මුදල් අමාත්‍ය මංගල සමරවීර ලිට්රෝ ගෑස් සමාගම සදහා පත් කරන ලද නව අධක්‍ෂ්‍ය මණ්ඩලය ක‍්‍රියාත්මක වීම වළක්වමින් කොළඹ වානිජ මහාධිකරණය මැයි 15 වැනිදා නියෝගයක් නිකුත් කරනු ලැබීය. ලිට්රෝ ගෑස් සමාගමේ කළමණාකර අධ්‍යක්ෂ මුදිත පීරිත් ඇතුලූ අධ්‍යක්‍ෂවරු හතර දෙනෙක් ඉදිරිපත් කල පෙත්සමක් සලකා බැලිමෙන් පසු වානිජ මහාධිකරණය එම නියෝගය නිකුත් කර තිබුණි. පෙත්සමින් පෙන්වා දී තිබුණේ ලිට්රෝ ගෑස් සමාගමේ කොටස් අයිතිය මුදල් අමාත්‍යංශයට නොමැති බැවින් මුදල් අමාත්‍යවරයාට එම පත් කිරීම් සිදු කිරීමට බලයක් නොමැති බවයි. මැයි 28 වැනිදා නැවත එම පෙත්සම සලකා බැලීමෙන් පසු ඒ පිළිබද විරෝධතා ඉදිරිපත් කිරීමට ජූනි 3 වැනිදාට ඉඩ දී තිබුණි.
මුදල් අමාත්‍ය මංගල සමරවීර ලිට්රෝ අධ්‍යක්‍ෂ මණ්ඩලය ඉවත් කරමින් නව අධ්‍යක්‍ෂ මණ්ඩලයක් පත් කර තිබුණේ පසුගිය පෙබරවාරි 25 වැනිදායි.
එදින සිට අභියාචනාධිකරණය වාරණ නියෝගය ලබා දෙන තෙක් මුදිත පීරිස් ඇතුලූ අධ්‍යක්ෂ මණ්ඩලය නව අධ්‍යක්ෂ මණ්ඩලයට ඉඩ නොදි එම තනතුරුවලම කටයුතු කර තිබුණි.

මේ ලිපියෙන් මතු කරන්නට යන්නේ එම නඩුවවත් නඩුවට අදාල කාරණා ගැනවත් නොවේ. ලිට්රෝ ගෑස් සමාගම ගැනය. එහි ප‍්‍රධානතම ව්‍යාපාර කටයුත්ත වන ගෑස් මිළදී ගැනීම පිළිබදවය. ඒ වටා පසුගිය කාලයේ සිදු වී ඇති සිදුවීම් පිළිබදවය. ඉහත නඩු නිමිත්ත ඊට පෙළබවීම ඇති කෙරුවා පමණය. ශ‍්‍රී ලංකාව රාජ්‍යයක් ලෙස වාර්ෂිකව මිලදී ගන්නා දෙවන විශාලතම ද්‍රව්‍යය වශයෙන් සැලකිය හැක්කේ එල්පී ගෑස් ය. ඊට දෙවැනි වන්නේ ලංකා ඛනිජ තෙල් සංස්ථාව මිලට ගන්නා ඉන්ධන පමණි. සාමාන්‍යයෙන් රටේ වෙළදපොල අවශ්‍යතාවයට ලිට්රෝ ගෑස් සමාගම වාර්ෂිකව එල්.පී ගෑස් මෙට්රික් ටොන් 350,000ක් පමණ මිළදී ගනී.

වර්තමාන සෞදි ඇරැුම්කො මිල අනුව එල්.පී ගෑස් මෙටි‍්‍රක් ටොන් එකක් ඇමරිකානු ඩොලර් 530ක් පමණ වේ. (රුපියල් 90,000ක් පමණය* නැව් ගාස්තු, රක්ෂණය ආදි ගෑස් සැපයීමේදී එකතුවන ගාස්තු ඊට අයත් නැත. ලිට්රෝ ගෑස් සමාගම 2018-2019 වර්ෂය සදහා සීමා සහිත ඕමාන් ටෙ‍්‍රඩින් සමාගමෙන් මිලදි ගන්නා ගෑස් මෙටි‍්‍රක් ටොන් එකක් සදහා සෞදි ඇරැුම්කො මිලට අමතරව ගෙවන ගාස්තුව ඇමරිකානු ඩොලර් 67.50 වෙයි. ඒ අනුව ශ‍්‍රී ලංකාව හෙවත් ලිට්රෝ ගෑස් සමාගම මිලදි ගන්නා ගෑස් මෙටි‍්‍රක් ටොන් එකක් සදහා දළ වශයෙන් ඇමරිකානු ඩොලර් 600ක පමණ මුදලක් වැය කරයි. රුපියල් වලින් නම් රුපියල් 102,000 පමණ වැය කරයි. එම ගණන වාර්ෂික ගෑස් අවශ්‍යතාව සමග සැසැ¥ කළ වර්ෂයකට රුපියල් මිලියන 35,700 ක පමණ ගනුදෙනුවකි. එවන් ගනුදෙනුවක් සදහා ආශක්ත නොවන්නේ කවුරුන්ද? එවන් ගණුදෙනුවක් හෙවත් සැපයුමක් ලබාදෙනවා නම් ඊට කෘතගුණ සදහා යමක් ලබා නෙදෙන සැපයුම් කරුවන් සිටීද? එසේම එවැනි සැපයුමක් ලබාදීම සදහා පෙරළා යමක් බලාපෙරොත්තු නොවන පෘතග්ජනයින් රාජ්‍ය ආයතන වල සිටිත්ද?

ලංකාව වැනි රටවලදි මෙවැනි ගණුදෙනු වලට දේශපාලන අධිකාරියද, ඔවුන්ගේ නියෝජිතයින්ද නිලධාරි තන්ත‍්‍රයද විශේෂ උනන්දුවක් දක්වන බවට සැක නැත. අහවල් විෂය මටම දෙන්න යැයි දේශපාලඥයන් ඉල්ලන්නේ ඒ නිසාය. අහවල් තනතුර මටම දෙන්න යැයි නිළධාරීන් බැගෑපත් වන්නේ ඒ නිසාය. මේ නම් රට ගැන ඇති ආදරයට නොවන බව කරුණු දන්නා අය දනිති.
2018-2019 වර්ෂයට අදාල ලිට්රෝ ගෑස් සමාගම ගෑස් කොන්ත‍්‍රාතුව අවසන් වන්නට නියමිතව ඇත්තේ 2019 ඔක්තෝබර් මාසයේදීය. එය එම කාලයට අදාලව හිමි කරගෙන ඇත්තේ සීමාසහිත ඕමාන් ටේ‍්‍රඩින් ඉන්ටර්නැෂනල් සමාගමය. එම සමාගමේ මීට වසර කිහිපයකට පෙර ලිට්රෝ සමාගමට ගෑස් සපයා ඇත. පසුගිය 2017-2018 වසරට අදාල ගෑස් සැපයීමේ තරගයටද ඔවුන් ඉදිරිපත් වී ඇත. එහෙත් අඩුම මිල ඉදිරිපත් කළත් තාක්ෂණික ඇගයීම කමිටුව එම වසරේදි එම සමාගම තෝරාගෙන නැත.

ටෙන්ඩරය ලබා දී ඇත්තේ ෂෙල් ඉන්ටර්නැශනල් ඊස්ටන් ටේ‍්‍රඩින් සමාගමටය. මෙම ටෙන්ඩරයේදී මිල ගණන තීරනය කරණු ලබන්නේ සෞදි ඇරම්කෝ මිල නොමැතිව නැව් ගාස්තු, රක්ෂණය ඇතුලූ අනෙකුත් ගාස්තු සදහා අය කරන මිළ පදනම් කරගෙනය. ඒ අනුව ඕමාන් ටේ‍්‍රඩින් ඉන්ටර්නැෂනල් සමාගම ගෑස් මෙටි‍්‍රක් ටොන් එකක් සදහා අනෙකුත් ගාස්තු වශයෙන් ඇමරිකානු ඩොලර් 48ක් ඉදිරිපත් කරද්දි ෂෙල් ඉන්ටර්නැෂනල් ඊසටන් සමාගම ඉදිරිපත් කර ඇති මිල වන්නේ ඩොලර් 49ක් ය. එහෙත් සුදුස්සා ලෙස ෂෙල් ඉන්ටර්නැෂනල් ඊසටන් සමාගම තෝරාගැනීමෙන් පසු ඔවුන් ඉදිරිපත් කළ මිළ සමග කේවල් කිරිමකට ගොස් ඕමාන් ටේ‍්‍රඩින් මිලට වඩා අඩු මුදලකට හෙවත් ඩෙලර් 47.50ක එකගතායකට පැමිණ එම වසරට අදාළ ටෙන්ඩරය ෂෙල් ඊස්ටන් සමාගමට ලබා දී තිබේ. මිල කෙවල් කිරීමේ සාකච්ඡුාවක් ඕමාන් සමාගම සමග පැවැත්වූවානම් එම සමාගම ඉදිරිපත් කළ මිල තවත් අඩුකර ගැනීමේ හැකියාවක් නොතිබූ බවක් කා හට හෝ කිව හැකිද? එහෙත් ඕමාන් සමාගම සමග එවැනි සාකච්ඡුාවකට ඒ අවස්ථාවේ ගොස් නැත.

