පසුගිය ජනවාරි 28 වැනි දින ජනාධිපති සිරිසේනගේ මත්ද්‍රව්‍ය නිවාරණ ජනාධිපති කාර්ය සාධන බලකාය ඇගයීම් සම්මාන උළෙලක් සංවිධානය කර තිබුණි. ඒ කොළඹ සුගතදාස ගෘහස්ථ ක්‍රීඩාංගණයේ දීය. මෙම සම්මාන උළෙල තුළදී කාණ්ඩ තුනක් යටතේ සම්මාන ලබා දුන් අතර එහිදී කියවුණේ මත්ද්‍රව්‍ය නිවාරණය සඳහා සිය ජීවිතය නොතකා කටයුතු කළ පොලිස් නිලධාරින් සහ විශේෂ කාර්ය බලකා නිලධාරීන් මෙහිදී සම්මානයට පාත්‍ර කරන බවය. ඒ අනුව පොලිස් නිලධාරීන් සහ විශේෂ බලකා නිලධාරීන් 1034 කට සම්මාන ලැබිණි. එහිදී ජනාධිපති පොලිස් වීරතා පදක්කම නිලධාරීන් 15 දෙනෙකුටද, ජනාධිපති පොලිස් දක්ෂතා පදක්කම නිලධාරීන් 59 දෙනෙකුටද, සෙසු පිරිසට ජනාධිපති ප්‍රශංසා සහතික පත් ද ප්‍රදානය කරනු ලැබීය.
මෙම සම්මාන උළෙල ජනාධිපතිවරයාගේ ඉදිරි දේශපාලන අනාගතය වෙනුවෙන් සංවිධානය කළ එකක් බව සහතිකය. එම දේශපාලන අනාගතය වෙනුවෙන් ඔහු මත්ද්‍රව්‍ය විරෝධී මවාගත් සටනක නිරතවී සිටී. ඒ අනුව ඔහු මත්ද්‍රව්‍ය මැඩලීමට උපදෙස් ගන්නට පිලිපීනයට යයි. නිරන්තරව මත්ද්‍රව්‍ය පිළිබඳ වැරදිකරුවන්ට මරණ දණ්ඩණ දෙන බවට ශපථ කරයි. ඉන් නොනැවති එයට එජාපය අකුල් හෙළනවා යැයි කියමින් එජාපය පරයා ජනතා ප්‍රසාදය දිනාගන්න දඟලයි. ඔහුගේ මේ රංගකාරී සටන අප තුළ සිනහවද ඉන්පසු පිළිකුළද ඇති කරවන්නේය. ඔහුගේ මේ සෝබන රංගනයේම අවස්ථාවක් සේ කළ එළිබැස්ස මේ සම්මාන උළෙලේ සම්මාන බෑගයේ, පොලිස් මත්ද්‍රව්‍ය කාර්යාංශයේ නැතිනම් නාකොටික් අංශයේ නියොමාල් රංගජීව නම් පොලිස් නිලධාරියාටද සම්මානයක් විය. අයිපී රංගජීව නමින් ප්‍රකට මේ පොලිස් නිලධාරියා කවුරුන්ද? ඔහු වෙන කවුරුත් නොව වැලිකඩ මිනිස් සංහාරයේ ප්‍රධාන සැකකරුවාය. සිරකරුවන් ලිස්ට් එකකට අඬගසා ඝාතනය කරන්නට ඔහු සහාය වී ඇති බවට ඕනෑ තරම් තොරතුරු ඇත. ඔහු දැන් සිටින්නේ ඇප පිටය. හරියට නීතිය සාධාරණව ක්‍රියාත්මක වන්නේ නම් ඔහුට පොලිස් සක්‍රිය සේවයේ සිටින්නට බැරිය. එහෙත් ලංකාවේ නීතිය රටේ ඉහළම පුද්ගලයාගේ බහට නැමෙන නිසා ඔහුට තවමත් සක්‍රිය සේවයේ සිටිය හැකිය. එයිනුත් නොනැවතී දැන් ඔහු සම්මානලාභියෙක්‍ ය. එසේ මෙසේ සම්මානලාභියෙකු නොව, ජනපති පොලිස් වීරතා පදක්කම පැළඳි නිලධාරියෙක් ය. ඒඅනුව මත්ද්‍රව්‍ය නාශනයට මෙන්ම වැලිකඩ ඝාතනයන් සාධාරණය කර මේ සම්මානය දුන්නාදැයි අපිට සාධරණ සැකයක් උපදියි. මෙහිදී ජනාධිපති සිරිසේනට මතක් කළ යුතුව ඇත්තේ ඔහු ජනපති පුටුවට ඔසවා තබනු ලැබූ සටනේ ප්‍රධාන සටන් පාඨයක් වැලිකඩ ඝාතන වෙනුවෙන් එහිදී ඝාතනයට ලක්වූවන්ට යුක්තිය ඉටුවීම වෙනුවෙන් ලියවී තිබුණු බවය. ඒ අනුව ජනාධිපතිවරයාට රංගජීව මගහැර හෝ මේ සම්මානය ලබාදීමට අවම සදාචාරයක් හෝ තිබී නැත. අනෙක් පැත්තෙන් මේ සම්මාන ලබාදීම පොලිස් ඉතිහාසයට එක්වන්නේ නරක පූර්වාදර්ශයක් ලෙසය.
මෙම සම්මාන දීමේ උත්සවය තුළදී ඉන් පිටතදීද ඔහු මත්ද්‍රව්‍ය වැරදිකරුවන්ට මරණ දඬුවම ලබාදෙන්නේ යැයිද එය එජාප ආණ්ඩුව මගහැර සිටින්නේ යැයිද රංගනයක නිරත වේ. මේ ලියුම්කරු මෙන්ම ‘අනිද්දා’ පුවත්පතද මරණ දඬුවමට විරුද්ධය. නවීන ලෝකයේ මරණ දඬුවමට කිසිදු ඉඩක් නැත. එවැනි තත්ත්වයකදී මිනිසුන් අන්දන්නට, රවටන්නට ජනපති කරන මේ රංගනයටද අපි විරුද්ධය. කෙසේ හෝ දැන් දැනගන්නට ලැබෙන ලෙස 6 දෙනෙකුට ඕනෑ නම් මරණ දඬුවම ලබාදිය හැකිය. එයිනුත් තිදෙනෙක් පකිස්තානු ජාතිකයෝ ය. එනිසා අපි කියන්නේ මේ සයදෙනාගේ ජීවිත පෝරකයට යවන්නට දඟලමින් බොරු රංගනයන්වලට රාජ්‍ය මුදල් අවභාවිත නොකරන ලෙසය.
