දීර්ඝ විරාමයකින් පසු කෝවිඞ්-19 මැඬලීම සඳහා වූ ජනාධිපති කාර්ය සාධක බලකාය ඔක්තෝබර් 6 වැනිදා යළිත් රැස්විය. මාධ්‍ය මගින් ප්‍රචාරය කෙරුණු ඡායාරූප තුළින් පෙනීයනුයේ මෙම රැස්වීම පවත්වා ඇත්තේ රජයේම නියෝග දෙකක් උල්ලංඝනය කරමින් බවය. එකක් නම්, මුඛ ආවරණ පැළඳීමයි. අනෙක නම් සමාජ දූරස්ථභාවයයි.
යළි උපත ලද කෝවිඞ්-19 කාර්ය සාධක බලකා රැස්වීමට සහභාගි වූ අති බහුතරය මුඛ ආවරණ පැළඳ නොසිටි බව පැහැදිලිය. අඩුම තරමින් රටේ නායකයා වූ ජනපති ගෝඨාභය රාජපක්ෂ මහතාවත් මුඛ ආවරණයක් පැළඳ සිටිනු මාධ්‍ය වාර්තාවලින් නොපෙනේ. කොමිසම රැස්වී ඇත්තේ කිසිදු සමාජ දූරස්ථභාවයක් ආරක්‍ෂා කරමින් නොවන බවවද මාධ්‍ය වාර්තාවලින් පැහැදිලිය.
රටේ නායකයාත්, වසංගතය මැඬලීම සඳහා ස්ථාපිත කොට ඇති ප්‍රමුඛතම රාජ්‍ය ආයතනයත් තමන්ගේම මූලික නීති රීති දෙකක් ප්‍රසිද්ධියේම උල්ලංඝනය කරන්නේ නම් එයින් රටේ ජනතාවට දෙන පණිවුඩය කුමක්ද?
වෛරසය සමාජ ව්‍යාප්තියක් නොමැති බවත්, එය මුළුමනින්ම පාලනය කර ඇති බවත් ආණ්ඩුව මාස ගණනක් පුරා කී කතාවයි. ආණ්ඩුවේ නායකයන් පවා මෙම කථාව විශ්වාස කළ බව ඔවුන්ගේ ක්‍රියාකාරිත්වයෙන් පෙනේ. රටේ ඉහළම නායකයන් දෙපළ වූ ජනපතිවරයා සහ අගමැතිවරයාගේ සිට සෙසු සියලු නායකකාරකාදීන් ප්‍රසිද්ධියේම ක්‍රියාත්මක වූයේ වසංගතයක් නැති ගණනටය. පාර්ලිමේන්තුවේ හෝ ඉන් පිටතත් මුව ආවරණ පැළඳීම්, සමාජ දූරස්ථභාවය ආරක්‍ෂා කිරීම් සිදු නොවිණි.
ජනපතිවරයා මොරගහකන්ද ප්‍රදේශයේදී ඔක්තෝබර් 1වැනිදා කළ සංචාරයක ඡායාරැපයක් ජනපති මාධ්‍ය අංශයේ වෙබ් අඩවියේ දැකිය හැක. එහි ජනපතිවරයා ප්‍රමුඛ අතිබහුතරයක් මුඛ ආවරණ පැළඳ නැත. කිසිදු සමාජ දූරස්ථභාවයක් ආරක්‍ෂා කිරීමක්ද නැත.
මහින්ද රාජපක්ෂ අගමැතිවරයා සැප්තැම්බර් 29දා මාධ්‍ය ප්‍රධානීන් සමග සාකච්ඡාවක් පැවැත්වීය. එහිදීද මුඛ ආවරණ පැළඳීමක් හෝ සමාජ දූරස්ථභාවය ආරක්‍ෂා කිරීමක් හෝ දක්නට නොලැබුණි.
