■ අරුණ ජයවර්ධන
කෝවිඩ් 19 ආසාදනය වීමෙන් මියයන පුද්ගලයන්ගේ මළසිරුරුවල අවසන් කටයුතු කිරීම සම්බන්ධයෙන් ආණ්ඩුව ඉදිරියේ වාර්තා දෙකක් තිබේ. ඉන් පළමුවැන්න, 2020දී පත්කරන ලද ප්රධාන අධිකරණ වෛද්ය නිලධාරී චන්න පෙරේරා ඇතුළු තාක්ෂණ කණ්ඩායමකගේ වාර්තාවයි. දෙවැන්න, 2020 දෙසැම්බර් 24 වැනිදා පත්කරන ලද, මහාචාර්ය ජෙනිෆර් පෙරේරාගේ නායකත්වයෙන් යුක්ත විශේෂඥ කණ්ඩායමේ වාර්තාවයි.
මුල් කණ්ඩායම, කෝවිඩ් මළසිරුරු අනිවාර්යයෙන් ආදාහනය කළ යුතුයැයි කියන අතර, දෙවැනි කණ්ඩායම, භූමදානය හා ආදාහනය යන දෙකම නිර්දේශ කරයි.
මේ කණ්ඩායම් දෙකේ වාර්තා දෙකෙන්, රජය අනුගමනය කරන්නේ කුමන වාර්තාවදැයි, පාර්ලිමේන්තු මන්ත්රී ගජේන්ද්ර කුමාර් පොන්නම්බලම් පාර්ලිමේන්තුවේදී ඇසූ ප්රශ්නයට පිළිතුරු දුන් සෞඛ්ය ඇමතිනි පවිත්රා වන්නිආරච්චි පැවසුවේ, ඒ පිළිබඳව නිර්දේශ ඉදිරිපත් කිරීම පිණිස පත්කරන ලද විශේෂඥ කමිටුව කොරෝනා වෛරසය ආසාදනය වීමෙන් මියයන පුද්ගලයන්ගේ මෘත ශරීර ආදාහනය පමණක් සිදුකළ යුතු බවට නිර්දේශ කර ඇති බවය. ඇගේ පිළිතුරෙන් කියැවෙන්නේ පළමුවැනි කණ්ඩායමයි.
‘කෝවිඩ් රෝගයෙන් මියයන පුද්ගලයන්ගේ මළසිරුරු පිළිබඳව නිර්දේශ ලබාදීමට පත්කළ ඒ විශේෂඥ කමිටුවේ නිර්දේශය වී තිබෙන්නේ මළසිරුරු ආදාහනය කළ යුතු බවයි. එම නිසා එම පැහැදිලි නිර්දේශය අප ක්රියාත්මක කරනවා වගේම මෙවැනි භයානක වසංගතයකට මුහුණ දීමේදී එවැනි විශේෂඥ නිර්දේශයන් සමාජීය, ආගමික, දේශපාලනමය හෝ වෙනත් කිසිම පෞද්ගලික හේතුවක් නිසාවෙන් වෙනස් නොකරන බවත් කාරුණිකව සඳහන් කරමි.’ යනුවෙන් ඇය පාර්ලිමේන්තුව හමුවේ පැවසුවාය.
මහාචාර්ය ජෙනිෆර් පෙරේරාගේ නායකත්වයෙන් යුක්ත විශේෂඥ කමිටුව පිහිටුවා ඇත්තේ වෛද්ය චන්න පෙරේරාගේ තාක්ෂණ කමිටුව යටතේ බවත් ඇමතිනිය කියයි. විශේෂඥ කමිටුවේ වාර්තාව තාක්ෂණික කමිටුව වෙත ඉදිරිපත් කරන බව ඇමතිනිය කීවත්, තාක්ෂණික කමිටුවට එය ලැබුණාදැයි දැනගන්නට ක්රමයක් නැත. කෙසේ වෙතත් විශේෂඥ කමිටුවේ වාර්තාව සලකා බලා තාක්ෂණික කමිටුව දෙන තීරණය පාර්ලිමේන්තුවට ඉදිරිපත් කරන බවට ඇමතිනිය පොරොන්දු වුණාය. තවමත් ඒ දිනය උදාවී නැත. ඒ අතර, කොවිඩ් ආසාදනයෙන් මියයන සියලු පුද්ගලයන්ගේ මළසිරුරු ආදාහනය කෙරෙයි. පසුගිය බදාදා වන විට මියගිය මුළු ගණන, 247කි. බදාදා දිනය තුළ අලුතින් හඳුනා ගැනුණු ආසාදිතයන්ගේ සංඛ්යාව 687කිෟ
2020දී පත්කරන ලද චන්න පෙරේරා කමිටුවේ සාමාජිකයන් වන්නේ, කායික රෝග විශේෂඥ වෛද්ය ආනන්ද විජේවික්රම, ස්වාභාවික සම්පත් පිළිබඳ මහාචාර්ය මෙත්තිකා විතානගේ, ක්ෂුද්රජීව විශේෂඥ වෛද්ය හසිත තිසේරා හා වෛරස විද්යාඥ දුල්මිනි කුමාරසිංහ ඇතුළු, රජයේ වෛද්ය නිලධාරීන්, ක්ෂුද්ර ජීව විද්යාඥයන්, විශේෂඥ අධිකරණ වෛද්ය නිලධාරීන්ගෙන් සමන්විත කණ්ඩායමකි.
