දේශයේ පංචායුදය. ඒ ජාතික නිදහස් පෙරමුණ සාමාජිකයන් තමන්ගේ නායකයා හඳුන්වා දෙන නමය. ඒ නායකයා වෙන කවුරුත් නොව විමල් වීරවංශය. මේ පුද්ගලයා මේ දේශය රකින්න ආරක්ෂා කරන්නම උපත ලැබූ පුද්ගලයෙකු බව ඔහුම කියයි. ජනතා විමුක්ති පෙරමුණෙන් දේශපාලනයට පැමිණ විමුක්ති දේශපාලනය නිසා සීගිරියට වත් තමන්ට යන්නට නොහැකි වූ බව කියමින් ඔහු කන්කෙඳිරිගානවා අප අසා ඇත. ඒ ඔහුගේ රට හදන්න කැපවීමය. එදා රට හදන්න මාතර සිට කෝච්චියේ කොළඹ ආවායැයි කියන මේ පුද්ගලයා අද මහා ධනප්තියෙකුව සුවිසල් මැඳුරක වාසය කරන්නේය. ඒ රට හදන්න ගොස් ඔහුගේ හිස මත පාත්වූ වාසනාවය. ඒකත් හරියට ඬේසි නෝනාගේ මැණික් මල්ල වාගේය. ඒ මන්ද විමල් වීරවංශ ධනවතෙකු වූවේ කෙසේදැයි එතුමාවත් දන්නේ නැති නිසාය. එතුමාගේ ප්‍රිය බිරිඳ ශෂී වීරවංශය. ශෂීද වර්තමානයේ ධනවත් ව්‍යාපාරික කාන්තාවක්ය. ඇයටද ඇයගේ ධනය කෙලෙස ලැබුණාදැයි කියන්නට බැරි ය. මේ යුවළගේ මේ කුප්‍රකට ඉතිහාස කතාවට දැන් අලුත් පරිච්ඡේදයක් එක්වී ඇත. ඒ කූට ලේඛන සෑදීම නම් පරිච්ඡේදයයි. දෙන්නා දෙමහල්ලෝ තරගයට කූට ලේඛන හදා ඇති බව දැන් අධිකරණයේ ඔප්පුවෙමින් තිබෙන්නේය. ඒ තමන් රට රකින්න මහංසිවී බොරුවෙන් උපයාගත් දේශපාලන බලය අවභාවිත කරමින් ය.
කූට ලේඛන නඩුව
ව්‍යාජ තොරතුරු ඉදිරිපත්කර සකස් කළ ජාතික හැඳුනුම්පතක් උපයෝගී කරගනිමින් සකස් කළ විදේශ ගමන් බලපත්‍රයක් සන්තකයේ තබාගැනීම, කූට ලේඛන සකස් කිරීම ආදි චෝදනා රැසක් යටතේ රහස් පොලිසිය ශෂී වීරවංශට විරුද්ධව කොළඹ ප්‍රධාන මහේස්ත්‍රාත් ඉදිරියේ නඩු පවරා ඇත. පසුගිය ජනවාරි පළවෙනි දින එම නඩුව ප්‍රධාන මහේස්ත්‍රාත් ලංකා ජයරත්න මහත්මිය ඉදිරියේ විභාගයට ගත් අතර එහිදී නවතම තොරතුරු රැසක් අනාවරණය විය.