සැප නින්දකින් පසු හදිසියේ අවදිව ජනපති කාර්ය සාධක බලකා රැස්වීම අවසානයේ ජනපති මාධ්‍ය අංශය නිකුත් කළ නිවේදනයේ වෛරසය යළි ඉස්මතුවීමේ වරද පටවා තිබුණේ ජනතාව මතය. ජනතාව ගත වූ කාලය පුරා සෞඛ්‍ය ආරක්‍ෂක නීතිරීති පිළිනොපැදීම නිසා මෙම අවදානම මතුවූ බවට වෛද්‍යවරුන් පවසන්නේ යැයි එම නිවේදනයේ දැක්විණි. මෙම නිවේදනය සිදුකළේ තමන්ගේම සෞඛ්‍ය ආරක්‍ෂණ නීති දෙකක් කඩකරමින් රැස්වූ ජනපති කාර්ය සාධක බලකායක් විසිනි.
කකුළුවා ඇදයට යමින් පැටියාට කෙළින් යන්නැයි උපදෙස් දෙනවායැයි කියනුයේ මෙවැනි වැඩවලටය.
පසුගිය සති ගණනාව තුළම රට පුරා විවිධ ප්‍රදර්ශන, සංදර්ශන පැවැත්විණි. මේ සියල්ල පැවැත්වුණේ සෞඛ්‍ය ආරක්‍ෂණ නීති අමු අමුවේ උල්ලංඝනය කරමින් හා රජයේ අවසරය පිටය. මුව ආවරණ පැළඳීමේ හා සමාජ දූරස්ථභාවය රැකීමේ නීති ප්‍රසිද්ධියේ උල්ලංඝනය වනු දැක දැකත් ආණ්ඩුව නිසල විය.
මෙයට හොඳම උදාහරණය කොළඹ ජාත්‍යන්තර පොත් ප්‍රදර්ශනයයි. ජනතාව ලක්‍ෂ ගණනින් එක් රැස්වන මෙවැනි ප්‍රදර්ශනයක් නොපැවැත්විය යුතුව තිබූ බව සාමාන්‍ය බුද්ධියට වුවද ගෝචර වන කාරණයකි. නමුත් ප්‍රදර්ශනය පැවැත්වීමට රජයේ අවසරය ලැබුණි. ප්‍රදර්ශනය පැවැත්වෙනුයේ කිසිදු සෞඛ්‍ය ආරක්‍ෂක විධිවිධානයකට අනුකූලව නොවන බව මාධ්‍ය මගින් දිනපතා වාර්තා විය. එහෙත් ආණ්ඩුව ඒ සම්බන්ධයෙන් අඳ-ගොලු-බිහිරි පිළිවෙතක් අනුගමනය කළේය.
මාස ගණනක සිටම ආණ්ඩුවේ නිල ස්ථාවරය වූයේ වෛරසයේ සමාජ ව්‍යාප්තිය මුළුමනින්ම පාලනය කර ඇති බවය. උදාහරණයක් ලෙස ජුලි 25දා ඉන්දියාවේ පුවත්පතට හමුදාපති ෂවේන්ද්‍ර සිල්වා මහතා ප්‍රකාශ කළේ වෛරසය සමාජගත වීම මුළුමනින්ම පාලනය කර ඇති බවත් තෙමසකට ආසන්න කාලයක් තුළ සමාජයෙන් ආසාදිතයකු හමු නොවූ බවත්ය.
මෙවන් කතා ඇසෙන විට හා රටේ ඉහළම නායකයන් මුඛ ආවරණ හා සමාජ දූරස්ථභාවය පිළිබඳ රෙගුලාසි අමු අමුවේ උල්ලංඝනය කරනු දකින විට ජනතාව අනාරක්‍ෂිත ආකාරයෙන් හැසිරීම පුදුමයක්ද?
