පසුගිය සතියේ විපක්ෂයේ මන්ත්‍රීවරුන් විසින් පාර්ලිමේන්තුවේදී මතුකරන ලද ගල්කිස්ස මහේස්ත්‍රාත් අධිකරණයේ විභාග වන නඩුවකට අදාළව ආණ්ඩුවේ ඇමතිවරයකු, නියෝජ්‍ය ඇමතිවරයකු හා නගරාධිපතිවරයකු අත්අඩංගුවට ගැනීමේ නියෝගයක් ක්‍රියාත්මක කර නැතැයි වූ චෝදනාව සම්බන්ධයෙන් නියෝජ්‍ය ඇමති මහින්ද ජයසිංහ පාර්ලිමේන්තුවේදී ප්‍රකාශ කළේ ඒ සම්බන්ධයෙන් ඔහු සහ කඩුවෙල නගරාධිපති රන්ජන් ජයලාල් පොලිසියට ප්‍රකාශ ලබාදී ඇති බවයි. එමෙන්ම ඇමති වසන්ත සමරසිංහද පොලිසියට ප්‍රකාශයක් ලබාදී ඇති බවයි.

එම චෝදනාවට හේතු වූ කොළඹ වංචා විමර්ශන කාර්යාංශය 2024 සැප්තැම්බර් 06 වන දින අධිකරණයට ඉදිරිපත් කළ බී 29984/24 දරන නඩුවේ වාර්තාව එම චෝදනාව තේරුම් ගැනීම සඳහා ප්‍රයෝජනවත් වන අතර, ඒ සම්බන්ධයෙන් පසුව මහින්ද ජයසිංහ, රන්ජන් ජයලාල් හා වසන්ත සමරසිංහ අධිකරණයට ඉදිරිපත් කර ඇති ප්‍රකාශද වැදගත්ය. ඒ අනුව වංචා විමර්ශන අංශය 2024 සැප්තැම්බර් 06 දින අධිකරණයට ඉදිරිපත් කළ වැඩිදුර වාර්තාව මෙසේය.

‘මහේස්ත්‍රාත්වරයා වෙතය,

නැෂනල් වර්කර්ස් ඉන්ස්ටිටියුට් ආයතනය සතු දෙමහල් ගොඩනැගිල්ල සහිත ඉඩම සඳහා ව්‍යාජ බදු ඔප්පුවක් සකස් කර රු. 3,600,000 මුදලකට බදු දී වංචා කළ බවට 283/ඒ, දයාජී, මො/කිරුළපන ලිපිනයේ පදිංචි සි. වැලුව ගමගේ දයාජි අමරසිංහ යන අය විසින් 2024.01.02 වැනි දින කරන ලද පැමිණිල්ල විභාග කළ බව කොළඹ වංචා විමර්ශන අංශයේ ඒකක 03 හි ස්ථානාධිපති ප්‍ර පො. ප මනෝහර රූපසිංහ වන මම මෙයින් වාර්තා කරමි.

2024.01.26 දින මාගේ මුල් වාර්තාව හා සැබැඳේ.

පැමිණිලිකාර නැෂනල් වර්කර්ස් කොන්ග්‍රස් වෘත්තීය සමිතිය හා නැෂනල් වර්කර්ස් ඉන්ස්ට්ටියුට් ආයතනය සතු අංක 10, නගර සභා පටුමග, දෙහිවල ලිපිනයේ පිහිටි පර්චස් 32.09කින් යුතු ඉඩම සහිත දෙමහල් ගොඩනැගිල්ල බදු දීමට අදාළව නීතිඥ එෆ්වයිඑච් ඉස්මයිල් මහතා විසින් සකස් කර ඇති අංක 166,206 සහ 207 දරන බදු ඔප්පුවල දෙවන පිටපත් ගරු අධිකරණ නියෝග මත දෙල්කඳ නුගේගොඩ ඉඩම් ලියාපදිංචි කිරීමේ කාර්යාලය වෙතින් ලබා ගැනීමෙන් අනතුරුව ඒ සම්බන්ධයෙන් නීතිඥ එෆ්වයිඑච් ඉස්මයිල් මහතාගේ ප්‍රකාශයක් ලබා ගැනීමට කටයුතු කරන ලදි.

පැමිණිලිකාර නැෂනල් වර්කර්ස් කොන්ග්‍රස් නමින් සඳහන් වෘත්තීය සමිතිය ලියාපදිංචි අංක 1041 යටතේ ජාතික කම්කරු සංගමයේ වර්තමාන නීත්‍යනුකූල නිලධාරි මණ්ඩලය සම්බන්ධයෙන් තොරතුරු අනාවරණය කර ගැනීම සඳහා කම්කරු දෙපාර්තමේන්තුවේ සහකාර කම්කරු කොමසාරිස් (වෘත්තීය සමිති) වෙතින් වාර්තාවක් ලබා ගැනීමට කටයුතු කළ අතර, ඒ අනුව මෙම සංගමයේ නීත්‍යානුකුල නිලධාරි මණ්ඩලයේ සභාපති- මයුරා ධර්මවර්ධන යන අයද, ලේකම්- ටී කෝසල සුරේන්ද්‍ර යන අයද, උප සභාපති එල්එච් කුමාරසිංහ යන අය සහ තිලක් කිටෝ යන අයවලුන්ද, උප ලේකම් දයාජි අමරසිංහ යන අයද, භාණ්ඩාගාරික පීඒඑස්පී පෙරේරා යන අයද, උප භාණ්ඩාගාරික මල්ලිකා අබේරත්න යන අය බවට වාර්තාවේ සඳහන්ව ඇති තොරතුරු මත අනාවරණය වී ඇත.

අනතුරුව මෙම සිද්ධිය සම්බන්ධයෙන් තෙල්ගේ නිරෝෂන් පීරිස් යන අයගේද, පයාගල උඩවත්තගේ මයුර ධර්මවර්ධන යන අයගේද, ලක්හේවලාගේ කුමාරසිංහ යන අයගේද, තිලක් ධර්මසිරි කිටෝ යන අයවලුන්ගේද ප්‍රකාශ ලබාගෙන ඇත.
මෙම ප්‍රශ්නගත දේපල බදු දීම සඳහා ලියා සකස් කර ඇති අංක 166 දරන බදු ඔප්පුවේ සාක්ෂිකරුවන් වශයෙන් අත්සන් කර ඇති මොහොමඩ් සාරුක් අහමඩ් රුෂ්ඩි යන අයගේද, හොරගල් ගමගේ චමින්ද කුමාර යන අයගේද, අංක 207 දරන බදු ඔප්පුවේ සාක්ෂිකරුවකු වන තෙල්ගේ මේරියන් ලලිනි පීරිස් යන අයවලුන්ගේද ප්‍රකාශ ලබාගෙන ඇත.

ෆාතිමා යුහා හුසෙයින් ඉස්මයිල්, නීතිඥ හා ප්‍රසිද්ධ නොතාරිස්, අංක 35, ද අල්විස් පාර, ගල්කිස්ස යන අය 2013 වර්ෂයේ සිට නීතිඥවරියක ලෙස කටයුතු කරමින් ඔප්පු සහ ගිවිසුම් 600 ක පමණ ලියා සකස් කර සහතික කර ලියාපදිංචි කර ඇති බවත්, එහිදී 2020.02.10 වන දින අංක 166 දරන බදු ඔප්පුව ලියා සකස් කිරීමට අදාළව 2016.10.08 දිනැති අංක 6679 දරන බදු ඔප්පුව යටතේ නැෂනල් වර්කර්ස් කොන්ග්‍රස් නමින් බදු දීමට අදාළව බදු ඔප්පුව දෙල්කඳ ඉඩම් ලියාපදිංචි කිරීමේ කාර්යාලයෙන් පරික්ෂාවක් සිදුකළ බවත්, ඉන්පසු ජාතික කම්කරු සංගමයේ ලිපි ශීර්ෂයක විධායක කමිටු රැස්වීමේදී දේපල කුලියට දීමට එකඟ වූ බවත්, එම බදු ගිවිසුම සඳහා සභාපති ලෙස වසන්ත සමරසිංහ හා උප සභාපති ලෙස සිරිල් ආනන්දසිරි යන අයවලුන් හා ලේකම් අමාලි කළුපහන යන අය සහ භාණ්ඩාගාරික ලෙස සප්නා අමදෝරු යන අයවලුන් අත්සන් කර තිබූ බවත්, ඒ අනුව අංක 166 දරන බදු ඔප්පුව යටතේ අංක 10, නගර සභා පටුමග දෙහිවල ලිපිනයේ පිහිටි පර්චස් 32.09 කින් යුතු ඉඩම සහිත දෙමහල් ගොඩනැගිල්ල සයිඩ් අස්කර් කාන් යන අය වෙත බදු දීමට අදාළව ඔප්පුව සකස් කර සහතික කර ලියාපදිංචි කළ බවත්, ඉන් පසුව අංක 166 දරන බදු ඔප්පුවේ කාල සීමාව අවසන් වීමෙන් අනතුරුව 2020.12.26 දිනැති අංක 206 දරන බදු ඔප්පුවෙන් අවලංගු කර සේනක මහින්දවංශ ජයසිංහ සහ ගලගම ආරච්චිගේ රංජන් ජයලාල් පෙරේරා යන අයවලුන් බදු ගැනුම්කරුවන් වශයෙන් බදු දීමට අදාළව අංක 207 දරන බදු ඔප්පුව සකස්කර බදු දීමනාකරුවන් ලෙස වසන්ත සමරසිංහ සහ සිරිල් ආනන්ද සිරි යන අයවලුන් අත්සන් කිරීමෙන් පසුව බදු ඔප්පුව සහතික කර ලියාපදිංචි කළ බවත්, එහි සාක්ෂිකරුවන් වශයෙන් තෙල්ගේ මේරියන් ලලනී පීරිස් යන අය හා රණසිංහ ආරච්චිගේ දොන් ජයතිලක යන අයවලුන් අත්සන් කළ බවත්, ඒ අනුව නීත්‍යනුකූල ලෙස නොතාරිස් පනත යටතේ බදු ඔප්පු සකස් කර ලියාපදිංචිය සිදුකළ බවට ප්‍රකාශ කර ඇත.

