ක‍්‍රිකට් සංග‍්‍රාම බලඇණි ගැන තත්ත්ව වාර්තාවක්
ක‍්‍රිකට් ලෝක කුසලානය ඇවිත්. හැම රසිකයෙකුගේම හදවත් උද්යෝගයෙන් පිරී ගිහින්. මේ වෙද්දී ලොව වැඩිම පිරිසක් නරඹන ක‍්‍රීඩාව පාපන්දු. ලොව දෙවැනියට වැඩිම පිරිසක් නරඹන ක‍්‍රීඩාව වන්නේ ක‍්‍රිකට්. දැවැන්ත ඉන්දියාවම ක‍්‍රිකට් රසිකයන් වීම මේ ලැයිස්තුවේ දෙවැනි තැන ක‍්‍රිකට්වලට ලැබීමට ප‍්‍රධාන හේතුවක් වූ බව ඇත්ත. කොහොම වුණත් අප මේ කතාකරන්නේ ලාංකිකයන්ගේ ජනප‍්‍රියම ක‍්‍රීඩාව ගැන පමණක් නොවෙයි. ලොව දෙවැනි ජනප‍්‍රියම ක‍්‍රීඩාවේ ලෝක කුසලානයට සහභාගි වෙන කණ්ඩායම් ගැනයි. ඒ කණ්ඩායම් අතරින් ජයගැනීමට වැඩි ඉඩක් තිබෙන කණ්ඩායම් ගැනයි.
එංගලන්තය
විශේෂ යමක් සිදු නොවුණොත් එංගලන්තය මෙවර තරගාවලිය ජයගත යුතුමයි. වසර හතරක් තිස්සේ එංගලන්තය ඉයන් මෝගන්ගේ නායකත්වයෙන් මේ තරගාවලියට සූදානම් වුණා. එංගලන්තය, ඉතිහාසයේ පළවැනි වතාවට ලෝක කුසලාන තරගාවලියට ලොව භයානකම උන්මත්තක-ප‍්‍රවේගකාරී පිතිකරණ කණ්ඩායම රැුගෙන එනවා.
එංගලන්තය කියන්නේ ටෙස්ට් ක‍්‍රිකට්වලට ආලයෙන් බැඳුණු ක‍්‍රිකට් දේශයක්. ඉඳහිට බිහිවූ කෙවින් පීටර්සන් කෙනෙක් හැරුණාම, එංගලන්තයේ සිටි පිතිකරුවන් අතර වැඩිපුර හිටියේ විශිෂ්ට තාක්ෂණයක් පාවිච්චි කරමින් තාක්ෂණයෙන් පිරි පහරවලින් මන්ද ගාමී ලෙස ලකුණු රැුස්කරන පිතිකරුවන්. එහෙත් වසර හතරකට පෙර ක‍්‍රිකට් නායකත්වයට පත්, අමුතු විදියට සිතූ නායකයෙක් වන ඉයන් මෝගන් හා ජොස් බට්ලර් නම් දහඅතේ වනන පිතිකරුවා කේන්ද්‍ර කරගනිමින් එංගලන්තය පසුගිය වසර හතර තිස්සේ තමන්ගේ කණ්ඩායමේ ඉරණම සම්පූර්ණයෙන්ම උඩු යටිකුරු කළා. තරග දෙකකදීම 400ට වැඩි ලකුණු ප‍්‍රමාණයක් ලබන්නටත් ඔවුන් සමත් වුණා. තම තරග රටාව සම්පූර්ණයෙන්ම වෙනස් කළා. අද එංගලන්තය ප‍්‍රවේගකාරී පිතිකරණ රටාවේ අන්තයට ගිය කණ්ඩායමක්.