එම ටෙන්ඩරය ලබා දෙන අවස්ථාවේත් ෂෙල් ඊස්ටන් සමාගම ලබාදුන් බැදුම්කරයේ ප‍්‍රශ්ණයක් තිබි ඇත. ඒ ලිට්රෝ සමාගම ඉදිරිපත් කළ අකෘතිය අනුව එම බැදුම්කරය සකස්වී නොතිබීමත් එංගලන්ත නීතිය අනුව එය සකස් වී තිබිමත්ය. එසේ වුවද ෂෙල් ටෙන්ඩර් අයදුම් පත එම අවස්ථාවේදී ප‍්‍රතිකෂේප වී නැත.

එහෙත් බැදුම්කරය නිවැරදි නොවීම මත තාක්ෂණික ඇගයීම් අවස්ථාවේම සමාගම් නුසුදුසු කරන ලද අවස්ථා ඊට පෙර තිබි ඇත. එපමණක් නොව මේ තාක්ෂණික කමිටුවට ඇති එක් ප‍්‍රධානතම චෝදනාවක් වන්නේ යම් යම් සමාගම් වලට වාසි දායක වන අයුරින්ම මිලදී ගැනීමේ අවශ්‍යතාවයන් සකස් කර තිබූ බවය. ඇණයුම් කිරිමෙන් පසු දින කීයක් ඇතුළත එම ඇනවුම ලබාදිය යුතුද යන කොන්දේසිය එයය. එය තනිකරම ෂෙල් ඊස්ටන් සමාගම වෙනුවෙන් සකස් කරන ලද කොන්දේසියක් බව මේ පිළිබද නිරීක්ෂණය කළ අයගේ මතයය. ෂෙල් ඊස්ටන් සමාගමේ ගෑස් සැපයුම් නෟකාවක් මාලදිවයින අසල
පසුගිය වසර කිහිපයේ නවතා තිබිම අසාධාරණ ලෙස සකස් කර තිබු එම කොන්දේසියට හේතු වී ඇත. එම නිසා තාක්ෂණික ඇගයිමේදි ඇණයුම් කර දිනක් ඇතුලත ගෑස් සපයීමේ හැකියාව තිබී ඇත්තේ ෂෙල් ඊස්ටන් සමාගමට පමණය. එම වාසිදායක කොන්දේසියෙන් ෂෙල් සමාගම පසුගිය වසර කිහිපයේම ටෙන්ඩර් දිනාගෙන ඇත. එහෙත් මාලදිවයින අසල තිබුණු ෂෙල් නෟකාව ඉවත් වීමත් සමග අපේ කප්පිත්තනගේ අවධානය ඕමාන් සමාගම වෙත යොමු වී ඇත. 2018-2019 ටෙන්ඩරය ඕමාන් සමාගමට ලැබී ඇත්තේ ඒ අනුවය.

මේ ගෑස් ටෙන්ඩරයේදී අමාත්‍ය මණ්ඩල ස්ථාවර ප‍්‍රසම්පාදන හෙවත් ටෙන්ඩර් කමිටුවක් පවතින අතර තාක්ෂණික ඇගයීම් කමිටුවක්ද පවති. මේ තාක්ෂණික ඇගයීම් කමිටුවට ලිට්රෝ සමාගමෙන් පසුගිය වසර කිහිපයේදීම පැමිණ ඇත්තේ එකම පිරිසකි. ඒ එකම පිරිස තාක්ෂණික ඇගයීමේදි කළ යුත්තේ කුමක් දැයි ඔවුන්ට ඉහළින් ලබාදුන් උපදෙස් ඉටු කර ඇති බව පෙනි යන්නේ මේ සියල්ලන්ටම වාගේ පසුගිය කාලයේ උසස් වීම් ලැබීමත්, මීට පෙර සිදු වී නැති ලෙස සමහරුන්ට අධ්‍යක්ෂ තනතුරු දක්වා උසස්වීම් ලැබීමත් හේතුවෙන්ය. එමෙන්ම අමාත්‍ය මණ්ඩල ස්ථාවර ප‍්‍රසම්පාදන කමිටුවේ රැුස්වීම් වලට දේශාපාලන පත්වීම්දාරියකු වන ලිට්රෝ කළමණාකර අධ්‍යක්ෂ මුදිත පීරිස් හා එහි නිළධාරීන් පිරිසක්ද සහභාගි වී ඇත. ඒ අතර තාක්ෂණික ඇගයීම් කමිටුව නියෝජනය කළ ලිට්රෝ සමාගමේ නියෝජිතයින්ද සිට ඇත. මේ නම් වචනයෙන් කිව නොහැකි අමුතු අප‍්‍රබංසයකි.

ගෑස් මිලදී ගැනීම යනු ඒ අනුව හො`ද වෘත්තීය මට්ටමේ සෙල්ලමක් බව වටහා ගත හැකිය. x

x ඉදුවර බණ්ඩාර

පසුගිය මැයි 31 වෙනි සිකුරාද ඉර මුදුන් වෙන දහවලේ නුවරට වැඩි අතුරලියේ රතන හිමියන් මාරාන්තික උපවාසයක් සඳහා නුවර මාළිගාව ඉදිරිපිට හිඳ ගති. ඒ ඇයි? හිමියන් උපවාසයට මුල පුරමින් කීවෝ හිටපු අමාත්‍ය රිෂාඞ් බදුර්දීන්, බස්නාහිර ආණ්ඩුකාර අසාද් සාලි, නැගෙනහිර ආණ්ඩුකාර ඒ. එල්. ඒ. එම්. හිස්බුල්ලා සිය ධුරවලින් ඉවත් කිරීමට බලධාරීන් කටයුතු කළ යුතු බවය.

එයට හේතුව ලෙස උන්වහන්සේ පැවසූවෝ මේ පුද්ගලයින් පාස්කු ඉරිදා ප‍්‍රහාරයේ සැකකරුවන් ආරක්ෂා කරන බවය. ඔවුන්ට විරුද්ධව නීතිය ක‍්‍රියාත්මක කිරීම වළකන බවය. අනෙක් පැත්තෙන් ස්ලාම් අන්තවාදයට උඩගෙඩි දී ඇති බවට තොරතුරු තිබෙන බවය. එනිසා මේ පුද්ගලයින් වහාම ආණ්ඩුවෙන් ඉවත්කර ඔවුන්ට විරුද්ධව පරීක්ෂණ කළ යුතු බවය. මෙම උපවාසයට යොමුවෙන විටද මේ ලියුම්කරු දන්නා තරමින් මේ හිමියන් ජනපති සිරිසේනගේ උපදේශකයෙක් ය. වස විෂෙන් තොර ගොවිතැනක් යන බොරුව අටවා විශාල ධනස්කන්ධයක් රජයේ මුදල් කාබාසිනියා කළේ මේ හිමියන්ගේ මූලිකත්වයෙන් ජනපතිගේ වෙර වෑයමෙන් ය. අනෙක් පැත්තෙන්
පසුගිය ඔක්තෝම්බර කුප‍්‍රකට කුමන්ත‍්‍රණයේදී මේ හිමියන් ජනපති සිරිසේනට පවුරක් වෙමින් ද ඒකාබද්ධ විපක්ෂයට ශක්තියක් වුණ හැටි අපිට අමතක නැත. මෙම තත්ත්වය තුළ රට නොසන්සුන් මොහොතක, රට තව දුරටත් අරාජික නොකර ඕනෑනම් මේ හිමියන්ට ජනපති සිරිසේනට තමන්ම පත්කළ ආණ්ඩුකාරවරුන් ඉවත්කරන්නට උපදෙස් දෙන්නට තිබුණි. එහෙත් මේ අවස්තාවේ රතන හිමියන් සිය උපදේශක තනතුරේ රාජකාරි කළේ නැත.

