ශ්‍රීලංකා නිදහස් පක්ෂය හා පොදුජන පෙරමුණ අතර සන්ධානයක් ඇති කරගැනීම පිළිබඳව සාකච්ඡා නතර වී තිබෙන බවත්, ජනාධිපති මෛත්‍රීපාල සිරිසේන හා ඒකාබද්ධ විපක්ෂයේ පිරිසක් ඒ සම්බන්ධයෙන් දැඩි අවුලකට පත්වී තිබෙන බවත් ආරංචි මාර්ග වාර්තා වෙයි.

ශ්‍රී ලංකා පොදුජන පෙරමුණේ බැසිල් රාජපක්ෂ ඇතුළු පිරිසකගේ බාධා කිරීම් නිසා සන්ධානය ගොඩනැඟීමේ කටයුතු අඩපණ වී තිබෙන බවත් සන්ධානයට බාධා කරන නායකයන් කෙරෙහි මහජන විරෝධයක් ඇති වෙන ලෙස අදහස් දැක්වීම් සිදු කිරීමට බලාපොරොත්තු වෙන බවත් ඒ සම්බන්ධයෙන් අදහස් දැක්වූ පොදුජන පෙරමුණේ සාමාජිකත්වය නොදරන ඒකාබද්ධ විපක්ෂයේ පක්ෂ නායකයෙක් කීය.

ඒකාබද්ධ විපක්ෂය සහ ශ්‍රීලනිපය සමඟ සන්ධානයක් ඇති කරගැනීමේ සාකච්ඡා ගැන කළ විමසීමකදී පාර්ලිමේන්තු මන්ත්‍රී වාසුදේව නානායක්කාර පැවසුවේ එම සාකච්ඡා මේ වන විට ඇනහිට තිබෙන බවය. මෑතකදී එවැනි සාකච්ඡාවක් නොපැවැත්වූ බවත්, ඉදිරියේදී පැවැත්වීමට නියමිත සාකච්ඡාවක් පිළිබඳව දැනුම් නොදුන් බවත් ඔහු කීය. මේ වන විට ඒකාබද්ධ විපක්ෂයේ සිටින පොදුජන පෙරමුණ හා ඒකාබද්ධ විපක්ෂයේ සිටින අනෙකුත් කුඩා පක්ෂ අතර සන්ධානයක් ඇති කරගැනීම සඳහා පැවැත්වෙන සාකච්ඡා නම් සාර්ථකව සිදුවෙන බවද ඔහු කීය.
මේ හේතුව නිසා ඒකාබද්ධ විපක්ෂය විසින් මාර්තු 08 වැනිදා මහනුවර නගරයේ සංවිධානය කර ඇති මහජන රැස්වීමට ශ්‍රීලනිප මෛත්‍රී පිළ සහභාගි නොවීමට තීරණය ඇතැයි වාර්තා වෙයි.

අනිද්දා කළ විමසීමකදී, ශ්‍රීලනිප මහලේකම් දයාසිරි ජයසේකර පැවසුවේ තවමත් ශ්‍රීලනිපය හා ඒකාබද්ධ විපක්ෂය සන්ධානගත වී නොමැති නිසා එම රැස්වීමට සහභාගි නොවීමට මාර්තු 06 වැනිදා තීරණයක් ගෙන ඇති බවයි. කෙසේ වෙතත් නව සන්ධානයක් පිළිබඳව මාර්තු 14 වැනිදා සාකච්ඡාවක් පැවැත්වීමට බලාපොරොත්තු වන බවද ඔහු කීය.

මේ අතර ශ්‍රීලනිපයේ දේශපාලන කටයුතු තනිව සිදුකිරීමට මෛත්‍රීපාල සිරිසේන ප්‍රමුඛ ශ්‍රීලනිප නායකයන් සැලසුම් කර ඇත. ඒ අනුව පසුගිය සතියේදී ‘මෛත්‍රී හරි’ යනුවෙන් සඳහන් කරමින් විවිධ සටන්පාඨ ඇතුළත් පෝස්ටර් මාලාවක් ප්‍රධාන නගරවල ඇලවීමටද එම කණ්ඩායම කටයුතු කර තිබේ.