පන්දු යැවීම අතිනුත් එංගලන්තය දුර්වල නැහැ. ලෝක පිතිකරුවන්ගේ රාජ්‍යයක් තිබුණා නම් මේ කණ්ඩායමේ සිටින ආදිල් රාෂිද් නම් පන්දු යවන්නා එල්ලා මරනවා සිකුරුයි. දකුණත් පා දඟපන්දු යවන්නෙක් වුව නොසිතූ විටෙක එන ගූග්ලියත් සමඟ ඕනෑ මොහොතක පන්දුව අනෙක් පැත්තට දඟ කවන්නට ඔහුට හැකියි.
ඉන්දියාව
ඉන්දියාවට මේ කුසලානයේදී යුගයේ අසහාය පිතිකරු විරාත් කෝලි ඉන්නවා. ලෝකයම කැළඹූ තරුණ පන්දු යවන්නා වන ජස්ප‍්‍රිට් බුම්රා ඉන්නවා. මේ වෙද්දී පිතිකරු ශ්‍රේණිගත කිරීම්වල කෝලිත්, පන්දු යවන්නන්ගේ ශ්‍රේණිගත කිරීම්වවල බුම්රාත් අංක එකේ සිටිනවා. ඔවුන්ගේ නම් දෙක වුව ඉන්දීය කණ්ඩායමේ ශක්තිය කියාපානවා.
විරාත් කෝලි ලකුණු හඹා යෑමටම ප‍්‍රසිද්ධ වූ පිතිකරුවෙක්. ඉන්දීය කණ්ඩායම හඹා ගොස් තරග ජයගත් අවස්ථා 84කට කෝලි සහභාගි වී තිබෙනවා. ඒ තරගවලදී ඔහු තනිව ලැබූ ලකුණු සංඛ්‍යාවෙහි සාමාන්‍යය 95ක විස්මිත අගයක් ගන්නවා. කෝලි, ශිකර් දවාන්, රෝහිත් ශර්මා යන අද්විතීය පිතිකරුවන් ත‍්‍රිත්වයෙන් ඇරඹෙන ඉන්දීය පිතිකරු බලඇණිය මහේන්ද්‍ර සිං දෝණි, රවීන්ද්‍ර ජඬේජා වැන්නන් සම්පූර්ණ කරනවා.
ජස්ප‍්‍රිට් බුම්රා මෙවර තරගාවලියට එක්වන වැඩිම බලාපොරොත්තු තැබූ ක‍්‍රීඩකයායි. ඔහු ගෙන් පටන් ගත් කල ඉන්දීය පන්දු යවන බලඇණිය ඔවුන්ගේ නූතන ඉතිහාසයේ විශිෂ්ටතම බලඇණිය ලෙස සැලකිය හැකියි. ඉන්දියාව හැමදාම හොඳ පන්දු යවන්නන්ගේ හිඟයකින් පෙළුණු රටක්. එහෙත් මෙවර ඔවුන්ට මොහොමඞ් සාමි, බුවනේෂ්වර් කුමාර් ඇතුළු වේග පන්දු යවන්නන්ට අමතරව වමත් දඟපන්දු යවන කුල්දීප් යාදව්ද ඉන්නවා. පා දඟපන්දු යවන යුස්වේන්ද්‍ර චාදල්ද, තුන් ඉරියව් ජඬේජාද එක්වෙද්දී ඉන්දියාවේ පන්දු බලඇණිය ඉන්දීය ඉතිහාසයේ හොඳම පන්දු යැවීමේ බලඇණිය වෙනවා.
ජස්ප‍්‍රිට් බුම්රා ගැන වෙනම වචනයක් සඳහන් කළ යුතුයි. ඔහු කෙබඳු ක‍්‍රීඩකයෙක්දැයි නිතර ක‍්‍රිකට් නොබලන රසිකයන්ට පහසුවෙන් තේරුම් කරන්නට පාවිච්චි කළ යුත්තේ එකම එක නමක්. ලසිත් මාලිංගෟ බුම්රාට අසම්මත හා අසාමාන්‍ය පන්දු යැවීමේ ඉරියව්වක් තිබෙනවා. දශමයකට කිරා මැන පිතිකරුවාගේ දෙපාමුලට යෝකර් යැවීමේ හැකියාවක් තිබෙනවා. සාමාන්‍යයෙන් පන්දුවක වේගය පැ.කි.මී. 140ට වැඩියි. වැරදීමකින් හෝ තමන්ගේ පන්දුවකට හතරේ පහරක් එල්ල කළොත් සිනහවෙනවා. බුම්රාට අඩුවකට ඇත්තේ පාට කළ කොණ්ඩයක් පමණයි.