රතන හිමියන් උපවාස කළේ ඇයි

අතුරලියේ රතන හිමියන්ට හිටි අඩියේ මෙවැනි මාරාන්තික උපවාසයකට යන්නට සිත් වූයේ ඇයි? මඳක් කල්පනා කළ යුතුය. කාලයක් ඒ හිමියන්ගේ ගමන් සගයෙකු, ළඟම දේශපාලන මිතුරෙකු සේ කටයුතු කළ ආචාර්‍ය අනුරුද්ධ ප‍්‍රදීප් සිය මුහුණු පොතට ඒ හිමියන්ගේ මේ ‘හිටි හැටියේ’ වැඩ ගැන අපූරු ලියමනක් ලියා තිබුණි. එහි ඔහු මෙසේ ලියයි. ‘උන්වහන්සේගේ වැඩ, බොහෝවිට දීර්ඝ කාලීන දේශපාලන සැලසුමක පියවරයන් නොව ‘හිටි හැටියේ’ කරන වැඩය. එසේ ‘හිටි හැටියේ’ කරන වැඩ නිසාම උන්වහන්සේට උන්වහන්සේගේ සමීපතයන් අතර ‘හිටිහැටියේ රතන’ යැයි අපර නාමයක් ද තිබුණි. ඒ බොහෝ වැඩවලින් බොහෝවිට යම් සංවිධානයක් විසින් දීර්ඝ කාලීන ඉලක්කයක් ඇතුව ප‍්‍රවේශමෙන් කරගෙන යන කටයුතු සම්පූර්ණයෙන්ම අවුල් වේ. එහෙත් තවත් සමහර විට ඒවා නොසිතූ ලෙස ‘පත්තු’ වේ. කොටින්ම සමහර විට ඒවායින් ඒ රටේ ඉතිහාසයද වෙනස් වේ’ ඔහු මෙහි ලියන්නේ රතන හිමියන්ගේ පත්තු වුණ වැඩ ගැනය.

ඔහුට ඔහුගේ අස්ථානයේ සිට බලනවිට බොහෝ පත්තු වූ සිදුවීම් නිවැරදි වන්නට පුලූවන් ය. එහෙත් රතන හිමියන්ගේ මේ පත්තු වූ වැඩ ගැන මේ ලියුම්කරුට තිබෙන්නේ වෙනස් අදහසක් ය. මාවිල් ආරූ මුදාගන්නට සටන ආරම්භ කළේ රතන හිමියන් ය. ඒ වැඬේ මේ කියන ලෙසම ‘පත්තු’ වුණේ ය. ඊට පසු රතන හිමියන් අරම්භ කළ වෂ විෂට විරුද්ධ ගොවි ව්‍යාපාරයද ‘පත්තු’ වුණේ ය. එහෙත් එයින් ජනතාවට වුණ සෙතක් නැත. පාස්කු ප‍්‍රහාරයට මාසයකට පසු හිටිහැටියේ වාඩිවූ මේ වාඩි ගැනීම ද හොඳ හැටියටම ‘පත්තු’ වුණේය. එහෙත් ජාතියේ මොකද්දෝ වාසනාවකට මුස්ලිම් නායකයෝ එකමිටකට එකතුවී සිය ඇමති ධුරවලින් ඉවත්වීම නිසා ඒ පත්තුවීම ලැව් ගින්නක් වී රටම ගිනි බත් කළේ නැත.

මෙම මාරාන්තික උපවාසයට රතන හිමියන් මුල පිරුවේ උන්වහන්සේට ලංකා දේශපාලය තුළ තිබූ ප‍්‍රභාව නැතිවීම නිසා නැවත එම රැුස්වළල්ල අත්පත් කරගැනීම ට බව බොහෝ දෙනෙක් කියයි. එහි යම් වලංගුතාවයක් තිබිය හැකිය. ජාතික හෙළ උරුමයෙන් ගලවා විසිකිරීම නිසා සහ ආණ්ඩුවෙන් ඉවත්ව විපක්ෂයට යන්නට වීම, පසුගිය ආසන්නම කාලයේදී ජනාධිපති සිරිසේනගෙන් ද ලකුණු කැපී කොන්වී සිටින්නට වීම, ආදිය නිසා ඒ හිමියන්ට තමන්ගේ නැතිවුණ අනන්‍යතාවය දේශපාලන භාවිතාව මතින්ම සොයා ගන්නට සිදුවී තිබුණි. මහා වීරයෙකු සේ නැවත ප‍්‍රධාන දේශපාලන බලවතුන් අතරට පැමිණීමට ක‍්‍රමයක් කල්පනා කරමින් සිටින විට හිටිහැටියේ මේ මාරාන්තික උපවාස කතාව ඔලූවට එන්නට ඇත!!

පාස්කු ප‍්‍රහාරයෙන් පසුව ඒ සඳහා සරුම පසක් ද රට තුළ නිර්මාණය වී තිබුණි. ඉතිං අන්තිමේ වැඬේ ‘පත්තු’ වුණේ ය. සතර දෙසින් සෙනඟ පිරිවර පැමිණියෝ ය. ඒ අතර රට එක එක අතට හසුරවමින් තම තමන් බලයට එන්නේ කෙසේදැයි කල්පනා කරමින් සිටි දේශපාලකයෝ ද, එක එක න්‍යාය පත‍්‍රවලට නැටවෙන සංඝයා වහන්සේ ද, ජාතිවාදීන් ද ආගම්වාදීන්ද සිටියෝ ය. එහෙත් ආණ්ඩුකාරවරුන් දෙදෙනා ඉල්ලා අස්වුණා යැයි මධ්‍යම ආණ්ඩුකාර මෛත‍්‍රී ගුණරත්න කියූ සැනින් ( ඒ මොහොතවනවිට උපවාස කතාවට මූලික වූ රිසාඞ් බදියුදීන් අදළ ඇමති තනතුරෙන් ඉවත්වන්නට සිතා හෝ නොසිටියත්* උන්වහන්සේ සිය මරාන්තික උපවාසය සුටුස් ගා අත්හැරීම නිසා දෑස් අන්ධවී සිටි බොහෝ දෙනෙකුට දෑස් ලැබුණි.. ඒ එමගින් නාටකයේ වෙස් ගැළවී යාම නිසාය.

ජාතිවාදී ගිනි පුළිඟු

මාරාන්තික උපවාසයට දින සතරක් වෙන පසුගිය ජූනි 3 වෙනිදා වෙනවිට රටේ හැම අස්සකම කතා කළේ රතන හිමියන් ගේ උපවාසය ගැනය. නුවර සිංහල වෙළඳ සංගමයද සිය වෙළඳසල් වසාදමමින්, අනෙකුත් වෙළඳ සැල් බලහත්කාරය යොදවා වසාදමමින්, බොහෝ උදව් උපකාර මෙම උපවාසයට ලබා දුන්නේය. හදිස්සි නීතිය තිබුණත් නුවර පොලීසිය අහක බලාගෙන සිටියේ ය. පිට පළාත්වලින් දහස් ගණනින් මිනිසුන් මාළිගාව ඉදිරිපිටට එනවා කියූ විට හෝ මාළිගාව ආරක්ෂා කරගැනීම සඳහා හෝ කියා එය නතර කිරීමට පොලීසිය කටයුතු කළේ නැත. කම්කරු උද්ඝෝෂණ නතර කිරීමට උසාවි නියෝග ගන්නා පොලීසිය හදිස්සි නීතිය තිබියදී ද මේ අයුතු ජනරාශියේ නැරඹුම් පේ‍්‍රමියෝ විය.

පිට පළාත්වල බොහෝ පිරිස් උදෑසනින්ම බස් පුරාවාගෙන නුවර එන්නට ලෑස්ති වුණෝය. ඒ පෙරදා රාත‍්‍රියේ ගමේ පන්සලෙන් ඒ සඳහා විධානය ලැබී තිබුණු බැවින් ය. ගලගොඩඅත්තේ ඥණසාර හිමියන් කියන පරිදි, නුවරට මිනිසුන් ඇදගෙන ඒම සංවිධානය කර ඇත්තේ ඒ හිමියන් ගේ ප‍්‍රධානත්වයෙන් ය.

බොහෝ නගරවල සිංහල වෙළඳ සංගමයන් සහ පොදුජන පෙරමුණේ පාක්ෂිකයෝ මේ පිළිබඳව බොහෝ උනන්දුවෙන් කටයුතු කර ඇත. පොදුජන පෙරමුණේ ආධාර කරුවන් මෙළෙස හැසිරුණේ රතන-සාර හිමි දේශපාලනයයේ තිරයෙන් පසුපස ඇත්ත කතාව නොදැනය. නැතිනම් සිංහල ජාතිය පිළිබඳව වූ කැක්කුමට වන්නටත් පුලූවන් ය. මේ තත්ත්වය තුළ මඩකලපුව වවුනියාව වැනි ප‍්‍රදේශවල දෙමළ ජනතාවද කතෝලිකයින්ද මෙම උපවාසයට ආශක්තවී කටයුතු කිරීම ලංකාවේ ඉදිරි අනාගතය ගැන අපිට පෙන්වන්නේ කළු චිත‍්‍රයක් ය.

