ශ්‍රී ලංකා නිදහස් පක්ෂයේ පාර්ලිමේන්තු කණ්ඩායම අයවැය දෙවැනි වර කියැවූ අවස්ථාවේදී ඡන්දය ප්‍රකාශ නොකර සිටියේ ජනාධිපති මෛත්‍රීපාල සිරිසේනගේ එකඟතාව අනුව බවත්, එයට ප්‍රතිචාර ලෙස ජනාධිපතිවරයාගේ වැය ශීර්ෂය ඒකමතිකව සම්මත කිරීමට එක්සත් ජාතික පෙරමුණ තීන්දු කළ බවත් අනිද්දා සමඟ අදහස් දැක්වූ ශ්‍රීලනිප හා එජාපෙ ප්‍රබලයෝ කිහිපදෙනෙක් පැවසූහ.
ජනාධිපති වැය ශීර්ෂයට විරුද්ධව ඡන්දය ප්‍රකාශ කරන බව කියා තිබුණු එජාප පාර්ලිමේන්තු මන්ත්‍රීවරයෙකු ජනාධිපති වැය ශීර්ෂය විවාදයට ගැනීමට පෙර අනිද්දා කළ විමසීමකදී කීවේ අයවැයට ශ්‍රීලනිපය සහයෝගය දැක්වූ පසුබිමක ජනාධිපති වැය ශීර්ෂයට විරුද්ධව ඡන්දය නොදෙන ලෙස අගමැති රනිල් වික්‍රමසිංහ තම කණ්ඩායමට උපදෙස් දුන් බවය.
ශ්‍රීලනිපයේ සහයෝගයෙන් අයවැය පරාජය කරන බව මීට පෙර විපක්ෂනායක මහින්ද රාජපක්ෂ ඇතුළු ඒකාබද්ධ විපක්ෂයේ මන්ත්‍රීවරුන් ප්‍රකාශ කර තිබුණු අතර මෛත්‍රීපාල සිරිසේන පාර්ශ්වයේ ඇතැම් ශ්‍රීලනිප මන්ත්‍රීවරුන්ද එම මතය ප්‍රකාශ කර තිබුණි. එමෙන්ම ජනාධිපති මෛත්‍රීපාල සිරිසේනද පවතින ආණ්ඩුව වෙනස් කළ යුතු බව ප්‍රකාශ කර තිබුණි. මාර්තු 12 වැනිදා පෙරවරුවේ ඒකාබද්ධ විපක්ෂයේ මන්ත්‍රී කණ්ඩායම රැස්වී අයවැයට විරුද්ධව ඡන්දය භාවිත කළයුතු යැයි තීන්දු කර තිබූ අතර එම රැස්වීමේදී මහින්ද රාජපක්ෂ මහතා කියා තිබුණේ මෛත්‍රීපාල සිරිසේන පාර්ශ්වය අයවැයට විරුද්ධව ඡන්දය දෙනු ඇතැයි ජනාධිපතිවරයා කියා තිබෙන බවය.
වාර්තා වන ආකාරයට අයවැය දෙවැනි වර ඡන්ද විමසූ මාර්තු 12 වැනිදා සවස 3ට පැවැත්වූ ශ්‍රීලනිප පාර්ලිමේන්තු කණ්ඩායම් රැස්වීමකදී ශ්‍රීලනිප මන්ත්‍රීවරුන් වන මහින්ද සමරසිංහ, දුමින්ද දිසානායක ඇතුළු පිරිසක් අයවැයට පක්ෂව ඡන්දය ප්‍රකාශ කිරීම හෝ ඡන්දය ප්‍රකාශ නොකර සිටීම කළ යුතු බව කියා ඇත. එහෙත් ඩිලාන් පෙරේරා, ශ්‍රියානි විජේවික්‍රම ඇතුළු පිරිසක් කියා ඇත්තේ අයවැයට විරුද්ධව ඡන්දය ප්‍රකාශ කළ යුතු බවය. ජනාධිපතිවරයා වරින් වර පැත්ත මාරු නොකළ යුතු බවත්, මහින්ද රාජපක්ෂ පාර්ශ්වය සමඟ සමගාමීව ඉදිරියට යා යුතු බවත් ඔවුන් පවසා ඇත. එසේ වුවද මෛත්‍රීපාල සිරිසේන ජනාධිපතිවරයා මහින්ද සමරසිංහ ඇතුළු මන්ත්‍රීවරුන්ගේ අදහසට එකඟ වෙමින් අයවැයේදී ඡන්දය ප්‍රකාශ නොකළ යුතු බව කියා තිබේ. මෙම සාකච්ඡාවෙන් පසුව මහින්ද රාජපක්ෂ මෛත්‍රීපාල සිරිසේන අමතා තීන්දුව වෙනස් කිරීම ගැන විමසා ඇති අතර, තම පක්ෂයේ මන්ත්‍රී කණ්ඩායමේ බලපෑම නිසා එම තීන්දුව ගත් බව මෛත්‍රීපාල සිරිසේන ජනාධිපතිවරයා කියා තිබේ.
අනිද්දා සමඟ අදහස් දැක්වූ අයවැයට පක්ෂ ශ්‍රීලනිප පාර්ලිමේන්තු මන්ත්‍රීවරයෙකු ප්‍රකාශ කළේ ජනාධිපතිවරයා අයවැයට විරුද්ධව ඡන්දය ප්‍රකාශ කිරීමට තම කණ්ඩායමට බලපෑම් කරනු ඇතැයි බලාපොරොත්තුවෙන්, එයට මුහුණදීමට සූදානමෙන් එම කණ්ඩායම ඉහත රැස්වීමට ගිය බවය. ජනාධිපතිවරයා එයට ප්‍රතිවිරුද්ධ අදහසක් දැරීම නිසා තම කණ්ඩායම පුදුමයට පත්වූ බව ඔහු කීය.
අනිද්දා සමඟ අදහස් දැක්වූ ශ්‍රීලනිප ජාතික සංවිධායක දුමින්ද දිසානායක, ජනාධිපතිවරයා සහභාගි වූ රැස්වීමකදී ගත් තීන්දුවක් අනුව ශ්‍රීලනිපය ඡන්දය ප්‍රකාශ නොකර සිටි බව තහවුරු කළේය. අයවැය තුන්වැනි වර කියවන අවස්ථාවේදීත් අයවැයට විරුද්ධව ඡන්දය ප්‍රකාශ කිරීමේ අදහසක් නොමැති බව පැවසූ අමාත්‍යවරයා, වැඩිදුරටත් පැවසුවේ ජනාධිපතිවරයා ආණ්ඩුවේ ප්‍රධානියා වන නිසා ශ්‍රීලනිපයට විරුද්ධ විය නොහැකි බවයි. ■
අයවැයට මෛත්‍රීගේ සහාය
ඥානසාර හිමි හොර උපස්ථායක
අධිකරණයට අපහාස කිරීමේ චෝදනාවට වරදකරු කරන ලදුව අවුරුදු හයක සිරදඬුවමක් ලබා බන්ධනාගාරගතව සිටින බොදු බල සේනාවේ ලේකම් ගලගොඩඅත්තේ ඥානසාර හිමි බන්ධනාගාර රෝහලේ අංක 1 වාට්ටුවේ උපස්ථායකයකු ලෙස කටයුතු කරන බව බන්ධනාගාර ආරංචි මාර්ගවලින් වාර්තා වෙයි. එහෙත් රෝහල් උපස්ථායකයකු හැටියට කළ යුතු කිසිම සේවයක් ඒ හිමියන් නොකරන බවද, ඊට අදාළ ඇඳුම නොඇඳ තවදුරටත් සිවුරම හැඳගෙන සිටින බවද වාර්තා වෙයි. මේ ආකාරයෙන් සිවුරු හැඳ සිටීමට, උපස්ථායකයකු හැටියට රෝහලට වී සිටීමට හා තමාට වෙනම ඇඳක් මේසයක් පුටුවක් ආදිය තබාගෙන බන්ධනාගාර රෝහල තුළ කාර්යාලයක් පවත්වාගෙන යෑමට බන්ධනාගාර රෝහලේ සමහර වෛද්‍යවරුන්, බන්ධනාගාර ජේලර්වරුන් මෙනම සමහර ඉහළ නිලධාරීන්ද එහිමියන්ට උදව් කරන බව තවදුරටත් වාර්තා වෙයි.
වාට්ටුවේ පසෙක තමාට වෙනම ඇඳ, පුටුව, පොත් රාක්කය හා මේසය තබාගෙන සිටින්නට තිබෙන අවකාශය භාවිත කරමින් ඥානසාර හිමි බන්ධනාගාරගත මත්ද්‍රව්‍ය ජාවාරම්කරුවන් හා වෙනත් වැරදිකරුවන් එහි ගෙන්වාගෙන දේශපාලන සාකච්ඡා තබන බවද අපේ ආරංචි මාර්ග කියයි.
දින 51 නීතිවිරෝධී ආණ්ඩුව කාලයේදී නාමල් රාජපක්ෂ මන්ත්‍රීවරයා කැඳවා බන්ධනාගාරගතව සිටින එල්ටීටීඊ නායකයකුවූ සුරේන් නමැත්තා සමග සාකච්ඡා කරන්නට පහසුකම් සැපයීමද ඥානසාර හිමියන් කර තිබේ. තමන්ගේ ආණ්ඩුවකින් එල්ටීටීඊ දේශපාලන සිරකරුවන් නිදහස් කරන බවට නාමල් රාජපක්ෂ ප්‍රසිද්ධියේ කීවේ ඒ හමුවෙන් පසුවය.
දේශපාලන සාකච්ඡාවලට අමතරව, බන්ධනාගාර රෝහල තුළ විවිධ ව්‍යාපාරවල යෙදෙන්නටද ඥානසාර හිමියන් පටන්ගෙන තිබෙන අතර, ව්‍යාපාරික හා මත්ද්‍රව්‍ය ජාවාරම්කාර ධනවතුන් බන්ධනාගාර රෝහලට ඇතුළත් කරගැනීමේ තැරැව්කරුවකු වශයෙන්ද එහිමියන් කටයුතු කරන්නට පටන්ගෙන තිබේ. ඒ අතර ඔහුට සීමාවක් නැතිව පිටතින් කෑම ලැබුණු අතර සීමාවක් නැතිව අමුත්තන් හමුවීමටද අවස්ථාව ලැබී තිබේ.