ප්‍රශ්නගත දේපල නැෂනල් වර්කර්ස් කොන්ග්‍රස් වෘත්තීය සමිතියේ සභාපති හා උප සභාපති වශයෙන් පෙනී සිටිමින් හේරත් මුදියන්සේලාගේ වසන්ත සමරසිංහ සහ රන්කොත් ගෙදර සිරිල් ආනන්ද සිරි යන අයවලුන් විසින් මෙම අංක 166 සහ 206, 207 දරන බදු ඔප්පු යටතේ බදු දීමට කටයුතු කර ඇති බව විමර්ශනයේදී අනාවරණය වී ඇති අතර, නැෂනල් වර්ක්ස් කොන්ග්‍රස් වෘත්තීය සමිතියේ අංක 1041 යටතේ ලියාපදිංචි නීත්‍යනුකූල සංගමයේ නිලධාරි මණ්ඩලයේ සභාපති සහ ලේකම් ඇතුළු උප සභාපති, උප ලේකම්, භාණ්ඩාගාරික, උප භාණ්ඩාගාරික යන තනතුරු සඳහා නිලධාරීන් සහ නිලධාරිනියන් පත්ව සිටියදී මෙම අංක 10, නගර සභා පටුමග, දෙහිවල ලිපිනයේ පිහිටි පර්චස් 32.09 කින් යුත් ඉඩම සහිත දෙමහල් ගොඩනැගිල්ල සේනක මහින්දවංශ ජයසිංහ හා ගල්ගම ආරච්චිගේ රංජන් ජයලාල් පෙරේරා යන අයවලුන්ට මුදල් රු. 3,600,000 කට බදු කුලී මත ලබා දීමට කටයුතු කර ඇති බව අනාවරණය වී ඇත.

අංක 207 දරන බදු ඔප්පුවේ බදු ගැනුම්කරුවන් වශයෙන් කටයුතු කර ඇති සේනක මහින්දවංශ ජයසිංහ හා ගල්ගම ආරච්චිගේ රන්ජන් ජයලාල් පෙරේරා යන අයවලුන් විසින් අංක 10, නගර සභා පටුමග දෙහිවල ලිපිනයේ පිහිටි පර්චස් 32.09 කින් යුතු ඉඩම සහිත දෙමහල් ගොඩනැගිල්ල බදු ගැනීමට අදාළව මුදල් රු. 3,600,000 ක මුදල ගෙවීම් කිරීම සම්බන්ධයෙන් කරුණු අනාවරණය කර ගැනීම සඳහා ප්‍රකාශ ලබා ගැනීමට කාර්යාංශයට පැමිණෙන ලෙසට ඔවුන් පදිංචි ලිපිනයන්ට අදාළ පොලිස් ස්ථාන මගින් දුරකතන පණිවිඩ ලබාදී ඇති අතර, මෙතෙක් මොවුන් ප්‍රකාශ ලබාදීම සඳහා කාර්යාංශය වෙත පැමිණ නැත.

එබැවින් තවදුරටත් මෙම සිද්ධිය සම්බන්ධයෙන් වැඩිදුර විමර්ශන කටයුතු සිදුකර, මෙම පැමිණිල්ලේ සඳහන් අංක 10, නගර සභා පටුමග දෙහිවල ලිපිනයේ පිහිටි පර්චස් 32.09 කින් යුතු ඉඩම සහිත දෙමහල් ගොඩනැගිල්ල බදු දීමට අදාළව නැෂනල් වර්ක්ස් කොන්ග්‍රස් නැමැති වෘත්තීය සමිතියේ නීත්‍යනුකූල නිලධාරි මණ්ඩලයක් සිටියදී බදු දීමනාකරුවන් ලෙස හේරත් මුදියන්සේලාගේ වසන්ත සමරසිංහ සහ රන්කොත් ගෙදර සිරිල් ආනන්ද සිරි යන අයවලුන් විසින් කටයුතු සිදු කර ඇද්ද යන්න අනාවරණය කර ගැනීමට ඇති අතර, මෙම නැෂනල් වර්කර්්ස් කොන්ග්‍රස් නැමැති වෘත්තීය සමිති ආයතනයට අදාළව කොළඹ අභියාචනාධිකරණයේ සහ කඩුවෙල දිසා අධිකරණයේ විභාග වන අංක 240/විශේෂ දරන නඩුවේ වාරණ නියෝග සම්බන්ධයෙන් ද තොරතුරු අනාවරණය කර ගැනීමට ඇත.’

ඒ කොළඹ වංචා විමර්ශන අංශය විසින් 2024.09.06 දින ගල්කිස්ස මහේස්ත්‍රාත් අධිකරණයට ඉදිරිපත් කරන ලද වැඩිදුර වාර්තාව හෙවත් දෙවන වාර්තාවේ සඳහන් කරන ලද කරුණුය. සැකකරුවන් වහාම අත්අඩංගුවට ගෙන අධිකරණයට ඉදිරිපත් කරන ලෙස එම වාර්තාව ඉදිරිපත් කළ දිනයේදී හා 2024.10.22 දින අධිකරණය නියෝග කර ඇති අතර පාර්ලිමේන්තුවේදී චෝදනා එල්ල වූයේ එම නියෝග ක්‍රියාත්මක කර නැති බවටය. ඊට අදාළ පළමු වාර්තාව 2024. 01.26 දින අධිකරණයට ඉදිරිපත් කර ඇති අතර එහි සඳහන් කරන්නේ එම පැමිණිල්ල දණ්ඩ නීති සංග්‍රහයේ 454,403 හා 386 යටතේ දඬුවම් ලැබිය හැකි වරදවල් බවට නිරීක්ෂණය වන බවයි. ඉන්පසු මෙම වසරේ අධිකරණයට ඉදිරිපත් කර ඇති වාර්තා මගින් ඇමති වසන්ත සමරසිංහගේ, නියෝජ්‍ය ඇමති මහින්ද ජයසිහගේ හා කඩුවෙල් නගරාධිපති රන්ජන් ජයලාල්ගේ ප්‍රකාශ ඉදිරිපත් කර ඇත. කරුණු අවබෝධ කර ගැනීම සඳහා ඒවා වෙන වෙනම පළ කරමු.

කාර්යාලයක අවශ්‍යතාවක් තිබුණා…මහින්ද ජයසිංහගේ ප්‍රකාශය

2000 වර්ෂයේ සිට ලංකා ගුරු සේවා සංගමයේ ප්‍රධාන ලේකම් ලෙසත්, ඒ අතරම ජාතික වෘත්තීය සමිති මධ්‍යස්ථානයේ ප්‍රධාන ලේකම් ලෙස තේරී පත්වීමෙන් අනතුරුව මේ දක්වා එම තනතුරුවල කටයුතු කරන බවයි. තම වෘත්තීය සමිති මධ්‍යස්ථානයට කාර්යාලයක් සඳහා ස්ථානයක් සොයමින් සිටියදී දිගු කාලයක සිට වෘත්තීය සමිති කටයුතු වලදී හඳුනන ජාතික කම්කරු සංගමයේ ලේකම් අමාලි කළුපහන සහෝදරියගේ සංගමයේ ගොඩනැගිල්ලක් බදු දීමට තිබෙන බව දැන ගන්නට ලැබුණ බවත්, 2017 වර්ෂයේදී ජාතික වෘත්තීය සමිති මධ්‍යස්ථානයේ වසන්ත සමරසිංහ සහෝදරයා ජාතික කම්කරු සංගමයේ සභාපති ලෙස එම සංගමයේ සාමාජිකයන්ගේ ඡන්දයෙන් තේරී පත්ව සිටි බවත්, එම අවස්ථාවේ සංගමයේ සාමාජිකයන්ගේ ඡන්දයෙන් තේරී පත් නොවූ ව්‍යාජ නිලධාරි මණ්ඩලයක් කම්කරු දෙපාර්තමේන්තුව විසින් එවක හිටපු අමාාත්‍යවරයකුගේ බලපෑම මත එම සංගමයේ නිලධාරින් ලෙස ලියාපදිංචි කිරීමට විරුද්ධව සංගමයේ නිලධාරීන් විසින් අභියාචනාධිකරණයේ නඩුවක් ගොනු කර ඇති බව දැන ගන්නට ලැබුණ බවත්, එහිදී ජාතික කම්කරු සංගමයේ නීත්‍යනුකූල මහ සභාවෙන් පත්වූ නිලධාරීන් ලෙස වසන්ත සමරසිංහ සහෝදරයා ඇතුළු කණ්ඩායම කටයුතු කරමින් සිටියදී 2020.12.25 දිනැති ඇති නීතිඥ එෆ්වයිඑච් ඉස්මයිල් මහත්මිය ලියා සහතික කර ඇති අංක 207 දරන බදු ඔප්පුව මගින් එම ගොඩනැගිල්ලේ කොටසක් බදු කුලී මත ලබා ගැනීම වෙනුවෙන් අත්සන් කළ බවටත්, ඒ අනුව විධායක සභාව වෙනුවෙන් මමත්, රන්ජන් ජයලාල් සහෝදරයාත් මෙම ගිවිසුම සඳහා අත්සන් කළ බවත් මේ සම්බන්ධයෙන් මුදල් ගනුදෙනු කරනු ලැබුයේ සංගම් දෙකේම භාණ්ඩාගාරික තනතුරු දරන නිලධාරීන් හා නිලධාරිනියන් බවත් ප්‍රකාශ කර ඇත.