රට පුරා නිරන්තරයෙන් අහඹු පීසීආර් පරීක්ෂණ සිදු නොකර වෛරසය සමාජය තුළ නැතැයි නිසැකව කිව නොහැකි බව වෛද්‍යවරුන් දැන සිටින්නට ඇත. නමුත් ඔවුන් මේ පිළිබඳව වචනයකුදු නොකීවේ දේශපාලන නායකත්වයේ ස්ථාවරයන්ට පටහැණි යමක් කීමට තිබූ බිය නිසා විය හැක. හේතුව කවරක් වුව ඒ නිහැඬියාවේ ප්‍රතිඵලය වූයේ සමාජය අනාරක්‍ෂිත වීමත් ජනතාව අවදානමට ලක්වීමත්ය. ගතවූ මාස කිහිපය තුළ පාලකයන් මවා තිබූ සුරක්‍ෂිතභාවයේ මායාවෙන් සුරැකුණේ හා ශක්තිමත් වූයේ වෛරසයයි.
ඇත්ත කීම
දිට්ඨධමම් වේදනීය කර්මයක්ද?
වෛද්‍ය පරීක්ෂණ ආයතනයේ ) අධ්යක්ෂ ධුරය දැරූ දොස්තර ජයරුවන් බණ්ඩාර මහතා ඔක්තෝබර් 5 වෙනිදා පෞද්ගලික රූපවාහිනී නාලිකාවකට කළ ප්‍රකාශයක් ෑජදබදපහ භැංඑ වෙබ් අඩවියේ සටහන්ව තිබුණි. ඔහු කියා තිබුණේ හඳුනාගත් පොකුරුවලට පරිබාහිරව සමාජය තුළ ගතවූ මාස කිහිපය තුළ වෛරසය පැවත ඇති බවය. මූලයක් සොයාගත නොහැකි ආසාදිතයකු දිවුලපිටියෙන් වාර්තා වීමෙන් මෙය පැහැදිලි වන බව ඔහු ප්‍රකාශ කෙළේය.
ඔහුගේ ප්‍රකාශය විද්‍යාත්මක ක්‍රමයට මෙන්ම බෞද්ධ දර්ශනයේ එන හේතු ඵලවාදයටද අනුගතය.
නමුත් වෛරසය ගතවූ මාස කිහිපය තුළ බාහිර සමාජයේ නොවූ බවට වූ රාජපක්ෂ සත්‍යයට නම් එම ප්‍රකාශය ගෝචර නොවේ.
වෛද්‍ය ජයරුවන් මහතා මෙම විද්‍යාත්මක සත්‍යය පැහැදිලි කළ දිනම, එනම් ඔක්තෝබර් 5දා ඔහුව එම්ආර්අයි ආයතනයේ අධ්යක්ෂ තනතුරින් ඉවත්කොට එහි නියෝජ්‍ය අධ්යක්ෂ ධුරයට පත් කෙරිණි. එතෙක් නියෝජ්‍ය අධ්යක්ෂ ධුරය දැරූ වෛද්‍යවරයා අධ්යක්ෂ තනතුරට උසස් කර තිබේ. මෙම තනතුරු මාරුව සිදුකර ඇත්තේ අමාත්‍යාංශයේ ලේකම් මේජර් ජෙනරාල් වෛද්‍ය සංජීව මුණසිංහ මහතාගේ අත්සනින් නිකුත් කර ඇති චක්‍රලේඛයකිනි. හෙවත් සර්කියුලර් එකකිනි.
එම්ආර්අයි ආයතනයේ සිදුවූ මෙම හදිසි තනතුරු මාරුව අහම්බයක්ද? නැතහොත් කළ කම් එසැණින් පල දීමක්ද? මෙයින් සෞඛ්‍ය ක්‍ෂෙත්‍රයේ සෙසු නිලධාරීන්ට හා සමස්ත විද්‍යාත්මක ප්‍රජාවට හැඟවෙන පණිවුඩය කුමක්ද?