කරදරයක් වූ නිසාත්, ඔහුට කිසිම රෝගයක් නැති නිසාත්, රෝහලෙන් මුදාහැරීමට රෝහල භාර වෛද්‍ය නිලධාරිනිය පියවර ගෙන තිබේ. එම තීරණය දැනගැනීමෙන් පසු වෛද්‍ය නිලධාරිනියගේ කාමරයට ගිය ඥානසාර හිමි, අසභ්‍ය වචනයෙන් වෛද්‍ය නිලධාරිනියට බැනවැදුණු බව අපේ ආරංචිමාර්ග කියයි.
පසුව බන්ධනාගාර අධිකාරිවරයා ඥානසාර හිමියන් ‘රෝහල් පාටිය’ට ඇතුළත්කොට එවා ඇති අතර, ‘පාටියට ඇතුළත් නම් පාටි වාට්ටුවට ඔහු යායුතුයැ’යි වෛද්‍යවරිය නියම කළ විට, තමාගේ ඇඳ, පුටු මේස ඇදගෙන ඥානසාර හිමියන් පාටි වාට්ටුවට ගොස් ඇති නමුත්, ඊට පසුදිනම නැවතත් රෝහල් උපස්ථායකයකු හැටියට නම් කරවාගෙන රෝහලට පැමිණ තිබේ. දැන් ඔහු ජම්පරයක් අඳින්නේ නැතිව සිවුරේ සිටිමින් නමුත් උපස්ථායකයකුට හිමි කිසිම සේවයක් නොකර, සුපුරුදු පරිදි දේශපාලන සාකච්ඡා බන්ධනාගාර රෝහල තුළ පවත්වමින් කල් යවන බව අපගේ ආරංචි මාර්ග වාර්තා කරයි. ■
අරුණ ජයවර්ධන
ආරාමය හැදුවොත් ගෝඨාට කැමතියි : වාසු
අහිංසකයන්ගේ ආරාමය නම් ස්මාරකය යළි ඉදිකිරීම ඇතුළු යෝජනා කිහිපයකට එකඟ වුවහොත් ගෝඨාභය රාජපක්ෂ මීළඟ ජනාධිපතිවරණ අපේක්ෂකයා ලෙස පිළිගැනීමට තමා සූදානම් බව ඒකාබද්ධ විපක්ෂයේ පාර්ලිමේන්තු මන්ත්‍රී වාසුදේව නානායක්කාර පැවසීය.
අසූව දශකයේදී ශ්‍රී ලංකා රජය විසින් ඝාතනය හා අතුරුදන් කරවන ලද පුද්ගලයන් වෙනුවෙන් චන්ද්‍රිකා බණ්ඩාරනායක රජය විසින් පාර්ලිමේන්තු මංසන්ධියේ මෙම ස්මාරකය ඉදිකර තිබුණි. ගෝඨාභය රාජපක්ෂ ආරක්ෂක හා නාගරික සංවර්ධන අමාත්‍යාංශයේ ලේකම්වරයාව සිටි කාලයේදී මෙම ස්මාරකය කඩා බිඳ දමා දියත උයන ඉදිකළ බවත්, එම ක්‍රියාව ඇතුළු ගෝඨාභය රාජපක්ෂගේ චර්යාවේ ඇතැම් ලක්ෂණවලට තමා විරුද්ධ බවත් ඔහු කීය. එම ලක්ෂණ වෙනස් කරගැනීමට පොරොන්දු වුවහොත් තමාගේ සහාය හිමිවන බව ඔහු වැඩිදුරටත් පැවසීය.
නානායක්කාර ගෝඨාභය රාජපක්ෂ ජනාධිපතිවරණ අපේක්ෂකයා ලෙස තෝරාගැනීමට එරෙහිව මීට පෙර ප්‍රසිද්ධියේ අදහස් දැක්වූ අයෙකි. ගෝඨාභය රාජපක්ෂ ඇමෙරිකානු ද්විත්ව පුරවැසිභාවය ඇති අයෙකු නිසා ජනාධිපතිවරණ අපේක්ෂකත්වයට නුසුදුසු බවත් ඔහු පෙන්වාදී තිබුණි.
පුරවැසිභාවය පිළිබඳව විමසීමේදී නානායක්කාර මන්ත්‍රීවරයා ප්‍රකාශකළේ අපේක්ෂකත්වය ලැබුණොත් පුරවැසිභාවයේ ප්‍රශ්නය නිරාකරණය කරගත හැකියැයි ගෝඨාභය රාජපක්ෂ පැවසූ බවය.
ඔහු වැඩිදුරටත් පැවසුවේ, ඒකාබද්ධ විපක්ෂය විසින් මීළඟ ජනාධිපතිවරණ අපේක්ෂකයා ලෙස මෛත්‍රීපාල සිරිසේන තෝරා නොගත්තොත් මෛත්‍රීපාල සිරිසේන තනිව ඉදිරිපත් වීමට ඉඩකඩක් ඇතැයි ආරංචි වන බවයි. එහෙත් ගෝඨාභය රාජපක්ෂට මෛත්‍රීපාල සිරිසේන සහයෝගය දැක්වීමට ඉඩක් ඇතැයි විශ්වාස කරන බව ඔහු කීය. මෛත්‍රීපාල සිරිසේන හා ගෝඨාභය රාජපක්ෂ අතර මිත්‍රත්වයක් පැවතීම එසේ කල්පනා කිරීමට හේතුව වන බව ඔහු කීය. ■
හමුදාපතිකමට සීතල යුද්ධයක්
සිය විශ්‍රාම දිවියට පෙර හෝ සේවා දිගුවක් ලබාගනිමින් හෝ ඊළඟ හමුදාපති ධුරයට පත්වීම සඳහා මේජර් ජෙනරාල් ශවේන්ද්‍ර සිල්වා දරන උත්සාහය නිසා ඔහුත් ඊළඟ හමුදාපති ධුරයට සුදුසුකම් ලබා තිබෙන මේජර් ජෙනරාල් සත්‍යප්‍රිය ලියනගේත් අතර සීතල යුද්ධයක් ආරම්භ වී ඇතැයි වාර්තා වේ.
මේජර් ජෙනරාල් ශවේන්ද්‍ර සිල්වා ජනාධිපති දියණි චතුරිකා සිරිසේන සමඟ ළඟ හිතවත්කම් පැවැත්වීම,ගජබා රෙජිමේන්තුවේ උත්සව සංවිධානය කර ජනාධිපතිවරයා ඒ සඳහා කැඳවීම යන ක්‍රියාකාරකම් පසුගිය කාලයේදී කර තිබුණි.
සත්‍යප්‍රිය ලියනගේගේ සහෝදරයා වන හිටපු මේජර් ජෙනරාල් ධම්මික ලියනගේ මේ වන විට ජනාධිපතිවරයාගේ උපදේශකයෙකු ලෙස ජනාධිපති ලේකම් කාර්යාලයේ සේවය කරන අතර ඔහුද සිය සහෝදරයා වෙනුවෙන් පෙනී සිටින බව වාර්තා වේ.
ශ්‍රී ලංකා යුද හමුදාවේ සම්ප්‍රදායට අනුව ඊළඟ හමුදාපති ධුරයට පත් නොවුණහොත් මේජර් ජෙනරාල් ශවේන්ද්‍ර සිල්වා වයස අවුරුදු 55 සම්පූර්ණ වීම නිසා ජුනි මස 21 වැනිදා විශ්‍රාම ගත යුතු අතර තවදුරටත් හමුදාව තුළ සිටීමට ජනාධිපතිවරයා ඔහුට සේවා දිගුවක් හෝ ඔහුගේ විශ්‍රාමයට පෙර යු හමුදාපති ධුරය ලබාදිය යුතුය.
වත්මන් යුද හමුදාපති ලුතිනන් ජෙනරාල් මහේෂ් සේනානායකගේ සේවා දිගුව අගෝස්තු මස 22 වැනිදා දක්වා ක්‍රියාත්මක වන අතර ඔහු එම දිනය දක්වා යුද හමුදාවේ කටයුතු කළහොත් හා සේවා දිගුවක් නොලැබුණහොත් ශවේන්ද්‍ර සිල්වාට විශ්‍රාම යෑමට සිදුවනු ඇත.
එසේ වුවහොත් ඊළඟට යුද හමුදාපති ධුරය සඳහා සුදුසුකම් සපුරා සිටින අය අතර ඉදිරියෙන් සිටින්නේ මේජර් ජෙනරාල් සත්‍යප්‍රිය ලියනගේය. ඔහුට වයස අවුරුදු 55 පිරෙන නොවැම්බර් 14 වැනිදා දක්වා යුද හමුදාවේ කටයුතු කළ හැකිය.
වත්මන් යුද හමුදාපතිවරයා ඉක්මනින් විශ්‍රාම යැවිය යුතු නම් ඔහුට ත්‍රිවිධ හමුදා මාණ්ඩලික ප්‍රධානි ධුරය ලබාදිය යුතු අතර ඒ සඳහා රවීන්ද්‍ර විජේගුණරත්න එම තනතුරෙන් විශ්‍රාම ගැන්විය යුතුය. රවීන්ද්‍ර විජේගුණරත්න එම තනතුරට පත්වී මේ වසරේ අගෝස්තු 17 දිනට වසර දෙකක් සම්පූර්ණ වේ.
