ඒ කාර්යය ඉටුකිරීමට තමන්ට බැරි බව කීවේය. සීඅයිඩීය සතුව එවැනි මකා දමන ලද තොරතුරු නැවතත් පුනරුත්පාදනය කිරීමේ උපකරණ තිබේ. එහෙත්, එය කළේ නම්, දැනටමත් නාමල් කුමාරද ඇතුළු ජනාධිපතිවරයාගේ පාර්ශ්වයෙන් බොරු චෝදනා එල්ලවී ඇති පරිදි සීඅයිඩීය පක්‍ෂපාතීව කටයුතු කළා යැයි කිසිවකු කියන්නට ඉඩ තිබේ. ඒ නිසා, සීඅයිඩීය කළේ හොංකොංහි ඬේටා ටෙක්නොලොජි පරීක්‍ෂණා ගාරයට මේ දූරකථනය ඉදිරිපත් කිරීමයි. එම පරීක්‍ෂණා ගාරයට, එහි මහාචාර්යවරුන්ට, මේ දූරකථනයෙන් මකා ඇති දෙබස් පුනරුත්පාදනය කරන්නට පැයක්වත් ගත නොවීය. එහිදී එලෙස යළි ලබාගත් මුළු සංවාද ගණන 531කි. පුනරුත්පාදනය කිරීමේදී ක්‍රියාත්මක දූරකථන සංවාද 427ක්, වීඩියෝ දර්ශන 26ක් සහ ඡායාරූප 4321ක් පටිගත වී ඇති බව දැනගන්නට ලැබිණ. අදාළ සංවාද පෙන්ඩ්‍රයිව් එකකට ලබාගත් සීඅයිඩී නිලධාරීහු දෙසැම්බර් 16 වැනිදා ලංකාවට ආහ.
දැන් ඒවා සීඅයිඩී නිලධාරීන් කිහිප දෙනකු විසින් කිහිප වරක්ම අසා තිබේ. එක් නිලධාරියකුට පමණක් එය නොපවරා කිහිප දෙනකුට පවරා ඇත්තේ දෙබස්වල නිවැරදිභාවය සහතික කරගනු පිණිසය.

ජනාධිපති ඝාතන කුමන්ත්‍රණයක් නෑ
එහෙත්, ඒ 531ක් වූ දෙබස්වලින් එළිදරව් වුණු ඇත්ත කුමක්ද? ඒ කිසිම දෙබසක, ජනාධිපති සිරිසේනවත් ගෝඨාභය රාජපක්‍ෂවත් මරන්නට කතාකරන එක වචනයක්වත් අඩංගු නැති බවයි. ඒ නිසා දැන්, සිරිසේන ජනාධිපතිවරයා හා රාජපක්‍ෂ මහතා ඝාතනය කරන්නට තිබුණු කුමන්ත්‍රණය කිසිවකු හෝ කිහිප දෙනකු විසින් සම්පූර්ණයෙන්ම අතේ පැළකළ බොරුවක් බව සහතික වී තිබේ.

ලෆීර් ඝාතනයට කුමන්ත්‍රණයක්
එහෙත්, ඒ සංවාදවල තවත් ඝාතන කුමන්ත්‍රණයක් ගැන සඳහන්වී තිබේ. එනම් පොලිස් විශේෂ කාර්ය බලකායේ අණදෙන නිලධාරී නියෝජ්‍ය පොලිස්පති එම් ආර් ලතීෆ් ඝාතනය කිරීමට නාමල් කුමාර අදහස් කරන බව ඒ සංවාදවල පටිගත වී තිබේ. මේ නිසා දැන් නාමල් කුමාරද ඉන්නේ නාලක සිල්වා සිටි තත්ත්වයේමය. එනම් පොලිස් ප්‍රධානියකු ඝාතනය කිරීමට කුමන්ත්‍රණය කිරීමේ චෝදනාවට ලක්වීය. ප්‍රසන්න අල්විස් ඝාතනයට කුමන්ත්‍රණය කිරීමේ චෝදනාවට නාලක සිල්වා රිමාන්ඞ් බන්ධනාගාරයේ සිටින විට, ලතීෆ් ඝාතනයට කුමන්ත්‍රණය කළ බවට තොරතුරු තිබෙන නාමල් කුමාරටද නීතිය එක සමාන ලෙස ක්‍රියාත්මක විය යුතු නොවේද?

