එහෙම කිව්වොත් අත්අඩංගුවට ගන්නේ නැහැයි කිව්වා
මහේස්ත්‍රාත් හමුවේ විශේෂ ප්‍රකාශයක් දෙමින් පොලිස් පරීක්‍ෂක මෙන්ඩිස් කියයි.
‘අපරාධ පරීක්ෂණ දෙපාර්තමේන්තුවේ හිටපු අධ්යක්ෂ ජ්‍යේෂ්ඨ පොලිස් අධිකාරි ශානි අබේසේකර, තමා සන්තකයේ තිබුණු ආයුධ තොගයක් ගෙනැවිත් දී, කළගෙඩිහේන වත්තක ඌරු කොටුවක් තුළ, හිටපු නියෝජ්‍ය පොලිස්පති වාස් ගුණවර්ධන එම වරදට හසුකිරීමේ අදහසින් වළලන්නට කී බව’ට ප්‍රකාශයක් දෙනවා නම්, තමා අත්අඩංගුවට නොගෙන මුදාහරින බව කොළඹ අපරාධ කොට්ඨාසයේ (සීසීඩී) නිලධාරීන් දෙදෙනෙකු තමාට පොරොන්දු වූ බව, අගෝස්තු 4 වැනිදා, ගම්පහ මහේස්ත්‍රාත් අධිකරණය ඉදිරියේ ප්‍රකාශයක් කරමින්, කලක් අපරාධ පරීක්ෂණ දෙපාර්තමේන්තුවේ සේවය කළ, දැනට ඇඹිලිපිටිය පොලිසියේ රාජකාරියේ නියුතු පොලිස් පරීක්‍ෂක ආර් එස් එම් මෙන්ඩිස් කීවේය.
එම ප්‍රකාශය අපරාධ නඩු විධාන සංග්‍රහය පනතේ 127 වගන්තිය යටතේ වාර්තා කරන ලෙස පොලිස් පරීක්‍ෂක මෙන්ඩිස්ගේ නීතිඥ චමින්ද අතුකෝරල මහේස්ත්‍රාත්වරයාගෙන් ඉල්ලූ විට, සිය නිල මැදිරියේදී මෙන්ඩිස් මහතාගේ ප්‍රකාශය සටහන් කර ගැනීමට මහේස්ත්‍රාත්වරයා කටයුතු කෙළේය.
මෙන්ඩිස් මහතාගේ එම ප්‍රකාශයත් සමග, ජේ්‍යෂ්ඨ පොලිස් අධිකාරි ශානි අබේසේකරට විරුද්ධව කොළඹ අපරාධ කොට්ඨාසය පවත්වාගෙන යන විමර්ශනවලට අදාළ නඩු කටයුත්ත අලුත්ම මානයක් වෙත ගමන් කරමින් තිබේ.
මෙන්ඩිස් මහතා මහේස්ත්‍රාත්වරයාට ප්‍රකාශ කර සිටියේ, කොළඹ අපරාධ කොට්ඨාසයේ සහකාර පොලිස් අධිකාරි නෙවිල් පෙරේරා සහ නිශාන්ත නමැති තවත් පොලිස් පරීක්‍ෂකවරයකු තමාට එසේ කී බවයි. තමා එවැනි අසත්‍යයක් ප්‍රකාශ කිරීම ප්‍රතික්‍ෂෙප කළ විට අගෝස්තු 3 වැනිදා අත්අඩංගුවට ගෙන මහේස්ත්‍රාත්වරයා වෙත ඉදිරිපත් කළ බවද මෙන්ඩිස් මහතා අධිකරණයට කීවේය.
මෙහෙම වෙන්නේ ඇයි?