දැනට ත්‍රිවිධ හමුදාපතිවරුන් අතර ජ්‍යෙෂ්ඨතමයා වශයෙන් සැලකෙන ගුවන් හමුදාපති එයාර් මාර්ෂල් කපිල ජයම්පති ඔහුට ලබාදී ඇති වසරක සේවා දිගුව මැයි මස 25 දින අවසන් කරන අතර, ත්‍රිවිධ හමුදා මාණ්ඩලික ප්‍රධානී ධුරයට ඊළඟට සුදුසුකම් ලැබීමට නියමිතව ඇත්තේ
මෛත්‍රී වෙනම එයි
පොදුජන පෙරමුණ හා ශ්‍රීලනිපය එක්වූ සන්ධානයක ජනාධිපති අපේක්ෂකයා ලෙස තමාට තරග කිරීමට අවස්ථාව නොලැබීමේ තත්වය තුළ ජනාධිපතිවරණයට ශ්‍රීලනිපයෙන් තනිව ඉදිරිපත් වීමට ජනාධිපති මෛත්‍රීපාල සිරිසේන මහතා සැලසුම් කරමින් සිටින බව ශ්‍රීලනිප ආරංචිමාර්ග පවසයි.
ශ්‍රී ලංකා පොදුජන පෙරමුණේ ජනාධිපතිවරණ අපේක්ෂකත්වය ලබන තැනැත්තෙකු පොදුජන පෙරමුණේසාමාජිකත්වය ගත යුතු බව මාර්තු 13 වැනිදා ශ්‍රී ලංකා පොදුජන පෙරමුණේ කාර්යාලයේදී මාධ්‍ය සාකච්ඡාවකට එක්වෙමින් බැසිල් රාජපක්ෂ ප්‍රකාශ කර තිබීමත්, මහින්ද රාජපක්ෂ ගෝඨාභය රාජපක්ෂට සහාය දක්වන බව පැවසීමත් එම තීන්දුවට හේතු වී තිබේ.
ඒ අනුව ඉදිරියේදී ශ්‍රීලනිපය වෙනම මැතිවරණ දේශපාලන ව්‍යාපාරය ආරම්භ කිරීමට නියමිත බව වාර්තා වෙයි. පොදුජන පෙරමුණ හා එක්සත් ජාතික පක්ෂය යන දෙපාර්ශ්වයටම එරෙහිව එම මැතිවරණ ව්‍යාපාරය කිරීමට සැලසුම් කර තිබේ. ජනාධිපතිවරයාගේ මත්ද්‍රව්‍ය විරෝධී ව්‍යාපාරය, මරණ දඬුවම ලබාදීම ඇතුළු කාරණා සහ ප්‍රතිවාදී පක්ෂ දෙකටම එල්ලවී තිබෙන දූෂණ චෝදනා මුල් කරගනිමින් මෙම ව්‍යාපෘති කිරීමට බලාපොරොත්තු වෙයි.
මේ පිළිබඳව අදහස් දක්වමින් ශ්‍රීලනිප ජාතික සංවිධායක දුමින්ද දිසානායක පැවසුවේ වෙනත් පක්ෂවලින් කවුරුන් ඉදිරිපත් කළත්, ශ්‍රීලනිපය ජනාධිපතිවරණ අපේක්ෂකයා ලෙස ජනාධිපති මෛත්‍රීපාල සිරිසේන ඉදිරිපත් කිරීමට බලාපොරොත්තු වන බවය. ඔහු වැඩිදුරටත් පැවසුවේ ශ්‍රීලනිපය මැයි දින රැළිය වෙනම පවත්වන්නට බලාපොරොත්තු වන බවත්, ඉදිරියේදී ශ්‍රීලනිපය දිස්ත්‍රික් මට්ටමෙන් රැස්වීම් මාලාවක් පැවැත්වීමට නියමිත බවත්ය.
මේ හේතු නිසා ශ්‍රීලනිපය හා පොදුජන පෙරමුණ අතර සන්ධානයක් ඇති කරගැනීමේ සාකච්ඡාද සාර්ථක නොවනු ඇතැයි වාර්තා වෙයි. මාර්තු 14 වැනිදා විපක්ෂනායක කාර්යාලයේදී ශ්‍රීලනිප හා ශ්‍රී ලංකා පොදුජන පෙරමුණු නියෝජිතයන් අතර සන්ධානය පිළිබඳව සාකච්ඡාවක් පවත්වා තිබුණි. එම සාකච්ඡාව සාර්ථකව නිමා වූ බව අනිද්දා කළ විමසීමකදී ශ්‍රී ලංකා නිදහස් පක්ෂයේ මහලේකම් දයාසිරි ජයසේකර පැවසීය. එසේ වුවද සන්ධානයේ ආකෘතිය, සංයුතිය, ජනාධිපතිවරණ අපේෂකත්වය ආදි කරුණු පිළිබඳව මෙම සාකච්ඡාවේදී කතා නොකළ බව වැඩිදුරටත් විමසීමේදී ඔහු කීය. ප්‍රතිපත්තිමය කාරණා පිළිබඳව සාකච්ඡා කළ බව ඔහු කීය. මාර්තු 21 වැනිදා තවත් සාකච්ඡාවක් පැවැත්වීමට බලාපොරොත්තු වෙන බවද ඔහු කීය. ■
අපේක්ෂකයා ගෝඨා මහින්ද තීරණය කරලා
ශ්‍රී ලංකා පොදුජන පෙරමුණේ ජනාධිපතිවරණ අපේක්ෂකයා ලෙස ගෝඨාභය රාජපක්ෂ ඉදිරිපත් කිරීම සඳහා මහින්ද රාජපක්ෂ තීරණය කර ඇතැයි එම පක්ෂයේ ප්‍රබලයෙක් අනිද්දා වෙත ප්‍රකාශ කළේය.
ගෝඨාභය රාජපක්ෂ මීළඟ ජනාධිපති අපේක්ෂකයා ලෙස තරගවැදීමේ තීරණය පසුගිය 2018 වර්ෂය අවසන් වනවිටද රාජපක්ෂ පවුල තීරණය කර තිබුණ බව කී එම ප්‍රකාශකයා තවදුරටත් පැවසුවේ එලඹෙන අගෝස්තු මාසය වනවිට පක්ෂයේ මෙම තීරණය නිල වශයෙන් රටට ඉදිරිපත් කරන බවය.
මාර්තු 13 වෙනිදා බත්තරමුල්ල නෙළුම් මාවතේ පොදුජන පෙරමුණේ පක්ෂ කාර්යාලයේ පැවති මාධ්‍ය හමුවකදී ද බැසිල් රාජපක්ෂ ප්‍රකාශ කර තිබුණේ තම පක්ෂයේ මීළඟ ජනාධිපතිවරණ අපේක්ෂකයා රාජපක්ෂවරයෙකු වන බවය. ඔහු වැඩිදුරටත් ප්‍රකාශ කළේ ඔහු කවුරුන්ද යන තීරණය මේ වනවිටද අරගෙන තිබෙන බවය.
අනිද්දා වෙත අදහස් දක්වමින් ඉහත ප්‍රකාශකයා පැවසුවේ වාසුදේව නානායක්කාර, කුමාර වෙල්ගම ආදින්ට ගෝඨාභය අපේක්ෂකයා වීම පිළිබඳව තිබුණු ප්‍රශ්න ඔවුන් මුහුණට මුහුණ මුණගැසී සාකච්ඡාකර මේ වනවිට විසඳාගෙන ඇති බවය. ඔහු වැඩිදුරත් පැවසුවේ ගෝඨාභය රාජපක්ෂ තරගයට එන්නේ නම් ඔහුට ජනාධිපති සිරිසේනගේ සහාය ලබාගැනීම සඳහා විමල් වීරවංශ පෙරමුණ ගෙන සාකච්ඡා කරන බවය. එහිදී උපජනාධිපති තනතුරක් ඇතිකිරීම, ජාතික ලැයිස්තු මන්ත්‍රී ධුර සිරිසේන පාර්ශ්වයට ලබාදීම ආදි කරුණු මූලික කරගෙන සාකච්ඡා පවත්වන බවය. ■
සජිත් පෙරටු කරගෙන රනිල් සටනට
මීළඟ ජනාධිපතිවරණයේදී එක්සත් ජාතික පෙරමුණ පාර්ශ්වයේ ජනාධිපති අපේක්ෂකයා ලෙස රනිල් වික්‍රමසිංහ හා අගමැති අපේක්ෂකයා ලෙස සජිත් ප්‍රේමදාස ඉදිරිපත්වනු ඇතැයි එජාපයේ ප්‍රබලයෙක් පැවසීය.
සජිත් ප්‍රේමදාසට 2020දී ජනාධිපතිවරණ අපේක්ෂකයා වීමට බලාපොරොත්තුවක් නොමැති බව දැනගන්නට තිබෙන බවත් ඔහු අනිවාර්යෙන්ම අගමැති අපේක්ෂකයා බව පක්ෂයේ නායක රනිල් වික්‍රමසිංහ ප්‍රකාශයට පත්කළ යුතුයැයි එජාපයේ සජිත් ප්‍රේමදාස පාර්ශවයේ මතය වන බවත් ඔහු කීය. පක්ෂ සාමාජිකයන් සහ පක්ෂයේ ආධාරකරුවන් අතර ඉහළම ජනප්‍රියතාවක් හිමිකරගෙන සිටින සජිත් ප්‍රේමදාස අගමැති අපේක්ෂකයා ලෙස නම් කිරීම මගින් රනිල් වික්‍රමසිංහ ජනාධිපති කිරීම සඳහා වන සටන පහසුවෙන් ජයගත හැකි බවට පක්ෂය තුළ මතයක් ගොඩනැගී ඇති බවටද එම ප්‍රකාශකයා පැවසීය ■
කැලැරන්ස් කියන්නේ ව්‍යතිරේකයක්
ඔබේ නවතම පර්යේෂණ කෘතියේ සංයුතිය කෙසේද?