නාමල් පරීක්‍ෂණවලට බාධකයක්
මේ සිදුවීම් පිළිබඳ විමර්ශන පවත්වන සීඅයිඩීයට, නාමල් කුමාර වරින් වර මාධ්‍ය ඉදිරියේ පෙනීසිටිමින් කරන ප්‍රකාශ බලවත් බාධාවක් වී තිබේ. තමා අත කිසිම සාක්‍ෂියක් නැති වුවත්, ඔහු වරින්වර මාධ්‍ය ඉදිරියේ පෙනීසිටිමින් ජනාධිපති ඝාතන කුමන්ත්‍රණයක් ගැන විවිධාකාර බොරු ප්‍රකාශ කරයි. එක් එක් පුද්ගලයන් ඊට සම්බන්ධ බවට නම් කරයි. ජනාධිපති ඝාතන කුමන්ත්‍රණයක් තිබුණාම යැ’යි රට තුළ මතයක් ඇතිකිරීම ඔහුගේ වුවමනාව බව ඉතා පැහැදිලිය. මේ හරහා ඔහු හදන්නේ, පොලිස් විමර්ශනවලට බාධා කිරීමටය. තමන්ගේ විමර්ශනවලින් කිසිදු ඝාතන කුමන්ත්‍රණයක් නැති බවට තහවුරු වුණත්, ඒ ගැන විවෘතව කියන්නට මේ සමාජ මතය නිසා පොලිස් නිලධාරීන් දෙවරක් සිතනු ඇතැ’යි නාමල් කුමාර කල්පනා කරනවා වන්නට පුළුවන. විමර්ශනවලට ඔහු බාධා වන්නේ ඒ ආකාරයෙනි. එසේ වුවද සිඅයිඩීය පසුගිය කාලය පුරාම ක්‍රියාකොට ඇත්තේ එවැනි බාධාවලින් කම්පනය වන ආකාරයෙන් නම් නොවේ.
එහෙත් ඔහුගේ මේ ක්‍රියාකලාපයට එරෙහිව පියවරක් ගැනීමට පොලිසියට හැකිය. අපරාධ නඩු විධාන සංග්‍රහයේ 124 වැනි වගන්තිය යටතේ, මහේස්ත්‍රාත්වරයකු වෙත ඉල්ලීමක් කිරීමෙන් එය කළ හැකිය. නිසි ආඥා කිරීමෙන් හා අධිකරණ නියෝග නිකුත් කිරීමෙන් විමර්ශනයක් පැවැත්වීම සඳහා අවශ්‍ය සහාය දීමට එම වගන්තියෙන් මහේස්ත්‍රාත්වරයකු බැඳී සිටියි. ඒ අනුව, මෙවැනි මාධ්‍ය හමු පවත්වමින්, පැමිණිලිකාරයාම විමර්ශනවලට කරන බාධා වළක්වා ගැනීමට, ඒවායින් වැළකී සිටින ලෙස නාමල්ට නියෝග කරන ලෙස ඉල්ලීමක් පොලිසිය විසින් කළ හැකිය.

නාමල් කුමාර පිටුපස කවුද?
වැදගත් ප්‍රශ්නය නාමල් කුමාර කාගේ නිර්මාණයක්ද යන්නයි. ඔහු පිටුපස ඇත්තටම සිටින්නේ කවුද යන්නයි. පිටුපස එවැන්නකු නැතිනම්, මෙවැනි තනි පුද්ගලයකුට මේ තරම් ඉක්මනින් රටේ මාධ්‍ය සියල්ලටම කතාකරමින් බොරුවක් වපුරන්නට හැකියාවක් නොලැබෙන්නේය. බැලූ බැල්මටම, කතාකරන හැසිරෙන විලාසයෙන් කිසිම විශ්වාසවන්තභාවයක් ප්‍රකට නොකරන මේ පුද්ගලයාට එක අවස්ථාවක පොලිසියේ නිලධාරින් දෙදෙනකුගේ ආරක්‍ෂාවද ලබාදී තිබිණ.
ඒ ගැන වැඩිදුර සිතන කෙනකුට අවශ්‍ය විය හැකි තොරතුරක් නාමල් කුමාරගෙන්ම හෙළිවී ඇත්තේය. එක් අවස්ථාවක ඔහු වෙනුවෙන් මහේස්ත්‍රාත් අධිකරණයේ පෙනීසිටින්නේ නීතිඥ මෛත්‍රී ගුණරත්නය. මෛත්‍රී ගුණරත්න වනාහි, එක්සත් ජාතික පක්‍ෂය තුළ හිඳිමින්, නායක රනිල් වික්‍රමසිංහට එරෙහිව කටයුතු කිරීම නිසා, පසුගිය කාලයේ ජනාධිපති සිරිසේනගේ සමීපතම හිතවතකු බවට පත්වන්නට හැකිවුණු පුද්ගලයෙකි. පසුගියදා ජනාධිපති සිරිසේන අලුතෙන් පත්කළ ජනාධිපති නීතිඥවරුන් 25 දෙනා අතර මෛත්‍රී ගුණරත්නද සිටින්නේය.