දකුණු අප‍්‍රිකාව
නූතන දකුණු අප‍්‍රිකානු ක‍්‍රිකට් ඉතිහාසයේ දැවැන්තම නාමයන් වන ස්මිත්, ජැක් කලීස් හා ඒබී ඩිවිලියර්ස් යන තිදෙනාම නැති පළමු ලෝක කුසලාන තරගාවලිය මෙයයි. ඒ සුන්දර යුගය අවසන්. එහෙත් ඒ යුගය නියෝජනය කරමින් හෂීම් අම්ලා හා ඬේල් ස්ටේන් යන නූතන ශ්‍රේෂ්ඨයන් දෙදෙනා මේ තරගාවලියට එක්වෙනවා. ඒ දෙදෙනා ඇතුළුව මීට පෙර ලෝක කුසලානවලට සහභාගි වූ ක‍්‍රීඩකයන් හත්දෙනෙක්ම මේ කණ්ඩායමේ සිටිනවා.
ඒ නිසා දකුණු අප‍්‍රිකාවට ඇති පළවැනිම වාසිය වන්නේ පෙර කී යුගයේ ක‍්‍රීඩා කොට අත්දැකීම්වලින් ඇති ක‍්‍රීඩකයන්ගේ නම් ලැයිස්තුවයි. මේ අත්දැකීම් නිසාම, දකුණු අප‍්‍රිකාවේ ලෝක කුසලාන ඉතිහාසය පසෙක තිබියදී ඔවුන් මෙවර ජයගනු ඇතැයි කෙනෙකු තර්ක කරනවා. අත්දැකිම්වලින් පිරි හෂීම් අම්ලා, ෆැෆ් ඩුප්ලෙසීස්, ක්වින්ටන් ඩිකොක්, ඬේවිඞ් මිලර් යන පිතිකරුවන් දකුණු අප‍්‍රිකානු කණ්ඩායමේ පෙරමුණේ සිටිනවා. ස්මිත්ලාගේ අවසන් පූර්ව තරග යුගයෙන් ශූරයන්ගේ යුගයකට ඉදිරි පිම්මක් පනින්නට හැකියාවක් මේ කණ්ඩායමට තියෙනවා. ඬේල් ස්ටේන් නම් අත්දැකීම්වලින් පිරි පන්දු යවන්නා ඔවුන්ට සිටිනවා. ඔහු ප‍්‍රමුඛව ජේ.පී. ඩුමිනි, ඉම්රාන් තාහිර් යන පන්දු යවන්නන් කණ්ඩායමේ සිටිනවා. ලූන්ගි න්ගිඩි, ඇන්ඩිලෙ පෙහ්ලූක්වයො, කගිසෝ රබාඩා යන වේගපන්දු යවන්නන් ඔවුන්ට තෝරාගැනීම් ලෙස සිටිනවා.