පොතේ සංයුතිය පරිච්ඡේද කිහිපයකින් යුක්තයි. මා මෙහි කතා කරන්නේ ගිතාරුකාර සංගීතඥයෙකුගේ සංගීත භාවිතාව ගැන නිසාවෙන් පළමු පරිච්ඡේදය වෙන් වුනේ ගිතාරුවේ ආගමනය, ඊටත් කලින් තත් භාණ්ඩවල ආගමනය, ඊටත් පෙර සංගීතයේ ආගමනය සිදුවුන ආකාරය පිළිබඳ විමර්ශනයටයි. ඒ කියන්නේ දළ වශයෙන් සංගීතය හා සංගීත භාණ්ඩ උත්පාද වුනේ කොහොමද? ඒ සම්බන්ධව තිබෙන පුරාකතා මොනවද සහ තත් භාණ්ඩ හැදුන ආකාරය කියන කාරණා. මොකද තත් භාණ්ඩ කියන්නේ මානව ශිෂ්ඨාචරයේදී මානවයා සොයාගන්නා ලද සංකීර්ණ සංගීත භාණ්ඩයක් .ඒ තත් භාණ්ඩ වලින් ගිතාරුව ව්‍යුත්පන්න වුනේ කොහොමද කියන කාරණාව සහ ක්‍රි.පූ. 3000 පමණ ඉඳලා කොහොමද ඒක මේ පැත්තට ආවේ කියන කාරණාව තමයි මම මේකෙදි ගේන්නේ. එහෙම ගෙනත් ඉලෙක්ට්‍රික් ගිතාරුව ළඟදි ඒ කතිකාව නතර කරනවා
ඊට පස්සේ ක්ලැරන්සියානු සංගීතය පිළිබඳ කතිකාව පටන් ගන්නවා. එය කාර්තු තුනකට බෙදනවා. ඒ කාර්තු තුනේදි ඔහුගේ සංගීත පරිණාමය කෙසේද සිද්ධවුනේ, සංගීතයේ යම් ආකාරයක වැඩි දියුණු වීමක් සිද්ධවුනාද සහ ඒ සමග බිහිවූ සාහිත්‍ය ගැන කතා කරනවා.
පසුව මම වෙනම පරිච්ඡේදයකට ගේනවා ප්‍රාග් ධනය හා සංගීතය අතර ඇති සම්බන්ධය ගැන. මේ සංගීත ප්‍රවර්ගය විශ්ලේෂණය කරගන්න බෑ ප්‍රාග්ධන මැදිහත්වීම ගැන විශ්ලේෂණයකින් තොරව.
එයින් පසුව මේ කාරණා සැළකිල්ලට ගෙන මා නිෂ්ඨාව කරා එළඹෙනවා. ක්ලැරන්සියානු සංගීතය කාර්තු තුනේදී ගීතයේ, ටෙලි නාටකයේ, සිනමාවේ සහ වෙළඳ දැන්වීම් නිර්මාණකරනය යන නිර්මාණ කලාපයන්හි විශේෂත්වය ගැන කතා කරනවා. එතකොට වෙනත් මාධ්‍යවල විශේෂයෙන්ම රූපවාහිනී මාධ්‍ය, ඒ කියන්නේ ශ්‍රව්‍ය හා දෘශ්‍ය මාධ්‍ය වල එකතුවෙන් බිහි වූ සුසීමා, නිදිකුම්බා මල්, කුමාරයාණෙනි වගේ ටෙලි නාටක වල සංගීතමය ලක්ෂණ සහ ඒවාගෙන් හෙලිදරව් වන සංගීතමය චරිත ලක්ෂණ නැතිනම් සංගීතමය චින්තාව ගැන සාකච්ඡා කරනවා.
සිනමාව ගැන සලකා බැලීමේදී මම එක් විශේෂ නිදර්ශනයක් ගත්තා. එය ඉතාම සංකීර්ණ නිදර්ශනයක්. ඒ තමයි සිකුරුලියා චිත්‍රපටයේ සිකුරුලියා ගීතය. ඒ වගේම ඔහුගේ ගීතම උදාහරණයට ගනිමින් තමයි මගේ උපන්‍යාසය සාධනය කරන්නේ.
ඔබ ක්ලැරන්සියානු සංගීතය ලෙස හඳුනාගන්නේ කුමක්ද?
ඇත්තටම එය බිහිවන්නේ ක්ලැරන්ස් විජේවර්ධනයන්ගෙන් පස්සේ. මම එයට කියන්නේ ක්ලැරන්සියානු සංගීතය කියල. අප එය හඳුනාගත යුත්තේ නව සංගීත ප්‍රවර්ගයක් හැටියටයි.
ඔබ කියන්නේ ඔහු නව සංගීත ප්‍රවර්ගයක් බිහි කරන බවද?
ඔව්. ඇත්තටම ඔහු හරහා එවැන්නක් බිහි වෙනවා. නමුත් එම නව රටාව තුල පැරණි ප්‍රාග් ක්ලැරන්සියානු සංගීතයේ යම් යම් කොටස් තිබෙනවා. ඔහුම කියනවා ඔහු බීට්ල්ස් සංගීත කණ්ඩායම ආසාදනය වුණා කියලා. නමුත් මට නම් බීට්ල්ස් කණ්ඩායමේ කිසිම ජානයක් ක්ලැරන්සියානු සංගීතය තුළ සොයා ගන්න ලැබුනේ නෑ. නමුත් කන්ට්‍ර සහ වෙස්ටර්න් සංගීතයේ ^country and western music } යම් ජාන ලක්ෂණ ක්ලැරන්සියානු සංගීතය තුළ දක්නට ලැබෙනවා, ඒකටත් හේතු තිබෙනවා. ඒ තමයි ඔහුට පසු කාලීනව එන ශිල්පීන්. උදාහරණයක් ලෙස ඩික්සන් ගුණරත්ත වගේ ගිතාරු වාදකයින්. ඩික්සන්ට පෙර ක්ලැරන්සියානු සංගීතය ගිතාරු මූලික සංගීතයක් නෙවෙයි. සාමාන්‍යයෙන් ක්ලැරන්ස් කිව්වම අපට මතක් වෙන්නේ ගිතාරයයි. නමුත් ඔහුගේ මූන්ස්ටෝන් සංගීත කණ්ඩායමේ ගිතාරුවක් ඇසෙන්නේම නැති තරම්. විශේෂයෙන්ම ඔහුගේ රිදම් ගිතාරුව නම් ඇසෙන්නේම නෑ.
එතකොට කොහොමද මේ පොප් අයිකොන් ( pop icon ) එක, ගිතාර් අයිකොන් එක බවට පත්වන්නේ. මේවා ඉතා සංයුක්ත කාරණා. ඔහු ගේන අළුත් ප්‍රවණතාවය තමයි මේ ගිතාරු මූලික් සංකලිපය සහ රසික හිතෛශී සරල ගීත ධාරාව. මොකද ඔහුට කලින් ලොස් කබෙලෝස් ( los cabellos ), නෙවිල් ප්‍රනාන්දු වගේ හාදයෝ භාෂාවේ සහ සංගීතයේ විදග්ධ උදවිය. ඒ අයගේ තිබුනේ ඉතාම සංකීර්ණ සංගීත පඨිතයන්. එහෙමත් නැත්නම් සංකීර්ණ සංගීත වියමන්. ඇත්තටම ව්‍යුහාත්මකව තෝරා බේරා ගතහොත් ක්ලැරන්සියානු සංගීතයේ හමුවන්නේ හාර්මොනි එකක් හෝ දෙකක් පමණයි. නමුත් කැබෙලෙරෝස් ( cabeller ) විතරක් නෙවෙයි ලා සිලොනියන්ස්, ලා ෆ්ලෙමින්කොස්, ලා බම්බාස් වගේ සංගීත කණ්ඩායම් වල සංගීත අනුපථයන්, සුසංවාදී අනුපථයන් ප්‍රධාන හාර්මොනි හතරකින් ගොඩ නංවා තිබෙනවා. ඒවා ඉතාමත් සංකීර්ණයි. නමුත් ඒවා සාමන්‍ය කෙනෙකුටවත් ගයන්න පුළුවන් ඒවා නෙවෙයි.
ක්ලැරන්සියානු සංගීතය ගැන තව දුරටත් විස්තර කළොත්
මම ඔහුගේ සංගීත චින්තාවේ පරිණාමය කාර්තු තුනකින් පැහැදිලි කරනවා. එහි පළමු කාර්තුවේ ගිතාරුව එන්නේම නෑ. ඒ කියන්නේ මූන්ස්ටෝන් කාලේ. පසුව ගෝල්ඩන් චයිම්ස් කලේ තමයි ඩික්සන් ගුණරත්න එන්නේ. එතැනින් තමයි ගිතාරුව ඇහෙන්න පටන් ගන්නේ. ඩික්සන් එන්න කලින් ඒ කියන්නේ මූන්ස්ටෝන් කාලේ සංගීත වයමන් ( musical texture ) ගත්තොත් ඒක ඉතා සරල ආකෘතික වයනයක්. නමුත් ඩික්සන්ගේ ආගමනයත් සමග අළුත් කෝඞ්ස් සහ වෙනත් ආකෘතීන් මතු වෙනවා. ක්ලැරන්සියානු සංගීතයට මේ වගේ වෙනස් වෙනස් හැඩතල සිදුවෙනවා පසුකාලීන සංගීතඥයින් හරහා සහ වාදකයින් හරහා. විශේෂයෙන්ම රුක්ෂාන් ගුණරත්න, රූකාන්ත ගුණතිලක වගේ අය හරහා. ක්ලැරන්ස් විසින් ගෙනාපු ඔහු විසින් යෝජනා කරපු අළුත් සම්ප්‍රදාය තමයි රසික හිතෛෂී සංගීත සම්ප්‍රදාය. ඒ තුළ ගිතාරුව තිබෙනවා. නමුත් එය තිබෙන්නේ ක්ලැරන්සියානු අර්ථයෙන් නෙවෙයි ඩික්සෝනියානු අර්ථයෙන්. මමත් ගිතාරු වාදකයෙකු හැටියට මම දන්නවා රිද්ම් ගිතාරුව කොහෙද තිබෙන්නේ ලීඞ් ගිතාරුව කොහෙද තිබෙන්නේ කියලා. මෙහිදී ඩික්සන් තමයි මේ ගිතාරු මූලික නාදය නැතිනම් සංඥාව ගෙන එන්නේ. මෙය අගය කිරීමට පාත්‍ර විය යුතුයි. කෙසේ වෙත්ත් මෙය අළුත් සම්ප්‍රදායක්. එය එවැන්නක් බවට පත්වන්නේ ඔහුගෙන් පසුව.