ක්ෂුද්ර ජීව විද්යාව පිළිබඳ ජ්යෙෂ්ඨ මහාචාර්ය ජෙනිෆර් පෙරේරාගේ නායකත්වයෙන් යුක්ත විශේඥ කණ්ඩායම, ක්ෂුද්රජීව විද්යා මහාචාර්ය නිලීකා මලවිගේ, ක්ෂුද්ර ජීව විද්යාඥ මාලිකා කරුණාරත්න, ප්රතිශක්තිකරණ විශේෂ වෛද්ය රජීව ද සිල්වා ඇතුළු පිරිසකගෙන් සමන්විතය.
ත්රස්තවාදීන් ගැන බය
රජය දැනට පිළිගන්නා, තාක්ෂණික කමිටුවේ නායක වෛද්ය චන්න පෙරේරා, 2019 දෙසැම්බර් 15වැනිදා, බීබීසී ලෝක සේවයේ විකාශය වූ ලෝක ප්රකට නිවුස්අවර් (භැඅියදමර) වැඩසටහනට අන්තර්ජාලය ඔස්සේ එක්වෙමින් අපූරු අදහසක් පළකළේය. ඔහු කිව්වේ, කොරෝනා මෘතදේහයන් ආදාහනය කිරීමට රජය පියවර ගත්තේ, වෛරසය අනවසර කටයුතු සඳහා භාවිත කළ හැකිද යන්න පිළිබඳව තරමක බියක් ඇති නිසා බවය. ඔහු එහිදී කිව්වේ, ‘සමහර විට අනවශ්ය පුද්ගලයෙකුට එවැනි දේහයක් ලබා ගැනීමට ඉඩ ඇති අතර එය ජීව විද්යාත්මක ආයුධයක් ලෙස භාවිත කළ හැකි බව’යි. ඔහු එයින් කියන්නේ, කෝවිඩ් මළසිරුරු ත්රස්තවාදීන් අතට පත්විය හැකි බවත්, ඒවා අවි හැටියට පාවිච්චි කරාවිදැයි බියක් ඇති බවත්ය. රටක විශේෂඥ වෛද්ය කණ්ඩfායමක ප්රධානියකු තම නිගමනයන්ට මුල් කරගන්නා හේතු නම් අපූරුය.ෟ
මේ කමිටුවේ සාමාජිකා මහාචාර්ය මෙත්තිකා විතානගේද එවැනි විවාදාපන්න අදහස් මාධ්ය හමුවේ කියා තිබේ. ඇය මේ වන විට මාධ්යවලට ප්රකාශ කර ඇති දෙයින් පැහැදිලි වන්නේ නිවැරදි නොවන සමහර දේ, මළසිරුරු භූමදානය ප්රතික්ෂෙප කිරීම සඳහා ඇය තර්ක වශයෙන් යොදාගන්නා බවයි. මීට පෙර අවස්ථාවක ඇය ‘ඩෙන්මාර්කයේ කෝවිඩ් ප්රභේදයක් ආසාදනය වූවායැ’යි සැකකර මුගටියන් මිලියන පහළොවක් වළදැමීමෙන් පසුව, එරට භූගත ජලයට වෛරසය පැතිර ගිය බවට, කිසිම තහවුරු කිරීමක් නැති වැරදි කරුණක් මාධ්ය හමුවේ කීවාය. ඒ තත්වය නිසා වළදැමූ මුගටි සිරුරු ගොඩගෙන පුළුස්සා දැමීමට ඩෙන්මාර්ක රජයට සිදුවූ බවද ඇය කීවාය. එහෙත්, ඇත්ත කතාව නම් එවැනි දෙයක් සිදුවූයේ නැති බවයි. මහජනතාව පරිභෝජනය කරන ජල මූලාශ්ර අසළ වළ දමා ඇති බව පෙන්වා දීම නිසා මුගටි මළසිරුරු මිලියන හතරක් ගොඩගැනීමට ඩෙන්මාර්ක් රජය තීරණය කර ඇති අතර, එය කරන්නට නියමිතව ඇත්තේද ලබන මැයි මාසයේදීය. තමා ඒ ප්රකාශය කළේ කිසිම තහවුරු කිරීමේ කරුණු සෙවීමකින් තොරව බව ඇය මාධ්ය විසින් කරන ලද ප්රශ්න හමුවේ පසුව ප්රකාශ කළාය. තවත් වරෙක ඇය මාධ්යවලට පැවසූයේ, භූමදානයෙන් වෛරසය ජල මූලාශ්රවලට එකතුවේදැයි තහවුරු වී නැති නිසා, භූමදානය නොකළ යුතු බවයි.