කොවිඞ්-19 වෛරසය ලොව පුරා ව්‍යාප්ත වීම පාලනය කරගත හැකිවූ මුල් සති කිහිපය තුළ එවැන්නක් සිදු නොවූයේ චීන රජය සත්‍යය සැඟවීමට කටයුතු කළ බැවිනි. නව හා බිහිසුණු වෛරසයක උපත දුටු චීන වෛද්‍යවරුන් පිරිසක් සමාජ වෙබ් අඩවි හරහා ඒ පිළිබඳව එකිනෙකා සමග අදහස් හුවමාරු කරගත් විට චීන පාලකයෝ ඔවුන්ව වහා මර්දනය කළහ. සමාජයේ කැළඹීමක් සිදුකිරීමට උත්සාහ කළායැයි මෙම වෛද්‍යවරුන්ට චෝදනා කළ චීන පොලිසිය යළිත් එවැන්නක් නොකරන බවට ඔවුන්ගෙන් ලිඛිත ප්‍රකාශ ලබා ගත්තේය.
ටික කලකට සත්‍යය යට ගියේය. නමුත් ඉන් වෛරසයේ ගමන නොනැවතුණි. වැඩි කල් නොයා වෛරසය නව ජවයකින් සමස්ත රටත් ලෝකයත් ආක්‍රමණය කළේය.
ලංකාවේ ගත වූ මාස කිහිපය පුරා සිදුවූයේ දැනුවත්ව හෝ නොදැනුවත්ව සත්‍යය යටපත් කිරීමක්ද?
චීනයේ දැවැන්ත මාධ්‍ය සංවිධානයක් වූ ශෂක්‍්ෂ මාධ්‍ය ආයතනයට අනුබද්ධ ශෂක්‍්ෂ පර්යේෂණ ආයතනය ගත වූ මස අවසානයේ ලෝකයේ රටවල් කෝවිඞ්-189 වසංගතයට මුහුණ දුන් ආකාරය පිළිබඳව වාර්තාවක් සකස් කළේය. වෛරසය පාලනය කිරීම අතින් වඩාත්ම සාර්ථකත්වයක් ලබා ඇත්තේ චීනය බවත් ලෝකයෙන්ම වෛරසය පාලනය අතින් දෙවැනි තැන හිමිවනුයේ ලංකාවට බවත් එහි දැක්විණි.
ලංකාවේ වාර්තාගත රෝගීන් ප්‍රමාණය අඩු අගයක් ගන්නේ මෙරට සිදුකළ පීසීආර් පරීක්ෂණ ප්‍රමාණයද අනෙකුත් රටවලට සාපේක්‍ෂව ඉතාමත් අඩුවීම නිසාද යන සරල ප්‍රශ්නය මෙම වාර්තාව සම්පාදනය කළවුන් නොනැගුවේ එය චීන රජයේ නිල සත්‍යයම පුනරුච්චාරණය කරන ආයතනයක් වූ නිසාද?
ගතවූ සති කිහිපය තුළ මෙරට දැවැන්ත වන විනාශයක් වූ බව නොරහසකි. මෑත කාලයේ මෙවැනි පරිසර හානි පිළිබඳ පැමිණිලි 20ක් ලැබී ඇති බව පොලිස් මාධ්‍ය ප්‍රකාශකවරයා ඔක්තෝබර් 20දා පැවසීය. හන්තාන, කල්පිටිය, වනාතවිල්ලුව, මාරවිල, මොරවැව, ආනවිලුන්දාව, මංගලපුර, කාවන්තිස්සපුර, මින්නේරිය, නකල්ස්, වැලිකන්ද, ඉහලතලාව, මීගමුව කළපුවේ කඩොලාන පරිසරය, කැකිරාව, සෝමාවතිය, වන්නියගම, හෑදෙණිය, කිරිඳිඔය, කන්තලේ හා ගලෙන්බිඳුණු වැව මෙලෙස පරිසර හානියට ගොදුරු වූ ප්‍රදේශයි. මේ පරිසර හානිය පිළිබඳ වාර්තා කළ මාධ්‍යයන්ට පොලිස් මාධ්‍ය ප්‍රකාශකයා තම ප්‍රණාමයද පුද කළේය.