මාර්තු 08 වැනිදා පැවැතීමට නියමිත මහජන රැස්වීමට ඒකාබද්ධ විපක්ෂයේ මීළඟ ජනාධිපතිවරණ අපේක්ෂකයා ලෙස ගෝඨාභය රාජපක්ෂ එක්වෙනු ඇතැයි පළවෙන ආරංචිමාර්ග පිළිබඳව අදහස් දක්වමින් ඒකාබද්ධ විපක්ෂ පාර්ලිමේන්තු මන්ත්‍රී මහින්දානන්ද අලුත්ගමගේ ප්‍රකාශ කළේ ගෝඨාභය රාජපක්ෂ නුදුරේදී පක්ෂ දේශපාලන වේදිකාවකට ගොඩවීමට සැලසුම් කර නොමැති බවයි. ඒ අනුව ගෝඨාභය රාජපක්ෂ මාර්තු 08 වේදිකාවට ගොඩවෙනු ඇතැයි පැතිරෙන ආරංචි සැබෑවක් නොවේයැයි ඔහු කීය. ■

තමාට විරුද්ධව ත්‍රිපුද්ගල විශේෂ මහාධිකරණයේ විභාගවෙමින් පවතින ඩීඒ රාජපක්‍ෂ කෞතුකාගාරය සම්බන්ධ නඩු විභාගයට එරෙහිව, එහි විත්තිකාර ගෝඨාභය රාජපක්‍ෂ මහතා අභියාචනාධිකරණය ඉදිරියේ ගොනුකරන ලද රිට් පෙත්සම, මාර්තු 8වැනිදා අභියාචනාධිකරණයෙහිදී සලකා බැලීමට නියමිතය.

ත්‍රිපුද්ගල විශේෂ මහාධිකරණය ඉදිරියේ ඉක්මනින් විභාග කොට අවසන් වීමට නියමිත තමාගේ නඩුව අත්හිටුවීම සඳහා රිට් ආඥාවක් නිකුත් කරන ලෙස ගෝඨාභය රාජපක්‍ෂ මහතා සිය පෙත්සමෙන් ඉල්ලා තිබේ.

මේ අතර, අභියාචනාධිකරණයේ සභාපති විනිසුරු හැටියට වැඩ බැලීමට දීපාලි විජේසුන්දර මහත්මිය නැවත වාරයක් ජනාධිපති මෛත්‍රීපාල සිරිසේන විසින්, මාර්තු 6 වැනිදා පත්කරනු ලැබුවාය. ඒ ආණ්ඩුක්‍රම ව්‍යවස්ථා සභාව, ඇය අභියාචනාධිකරණ සභාපති ධුරයට පත්කිරීමට ජනාධිපති විසින් කරන ලද නාමයෝජනාව අනුමත නොකිරීමෙන් පසු, දෙවැනි වරටය.

අභියාචනාධිකරණ සභාපති ධුරයේ වැඩ බැලීම සඳහාවත් ව්‍යවස්ථා සභාවේ අනුමැතියකින් තොරව විනිසුරුවරයකු පත්කිරීමට ජනාධිපතිවරයාට ආණ්ඩුක්‍රම ව්‍යවස්ථාවෙන් බලයක් නැති නිසා, මේ පත්කිරීම ව්‍යවස්ථාව උල්ලංඝනය කිරීමක් බව නීති විශාරදයන් පෙන්වා දී තිබේ.
පසුගියදා පාර්ලිමේන්තුවේ පැවැති ආණ්ඩුක්‍රම ව්‍යවස්ථා සභාව සම්බන්ධ කල් තැබීමේ විවාදයේදී කතාකළ පාර්ලිමේන්තු මුජිබුර් රහුමාන් කීවේ, අභියාචනාධිකරණ විනිසුරු දීපාලි විජේසුන්දර මහත්මියගේ දියණියගේ විවාහ මංගල්‍යය අවස්ථාවේ හිටපු ජනාධිපති මහින්ද රාජපක්‍ෂ මහතා අලුත් ම මෝටර් රථයක් ඇයට තෑගි දුන් බවය.

අභියාචනාධිකරණයේ නඩු ඇසීමට විනිසුරුවරුන් පත්කරන්නේ එහි සභාපති විනිසුරුවරයා හෝ විනිසුරුවරිය විසිනි. ■

අරුණ ජයවර්ධන

තමා අත්අඩංගුවට ගැනීමෙන් වළක්වන නියෝගයක් නිකුත් කරන ලෙස ඉල්ලා හිටපු නාවික හමුදාපති වසන්ත කරන්නාගොඩ ශ්‍රේෂ්ඨාධිකරණයට ඉදිරිපත් කළ මූලික අයිතිවාසිකම් පෙත්සම, මාර්තු 7වැනිදා කැඳවූ අවස්ථාවේදී එම පෙත්සමට මැදිහත්වීමට අවසර ඉල්ලා සිටි පාර්ශ්වයන්ට සිය කරුණු දැක්වීමට ශ්‍රේෂ්ඨාධිකරණයෙන් අවසර ලැබී නැත. මෙසේ මැදිහත්වීමට අවසර ඉල්ලා සිටියේ. නාවික හමුදා කණ්ඩායම විසින් පැහැරගෙන යනු ලැබ ඝාතනය කැරුණු තරුණ ශිෂ්‍යයකු වන රජීව් නාගනාදන්ගේ මව වන සරෝජිනි නාගනාදන් මහත්මියයි. ඒ අගතියට පත් පාර්ශ්වයක් වශයෙනි.