මෙන්ඩිස් මහතාගේ මේ ප්‍රකාශයත්, එදින අධිකරණයේදි සිදුවූ දේත් සිංහල, ඉංග්‍රීසි පුවත්පත් වාර්තා කර තිබුණේ පුදුම හිතෙන විදියටය. අගෝස්තු 5 වැනිදා ඬේලිමිරර් පුවත්පත සිය මුද්‍රිත සංස්කරණයේදී සඳහන් කළේ, මෙන්ඩිස් මහතා ලබන 7 වැනිදා දක්වා රිමාන්ඞ් බන්ධනාගාරගත කිරීමට මහේස්ත්‍රාත්වරයා නියම කළ බවක් පමණකි. මෙන්ඩිස් මහතා කිසිම විශේෂ ප්‍රකාශයක් අධිකරණයට කළ බවක් එම ප්‍රවෘත්තියේ සඳහන් නොවීම විස්මයට කාරණයකි. එහෙත් එදිනම ඬේලිමිරර් ඔන්ලයින් සංස්කරණයෙහි ඉහත කාරණා පිළිබඳ විස්තරාත්මක වාර්තාවක් පළවිය. පුදුමයකට මෙන්, මිනිත්තු ගණනක කාලයක් තුළ එම පුවත ඬේලිමිරර් ඔන්ලයින් සංස්කරණයෙන් ඉවත් කර තිබිණ. අනෙක් පුවත්පත සියල්ලකමද මෙන්ඩිස්ගේ මෙම ප්‍රකාශය ගැන සඳහන් නොකරම, සාක්ෂි ගෙතීමේ චෝදනාවට ඔහු රිමාන්ඞ් කළ බව පමණක් සඳහන් කර තිබිණ. ඒවා එසේ සිදුවන්නේ කෙසේදැයි කවුරුත් දන්නේ නැත. පසුගිය කාලයේ, නඩුවල විත්තිකරුවන් ජනාධිපති කොමිසම ඉදිරියට විත්, ‘ගෝඨාභය පටලවන්න කියා අපට කිව්වා’ කී හැම විටකම, එම ප්‍රකාශ පොල් ගෙඩි අකුරෙන් මේ පුවත්පත්වලම පළවෙද්දී මේ පුවත පමණක් පළනොවන්නේත්, පළවූවත් ඒ වහාම ගැලවෙන්නේත් ඇයිදැයි පැහැදිලි නැත.
අත්අඩංගුවට ගැනීම
අපරාධ පරීක්ෂණ දෙපාර්තමේන්තුවේ හිටපු අධ්යක්ෂ ජේ්‍යෂ්ඨ පොලිස් අධිකාරි ශානි අබේසේකර, කොළඹ අපරාධ කොට්ඨාසය විසින් ඔහුගේ නිවසේදී අත්අඩංගුවට ගැනෙන්නේ ජුලි 31වැනිදා උදේය. ඒ, ‘බොරු සාක්ෂි ගෙතීමේ’ චෝදනාවකට අදාළව යැයි මාධ්‍ය වාර්තා කළේය. උදේ අත්අඩංගුවට ගැනෙන ඔහු රාත්‍රි 9 පමණ වන තෙක් සීසීඩීයේ රඳවාගෙන ප්‍රකාශයක් සටහන් කරගන්නා අතර, රාත්‍රි 10ට පමණ ගම්පහ මහේස්ත්‍රාත් මංජුල කරුණාරත්න වෙත ඉදිරිපත් කෙරිණ. සීසීඩීය ගොනුකළ ‘බී‘ වාර්තාවෙන් ඔහුට චෝදනා නගා තිබුණේ ගිනි අවි ආඥා පනත යටතේය. ගිනි අවි ආඥා පනත යටතට ගැනෙන වැරදි සම්බන්ධයෙන් ඇප ලබාදීමට මහේස්ත්‍රාත් අධිකරණයට බලයක් නැත. එනිසා, එදින අනිවාර්යය වූයේ ශානි බේසේකර රිමාන්ඞ් බන්ධනාගාරගත කිරීමයි. අගෝස්තු 4වැනිදා සහ 7 වැනිදා නඩුව නැවත කැඳවීමට මහේස්ත්‍රාත්වරයා නියම කෙළේය.