ජනපතිගේ මෙම රංගනීය උත්සව සඳහා හිරු වැනි මාධ්‍ය නාලිකා අනුග්‍රහය ලබාදීම තුළින්ම ජනපතිගේ මත්ද්‍රව්‍ය සටනේ සුජාතභාවය පෙනේ!!■
වැලිකඩ සමූහ ඝාතන සිද්ධියේ සැකකරු රංගජීවට ජනපතිගෙන් සම්මාන
සුරක්ෂා රක්ෂණය විදේශයකට දීමෙන් රට සුරක්ෂා වේද?
ජනවාරි 30 වැනි බදාදා දිනමිණ පුවත්පතේ ඇති දැන්වීමක සිරස්තලය මෙයාකාරය. “සුරක්ෂා රක්ෂාවරණය, ප්‍රතිලාභ අයදුම්පත් අමාත්‍යාංශයට එවන්න.” එම සිරස්තලය යටතේ වැඩිදුරටත් සඳහන් වන්නේ මෙසේය. “සුරක්ෂා රක්ෂාවරණ වැඩසටහන ක්‍රියාවට නැංවීම සඳහා ඉදිරිපත් වී සිටි රක්ෂණ සමාගමේ ගිවිසුම්ගත කාලසීමාව 2018 දෙසැම්බර් 01 වැනිදායින් අවසන් වූ බැවින් නව ආයතනය සමග ගිවිසුම්ගත වන තෙක් පසුගිය දෙසැම්බර් 01 දිනට පසු රක්ෂණ ප්‍රතිලාභ අපේක්ෂා කරන සියලු පාසල් දරුවන් අදාළ අයදුම්පත් සෘජුවම අධ්‍යාපන අමාත්‍යාංශය වෙත යොමු කළ යුතු බව එම අමාත්‍යාංශය දැනුම් දෙයි.’
මෙම නිවේදනයේ ඇති කරුණු ගැටලුවක් මතුකරයි. ඒ මීට මාස දෙකකට පෙර ඇතිවූ තත්ත්වයන් පිළිබඳව අධ්‍යාපන අමාත්‍යාංශය දැන් නිවේදනය කරන්නේ ඇයිද යන්නයි. මේ දැන්වීම දකින තුරුම සුරක්ෂා රක්ෂණාවරයට අයත් දූදරුවන් එය පෙර ක්‍රියාත්මක කළ ආයතනය වන ශ්‍රී ලංකා රක්ෂණ සංස්ථාවට සිය අයදුම්පත් යොමුකර තිබුණාට සැක නැත. දැන් එම දරුවන්ට සිදුවන්නේ නැවත වතාවක් අධ්‍යාපන අමාත්‍යාංශයට සිය අයදුම්පත් යොමු කිරීමටය. මේ මඟින් සිදුවිය හැකි එක් නරක ප්‍රතිඵලයක් වන්නේ මේ දූදරුවන්ට තමන්ට හිමි රක්ෂණ ප්‍රතිලාභ ලබා ගන්නට කල්ගතවීමය.
ඇත්ත වශයෙන්ම අධ්‍යාපන අමාත්‍යාංශයත්, ශ්‍රී ලංකා රක්ෂණ සංස්ථාවත් අතර වූ සුරක්ෂා රක්ෂණයට අදාළ ගිවිසුම් අවලංගු වූයේ පසුගි ය වර්ෂයේ සැප්තැම්බර් 30වැනිදාය. අධ්‍යාපන අමාත්‍යාංශය එම රක්ෂණය සඳහා නැවත ටෙන්ඩර් කැඳවීමට ප්‍රමාදවීමත්, එම ටෙන්ඩරයට අදාළව රක්ෂණ ආයතනයක් තෝරා ගැනීමට ප්‍රමාද වීමත් මෙසේ දූ දරුවන් අපහසුතාවට පත්වීමට හේතු වී තිබේ.
කෙසේ වෙතත් ගිවිසුම්ගත කාලය අවසන් වීමෙන් පසුත් ශ්‍රී ලංකා රක්ෂණ සංස්ථාව මෙම රක්ෂණාවරණයේ කටයුතු පවත්වාගෙන ගොස් තිබුණේ අධ්‍යාපන අමාත්‍යාංශය සමග වූ යම් එකඟතාවක ප්‍රතිඵලයක් වශයෙන්ය. ඒ අනුව පසු ගිය වසරේ ඔක්තෝබර් හා නොවැම්බර් මාසවලට අදාළ රක්ෂණ ප්‍රතිලාභ ශ්‍රී ලංකා රක්ෂණ සංස්ථාව ගෙවා ඇත.
මෙම රක්ෂණය ශ්‍රී ලංකා රක්ෂණ සංස්ථාව කරන සමයේ තිබූ ප්‍රධාන චෝදනාව වූයේ මෙම රක්ෂණාවරණයේ වාරික මුදලින් 90%ක් තරම් වූ අතිවිශාල මුදලක් ප්‍රතිරක්ෂණය කිරීමේ ගනුදෙනුවය. ඒ තුළ විශාල සැක කටයුතු ගනුදෙනු සිදුවිය හැකි බව අපගේ නිරීක්ෂණය විය. රුපියල් බිලියන 2.7ක් හෙවත් රුපියල් කෝටි 270ක් වූ එම රක්ෂණ වාරිකයෙන් රුපියල් මිලියන 100ක කොමිස් මුදලක් අධ්‍යාපන අමාත්‍ය අකිල විරාජ් කාරියවසම්ට ලැබෙන බව අපගේ හෙළිදරව් කිරීමක් විය. අකිල විරාජ් අමාත්‍යවරයා ඒ ආකාරයට රුපියල් මිලියන 100ක මුදලක් ලැබුණා යැයි පිළිගත්තේය. වාර්ෂිකව ලැබීමට නියමිත එම මුදලින් අධ්‍යාපන අමාත්‍යාංශය තුළ අරමුදලක් ගොඩනඟනවා යැයි කීවේය. එසේ වුවද එම රුපියල් මිලියන 100ක මුදල ආවේ ශ්‍රී ලංකා රක්ෂණ සංස්ථාවෙන්ද, ප්‍රතිරක්ෂණ සමා ගමෙන්ද, එම මුදල ලැබුණේ කාගේ ගිණුමකටද, දැන් එම මුදල් තිබෙන්නේ කාගේ ගිණුමකද, යන්න බලධාරීන් කිසිවකුත් පිළිතුරු නොදෙන අදටත් විසඳී නැති ප්‍රශ්නයකි.