නවසීලන්තය
යන්තමින් මඟහැරුණු ජයග‍්‍රහණය ලබන්නට සිතාගෙන අන්තර්ජාතික ශ්‍රේණිගත කිරීම්වල සිව්වැනි ස්ථානයේ සිටිමින් නවසීලන්තය මෙවර තරගාවලියට එනවා. ඒ තුන් ඉරියව් ක‍්‍රීඩකයන් තොගයක් සාක්කුවේ දමාගෙනයි. ඕනෑ මොහොතක පන්දු ඕවරයක් යැවිය හැකි මාටින් ගප්ටිල්, කොලින් මුන්රෝ වැන්නන් මෙන්ම කොලින් ඩි ග‍්‍රෑන්ඞ්හෝම්, ජිමී නීෂම් වැනි තුන් ඉරියව්වෙන් විශිෂ්ට ක‍්‍රීඩකයන්ද ඒ සාක්කුවේ සිටිනවා. මේ සියලූදෙනා පිත්තෙහි දක්ෂයන්. ඊට අමතරව කේන් විලියම්සන් හා රොස් ටේලර් නම් අත්දැකීම් සහිත විශිෂ්ට පිතිකරුවන් දෙදෙනා කණ්ඩායමේ සිටිනවා. නවසීලන්ත නායක කේන් විලියම්සන් විශිෂ්ට සිතන්නෙක්.
නවසීලන්තයේ කේන්ද්‍රීය ක‍්‍රීඩකයා වන්නේ සැක නැතිවම කේන් විලියම්සන්. එහෙත් අත්දැකීම්වලින් පිරි වේගවත් ආරම්භක පිතිකරු මාටින් ගප්ටිල් ගැන දෙවියන්ටවත් අනුමාන කළ නොහැකියි. ගප්ටිල්ගේ භයානකකම තවත් වැඩි වන්නේ ඔහු එංගලන්තයේදී 46.5ක ලකුණු සාමාන්‍යයක් හා 97.31ක ප‍්‍රහාරක වේගයක් රඳවාගැනීමට සමත් වීම නිසායි. නවසීලන්තයේ පන්දු යවන්නන් වන ට‍්‍රනේට් බෝල්ට්, ටිම් සවුති වැන්නන් නම ඇසූ පමණින් පිතිකරුවන්ව බිය ගන්වන අන්දමේ පන්දු යවන්නන් නොවෙයි. එහෙත් යම් තණතිල්ලක් දෝලනය වීමේ පුංචි සලකුණක්වත් පෙන්වුවොත් පිතිකරුවන්ට තර්ජනයක් වෙන්නට තරම් ඔවුන් ශක්තිමත්. ඒ නිසා නවසීලන්තයට මෙවර ලෝක කුසලානය දුර සිහිනයක් නොවෙයි.
ඕස්ටේ‍්‍රලියාව
මේ වසරේ මාර්තු මාසය දක්වා ඕස්ටේ‍්‍රලියාවේ දුර්වලම ක‍්‍රිකට් යුගයක් ගෙවී ගියා. ඒ කාලයේ සහභාගි වූ තරග 26න් ඔවුන් ජයගෙන තිබුණේ තරග 4ක් පමණයි. එහෙත් මාර්තු මාසයෙන් පසුව ඕස්ටේ‍්‍රලියානු කණ්ඩායම වෙනස් වුණා. නව පෙනුමක් සමඟ කණ්ඩායම ඉන්දියාවටත් පාකිස්ථානයටත් සංචාරය කළා. තරගාවලි දෙකම නොසිතූ ලෙස ජයගත්තා. ඉන්දීයාව ඉන්දියාවේදීම පරාජය කිරීම ඔවුන්ට දැවැන්ත උත්පේ‍්‍රරකයක්. පළමු පුහුණු තරගයේදී අංක එකේ එංගලන්තය පරාජය කරන්නටත් ඔවුන් සමත් වුණා. දෙවැනි පුහුණු තරගයේදී ලංකාවට එරෙහිව උස්මාන් කවාජා හැකියාව පෙන්වුවා. කවාජාට අමතරව නායක ඒරන් ෆින්ච්, ඬේවිඞ් වෝනර්, ස්ටීව් ස්මිත් හා ෂෝන් මාෂ් යන පිතිකරුවන් ඔවුන්ට සිටිනවා.