මොහොමඞ් ෂියාම් ඝාතනය
ශානි අබේසේකරට මේ චෝදනා ගොනුවන්නේ ව්‍යාපාරික මොහොමඞ් ෂියාම් ඝාතනය සම්බන්ධයෙන් අපරාධ විමර්ශනවලට මූලිකත්වය දීම නිසාය. මොහොමඞ් ෂියාම් ඝාතනය කෙරෙන්නේ 2013 අවුරුද්දේ මැයි මාසයේය. ෂියාම්ගේ මස්සිනා එවකට ජනාධිපති මහින්ද රාජපක්ෂ හිතවතෙකි. ඔහු ඇතුළු පවුලේ ඥාතීහු ජනාධිපතිවරයා හමුවී ඝාතනය ගැන සාධාරණ විමර්ශනයක් පවත්වන ලෙස ඉල්ලා සිටියෝය. ඒ අනුව, 2013 වෙසක් පෝය දින, එවකට පොලිස්පති එන්කේ ඉලංගකෝන් සහ සීඅයිඩීය භාර ජ්‍යෙෂ්ඨ නියෝජ්‍ය පොලිස්පති රවි සෙනෙවිරත්න අරලියගහ මන්දිරයට කැඳවූ ජනාධිපති මහින්ද, මෙම විමර්ශනය සීඅයිඩීයේ ‘වැනෙන්නේ නැති’ දක්‍ෂ නිලධාරියකුට බාරදෙන ලෙස නියම කෙළේය. රවි සෙනෙවිරත්න මහතා එවිට කීවේ, එවැනි සුදුස්සකු සීඅයිඩීයේ සිටී නම් ඒ ශානි අබේසේකර බවයි. පසු දිනෙක පොලිස්පතිවරයා හා සෙනෙවිරත්න මහතා, ශානි අබේසේකර කැඳවා ෂියාම් ඝාතනයේ විමර්ශන කටයුතු බාරගන්නා ලෙස ඉල්ලා සිටියහ.
බාරගන්න බැහැ
ශානි අබේසේකර ගත් කටටම කිව්වේ, එම විමර්ශනය තමන්ට බාරගත නොහැකි බවයි. ‘අඟුලාන සිද්ධිය ගැන විමර්ශන කළ නිසා පොලිසියේ බාගයක් මං එක්ක දැන් තරහයි. ඒ නිසා මට ඕක බාරගන්න බැහැ.‘ ශානි තිර හඬින් කීවේය. අඟුලාන සිද්ධිය යැයි ශානි කීවේ, 2009 අගෝස්තු 11 වැනිදා, අඟුලාන පොලිසියේ අත්අඩංගුවේ සිටි තරුණයන් දෙදෙනකුට වෙඩි තබා ඝාතනය කිරීමේ අපරාධය සම්බන්ධයෙන් අඟුලාන පොලිසියේ පොලිස් නිලධාරීනට එරෙහිව පැවැත්වුණු විමර්ශනය ගැනය. (එම අපරාධයට අදාළ නඩුවේ ත්‍රිපුද්ගල මහාධිකරණ විනිසුරු තීන්දුව අනුව පොලිස් නිලධාරීන් හතර දෙනකුට මරණ දඬුවම නියම වූ අතර, විමර්ශන ඉතාමත් දක්‍ෂ අන්දමින් කිරීම ගැන ශානි අබේසේකර මහාධිකරණ විනිසුරුවරුන්ගේ විශේෂ ගරු සඳහන් කිරීමකට ලක්විය.) ‘මේක බාරනොගන ඉන්න බැහැ. ජනාධිපතිතුමාට අපි ශානිගේ නම දැනුම්දීලයි ආවේ.’ සෙනෙවිරත්න හා පොලිස්පති ශානිට කීවෝය.
වාස්ගෙන් මරණ තර්ජන
මොහොමඞ් ෂියාම් ඝාතනය ගැන විමර්ශන ශානි වෙත පැවරෙන්නේ ඒ ආකාරයටය. ශානි විමර්ශන කටයුතු කරද්දී, නියෝජ්‍ය පොලිස්පති වාස් ගුණවර්ධන සිද්ධියට සම්බන්ධ බවට තොරතුරු ලැබිණ. ඔහුගෙන් හා සම්බන්ධ අනෙක් පොලිස් නිලධාරීන්ගෙන් ප්‍රකාශ සටහන් කරගන්නට ශානිට අවශ්‍ය වූ නමුත්, සිය ඉහළ පොලිස් බලය පාවිච්චි කරමින් වාස් ගුණවර්ධන ප්‍රකාශ දීම මගහරිමින් සිටියේය. අවසානයේ, ඔවුන්ට එරෙහිව අධිකරණ නියෝග ලබාගන්නා බවට දැනුම් දීමෙන් පසු වාස් ගුණවර්ධන ප්‍රකාශය දීමට පැමිණියේය. එහෙත්, 2013 ජුනි 13 වැනිදා, ප්‍රකාශය දෙන අතරතුරේදී වාස් ගුණවර්ධන ප්‍රකාශය සටහන් කරගත් ශානිට, අසභ්‍ය වචනයෙන් බැන, ඔහු මරා දමන බවට තර්ජනය කළේය. ‘ශානි මං මිනිමරුවෙක්. උඹට හැමදාම මාව ඇතුළෙ තියන්න බැහැ. මං එළියට ආවාම උඹලා ඔක්කොටම මොකද වෙන්නේ කියලා බලාගනිං.’ ඒ තර්ජනයයි. (මේ මරණ තර්ජනය ගැන ශානි කළ පැමිණිල්ලට අනුව කොළඹ මහාධිකරණය ඉදිරියේ වාස් ගුණවර්ධනට නඩු පැවරුණු අතර එය 2018දී අවසන් විය. මහාධිකරණ විනිසුරු ගිහාන් කුලතුංග විසින් වරදකරු කරන ලද වාස් ගුණවර්ධනට අවුරුදු පහක බරපතළ වැඩ ඇති සිරදඬුවමක් නියම විය.)