උපදෙස් නැතිව පෙනීසිටියි
නාමල් කුමාර සීඅයිඩීයට දුන් ප්‍රකාශයක සඳහන් වන්නේ, මෛත්‍රී ගුණරත්න තමා වෙනුවෙන් අධිකරණයේ පෙනී සිටියත්, ඔහුට එසේ පෙනී සිටින ලෙස තමා කිසි අවස්ථාවක කියා නැති බවයි. සාමාන්‍ය පිළිවෙත අනුව නීතිඥවරයකු කිසියම් අධිකරණයක පෙනීසිටින්නේ සේවාදායකයකුගේ ඉල්ලීම මත පමණි. එසේ නොවන විට සේවාදායකයකු වෙනුවෙන් පෙනීසිටීම නීතිඥ වෘත්තියේ ආචාරධර්ම කඩකිරීමකි. ඒ ගැන පැමිණිල්ලක් ශේෂ්ඨාධිකරණයට ලැබුණහොත්, අදාළ නීතිඥවරයාට විරුද්ධව විනය ක්‍රියාමාර්ග ගැනීමට ශ්‍රේෂ්ඨාධිකරණයට බලය තිබේ.
මෑත අවස්ථාවකදී, අජිත් ප්‍රසන්න නමැති නීතිඥවරයා අධිකරණය ඉදිරියේ සිටින විවිධ විත්තිකරුවන් වෙනුවෙන්, ඔවුන්ගේ උපදෙස් නැතිව ඉදිරිපත්වීම, අධිකරණයේ දැඩි විවේචනයට බඳුන් වුණු අතර ඔහු සම්බන්ධයෙන් විනය ක්‍රියාමාර්ග ගන්නා බවටද අධිකරණය ඔහුට අවවාද කරන ලදි.
කොහොම වුණත්, මෛත්‍රී ගුණරත්න නීතිඥවරයා තමා වෙනුවෙන් පෙනීසිටියේ තමාගේ ඉල්ලීම මත නොවන බව නාමල් කුමාර කියන විට එය නොසලකා හළ හැකි කරුණක් නොවේ.