ඇය වෙනුවෙන් පෙනීසිටි ජනාධිපති නීතිඥ ජේසී වැලිඅමුණ එසේ කරුණු දැක්වීමට අවසර ඉල්ලූ විට පසුව ඒ ගැන සලකා බලන බව ශ්‍රේෂ්ඨාධිකරණ විනිසුරු මඬුල්ල දන්වා සිටියත් ඒ අවස්ථාව ලැබුණේ නැත. එහෙත් මීට පෙර එවැනි පෙත්සම් විභාගවලදී මැදිහත්කාර පාර්ශ්වවලට සිය කරුණු දැක්වීමට අධිකරණයෙන් අවසර ලැබීම සිදුවිය.

කරුණු විමසීම අවසානයේදී බුවනෙක අලුවිහාරේ, විජිත් මලල්ගොඩ හා ප්‍රීති පද්මන් සූරසේන යන විනිසුරු මඬුල්ල පෙත්සම්කාර වසන්ත කරන්නාගොඩ අත්අඩංගුවට ගැනීමෙන් වළක්වන නියෝගයක් නිකුත් කළේය.

තිවංක සපරමාදු

ජනාධිපති අභියාචනා කමිටුව විසින්ම අලියොන්ස් රක්ෂණ සමාගමට ලබාදී තිබූ සුරක්ෂා රක්ෂණය අවලංගු කරන ලෙසට ජනාධිපතිවරයා නියෝග කර ඇතැයි වාර්තා වේ.

මාර්තු 06 වැනිදා පැවති කැබිනට් මණ්ඩල රැස්වීමේදී ජනාධිපතිවරයා එම නියෝගය කර ඇති අතර ඒ සම්බන්ධයෙන් තමාට නිරීක්ෂණ ඉදිරිපත් කිරීමට අවශ්‍ය බවද ප්‍රකාශ කර ඇත.

ඊට අමතරව එම රක්ෂණය සම්බන්ධයෙන් අධ්‍යාපන අමාත්‍යාංශ බලධාරීන් සමඟ මාර්තු 07 වැනිදා සාකච්ඡාවක් පැවැත්වීමටද ජනාධිපතිවරයා තීරණය කර තිබූ අතර සාකච්ඡාවේ තොරතුරු කුමක්ද යන්න පුවත්පත මුද්‍රණයට යන තෙක්ම වාර්තාවුණේ නැත.

ඉඳුවර බණ්ඩාර

බලපත්‍රයක් නොමැතිව අලි පැටියෙකු සන්තකයේ තබාගැනීමේ චෝදනාවට උඩුවේ ධම්මාලෝක හිමිට විරුද්ධව කොළඹ මහාධිකරණයේ විභාග වූ නඩුවෙන් ඒ හිමියන් නිදහස් කරමින් ලබාදුන් තීන්දුවට එරෙහිව අභියාචනයක් ගොනුකරන බව නීතිපති දෙපාර්තමේන්තුව ප්‍රකාශ කරයි.

අලි පැටවා විත්තිකාර හිමියන් භාරයේ සිටි බවට පැමිණිල්ල සාක්ෂි ඉදිරිපත් කළත් එම සාක්ෂිවලට, මෙම චෝදනාව සාධාරණ සැකයකින් තොරව ඔප්පු කිරීමට නොහැකිබව ප්‍රකාශ කරමින් මාර්තු 01 දින මෙම නඩු තීන්දුව කොළඹ මහාධිකරණ විනිසුරු සම්පත් විජේරත්න ලබාදුන්නේය.

2015.01.28 දින කිරුළපන ඇලන් මැතිනියාරාමයේදී උඩුවේ ධම්මාලෝක හිමියන් සතුව සිටි මෙම අලි පැටවා වනජිවී භාරයට ගනු ලැබූ අතර පසුව ඒ හිමියන් මාධ්‍යයට ප්‍රකාශ කර තිබුණේ කවුරු හෝ කෙනෙකු මෙම අලි පැටවා පන්සල් වත්තට අතහැර ගොස් සිටියදී, තමන් භාරයට ගෙන ඇතිදැඩි කළ බවය.

මංජු කස්තුරිආරච්චි