නමුත් මෙහි තිබෙන විශේෂම කාරණය තමයි ක්ලැරන්සියානු සංගීතය, සංගීතමය වශයෙන් පරිණාමය වුනේ නෑ. මොකද ක්ලැරන්සියානු සංගීතය ඊළඟ කාර්තුවේදී සර පුවරුවෙන් ( key board ) හා සින්තතයිසර් (ි ynthesizer ) ප්‍රතිස්ථාපනය වුණා. මෙය සිදුවන්නේ රූකාන්ත ගුණතිලකගේ සහ ආත්මා ලියනගේ ආගමනයත් සමග. එවිට ගිතාරු මූලික සංගීතයක් වෙනුවට සර පුවරුව මූලික් සංගීතයක් ඇතිවෙන්න පටන් ගත්තා. මේක ලෝකේ අනිත් රටවලත් මේ විදියට සුදුවුණා. ස්ටීව් වොන්ඩර්, එල්ටන් ජෝන් වගේ අය සමග 80 දශකයේ තමයි වඩා ප්‍රචලිත වෙන්න පටන් ගන්නේ. ඒ කියන්නේ හැත්තෑවෙන් පස්සේ තමයි ගිතාරුවේ අවගමනය පටන් ගන්නේ. මේ කාරණා නිසා ක්ලැරන්සියානු සංගීතය ආකෘතිකමය වශයෙන් වර්ධනය වෙන්නේ නෑ. ඔහු යෝජනා කල සංගීතය ඒ තුළම තිබෙනවා. තවද ඒ සංගීතය අරගෙන එය ප්‍රතිආයෝජනය වෙන්න පටන් ගන්නවා. ඒ සංගීතය අරගෙන වෙනස් නොකර, පරිණාමය නොකර, වැඩිදියුණු නොකර තියෙන එකම නා නා විධි වලින් සමජගත වෙනවා. ඒකට රසිකයිනුත් කමති වුනා. ඒක ගුරු කුලයකටත් වඩා කඳවුරක් බවට පත්වුනා. ඒ කඳවුරට විශාල බලයක් ආවා. ඒක ඉතාම හොඳ තත්වයක්. මොකද කණ්ඩායම් සංගීතය ‘තුප්පහි සංගීතය‘ කියන වචනය තමයි බොහෝ ප්‍රභූ සංගීතඥයන් පවා භාවිතා කරේ. එම නිසා පසු කාලීනව මෙය කඳවුරක් දක්වා වර්ධනය වීම වැදගත්. නමුත් ඒ තුලින් අළුත් නිර්මාණ ධාරාවන් හට ගත්තේ නෑ.
මේ අරුමැසි රසික් හිතෛශී සංගීතඥයා තුල සිට ගායකය ගැන ඔබේ විග්‍රහය?
මේ කණ්ඩායම් සංගීතක්කාරයෝ බහුතරයක් පල්ලිය ආශ්‍රිතව ඇති දැඩි වුන අය. ලොස් ෆ්ලෙමින්කොස් ගත්තත් සමනලයෝ ගත්තත් මේවායේ ප්‍රධානීන් රේමන්ඞ් ෆොන්සේකා සහ ස්ටැන්ස්ලි ප්‍රනාන්දු යන දෙදෙනාම පූජකවරු වෙන්න ඉගෙනගත්ත අය. මේ සංස්කෘතිය හුදෙක්ම පල්ලියේ ගීතිකා ගායනා කිරීමම නොවෙයි. ඔවුන් පූජකවරු වෙන්න ඉගෙන ගත්තේ. මේ ගායකයින්ට පල්ලියේ දැඩි බලපෑමක් තිබුණා. ඔවුන්ගේ තිබුනේ ඉතාම හොඳ පිරිසිදු හඬවල්. හැබැයි ක්ලැරන්ස් විජේවර්ධන කියන්නේ ව්‍යතිරේකයක්. ඔහු පල්ලිය ආශ්‍රිතව හැදුණු වැඩුණු කෙනෙක් නෙවෙයි. ඔහුගේ හඬ පිරිමැදුණු ශික්ෂිත හඬක් නෙවෙයි. මා මෙය කියන්නේ සංගීතඥයෙකු හැටියටයි. නමුත් කෙනෙක් ඒ ගැන කලබල වෙන්න පුළුවන්. නමුත් ඔබට පරීක්ෂාකර බලන්න පුළුවන් ඔහුගේ ගායනාවේ කලින් ගායකයන්ගේ වගේ පිරිපහදු සෘති මත පිහිටන තනුව මත යන එකක් නෙවෙයි. ඔහුගේ අලංකාර පවා ලංකාවේ වෙනස්ම අලංකාර ගැයුම්. අනෙක තමයි ලොස් ෆ්ලෙමින්කොස්, ලා බම්බාස් වගේ සංගීත අයගේ ගැයුම් පවා ඉතාම විද්ග්ධයි. නමුත් කැරන්සියානු ගායනය තුළ දියුණු ශික්ෂිත තාක්ෂණැයක් නෑ. ඒක විශේෂ කරුණක්. ඔහුගේ ගායනාව ගැන බොහෝ දෙනෙක් එලිපිට නොකියන දෙයක්. ඒක කිසිසේත්ම ඔහුට අගෞරවයක් හැටියට නෙවෙයි මා කීයන්නේ. කැරන්සියානු ගායනය නෙවිල් ප්‍රනාන්දු ගායනය තරම් සංවිධිත ශික්ෂිත හඬක්වත් ගායනයක්වත් නොවේ. අර පෙර කී අය පල්ලියේදී ගායනාව පුහුණු වුණා. නමුත් ක්ලැරන්ස් විජේවර්ධන එසේ පල්ලිය ආශ්‍රිතව පුරුදු පුහුණු වුණු අයෙක් නොවේ. ඒ වගේම තමයි ඔහුගේ හඬ දමනය නොවූ හඬක්. ඒ වගේම නොදැමුණු හඬක් තමයි විජය කුමරතුංගට තිබුනේ. එවැනි නොදමුණු හඬවල් කීපයක් ලංකාවේ ගායනා තුළ තිබුණා. ඒක ක්ලැරන්සියානු ගීත වල තිබෙන හාර්මොනි වලත් පැහැදිලි වෙනවා. සමහර වෙලාවට නිශ්චිත ස්වරයට ගයන්නේ නෑ. වෙනත් ස්වර වලට යන්නේ. නමුත් එහි සුවිශේෂී බව වන්නේ එයම එයට අදාළ හැඩයක් ගන්නවා. එය තමයි ක්ලැරන්සියානු ව්‍යතිරේකය
ක්ලැරන්ස් විජේවර්ධනයන් වාග් ගේය කරුවෙක්. ගායන, වාදන, සංගීතඥ භූමිකාවන්ට අමතරව ඔබගේ පර්යේෂණයට පාත්‍ර වූ ඔහුගේ ගේය පද රචක භූමිකාව කෙබඳු ද?
ඔහුගේ පද රචනා වල අනෙකුත් කණ්ඩායම් සංගීතක්කාරයන්ගේ පද රචනා වලට වඩා වෙනසක් තිබුණා. ඔහු ගම ඓන්ද්‍රීයව ජීවත් වුණු අයෙක්. රත්නපුර ප්‍රදේශයේ තමයි ඔහු ජීවත් වුනේ. ඔහු එම ප්‍රදේශවල ගැමි වහර තම පද රචනා වලට යොදා ගත්තා. එක ගීතයක ඔහු යොදා ගන්නවා “මගේ අලාභය ඒ සැටියා“ කියල. එවිට අපට කොළඹ යුගයේ කවිත් මතක් වෙනවා. ඔහුගේ ගීත සාහිත්‍ය ගතහොත් අළුත් වචන පවා බිහිවෙනවා. මාගේ වියොවෙන් වැනි ගීත වල ව්‍යක්ත සිංහලම නොවේ ඔහු භාවිතා කරන්නේ. එය ඔහුටම ආවේනික භාෂාවක්. “කිමද නාවේ“ වැනි ගීත වල එක් තැනක “පෙර නූයේ“ යනුවෙන් දැක්වෙනවා. “නූයේ“ වැනි වචනයක් සිංහල භාෂාවේ නැහැ. නමුත් “වූයේ“ යන පදයට සමපාත වන පරිදි ඔහු එය ගලපාගෙන තිබෙනවා. ඔහුට ඉතා හොඳ භාෂා ඥණයක් තිබූ බවක් මම අදහස් කරන්නේ නැහැ. නමුත් ඔහුට සංගීතමය භාෂාව පිළිබඳ හොඳ අවබෝධයක් තිබුණා.
එපමණක් නොවේ පසු කාලීනව සමාජ සංසිද්ධීන් දෙකක් ගැනත් ඔහු කතා කරනවා. එකක් තමයි ළමා අපයෝජන. “දෑ සමන් දැයෙහි“ කියන ගීතය නිර්මාණය කිරීම ඉන් එකක්. අනෙක තමයි 80 දශකයේ පාරේ හිඟා කමින් ගීත ගායනා කල අය එකතු කරලා ටවර් රඟහලේ පැවැත්වූ ප්‍රසංගය විවේචනය කරමින් ගීතයක් ලියුවා ඒ ප්‍රසංගය නිසා ඔවුන්ගේ තිබුණ වෘත්තියත් නැතිවුණා කියල. “මාවතේ අපි යැයි කියා“ තමයි ඒ සිංදුව.