කාර්යාලයක අවශ්‍යතාවක් තිබුණා
රන්ජන් ජයලාල් ප්‍රකාශය

වසර 30ක පමණ කාලයක් ලංකා විදුලි සේවක සංගමයේ ප්‍රධාන ලේකම් ලෙස සේවය කළ බවත්, එම වෘත්තීය සමිතිය ජාතික වෘත්තීය සමිති මධ්‍යස්ථානයට අනුබද්ධ වෘත්තීය සමිතියක් බවත්, 2020 වර්ෂයේ දෙසැම්බර් 26 වන දින ජාතික කම්කරු සංගමය සමඟ ගිවිසුමක් අත්සන් කළ බවත්, තම වෘත්තීය සමිතිය පවත්වාගෙන යෑම සඳහා කාර්යාලයක අවශ්‍යතාව පැනනැඟී තිබූ බවත්, වසර 05කට අධික කාලයක් තිස්සේ තම සංගමය ජාතික කම්කරු සංගමය සමඟ වෘත්තීය ක්‍රියාමාර්ගවලදී ඒකාබද්ධව වැඩකටයුතු සිදුකළ බවත්, ඒ අනුව 2024 වර්ෂයේදී තම වෘත්තීය සමිති මධ්‍යස්ථානයේ වසන්ත සමරසිංහ සහෝදරයා ජාතික කම්කරු සංගමයේ සභාපති ලෙස එම සංගමයේ සාමාජිකයන්ගේ ඡන්දයෙන් තේරී පත්වූ බවත්, පසුව සාමාජිකයන්ගේ ඡන්දයෙන් තේරී පත් නොවූ ව්‍යාජ නිලධාරි මණ්ඩලයක් කම්කරු දෙපාර්තමේන්තුව විසින් එවකට සිටි අමාත්‍යවරයකුගේ බලපෑම මත එම සංගමයේ නිලධාරීන් ලෙස ලියාපදිංචි කිරීමට විරුද්ධ ජාතික කම්කරු සංගමයේ නිලධාරින් විසින් එම ලියාපදිංචියට විරුද්ධව ඔවුන් අභියාචනාධිකරණයේ නඩුවක්ද ගොනුකර ඇති බව දැන ගන්නට ලැබුණ බවත්, එහිදී ජාතික කම්කරු සංගමයේ නීත්‍යනුකූල මහ සභාවෙන් පත් නිලධාරීන් ලෙස වසන්ත සමරසිංහ සහෝදරයා ඇතුළු කණ්ඩායම කටයුතු කරමින් සිටි බවත්, බදු ඔප්පු අත්සන් කිරීම සඳහා ඔවුන්ට එම විධායක සභාවෙන් බලය පවරා තිබුණ බවත්, ඒ අනුව විධායක සභාව වෙනුවෙන් මහින්දවංශ සහෝදරයා සමගින් අංක 207 දරන බදු ඔප්පුවට බදු ගැනුම්කරුවන් ලෙස අත්සන් කළ බවත්, එම මුදල් ගනුදෙනු කටයුතු සිදු කරනු ලැබුයේ සංගම් දෙකෙහි භාණ්ඩාගාරිකවරුන් බවත්ය

බදු දුන්නේ නීත්‍යනුකූලවයි
වසන්ත සමරසිංහ

2016 වර්ෂයේ දී නැෂනල් වර්කර්ස් කොන්ග්‍රස් වෘත්තීය සමිතියේ විධායක සභාවට පත්වීමෙන් අනතුරුව 2017.09.03 වන දින පවත්වන ලද විශේෂ මහ සභාවෙන් සභාපතිවරයා ලෙස තේරී පත්වී එදින පත්වූ විධායක සභාවේ යෝජනා ස්ථිරත්වයෙන් සභාපති ලෙස කොන්ග්‍රසයේ කටයුතු සිදුකළ බවත්, 2012 වර්ෂයේදී මෙම සංගමයේ හිටපු නිලධාරින් දෙදෙනෙක් වන ජෙරාඩ් ගුණරත්න සහ දයාජී අමරවංශ යන අය සංගමයේ නීත්‍යනුකූලව කැඳවූ මහ සභාවට විරුද්ධව ගල්කිස්ස දිසා අධිකරණයේ 1229/12 ීඡඛ යටතේ අධිකරණ වාර්ණ නියෝගයක් ලබා ගැනීමෙන් පසු එම වාරණ නියෝගයට එරෙහිව 2012 වර්ෂයේදී කොංග්‍රසයේ මහ සභාවෙන් පත්වූ නිලධාරි මණ්ඩලය අධිකරණයට කරුණු දැක්වීමෙන් පසු එම වාරණය ආපසු කැඳවීමට එරෙහිව මෙම හිටපු නිලධාරින් දෙදෙනා ගල්කිස්ස සිවිල් අභියාචනාධිකරණයේ උඡරැ්‍යක්‍ක්‍රැඵඑරැ41රැ12රැඛ් යටතේ එම නියෝගය බලරහිත කරන ලෙස කරන ලද ඉල්ලීම සිවිල් අභියාචනාධිකරණයෙන් ප්‍රතික්ෂේප කළ බවත්, පසුව එම සිවිල් අභියාචනාධිකරණයේ නියෝගයට එරෙහිවද මෙම හිටපු නිලධාරින්  යටතේ ශ්‍රේෂ්ඨාධිකරණයට සිදුකරන ලද ඉල්ලීම ඔවුන් විසින්ම 2013.04.19 වන දින මෝසමක් මගින් ඉල්ලා අස්කර ගැනීමෙන් අනතුරුව මොවුන් විසින් මෙහෙයවන ලද කොංග්‍රසයේ සාමාජිකයන් කිහිප දෙනෙක් 1249/12/ීඡඛ දරන අංකය යටතේ සංගමයේ නීත්‍යනුකූල නිලධාරීන්ට එරෙහිව වාරණ නියෝගයක් ඉල්ලා සිටි අතර එයද ගල්කිස්ස දිසා අධිකරණය විසින් ප්‍රතික්ෂේප කළ බවත්, ඒ සමගම කොළඹ දිසා අධිකරණයේ නඩු අංක 0074/14/ීඡඛ යටතේ කොංග්‍රසයේ හිටපු උප සභාපතිවරයකු වන එල් කුමාරසිංහ යන අය විසින් ඉල්ලා සිටි වාරණ නියෝගයද කොළඹ දිසා අධිකරණය ප්‍රතික්ෂේප කළ බවත්, ඒ අනුව 2012 වර්ෂයේදී මහ සභාවෙන් පත්වූ නිලධාරි මණ්ඩලය නීත්‍යනුකූල නිලධාරි මණ්ඩලය ලෙස අන්තර් සමාගම් සේවක සංගමය ඇතුළු වෘත්තීය සමිති ව්‍යාපාරය විසින් පිළිගෙන කටයුතු කරමින් බැංකු ඇතුළු මූල්‍ය ආයතන සහ සිය සේවා සපයන ආයතන ඔවුන් සමග කටයුතු ආරම්භ කළ බවත්, එහිදී තම සංගමයේ විධායක සභාවට පත්වන විටත් සංගමයේ නීත්‍යනුකූල නිලධාරි මණ්ඩලය ලෙස කිසිදු පාර්ශ්වයක් පැවති නඩු කටයුතු හේතුවෙන් කම්කරු දෙපාර්තමේන්තුව විසින් ලියාපදිංචි කර නොතිබූ බවත්, පසුව භඋක්‍ සභාපති ලෙස පත්වීමෙන් පසු අධිකරණය විසින් පිළිගත් කණ්ඩායම පසෙක තබා ව්‍යාජ පුද්ගලයන් පිරිසක් මෙම සංගමයේ නීත්‍යනුකූල නිලධාරින් ලෙස එවකට හිටපු කම්කරු අමාත්‍ය  සෙනෙවිරත්න මහතාගේ නියෝගයක් මත කම්කරු දෙපාර්තමේන්තුව විසින් හොර රහසේ 2017 වසරේදී ලියාපදිංචි කිරීමට කටයුතු කර තිබූ බවත්, එහිදී තම සංගමයේ දේපල භාරකාරිත්වය නීත්‍යානුකූලව පැවරී තිබෙන්නේ ලේකම්, සභාපති හා භාණ්ඩාගාරික යන අයවලුන්ට බවත්, කෙසේ වෙතත් තම සංගමයේ භාරකරුවකු ලෙස පෙනී සිටිමින් සංගමයට අයත් සීදුව හා පොල්ගහවෙල ප්‍රදේශවල පිහිටා තිබූ ඉඩම් කාර්යාල සහ නේවාසික ගොඩනැගිලි මෙම පැමිණිලිකරු ඇතුළු පුද්ගලයන් කිහිප දෙනෙකු විසින් අනීතිකව ව්‍යාජ ලේඛන සකසා විකිණීමට කටයුතු කර ඇති බවත්, එසේ අනීතික දේපල පැවරුම්වලට එරෙහිව කඩුවෙල දිසා අධකරණයේ 240/විශේෂ/14 යන නඩුව යටතේ පැමිණිලිකරුට එරෙහිව කොංග්‍රසයේ දේපලවලට අදාළව වාරණ නියෝගයක් ලබාගෙන ඇති බවත්, එහිදී මෙම නීති විරෝධී ලියාපදිංචියට එරෙහිව කොළඹ සිවිල් අභියාචනාධිකරණයේ ක්‍්රැ390රැ2017 යටතේ රිට් පෙත්සමක් ගොනුකර ඇති බවත්, එම වර්ෂයේදීම අපරාධ පරීක්ෂණ දෙපාර්තමේන්තුව වෙත පැමිණිල්ලක් ඉදිරිපත් කර ඇති බවත්, එමෙන්ම පැමිණිලිකරු ඇතුළු කොංග්‍රසයේ හිටපු නිලධාරින්ට එහෙිව කොංග්‍රසයට අයත් රුපියල් මිලියන 39කට අධික මූල්‍ය වංචාවක් සම්බන්ධයෙන් සංගමයේ ප්‍රධාන ලේකම් අමාලි කළුපහන මහත්මිය විසින් 2012 වර්ෂයේ සිදුකර ඇති පැමිණිල්ලට අදාලව විමර්ශන කටයුතු අවසන් කර නොමැති බවත්, 2012 වර්ෂයේ සිට ව්‍යාජ හේතු මත පවරන ලද නඩු කටයුතුවලට සංගමයේ නිලධාරින්ට මුහුණ පෑමට සිදුවීම තුළ කොංග්‍රසයේ ඇතිවූ මූල්‍ය අස්ථාවරත්වයත් ගොඩනැගිලි නඩත්තු කිරීමේ අවශ්‍යතාව මත 2014 වර්ෂයේ කොංග්‍රසයේ මහ සභාවෙන් ගත් තීන්දුවක් මත දෙහිවල ගොඩනැගිල්ලේ කොටසක් කුලී පදනම මත බදු දීම සිදුකර තිබූ බවත්, අදාළ බදු ගිවිසුම් සඳහා විටින් විට සංගමයේ විධායක සභාව විසින් යෝජනා සම්මතයකින් නම් කරන ලද නිලධාරින් කොංග්‍රසය වෙනුවෙන් අත්සන් තැබූ බවත්, ඒ අනුව 2020 දෙසැම්බර් මස 19 වන දින රැස්වූ සභා යෝජනා සම්මතයකට අනුව ඊට පෙර පැවති බදු ගිවිසුම් අහෝසි කිරීමටත්, යළි කොංග්‍රසයට අයත් දෙහිවල පිහිටි දෙමහල් ගොඩනැගිල්ලේ කොටසක් බදු දීමටත්, ඒ වෙනුවෙන් බදු ගිවිසුම් අත්සන් කිරීමටත් කොංග්‍රසයේ සභාපති ලෙසට හා උප සභාපති ලෙසට සිරිල් ආනන්ද සිරි යන අයත් විධායක සභාවෙන් පත්කළ බවත්, කොංග්‍රසයේ නීත්‍යානුකූලව පත්වූ සභාපති ලෙස කොන්ග්‍රසයේ ව්‍යවස්ථාවේ 12 වන වගන්තිය ප්‍රකාරව ලැබී ඇති බලය සහ කොංග්‍රසයේ විධායක සභාවේ තීරණයන් අනුව මෙම පැමිණිල්ලට අදාල බදු ගිවිසුම් සඳහාා 2020.02.10 දිනැති නීතිඥ එෆ්වයිඑච් ඉස්මයිල් මහත්මිය විසින් සහතික කර ඇති අංක 166 දරන බදු ඔප්පුව මගින් වසර 02කක කාලයක් සඳහා රු. 2,400,000.00 ක මුදලකට සහීඩ් අහමඩ් අස්කර් ඛාන් යන අය වෙත බදු දීමට කටයුතු කළ බවත්, එහිදී මෙම බදු ගැනුම්කරු විසින් බදු ලබාගත් කාලය අවසන් වීමට පෙර ඔවුන් එම ස්ථානයෙන් ඉවත්වීමට කටයුතු සිදුකිරීම හේතුවෙන් මෙම අංක 166 දරන බදු ඔප්පුව අවලංගු කිරීම සඳහා 2020.12.26 වන දින නීතිඥ එෆ්වයිඑච් ඉස්මයිල් මහත්මිය විසින් ලියා සකස් කර සහතික කරන ලද අංක 206 දරන ගිවිසුම යටතේ බදු ගිවිසුම අවසන් කිරීම සඳහා පළමු පාර්ශවය වෙනුවෙන් කොංග්‍රසයේ සභාපති ලෙසට සහ උප සභාපති සිරිල් ආනන්ද සිරි යන අයත් අත්සන් කර 2020.12.26 දිනයේදීම නීතිඥ එෆ්වයිඑච් ඉස්මයිල් මහත්මිය විසින් ලියා සකස් කර සහතික කරන ලද අංක 207 දරන බදු ගිවිසුම මගින් නැෂනල් වර්ක්ස් කොන්ග්‍රස් වෘත්තීය සමිතියේ සහෝදර වෘත්තීය සමිතියක නිලධාරි මණ්ඩලයේ කටයුතු සිදු කළ සේනක මහින්දවංශ ජයසිංහ සහ ගලගම ආරච්චිගේ රංජන් ජයලාල් පෙරේරා යන අයවලුන්ට වසර 03 කට මාසිකව රු.100,000 ක් බැගින් රු.3,600,000 ක මුදලකට බදු කුලිය මත ලබාදීම සඳහා බදු දීමනාකරු ලෙසට කොන්ග්‍රසයේ සභාපති ලෙසට සහ උප සභාපති ලෙස සිරිල් ආනන්ද සිරි යන අයත් මෙම අංක 166 සහ 207 දරන බදු ඔප්පුවල බදු දීමනාකරු ලෙසට තම නීත්‍යනුකූල අත්සන තැබූ බවටත්, එහිදී මෙම පැමිණිල්ල කොන්ග්‍රසයේ සත්‍ය ව්‍යවස්ථාව හෙළිදරව් නොකරමින් ව්‍යාජ ව්‍යවස්ථාවක් උපයෝගී කර ගනිමින් සිදු කර ඇති බවත්, මෙම ව්‍යාජ ලේඛන සම්බන්ධයෙන් නැෂනල් වර්කර්ස් කොන්ග්‍රස් වෘත්තීය සමිතියේ ප්‍රධාන ලේකම් ලෙස කටයුතු කරන අමාලි කළුපහන මහත්මිය විසින් සිදුකර ඇති ප්‍රකාශයේ සඳහන් කර ඇති මෙම කූඨ ලේඛන සකසා කොන්ග්‍රසයට අයත් දේපල අනීතිකව විකිණීමට අදාලව සීදුව සහ කුලියාපිටිය කොට්ඨාසය වෙත පැමිණිලි ඉදිරිපත් කර තිබෙන බවත්, ඒ අනුව 2017.09.03 දිනැති නැෂනල් වර්ක්ස් කොන්ග්‍රසයේ සභාපති ලෙස තේරී පත්වීමට අදාල මහ සභා රැස්වීම් වාර්තාවේ පිටපතක් සහ කොන්ග්‍රසයේ වර්තමාන නීත්‍යනුකූල ව්‍යවස්ථාවේ ඡායා පිටපතක් ඉදිරිපත් කරමින් ප්‍රකාශයක් සිදුකර ඇත.