සුරක්ෂා රක්ෂණය සඳහා දෙවන වර ටෙන්ඩර් කැඳවීමක් කරන්නේ එම රක්ෂණයේ පළමුවර ගනුදෙනුව සම්බන්ධයෙන් එවැනි පිළිතුරු නොලැබුණ මූල්‍ය විෂමාචාර චෝදනා රාශියක් තිබියදීය.
මෙවර ටෙන්ඩර් කැඳවීමෙන් පසු මෙම රක්ෂාවරණය ශ්‍රී ලංකා රක්ෂණ සංස්ථාවට නැවත වරක් ලබාදෙන බව අධ්‍යාපන අමාත්‍යාංශය අනෙකුත් මිල ගණන් ඉදිරිපත් කළ පාර්ශ්වවලට දැනුම් දී ඇත. නමුදු ඒ අඩුම මිල ගණන ඉදිරිපත් කළා යන නිර්ණායකය මත පදනම්ව නොවේ. රක්ෂණ සංස්ථාව ඒ සඳහා මෙවර ඉදිරිපත් කර ඇති මුදල වන්නේ රුපියල් බිලියන 1.8කි. එය මිල ගණන් අතර දෙවන ස්ථානය බවට පත්වී ඇත. ශාඛා ජාලය, සමූහ රක්ෂණ පළපුරුද්ද යන අතිරේක හේතු එම තෝරා ගැනීම සඳහා සමහරවිට හේතු වී තිබෙන්නට ඇත.
කෙසේ වෙතත් මේ සඳහා අඩුම මිල ගණන ඉදිරිපත් කළ අලියාන්ස් සමාගම (Allianz) සමාගම ඊට විරුද්ධව අභියාචනාවක් ඉදිරිපත් කර ඇත. එම සමාගම ඉදිරිපත් කර ඇති මුදල වී ඇත්තේ රුපියල් බිලියන 1.63කි. එම අභියාචනය සලකා බලා ඇත්තේ ජනාධිපතිවරයා විසින් පත්කරන ලද අභියාචනා කමිටුවක් විසිනි. (අමාත්‍ය මණ්ඩලය විසින් පිහිටවනු ලබන ටෙන්ඩර් මණ්ඩලයකින් ලබාදෙන තීන්දුවක් පිළිබඳව යම් පාර්ශ්වයකට සෑහීමට පත්වීම නොහැකි නම් ඒ පිළිබඳව අභියාචනා කළ හැකි අතර එම අභියාචනා මණ්ඩල පත්කිරීමේ බලය ඇත්තේ ජනාධිපතිවරයාටය.) ඔවුන් අවසානයේ තීරණය කර ඇත්තේ අලියාන්ස් සමාගමට මෙම සුරක්ෂා රක්ෂණ ටෙන්ඩරය ලබාදීමටය.
ඒ සමගම නැවතත් මෙම සුරක්ෂා රක්ෂණය සම්බන්ධයෙන් විරෝධතා ගණනාවක් මතුවී ඇත. එහි එක් සටන්කරුවෙකු බවට පත්වී තිබෙන්නේ ශ්‍රී ලංකා රක්ෂණ සංස්ථාවේ වෘත්තීය සමිතිය. ඔවුහු විරෝධතා කිහිපයක් ඉදිරිපත් කරති. එකක් මේ රක්ෂණ යෝජනා ක්‍රමය අධ්‍යාපන අමාත්‍යාංශයේ අදහසක් නොවන බවත් එය යෝජනා කරනු ලැබුයේ ශ්‍රී ලංකා රක්ෂණ සංස්ථාව බවත්, ඒ නිසාම එහි යම් වෙනස්කමක් සිදුකළ යුතුව තිබුණේ නම් අධ්‍යාපන අමාත්‍යාංශය ශ්‍රී ලංකා රක්ෂණ සංස්ථාව සමග සාකච්ඡා කළ යුතුව තිබුණ බවත්ය.
දෙවැන්න රාජ්‍ය අංශයේ රක්ෂණ කටයුතු රජයේ රක්ෂණ සමාගමකින් සිදුකළ යුතු බවට වූ රජයේ චක්‍රලේඛය උල්ලංඝනය කරමින් මෙම රක්ෂණ යෝජනා ක්‍රමය සඳහා මිල ගණන් කැඳවා ඇති බවය.
තුන්වැන්න දේශීය පෞද්ගලික රක්ෂණ සමාගමකුත් නොවන විදේශීය රක්ෂණ සමාගමක් මේ සඳහා තෝරා ගැනීම මඟින් මෙම රක්ෂණයෙන් ලැබෙන ලාභය විදේශ රටකට ඇදී යන බවය. (අලියාන්ස් රක්ෂණ සමාගම ජර්මනිය මුල්කරගත් රක්ෂණ සමාගමකි.)