පරණ උදාහරණ
මේ හා සමාන තවත් අවස්ථාවක් අපට මතකයට නගාගත හැකිය. උඩුවේ ධම්මාලෝක භික්‍ෂුව අලි පැටියකු හොරකම් කිරීම සම්බන්ධයෙන් රිමාන්ඞ් බන්ධනාගාරගතව දින කිහිපයක් ගත කළේය. 2016 මාර්තු 11 වැනිදා, ඔහු උසාවියට ගෙන ආ විටෙක, ඔහු වෙනුවෙන් නීතිඥවරයකු ඉදිරිපත්වී ඇප ඉල්ලා සිටියේය. අධිකරණයෙන් ඇප ලැබුණි. අධිකරණයෙන් එළියට ආ උඩුවේ ධම්මාලෝක භික්‍ෂුව කිව්වේ, තමා වෙනුවෙන් ඇප ඉල්ලන්නට කිසිම නීතිඥවරයකුට තමා උපදෙස් නොදුන් බවය. එහි තේරුම, මේ භික්‍ෂුව වෙනුවෙන් බලහත්කාරයෙන් නීතිඥවරුන් ඉදිරිපත්වී ඇප ඉල්ලීම කළ බවය. ඒ නීතිඥවරුන් සම්බන්ධීකරණය කළේ, අසාද් සාලිය. ඔහුට එසේ කරන්නට යැයි නියම කර තිබුණේ ජනාධිපති මෛත්‍රීපාල සිරිසේනය. ඒ සිදුවීම හා මේ සිදුවීම අතර කිසියම් සමානකමක් මේ කියවන කාටත් පැහැදිලි වනවා ඇත. ඒ අනුව බලන විට, නාමල් කුමාර නටවන නූල්වල කොන් තිබෙනු ඇත්තේ කොයි පැත්තේද?
2003 මාර්තු 20 වැනිදා අමෙරිකානු ජනාධිපති ජෝර්ජ් බුෂ් ඉරාකය ආක්‍රමණය කළේ ගල් පැලෙන බොරුවක් ඉරාකයට එරෙහිව නිර්මාණය කරමිනි. එනම්, මානව සංහතිය විනාශ කිරීමට සමත් භයානක ආයුධ සදාම් හුසේන් ඉරාකය තුළ නිපදවා ඇතිය යන්නයි. අවුරුදු 15ක් ගත වන විට බුෂ්ගේ ඒ භයානක බොරුව හෙළිදරව්වී බොහෝ කල් ද ගතවී තිබේ. එහෙත්, ඒ ආක්‍රමණය නිසා ඉරාකය අදත් මරණයේ, ඝාතනයේ හා විනාශයේ බිමකි.
ඔක්තෝබර් 26වැනිදා, නීත්‍යනුකූල ආණ්ඩුවක් පෙරලා, රනිල් වික්‍රමසිංහ අගමැතිධුරයෙන් පහකරන්නට ජනාධිපති සිරිසේන උපයෝගි කර ගත්තේද ගල් පැලෙන බොරුවකි. එනම්, එජාපය තමා ඝාතනය කරන්නට ඉන්නා බවයි. ඔහුගේ ඒ දුෂ්ට ක්‍රියාවෙන් ඇරඹි දින 51ක් තුළ ලංකාව මහත් විනාශයකට වැටුණේය. ඒ ගැන දැන් ඕනෑ තරම් ලියා කියා තිබේ. ඉරාකයට බෝම්බ දමන විට, තමන් ඉරාකය ගැන නිර්මාණය කළ බොරුව ගැන ජෝර්ජ් බුෂ් හොඳින්ම දැනගෙන සිටි ලෙසම, නීත්‍යනුකූල ආණ්ඩුව පෙරලන විටද ජනාධිපති සිරිසේන නාමල් කුමාර කියන්නේ බොරුවක් බව හොඳින් දැන සිටින්නට ඇත. නාමල් කුමාර දකින, ඔහුගේ කතා අහන සාධාරණ සිහියක් තිබෙන කිසිවකුට ඔහු ඇත්තක් කියන බවක් නොපෙනේ. ජනාධිපතිවරයා නාමල්ගේ බොරුව පදනම් කරගෙන මහා විනාශයක් කළේ, වෛරයෙන් ද්වේෂයෙන් හා ඊර්ෂ්‍යාවෙන් තමාගේ පෘථග්ජන චිත්තය වෙව්ලමින් තිබුණු නිසා බව පෙනේ.
මහින්ද රාජපක්‍ෂ අගමැති කළ පසු ජනාධිපතිවරයා නීතිය හා සාමය අමාත්‍යාංශයත් ඒ යටතේ ඇති පොලිසියත් තමා යටතට පවරාගත්තේය. පසුව රනිල් වික්‍රමසිංහ යළි අගමැති කළ විටද, ඔහු නීතිය හා සාමය ආමාත්‍යාංශයත් (එය ව්‍යවස්ථාව උල්ලංඝනය කිරීමකි.) පොලිසියත් තමාගේ යටතේ තබා ගත්තේය. එහෙත්, අද වන තුරු ඔහුට තමා ඝාතන කුමන්ත්‍රණය ගැන තහවුරු වන කිසිම සාක්‍ෂියක් තමා යටතේම ඇති පොලිසිය මාර්ගයෙන් සොයාගැනීමට නොහැකිවී තිබේ.
මේ කුමන්ත්‍රණය බොරුවක් බවට ඊටත් වඩා සාධක කුමටද?■

■ අරුණ ජයවර්ධන