දඩය ලක්ෂයයි
උපරිම දඬුවම අවුරුදු දෙකයි

‘ “බී” ගේ ළමයා වන “ඒ” විසින් විභාගයක් සඳහා අධ්‍යයන කටයුතු කරන ලෙස “බී” විසින් ලබාදෙන නියෝග අනුගමනය කිරීම ප්‍රතික්ෂේප කරයි. “බී” විසින් දඬුවමක් වශයෙන් “ඒ” ට බඳ පටියකින් පහර දෙයි. මෙම පහර දීම හේතුවෙන් “ඒ” ට ශාරීරික තුවාල සිදුවේ. “බී” විසින් ශාරීරික දඬුවම් කිරීමේ වරද සිදුකර ඇත.’

‘ළමා නිවාසයක රැක බලා ගන්නකු වන “ඒ” විසින් එම ආයතනයේ ළමයකු වන “බී” තවත් ළමයකුට හිරිහැර කිරීමක් නිරීක්ෂණය කරයි. දඬුවමක් වශයෙන් “ඒ” විසින් පැය ගණනක් තිස්සේ “බී” වෙත ආහාර ලබා නොදී සිටියි. “ඒ” විසින් ශාරීරික දඬුවම් කිරීමේ වරද සිදුකර ඇත.’

‘ගුරුවරයකු හෝ විදුහල්පතිවරයකු වන “ඒ” විසින් “බී” නමැති ළමයකු තවත් ළමයකුගේ දෙයක් සොරකම් කර ඇති ලෙස විශ්වාස කර “බී” පාසල් රැස්වීම් වේදිකාවට කැඳවා පාසල් ශිෂ්‍ය සමූහය ඉදිරිපිට දී “බී” සොරකු ලෙස ප්‍රකාශ කරමින් “බී” ට අවමන් කරයි. “ඒ” විසින් ශාරීරික දඬුවම් කිරීමේ වරද සිදුකර ඇත.’

‘විදුහල්පතිවරයා විසින්, අවුරුදු 16ක් වයසැති පාසල් ශිෂ්‍ය නායකයා වන “ඒ” ව සිසුන්ගේ නිළ ඇඳුම අධීක්ෂණය කිරීම සඳහා යොදවනු ලබයි. “ඒ” විසින් “බී” නමැති සිසුවා පාසල් නිළ ඇඳුම උල්ලංඝනය කරමින් ඇඳුම් ඇඳ සිටින බවට අනාවරණය කර ගනියි. “බී” ට කිසිදු ශාරීරික තුවාලයක් සිදු නොවේ. “ඒ” විසින් ශාරීරික දඬුවම් ලබාදීමේ වරද සිදුකර ඇත. ’

ඉහත සඳහන් නිදර්ශන ඇතුළත් වන්නේ මේ වනවිට ගුරු හා විදුහල්පති වෘත්තීය සමිතිවල හා සමාජයේ වෙනත් ක්ෂේත්‍රවල විරෝධයට හා සාකච්ඡාවට බඳුන් වී ඇති ආණ්ඩුව විසින් ඉදිරිපත් කර ඇති දණ්ඩ නීති සංග්‍රහය සංශෝධන පනත් කෙටුම්පතේය. එම නිර්දේශවලින් පෙන්නුම් කරන ආකාරයේ ක්‍රියාවන් මෙම සංශෝධනයය සම්මත වීමෙන් පසු දණ්ඩ නීති සංග්‍රහය යටතේ වන අපරාධ වරදවල් වන බවට පත්වන බව පෙනී යයි. ඉහත නිදර්ශනවල සඳහන් වුවත්, නැතත් ළමයින් සම්බන්ධයෙන් ශාරීරික හා මානසික දඬුවම් ලබාදීම හා අවමානයට පත් කිරීම සිදු නොකළ යුතු බවට විවාදයක් නැත.
මේ පිළිබඳව අදහස් දක්වමින් අධ්‍යාපන, උසස් අධ්‍යාපන හා වෘත්තීය අධ්‍යාපන ඇමතිවරියද වන අගමැතිනි ආචාර්ය හරිනි අමරසූරිය කියා ඇත්තේ, එම සංශෝධනය හිංසනයට එරෙහිව මිස ශික්ෂණයට එරෙහිව නොවන බවය. එය පාසල් විනය පවත්වා ගැනීමට එරෙහිව නොවන බවද, රජයට අවශ්‍ය දරුවන් හිරගෙවල්වලට යෑම නැවැත්වීම බවද කියා ඇත.