ඊටත් අමතරව මෙම රක්ෂණ ගනුදෙනුව පිළිබඳව ජනාධිපති ලේකම්වරයා සමග පැවති සාකච්ඡාවකදී රක්ෂණ සංස්ථාවේ වෘත්තීය සමිති පෙන්වා දී ඇත්තේ අවශ්‍ය නම් අධ්‍යාපන අමාත්‍යාංශයෙන් කිසිදු වාරික මුදලක් ලබානොගෙන මේ රක්ෂණ යෝජනා ක්‍රමය ශ්‍රී ලංකා රක්ෂණ සංස්ථාවට ක්‍රියාත්මක කළ හැකි බවය. එහිදී මේ සුරක්ෂා රක්ෂණ යෝජනා ක්‍රමයේ ප්‍රතිලාභ වෙනුවෙන් වාර්ෂිකව වැය වන මුදල ශ්‍රී ලංකා රක්ෂණ සංස්ථාව වාර්ෂිකව රජයට ගෙවන ලාභාංශවලින් අඩුකර ගෙවිය හැකි බවය. (ශ්‍රී ලංකා රක්ෂණ සංස්ථාව දැනට වර්ෂයකට බදු රහිතව ලාභාංශ වශයෙන් රුපියල් බිලියන 12ක පමණ මුදලක් රජයට ගෙවනු ලබයි.)
එහෙත් එම යෝජනා කිසිවක් ඵල දරා නැත. ජනාධිපතිවරයාගේ පාර්ශ්වයෙන් ලැබී ඇති පිළිතුර වී ඇත්තේ අලියාන්ස් රක්ෂණ සමාගමට මෙම ටෙන්ඩරය ලබාදුන් බවට ලිපියක් මඟින් දැනුම් දී ඇති බවය. එහිදී ශ්‍රී ලංකා රක්ෂණ සංස්ථාවේ නුසුදුසුකම් වශයෙන් පෙන්වාදී ඇත්තේ වෛද්‍යාධාර සඳහා ප්‍රතිලාභ ගෙවීමේදී එය රෝහල් ගාස්තු, ඖෂධ ගාස්තු හා පරීක්ෂණ ගාස්තු වශයෙන් වෙන වෙනම පෙන්නුම් කිරීමේ දෝෂයය. අලියාන්ස් සමාගම ප්‍රතිලාභ ගෙවීමේදී ඒ ආකාරයට කොටස් නොකර ප්‍රතිලාභ ගෙවන බව පෙන්වා දී ඇත. ශ්‍රී ලංකා රක්ෂණ සංස්ථාවේ කළමනාකාරිත්වය එහි වෘත්තීය සමිති හා ජනාධිපති ලේකම්වරයා අතර පැවති එම සාකච්ඡාව සම්බන්ධීකරණය කර ඇත්තේ ටෙලිකොම් සභාපති ජනාධිපති සොහොයුරු කුමාරසිංහ සිරිසේනය. මෙම රක්ෂණ යෝජනා ක්‍රමය අලියාන්ස් සමාගමට ලබාදීමට යෑමේ ගනුදෙනුව පිළිබඳව සුරක්ෂා රක්ෂණය අධ්‍යාපන අමාත්‍යාංශයට ඉදිරිපත් කළ රක්ෂණ සංස්ථාවේ නිලධාරියෙකු හිටපු අධ්‍යාපන සේවා ඇමතිවරයෙකුට කථා කළ විට ලැබී ඇති පිළිතුර වී ඇත්තේ ජනාධිපතිවරයා එයට අත ගසා ඇති බැවින් කිසිවක් කළ නොහැකි බවය.
මෙම රක්ෂණ යෝජනා ක්‍රමය ගැන විකල්ප අදහස් දක්වමින් ලංකා ගුරු සංගමය පෙන්වා දී ඇත්තේ අධ්‍යාපන අමාත්‍යාංශය තුළම අරමුදලක් ගොඩනංවා ඒ මඟින් මෙම රක්ෂණ ක්‍රමය ක්‍රියාත්මක කළ යුතු බවය.
මේ යෝජනා අතරින් දැනට අපට පෙනෙන සාර්ථකම යෝජනාව වශයෙන් සැලකිය හැක්කේ ශ්‍රී ලංකා රක්ෂණ සංස්ථාවේ වෘත්තීය සමිති විසින් යෝජනා කර ඇති හා එහි කළමනාකාරිත්වයද පිළිගෙන ඇති අධ්‍යාපන අමාත්‍යාංශය විසින් කිසිදු වාරික මුදලක් නොගෙ වා ශ්‍රී ලංකා රක්ෂණ සංස්ථාව විසින් මෙම රක්ෂණ ක්‍රමය ක්‍රියාත්මක කර, ඒ සඳහා වැයවන මුදල රජයට ගෙවන ලාභාංශවලින් අඩුකර ගෙවීමේ යෝජනාවය. ඒ තුළින් රජයට තවදුරටත් වාසියක් මිස අවාසියක් සිදුවන්නේ නැත. මන්ද මේ සඳහා වාරික මුදල් ගෙවන්නේ රජය විසින් බැවින්ය. ශ්‍රී ලංකා රක්ෂණ සංස්ථාවට යම් ලාභයක් ලැබුණේ නම් එයද රජයට බැර වන එකක් නිසාත්, වාරික ගෙවීම සඳහා අමතර මුදල් සෙවීමේ කටයුත්තක රජය නොයෙදිය යුතු නිසාත්, එම යෝජනාව දීර්ඝ කාලීනව ප්‍රායෝගි කය. මන්ද අපට ලැබී ඇති තොරතුරු අනුවත් අධ්‍යාපන අමාත්‍යාංශයේ මාධ්‍ය නිවේදනය අනුවත් පෙනෙන්නේ අලියාන්ස් සමාගමට මෙම රක්ෂණය ලබාදුන් බවට ලිඛිතව ජනාධිපති අභියාචනා කමිටුව දැනුම් දීමක් සිදුකර තිබුණද ඊට අදාළ ගිවිසුම් අත්සන් කර නැති බවය. ඊට හේතුවී ඇත්තේ අලියාන්ස් සමාගම මෙම රක්ෂණයේ සම්පූර්ණ වාරික මුදලම එනම් රුපියල් බිලියන 1.63ක මුදල එකවර ගෙවන ලෙස අධ්‍යාපන අමාත්‍යාංශයට දැනුම් දී තිබීමය.
සුරක්ෂා රක්ෂණය සඳහා යෝජනා කැඳවීමේදී මුළු වාරික මුදල කොටස් හතරකට ගෙවන බවට අධ්‍යාපන අමාත්‍යාංශය සිය ටෙන්ඩර් ලියවිලිවල සඳහන් කර තිබුණද එම ටෙන්ඩර් කොන්දේසිය උල්ලංඝනය වීම ජනාධිපති අභියාචනා කමිටුවට දැනී නැති බව ඒ මඟින් පෙනී යයි.