මෙහිදී සාක්ෂි ලබාදෙමින් විශ්‍රාමික නියෝජ්‍ය රෙජිස්ට්‍රාර් ජනරාල් සුමතිපාල හෙට්ටිආරච්චි ප්‍රකාශකර තිබුණේ දරුවන් දෙදෙනාගේ උප්පැන්න සහතිකවල සඳහන් තමන්ගේ වයස අවුරුදු හතරකින් අඩුකර සංශෝධනය කර දෙන ලෙස ඉල්ලා ශෂී වීරවංශ ඉල්ලු‍ම්පත්‍රයක් ඉදිරිපත්කර තිබූ බවය. එම ඉල්ලු‍ම්පත්‍රය සමග ඇය ඉදිරිපත් කළ ලිපි ලේඛන අතර තිබූ උප්පැන්න සහතිකය ව්‍යාජ එකක් බව පසුව කළ පරීක්ෂණවලදී අනාවරණය වූ බවද එහිදී ඔහු පවසා ඇත. එහිදී මේ නිලධාරියා පවසා ඇත්තේ ශෂී වීරවංශ තම කාර්යාලයට ඉහත කාර්යය සඳහා පැමිණි පසු එවක අමාත්‍ය විමල් වීරවංශ තමන්ට දූරකථනයෙන් අමතා හදිසි කටයුත්තක් නිසා ඉක්මණින් සංශෝධනය කරදෙන ලෙස ඉල්ලා සිටි බවය. ඒ අනුව ඇමති බලය නිසා ඉදිරි වැඩ සිද්ධ වී ඇත.
ආගමන හා විගමන පාලකගේ සාක්ෂිය
පසුගිය අප්‍රේල් 23 වැනි දින මෙම නඩුව විභාගයට ගැනුණු අවස්ථාවේ හිටපු ආගමන හා විගමන පාලක චූලානන්ද පෙරේරා සාක්ෂි වශයෙන් පැවසුවේ මොනවාද? මතක් කරගත යුතුය. එහිදී ඔහු ප්රකාශ කළේ ශෂී වීරවංශ රාජ්‍යතාන්ත්‍රික ගමන් බලපත්‍රයක් ලබාගැනීම සඳහා ඉදිරිපත් කරනු ලැබූ අයදුම්පත්‍රයේ උපන්දිනය සහ සාමාන්‍ය ගමන් බලපත්‍රයේ උපදිනය සමාන නොවූ බවය. ඒ අනුව එහිදී තමන් උපන් වර්ෂ දෙකක් නිරීක්ෂණය කළ බවය. එහෙත් මනුෂ්‍යත්වය සලකා තමන් ඒ පිළිබඳව පොලීසියට පැමිණිලි නොකළ බවය. මෙම නිලධාරීන්ගේ මේ මනුෂ්‍යත්වය සාමාන්‍ය මිනිසෙකු ඉදිරියේ පවතීද? එහිදී මේ හිටපු පාලකවරයා පවසා තිබුණේ අයදුම්පත්‍රයේ උපන් වර්ෂය 1971 ලෙස සඳහන් කර තිබුණත් සාමාන්‍ය ගමන් බලපත්‍රයේ උපන් වර්ෂය ලෙස 1967 සඳහන්ව තිබූ බවය. එහිදීද පෙර අවස්ථාවේ පරිදිම එවක අමාත්‍ය විමල් වීරවංශ ආගමන විගමන පාලක අමතා තම බිරිඳට කඩිනමින් රාජ්‍යතාන්ත්‍රික ගමන් බලපත්‍රයක් ලබා දෙන ලෙස ඉල්ලා ඇත. ඒ අනුව මේ නිලධාරියා කියන ‘මනුෂ්‍යත්වය’ පැමිණෙන්නට ඇත.
තම සහෝදරයා පාර්ලිමේන්තු බෝම්බ ප්‍රහාරය සම්බන්ධයෙන් අත්අඩංගුවට ගැනීමෙන් පසුව තම පවුලට තර්ජන එල්ලවීම නිසා, තමන්ගේ සහ පවුලේ ආරක්ෂාව වෙනුවෙන් මෙම දින වෙනස කළ බව එවකදී තමන් සමග ශෂී වීරවංශ පැවසූ බව හිටපු ආගමන විගමන පාලකවරයා මෙම සාක්ෂි දීමේදී පවසා ඇත. ඒ අනුව එතුමාගේ හිත උණුවී ඇත. පාර්ලිමේන්තු බෝම්බ ප්‍රහාරයේ සහ අජිත් කුමාරගේ අත්අඩංගුවට පත්වීමට අදාළ දින වකවානු සහ මේ කියන සාමන්‍ය ගමන් බලපත්‍රය ලබාගත් කාලය වන 2004 වර්ෂය සැසදීමේදී පෙනෙන්නේ මේ කතාව පට්ටපල් බොරුවක් බවය. එය ආගමන විගමන එවක පාලකයාට නොතේරීම කියන්නේ මේ නිලධාරියා මෝඩයෙකු හෝ කපටියෙකු බවය.