එමෙන්ම එම සංශෝධනය සම්බන්ධයෙන් විවිධ මතිමතාන්තර, වාද විවාද ඇතිවී තිබීම යහපත් දෙයක් බවද ඇය කියා ඇත.
එහෙත් මේ පිළිබඳ අදහස් දක්වන පිරිසකගේ අදහස වී ඇත්තේ ලෝකයේ රටවල් කිහිපයක පමණක් මේ ආකාරයයට නීති පවතින බවයි. ළමයින් සම්බන්ධයෙන් ඇත්තේ සිවිල් ළමාරක්ෂක හා පරිපාලන නීති බවයි.

කෙසේ වෙතත් එම සංශෝධනයේ ‘ළමයින් සම්බන්ධයෙන් ශාරීරිකව දඬුවම් කිරීම’ 308ආ (1) යටතේ සඳහන් කරන්නේ, වයස අවුරුදු දහඅටකට අඩු යම් තැනැත්තකුගේ භාරකාරත්වය, භාරය හෝ ආරක්ෂකත්වය දරා සිටිමින්-
දඬුවම් කිරීමේ ක්‍රියාමාර්ගයක් වශයෙන් හෝ නිවැරදි කිරීමේ ක්‍රමයක් වශයෙන්, කෙතරම් අඩු වුවද යම් ප්‍රමාණයක වේදනාවක් හෝ අපහසුතාවක් ඇතිවීමට හේතුවන බවට දැනුම ඇතිව ශාරීරික බලය භාවිත කරනු ලබන යම් ක්‍රියාවක් සිදුකරන හෝ කෙතරම් අඩු වුවද යම් ප්‍රමාණයක අවමානයක් ඇතිවීමට හේතුවන බවට දැනුම ඇතිව ශාරීරික නොවන යම් ක්‍රියාවක් සිදුකරන, කවර හෝ තැනැත්තකු ශාරීරික දඬුවම් කිරීමේ වරද සිදුකරනු ලබන බවයි.

ඒ ආකාරයට ළමයින් සම්බන්ධයෙන් ශාරීරික දඬුවම් කිරීමේ වරද සිදුකරන කවර හෝ තැනැත්තකු වරදකරු කරනු ලැබීමේ දී මාස හයක් නොඉක්මවන්නා වූ කාලයකට බන්ධනාගාරගත කිරීමකින් හෝ රුපියල් ලක්ෂයක් දක්වා දීර්ඝ කරනු ලැබිය හැකි දඩයකින් හෝ එම බන්ධනාගාරගත කිරීම සහ දඩය හෝ යන දෙකින්ම දඬුවම් කරනු ලැබිය යුතු බවයි.

එසේම එම වරද සිදුකරන ලද්දේ යම් තැනැත්තකු සම්බන්ධයෙන් ද ඒ තැනැත්තාට සිදුකරන ලද හානි වෙනුවෙන්, 2023 අංක 10 දරන අපරාධයක වින්දිතයන් සහ සාක්ෂිකරුවන් හට සහාය දීමේ සහ ආරක්ෂා කිරීමේ පනත යටතේ පිහිටුවන ලද අපරාධයක වින්දිතයන් සහ සාක්ෂිකරුවන් ආරක්ෂා කිරීම සඳහා වන ජාතික අධිකාරිය විසින් ගොනු කරනු ලබන වින්දිත බලපෑමේ ප්‍රකාශය සැලකිල්ලට ගෙන අධිකරණය විසින් නිශ්චය කරනු ලබන මුදලක වන්දියක් ඒ තැනැත්තාට ගෙවන ලෙස ද ආඥා කරනු ලැබිය හැකි බවයි.

රජයේ අධිකාරි ආයතනයක හෝ පුහුණු පාසලක, පාසල් නේවාසිකාගාරයක, ළමා නිවාසයක හෝ දිවා සුරැකුම් මධ්‍යස්ථානයක බාරයේ සිටින වයස අවුරුදු දහඅටකට අඩු යම් තැනැත්තකු සම්බන්ධයෙන් හෝ ශාරීරික වශයෙන් හෝ මානසික වශයෙන් අශක්නුතාවක් සහිත වයස අවුරුදු දහඅටකට අඩු යම් තැනැත්තකු සම්බන්ධයෙන්, ශාරීරික දඬුවම් කිරීමේ වරද සිදුකරන කවර හෝ තැනැත්තකුට වරදකරු කරනු ලැබීිමේ දී මාස හයකට නොඅඩු වූ ද අවුරුදු දෙකක් නොඉක්මවන්නාවු ද කාලයකට බන්ධනාගාරගත කිරීමකින් හෝ රුපියල් ලක්ෂයක් දක්වා දීර්ඝ කරනු ලැබිය හැකි දඩයකින් හෝ ඒ බන්ධනාගාරගත කිරීම සහ දඩය යන දෙකින්ම දඩුවම් කරනු ලැබිය යුතු බව එහි සඳහන් කරයි.

එසේම එම වරද සිදු කරන ලද්දේ යම් තැනැත්තකු සම්බබන්ධයෙන්ද, ඒ තැනැත්තාට සිදු කරන ලද හානි වෙනුවෙන්, 2023 අංක 10 දරන අපරාධයයක වින්දිතයන් සහ සාක්ෂිකරුවන් හට සහාය දීමේ සහ ආරක්ෂා කිරීමේ ජාතික අධිකාරිය විසින් ගොනු කරනු ලබන වින්දිත බලපෑමේ ප්‍රකාශය සැලකිල්ලට ගෙන අධිකරණය විසින් නිශ්චය කරනු ලබන මුදලක වන්දියක් ඒ තැනැත්තාට ගෙවන ලෙසද නියෝග කරනු ලැබිය හැකි බවද සඳහන් කරයි.

එසේ වුවද, වරදකරන ලද තැනැත්තා වයස අවුරුදු දහඅටකට අඩු තැනැත්තකු වන අවස්ථාවක දී, අධිකරණය විසින් මාස හයකට වඩා අඩු කාලයකට බන්ධනාාගාරගත කිරීමේ දඬුවමක් නියම කරනු ලැබිය හැකි බව වැඩිදුරටත් සඳහන් කරයි.
ඒ නිසා මෙම සංශෝධනය පාර්ලිමේන්තුවේ තමන්ට බහුතර බලයක් ඇති නිසා සම්මත කර ගත හැකිය යන මානසිකත්වයේ නොසිට ආණ්ඩුව කළ යුත්තේ ඒ සම්බන්ධයෙන් ගුරු විදුහල්පති සංගම්වල හා සමාජයේ ඇතිවී ඇති සංවාදය සමග සම්බන්ධ වී ඒවායෙන් මතුකරන කරුණු ද සලකා බලමින් එම සංශෝධනය සම්මත කිරීමට කටයුතු කිරීමය. එහෙත් අගමැතිවරියගේ ඉහත ප්‍රකාශය හැර ආණ්ඩුව පාර්ශ්වයෙන් එවැනි සූදානමක් ඇති බවක් මෙතෙක් පෙනෙන්නට නැත. ඔවුන් සිටින්නේ ඔවුන්ගේ සංශෝධනය වචනයකුදු වෙනස් කිරීමෙන් තොරව සිදුකළ යුතුය යන තත්වයකය.

‘කෝපා කමිටුවේදී ලබාදුන් සාක්ෂිවලට එරෙහිව පෞද්ගලික සමාගමක් ගෙන ඇති නීතිමය ක්‍රියාමාර්ග’ යනුවෙන් සැප්තැම්බර් 11 වැනිදා පැවති පාර්ලිමේන්තු රැස්වීමට වරප්‍රසාද ප්‍රශ්නයක් යොමු කර තිබුණේ රජයේ ගිණුම් කාරක සභාව හෙවත් කෝපා කමිටුවේ සභාපති, ජාතික ජන බලවේග හම්බන්තොට දිස්ත්‍රික් මන්ත්‍රී අරවින්ද සෙනරත් විසිනි. එම දිනට අදාළ හැන්සාඩ් වාර්තාව අනුව මේ ආකාරයට සඳහන් වේ.

‘ගරු කථානායකතුමෙනි, රජයේ ගිණුම් පිළිබඳ කාරක සභාව හමුවේ කරුණු ඉදිරිපත් කිරීම මත පෞද්ගලික ආයතනයක් විසින් පාර්ලිමේන්තු (බලතල හා වරප්‍රසාද) පනත උල්ලංඝනය කරමින් රජයේ නිලධාරිනියක වෙත එන්තරවාසියක් යොමු කිරීම, ඉන් අනතුරුව අභියාචනාධිකරණයේ අපහාස අයැදුම්පතක් ගොනු කිරීම හා කොළඹ දිසා අධිකරණයේ වන්දි නඩුවක් ගොනු කිරීම තුළින් රජයේ ගිණුම් පිළිබඳ කාරක සභාවේ සහ පොදුවේ පාර්ලිමේන්තුවේ වරප්‍රසාද උල්ලංඝනය කිරීම’ යනුවෙන් එය ඉදිරිපත් කර ඇති අතර ඒ යටතේ අංක 6ක් යටතේ කරුණු ඉදිරිපත් කර ඇත. ඒ මෙසේය.