මෙලෙස උපවාසයේ හතරවන දිනය වනවිට ලංකාවේ බොහෝ පළාත්වල පිරිස් උපවාසයට සහයෝගය පළ කළේය. පසුගිය ජූනි 03 දා වවුනියාව නව බස් නැවතුම්පොළ ඉදිරිපිට පිහිටි ශ‍්‍රී මුත්තුමාරි අම්මාන් කෝවිල ඉදිරිපස උපවාසයක් ආරම්භ කළ වවුනියාව වෙලිකුලම් ප‍්‍රදේශයේ දේවරාසා ගෝපාලසිංහම් කියා සිටියේ තමන් රතන හිමියන් ගේ ඉල්ලීම්වලට සහාය පළකරමින් උපවාස කරන බවය. මේ වනවිට පාර්ලිමේන්තු මන්ත‍්‍රී එස් වියාලේන්ද්‍රන් ද මඩකලපුවේ දී උපවාසයක් අරාඹා තිබුණි. ඒ රතන හිමියන්ට සහාය පළකරමින් ය. ඒ ජූනි 1වෙනි දාය.

මෙම මන්ත‍්‍රීවරයා පසුගිය ඔක්තෝම්බර් කුමන්ත‍්‍රණයේදී ජනාධිපති සිරිසේනට සහාය දුන් අයෙක් ය. එය මතක තබා ගැනීම මෙම නාටකය තේරුම් ගැනීමට උපකාර වෙනු ඇත. මේ සිදුවීම් වලට සමගාමීව අතුරලියේ රතන හිමියන් ඉදිරිපත් කරන ඉල්ලීම්වලට වහා විසඳුම් ලබා දෙන ලෙස දන්වමින් සියම් නිකායේ මල්වතු සහ අස්ගිරි පාර්ශව මහ නායක හිමිවරුන් ජනාධිපති මෛත‍්‍රිපාල සිරිසේන වෙත ලිපියක් යොමු කර තිබුණි. ජූනි 02වෙනිදා දිඹුලාගල ආරණ්‍ය සේනාසනයේ භික්ෂූන් වහන්සේ දෙනමක් ද මෙම උපවාසයට සහාය දක්වමින් එයට එකතුවිය. මෙලෙස රතන හිමියන්ගේ උපවාසය පත්තුවීගෙන යනවිට ගමේ පන්සලද, තමන්ගේ නායකයා බලයට ගෙන එන්නට මේ රැුල්ලට පුළුවන් යැයි විශ්වාස කළ පොදුජන පෙරමුණේ අධාරකරුවන්ද, එම පෙරමුණේ ප‍්‍රාදේශීය සභාවල මන්ත‍්‍රීවරුන්ද රටම පත්තුකරන්නට සුදානම් වී ඇත.

උපවාසයේ සිට අයුතු ජන එකතුවීම ආදී වූ බොහෝ දේවල් වෙන්නේ හදිස්සි නීතිය පවතින සමයක බවද අපි අමතක නොකළ යුතුය. මේ සමය අයි. සී. සී. පී. ආර් වැනි පනත් රට තුළ ශක්තික සත්කුමාර වැනි ලේඛකයින්ට විරුද්ධව තදින්ම ක‍්‍රියාත්මක වෙන සමයක් බව ද අපි අමතක නොකළ යුතුය. උපවාසය කරන්නේ ජනාධිපති උපදේශකයා ය. නීතිය ක‍්‍රියාත්මක කළ යුතු පොලීසිය අයිති වන්නේ ත් ජනාධිපතිටය. ඉතින් අපි මේවා එකට ගැටගසා කල්පනා කළ යුතුය.

88/89 යළිත්

උපවාසයෙන් 4 වෙනි දිනයේ එනම් පසුගිය ජූනි 3 වෙනිදා රටේ බොහෝ නගරවල කඩ සාප්පු තුන්ඩු කෑලි බිය ගැන්වීම් මගින්ද, කඩයට පැමිණ කරන තර්ජනයන් වලින්ද, වසා දමනු ලැබිණි. මුලින්ම බිබිලේ නගරයේ සිදුවූ සිදුවීම දෙසට හැරෙමු. පසුගිය ජූනි 3 වැනිදා සවස දෙකට පමණ පැමිණි දොඩන්ගොල්ලේ සෝරත නම් භික්ෂුවක් සහ තවත් සංඝයා වහන්සේ පිරිසක් කඩ සාප්පු වසාදමන්නට නියෝග ලබා දී ඇත. ඉන්පසු නගරයේ කඩ සාප්පු සියල්ල වසා දමා ඇත. පසුව ශබ්දවාහිනී යන්ත‍්‍ර නගරයේ මැදට රැුගෙන පැමිණි 200ක පමණ පිරිසක් රැුස්වීමක් පවත්වා ඇත. බිබිල ප‍්‍රාදේශීය සභාවේ පොහොට්ටු පක්ෂයේ මන්ත‍්‍රීවරයෙක් වන සුදු නිළමේ අත්තනායද මෙම සිදුවීම පිටුපස සිට ඇත. මේ සියල්ල දෙස බිබිල පොලිසිය උපේක්ෂාවෙන් බලා සිට ඇත.

රත්නපුර නගරයේ ද තත්ත්වය මෙයමය. දහවල් 12 පමණ වනවිට රත්නපුර පොලිසිය ඉදිරිපිට කොන්කොඞ් බේකරිය ළඟින් කඩ වසා දමන්නට පටන්ගෙන ඇත. දහවල් 1 පමණ වනවිට 99%ක් වෙළදසැල් වසාදමන්නට කටයුතු කර ඇත. මෙම කඩ වසා දැමීමට නගරයේ ප‍්‍රධාන විහාරස්ථාන 4ක පමණ තරුණ භික්ෂූන් පෙරමුණ ගෙන ඇත. ඊට අමතරව රත්නපුර නගරයේ ‘සුදු මහත්තයා’ නමින් ප‍්‍රකට පුද්ගලයෙක් ද මෙම සංවිධානය කිරීම් පිටුපස සිට ඇත. ඊට අමතරව රත්නපුර නගරයේ එක්සත් වෙළද සංගමයද කඩ වසා සහාය දෙන්න යැයි කලින් දිනයේදී ව්‍යාපාරික ප‍්‍රජාවගෙන් ඉල්ලා ඇත. මෙම කඩ වසා දැමීමෙන් පසුව පොලීසිය අසල පුස්තකාලය ඉදිරිපිටට රැුස්වූ පිරිස රැුස්වීමක්ද පවත්වා ඇත. අහෝ ලංකාවේ පොලිසිය!!

කුරුවිට, ඇහැළියගොඩ තත්ත්වයද මෙයමය. මෙහිදී ඇහැළියගොඩ ප‍්‍රාදේශීය සභාවේ උපසභාපති පොහොට්ටු පක්ෂයේ රුවන් ලියනගේ සහ සිංහල වෙළද ප‍්‍රජාව නම් සංගමයක් මෙම කඩ වසාදැමීම සංවිධානය කර ඇත. මෙහිදී නගරයේ දමනු ලැබූ කළු කොඩි ප‍්‍රාදේශීය සභාව ඇතුළතදී නිර්මාණය කර ඇත.

කුරුවිට නගරයේද පසුගිය ජූනි 3 වෙනිදා කඩ සාප්පු වසා දැමීමට කටයුතු කර තිබුණ අතර එහි සංවිධාන කටයුතු කර තිබුණේ කුරුවිට ප‍්‍රාදේශීය සභාවේ මන්ත‍්‍රීවරුන් සහ කුරුවිට නගරය අවට විහාරස්ථානවල තරුණ භික්ෂුන් ය. දිවයිනේ බොහෝ ප‍්‍රදේශවල මෙම කඩ වසා දැමීමේ නියෝග ලබා දී ඇත්තේ ඒ ඒ ප‍්‍රදේශවල සිංහල වෙළද සංගම්, පන්සල්වල භික්ෂූන් සහ පොදුජන පෙරමුණේ ප‍්‍රාදේශීය සභා මන්ත‍්‍රීවරුන් සහ ඔවුන්ගේ ප‍්‍රභල ආධාරකරුවන් විසින් ය.