ඉහත කරුණු කාරණා පිළිබඳ අවධානය යොමු කිරීමේදී ඉදිරියට විය හැකි යැයි අනුමාන කළ හැකි දේවල් කිහිපයක් පෙනේ. ඉන් පළමුවැන්න වන්නේ අධ්‍යාපන අමාත්‍යාංශයට සම්පූර්ණ වාරික මුදල එකවර ගෙවීම සඳහා මුදල් සොයා ගන්නා තෙක් සුරක්ෂා රක්ෂණයේ ගිවිසුම් අත්සන් කිරීම තවදුරටත් කල් යනු ඇති බවය. දෙවැන්න වන්නේ ගිවිසුම්ගත කාලයෙන් පසු නව ගිවිසුමක් ඇති කරගන්නා තෙක් එක් දිනක්වත් ඉදිරියට ඇලියොන්ස් සමාගම රක්ෂණ ප්‍රතිලාභ ගෙවයිද යන ප්‍රශ්නාර්ථයය. (ශ්‍රී ලංකා රක්ෂණ සංස්ථාව ඔවුන්ගේ ගිවිසුම්ගත කාලය ඉකුත්වීමෙන් පසු මාස දෙකක කාලයක් රක්ෂණ ප්‍රතිලාභ ගෙවා තිබුණේ කිසිඳු වාරික මුදලක් ලබාගැනීමකින් තොරව බව මතක තබා ගන්න.) ඒ මඟින් සිදුවිය හැක්කේ මෙම සුරක්ෂා රක්ෂණ ක්‍රමය නොකැඩී අඛණ්ඩව ඉදිරියට යෑමේ බාධා ඇතිවීමය.
අපේකම ගැන, දේශීයත්වය ගැන, විදේශ විරෝධය ගැන බණ දේශනා කරන ජනාධිපතිවරයා හා ආර්ථිකය ශක්තිමත් කළ යුතු බවට බණ දේශනා කරන අගමැතිවරයා මෙම සුරක්ෂා රක්ෂණය සම්බන්ධයෙන් අවධානය යොමු කළ යුතු කරුණු කිහිපයක් වේ. එකක් මේ රටේ ජනතාවගේ බදු මුදල් මෙම රක්ෂණය හරහා විදේශගත වන්නට ඉඩ දෙනවාද යන්නය. අනෙක අධ්‍යාපන අමාත්‍යාංශයට වැය බරක් නොවී මෙම රක්ෂණය ක්‍රියාත්මක කරන්නේ කෙසේද යන්නය.
ඊට පිළිතුරු සොයාගත් විට මෙම සුරක්ෂා රක්ෂණ යෝජනා ක්‍රමය පාසල් දූ දරුවන්ගේ අභිවෘද්ධිය සඳහා අනවශ්‍ය වැය කිරීම්වලින් තොරව හා ප්‍රතිලාභ ලැබියයුත්තාට ප්‍රතිලාභ ලැබෙන පරිදි සකස් කරන්නේ කෙසේද යන්න පිළිබඳවද සාකච්ඡාවක් ඇතිකළ යුතුය. එහිදී දැනට මෙම සුරක්ෂා රක්ෂණයෙන් ආවරණය නොවන බරපතළ රෝගාබාධ,සැත්කම් හා ප්‍රතිකාර සඳහා වු යෝජනාවද අනිවාර්යෙන් සලකා බැලිය යුතුය. මන්ද රජයේ රෝහල්වල ඇති දීර්ඝ පෝලිම් නිසා නිසි වේලාවට සැත්කම් හා ප්‍රතිකාර ලබා ගැනීමට නොහැකිව අසරණ තත්ත්වට පත්වන්නේ ඇති හැකි දෙමව්පියන්ගේ දූ දරුවන් නොවන නිසාය. සුරක්ෂා රක්ෂණයේ අරමුණ පාසල් දූ දරුවන් ආරක්ෂා කිරීම නම් එහි ප්‍රමුඛතාව ලැබිය යුත්තේ නිසි වේලාවට සැත්කම් කර ගැනීමට හා ප්‍රතිකාර ලබාගැනීමට නොහැකිකමෙන් පීඩා විඳින දරුවන්ය. ඔවුන් මියයෑම වළක්වා ගැනීම බළධාරීන්ගේ යුතුකමය.■
ජයසිරි සම්මාන ගන්න නොයයි
කලාව වෙනුවෙන් විශිෂ්ට සේවයක් කළ කලාකරුවන් වෙනුවෙන් පිරිනැමුණු කලාභූෂණ රාජ්‍ය සම්මාන උළෙලේදී ජනාධිපති මෛත්‍රිපාල සිරිසේන අතින් තම සම්මානය ලබාගැනීම ප්‍රවීණ රංග ශිල්පී ඩබ්ලිව්. ජයසිරි ප්‍රතික්ෂේප කර ඇත.
සම්මාන උළෙල ජනවාරි 29 වන දින නෙළුම් පොකුණ ශාලාවේදී පැවැත් වුණු අතර එදින කලා ශිල්පී ශිල්පිනියන් දෙසීය දෙනෙකු පමණ ඇගයීමට ලක් කරමින් විශිෂ්ටතා සම්මාන පිළිගැන්වීම ජනාධිපතිවරයා අතින් සිදු විය.
මෙම සම්මාන උළෙල මීට පෙර පැවැත්වීමට කටයුතු යොදා තිබූ අතර එම අවස්ථාවේදී ජනාධිපතිවරයා විසින් ක්‍රියාවට නඟන ලද ව්‍යවස්ථා විරෝධී කුමන්ත්‍රණයට විරෝධය පළකරමින් ඩබ්ලිව්. ජයසිරි මහතා විසින්, තමන් එම සම්මානය ජනාධිපතිවරයා අතින් ලබා නොගන්නා බව දැනුම් දී තිබුණි.■
හංසි මානවඩු
ලංකාවේ ප්‍රජාතන්ත්‍රවාදය දුර්වලයි ට්‍රාන්ස්පේරන්සි ඉන්ටර්නැෂනල්
ශ්‍රී ලංකාව දුර්වල ප්‍රජාතන්ත්‍රවාදයක් සහ ඒකාධිපති ප්‍රවණතා පෙන්නුම් කරන රටක් බව 2018 වසර සඳහා වූ දූෂණ සංජානන දර්ශකය මත පදනම් වෙමින් ට්‍රාන්ස්පේරන්සි ඉන්ටර්නැෂනල් ආයතනය සිය වාර්තාව මඟින් සඳහන් කරයි.