තවත් දෙයක් තමයි දිලීප අබේසේකර වගේ චිචාරකයෙක් කියනවා ක්ලැරන්ස්ගේ භාෂාව තුළ ඉතා හොඳ උපමා රූපක තියෙනව කියල. මට හිතෙන තවත් දෙයක් තමයි “විලක් තිබුණා නෙළුම් පිපෙනා උදාවූ හිරු වගේ, මතක් වෙනවා හිතක් රිදවා එදා අද මෙන් වගේ. මේ වගේ පුනරුක්ත දෝෂ ඔහුගේ සමහර ගීත වල තිබුණා. ‘එදා අද මෙන් වගේ‘ කියන එකේ ‘මෙන්‘ කියන්නෙත් ‘වගේ‘ කියන්නෙත් දෙකම එකයි. නමුත් ඔහුට එළිවැට රිද්මය ගලපා ගැනීම සඳහා ඔහු එය භාවිතා කරනවා.
ඔහු විසින් යෝජිත ගීත සාහිත්‍යයත් ඔහුටම අවේනිකයි. ඒක ඉතාම රසික හිතෛෂී එකක්. උදාහරණයක් විදියට ‘ගමෙන් ලියුමක් ඇවිල්ලා‘, වගේ ගීත වල ‘මොකක් කියලාද දන්නෑ‘ කියන කොටස. මෙහි ‘මොකක්‘ කියන එක අව්‍යක්ත යෙදුමක් හැටියට තමයි සලකන්නේ. නමුත් ඔහුගේ පද රචනා වල එවැනි පද තිබෙනවා. එම ගීතයේම තිබෙනවා ‘තවත් ආරංචි ගොඩයි, කියන්නත් ලැජ්ජයි‘ කියල ව්‍යංගයක් තිබෙනවා. මේ වගේ හේතු නිසා ඔහු සංකල්ප රූප මැවිමෙහිලා ඔහුගේ වපසරිය තුළ හා ඔහුගේ භාෂා ලෝකය තුළ එය හොඳින් භාවිතා කල බව මා කියන්නට කැමතියි.
පොත එළි දකින උත්සවය සංවිධානය වී තිබෙන ආකාරය ගැන රසිකයන් දැනුවත් කළොත්…..
මම කලින් කියූ පරිදි වර්ෂ 1990න් පස්සේ ක්ලැරන්සියානු ගිතාරුව පසුව ආපු සර පුවරුවෙන් ( lead guitar ) ප්‍රතිස්ථාපනය වීමෙන් පසු නැවතත් මා විසින් ඉදිරිපත් කරන ලද ‘රෝමියෝ‘,‘රැඩිකල් ප්‍රේමය‘,‘අමීෂා‘ වගේ ගීත හරහා තමයි නැවතත් පොලා පනින්නේ. එතෙක් පවතිනේ ලීඞ් ගිතාරුවක් (කැ්ා ටමසඒර) . එයට නියමිත වැඩක් තිබෙනවා. ලීඞ් කොටස් වාදනය තමයි එකෙන් කරන්නේ. නමුත් මා එන්නේම ගිටරුවක් අරගෙන. මගේ ගීතවල මුල සිට අග දක්වාම තිබෙන්නේ ගිතාරුව. ඒ නිසා මේ ගිතාරු සංස්කෘතිය කොහොමද නූතන රැවුල් කොණ්ඩ වවාගත්තු කට්ටියට කොහොමද ආවේ කියන එක මෙහිදී කතා කරනවා.
මගේ ‘වේදිකාවේ අසුනකට බර වී‘ කියන ගීතය වර්ෂ 2000දී විතර ආපු එකක්. එකේ මුල සිට අග දක්වාම තියෙන්නේ ගිතාරය. එකේ ටැපින්ග් ( tapping ) තියෙනවා, අළුත් කෝඞ්ස් ( chords ) තියෙනවා. ඒ ගීත අහපු තරුණැයෝ ඒ මග ගියා. මගේ අධ්‍යනය තිබුණේ ලතින් අමරිකානු හා බොලීවියානු සංගීතය. ඒ වාදන තාක්ෂණ සියල්ල මගේ ගීත තුළ තිබුණා. එවිට අනෙක් සංගීතඥයන් එම තාක්ෂණය ගනු ලැබුවා. ඒක සම්ප්‍රදායක් වුණා. ලතින් ඇමෙරිකානු සංගීතය මෙහි විලාසිතාවක් වුණා. ඒකෙ මුල්ම ගීතය තමයි ‘අමීෂා‘ සහ ‘රංගධරයා‘. ඒක දන්න අය දන්නවා. එතකොට නූතන ගිතාරු මූලික සංගීතයේ මගේ මැදිහත්වීම කුමක්ද කියන එක ගැන අදහසක් දෙන්න උත්සාහ කරනවා. මොකද බොහෝ දෙනා සිතන්නේ මගේ මැදිහත්වීම තිබෙන්නේ එක්කෝ රූපවාහිනිය තුල එහෙමත් නැත්නම් සිනමාව තුල කියලා. නමුත් පොප් ගීතය තුල මගේ මැදිහත් හදපු ‘රැඩිකල් ප්‍රේමය‘ රොක් ප්‍රවර්ගයේ පළමු ගීතය හැටියට දක්වන්න පුළුවන්. ඉන්පසු එම වර්ගයේ ශානරයක් ආවා. ඒ කලයේ තිබුනේ ඉංග්‍රීසියෙන් රොක් සිංදු ගායනා කරන ශෛලියක්. විශේෂයෙන්ම ස්ටිග්මෙට් වගේ කණ්ඩායම්.
මේ රිද්ම, තාල ගිතාරු පද්ධතීන් කොහොමද 2000න් පස්සේ නූතන ලංකාවේ සිංහල ගීතයට එකතු වුණේ කියන එක ගැන බොහෝ දෙනෙකුට විශේෂ අදහසක් නැහැ. ඒ නිසාම මම එය රසිකයන් හා බෙදා ගන්න හිතුවා. ගිතාරුව වයමින් මම මේ පටන් ගත්ත සම්ප්‍රදාය මංජුල වෙඩිවර්ධන පැහැදිලි කරනවා ප්‍රතිකූල කල්තර මුමෙන්තුව (්බඑස ජමකඑමර්ක පදඩැපැබඑ) කියලා. මේ කාරණාව ගැන මෙම විෂය හදාරන විද්‍යාර්ථයින් දත යුතුයි කියන එක තමයි මගේ විශ්වාසය. නිවැරදි විශ්ලේෂණයකදී මේ සියල්ල අහුවේවි. ඒකට අපිට ගොඩෝ එනකං ඉන්න වෙනවා. ක්ලැරන්ස්, සුනිල් ශාන්ත, කේමදාස වැනි පූර්වජයන්ගේ ගොඩෝ බවට මම පත් වුනා. මම දැන් මගේ ගොඩෝ එනකන් බලං ඉන්නවා.
දිලීප වීරසිංහ
අපේ රටේ ගොඩාක් ඒවා මතක් වුණා
දැන් මාස ගාණක ඉඳලා Paolo Sorrentino නැමැති ඉතාලි ජාතික අධ්‍යක්ෂවරයා විසින් ලියා අධ්‍යක්ෂණය කරන The New Pope ටෙලි කතා මාලාව ඉතාලියේ රෝම නගරයේ රූගත කෙරෙනවා. The New Pope කියන්නේ රෝමානු කතෝලික පල්ලියේ මූලස්ථානය වන වතිකානුව ඇතුළේ පාප් වහන්සේ ඇතුළු කාදිනල්වරුන් සහ අනෙක් තනතුරු හොබවන පූජකවරුන්ගේ ජීවිත සහ ඔවුන්ගේ ක්‍රියාකලාපයන් අළලා නිර්මාණය වුණු ටෙලි කතා මාලාවක්. එය වතිකානුව ඇතුළත සිද්ද වෙනවා යැයි පිටපත් රචකයා විසින් පරිකල්පනය කරන ලද ඉතාමත් විවාදසම්පන්න සිදුවීම්වලින් පිරුණු නිර්මාණයක්. පාප් වහන්සේ ඇතුළු අනෙක් පූජකවරුන්ගේ ජීවිතවල සැගවුණු පරස්පර විරෝධතාවන්, සුඛෝපභෝගී පැවතුම්, රෝමානු කතෝලික පල්ලියේ මූල්‍යමය ගනුදෙනු, දේශපාලන උප්පරවැට්ටි, බලපොරය ආදි බොහෝ දේ සමග ඈඳුණු සිදුවීම් සහ අවස්ථා මේ නිර්මාණයට යොදාගෙන තිබෙනවා.
රූගත කිරීම් සිදුවෙන්නේ වතිකානුවට ඉතාම ආසන්නයෙන්, විවිධාකාර දර්ශනතලවල.
කිසිදු බාධාවක් නැහැ. දර්ශනතලවලට පාදිලිවරුන් කඩාපනින්නේ හෝ, පොලීසියෙන් පැමිණ ප්‍රශ්න කරන්නේ නැහැ. කතෝලික භක්තිකයන් රංචු පිටින් සංවිධානය කරගෙන ඇවිත් දර්ශන තල ඉදිරියේ කෑ මොර දෙන කිසිවෙකුත් නැහැ.