මෙවර මහා මැතිවරණයෙන් පසු පෙර නොවූ විරූ තරම් මහා පරිසර විනාශයක් සිදුවෙමින් පවතින බව යථාර්ථයක් වුවද, එය පිළිගැනීමට රාජපක්ෂ පාලනය සූදානම් නැත. එපමණක් නොවේ, මාධ්‍ය මගින් මෙම විනාශය හෙළිවීම වළකාලීමට පාලකයන් උත්සාහ කරන බව සැප්තැම්බර් 28දා ජනාධිපති මාධ්‍ය ඒකකය නිකුත් කළ නිවේදනයකින් පැහැදිලි වේ. වත්මන් පාලනය යටතේ පෙර නොවූ විරූ තරම් පරිසර විනාශයක් සිදුවෙතැයි පළවන ප්‍රවෘත්ති ප්‍රබන්ධ බවත්, මෙලෙස අසත්‍ය ප්‍රවෘත්ති නිර්මාණය කරන පිරිස්වලට එරෙහිව නීතිමය පියවර ගැනීමට රජය සූදානම් වන බවත් එයින් කියැවේ.
මෙම නිවේදනයේ අරමුණ වනුයේ නීතිය අවභාවිත කොට මාධ්‍යයට මුකවාඩම් බැඳ පරිසර විනාශයක් සිදුවන බව රටට වසන් කිරීම නොවන්නේද?
කෝවිඞ්-19 වෛරසය සමාජගත වීම පිළිබඳව යථාර්ථය වසන් කිරීමට මෙවැනිම ක්‍රියාන්විතයක් සිදුවීද (හා සිදුවන්නේද) යන ප්‍රශ්නය මතුවනුයේ මෙම සංදර්භය තුළය. වෛරසය පිළිබඳ රාජපක්ෂ පාලනයේ නිල මතයට වෙනස් විද්‍යාත්මක උපකල්පනයක් ඉදිරිපත් කළ එම්ආර්අයි ආයතනයේ අධ්‍යක්‍ෂවරයාට අත්වූ ඉරණම තුළින් මෙම සැකය තවත් තහවුරු නොවන්නේද?
20වන සංශෝධනය ගෙනඒමේ එක් අරමුණක් වනුයේ මෙලෙස රටේ සැබෑ තත්වය ජනතාවගෙන් වසන් කිරීම තවත් පහසු කිරීමටද? උදාහරණයක් ලෙස 20වන සංශෝධනය සම්මත වුවහොත් රටේ සියලුම අධිකරණවල විනිසුරුවරුන් පත්කිරීමේ බලය ඍජුව හෝ වක්‍රව ජනපතිවරයාට හිමිවනු ඇත. එවැනි තත්වයක් තුළ රටේ යථාර්ථය පිළිබඳව ඇති තතු කියන්නවුන්ට එරෙහිව නීතිය අවභාවිත කිරීම පාලකයන්ට ඉතාමත් පහසු වන බව පැහැදිලිය. පරිසර විනාශය ගැන හෙළිදරව් කරන මාධ්‍යවේදීන්ට හා වසංගතය පිළිබඳ සත්‍යය කතාකරන වෛද්‍යවරුන්ට නීතියෙන් බැට කා හිරේ විලංගුවේ වැටීමට සිදුවුවහොත් එයද පුදුමයක් නොවනු ඇත.