උපවාසයෙන් පසු

ජූනි 3 වෙනිදා දහවල් අදාළ ආණ්ඩුකාරවරුන්ගේ ඉල්ලා අස්වීම පිළිබදව තතු උපවාස භූමියට සැලවූ පසු රතන හිමියන් උපවාසය අතහැර දමනු ලැබූ අතර ඉන්පසුව දැන් උපවාස කලාකරුවන් මාධ්‍ය ඉදිරියේ ඔවුනොවුන්ගේ රෙදි ගැලවා ගැනීම උත්ප‍්‍රාස ජනකය. මෙම උපවාස භූමියට පසුගිය ජූනි 2වෙනිදා වඩින ඥාණසාර හිමියන් ප‍්‍රකාශ කරන්නේ ජාතික ව්‍යාපාරයේ ගුරුවරයා අමතක නොකරන බවය. උන්වහන්සේ දුර්වල කරන්නට ඉඩ නොදෙන බව එහිදී සපථකර ප‍්‍රකාශ කරන ඒ හිමියන් මාධ්‍යට උස හඬින් කියන්නේ තමන් අදාළ පුද්ගලයින් ආණ්ඩුවෙන් ඉවත්කර මෙම ප‍්‍රශ්නය විසඳීමට ආණ්ඩුවට පසුදා දහවල් 12 තෙක් කාලය දෙන බවය.

පසුදා එනම් 3 වෙනිදා උපවාසය අවසන් වූ මොහොතේ උපවාස භූමියට වඩින උන්වහන්සේ ‘හරි මේ කට්ටිය ආවේ මම කියපු නිසා මම ඒ ප‍්‍රශ්නය විසදන්නම්’යි උස්හඬින් වදාරමින් කෑගසන්නෝය. ඉන්පසු රනිල් වික‍්‍රමසිංහ අග‍්‍රාමාත්‍යවරයාට බැන අවධාරණය කරන්නේ රිසාඞ් ආරක්ෂා කරන බැවින් නුවරට රැුස්වූ තම පිරිස සමගින් කොළඹට පාගමනින් පැමිණෙන බවය. ‘අපි එනවා කොළඹ අපි ආණ්ඩුවට කියනවා බඩු පැක් කරගන්න කියලා. අපි හදනවා අපේ ආණ්ඩුවක්’ ඉන්පසුව උපවාස සහායකයෝ කොළඹ එති.

එහෙත් ඒ ගමන අතරමගදී ඔවුන්ගේ සියලූ බලාපොරොත්තු සුනු කරමින් සියලූම ආණ්ඩුවේ මුස්ලිම් අමාත්‍යවරුන් නියෝජ්‍ය අමාත්‍යවරුන් රාජ්‍ය අමාත්‍යවරුන් ඉල්ලා අස්වෙන බව මාධ්‍ය සාකච්ඡුාවක් තබා ප‍්‍රකාශ කරයි. එතනින් පසුව බොරු රංගනයන් කළ සාර-රතන හිමි සුසංයෝගය අතර ගැටුම එළියට එන්නේය. ඒ අනුව ජූනි 4 දා මාධ්‍ය සාකච්ඡුාවක් කැඳවමින් ඥාණසාර හිමියන් රතන හිමියන්ගේ උපවාසය බරපතළ ලෙස විවේචනය කරති. ‘මේ නිකං කොහෙවත් යන පංචස්කන්ධයන් තුනක් අල්ලාගෙන කරපු මේ උපවාසයෙන් මොකද වුණෙ’. යන්නෙන් ආරම්භ කරන වාග් ප‍්‍රහාරය කෙලවර කරන්නේ රතන හිමියන් කාඞ්බෝඞ් වීරයෙකුට සමාන කරමින්ය. සංහිඳියාව විනාශ කරමින් රට ගිනි තැබීමට මෙම උපවාසය මගින් උත්සාහ කළා යැයි චෝදනා කරමින් ය. ඒ අනුව දැන් රතන-සාර හිමිවරුන්ගේ නාටකයේ හොඳම හරිය කරළියට ඇවිත් ඇත. ඒ අස්සේ ජනාධිපති සිරිසේන කියනවා කියන්නේ තමන් මීළග ජනාධිපතිවරණයට ඉදිරිපත් නොවෙන බවය. රාජපක්ෂවරුන්ටද කිසිදු සහයක් නොදෙන බවය. අහෝ දැන්නම් මේ නාටකය සිනා සාගරයක් ය. x

වෛද්‍ය සාෆිගේ ප‍්‍රශ්නය දෙවැනි සතියටත් ඇදී ගොස් ඇත. ඒ ප‍්‍රශ්නය නැවතත් කලබල ගණනාවක් ඇති කිරීමට මග විවෘත කළේය. මාධ්‍යවලින් දැන් වර්ග සංහාරයක් ගැන දැවැන්ත ලිපි ලියයි.

එහෙත් මේ සටහන ලියැවෙන මොහොත වෙද්දීත් එක මවකගේවත් පැලෝපීය නාලය අවහිර කර ඇතැයි පරීක්ෂණයකින් ඔප්පු වී නැත. මේ වෙද්දී සෞඛ්‍ය අමාත්‍යාංශයේ විශේෂඥ කමිටුව අතුරු වාර්තාවක් නිකුත් කරමින් පරීක්ෂණය සඳහා පහසුකම් ඉල්ලා ඇත.

වෛද්‍ය සාෆිව අත්අඩංගුවට ගත්තේ අල්ලස් හෝ ¥ෂණ පිළිබඳ චෝදනාවකට අදාලවය. එහෙත් ඔහුව සීඅයිඞීයට බාර දී තිබුණේ වඳ සැත්කම් කතාවක් නිසාය. දැන් සීඅයිඞීයට ඔහු ගැන ගැන කරන්නට දෙයක් නැත. අල්ලස් හෝ ¥ෂණ පිළිබඳ සීඅයිඞීය විමර්ශනය කරන්නේ නැත. වඳ සැත්කම් ගැන සොයන්නට නම් පෙර කී මවුවරුන්ව පරීක්ෂා කළ යුතුය. දැන් වෛද්‍ය සාෆි අත්අඩංගුවේ ඉන්නේ කිසිම තහවුරු වූ කරුණක් නැතිවය. චෝදනා නැතිවම ඔහුව අත්අඩංගුවේ තබාගෙන ඉන්නේ ජාතිවාදී බෞද්ධ හිමිවරුන් පෙරටු කරගත් අන්තවාදී කල්ලි රට ගිනිතබනු ඇතැයි තිබෙන බිය නිසාය.

විශේෂඥ මතය

කෙසේ වෙතත් මේ මවුවරුන්ගේ පැලෝපීය නාලය පිළිබඳ පරීක්ෂා කිරීම අපහසු කටයුත්තක් නොවේ. ඉදිරියේදී ඒ කටයුතු සිදු කරනු ඇත. එයින් වරදකරුවෙකු වුවහොත් මිස සාෆි නීතිය ඉදිරියේ වරදකරුවකු නොවේ. එතෙක් අපට කල්පනා කරන්නට සිදුවෙන්නේ සාෆි ගැන ඇති චෝදනා පදනම් සහගත ඒවාද නැද්ද කියාය.

අප මේවා ගැන විශේෂඥයන් නොවන නිසා සැලකිල්ලට ගත යුත්තේ විශේෂඥයන්ගේ මතයයි. ජුනි 04 වැනිදා ඬේලි මිරර් පුවත්පතට සම්මුඛ සාකච්ඡුාවක් ලබාදෙමින් ලංකාවේ ප‍්‍රසව හා නාරිවේද විශේෂඥයන් අතර ප‍්‍රවීණම වෛද්‍ය නිලධාරියෙකු හා කොළඹ විශ්වවිදද්‍යාලයේ වෛද්‍ය පීඨයේ ප‍්‍රසව හා නාරිවේද අධ්‍යනාංශයේ ප‍්‍රධානී මහාචාර්ය හේමන්ත සේනානායක කියන්නේ මේ චෝදනා ප‍්‍රායෝගික නොවන බවය.

දිවයින පුවත්පත පසුගිය සතියේ වාර්තා කර තිබුණේ පැලෝපීය නාලය අවහිර කර ඇතිද යන්න පිළිබඳව මෙරටදී පරීක්ෂණ සිදු කළ හැකිද කියායි. ඉහත කී වෛද්‍යවරයා පවසන්නේ එම පරීක්ෂණ මෙරටදී කළ හැකි බවය. හසල දැනුමින් යුතු ජ්‍යෙෂ්ඨ ප‍්‍රසවවේදීහු ඕනෑ තරම් මේ රටේ සිටින බව ඔහු කියා තිබුණි.