වතිකානුව ඇතුළත පාප් වහන්සේගේ කාමර, කාදිනල්වරුන්ගේ නිදන කාමර, පුස්තකාල, පල්ලියේ ගබඩාව, උද්‍යාන, රහස් කවුළු, හදිසි හමුවීම් ස්ථාන, නාන කාමර ආදි ස්ථාන පිළිබද පිටපතේ ලියා ඇති සවිස්තරාත්මක කාරණා එසේ ලියන්නට නම් රචකයා/අධ්‍යක්ෂවරයා වතිකානුව අභ්‍යන්තරය ගැන ඉතා ගැඹුරු අධ්‍යයනයක නිරත විය යුතුමයි. ඒ ගැන මා සල්ලාපයක යෙදී ඉන්නා අතරතුර (මාත් මේ නිර්මාණයේ චරිතයක් රඟපාන්නට ආ බැවින් තොරතුරු සොයා ගන්නට පුළුවන් වුණා) සහාය අධ්‍යක්ෂවරියකගෙන් විමසුවා. පිටපත ලියන්නට පෙර, තමන්ට වතිකානුව ඇතුළත සංචාරයක් කරන්නට අවසර දෙන්නැ’යි පල්ලියේ අදාළ ආයතනවලින් අධ්‍යක්ෂවරයා ඉල්ලීමක් කළ බවත්, ඔහුට ඒ අවසරය ලැබුණු බවත්, ඒ අනුව, ඔහුත්, පළවෙනි සහාය අධ්‍යක්ෂවරයාත්, කලා අධ්‍යක්ෂවරයාත් වතිකානුව ඇතුළත සෑම අස්සක මුල්ලකම දීර්ඝ සංචාරයක් කරමින් සියල්ල අධ්‍යයනය කළ බවත් ඇය මට පැහැදිලි කළා. ඒ සංචාරයේදී සාමාන්‍ය මිනිසුන්ට දකින්නට නොලැබෙන බොහෝ තැන් අධ්‍යක්ෂවරයාට දැක බලා ගන්නට ලැබුණු බවත් ඇය කියා සිටියා. ඒ සහය ඔහුට ලබා දී ඇත්තේ වතිකානුව විසින්මයි!
මට ඉතිං අපේ රට මතක් වුණා!! අපේ රටේ ගොඩක් ඒවා මතක් වුණා. !!
මේ නිර්මාණයේ අධ්‍යක්ෂවරයා ජිවත් වෙන්නෙත් රෝම නගරයේමයි. කවුරුවත් ඔහුගේ ගෙදරට ගල් ගහන්නේ නැහැ. මෙහි පාප් වහන්සේට රඟන නළුවාට මරණ තරජන එල්ල කරන්නට කෙනෙකුත් නැහැ.
පල්ලිය තියෙනවා. ආණ්ඩුව තියෙනවා. කලාව වෙනම ස්වාධීනව පවතිනවා. කලාකරුවන් නිදහසේ නිර්මාණවල යෙදෙනවා. තමන්ට කියන්නට ඇති දේ ඉතා නිදහසේ කියනවා. පූජකවරු තමන්ගේ වැඩක් කරගෙන ඉන්නවා. පුළුවන් දෙයක් තියෙනවා නං සහයෝගයත් දෙනවා. නිර්මාණය ගැන තමන්ට විවේචනයක්, අදහසක් පළ කරන්න තියෙනවා නං ඒකත් බොහොම ගෞරවනීයව කරනවා. ඒවාට බය වෙලා ඒවා නිසා වතිකානුව විනාස වෙනවා කියා කලබල වෙන්නේ නැහැ. දේශපාලන විගඩංකාරයො රට ගිනි තිය තියා, වාරණ නියෝග ඉල්ලගෙන යන්නෙත් නැහැ.
(අතීතයේ තත්ත්වය මීට වඩා බොහෝම වෙනස්. ඒක අපි කවුරුත් දන්නා කාරණයක්. නමුත් අද වෙනකොට මේ සමාජ ප්‍රගතිශීලී දිසාවට ගොඩාක් දුර ඇවිල්ලා. )
මට ඉතිං අපේ රට මතක් වුණා!!
නදී කම්මැල්ලවීර
(නදී කම්මැල්ලවීරගේ මුහුණු පොතෙනි.)
ශේෂය ආදරයමය! නොපවතිනු වස් ප්‍රේමයට පවතිමි
මාලතී කල්පනා කිවිඳියගේ ‘නොපවතිනු වස් ප්‍රේමයට පවතිමි’ හා ‘පියා නොහැඹූ පියාපත්’යන කාව්‍ය සංග්‍රයන් ප්‍රකාශයට පත්වී මාස ගණනක් ඉකුත්ව ගොසිණි. එහි කවි පිළිබඳ යම් කතා බහක් ඇතිවිණිද යන්න තක්සේරුවක් නොමැත. ඒ වෙනුවට හැන්දෑවක වටින් ගොඩින් කළුවර කඩා වැටෙමින් එද්දී තට්ටු ගෙදරක, කුලියට හිමි කොටසක, සඳලු තලයට වී සීතල බීර වීදුරුවක් තොලගාමින්, සිගරට්ටුවක දුම් රොටුවක් අදිමින් නිසි අරමුණකින් තොරව වීදියේ දුර ඈ බලාගෙන හුදකලාව ගෙවී යන බොහෝ දිනවල මතකයන් කීරිගස්වන ඇගේ ‘නොපවතිනු වස් ප්‍රේමයට පවතිමි’ කවි පොත මා නැවත නැවත පෙරළා බලමි. එමඟින් කිතිකවා දවා ලූ මෙන්ම විටෙක පණ ගැසූ ආදරයේ අංශු මාත්‍රයන් වෙත ඉව අල්ලමි. කෘතිය දොරට වැඩි අවස්ථාවේදී සන්නස්ගල කියූ පරිදි කාව්‍ය විචාරයන්හිදී බොහෝවිට සිදුවන්නේ කවිය විචාරය කිරීමක් නොව වස්තු විෂය විචාරය කිරීමකි. එබැවින් මෙයද, කිසිසේත්ම ඇගේ කවිය විවරණය කිරීමක් හෝ ඊට ඌන පූර්ණ සැපයීමක් නොව බීර තොල ගෑවෙද්දී රස නහරට දැනෙන තිත්ත මුසු මිහිර බඳුම ඇගේ කවියෙන් ස්පර්ශ කෙරෙන ආදරයේ තිත්ත රස ආවර්ජනය කිරීමකි. රසවිඳීමකි.
සැතක් ගෙන තියුණු ලෙස ඔබ සිදුරු කළ තැනින්
ප්‍රේමයේ සඳ බිඳක් ගල්වමි
අතක් ගිළිහුණු තැනින් අඩක් පිරි විත තබා
යා යුතුම මග හෙමින් ඇවිදිමී (පිටුව-35)
ඔහු හෝ ඇය විසින් ප්‍රේමාග්නිය දැල්වූ තැන, හදවත සිදුරු කළ තැන, එකී හිඩැසේ මට කළ හැක්කේ (කථකයාගේ) මාගේ ආදරයේ අංශුවක් තැවරීමය. ආදරයේ මධු බඳුන පිරෙන්නට ඉඩ නොදී එය අඩක්ව තිබියදී, දිගු කළ අත ගිළිහුණේ නම් හුදකලාව වුව ඉදිරියටම යාම හැර අන් විකල්පයක් ඉතිවිය නොහැක. බිඳී ගිළිහී ගරා වැටුණද, ආදරය නම් එහෙමය.
“පා ලකුණු”යන මැයෙන් ඇය ලියා ඇති තවත් කවිියක මෙසේ එයි.
“ආලයේ වෙරළ මත
පා ලකුණු ඇඳුණේම
කාලයේ ඉම නොදැක
මැකී යනු පිණිසය”
ඇතැමෙකු විසින් ආදරයේ කෙලවර විවාහය යයි සැලකුවද, එය විවාහයෙන් කෙලවර වන්නක් හෝ එයින් සීමාවන්නක් නොවේ. එයට ඇත්තේ එහිම වූ කාල නීර්ණයක් පමණි. එබැවින් එකී කාලයට සීමාවක්, නිමාවක් සලකුණු කළ හැකි නොවීම කිවිඳිය විසින් අපූර්වත්වයෙන් විදහා පෙන්වයි. එහි එන අවසන් කවිය මෙපරිදිය.
“ඒ කවිය වෙරළ මත
කිසිවෙකුත් ලියා නැත
ලියූ අය වෙරළ වෙත
කිසිදාක ඇවිත් නැත” (පිටුව-24)
මෙහිදී ලූෂන් බුලත්සිංහල විසින් වරෙක ලියූ “සැබෑ පෙම්වතුන් කිසිදාක එක් නොවේ. එක්වූ කිසිවෙකුත් සැබෑ පෙම්වතුන් ලෙස ජීවත් නොවේ. වෙන්වී ගියවුන් සදාකල් පෙම්වතුන් ලෙසම ජීවත් වේ.” යන අදහස නිතැතින් සිහිපත්වීම වැළැක්විය නොහැකිය.
ප්‍රේමය පිළිබඳ ඇලේන් බදියුගේ විශ්ලේෂණාත්මක කියැවීමක් සිංහලට නැඟූ විදුර හා කෞෂල්‍යයගේ පරිවර්තිත කෘතියේ යම් තැනක මෙසේ දැක්වෙයි.
“ප්‍රේමය පිළිබඳ කල්පනා කිරීමේ අභිරහස වන්නේ එයට විකසිත වීමට අවශ්‍ය කාලයේ කාලාන්තරය කෙතරම්ද යන්නයි. ඇත්තෙන්ම සුවිශිෂ්ට වන්නේ මේ සමාරම්භයන්හි පරමානන්දය නොවේ. විකසිතවීම් පැහැදිලිවම ආනන්දනීය වන නමුත් ප්‍රේමය යනු මේ හැම එකකටම වඩා අනවරත ගොඩනැංවීමක්. ප්‍රේමය යනු ලෙහෙසියෙන් අත් නොහරින වික්‍රමයක් යයි අපට කිව හැකියි. මෙහි වික්‍රමාන්විත පාර්ශවය වැදගත්. නමුත් ලෙහෙසියෙන්ම අත්නොහැරීමත් ඒ තරම්ම වැදගත්. පළමුවැනි බාධකයේදී, පළමුවැනි බරපතළ විසංවාදයේදී, පළමුවැනි රණ්ඩුවේදී අත්හැරීම යනු ප්‍රේමය විකෘති කිරීමක්. ප්‍රේමය යනු කාලය, අවකාශය හා ලෝකය විසින් ගොඩනංවනු ලබන බාධක හමුවේ සමහරවිට වේදනාකාරීව වුව කල්පවත්නා ලෙස විජයග්‍රාහී වීමයි” (ප්‍රේමය පසසනු වස්-පිටුව 40-41). එබැවින් ආදරය යනු එහිම පැවතීම හා විඳීම මිස අන් යමක් නොවේ.