ශානි අපරාධ විමර්ශනය කරගෙන ගියේ ඒ තරම් නරක තත්වයක් යටතේය.
කෙසේ වෙතත් අවසානයේ වාස් ගුණවර්ධන, ඔහුගේ පුත්‍රයා වන රවිඳු ගුණවර්ධන හා තවත් පොලිස් නිලධාරීන් හතරදෙනකුට එරෙහිව ත්‍රිපුද්ගල මහාධිකරණ විනිසුරු මඬුල්ලක් ඉදිරියේ, විරුද්ධකාර ව්‍යාපාරිකයකුගෙන් රුපියල් මිලියන 10ක් ලබාගැනීමේ එකඟතාව මත, ව්‍යාපාරික මොහොමඞ් ෂියාම් පැහැරගෙන ගොස් ඝාතනය කිරීම සම්බන්ධයෙන් නඩු පැවරුණි. සීසීටීවි දර්ශන අනුව, ෂියාම් කොළමදී පැහැර ගැනෙන්නේ වාස් ගුණවර්ධනට අයත් වාහනයකිනි. ෂියාම් පැහැරගන්නා විට රවිඳු ගුණවර්ධන රියැදුරු අසුනේ සිටියේය. විත්තිකරුවෝ වරදකරුවන් කරනු ලැබ 2015දී මරණීය දණ්ඩනයට නියම වූහ. වාස් ගුණවර්ධන තීන්දුවට එරෙහිව අභියාචනය කරන ලදුව දැන් එය ශ්‍රේෂ්ඨාධිකරණය ඉදිරියේ විභාග වෙමින් තිබේ.
ආයුධ ගබඩාවක්
විමර්ශන කරගෙන යන අතරතුර වාස් ගුණවර්ධනගේ නිවසෙහි සිටි සේවකයන්ගෙන් තවත් තොරතුරක් ලැබිණ. එනම්, වාස් ගුණවර්ධනගේ නිවසේ තිබුණු ආයුධ සමූහයක්, එතැනින් ඉවත්කොටගෙන පොලිස් වාහනයක පටවාගෙන ගොස් කලගෙඩිහේන ප්‍රදේශයේ ඌරු කොටුවක වළලා ඇති බවත්, එම ආයුධ වාස් ගුණවර්ධනගේ නිවෙසින් පිටකර ඇත්තේ ඔහුගේ පොලිස් කාර්යාලයේ සේවයේ නියුතු පොලිස් පරීක්‍ෂක නිරෝෂ් චමින්ද විල්ලරආරච්චි විසින් බවත්ය.