සිසේරියන් සැත්කමක් කිරීම මවකගේ උදරය විවෘත කිරීමේදී පැලෝපීය නාලය ඇති කොටස දිස් නොවන බව එම මහාචාර්යවරයා පවසයි. ඒ නිසා පැලෝපීය නාලය අවහිර කරන්නට නම් උදරයේ විවර කරන කොටසෙන් අත දමා පැලෝපීය නාලය සොයාගැනීමට සිදුවෙන බවයි. එනිසා ඇතැම් බාහිර පුද්ගලයන් විවේචනය කරන ආකාරයට සිසේරියන් සැත්කම් දහස් ගණනක් ආවාට ගියාට කළ හැකි යැයි සිතිය නොහැකි බව මෙන්ම පැලෝපීය නාල දහස් ගණනකට හානි කිරීම නම් සරල කටයුත්තක් නොවන බව ඔහුගේ නිගමනය වෙයි.

ඬේලි මිරර් පුවත්පතට ඔහු වැඩිදුරත් ප‍්‍රකාශ කර තිබුණේ මෙම චෝදනා පිළිබඳව කරන විමර්ශනය සිදුකරන පරීක්ෂණ කණ්ඩායමේ සංයුතිය වැදගත් බවයි. එය අනිවාර්යයෙන්ම විෂයෙහි හසල දැනුමක් ඇති ජ්‍යෙෂ්ඨ ප‍්‍රසවවේදීන්ගෙන් සමන්විත විය යුතු බව ඔහු පවසයි. හුදු රෝහලක පරිපාලනයකට පමණක් මේ පරීක්ෂණ කළ නොහැකි බව ඔහු කියයි. මේ වෙද්දී කුරුණැගල ශික්ෂණ රෝහලේ අධ්‍යක්ෂවරයා උත්සාහ කරමින් ඉන්නේ මේ සිදුවීම පිළිබඳ පරීක්ෂණය කුරුණැගල රෝහලේ සිදු කරන්නටය. එහෙත් ඉහත මහාචාර්යවරයා පෙන්වාදෙන්නේ එම පරීක්ෂණය ජාතික මට්ටමින් විය යුතු බවයි. සාමාන්‍ය රාජ්‍ය සේවා ප‍්‍රශ්නයකදී මූලිකව අභ්‍යන්තර විමර්ශනයක් පැවැත්වීම සම්ප‍්‍රදාය වුවද රටක් ගිනි ගෙන ඇති මෙවන් ප‍්‍රශ්නයකදී එය රටටම පිළිගතහැකි විශ්වසනීය හා සාධාරණ එකක් වීමේ වැදගත්කම ඔහු පෙන්වයි.
ඇත්තවශයෙන්ම මෙය මේ වෙද්දී සෞඛ්‍ය ක්ෂේත‍්‍රයේ සේවය කරන තතු දන්නා බොහෝ අයගේ මතයයි. වෛද්‍යවරුන් බහුතරය ඉන්නේ මේ මතයේය. එහෙත් මේ පිළිබඳව ඉදිරිපත් වී මහජනතාවගේ සැකය නිරාකරණය කළ හැකි, ඒ සඳහා අවශය පහසුකම් ඇති රජයේ වෛද්‍ය නිලධාරීන්ගේ සංගමය මේ ගැන කුහක වත‍්‍රයක් රකිමින් නිහඬව සිටීම ලොකුම ප‍්‍රශ්නයක් පව අනිද්දා සමඟ නිර්නාමිකව අදහස් දැක්වූ වෛද්‍යවරුන් පවසයි.

මව්වරුන්ගේ පැමිණිලි

කෙසේ වෙතත් තමන්ව වඳ කර ඇතැයි මව්වරුන් සිය ගණන් පැමිණිලි කර ඇති බව දැන් ජාතිවාදීන් හැමතැනම කියමින් සිටියි. එහෙත් ඒ පැමිණිලිවල ස්වභාවය කුමක්ද, තමන්ගේ පැලෝපීය නාලය අවහිර ඇති බව පරීක්ෂණයකින් හෝ් වෙන කිසිදු අවස්ථාවකදී තහවුරු වූ බව පැමිණිලිවලදී කියා නැත. අඩු තරමේ එකදු මවක්වත් එසේ කියා නැත.

කුරුණෑගල ප‍්‍රදේශයේ ප‍්‍රාදේශීය මාධ්‍යවේදීන්, පොලිස් නිලධාරීන් හා කුරුණැගල රෝහල නියෝජනය කරන ආරංචිමාර්ගවලට අනුව කුරුණැගල ප‍්‍රදේශයේ ප‍්‍රසිද්ධ කතාවක් ඇත. ඒ වෛද්‍ය සාෆිගෙන් සිසේරියන් සැත්කමක් කළ මවක් නැවත ඉදිරිපත්වී පැමිණිලි කළොත් මුදල් ලබාගත හැකි බවය. ඉදිරියේදී එවැනි මවුවරුන්ට වන්දි ගෙවන බවද ප‍්‍රසිද්ධ වී ඇත. ඒ අනුව පැමිණිලි කරන්නට පැමිණි මවුවරුන් සිය ගණනකි.

ඒ අතර සිටින විශාල ප‍්‍රමාණයක් මවුවරුන් වෛද්‍ය සාෆිගෙන් සැත්කම් කරවාගෙන තවත් දරුවෙක් හදන්නට තරම් කාලයක් ගත නොවූ මවුවරුන් බව පරීක්ෂණවලට සම්බන්ධ ආරංචිමාර්ග පවසයි. එවැනි මවුවරුන් ප‍්‍රසිද්ධියේ මාධ්‍යවලට අදහස් දැක්වීම්ද කර තිබුණි. සැත්කමෙන් පසුව ඇතිවූ සිරුරේ වේදනා ගැන එම පැමිණිලිවල වැඩිපුර සඳහන් වෙයි. ඒ සැත්කම් සිදු කළත් නොකළත්, ප‍්‍රජනන පද්ධතිය නිසා කාන්තාවකට කෙතරම් වේදනා විඳින්නට සිදු වෙනවාදැයි දන්නේ කාන්තාවන්මය. එහෙත් මේ මොහොතේ තිබෙන ජාතිවාදී වාතාශ‍්‍රය නිසා එවැනි වේදනාවක් වුව සැකය වර්ධනය කරන්නට හේතුවෙයි. ඒ නිසා වැඩිපුර පැමිණිලි එන්නේ වෛද්‍ය සාෆිගෙන් සැත්කම කරවාගෙන ටික කාලයක් තුළ බියට පත්වූ කාන්තාවන්ය.

බිරිඳගේ කතාව

මේ වෙද්දී වෛද්‍ය සාෆිව වරදකරු බවට පත්කර හමාරය. මාධ්‍යවලින් මෙන්ම රතන හිමි වැනි ජාතිවාදී හිමිවරුන්ද වර්ග සංහාරයක් ගැන කතාකර හමාරය. එහෙත් එක මොහොතකටවත් වෛද්‍ය සාෆිගේ බිරිඳට සාධාරණ ඉඩක් ලබාදීමට බොහෝ මාධ්‍ය කටයුතු කර නැත. ඇය කුරුණෑගල රෝහලේ වකුගඩු සම්බන්ධ ඒකකයේ වෛද්‍යවරියකි. අපි ඇගේ කතාවට ඉඩ වෙන්කළෙමු.

‘මුලින්ම අපේ නිවෙස් ආදිය පරීක්ෂා කළේ අපේ‍්‍රල් මාසයේ අග. ඒ කලින් කරපු වැටලීම්වල කොටසක් විදියටයි. බැංකු ගිණුම්වල තොරතුරු එහෙම අරගෙන ගියා. දේපොල, ආදායම් ගැන විස්තර හෙව්වා. ගෙදර පරීක්ෂා කළ මොහොතේ පිට කට්ටිය එනවාද කියලා ඇහුවා. මුලින්ම පරීක්ෂා කරලා දවස් හතරකින් පහකින් අපි කුලියට දීලා තියෙන ගෙදරත් පරීක්ෂා කරලා විස්තර අහලා තිබුණා. ඇත්තටම කුලියට දීලා තියෙන්නේ අපේ ගෙදරම අනෙක් කොටස. ඒවායින් පස්සේ මැයි 06 වැනිදා ලැබ් එකට ඇවිත් පරීක්ෂා කළා. මේ දේවල් සිද්ධවුණේ අපේ‍්‍රල් මාසයේ අග කාලයේදී. මේ වගේ පරීක්ෂණ අපි වැඩිපුර ඔලූවට ගත්තේ නැහැ. මේ කාලයේ පරීක්ෂණ කිරීම සාමාන්‍ය දෙයක්නේ. මේවා රටේ පවතින තත්වයත් එක්ක සාමාන්‍ය පරීක්ෂණ විදියට අපි සැලකුවේ. වරදක් නැතිනම් බයවෙන්න දෙයක් නැහැනේ. එතැනින් ඒවා අවසන් වුණා.