01. කොළඹ මහ නගර සභාවේ 2022 හා 2023 වර්ෂවල විගණකාධිපති වාර්තාවල ඇතුළත් කරුණු සහ වර්තමාන කාර්ය සාධනය පරීක්ෂා කිරීම සඳහා 2025 පෙබරවාරි 25 දින රජයේ ගිණුම් පිළිබඳ කාරක සභාව රැස් කරන ලදි. එහිදී අනාවරණය වූ කරුණු පිළිබඳව වැඩිදුර පැහැදිලි කිරීම් ලබා ගැනීම සඳහා අදාළ කාල සීමාව තුළ කොළඹ මහ නගර සභාවේ නාගරික කොමසාරිස්වරියක ලෙස සේවය කරන ලද වර්තමානයේ රාජ්‍ය පරිපාලන, පළාත් සභා හා පළාත් පාලන අමාත්‍යාංශයේ අතිරේක ලේකම් ලෙස කටයුතු කරනු ලබන ආචාර්ය රෝෂණී දිසානායක මහත්මිය 2025 පෙබරවාරි 27 වන දින දෙවන දිනට රැස්වූ කාරක සභාව වෙත කැඳවන ලදි.

02. දැන්වීම් පුවරු ප්‍රදර්ශනය කිරීම තුළින් ආදායම් ලැබිය හැකි ස්වභාවයේ ව්‍යාපෘති වන බස් නැවතුම් පොළවල් සහ ඉසකකඉද්රාි, ග්‍රැන්ටි සංඥා පුවරු සහ සුහුරු වීදි පහන් යන ව්‍යාපෘති තුන රාජ්‍ය-පෞද්ගලික හවුල්කාරිත්ව අනුග්‍රාහක ව්‍යාපෘති ලෙස රිචඩ්සන් ටෙක්නොලොජීස් (පුද්ගලික) සමාගම වෙත ප්‍රදානය කිරීම සම්බන්ධව සිදු වී ඇති අක්‍රමිකතා පිළිබඳව කාරක සභාව විසින් එහිදී කරන ලද විමසීම් අනුව එම නිලධාරිනිය විසින් කාරක සභාව හමුවේ කරුණු පැහැදිලි කරන ලදි.

03. මෙම කරුණු දැක්වීම සම්බන්ධයෙන් රුපියල් බිලියනයක ගාස්තුවක් ගෙවන ලෙසත්, ඉදිරියේදී අදාළ සමාගම සම්බන්ධව අපහාසාත්මක ප්‍රකාශ කිරීමෙන් වළකින ලෙසත් දන්වා රිචඩ්සන් ටෙක්නොලොජීස් (පුද්ගලික) සමාගමේ උපදෙස් පරිදි නීතිඥ සහ නොතාරිස් ආර්එන්එස් ලිවේරා මහතා විසින් අතිරේක ලේකම්, ආචාර්ය රෝෂණී දිසානායක මහත්මිය වෙත 2025 අප්‍රේල් 21 දිනැතිව එන්තරවාසියක් යොමුකර ඇති අතර, ඒ සම්බන්ධව ඉදිරි පියවර ගන්නා ලෙස අංක RAR/COPA/05/14 හා 2025.05.14 දිනැති ලිපියෙන් ආචාර්ය රෝෂණී දිසානායක මහත්මිය විසින් රජයේ ගිණුම් පිළිබඳ කාරක සභාව වෙත ඉල්ලීමක් ඉදිරිපත් කරන ලදි.

04. ඉහත එන්තරවාසියේ අන්තර්ගතය හරහා පාර්ලිමේන්තුව හෝ පාර්ලිමේන්තු කාරක සභාවක් හමුවේ සාක්ෂි ලබා දුන් පුද්ගලයන්ට මුක්තිය සලසනු ලබන 1953 අංක 21 දරන පාර්ලිමේන්තු (බලතල හා වරප්‍රසාද) පනතේ 16 වැනි වගන්තිය අභියෝගයට ලක්කර ඇති බැවින්, රජයේ ගිණුම් පිළිබඳ කාරක සභාවේ උපදෙස් පරිදි ආචාර්ය රෝෂණී දිසානායක මහත්මිය වෙනුවෙන් ඉහත එන්තරවාසියට පිළිතුරු යැවීමට කටයුතු කරන ලෙස දන්වා පාර්ලිමේන්තුවේ මහ ලේකම්ගේ අංක PS/LEG/COPA/02/MC(10) 02 දරන ලිපිය 2025 ජුනි 04 දිනැතිව ගරු නීතිපතිතුමා වෙත යොමු කරන ලදි. ඒ සම්බන්ධව සිහි කැඳවීමේ ලිපියක්ද සමාංක හා 2025 ජූලි 24 දිනැතිව ගරු නීතිපතිතුමා වෙත යොමු කර ඇත.

05. 2025 පෙබරවාරි 27 වන දින පැවති රජයේ ගිණුම් පිළිබඳ කාරක සභාව ඉදිරියේ කරුණු දැක්වීම මත අදාළ සමාගම විසින් ඉන් අනතුරුව ඇයට එරෙහිව අභියාචනාධිකරණයේ අපහාස අයැදුම්පතක් ගොනු කිරීමටත්, කොළඹ දිසා අධිකරණයේ වන්දි නඩු ගොනු කිරීමටත් කටයුතු කර ඇත. අභියාචනාධිකරණයේ පවරන ලද අපහාස අයැදුම්පත සම්බන්ධයෙන් ඇය විසින් 2025.07.28 දිනැතිව කාරක සභාව දැනුවත් කර ඇති අතර එම ඉල්ලීම සලකා බලන ලද රජයේ ගිණුම් පිළිබඳ කාරක සභාව ඇය වෙනුවෙන් පෙනී සිටීමට නීතිපති වෙත දන්වා යැවීමට තීරණය කරන ලදි. ඒ අනුව පාර්ලිමේන්තුවේ මහ ලේකම්ගේ සමාංක හා 2025.08.05 දිනැති ලිපිය මගින් ඇය වෙනුවෙන් පෙනී සිටින ලෙස ගරු නීතිපතිතුමා වෙත දන්වා යවා ඇත. වන්දි නඩුව සඳහා ඇය වෙනුවෙන් පෙනී සිටින ලෙස රාජ්‍ය පරිපාලන, පළාත් සභා හා පළාත් පාලන අමාත්‍යාංශයේ ලේකම් HA/RAR/COPA/05/14 හා 2025.08.18 දිනැති ලිපිය මගින් ගරු නීතිපතිතුමා වෙත දන්වා ඇත.

06. රාජ්‍ය නිලධාරිනියක විසින් කාරක සභාවක් ඉදිරියේ කරන ලද කරුණු පැහැදිලි කිරීම පදනම් කරගෙන අධිකරණ ක්‍රියාමාර්ගවලට අවතීර්ණ වීම සඳහා කාරක සභාවක් හමුවේ සාක්ෂි ලබා දුන් පුද්ගලයන්ට මුක්තිය සලසනු ලබන ලබන 1953 අංක 21 දරන පාර්ලිමේන්තු (බලතල හා වරප්‍රසාද) පනතේ 16 වැනි වගන්තිය අභියෝගයට ලක් කිරීමකි. මෙය පාර්ලිමේන්තු කාරක සභා ක්‍රමවේදය තුළ අහිතකර පූර්වාදර්ශයක් බවට පත් විය හැකි බැවින් පාර්ලිමේන්තු ක්‍රියාවලියේ අඛණ්ඩතාව සහ ස්වාධීනත්වය ආරක්ෂා කිරීම සඳහා මෙම ගැටලුව ආචාර් ධර්ම සහ වරප්‍රසාද පිළිබඳ කාරක සභාව වෙත යොමු කොට රාජ්‍ය ගිණුම් පිළිබඳ කාරක සභාවේ හා අවසානයේ පාර්ලිමේන්තුවේ වරප්‍රසාද කඩ කිරීමට එරෙහිව සුදුසු පියවර ගැනීමට කටයුතු සලසන ලෙස කාරුණිකව ඉල්ලා සිටිමි.

ඒ අනුව එම වරප්‍රසාද ප්‍රශ්නය පාර්ලිමේන්තුවේ ආචාර ධර්ම හා වරප්‍රසාද පිළිබඳ කාරක සභාව වෙත යොමු කරන බව කථානායකවරයා දැනුම් දී ඇත.

මෙම වරප්‍රසාද ප්‍රශ්නය වැදගත් වන්නේ කෝපා කමිටුව වෙත කැඳවූ රාජ්‍ය නිලධාරිනියක ලබාදුන් සාක්ෂි මත ඇයට එරෙහිව එම සාක්ෂිවලට සම්බන්ධ පෞද්ගලික ආයතනයක් විසින් නඩු පැවරීමට එරෙහිව එම කමිටුවේ සභාපතිවරයා විසින්ම ඉදිරිපත් කර ඇති එකක් වන නිසාය. මේ ආකාරයට කෝපා කමිටුව හෝ පාර්ලිමේන්තුවේ වෙනත් කමිටුවක් හමුවේ හෝ සාක්ෂි දීම සඳහා කැඳවන රාජ්‍ය නිලධාරීන්ගේ සාක්ෂිවලට එරෙහිව අපහාස නඩු හෝ වෙනත් ආකාරයේ නඩු බාහිර ආයතන හෝ පුද්ගලයන් විසින් පවරන්නට ගියහොත් රාජ්‍ය මුදල් පිළිබඳ පාර්ලිමේන්තු බලය ක්‍රියාත්මක කරන්නට හැකි වන්නේ නැත.
කෝපා කමිටුව හමුවේ කරුණු දැක්වීම හේතුවෙන් එම රාජ්‍ය නිලධාරිනියට එරෙහිව එසේ පෞද්ගලික ආයතනයක් නඩු පැවරීම සඳහා හේතුව කුමක්ද යන්න විමසා බැලීම මෙහිදී වැදගත්ය.

රජයේ ගිණුම් පිළිබඳ කාරක සභාවේ හෙවත් කෝපා කමිටුවේ ලේකම් කාන්ති පීරිස් විසින් පාර්ලිමේන්තුවේ මහ ලේකම් වෙනුවට 2025 මාර්තු 03 දින සහිතව රාජ්‍ය පරිපාලන, පළාත් සභා හා පළාත් පාලන අමාත්‍යාංශයේ ලේකම්වරයාටත්, බස්නාහිර පළාත් සභාවේ ප්‍රධාන ලේකම්වරයාටත්, කොළඹ මහා නගර සභාවේ නාගරික කොමසාරිස්වරයාටත් ලිපියක් යොමු කරනු ලබයි. එහි උද්ධෘතය ලෙස සඳහන් කරන්නේ ‘කොළඹ මහා නගර සභාවේ 2022 හා 2023 වර්ෂයේ විගණකාධිපති වාර්තාවල ඇතුළත් කරුණු සහ වර්තමාන කාර්යසාධනය පරික්ෂා කිරීම’ යන්නය.