තොරතුරු හඹා ගිය සීඅයිඩීයේ පොලිස් පරීක්‍ෂක නිශාන්ත සිල්වා (ඔහු මේ වන විට විදේශගතව සිටියි.) ඇතුළු පිරිසට 2014 මැයි මාසයේදී කළගෙඩිහේන ඌරු කොටුවක වළලා තිබූ දැවැන්ත ආයුධ තොගයක් හමුවිය. ඒ සම්බන්ධයෙන් විමර්ශන තොරතුරු නීතිපති දෙපාර්තමේන්තුවට හා කොටුව මහේස්ත්‍රාත්වරයාට වාර්තා කරන ලදුව, නීතිපති දෙපාර්තමේන්තුවේ උපදෙස් පරිදි අත්අඩංගුවට ගැනීම් හා වැඩිදුර විමර්ශන සිදුවිය. ඒ අතර, ඌරු කොටුව හිමි ප්‍රියන්ත නැලිගම යුවල අත්අඩංගුවට ගන්නා ලෙස ගම්පහ මහෙස්ත්‍රාත්වරයා නියම කළ අතර, නීතිපති දෙපාර්තමේන්තුව ඔවුන් අත්අඩංගුවට ගැනීමට කළ මහේස්ත්‍රාත් නියෝගයට එරෙහිව මහාධිකරණයට ප්‍රතිශෝධන ඉල්ලීමක් ඉදිරිපත් කෙළේය. එය මහාධිකරණය විසින් ප්‍රතික්‍ෂෙප කරනු ලැබිණ.
නීතිපති දෙපාර්තමේන්තුවෙන් සීඅයිඩීයට උපදෙස් ලැබුණේ, කොටුව හිමි නැලිගම දෙපළ රජයේ සාක්‍ෂිකරුවන් කිරීමටය.
ආයුධ තොගය සම්බන්ධයෙන් වාස් ගුණවර්ධනට හා ඔහුගේ බිරිඳට එරෙහිව මහාධිකරණයේ අධිචෝදනා ගොනු කිරීමට නීතිපති දෙපාර්තමේන්තුව සූදානම් වෙමින් සිටියත්, මේ වන තෙක් නඩු පවරා නැත. එම අධිචෝදනා පත්‍රයේ සාක්‍ෂිකරුවන් හැටියට නැලිගම යුවල ඇතුළත් කර ඇති බවද දැනගන්නට තිබේ.
පරණ කතා හා අලුත් කතා
2014දී විල්ලරආරච්චි හා නැලිගම සීඅයිඩීයට ප්‍රකාශ දෙමින් සඳහන් කෙළේ, ආයුධ එහි සඟවන්නට නියම කෙළේ වාස් ගුණවර්ධන බවය. එහෙත් 2020දී ඔවුන් දෙදෙනා නැවත ප්‍රකාශයක් සීසීඩීයට දෙමින් කියා සිටින්නේ, එහි ආයුධ දමන්නට උපදෙස් දුන්නේ ශානි අබේසේකර බවත්, එසේ දැමුයේ ශානි අබේසේකර ලබාදුන් ආයුධ තොගයක් බවත්ය.
එම ආයුධ තොගය දැවැන්ත එකකි. ටී56 ගිනිඅවි 7ක්, ජීව උණ්ඩ, ගල් කටස්, ආර්පීජී උණ්ඩ ආදිය එහි තිබිණ. එම ආයුධ තොගය ගැන වාස් ගුණවර්ධනගේ (ෂියාම් ඝාතනය පිළිබඳ) මහාධිකරණ නඩුවේදී සඳහන් වුණ විට විනිසුරුවරුන් පවා කිව්වේ ‘ඒක පුංචි ආමරියක් (ආයුධ ගබඩාවක් ) වගේනේ’ කියාය. එම නඩුවේදී විත්තිකූඩුවේ සිට ප්‍රකාශයක් කළ වාස් ගුණවර්ධන, අදාළ ආයුධ තමාගේ බව පිළිගෙන තිබේයැයි දැනගන්නට ඇත. එල්ටීටීයෙන් අල්ලාගත් ආයුධ තමන් ලබාගත් බවත් ඔහු කියූ බවට දැනගන්නට තිබේ. එම ආයුධ තොගයෙන් ටී56 තුනක්, මහවිලච්චිය සහ තන්තිරිමලේ පොලිස් ස්ථානවලින් වාස් ගුණවර්ධන නීති විරෝධී ලෙස ලබාගත් ඒවා බවටද තොරතුරු තිබේ. ඒ සම්බන්ධයෙන් එම පොලිස් ස්ථානාධිපතිවරුන්ට විරුද්ධව විමර්ශනයක් පවත්වා ඇති බවත්, විනය පරීක්ෂණ දැනට පැවැත්වෙන බවත් වාර්තා වෙයි.