ඒත් මැයි 23 වැනිදා දිවයින පත්තරේ ප‍්‍රධාන ප‍්‍රවෘත්තිය තිබුණා තවුහිද් ජමාත් දොස්තර මෙහෙම කරනවා කියලා. ඒ ප‍්‍රවෘත්තිය අපි දැක්කා. ඒත් ඒක අපට අදාල කරගන්න කිසිම හේතුවක් තිබුණේ නැහැ. අපව පරීක්ෂා කළෙත් ඔය කියන විදියේ දෙයක් ගැන නෙවෙයිනේ. ඒත් 23 වැනිදාම හවස රජරට විශ්වවිද්‍යාලයේ මහාචාර්ය චන්න ජයසුමන මගේ සැමියාගේ ෆොටෝ ෆෙස්බුක් එකේ දාලා තියෙනවා පත්තරේ තියෙන්නේ මේ පුද්ගලයා ගැන විය හැකියි කියලා. පහුවදා උදේ වෙද්දී 400කට වඩා ෂෙයා කරලා තිබුණා. ඒත් පහුවදාම ඒ පෝස්ට් එක අයින් කරගෙන තිබුණා. ඒත් මේක එක එක ජාතියේ අයට ගිහිල්ලා තිබුණා. මෙයාලාගේ ගෙවල් කොහේද, මෙයාලාව මරන්න ඕනෑ කියලා පවා සමහරු දාලා තිබුණා. දරුවන්ගේ පින්තූරත් ඒ වෙද්දී හොයාගෙන. මේවා වුණේ මැයි 24 සිකුරාදා දවසේ.

සිකුරාදා දවල් වෙද්දී මම සැමියාට කිව්වා අපි මේ ගැන මොකක්හරි ක‍්‍රියාමාර්ගයක් ගන්න ඕනෑ කියලා. ඊටපස්සේ සැමියාගේ මිතුරු නීතීඥයෙක් කිව්වා ලියුමක් දාන්න කියලා. අපි හවස් වෙද්දී ලියුමක් සකස් කළා. ඒත් හවස් වෙද්දී නෝම්බි අරින්න ඕනෑ, පල්ලි යන්න ඕනෑ නිසා ටිකක් වැඩ හිරවුණා. ඒත් ලියුමේ ප‍්‍රින්ට්අවුට් අරගත්තා. ඊට පස්සේ ඒ ගැන කතාකරන්න ලෑස්තිවුණා. ඒත් සැමියා මේ ෆෙස්බුක් එකේ ගිය දේවල් ගණන් ගත්තේ නැහැ. තමන් වැරැුද්දක් කරලා නැත්නම් බයවෙන්න දෙයක් නැහැ කියලයි මගේ සැමියා හිතුවේ. මම බයෙන් හිටියේ වැරැුද්දක් කළත් නැතත්, ගෙදරට ඇවිල්ලා කරදරයක් කරයි කියලා. ඉතින්, එයා පල්ලියට ගිහිල්ලා වැඳලාම එන්නම් කියලා යන්න පිටත්වුණා. ? අට විතර වෙද්දී සිවිල් ඇඳුමෙන් නිලධාරීන් දෙන්නෙක් ඇවිත් නිවසෙන් එළියේ හිටියා. එයාලාව ගේ ඇතුලට අරගෙන කතාකලා. මගේ සැමියා කොහෙද කියලා ඇහුවා. එයා පල්ලියට ගියා කියලා අපි කිව්වා.

ඒ වෙද්දී ටීපෝ එක තිබුණා මම පැමිණිල්ලට ලෑස්ති කරපු ලියකියවිලි ටික. ඒවා ගැනත් ඇහුවා. අපි කිව්වා පොලීසියට එන්න තමයි බලාගෙන හිටියේ කියලා. ෆෙස්බුක් එකේ ගිය දේවල් ගැන කිව්වා. එයාලා මිත‍්‍රශීලී විදියට කිව්වා එහෙනම් අපි යමු පොලීසියට, දැන්ම පැමිණිල්ලක් දාමු කියලා. ඊටපස්සේ පොලිස් ජීප් එකකින් පොලීසියට යන්න පිටත් වුණා. මගේ මල්ලිලා එයාලාගේ වාහනයේ ජීප් එක පිටිපස්සෙන් ආවා. අපි පැමිණිල්ලක් දාන්න හිතාගෙනයි ගියේ. ඒත් පොලීසිය පහුවෙලා ටිකක් දුර ගියා. ඊට පස්සේ පාර හරස් කළා. සැමියා එද්දී ඔහුව අත්අඩංගුවට ගත්තා. පාර අයිනේම පැය භාගයක් විතර ඔහුව තියාගෙන කාට හෝ ෆෝන් වලින් කතා කළා. මට තේරුණු විදියට ඔහුව අත්අඩංගුවට ගන්නද එපාද කියලයි කෝල් කරලා ඇහුවේ. ඒකෙන් පස්සේ අපට එන්න එපා කියලා පොලීසියට සැමියාව විතරක් අරගෙන ගියා. අපි ගෙදර ආවා. ආයෙමත් පැයකින් විතර සැමියාවත් අරගෙන පොලිස් නිලධාරීන් ගෙදරට ආවා. එතකොට මගේ පැමිණිල්ල බාර අරගෙන තිබුණේත් නැහැ, එයාලාගේ අතේ තිබුනු මගේ පැමිණිල්ලේ ලිපිගොනුත් අතුරුදන්.

ගෙදර ඇවිල්ලා අපට කිව්වා සැමියා ගැන තොරතුරු වගයක් ඇවිල්ලා තියෙනවා කියලා. පැමිණිල්ලක් නෙවෙයි, තොරතුරු තියෙනවා කියලා තමයි කිව්වේ. අසාමාන්‍ය විදියට ඔහු මුදල් උපයලා තියෙනවා, වැඩිපුර දේපල තියෙනවා කියලා තමයි තොරතුරු ගැන කීවේ. ඊට පස්සේ ගේ ඇතුලට පිරිමි නිලධාරීන් හයක්, කාන්තා නිලධාරීන් දෙන්නෙක්. බල්ලෙක් ආවා. එළියේත් තවත් අය හිටියා. මුලින්ම සීසීටීවී කැමරාවේ ඞීවීආර් එක ගැලෙව්වා. ඊට පස්සේ පාන්දර වෙනතුරුම ගේ පරීක්ෂා කළා. ඉන්පස්සේ මගෙන් කටඋත්තරයක් ගත්තා. එයාලා අපේ භාණ්ඩ තොගයක් අත්අඩංගුවට ගත්තා.

ඒ භාණ්ඩ අතර පාස්පෝට්, ලැප්ටොප් එකක්, ලියකියවිලි තිබුනු සූට්කේස් එකක්, මගේ චෙක්පොත වගේ ඔක්කෝම අරගෙන ගියා. ඒවායේ විස්තර ලියාගත්තා. ඒත් මට මොනාවත් දුන්නේ නැහැ. සැමියාව පොලීසියට ගෙනිච්චා. ගේ පරීක්ෂා කළේ කිසිම වරෙන්තුවක් නැතිව. මේ පරීක්ෂා කරපු අය ගෙදර කුලියට හිටපු අයගෙන් ඇහුවා තමුසෙලාට ලැජ්ජා නැද්ද, මේ ගෙදරට වෙලා ඉන්න කියලා. එදා බයවෙලා ගියපු කුලියට හිටපු අය තවමත් නැහැ.

ඒ වෙලාවේ පරීක්ෂා කරපු කෙනෙක් කෝල් කරලා තව කෙනෙක්ට කිව්වා චීෆ් පෲෆ් මොනාවත් නැහැ, මොනවද කරන්නේ කියලා. ගන්නද කියලා ඇහුවා. මට තේරුණ විදියට සැමියාව අත්අඩංගුවට ගන්නද එපාද කියලා කාගෙන් හරි අහලා තිබුණේ.

ඒකෙන් පස්සේ ඔහුව කුරුණෑගල අපරාධ විමර්ශන ඒකකයට ගිහිල්ලා තිබුණා. ඒකෙන් පස්සේ කොළඹ අපරාධ පරීක්ෂණ දෙපාර්තමේන්තුවට එව්වා. ඔහු තවම ඉන්නේ අත්අඩංගුවේ. අත්අඩංගුවට ගත්තේ ඇයිද කියලාවත් අපට පැහැදිළි නැහැ.