පවුලේ බොරුවල ඉතිහාසය
විභූති විශ්වජිත් විමල් ශෂී යුවලගේ පළමු දරුවාය. විභූති උපත ලබන්නේ 1997 අවුරුද්දේය. එහිදී උප්පැන්නය ලියන්න යන්නේ සහ තොරතුරු දෙන්නේ විමල් වීරවංශය. ඔහුගේ තොරතුරු අනුව ශෂී ගේ උපන් දිනය 1967/02/01 දා ය. ඔහුට අනුව ඔහුගේ උපන් දිනය 1965/03/07 ය. මේ තොරතුරු බොරු විය නොහැකිය. ඒ මන්ද කට ඇරියත් බොරු කියන විමල් සේ ප්‍රසිද්ධ මේ පුද්ගලයා තමන්ගේ දරුවාගේ උප්පැන්න සහතිකයට බොරු කියාවියැයි සිතිය නොහැකි නිසාය. එහෙත් 2008 අවුරුද්ද වනවිට විමල් වීරවංශ කියන්නේ දරුවාගේ උප්පැන්න සහතිකයේ සඳහන් තම උපන් දිනය වැරදි බවය. ඊළඟට ශෂී වීරවංශ ඇගේ උපන්දිනය දරුවාගේ උප්පැන්නයේ වෙනස් කරන්නේ 2011 මාර්තු වේදීය. මේවාට සිනා වෙනවා හැර වෙන කුමක් කරන්නද? මේ අවුල් ජාලාව මෙසේම තිබියදී 2001 දී උපදින දෙවෙනි දරුවා වන විමාෂා විශ්වාදරීගේ උප්පැන්න සහතිකයටද පළමු දරුවාගේ උප්පැන්න සහතිකයට දී තිබුණ පසුව ඔවුන්ම වැරදියි ලෙස හඳුනාගත් උපන් දිනම පැමිණිම පුදුම සහගතය.
ඇත්තටම මේ දෙදෙනා ඉපදුණේ කිනම් වර්ෂවලදීද? මොවුන්ගේ ඇත්ත නම් මොනවාද? මේවා තවමත් පැටලිලි සහගතය. ශෂී වීරවංශගේ සාමාන්‍ය ගමන් බලපත්‍රයේ අංකය N1284124ය. ජාතික හැඳුනුම්පත් අංකය 675320233ඩ. ඊට අදාළ උපන්දිනය 1967/02/01. ඇයගේ රාජ්‍යතාන්ත්‍රික ගමන් බලපත්‍රයේ අංකයD3642817ය. ඊට අදාළ උපන්දිනය 1971/02/03ය. ජාතික හැඳුනුම්පත් අංකය 715344696V ය. මෙම අවස්ථා දෙකෙහි ඇයගේ නම් ද එකිනෙකට වෙනස් ය. මුල් අවස්ථාවේදී ඇගේ නම ශිර්ජා උදයන්ති වීරවංශය. දෙවෙනි වර ඇගේ නම රන්දුණු මුදියන්සේලාගේ ෂෙහාසා උදයන්ති රණසිංහය. මේ ඔවුන්ගේ පවුලේ බොරු ඉතිහාසයෙන් බිඳක්‍ ය. නීතිය නිවැරදිව ඩීල්වලට යටනොවී ක්‍රියාත්මක වෙනවා නම් මේ සියල්ල ඉදිරියේදී අධිකරණය ඉදිරියට පැමිණෙනවා ඇත. ■