20වන සංශෝධනයෙන් රාජ්‍ය විගණනය පිළිබඳව යෝජිත හානිදායක වෙනස්කම් සාධාරණීකරණය කරමින් අගමැති මහින්ද රාජපක්ෂ මහතා කළ ප්‍රකාශයට ප්‍රතිචාර දක්වමින් හිටපු කතානායක කරු ජයසූරිය මහතා පෙන්වා දුන්නේ මෙම සංශෝධනය තුළින් සුදුසුකමක් නැති පුද්ගලයකු වුවද තම තනිමතයට විගණකාධිපතිධුරයට පත්කිරීමට ජනපතිවරයාට හැකිවන බවයි. මෙම අවදානම අධිකරණයටද පොදුය. ව්‍යාජ දෝෂාභියෝගයකින් අගවිනිසුරු ශිරාණි බණ්ඩාරනායක මහත්මිය පන්නා දමා ඒ තනතුරට මොහාන් පීරිස් මහතා පත්කිරීමට එවකට ජනපති මහින්ද රාජපක්ෂ මහතා කටයුතු කළේය. 20වන සංශෝධනය බලාත්මක වුවහොත් තමන්ගේ අණසකට යටත් නොවන විනිසුරුවරුන් ඉවත් කොට ඒ වෙනුවට තමන්ගේ නියමයන් පිළිපදිනවුන් පත්කිරීමට රටේ නායකත්වයට මං විවර වනු ඇත. ඉන්පසු එම විනිසුරුවරුන් ලවා තමන්ගේ දේශපාලන මායාවන් විනිවිද දැකීමට ඒවායේ යථාර්ථය රටට හෙළිදරව් කිරීමට තැත් දරන සියල්ලන්ටම නීතියේ රාමුව තුළම දඬුවම් කිරීමට රාජපක්ෂ පාලනයට හැකිවේ.
කෝවිඞ්-19 වෛරසය පාලනයට වඩා 20වන සංශෝධනය සම්මත කරගැනීමට ආණ්ඩුව ප්‍රමුඛතාව දෙනුයේ එබැවිනි.
ප්‍රමාදය මරණයයි
කෝවිඞ්-19 වසංගතයේ පළමු රැල්ල ආරම්භයේදීම රට ලොක්ඩවුන් කිරීමට රාජපක්‍ෂවරුන් කටයුතු නොකළේ එයින් මහමැතිවරණය සඳහා නාමයෝජනා දීම කල් යාමට ඉඩ තිබූ බැවිනි. එජාපය බෙදී තිබූ තත්වය තුළ කඩිනමින් නාමයෝජනා දීම තමන්ට දේශපාලනික වශයෙන් වාසි සහගත බව රාජපක්‍ෂවරු වටහා ගත්හ. නාමයෝජනා නිමා වෙන තෙක් රට විවෘතව තැබීමේ ප්‍රතිඵලය වූයේ වෛරසය වඩ වඩාත් ව්‍යාප්ත වීමයි.
අද අප මුහුණ දෙමින් සිටිනුයේ එදාට වඩා භයානක තත්වයකටය. වෛරසය මේ වන විටත් රට පුරාම ව්‍යාප්තව ඇති බව පීසීආර් පරීක්‍ෂණවලින් පැහැදිලි වේ. කෝවිඞ්-19 රෝගයේ මූලික ලක්ෂණ සාමාන්‍ය සෙම්ප්‍රතිශ්‍යාවකට හෝ වැසි සමයේ බහුල වන වෛරස් උණ රෝගවලට සමාන නිසාත්, වෛරසය ආසාදිතවූවන්ගෙන් සැලකිය යුතු ප්‍රතිශතයක් රෝග ලක්ෂණ නොපෙන්වන නිසාත් වෛරසයට සමාජය තුළ සැඟවී සිටීම ඉතාම පහසුය.
නමුත් පාලකයන් අදත් මූලිකත්වය දෙනුයේ වසංගතය මැඬලීමට නොව තමන්ගේ බල ව්‍යාපෘතිය ඉදිරියට ගෙනයාමටය. වසංගත උවදුර දුරලීමට මුළු බර යොදනවා වෙනුවට ආණ්ඩුවේ ප්‍රමුඛතාව වී ඇත්තේ හැකි ඉක්මනින් 20 වන සංශෝධනය සම්මත කර ගැනීමටය.