පිත්ත අතට ගත් විට බෝලය කෙරෙහි වෛරයෙන් එය හැකි තරම් ඈතට යවන්නට උත්සාහ කරන ග්ලෙන් මැක්ස්වෙල් නම් යක්ෂ පුත‍්‍රයාගේ නම ඉහත පිතිකරු නම් අතරට එකතු නොකළේ ඔහු පිතිකරණයට අදක්ෂ නිසා නොවෙයි. තුන් ඉරියව් ක‍්‍රීඩකයෙක් නිසායි. ඔහු පන්දු යැවීමේ බලඇණියේ සාමාජිකයෙක්ද වෙනවා. මිෂෙල් ස්ටාක් හා පැට් කමින්ස් ප‍්‍රමුඛ ඕස්ටේ‍්‍රලියානු පන්දු යවන බලඇණියට නේතන් ලයන්ගේ හා ඇඩම් සම්පාගේ දඟපන්දුවක් එකතු වෙද්දී එය ඉතා ශක්තිමත් එකක් වෙනවා. ඉතින්, ඕස්ටේ‍්‍රලියාවේ තරග සැලසුම විය යුත්තේ තම ශක්තිය පාවිච්චි කොට ප‍්‍රතිවාදීන්ගේ කඩුලූ ඉක්මනින් දවාගැනීමයි.
පාකිස්ථානය
මෙවර පාකිස්ථානය සියලූ කැට තබා ඇත්තේ බාබර් අසාම් මතයි. ඔහු මෙවර ඉන්නේ උපරිම රිද්මයේයි. ඔහුගේ 2019 වර්ෂයේ ලකුණු සාමාන්‍යය 52.44ක්. බාබර් අසාම් සමඟ ඉමාම් උල් හක් සහ ෆකාර් සමාන් හරිහැටි ක‍්‍රියාත්මක වුණොත් පාකිස්ථානයට සාර්ථක වීම අසීරු නැහැ. ෆකාර් සමාන් කියන්නේ ද්විත්ව ශතකයක්ද රැුස්කළ අධි-ප‍්‍රවේගකාරී පිතිකරුවෙක්.
මේ එංගලන්තයේදීම 2017දී ශූරයන්ගේ කුසලානය ජයගත්තේ ඔහු නිසායි. මීට අමතරව වමත් පිතිකුරු හැරිස් සොහෙල් මෙන්ම අත්දැකීම්වලින් පිරුණු මොහොමඞ් හෆීස්, ෂොයිබ් මලික් හා සෆ්රාස් අහ්මඞ් සිටිනවා. පරාජයේ අමිහිරි අත්දැකීම් තිබුණද, ඔවුන්ට තරගාවලිය ජයගැනීමට තරම් සෑහීමට පත්විය හැකි අන්දමේ පිතිකරු ලැයිස්තුවක් ඉන්නවා.
සාම්ප‍්‍රදායිකව පාකිස්ථානයට තිබුණු ශක්තිය මෙවර ඔවුන්ගේ දුර්වලතාවක් වීම ඔවුන්ට ඇති අවාසියයි. මෑතකාලයේ හැම ලෝක කුසලානයටම පාහේ හොඳම පන්දු යවන්නන්ගේ බලඇණිය රැුගෙන ගිය පාකිස්ථානයට මෙවර ඉන්නේ සාපේක්ෂව දුර්වල පන්දු බලඇණියක්. පාකිස්ථානයට සිටින එකම බලාපොරොත්තුව වේගපන්දු යවන මොහොමඞ් අමීර්. 19 හැවිරිදි ෂහීන් අෆ‍්‍රිඩි මෙන්ම අත්දැකීම්වලින් පිරි වහබ් රියාස්ද පාකිස්ථානු කණ්ඩායමේ ඉන්නවා. මේ තිදෙනාම වමත් පන්දු යවන්නන්. පාකිස්ථානු කණ්ඩායමට අඩුවකට ඇත්තේ ඇඟිලිවලින් දඟ කවන පන්දු යවන්නෙකුයි. ෂාඩාබ් ඛාන් හා ඉමාඞ් වසීම් දඟපන්දු යවන්නන් ලෙස සිටිනවා.