ලොව රටවල් 180 අතරින් මෙම දර්ශකයට අනුව ලකුණු 38ක අගයක් ලබා ගනිමින් ශ්‍රී ලංකාව 89 වන ස්ථානයේ පසු වෙයි. එලෙසම දකුණු ආසියාව තුළ දූෂණය අතින් භූතානය සහ ඉන්දියාව ශ්‍රී ලංකාවට වඩා ඉදිරියෙන් සිටියි. දකුණු ආසියාවේ අනෙකුත් රටවල් දූෂණය අතින් සිටින්නේ ශ්‍රී ලංකාවට වඩා පහළ ස්ථානයකය.
2017 වසරේදී ද ශ්‍රී ලංකාවට හිමිව තිබුණේ 89 වන ස්ථානයයි. එලෙසම මෙම දර්ශකයේ ලකුණු අනුව 2015 සිට 2018 වසර දක්වා කාලය තුළ ශ්‍රී ලංකාව ලකුණු 36 සිට 38 අගයක් අතර දෝලනය වෙමින් පැවති බව එම වාර්තාව අනාවරණය කරයි.
මේ අනුව ලකුණු අගය 75 ක සාමාන්‍ය අගයක් ලබන රටවල් පුර්ණ ප්‍රජාතන්ත්‍රවාදයක් සහිත රටවල් ලෙසත් ලකුණු අගය 45 ක සාමාන්‍ය අගයක් ලබන රටවල් දුර්වල ප්‍රජාතන්ත්‍රවාදී රටවල් ලෙසත් ලකුණු 35 ක සාමාන්‍ය අගයක් ලබන රටවල් ප්‍රජාතන්ත්‍රවාදී එහෙත් ඒකාධිපති ප්‍රවණතා සහිත දෙමුහුන් රටවල් ලෙසත් එම දර්ශකය අනුව වර්ග කෙරේ.■
වරුණ සූරියආරච්චි
ජනපතිගේ චෝදනාවලට තලතාගෙන් උත්තර
තමන් මත්ද්‍රව්‍ය සම්බන්ධ වැරදිවලට මරණ දඬුවම නියම වූ පුද්ගලයන්ට මරණ දඬුවම ලබාදෙන්නට උත්සාහ කළත් වර්තමාන ආණ්ඩුව එම කටයුත්තට බාධා කරනවායැයි ජනාධිපතිවරයා නගන චෝදනාවලට අධිකරණ අමාත්‍ය තලතා අතුකෝරල පසුගිය 22 දා පැවති කැබිනට් රැස්වීමේදී පිළිතුරු දී ඇත.
ජනාධිපතිවරයාගේ මරණ දඬුවම් අදහස සම්බන්ධයෙන් අධිකරණ අමාත්‍යාංශය කටයුතු කළ ආකාරය දින වකවානු සහිතව එහිදී අමාත්‍යවරිය පැහැදිලි කර ඇත.
තම අමාත්‍යාංශය බන්ධනාගාර දෙපාර්තමේන්තුව සහ නීතිපති දෙපාර්තමේන්තුව සමග එක්ව මේ පිළිබඳව කටයුතු කළ ආකාරය දක්වා ඇති අමාත්‍යවරිය එහිදී ප්‍රකාශ කර ඇත්තේ එම දඬුවමට ලක්කළ හැකි පුද්ගලයන් සංඛ්‍යාව 48ක් බවය. එයින් 30 දෙනෙකු අභියාචනා ඉදිරිපත් කර ඇත. ඒ අනුව අභියාචනා ඉදිරිපත් නොකළ 18 දෙනාගේ නාම ලේඛනයක් නීතිපති දෙපාර්තමේන්තුව වෙත යැවූ බවද ඇය ප්‍රකාශ කර ඇත. එම ලේඛනයට අනුව 3 දෙනෙකු හඳුනාගෙන ඒ පිළිබඳව නීතිපති දෙපාර්තමේන්තුව අධිකරණ අමාත්‍යාංශයට දැන්වූ බව ද එහිදී ඇය ප්‍රකාශ කර ඇත. ■
මංජු කස්තුරිආරච්චි
පළාත් සභාවට එජාපය පස්ස ගහයි
සියලු‍ම දේශපාලන පක්ෂවල එකඟතාවෙන් පාර්ලිමේන්තුවේ යෝජනාවක් සම්මත කොට පළාත් සභා මැතිවරණය පැරණි ක්‍රමයට ඉක්මනින් පැවැත්වීම සඳහා සාකච්ඡා කරන බව අග්‍රාමාත්‍ය රනිල් වික්‍රමසිංහ ප්‍රකාශ කළායැයි මාධ්‍ය වාර්තා පළවුවද එජාපෙ බහුතර පිරිසක් පළාත් සභා මැතිවරණය ඉක්මනින් පැවැත්වීමට පිළිබඳව කැමැත්තක් නොදක්වන බව වාර්තා වෙයි.
පළාත් සභා මැතිවරණයකට පෙර ජනාධිපතිවරණයක් පැවැත්වීම එක්සත් ජාතික පෙරමුණට වඩා වාසිදායක වීම ඒ සඳහා හේතු වී ඇත. 2018 දී පැවැත්වූ පළාත් පාලන මැතිවරණයේදී මෙන් ශ්‍රී ලංකා පොදුජන පෙරමුණට වාසිදායක මැතිවරණ ප්‍රතිඵලයක් ලැබුණහොත් එය ජනාධිපතිවරණයකදී එක්සත් ජාතික පක්ෂයට අවාසියක් වනු ඇතැයි එක්සත් ජාතික පෙරමුණේ ප්‍රබලයන්ගේ තක්සේරුව වී ඇත.