අධිකරණයෙන් ඉල්ලීමක්
අගෝස්තු 4වැනිදා, ගම්පහ මහේස්ත්‍රාත් අධිකරණයේදී ශානි අබේසේකරට අදාළ නඩුව කැඳවූ අවස්ථාවේදී අප මුලින් කී පොලිස් පරීක්‍ෂක මෙන්ඩිස්ද සීසීඩීයේ භාරය යටතේ අධිකරණයට ඉදිරිපත් කරන ලදි. එහිදී ඔහු වෙනුවෙන් පෙනීසිටි නීතිඥ චමින්ද අතුකෝරල, අධිකරණයෙන් ඉල්ලීමක් කරමින් කීවේ, ‘නීතිපති දෙපාර්තමේන්තුවේ මේ සම්බන්ධ ලිපිගොනුව තිබෙන බවත්, මේ හැම දෙයක් ගැනම ලිඛිත සාක්ෂි එහි තිබෙන බවත්’ය. උසාවියට පැමිණ තම ස්ථාවරය පැහැදිලි කරන ලෙස නීතිපතිතුමාට නියෝගයක් නිකුත් කරන ලෙස අතුකෝරල මහතා ඉල්ලා සිටියේය.
ඒ අනුව, මහේස්ත්‍රාත් පොලිසියට විධාන කෙළේ, 7 වැනිදාට කලින් නීතිපති හමුවී, 7 වැනිදාට අධිකරණයට පැමිණ සහාය දෙන ලෙස නීතිපතිගෙන් ඉල්ලා සිටින හා අදාළ උපදෙස් ලබාගන්නා ලෙසයි. ‘මමත් පෞද්ගලිකව හිතනවා නීතිපති මේකට සහාය දෙන්න ඕනෑ කියලා.’ මහේස්ත්‍රාත්වරයා කීවේය.
මෙන්ඩිස්ට අමතරව තවත් පොලිස් නිලධාරියකුද ගම්පහ මහේස්ත්‍රාත් ඉදිරියේ ප්‍රකාශයක් වාර්තා කර ඇති බව දැනගන්නට තිබේ.
මේ අවස්ථාවේදී අධිකරණය ඇමතූ නීතිඥ චමින්ද අතුකෝරල කළ ප්‍රකාශය ඉතා වැදගත්ය.
මේ කූඩුවම තමයි
‘මෙවැනි නීති විරෝධී වැඩවලට විරුද්ධව ශ්‍රේෂ්ඨාධිකරණය ඉදිරියේ මූලික අයිතිවාසිකම් නඩු පැවරුවොත්, නියෝග දුන් ඉහළ නිලධාරින්, තමන්ය නියෝග දුන්නේ කියා පිළිගන්න එකක් නැහැ. තනියෙන් වගඋත්තර කියන්න වෙන්නේ මේ පහළ පොලිස් නිලධාරීන්ටමයි.’ ඔහු කීවේය.
‘මේ විදියට සීසීඩීයත් අපරාධ විමර්ශන විමර්ශන කරනවා. මේ සිදුවීම ප්‍රවණතාවක් බවට පත්වෙලා, ඒගොල්ලො කරන නඩුවලදීත් තීන්දුව දීලා අවුරුදු පහ හයකට පස්සේ සාක්කිකාරයො කිව්වොත් එහෙම, ‘අපිට බලපෑම් කරලායි ප්‍රකාශ ගත්තේ’ කියලා මොකද වෙන්නේ? ඒ ගැන විමර්ශන කළ සීසීඩීයේ පොලිස් නිලධාරීන්වත් හිරේ දාන්න පුළුවන්. සාක්ෂි මෙහෙයෙව්වාය කියලා රජයේ නීතිඥ මහත්තයාවත් හිරේ දමන්න පුළුවන්, වැරදි සාක්කි මත නඩුවේ තීන්දුව දුන්නාය කියලා නඩුකාරතුමාවත් හිරේ දමන්න පුළුවන්. මේ ප්‍රවණතාව එච්චර භයානක තැනකට යන්න පුළුවන්. මේ නඩුවේ ඇත්ත මොකක්ද කියලා අපට වඩා හොඳින් පොලිසියේ මහත්තුරු දන්නවා. ඒ ඇත්ත එළිවෙච්ච දවසට ඒ මහත්තුරුන්ට නගින්න වෙන්නෙත් මේ විත්තිකූඩුවටම තමයි.’