කියපු විදියට ඔහුව අත්අඩංගුවට අරගෙන තියෙන්නේ ත‍්‍රස්තවාදය වැළැක්වීමේ පනත හා හදිසි නීතිය යටතේ. ඒත් චෝදනා විදියට කිව්වේ දේපළ ගැනයි. මීට කලින් මැයි 23 වැනිදා දිවයින ප‍්‍රවෘත්තිය පළවුණාට පස්සේ එදාම පොලිස් මාධ්‍ය ප‍්‍රකාශකවරයා කිව්වේ ඒ ප‍්‍රවෘත්තියේ තිබුනු විදියේ පරීක්ෂණයක් පොලීසිය කරන්නේ නැති බව. කුරුණෑගල ප‍්‍රදේශයේ වැඩිපුර වත්කම් ඉපැයූ බවට සැක වෛද්‍යවරයෙක් ගැන පරීක්ෂණයක් නම් මෙහෙයවන බව කීවා. මුලින් මේ කියන විදියේ චෝදනාවක් තිබුණේ නැහැ. මම දන්න විදියට වත්කම් සම්බන්ධයෙන් ත‍්‍රස්තවාදය වැළැක්වීමේ පනත යටතේ අත්අඩංගුවට ගන්නේ නැහැ.

මේ කියන රියෝ වෙළඳසැල මිලදී ගැනීමේ ප‍්‍රශ්නය ගැන දැන් කතාවෙනවා. අපි අසාමාන්‍ය විදියට මුදල් උපයපු කෝටිපතියන් බව කියනවා. ඇත්තටම මේ ඉඩම හතරදෙනෙක් තමයි මිලදී ගත්තේ. මගේ සැමියා තනියෙන්ම ගත්ත එකක් නෙවෙයි. ඉඩමේ වටිනාකම කෝටි 13ක් වෙනවා. කෝටි 6ක් මුලින් ගෙවලා, ඉදිරි කොටස ණයක් අරගෙනයි ගෙව්වේ. මේ ඉඩමේ මුල් හිමිකරුගෙන් කුරුණෑගල සිංහල වෙළඳ සංගමයේ කෙනෙක් ඉඩම ඉල්ලූ බව මුල් හිමිකරු කියනවා. ඔහු ඉඩම නැවත ඉල්ලලා තිබුණා තවත් කෝටියක් වැඩිපුර දෙන බව කියලා. ඒ වෙද්දී මේ හතරදෙනා ඉඩම් ඇඞ්වාන්ස් ගෙවලා ඉවරයි. බැංකු ණයට අයදුම් කරලත් ඉවරයි. ඒ නිසා ඒ යෝජනාවට කැමති වුණේ නැහැ. ඉඩම මගේ සැමියා ඇතුලූ හතරදෙනා ගත්තා. දැන් කියන විදියට ඒක ප‍්‍රශ්නයක්ලූ. එහෙනම් ඒක ඩොක්ටර් සාෆිගේ වත්කමක් නෙවෙයි. ඩොක්ටර් සාෆි ඇතුලූ පිරිසකගේ වත්කමක්.

මම දැක්කා ලංකාදීපයේ තියෙනවා, කුරුණැගල සුඛෝපභෝගී නිවෙස් දෙකක් තියෙන බව. එහෙම නැහැ. එකක් අපි ඉන්න ගෙදර. ඒක සාමාන්‍ය පරණ ගෙයක්. ඒත් ඒකේ පැත්තකින් උස්සලා අපේ රාජකාරී වැඩවලට පහසු විදියට පොඩි කොටසක් හදලා තියෙනවා. තව ගෙයක් තියෙනවා කියලා තියෙනවා. අපට කුරුණෑගල තව ගෙවල් නැහැ. සමහරවිට මෙයාලා කියන්නේ මගේ පවුලේ මහගෙදර ගැන වෙන්න ඇති. ඒ ගෙදරත් සුඛෝපභෝගී ගෙයක් නෙවෙයි. ඒවාට අමතරව අපට පර්චස් ගණන්වල ඉඩම් කොටස් කිහිපයක් තියෙනවා. අපි අක්කර ගණන් ඉඩම් තියෙන කෝටිපති ව්‍යාපාරිකයෝ නෙවෙයි. අපට කෝටිපතියෝ කියලා කියන්නේ ඇයිද කියලා මම දන්නේ නැහැ.
දිවයින පත්තරේ තිබුණේ ‘තවුහිද් ජමාත්’ දොස්තර කෙනෙක් ගැන. ඒත් තවුහිද් ජමාත් හෝ වෙනත් කිසිම සංවිධානයකට මගේ සැමියා සම්බන්ධ නැහැ. එහෙම එකක් ඔප්පු කරන්න බැහැ. එයා කලාවැව ගමක සාම්ප‍්‍රදායික මුස්ලිම් පවුලකින් ඉපදිලා ආපු මනුස්සයෙක්. අපි කිසිම ආගමික නිකායකට සම්බන්ධ නැහැ. අපි සාම්ප‍්‍රදායික මුස්ලිම් ජාතිකයන්.

ඔහු රස්සාව කරද්දී කැපවීමෙන් වැඩ කරනවා. ඔහු දැඩිව විශ්වාස කළා අම්මා කෙනෙකුගේ සැත්කමක් එක දවසක් ප‍්‍රමාද කළොත් ඒ අම්මා ගෙදර යන එක ප‍්‍රමාද වෙන නිසා, එක් දවසක්වත් සැත්කම ප‍්‍රමාද නොකළ යුතු බව. අනෙක සිසේරියන් සැත්කමක් වෙනුවෙන් පැය හයක් අම්මා කෙනෙක් බඩගින්නේ ඉන්න ඕනෑ. ඩොක්ටර් කෙනෙක් සැත්කම කල්දැම්මොත් පැය හයක් බඩගින්නේ හිටපු අම්මා කෙනෙකුගේ බලාපොරොත්තු කඩවෙනවා. ඒ අම්මා පහුවදාත් බඩගින්නේ ඉන්න ඕනෑ. ඒ වගේ ප‍්‍රතිපත්ති ගොඩක් එයාට තියෙනවා. එයා කැපවෙලා වැඩකරන කෙනෙක්. දැන් එළියට ඇවිල්ලා කතාකරන අම්මලා ඉන්න බව ඇත්ත. ඒත් මේ ජාතිවාදී පසුබිමේ එළියට නොආපු, එයා ගැන ගෞරවයෙන් කතාකරන අම්මලා ගොඩක් ඉන්නවා.
මේ සිද්ධියෙන් පස්සේ අපි හැමෝටම ප‍්‍රශ්න ඇතිවුණා. මට ගෙදරින් එන්න වුණා. මල්ලි මාව මහගෙදරට එක්කාගෙන ගියා. මගේ ළමයි ඉස්කෝලේ යන්නේ නැහැ. මොකද මගේ ළමයි තුන්දෙනාම කුරුණෑගල ප‍්‍රධාන පෙළේ සිිංහල බෞද්ධයන් බහුතරයක් ඉන්න පාසැල්වලට යන්නේ. දැන් ළමයි තුන්දෙනා තැන් තුනක නවත්වලා ඉන්නේ. දැන් මට වැඩට යන්න බැහැ. රෝහල ඉදිරියේ උද්ඝෝෂණ ගණනාවක් තිබුණා. හාමුදුරුවරු ඇවිල්ලා වෛරී ප‍්‍රකාශ කළා. රෝහලට ගියොත් පහරදෙන බවට තර්ජන තියෙනවා. තවමත් මම අතරමං වෙලයි ඉන්නේ.

අපට දැන් මුහුණදෙන්න වෙලා තියෙන තත්වය ගැන මම මානව හිමිකම් කොමිෂමට යන්න බලාපොරොත්තු වෙනවා. මේ ගැන කරන්න පුලූවන් නීතිමය කටයුතු ගැන අපි බලනවා. මගේ සැමියා ගැන බී රිපෝට් එකක් තවම ලැබිලා නැහැ. ඔහුව අත්අඩංගුවට ගත්තේ මොකක් යටතේද කියලා අපි දන්නේ නැහැ. ඒවායින් පස්සේ මූලික අයිතිවාසිකම් පෙත්සමක් දාන්න අපි බලාපොරොත්තු වෙනවා.

අපි කිසිම වැරැුද්දක් කරලා නැහැ. ඒත් ලංකාවේ විදියක් තියෙනවානේ. අපව වැරදිකාරයන් කරලා ඉවරවෙලයි පැමිණිලි බාරගන්නේත්.’ x