’‘ඇවිදින් යළිත් ගිය අය ඇති
බිඳෙමින් හැදුණු තැන් තව ඇතී
සිඳිතත් පිපෙයි මල් එක් පෙති
සිහිනෙන් සිඹිමි මට ඒ ඇති
නුරා සැඩ දිය පරදවා එතෙරවී
සළාවැටුමක හරි මැදම නතරවී
පෙරා ගන්නෙමි නුගිනුරා නැති කවී
සරා එන්නට සසර වුව මට මදී (පිටුව-34)
“සිහිනෙන් සිඹිමි මට ඒ ඇතී”, “සරා එන්නට සසර වුව මට මදී”යන වැකි ද්විත්වය වුවද, දහසකුත් දේ එකට කැටි කළ පරිපූර්ණ කවියක් වැනිමය.
ලියනගේ අමරකීර්තිගේ ‘පහන සහ කැඩපත’ කෘතියෙහි එක් තැනක හැරල්ඞ් බ්ලූම් උපුටා දක්වමින් ලියූ අදහසක මෙසේ සඳහන්ය.
’‘හොඳ කවිය, එදිනෙදා ලෞකිකත්වයෙහි අඳුර සමතික්‍රමණය කරන දූරදර්ශක ගුණයෙන් යුක්ත බව ශ්‍රේෂ්ඨ අමෙරිකානු විචාරක මහාචාර්ය හැරල්ඞ් බ්ලූම් කියයි. මෙහිදී මා දූරදර්ශක ගුණය යනුවෙන් සිංහලට නඟන ඪසිසදබ්රහ ූම්කසඑහ යන යෙදුම ඉතා සංකීර්ණ එකකි. ඉන් අදහස් කරන්නේ අවකාශමය හා කාලමය දැකීම නොවේ. එදිනෙදා දෙයෙහි, ජීවිතයේ සාමාන්‍යත්වය ඉක්මවා දැකීමයි. දෘෂ්‍යමානය ඉක්මවා දැකීමයි. ජීවමානය ඉක්මවා දැකීමයි. ඉන්ද්‍රීය සංජානනය ඉක්මවා දැකීමයි.” (පිටුව-207). අමරකීර්ති විසින් ප්‍රවීණ කිවියරයන් තිදෙනෙකු ගේ නිර්මාණ විචාරයට ප්‍රවේශයක් ගන්නා එකී අදහස මෙහිදී යළි උපුටා දක්වන්නට සිත්වූයේ මෙම කාව්‍ය සංග්‍රහයේම එන තවත් කවියක තිත්ත මිහිර අත්විඳීමටය.
පිරී ඉතිරෙන දුකත් කවියකින් හෙල්ලූ
මැරී යන ගස මුලත් පෙම් පහන් දැල්වූ
ඉරී ගිය දෙපතුළින් ජීවිතය ඉල්ලූ
සිරීපාදේ නොයන අරුම සමනල්ලූ
(පිටුව-26)
’‘සමනලුන්” නම් “සිරීපාදේ යන්නෝය” යන සම්ප්‍රදායික මෙන්ම බහුතරයකගේ ඇදහීමට හෙවත් ආදරය පිළිබඳ ලාංකේය සමාජ කතිකාවේ ඌනිත කියැවීමට එරෙහිව එය සංකීර්ණ විඳීමක් බව යළි යළිත් පසක් කරන මොහොතකි. සීමා සහිත පවුල් කේන්ද්‍රීයව ආදරය වරනැඟීමත්, කෙනෙකු තෝරාගත් කෙනෙකුට පමණක් ආදරය කළ යුතු බවට කෙරෙන අවධාරණයත් සියුම්ව ප්‍රශ්න කෙරෙන හා සීමාවන් අභිබවන බැඳීමත් මේ සා අපූර්වත්වයෙන් යුතුව ගැට ගැසීමට කිවිඳියට හැකිවී තිබේ. “ගසක හදවත එහෙමය” නමින් යුතු එකී කවිය මෙපරිදිය.
පිපෙන පිපෙනා මල් මත
අතුර අතුරා සුවඳ මුවරද
ඉතිරි කර ගත් දෙයක් නැති එක
ඒ තමා ගසක සෙනෙහස
එකම එක මලකට
මිස සියක් මල් වෙත
නොබැඳිය යුතුයි කීවද
පළමු සහ අවසාන මලටද
බැඳුණු සෙනෙහස එකමය
ගසක හදවත එහෙමය”
(පිටුව-29)
අලේන් බදියු, යළිත් මෙසේ පවසයි. “මගේ ජීවිත කාලය තුළදී ප්‍රේමය අතහැරලා දාලා තියෙන්නේ එක වතාවක් විතරයි. ඒ මගේ ප්‍රථම ප්‍රේමය. මේ පියවර වැරදීමක් බව මම ක්‍රමයෙන් අවබෝධ කරගත් පසු බොහෝ කල් පසුවී මා ප්‍රේම කළ අයගේ මරණය ළඟා වෙමින් තිබියදී, සුවිශේෂී වූ හදිසියකින් අත්‍යවශ්‍යතාව පිළිබඳ හැඟීමකින් මම ඒ මුල් ප්‍රේමය යළි ගොඩගැනීමට උත්සාහ කළා. අනතුරුව මම කිසිම විටෙක ප්‍රේමය අතහැර ගොස් නැහැ. ගැටුම්කාරී සිදුවීම්, හද කැළඹවීම්, සහ සැක සංකාවන් තිබුණේවී නමුත් මම ඉන්පසු කිසිම දිනෙක ප්‍රේමයක් ඉවතලූයේ නෑ. මා ප්‍රේම කළ ගැහැනියකට මා හැම විටම ප්‍රේම කළේය යන කාරණය ඇත්තෙන්ම මට සුරක්ෂිත හැඟීමක් ඇති කළා”(ප්‍රේමය පසසනු වස්-පිටුව 53). පහත කාව්‍යමය අරුත් විසින් මා අවුළුවාලන හැඟීම එයමය.
“ගැස්මක් පවා නොදැනෙන අන්ධකාරම යාමය
හුස්මත් දිදී රැක්කත් ශේෂ වුණු දේ බිඳුණු හීනය
විස්මයක් ඉදින් වේ නම් තාරකා මැද නිවී ගිය දේමය
අස්නක් තබා ඇති පිනි මත
කියවා දවාලනු මැන
ඒ මගේ ප්‍රේමය”
(පිටුව-58)
තවත් තැනක තවත් කවියක ඇය මෙසේ සටහන් කරයි.
“කඳු හෙමින් වැළඳගන්නා අතර
මධු විතක් පෙරා දෙයි සඳ වතුර
සොඳුර ඔබ ඇවිද ගිය තරු අතර
බිඳුණු යම් දෙයක් ඇත බිම වැතිර”
(පිටුව-52)
දැවී හළුවී ගිය පසුත්, සිඳී බිඳී ගිය පසුත්, ඉතිරි වන ශේෂයක් ඇත්නම් ඒ ආදරයමය. ඒ ගැන බොහෝ දෙනා බොහෝ අවස්ථාවන්හිදී විවිධ මාදිලියෙන් ප්‍රකාශ කර තිබේ. ඒ ගැන යළි යළිත් කියන්නට අලුත් වචන වෙනත් ලෝකයකින් ආනයනය කරන්නට හැකියාවක් නැත. අප එදිනෙදා අත්දකින, ඇතැම්විට මතකයන් හාරා අවුස්සා උණුසුම් කරන අතීතකාමී හැඟීම යළි යළිත් කූද්දන්නට අපූරුවට කැටි කළ පුරුදු වචන ගොන්නටම හැකිය. කවිය නම් ඒ අපූරු පද ගැලපුම මිස අන් කුමක්ද?
මීවිතක පෙරි පෙරී මත් වෙන්න
මීදුමක එති එතී පා වෙන්න
මාවතේ උමතුවෙන් ඇවිදින්න
ජීවිතේ මේ මෙතන, ඉඩදෙන්න
දර දියෙන් සැදි කඳුළු සාගරය
වර නැඟෙන අසීමිත ජීවිතය
සිරගෙයක දැමුවැකිද මාරුතය
අරගලය කියන්නෙම ආදරය (පිටුව-45)
සංකේත සංවාද සංලාප මැවෙන
සංවේදනා මතින් සංධ්වනි වැයෙන
සංකාව බිඳක් නැති ආදරේ අරුම
සංගායනාවක් තමයි හමුවෙනා එකම (පිටුව-60)
ඇයගේ කාව්‍ය සංග්‍රහයේ එන මෙවන් සියලුම නිර්මාණයන් ආදරය සමග ඉපිද, ආදරය සමග දියවී යන මේ මොහොතේ ජීවිතය තදින් ස්පර්ශ කරන රසකාරකයකි. වචනයේ පරිසමාප්ත අර්ථයෙන්ම එය ප්‍රේමයට පැවතීමකි. මොහොත අත් නොහැර අත්විඳීමකි. ‘පියා නොහැඹූ පියාපත්’ නමින් කිවිඳිය විසින් කෙටි කාව්‍ය නිර්මාණ සංග්‍රයක්ද, උක්ත කෘතියට සමගාමීව ප්‍රකාශයට පත් කළාය. එය අගනා අත්හදා බැලීමක් වුවද, මා කම්පනයට පත් කරන්නේද, යළි යළිත් අවුළුවා ලන්නේද, අපූරු වචන ගෙත්තමක් වන ඇගේ මෙවන් සාපේක්ෂ වශයෙන් දිගු කාව්‍ය නිර්මාණයන්ය. එමඟින් බීර විතක් තරමටම තිත්ත රසයක් සමග මත්විය හැකිය. ළෙංගතු විය හැකිය. ආදරය කළ හැකිය. හුදකලා විය හැකිය. සැබවින්ම ඇගේ කවි සංවාදයට ලක්විය යුතුමය.
-ප්‍රියාන් ආර් විජේබණ්ඩාර