ඇමතිනියගේ මේ තාක්ෂණික කමිටු සාමාජිකයන් දෙදෙනකුගේම ප්රසිද්ධ තර්ක සලකා බලන විට පෙනෙන්නේ කුමක්ද? ඔවුන් මළසිරුරු භූමදානයට ඉඩ නොදීම සම්බන්ධයෙන් කිසියම් පූර්ව නිගමනයක එල්ලී සිටින බවයි. විශේෂයෙන් මෙත්තිකා විතානගේ මහාචාර්යවරිය, සිය පූර්ව නිගමනය සනාථ කිරීම සඳහා වරින් වර මාධ්ය ඉදිරියේ පෙනීසිටිමින්, තමා මේ කතාකරන්නේ කමිටුවේ සාමාජිකාවක හැටියට නොවන බවද පුන පුනා කියමින්, තමාගේ පූර්ව නිගමනය තහවුරු කිරීම සඳහා නිවැරදි නොවන කරුණු කියාපාන්නීය. ඔවුන් දෙදෙනාගේ පොදු ලක්ෂණය නම්, මළසිරුරු භූමදානයට ඉඩ නොදෙමැයි කියන ස්ථාවරයයි. ඉතින් මෙවැනි සාමාජිකයන් කමිටුවක් විසින් විශේෂඥ කමිටුවේ වාර්තාව පිළිගනීවියැයි සිතීමට අපට පිස්සුද?
කෙසේ වෙතත්, විශේෂඥ කමිටුවේ වාර්තාවේ අන්තර්ගතය දැන සිටීම වැදගත්ය.
‘ආසාදිත පුද්ගලයා මියගිය පසුව ශරීරයේ ජීව සෛල නොමැති බැවින් ඉතිරිව ඇති වෛරසය පුද්ගලයෙකුගේ මරණයත් සමඟ යම් කාලයක් තුළදී මිය යයි. සාර්ස්-කෝවිඩ 2 වෛරස් ආසාදනය ජලයෙන් බෝවන රෝගයක් නොවේ’ය කියා එම වාර්තාවේ සඳහන් වේ.
‘මළසිරුරක ඉතිරිව ඇති වෛරස ප්රමාණය ජලය අපවිත්ර වීමට තරම් ප්රමාණවත් නොවේ. භූගත ජල මට්ටමට කාන්දු වීමට පසේ ස්තර කිහිපයක් පසුකර යා යුතු බැවින් එසේ පස් ස්තර තුළින් කාන්දු වීමේදී ඕනෑම අවශේෂ වෛරසයක් මිය යන අතර එය ආසාදිත මට්ටම් කරා ළඟාවීම ඉතාමත් දුර්ලභය. එනම්, ආසාදනය වීමට අවශ්ය අවම සංයුතිය එවිට වෛරසයට නැත.’
‘ජල මට්ටමට ළඟා වන ඕනෑම අවශේෂ බෝවන වෛරසයක් විශාල ජල පරිමාවකින් තනුක වේ. එම නිසා, වෛරසයේ අවම ආසාදිත මාත්රාව තරමක් ඉහළ බැවින් ජලයේ ඇති වෛරස් ප්රමාණය ශ්ලේෂ්මල පටල සමඟ සම්බන්ධ වීමෙන් හෝ අපවිත්ර වූ දෑත් මගින් ආසාදනයට තුඩු දීමට ප්රමාණවත් නොවේ.’
‘එම හේතු නිසාම, සාර්ස් හෝ ඉන්ෆ්ලුවෙන්සා හේතුවෙන් මියගිය පුද්ගලයන් භූමදානය කිරීමේදී ජලය දූෂණය වූ බවට කිසිදු සාක්ෂියක් නොමැත.’
ජෛව හායනයට ලක් නොවන, සිරුරු බහාලන බෑග් වැනි වෛරස කාන්දුවකට ඉඩක් නැති ද්රව්යවලින් නිර්මිත කවර භාවිතයෙන් ශරීරය ඔතා තැබීමෙන් ජලය දූෂණය වීම බොහෝ දුරට වළක්වාගත හැකි බව එම කමිටුව විසින් නිර්දේශ කර තිබිණ.