20වන සංශෝධනයට එරෙහිව ආණ්ඩුව තුළින්ම මතුවන විරෝධතා මේ වන විට උත්සන්නව ඇත. විජේදාස රාජපක්ෂ මන්ත්‍රීවරයාගේ ලිපිය හා මාධ්‍ය ප්‍රකාශයත් බැසිල් රාජපක්ෂ මහතාගේ හිතවතකු ලෙස සැලකෙන පුවත්පත් මණ්ඩල සභාපතිවරයා හා විමල් වීරවංශ ඇමතිවරයා අතර සිදුවන දෝෂාරෝපණයනුත් මෙම තත්වයට නවතම උදාහරණයන්ය. වීරවංශ ඇමතිවරයාගේ ප්‍රසිද්ධ ප්‍රකාශයන්ට පොහොට්ටු පක්‍ෂයේ ලේකම්වරයා යළිත් තම නොසතුට ප්‍රකාශ කිරීම මෙහි තවත් ප්‍රකාශනයකි.
වසංගතය නිසා 20 පමා වුවහොත් ඊට එරෙහි පිරිස් ශක්තිමත් වීමට ඉඩ ඇති බව රාජපක්‍ෂවරු දනිති. රටේ ආර්ථික අර්බුදයත් ජනතාවගේ ජීවන ප්‍රශ්නත් දිනෙන් දින වැඩිවනවා මිස අඩු නොවන බවත් රාජපක්‍ෂවරු දනිති. ප්‍රමාද වන තරමට 20 සම්මත කර ගැනීමට ඇති ඉඩකඩ ඇහිරෙන බවද රාජපක්‍ෂවරු අවබෝධ කර ඇති බව නිසැකය. ඔවුන් වසංගතයට වඩා 20ට මුල් තැන දෙන්නේ එබැවිනි. 20 සම්මත කරගෙන සියලු බලය ජනපතිවරයා ප්‍රමුඛ රාජපක්ෂ පවුල අතර සංකේන්ද්‍රණය කරගත් පසු ආණ්ඩුව අභ්‍යන්තරයේ මෙන්ම රට තුළද මතුවන ඕනෑම විරෝධතාවක් යටපත් කිරීම රාජපක්‍ෂවරුන්ට පහසු වනු ඇත.
20 සම්මත කරවා ගැනීමට රාජපක්‍ෂවරුන්ට ඇති කඩිනමට අනෙක් හේතුව ඇමෙරිකානු ජනපතිවරණයයි. වත්මන් ඇමෙරිකානු ජනපති ට්‍රම්ප් මහතාත් රාජපක්‍ෂවරුනුත් අයත් වනුයේ එකම දේශපාලන කුලකයකටය. රාජපක්‍ෂවරුන් යළිත් පවුල්-ඒකාධිපතිත්වයක් දක්වා යන ගමනට ට්‍රම්ප් පාලනයකින් ප්‍රබල විරෝධයක් මතුවීමට ඇති ඉඩකඩ අවමය.
නමුත්, නොවැම්බර් ජනපතිවරණයෙන් ට්‍රම්ප් මහතා පරාජය වුවහොත් තත්වය රාජපක්‍ෂවරුන්ට අවාසිදායක ලෙස වෙනස් විය හැක. ජෝ බයිඞ්න් ජනපතිවරයකු හා කමලා හැරිස් උප ජනපතිනියක යටතේ ජාත්‍යන්තර තලයේ මානව හිමිකම් ප්‍රශ්න පිළිබඳව ඇමෙරිකාව යළිත් වැඩි අවධානයක් යොමු කරනු ඇත. එවැනි සංදර්භයක් තුළ 20වන සංශෝධනයට අදට වඩා ජාත්‍යන්තර විරෝධයක් මතු වීමට ඉඩ තිබේ.