එම ලිපියේ සඳහන් කරන්නේ කොළඹ මහා නගර සභාවට අදාළව එම කරුණ සම්බන්ධයෙන් 2025.02.25 හා 27 දිනයන්හිදී පැවැත්වූ රජයේ ගිණුම් පිළිබඳ කාරක සභා රැස්වීම්වල කාර්ය සටහන් ඔවුන් වෙත ලැබීමට සලස්වන බව හා එහිදී කාරක සභාව විසින් ලබාදුන් නිර්දේශයන් කඩිනමින් ක්‍රියාත්මක කිරීම සඳහා එම ලිපිය සමඟ ඉදිරිපත් කරන බවයි.
එම ලිපිය අනුව කොළඹ මහා නගර සභාව සම්බන්ධයෙන් වන කරුණු 7ක් ගැන රජයේ ගිණුම් පිළිබඳ කාරක සභාව නිර්දේශ ලබාදී ඇති අතර ඉන් එකක් වන්නේ ග්‍රැන්ටි සංඥා පුවරු ව්‍යාපෘතියේ කාලය දීර්ඝ කිරීමේදී සිදුව තිබූ විෂමාචාරයන් සහ ීප්රඑ ීඑරුැඑ ඛසටයඑ ව්‍යාපෘතිය සම්බන්ධව රජයේ ගිණුම් පිළිබඳ කාරක සභාවේදී අනාවරණය වූ කරුණුය.

එම කරුණ සම්බන්ධයෙන් රජයේ ගිණුම් පිළිබඳ කාරක සභාව නියෝග තුනක් ලබාදී ඇති අතර ඉන් එකක් වන්නේ, ගාලු මුවදොර පිටිය ප්‍රදේශයේ දැන්වීම් පුවරු ප්‍රදර්ශනය කිරීම සඳහා නීතිමය ප්‍රතිපාදනවලට පටහැනිව ව්‍යාජ අත්සන් යෙදූ ඊ-මේල් පණිවිඩයක් මගින් අනුමැතියක් ලබාදී තිබීම (කූඨ ලේඛන සකස් කිරීම) සහ වීදි ලාම්පුවල පාලනය බාහිර පාර්ශ්වයක් අත පැවතීම මත ජාතික ආරක්ෂාව පිළිබඳ ගැටලු මතුවීම යන කරුණු සම්බන්ධයෙන් අපරාධ පරීක්ෂණ දෙපාර්තමේන්තුව වෙත පැමිණිල්ලක් ඉදිරිපත් කිරීමේ කටයුතු 2025.02.28 දින සිදුකරන ලෙසයි.

එහෙත් කොළඹ මහ නගර සභා බලධාරීන් මෙම සටහන ලියන මොහොත වනවිටත් එම නිර්දේශය අනුව අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කර නැත. අභාග්‍යය වන්නේ ජාතික ජන බලවේගය කොළඹ මහ නගර සභාවේ බලය ලබා ගැනීමෙන් පසුවවත්, එය සිදුවී නොතිබීමයි.

එම නිර්දේශවල දෙවැන්න වන්නේ, නාගරික භාණ්ඩාගාරිකවරිය ස්ථාන මාරුවී යෑමේදී එම නිලධාරිනිය සතුව පවතින මූල්‍ය වංචාවලට අදාළ තොරතුරු ඇතුළත් ලේඛන සියල්ල ලිඛිතව හා ආරක්ෂිතව නාගරික කොමසාරිස් වෙත භාරදෙන ලෙසයි.
තෙවැන්න, එම ගැටලුව සම්බන්ධව විගණන වාර්තා කෙටුම්පතේ සඳහන් කරුණු පිළිබඳව වර්තමාන තත්වය රජයේ ගිණුම කාරක සභාව වෙත වාර්තා කරන ලෙසයි.

එම නිර්දේශයන්ට පාදක වූ 2025 පෙබරවාරි 27 වැනිදා පැවැත්වූ රජයේ ගිණුම් පිළිබඳ කාරක සභාවේදී බස් නැවතුම් දැන්වීම් පුවරු ව්‍යාපෘතිය, ග්‍රැන්ටි සංඥා පුවරු සහ Smart Street Light යන ව්‍යාපෘති සම්බන්ධ ගැටලු ලෙස එය සාකච්ඡාවට ලක්කර ඇත.

එහිදී අනාවරණය වී ඇත්තේ එකම සමාගමකට අයත්, එකම අධ්‍යක්ෂ මණ්ඩලයකින් සමන්විත, එහෙත් නමින් පමණක් එකිනෙකට වෙනස් ආයතන 03කට එම කොන්ත්‍රාත් 03 ලබාදී ඇති බවයි.

එහිදී විගණකාධිපතිවරයා පෙන්වා දී ඇත්තේ Smart Street Light ව්‍යාපෘතිය ප්‍රදානය කර ඇති ආයතනය එම කාර්යය සඳහාම අලුතෙන් ඇතිකර ඇති ආයතනයක් බැවින් ලංසු ඇගැයීමේදී සමාගම් සමූහයේ පළපුරුද්ද එම ආයතනයට අදාළ කර තිබීම නිවැරදි නොවන බවයි.

එම ව්‍යාපෘතිය තුළින් අධි ආරක්ෂක කලාප පවා ආවරණය වන පරිදි ක්‍ක්‍ඔඪ කැමරා සවි කිරීමට අවස්ථාව සලසා දීම සහ එමඟින් එක්රැස් කරනු ලබන දත්තවලට ප්‍රවේශ පහසුකම් පෞද්ගලික ආයතනයක් සතුවීම හේතුවෙන් ජාතික ආරක්ෂාවට බලපෑමක් සිදුව තිබීම පිළිබඳව කාරක සභාව නගර සභා නිලධාරීන්ගෙන් කරුණු විමසා තිබේ.

කොළඹ නගරයේ වීදි ලාම්පු 12,000ක් සුහුරු ලාම්පු බවට හරවා ප්‍රධාන පාලන මධ්‍යස්ථානයක් හරහා එම පද්ධතිය පාලනය කිරීමේ අරමුණින් ආරම්භ කළ එම ව්‍යාපෘතිය සඳහා ලංසු කැඳවීමේදී ව්‍යාපෘතිය සඳහා අමතර විකල්ප යෝජනා ඉදිරිපත් කිරීම සඳහා ලංසුකරුවන් වෙත අවස්ථාව ලබාදී තිබූ බවත්, ඒ අනුව මහා නගර සභාවට අමතර වියදමකින් තොරව වීදි පහන් කණුවල ක්‍ක්‍ඔඪ කැමරා 200ක් සවි කිරීම සඳහා තෝරාගත් ආයතනය විසින් ඉදිරිපත් කළ යෝජනාව අනුව එය ලබාදුන් බවත්, එම ක්‍ක්‍ඔඪ කැමරා මගින් ලබාගන්නා දත්ත කොළඹ මහා නගර සභාව සතු පාලන මධ්‍යස්ථානයක ගබඩා වන බවත් නගර සභා නිලධාරින් එහිදී ප්‍රකාශ කර ඇත. එම දත්තවල අයිතිය මහා නගර සභාව සතුවන බවත්, සකසන ලද දත්ත පමණක් වාණිජමය අරමුණු සඳහා එම ආයතනය වෙත ලබාදෙන බවත්, ආරක්ෂක තත්වය සම්බන්ධයෙන් පවතින නීතිමය ප්‍රතිපාදනවලට යටත් වන පරිදි එම ගිවිසුම අත්සන් කර ඇති බවත් වැඩිදුරටත් ප්‍රකාශ කර ඇත.

එමෙන්ම කොළඹ නගරයේ විදුලි රථවාහන සංඥා නියාමනය කිරීම සඳහා එවැනි ක්‍ක්‍ඔඪ කැමරා පද්ධතියක පැවති අවශ්‍යතාව, නගර සභාවට ඒ සඳහා අමතර වියදමක් දැරීමට නොමැති වීම සහ ව්‍යාපෘතියෙන් එම ආයතනයට ලැබෙන මුළු පිරිවැටුමෙන් 5%ක් නගර සභාව වෙත ලබාදීමට එකඟවීම යන කරුණු සලකා එම විකල්ප යෝජනාව පිළිගැනීමට නගර සභාව එකඟ වී ඇති බවද එහිදී කියා ඇත.

එහෙත් කාරක සභාවේදී අනාවරණය වී ඇත්තේ නගර සභාවට වියදම් රහිත ව්‍යාපෘතියක් ලෙස සඳහන් කර තිබුණද පසුව වීදි පහන් කණුවල නඩත්තු වියදම් කොළඹ මහා නගර සභාව විසින් දැරීමට එකඟ වී ඇති බවයි.

එහිදී එම ව්‍යාපෘතිය සම්බන්ධයෙන් අදහස් දක්වමින් වර්තමානයේ නඩුවලට මුහුණ දී සිටින කොළඹ මහා නගර සභාවේ හිටපු නාගරික කොමසාරිස් රෝෂණී දිසානායක ප්‍රකාශ කර ඇත්තේ, නගර සභා ආඥා පනතේ කොන්දේසිවලට එරෙහි වන ලෙස හා අදාළ සමාගමට වාසිදායක වන ආකාරයට එම ව්‍යාපෘතිය සිදුකර ඇති බවයි. එමෙන්ම එම ව්‍යාපෘතියෙන් කොළඹ මහා නගර සභාවට රුපියල් බිලියන 2.45ක පාඩුවක් සිදුවන බවට හිටපු නාගරික භාණ්ඩාගාරික වාර්තා කර ඇති බවද, එම ගිවිසුමේ ඇතැම් කොන්දේසි පවතින නීති ප්‍රතිපාදනවලට පටහැනි බව නිරීක්ෂණය කළ බැවින් ගිවිසුම සංශෝධනය වියයුතු බවට සභාව දැනුවත් කළ බවද කියා ඇත.