නීතිඥ අතුකෝරළ කී කතාව, ශානි අබේසේකර, මෙන්ඩිස් වැනි අවංක පොලිස් නිලධාරීන් වර්තමානයේ මුහුණ දී සිටින ඛේදවාචකය මැනැවින් පැහැදිලි කරයි. තමන් වෙත අපරාධ විමර්ශනයක් පැවරුණු විට මේ දක්‍ෂ නිලධාරීහු පුද්ගල තරාතිරම, දේශපාලන භේද නොතකා එම විමර්ශන විශිෂ්ට ලෙස පවත්වති. එම විමර්ශනවල ප්‍රතිඵලය ලෙස නීතිපති දෙපාර්තමේන්තුවට සම්පූර්ණ අපරාධ විමර්ශන ගොනුවක් ලැබේ. අධිකරණය ඉදිරියේ පැමිණිල්ල මෙහෙයවීමට එය ඉතාම වැදගත්ය. රජයේ නීතිඥවරු එම තොරතුරු මත අධිකරණය ඉදිරියේ ශිල්ප දක්වති. අවසානයේ විනිසුරුවරු අපරාධකරුවන් වරදකරුවන් කරති. විමර්ශන පැවැත්වූ පොලිස් නිලධාරීන්ගේ සහාය ගැන ඔවුන්ට ප්‍රශංසාද කරති. එහෙත්, නඩුවේ තීන්දුව දී අවුරුදු කිහිපයකට පසුව, සමහර සාක්‍ෂිකරුවෝ හෝ වෙනත් පුද්ගලයෝ පොලිසියට පැමිණ, තමා සාක්ෂි දුන්නේ අහවල් පොලිස් නිලධාරියාගේ තර්ජනයට බයේ බව අලුතෙන් කියති. ඒ කාලයේ පොලිසිය අලුත් විමර්ශනයක් පටන්ගෙන, මුල් විමර්ශන කළ පොලිස් නිලධාරීන් ‘බොරු සාක්ෂි ගෙතීමේ වරදට’ අත්අඩංගුවට ගනිති. රිමාන්ඞ් කරන ලෙස අධිකරණයෙන් ඉල්ලති.
ඉතින් මෙවැනි තත්වයක, අපරාධ විමර්ශකයන්ගෙන් ස්වාධීන, කොන්ද පණ ඇති, විමර්ශනයක් බලාපොරොත්තු විය හැකිද? ඔවුන් අනාගතයේ තමන්ට විය හැකි මේ අවදානම ගැන බලා, එක්කෝ විමර්ශන හරිහැටි නොකරති. නැතිනම්, අපරාධකරුවන් සමග මිත්‍ර සන්ථව පවත්වාගෙන ඔවුන්ගේ ලබාගත හැකි දේ ලබාගනිති.
ශානිට ලැබෙන තෑගි
ශානි අබේසේකර වැනි ශ්‍රී ලංකා පොලිසියේ කීර්තිමත් අපරාධ විමර්ශකයකුට සිදුවී තිබෙන්නේ, තමන්ගේ කොන්ද පණ ඇතිකම නිසා, ඊටත් වඩා දරුණු ඉරණමකට මුහුණ දෙන්නටය. අද ශානිට විරුද්ධව චෝදනා ගොනු කර තිබෙන්නේ ගිනි අවි ආඥා පනත යටතේය. වාස් ගුණවර්ධන වරදට හසුකරන්නට අවිආයුද තොගයක් වෙනත් පොලිස් නිලදාරීන් ලවා කලගෙඩිහේනේ වත්තේ වළ දැමූ බවටය. එක පැත්තකින් ගිනි අවි ආඥා පනත යටතේ චෝදනා නිසා, ශානිට ඇප ලබාදෙන්නට මහේස්ත්‍රාත්වරයාට නොහැකිය. ඒ හේතුවෙන් දීර්ඝ කාලයක් රිමාන්ඞ් බන්ධනාගාරගත වී සිටින්නට ශානිට සිදුවී තිබේ. තමාගේ කීර්තිමත් අපරාධ විමර්ශන ඉතිහාසයට ශානි අබේසේකරට ලැබෙන ‘තෑග්ග’ එයයි. එම ආයුධ තොගය ඇත්තටම ශානි ‘අතින් දැම්මා’ නම්, ඔහු එවැනි අතිවිශාල ආයුධ තොගයක් සන්තකයේ තබාගත් ‘භයානක පුද්ගලයකු’ හැටියට සිතන්නට මහජනයා මෙයින් පොළඹවනු ලැබේ. සමස්ත පොලිස් දෙපාර්තමේන්තුවට, තමන්ගේ අවංක කැපවීම නිසා ශානි ලබාදුන් ඉමහත් කීර්තියට, පොලිසියෙන්ම ඔහුට ලැබෙන ‘තෑග්ග’ද එයයි.