කාන්තා නියෝජනය වැනි වැදගත් ප්‍රතිසංස්කරණ පළාත් සභා මැතිවරණ ක්‍රමයට ඇතුළත් විය යුතුයැයි පවසමින්, පැරණි ක්‍රමයට එකඟ නොවිය යුතුයැයි එම ප්‍රබලයන්ගේ මතය වී ඇත.
එක්සත් ජාතික පෙරමුණ මීට පෙර සිටම නව මැතිවරණ ක්‍රමයට අනුව පළාත් සභා මැතිවරණය පැවැත්විය යුතු බව ප්‍රකාශ කර තිබුණි. එසේ වුවද නව ක්‍රමයට අදාල සීමා නිර්ණය වාර්තාව පිළිබඳව සමාලෝචනය කිරීමට අග්‍රාමාත්‍ය රනිල් වික්‍රමසිංහගේ ප්‍රධානත්වයෙන් යුතු කමිටුවක් රැස්විය යුතුව තිබුණද, එම කමිටුව කැඳවීමට අගමැතිවරයා කටයුතු කර තිබුණේ නැත.
අනුරංග ජයසිංහ
මහින්දට ගෝඨා විශේෂ නැහැ
ඉදිරි ජනාධිපතිවරණයට අපේක්ෂකයන් ලෙස ඉදිරිපත් වීමට බලාපොරොත්තු වන ගෝඨාභය රාජපක්ෂට මෙන්ම වත්මන් ජනාධිපති මෛත්‍රීපාල සිරිසේනටද තමන්ගේ සහයෝගය හිමිවන බව විපක්ෂ නායක මහින්ද රාජපක්ෂ ඒකාබද්ධ විපක්ෂයේ පක්ෂ නායකයන් හමුවේ පවසා ඇත.
ගෝඨාභය රාජපක්ෂ ජනාධිපතිවරණ අපේක්ෂකයා ලෙස තෝරාගෙන ඇති බවට ගෝඨාභය රාජපක්ෂ ඇතුළු කණ්ඩායමක් ගෙනයන ප්‍රචාරය පිළිබඳව අදහස් දක්වමින් මහින්ද රාජපක්ෂ
එසේ කියා ඇත. ඒ, ජනවාරි 29 වැනිදා මහින්ද රාජපක්ෂගේ නිල නිවසේදී ඒකාබද්ධ විපක්ෂයේ පක්ෂ නායකයන් අතර පැවති රැස්වීමේදීය.
ජනාධිපතිවරණ අපේක්ෂකත්වය පිළිබඳව ‘අනිද්දා’ කළ විමසීමකදී අදහස් දක්වමින් පාර්ලිමේන්තු මන්ත්‍රීවරුන් වන කුමාර වෙල්ගම හා වාසුදේව නානායක්කාර මහත්වරුන් ප්‍රකාශ කළේ ජනාධිපතිවරණ අපේක්ෂකත්වය තමන්ට ලබාදීම සඳහා මහින්ද රාජපක්ෂ එකඟ වූ බව ගෝඨාභය රාජපක්ෂ ප්‍රකාශ කළද, මහින්ද රාජපක්ෂ තම කණ්ඩායමට එවැන්නක් ප්‍රකාශ කර නොමැති බවය.■
මෛත්‍රීගේ යෝජනාවට ශ්‍රීලනිපය අකමැතිලු
ජනාධිපති මෛත්‍රීපාල සිරිසේන විසින් පළාත් සභා මැතිවරණය පැරණි මැතිවරණ ක්‍රමයට පැවැත්වීම සඳහා යෝජනාවක් කැබිනට් මණ්ඩලයට ඉදිරිපත් කළද ශ්‍රීලනිප මෛත්‍රී පිලේ පාර්ලිමේන්තු මන්ත්‍රීවරුන් එම යෝජනාවට විරෝධය පළ කර ඇතැයි වාර්තා වෙයි.
එම යෝජනාව පාර්ලිමේන්තුවේ සම්මත වුවහොත් පළාත් සභා මැතිවරණය ඉක්මනින් පැවැත්වීමට සිදුවන බවත්, එය ශ්‍රීලනිපයට අවාසිදායක බවත් ඒ පිළිබඳව අදහස් දැක්වූ ශ්‍රීලනිප මන්ත්‍රීවරයෙක් පැවසීය. තවමත් ඒ පිළිබඳව ජනාධිපතිවරයා සමඟ විධිමත් ලෙස සාකච්ඡා කර නැතත්, ඉදිරියේදී සාකච්ඡා කිරීමට බලාපොරොත්තු වෙන බවද ඔහු කීය.
ශ්‍රී ලංකා නිදහස් පක්ෂය ඉදිරි මැතිවරණයට ඉදිරිපත්වීම සම්බන්ධයෙන් තවමත් නිශ්චිත තීන්දුවකට පැමිණ නොමැති බවත්, හදිසියේ සන්ධානගත වුවහොත් පොදුජන පෙරමුණ ශ්‍රීලනිපය දුර්වල කරනු ඇති බවත් එම කණ්ඩායමේ මතය වී තිබේ. ශ්‍රී ලංකා පොදුජන පෙරමුණේ පළාත් සභා මන්ත්‍රීවරුන්ගේ සංසදය දැනටමත් ඉදිරි පළාත් සභා මැතිවරණය පොහොට්ටුව ලකුණෙන් තරග කළ යුතුයැයි ප්‍රකාශ කර ඇති බවත්, ශ්‍රීලනිපයේ අපේක්ෂකයන් පරාජය කරවීමට දැනටමත් පොදුජන පෙරමුණ ප්‍රචාරයක් ගෙනයන බවත් එම මන්ත්‍රීවරයා කීය. සමානුපාතික ක්‍රමයට මැතිවරණය පැවැත්වුවහොත්, ශ්‍රීලනිප අපේක්ෂකයන් පරාජය කළ හැකි බවත්, මිශ්‍ර ක්‍රමයට පළාත් සභා මැතිවරණය පැවැත්වුවහොත් කොට්ඨාස ජයගත යුතු නිසා එසේ කළ නොහැකි බවත් ඔහු කීය.■
අනුරංග ජයසිංහ
ව්‍යවස්ථාව කඩා වැඩ බලන්න පත්කරයි
ජනාධිපති මෛත්‍රීපාල සිරිසේන විසින්, අභියාචනාධිකරණයේ වැඩබලන සභාපතිවරිය හැටියට දීපාලි විජේසුන්දර මහත්මිය පත්කිරීම නිසා ආණ්ඩුක්‍රම ව්‍යවස්ථාවේ විධිවිධාන උල්ලංඝනය කිරීමක් සිදුවී ඇති බව වාර්තා වෙයි.