මේ අතර ශ්රී ලංකා වෛද්ය සංගමයද, ශ්රී ලංකා ප්රජා වෛද්යවරුන්ගේ සංගමයද නිවේදන නිකුත් කරමින් පවසන්නේ, කොවිඩ්-19 වෛරසය ආසාදනය වීමෙන් මිය යන පුද්ගලයන්ගේ සිරුරු සෞඛ්යාරක්ෂිත පියවර අනුගමනය කරමින් භූමදානය කිරීමේ ගැටලුවක් නොමැති බවය.
ප්රජා වෛද්යවරුන්ගේ සංගමය තම නිර්දේශ ඉදිරිපත් කරමින් පැවසුවේ මළසිරුරු භූමදානය කිරීමෙන් කොරෝනා වෛරසය පැතිරෙන බවට ප්රබල සාක්ෂි නොමැති අතර, දැනට පවතින විද්යාත්මක සාක්ෂි සහ ගෝලීය මාර්ගෝපදේශ අනුව යමින් සෞඛ්ය අමාත්යාංශය විසින් නිර්දේශ කරනු ලබන දැඩි මාර්ගෝපදේශ අනුව ශ්රී ලංකාවේ පුරවැසියන්ට ඔහුගේ හෝ ඇයගේ සහ ඔවුන්ගේ පවුල්වල අභිමතය පරිදි ආදාහනය කිරීමට හෝ භූමදාන කිරීමට ඉඩ දිය යුතුව ඇති බවය.
මේ විදියට බලන විට, රටේ ඉහළම විද්යාඥයන්, වෛද්ය කණ්ඩායම් හා සංගම්ද, කියන්නේ, භූමදානය හා ආදාහනය යන දෙකෙන් එකක් කළ හැකි බවය. එහෙත්, ආණ්ඩුවට මේ එකම විශේෂඥ සංගමයකවත්, කණ්ඩායමකවත් නිර්දේශ අවශ්ය නැත. ඔවුන් පිළිපදින්නේ චන්න පෙරේරා කණ්ඩායමේ තීරණයයි.
තම ඥාතින්ගේ මළසිරුරු භූමදානයට අවසර දෙන ලෙස ඉල්ලා මුස්ලිම් මිනිසුන් කළ උද්ඝෝෂණයට අංශු මාත්රයක්වත් කන්දෙන ආණ්ඩුවක් නම් කළ යුතුව ඇත්තේ ඒ ගැන තමන්ට ඇති දත්ත මොනවාද කියා සලකා බැලීමය. විශේෂඥ කමිටු කිහිපයක්ම, භූමදානයට අවසර ලබාදී තිබේ. ලෝක සෞඛ්ය සංවිධානයද එය අනුදැන තිබේ. ලෝකයේ රටවල් එකසිය අනූ ගණනකද භූමදානය සිදුවේ. ඉතින්, මේ දත්ත අනුව, සෞඛ්යාරජෂක ක(මවේද අකුරටම අනුගමනය කරමින් සිරුරු වල දමීමට ඇති බාදාව කුමක්ද? ආන්ඩුව කියන ඕනෑම විදියකට, මළසිරුරු මුද්රා තබා වළ දැමීමට මුස්ලිම් ප්රජාව සුදානම් ය. මළසිරුර වාටේට කොන්ක්රීට් දැමීමට පවා තමන් එකඟ බව එකි් මුස්ලිම් ප්රජා නායකවෙක් බීබීසීයට කීවේය.
දැන් ආණ්ඩු කියන්නේ විශේෂඳ කමිටු මොනවා කීවත් තීරණය ගන්නේ ආණ්ඩුව, ජනාධිපතිතුමා බවයි. ඇත්තටම මුස්ලිමුන්ට යහපත් ප්රතිචාරයක් දක්වන්නට වුවමනා නම්, ආණ්ඩුව තෝරාගත යුත්තේ විශේෂඥ කමිටු වාර්තාවයි. ඒ තෝරාගැනීම නොකරමින් ආණ්ඩුව කල් ගෙවන්නේ ඇයි? විද්යාත්මක පැහැදිලි කිරීමට උඩින් යන වෙනත් අරමුණක් ආණ්ඩුව වෙත තිබෙන නිසාය. ඒ කුමක්ද? මුස්ලිමුන්ට එරෙහිවීමයි. ඉස්ලාමොෆෝබියාවයි.■
බැහැර කිරීම සම්බන්ධයෙන් අත්යන්තයෙන්ම එකිනෙකට ප්රතිවිරුද්ධ නිර්දේශ ඉදිරිපත් කර තිබුණි.