පාකිස්ථානය ජයගත් ලෝක කුසලානයට අමතරව ඔවුන් මේ සියලූ කණ්ඩායම් සහභාගි වූ තරගාවලිවලදී ජයග‍්‍රහණ තුනක් ලබාගත්තා. 1999 ලෝක කුසලානයේදී අවසන් තරගයට පැමිණියා. 2009 දී ලෝක කුසලානය ජයගත්තා. 2017 දී චැම්පියන් කුසලානය ජයගත්තා. ඒ ජයග‍්‍රහණ තුනම ඔවුන් ලැබුවේ එංගලන්තයේදීයි. පාකිස්ථානය ක‍්‍රිකට් ඉතිහාසය පුරාම නොසිතූ විස්කම් කළ කණ්ඩායමක්. කෙසේ හෝ මුල් වටයේදී ලකුණු ලැයිස්තුවේ ඉහළ තැනක් වෙන් කරගන්නට සමත් වුණොත් කුසලානය ජයගන්නට ඕනෑ වෙන්නේ තවත් ජයග‍්‍රහණ දෙකක් පමණයි.
බංග්ලාදේශය
ක‍්‍රිකට් ඉතිහාසය පුරාවට හිටියේ සුපිරි කණ්ඩායම් අටක් පමණයි. බංග්ලාදේශය හැමවිටම නවවැනි කණ්ඩායම පමණක් වුණා. ඔවුන් අනපේක්ෂිත ජයග‍්‍රහණයක් දෙකක් වාර්තා කරන්නට මිස තරගාවලියක අර්ධ අවසන් පූර්ව වටය දක්වා යන්නටවත් සුදුසු කණ්ඩායමක් ලෙස කවුරුත් අනුමාන කළේ නැහැ. හබිබුල්, අෂ්රෆුල් වැන්නන්ව විශිෂ්ට ක‍්‍රීඩකයන් ලෙස සැලකුවද ඔවුන් විශිෂ්ට කණ්ඩායමක් ලෙස සැලකුවේ නැහැ. එහෙත් වත්මන් බංග්ලාදේශ නායකයා හා පාර්ලිමේන්තු මන්ත‍්‍රීවරයෙක්ද වන මෂ්රෆී මොර්ටාසාගේ නායකත්වය යටතේ බංග්ලාදේශ ක‍්‍රිකට් වෙනස් වුණා. මොර්ටාසාගේ කතාව සම්පූර්ණ වෙන්නට මෙවර කුසලානයේදී බංග්ලාදේශය යමක් කළ යුතුයි.
ඔවුන් සතුව අත්දැකීම් සහිත ක‍්‍රීඩකයන් ගණනාවක් සිටිනවා. ලෝක ශ්‍රේණිගතකිරීම්වල අංක එකේ තුන් ඉරියව් ක‍්‍රීඩකයා වන ෂකිබ් අල් හසන්, නායක මෂ්රෆී මොර්ටාසා, මුෂ්ෆිකර් රහීම්, තමීම් ඉක්බාල්, මහමදුල්ලා යන නූතන බංග්ලාදේශ ඉතිහාසයේ විශිෂ්ටතම ක‍්‍රීඩකයන් පස්දෙනා ඔවුන් සතුව තවම සිටිනවා. පස්දෙනාටම වසර 10ට වැඩි අත්දැකීම් තියෙනවා. එපමණක් නොව අත්දැකීම් හා තරුණ්‍යය අතරමැද්දේ ක‍්‍රිකට් ක‍්‍රීඩාවට ගැළපෙනම වයස වන අවුරුදු 29-32 අතර සීමාවේ මොර්ටාසා හැර අනෙක් සිව්දෙනාම සිටිනවා. බංග්ලාදේශය විශේෂ යමක් කරනවා නම් ඔවුන්ට ඇති ලොකුම ශක්තිය මේ පස්දෙනායි. බංග්ලාදේශය දැනටත් අන්තර්ජාතික ශ්‍රේණිගතකිරීම්වල බටහිර ඉන්දීය කොදෙව්වන්ට හා ශ‍්‍රී ලංකාවට වඩා ඉදිරියෙන් සිටින බවත් මතක තබාගත යුතුයි. ඔවුන් නොසිතූ ජයග‍්‍රහණ දෙකතුනක් වාර්තා කළොත් ඉතිහාසය වෙනස් වේවි.