මීට පෙර අභියාචනාධිකරණයේ සභාපති ධුරය සඳහා දීපාලි විජේසුන්දර මහත්මියගේ නම ජනාධිපති සිරිසේන විසින් ආණ්ඩුක්‍රම ව්‍යවස්ථා සභාවට යෝජනා කරන ලද අතර, ඇය එසේ පත්කිරීම ආණ්ඩුක්‍රම ව්‍යවස්ථා සභාව විසින් ප්‍රතික්‍ෂෙප කෙරිණි. එවැනි තත්ත්වයක් යටතේ වෙනත් නමක් ව්‍යවස්ථා සභාවට යැවිය යුතු වුණත්, ජනාධිපතිවරයා එසේ නොකොට, ව්‍යවස්ථා සභාව විසින් ප්‍රතික්‍ෂෙප කරන ලද දීපාලි විජේසුන්දර මහත්මිය අභියාචනාධිකරණයේ වැඩබලන සභාපති හැටියට පත්කරන ලදි.
ව්‍යවස්ථාව අනුව වැඩ බැලීමට විනිසුරුවරයකු පත්කළ හැක්කේ අභියාචනාධිකරණයේ සභාපතිවරයා විදේශගත වුවහොත් හෝ නිලයේ කර්තව්‍යයන් කරන්නට අපහසු තත්ත්වයක සිටියහොත් පමණකි. එහෙත්, හිටපු සභාපති ප්‍රීති පද්මන් සූරසේන ශ්‍රේෂ්ඨාධිකරණයට පත්කිරීමත් සමග අභියාචනාධිකරණ සභාපති ධුරය හිස්විය. සභාපති ධුරය හිස්ව ඇති විට නව සභාපතිවරයකු පත්කරනවා මිස වැඩබලන සභාපතිවරයකු පත්කරන්නට ජනාධිපතිවරයාට බලයක් නැත. එහෙත්, ඔහු දීපාලි විජේසුන්දර මහත්මිය දින 14ක කාලයක් සඳහා සභාපති ධුරයට පත්කළ අතර, පසු අනුමැතිය සඳහා ආණ්ඩුක්‍රම ව්‍යවස්ථා සභාවට ඉදිරිපත් කොට අනුමැතිය ලබාගන්නා ලදි. දීපාලි විජේසුන්දර මහත්මියගේ වැඩ බලන සභාපති ධුරයේ දින 14ක නිලකාලය 23 වැනි බදාදා නිමවූ අතර ඉන් පසු අභියාචනාධිකරණයේ සභාපතිවරයකු නැති තත්ත්වයක් උදාවිය.
ඒ තත්ත්වය යටතේ නැවතත් දීපාලි විජේසුන්දර මහත්මිය වැඩබලන සභාපති හැටියට ජනවාරි 30 වැනිදා ජනාධිපතිවරයා විසින් පත්කරනු ලැබ ඇති නමුත් අනුමැතිය සඳහා ආණ්ඩුක්‍රම ව්‍යවස්ථා සභාවට ඇගේ නම ඉදිරිපත් නොකළ බවද වාර්තා වෙයි. මෙය ආණ්ඩුක්‍රම ව්‍යවස්ථාවේ ප්‍රතිපාදන ජනාධිපතිවරයා විසින් උල්ලංඝනය කරනු ලැබීමකි.■
අරුණ ජයවර්ධන
කරන්නාගොඩගේ ඉරණම නීතිපති අතේ
හිටපු නාවික හමුදාපති වසන්ත කරන්නාගොඩ පුද්ගලයන් එකළොස්දෙනෙකු පැහැරගෙන ඝාතනය කරනු ලැබුවේයැයි කියන සිද්ධියට සැකකරුවෙකු ලෙස නම් කිරීම හෝ නොකිරීම නීතිපතිවරයා සතු කාර්යයක් බව අපරාධ පරීක්ෂණ දේපාර්තමේන්තුවේ අදහස වී ඇත.
අපරාධ පරීක්ෂණ දෙපාර්තමේන්තුව මීට මාස කීපයකට පෙර බී වාර්තාවක් මගින් අධිකරණයට කරුණු වාර්තා කර ඇත්තේ හිටපු නාවික හමුදාපති වසන්ත කරන්නාගොඩ මෙම සිද්ධියේ සැකකරුවෙකු බවට පත්කිරීමට අවශ්‍ය තරම් හේතු තිබෙන බවය. ඒ, ඔහු මෙම සිද්ධියේ සියලු තතු දැන සිටියා යැයි අපරාධ පරීක්ෂණ දෙපාර්තමේන්තුවට කරුණු අනාවරණය වී තිබීම හේතුවෙනි.
එකී තොරතුරු පරිශීලනය කර නීතිපති දෙපාර්තමේන්තුව වසන්ත කරන්නාගොඩ මෙම නඩුවේ සැකකරුවෙකු වශයෙන් නම් කරනවාද නැද්ද යන්න පිළිබඳව අධිකරණය දැනුවත් කිරීම සඳහා අපරාධ පරීක්ෂණ දෙපාර්තමේන්තුවට උපදෙස් දිය යුතුව තිබුණත්, තවම ඒ සඳහා උපදෙස් ලබා දී නොමැත.
පුද්ගලයන් 11 දෙනෙකු පැහැරගෙන ගොස් ඝාතනය කරන ලදැයි කියන මෙම සිද්ධිය මුලින්ම අනාවරණය වී ඇත්තේ තමන්ගේ ශරීර ආරක්ෂකයා සේ කටයුතු කළ සම්පත් මුණසිංහ පිළිබඳව හිටපු නාවික හමුදාපති වසන්ත කරන්නාගොඩ හිටපු නියෝජ්‍ය පොලිස්පති අනුර සේනානායකට කරන පැමිණිල්ලක් විමර්ශනය කිරීමේදීය.■