ලංකාව කෙතරම් දුරකට චීනයේ උපග්‍රහයකු බවට පත්වුවත්, බැසිල් රාජපක්ෂ මහතා ඇමරිකානු පුරවැසිභාවය තබාගන්නා තාක්කල් වොෂින්ටනයේ අදහස්, යෝජනා, විවේචන මුළුමනින්ම පිටුදැකීමට රාජපක්ෂ පාලනයට අසීරු වනු ඇත. තම ඇමරිකානු පුරවැසිභාවය අත් නොහරින බව බැසිල් රාජපක්ෂ මහතා ප්‍රසිද්ධියේ හා පැහැදිලිව ප්‍රකාශ කර ඇත. 20වන සංශෝධනයේ ද්විත්ව පුරවැසි වගන්තිය ඇතුළත් වනුයේත් තමන්ගේ ගිහි-පැවිදි අනුගාමිකයන් කෙතරම් කෑමොර දුන්නත් එම වගන්තිය ඉවත් කිරීමට රාජපක්‍ෂවරුන් සූදානම් නැත්තේත් එබැවිනි.
ඇමරිකාවේ ඊළඟ ජනපතිවරයා තනතුරේ වැඩ බාරගනුයේ 2021 ජනවාරි 21 වැනිදාය. ඊට පෙර 20වන සංශෝධනය සම්මත කර ගැනීම රාජපක්‍ෂවරුන්ගේ සැලැස්ම විය හැක. 20වන සංශෝධනය පිළිබඳව ශ්‍රේෂ්ඨාධිකරණයේ මතය මෙම සතිය තුළ කතානායකවරයාට බාරදීමට නියමිත බව කියැවේ. වසංගත උවදුරද නොසලකා පාර්ලිමේන්තුවේ කටයුතු දිගටම ගෙනයාමට රාජපක්‍ෂවරුන් තීරණය කළේ මේ නිසා විය හැක. වෛරස් අවදානම පහව යන තෙක් රට මුළුමනින්ම හෝ අර්ධ ලෙස වසා දැමුවහොත් එය 20 කඩිනමින් සම්මත කරගැනීමේ අරමුණට බාධාවක් විය හැක. එපමණක් නොවේ. වසංගත උවදුරට වැඩි බරක් දීම ‘වැඩ කරන විරුවන්ගේ’ ප්‍රතිරූපයට හානිදායකය. යථාර්ථය වසා මායාව පැතිරවිය යුත්තේ එබැවිනි.
වෛරසය සමාජගත වීමේ අවදානම තමන් මුළුමනින්ම පරාජය කළාය යන මිථ්‍යාව ජන විඥානය තුළට ඇතුළත් කිරීමෙන් වෛරසයට සමස්ත රට පුරාම නිදහසේ සැරිසැරීමට ඉඩකඩක් රාජපක්‍ෂවරු නිර්මාණය කළහ. වෛරසය පාලනයට වඩා 20 සම්මත කරගැනීමට ප්‍රමුඛතාව දීම තුළින් වසංගතය සුනාමියක් බවට පත්වීම වළක්වාලීමට ඇති සීමිත අවස්ථාවද රාජපක්‍ෂවරුන් නොසලකා හරින සෙයක් පෙනේ. යම් පාලකයකු රට යනු තමා යයි සිතුවහොත්, රටේ පැවැත්ම සඳහා තමන්ගේ නායකත්වය අත්‍යවශ්‍යයැයි සිතුවහොත් එහි ඊළඟ පියවර වනුයේ ජාතික ආරක්ෂාව යනු තමන්ගේ ආරක්ෂාව ලෙස දැකීමයි. වසංගතය වැඬලීමට වඩා ප්‍රමුඛතාවක් 20 සම්මත කර ගැනීමට දෙන්නේ මේ දැක්ම මතය. ඒ සාවද්‍ය ප්‍රමුඛතාවේ අවසානය කිසිවකුටත් සුබදායක නොවනු ඇත.■