බටහිර ඉන්දීය කොදෙව්
අධිවේගයෙන් පන්දු යවන, ඇසිපිය නිමේෂයෙන් පන්දුව ඉහළ යවන ජවාධිකයන් රොත්තක් සිය අසීමිත ජවය සරල විහිළු තහලූවෙන් හා සිනහවෙන් වසාගෙන එංගලන්තයට පැමිණ සිටින්නේ බටහිර ඉන්දීය කොදෙව් ක‍්‍රිකට් කණ්ඩායම යන ලේබලය පිටේ අලවාගෙනයි. තරගාවලිය ජයගත්තත් නැතත් ඔවුන් විශේෂයි. එහෙත් මෙවර ඔවුන්ට පෙර තිබුණාටත් වඩා කුසලානය ජයගැනීමේ ආශාවක් ඇතිවාට සැක නැහැ. වසර ගණනාවක් තිස්සේ ලද අත්දැකීම්වලින් හැකි උපරිම ඵල නෙලාගැනීමට කොදෙව් නායක ජේසන් හෝල්ඩර්ට බලාපොරොත්තු ඇතිවාටද සැකයක් නැහැ.
ඩැරන් බ‍්‍රාවෝ, ක‍්‍රිස් ගේල්, ෂායි හෝප් ආදි පිතිකරුවන් ඔවුන්ට සිටිනවා. එහෙත් බටහිර ඉන්දීය කොදෙව් පිතිකරු අංශය වෙනදාට වඩා මෙවර දුර්වල බව කල්පනා කළ හැකියි. ක‍්‍රිස් ගේල් 40 වැනි වියේ පසුවෙද්දී වෙනදා තරම් ජවාධික විලාසයක් ඔහු ගෙන් වුව බලාපොරොත්තු විය නොහැකියි. ඒ නිසා මෙවර බටහිර ඉන්දීය කොදෙව්වන්ට බලාපොරොත්තු තබන්නට පැමිණෙන්නේ සම්ප‍්‍රදායානුකූලවම ශක්තිමත් වූ වේගපන්දු යවන්නන්ගේ අනවරත වේගපන්දු මාලාව කෙරෙහියි.
ශ‍්‍රී ලංකාව
අප මෙවර බලාපොරොත්තු රහිතම කණ්ඩායම් අතර සිටින බව ඕනෑ කෙනෙක් දන්නවා.
මහේල, සංගා ඇතුළු ක‍්‍රීඩකයන්ගේ නික්මයෑමත් සමඟ ශ‍්‍රී ලංකා ක‍්‍රිකට් කණ්ඩායමට අහිමිවුණේ විශිෂ්ට ක‍්‍රීඩකයන් පමණක් නොවෙයි. විශිෂ්ට සිතන්නන්ද අපට අහිමි වුණා. අද අපේ කණ්ඩායමේ මොළයට වැදගත්කමක් ලබාදෙන එකම ක‍්‍රීඩකයා ලසිත් මාලිංග පමණයි. ලංකාවේ අය ලසිත් මාලිංග ක‍්‍රිකට් බුද්ධිමතෙක් ලෙස හඳුනා නොගත්තද, ඔහු විශිෂ්ට ක‍්‍රිකට් සිතන්නෙක් ලෙස ලෝකයම පිළිගන්නවා. අවශ්‍ය නම් ඒ ගැන මුම්බායි ඉන්දියන්ස් කණ්ඩායමෙන් විමසිය හැකියි. මහේල හා සංගාගෙන් පසුව ලංකාවේ ක‍්‍රිකට් ඔහුට බාරදිය යුතුව තිබුණද, බාල දේශපාලනය නිසා එය එසේ සිද්ධවුණේ නැහැ. කෙසේ වෙතත් අද අප මෙතැන සිටිනවා. අපට සිටින කණ්ඩායම ගැන කතාකළ යුතුයි.