තවද, එම ව්‍යාපෘතිය සඳහා කේබල් යෙදීමේදී මාර්ගය කැඩීම සම්බන්ධව අදාළ සමාගම විසින් මහා නගර සභාවට ගෙවිය යුතු රුපියල් මිලියන 80ක මුදල ගෙවීමෙන් නිදහස් කරන ලෙස ඉල්ලීමක් ඉදිරිපත් වූ බවත්, එය අනුමත කිරීම ප්‍රතික්ෂේප කළ බවත් හිටපු නාගරික කොමසාරිස්වරිය කාරක සභාව හමුවේ පවසා ඇත. එමෙන්ම ඒ හේතුවෙන් එම සමාගමේ නිලධාරියකු විසින් කොළඹ නගරයේ විදුලි පහන් නිවා දමන බවට තමා වෙත තර්ජනය කළ බව ප්‍රකාශ කර ඇත. එම ව්‍යාපෘතියට අදාළව ජනාධිපති ලේකම් කාර්යාලය පිහිටි ප්‍රදේශයේ වීදි පහන්වල පාලනය එවකට එම සමාගම සතුව පැවති බවට තහවුරු වූ බවත්, ඒ අනුව ජාතික ආරක්ෂාව පිළිබඳ ගැටලුවක් ඇති වන බැවින් ඒ සම්බන්ධයෙන් පොලිස්පතිවරයා දැනුවත් කළ බවත් ඇය වැඩිදුරටත් කියා ඇත.

ජනාධිපති ලේකම් කාර්යාලය ඉදිරිපස එල්ඊඩී වෙළඳ දැන්වීම් ප්‍රදර්ශනය කිරීම සඳහා මෙම සමාගම වෙත අවසර ලබාදීමට නගර සභාව එකඟ වී තිබූ බවත්, නීති ප්‍රතිපාදන අනුව එම ප්‍රදේශය වෙළඳ දැනවීම් පුවරු ප්‍රදර්ශනය කළ නොහැකි බැවින් තමා ඊට විරෝධය දැක්වූ බවත්, එම සමාගම විරෝධය නොතකා එම ප්‍රදේශයේ කැනීම් කටයුතු කිරීමට උත්සාහ දැරූ බවත්, එය එවක ජනාධිපතිවරයාගේ නිරීක්ෂණයට ද ලක්වීමෙන් අනතුරුව පොලීසිය මැදිහත්ව එය නතර කළ බවත්, එසේම එම ව්‍යාපෘතියේ කටයුතුවලට බාධා කරන බවට චෝදනා කරමින් එම සමාගම තමාට එරෙහිව පෞද්ගලික වනසේ නඩුවක් පැවරූ බවත් හිටපු නාගරික කොමසාරිස්වරිය පවසා ඇත.

ඊට අමතරව සභාවේ විධිමත් අනුමැතියකින් තොරව ව්‍යාජ අත්සනක් යෙදූ ඊමේල් පණිවිඩයක් මගින් එම රිචඩ්සන් සමාගම වෙත රුපියල් බිලියන ගණනක් වටිනා ව්‍යාපාරයක් සඳහා අනුමැතියක් ලබාදී ඇති බව රහසිගතව සිදුකරන ලද විමර්ශනයකින් අනාවරණය කරගත් බවත්, එම අත්සන් ව්‍යාජ අත්සන් බවට රස පරීක්ෂක දෙපාර්තමේන්තුව හරහා තහවුරු කරගත් බවත් හිටපු නාගරික කොමසාරිස්වරිය ප්‍රකාශ කර ඇත. තමා විදේශගත වන විට එම ලේඛන නිලධාරියකු වෙත ලබාදුන් බවත්, ඒ සම්බන්ධව විධිමත් පරීක්ෂණයක් සිදුකර සුදුසු පියවරක් ගන්නා ලෙසත් ඉල්ලීමක් කර ඇත.

එම ව්‍යාපෘතිය සම්බන්ධයෙන් වන මූල්‍ය විමර්ශන සිදුකිරීම සඳහා වර්තමාන නාගරික භාණ්ඩාගාරික විසින් විවිධ තර්ජන මැද විශාල සහායක් ලබාදුන් බව ප්‍රකාශ කර ඇති හිටපු නාගරික කොමසාරිස්වරිය ඒ වනවිට එම නිලධාරිනිය වෙත ස්ථාන මාරුවක් ලබාදී ඇති බැවින් ඇය සතුව පවතින මූල්‍ය වංචාවලට අදාළ වැදගත් තොරතුරු සහිත ලේඛන සුරක්ෂිත කිරීමට පියවරක් ගන්නා ලෙසද වැඩිදුරටත් ඉල්ලීමක් කර ඇත.

එමෙන්ම ගාලු මුවදොර ප්‍රදේශයේ වෙළඳ දැන්වීම් ප්‍රචාරණය සඳහා අවසර ලබාදීමක් සිදුකර නැති බව කොා්පා කමිටුවේදී නාගරික කොමසාරිස් (ඉංජිනේරු සේවා) ප්‍රකාශ කර තිබේ.

2010 වර්ෂයේදී ආරම්භ කළ ග්‍රැන්ටි සංඥා පුවරු ව්‍යාපෘතිය 2018 වර්ෂයේදී නැවත ලංසු කැඳවීමකින් තොරව රිචඩ්සන් ආයතනය වෙතම තවත් වසර 03කට ලබාදීම සිදුකර තිබේ. 2015 වර්ෂයේදී නිවාස හා ගොඩනැගිලි වරිපනම් අංක පුවරු සවි කිරීමේ ව්‍යාපෘතියක් සඳහා ලංසු කැඳවා ඇති අතර එහිදී රිචඩ්සන් එම වරිපනම් අංක පුවරු නොමිලේ සකසා දීමේ විකල්ප යෝජනාවක් ඉදිරිපත් කර ඇති අතර ඒ අනුව නගර සභා බලධාරින් ග්‍රැන්ටි සංඥා පුවරු ව්‍යාපෘතිය ලංසු කැඳවීමකින් තොරව රිචඩ්සන් සමාගම වෙත දීර්ඝ කර ලබාදී තිබේ.

එම ව්‍යාපෘති 02 සම්පූර්ණයෙන් එකිනෙකට වෙනස් විෂය පථයන් යටතේ ගැනෙන ව්‍යාපෘති වන බැවින්ද, මුල් ව්‍යාපෘතිය වන ග්‍රැන්ටි සංඥා පුවරු ව්‍යාපෘතිය යටතේ ගිවිසුම්ගත කටයුතු ඒ වනවිටත් නිමවී නොතිබූ හෙයින්ද, එලෙස කොන්ත්‍රාත් ප්‍රදානය කර තිබීම ප්‍රසම්පාදන මාර්ගෝපදේශවලට පටහැනි බව කෝපා කමිටුවේ මතය වී ඇත. එමෙන්ම කෝපා කමිටුව නිරීක්ෂණය කර ඇත්තේ එය අනෙකුත් තරගකාරී ඉල්ලුම්කරුවන් වෙත සාධාරණ අවස්ථාවක් අහිමි කිරීමක් බවයි.

කෝපා කමිටුවේ නිර්දේශ හා සාකච්ඡාවට ලක්වූ කරුණු එසේ තිබියදී, මුලින් තොතිබූ වීදි පහන් කණුවල නඩත්තු වියදම් පසුව ගෙවීමට තීරණය කිරීමේ පදනම යටතේ එම සමාගමට අමතර ගෙවීමක් කිරීමට නව නගරාධිපති වායි කැලි බල්තසාර්ටනගර සභා බලධාරින් යොමු කර තිබූ අතර ඒ සම්බන්ධයෙන් වන අපගේ වාර්තාකරණයක් හේතුවෙන් එය නැවතී ඇති බව මීට පෙර දැනගන්නට ලැබුණි.

කෝපා කමිටුවේ සභාපතිවරයා පාර්ලිමේන්තුවට ඉදිරිපත් කළ වරප්‍රසාද ප්‍රශ්නයේ කරුණු එසේ වුවද කොළඹ නගරයේ ඇති රිචඩ්සන් සමාගමට අයත් ග්‍රැන්ටි සංඥා පුවරුවල මෙම ආණ්ඩුවේ ‘ක්ලීන් ශ්‍රී ලංකා’ ව්‍යාපෘතියට අයත් ප්‍රචාරයන් නොමිලේ සිදුකර තිබේ. ඒ ක්ලීන් ශ්‍රී ලංකා ව්‍යාපෘතියේ රිචඩ්සන් සමාගම හවුල්කරුවන් බව සඳහන් කරමිනි. එහි තේරුම වන්නේ ජාතික ජන බලවේගයේ කෝපා කමිටු සභාපතිවරයා වරප්‍රසාද ප්‍රශ්නයක් නඟන එම සමාගම කොළඹ මහ නගර සභාවේ සම්බන්ධයටත් ඉහළින් ගොස් දැන් ආණ්ඩුව සමඟ කටයුතු කරමින් සිටින බවයි.

දූෂිත ගනුදෙනු ක්ලීන් කිරීමද ක්ලීන් ශ්‍රී ලංකා යටතේ සිදුකළ යුතු එකකි. පාර්ලිමේන්තුවේ වරප්‍රසාද ප්‍රශ්නයෙන් ඔබ්බට ගොස් කෝපා කමිටු නිර්දේශ ක්‍රියාත්මක කිරීම වෙනුවෙන්ද ජාතික ජන බලවේග ආණ්ඩුව පෙනී සිටිය යුතුය. එමෙන්ම දූෂිත ගනුදෙනුවල නිරතවූවන් ආණ්ඩුවේ ව්‍යාපෘතිවලට සම්බන්ධකර ගැනීම සම්බන්ධයෙන් ආණ්ඩුව සිය ස්ථාවරය පැහැදිලි කිරීමක්ද කළ යුතුය.