මේ සිදුවන්නේ කුමක්දැයි සාධාරණ බුද්ධියක් ඇති ඕනෑම කෙනකුට පැහැදිලිය. ශානි අබේසේකර වනාහි, 2015ට පෙර තිබුණු ‘අපරාධ රාජ්‍යයේ’ අපරාධකරුවන්ට එරෙහිව බලවත්ම අපරාධ විමර්ශනවලට දායකත්වය හා නායකත්වය දුන් අපරාධ විමර්ශකයාය. ඔහුගේ සුපිළිපන්භාවය පිළිබඳව රටේ අවංක පොලිස් නිලධාරීන්ටවත්, නීතිඥවරුන්ටවත්, විනිසුරුවරුන්ටවත් සැකයක් නැත. ඔහුගේ සුවිශේෂ ජීවන රටාව හා පැවතුම් ඒ සුපිළිපන්භාවය නැවත නැවතත් තහවුරු කරයි.
මේ ආණ්ඩුව පත්වූ විගසම දින ගණනක් තුළ, දංගෙඩියට යැවුණු ජ්‍යෙෂ්ඨ පොලිස් අධිකාරි ශානි අබේසේකර හෙවත් සීඅයිඩීයේ අධ්‍යක්‍ෂවරයා පළමුව, ගාල්ල ප්‍රදේශය භාර නියෝජ්‍ය පොලිස්පතිගේ ‘පෞද්ගලික සහායක’ හැටියට මාරු කෙරිණ. දෙවනුව, වැඩ තහනමට ලක්කෙරිණ. මුළු වැටුපම ගෙවීම නැවැත්විණ. පසුව ශානි කළ අභියාචනයකට අනුව වැටුපෙන් භාගයක් ගෙවන්නට කොමිසම නියම කෙළේය. එහෙත්, ඒ භාගයද ඔහුට නොලැබෙයි. අදටත් ඔහුට එරෙහිව පොලිස් කොමිසමේ චෝදනා ගොනුකෙරී නැත. ඒ වෙනුවට විවිධාකාර චෝදනා තිස් ගණනක් යටතේ ශානිට එරෙහිව ‘අභ්‍යන්තර පරීක්ෂණ’ පටන්ගෙන පැවැත්වෙයි. අවසානයේ, දැන් ඔහු දැවැන්ත ගිනි අවි තොගයක් ‘අතින් දැමූ’ බවට චෝදනා ලැබ රිමාන්ඞ් භාරයේය.
ඒ අතර ඔහු, ඉහත කී ‘අපරාධ රාජ්‍යයේ’ අපරාධකරුවන්ට එරෙහිව දැන් පැවරී ඇති, නමුත් තවමත් අවසානයක් දක්වා ගොස් නැති අතිවිශේෂ නඩුවල ප්‍රධාන සාක්‍ෂිකරුවෙකි. ප්‍රධාන විමර්ශකයාය.
ඔහුට පහර දීම, ඔහු නිහඬ කිරීම, එම නඩුවල පැමිණිල්ලටද කරන බලවත්ම ප්‍රහාරයයි. එහි අවසානය කුමක්ද? පැමිණිල්ල අංගවිකල කර, අපරාධකරුවන් මතුමහලට නංවා, අපරාධ විමර්ශකයන් දංගෙඩියට යවා, පරණ අපරාධ රාජ්‍යය නැවත ස්ථාපනය කිරීමයි.
ඒ අනුහසින්, දැනටමත් බන්ධනාගාරගතව සිටින දේශපාලන බැඳියාවක් ඇති අපරාධකරුවන්, තොග පිටින් සමාව ලබා සමාජයට යළි පිවිසීම අප බලාපොරොත්තු විය යුතුය.■
■ අරුණ ජයවර්ධන