අපට ඇති ඉහළම බලාපොරොත්තුව වන්නේ මාලිංගගේ බුද්ධියයි. ඒ නිසා නායක දිමුත්, මාලිංගගේ උපදෙස් කෙරෙහි උපරිම විශ්වාසය තැබිය යුතුයි. සුරංග ලක්මාල්වත්, නුවන් ප‍්‍රදීප්වත්, ඉසුරු උදානවත් තුන් ඉරියව් ක‍්‍රීඩක තිසර පෙරේරාවත් නිසි ලෙස කළමනාකරණය කරගන්නට මාලිංග සමත් වුණොත් පන්දු යැවීම පැත්තෙන් අපට යමක් කළ හැකියි. මැතිව්ස්ගේ නායකත්වය ගැන කුමන විවේචන තිබුණත් ඔහු කෙතරම් විශිෂ්ට පිතිකරුවෙක්ද යන්න කිසිවෙකුට කිසිදා අමතක කළ නොහැකියි. ඔහුටත් තිසර පෙරේරාටත් මැදපෙළ බාරවෙද්දී ළහිරු තිරිමාන්නට ඉදිරි පෙළ දැවැන්ත වගකීමක් පැවරෙනවා. මෑත දිනෙක දකුණු අප‍්‍රිකානු ටෙස්ට් තරගවලදී විස්කම් පෑ කුසල් ජනිත් තමන් ගැනම විශ්වාස කළොත් මේ තරගාවලියේදී සියල්ලන්ගේ දෑස් විවර කරවන විස්මයක් පාන්නට ශ‍්‍රී ලංකාවේ කොල්ලන්ට හැකිවේවි.
ඇෆ්ගනිස්ථාන
ඇෆ්ගනිස්ථානය ගැන දීර්ඝ යමක් කියන්නට නැහැ. ඔවුන් එක් තරගයක් හෝ ජයගෙන මේ තරගාවලියේදී තමන්ගේ සලකුණ තබනු ඇති බව විශ්වාසයි. නූතන ඉතිහාසයේ ක‍්‍රිකට් ලොවේ නැගී ආ කණ්ඩායමක් ලෙස ඔවුන්ව සැලකිය හැකියි. කෙසේ වෙතත් ලෝක කුසලානයට මාසයක් තබා ඇෆ්ගනිස්තාන ක‍්‍රිකට් තේරීම් කමිටුව වසර හතරක් තිස්සේ ඇෆ්ගන් ක‍්‍රිකට් නායකයාව සිටි අස්ගර් ඇෆ්ගාන ඉවත් කොට තරුණ ගුල්බාදීන් නායිබ් නායකත්වයට පත් කර තිබුණා. 28 හැවිරිදි තුන් ඉරියව් ක‍්‍රීඩක නායිබ්ට සිය පළමු අභියෝගය ලෙස තරගකාරී ලෝක කුසලානයක් හිමිව තිබීම ඒ කණ්ඩායමට අවාසියක් විය හැකියි. කෙසේ වෙතත් මෙය ඇෆ්ගන් කණ්ඩායමට යහපත් තත්වයක් නොවේවි. අනෙක් අතට ඔවුන්ට ආසියාවෙන් පිට තරග කොට අත්දැකීම්ද නැති තරම්. ඇෆ්ගනිස්ථානයේ බලාපොරොත්තු සහගත ක‍්‍රීඩකයා වන්නේ තුන් ඉරියව් ක‍්‍රීඩක රෂීඞ් ඛාන්. x
