■ අනුරංග ජයසිංහ

ශ්‍රී ලංකාවේ වාහන ආනයනකරුවන් රුපියල් බිලියන 5.2ක් පමණ වටිනා ණයවර ලිපි විවෘත කර තිබියදී, ඒවා නොතකමින් 2020 මාර්තු මාසයේ සිට වාහන ආනයනය නැවැත්වූ රජයක් දැන් ණයවර ලිපි විවෘත කර හමාර බව කියමින් සුඛෝපභෝගී වාහන ආනයනය කිරීමට උත්සාහ ගැනීම ගැන ශ්‍රී ලංකා වාහන ආනයනකරුවන්ගේ සංගමය විරෝධය දක්වයි.

නිවේදනයක් නිකුත් කරමින් එම සංගමය සඳහන් කර ඇත්තේ මීට පෙර හදිසියේ වාහන ආනයනය නතර කිරීමේ තීන්දුව ආණ්ඩුව ගත් මොහොතේ ශ්‍රී ලංකාවේ වාහන ආනයනකරුවන් විශාල පිරිසක්ද ණයවර ලිපි විවෘත කර තිබුණු බවත්, ආනයන තහනම නිසා ඒ සියලුදෙනා අපහසුතාවට පත් වූ බවත්ය. ණයවර ලිපි විවෘත කර ඇති ආනයන සඳහා අවසර ලබා දෙන ලෙස තම සංගමය එම කාලසීමාවේ ඉල්ලුවද, එයට අවසර නොලැබුණු බව එම නිවේදනයෙන් පෙන්වා දී තිබේ.

එම කාලසීමාවේ තම සංගමයේ සාමාජිකයන් විවෘත කර තිබුණු රුපියල් බිලියන 5.2ක් වටිනා ණයවර ලිපි 216ක් අත්හැර දැමූ බවත්, එයින් තම සංගමයේ සාමාජිකයන්ගේ ව්‍යාපාර සම්බන්ධතාවලට හානි සිදු වූ බවත් එම සංගමය පෙන්වාදෙයි. පෞද්ගලික වාහනවලින් ගමනාගමනය අත්‍යවශ්‍ය වූ කාලසීමාවක රජය වාහන ආනයනය සීමා කළ බවත්, එලෙස ආනයනය සීමා කිරීමෙන් පසු පාවිච්චි කළ වාහනවල මිල ගණන් විශාල වශයෙන් ඉහළ ගොස් වාහන මිලදී ගැනීමට බලාපොරොත්තු වූ පාරිභෝගිකයන් අපහසුතාවට පත් වූ බවත් එම නිවේදනයේ සඳහන්ය.

සුඛෝපභෝගී ටොයොටා ලෑන්ඩ් කෲසර් රථ 227ක් ඇතුළු වාහන 400ක් බදු සහන ලබාදෙමින් ආනයනය කිරීමට රජය පසුගිය කාලසීමාවේ උත්සාහ ගත් අතර ඒ සඳහා මැයි 18 වැනිදා කැබිනට් පත්‍රිකාවක්ද ඉදිරිපත් කර තිබුණි.

කෙසේ වෙතත් එම කැබිනට් පත්‍රිකාවට විරෝධය එල්ල වූ නිසා මැයි 24 වැනිදා කැබිනට් මණ්ඩල රැස්වීමේදී එම කැබිනට් පත්‍රිකාව සම්මත කර නොගැනීමට තීන්දු කළේය.

කෙසේ වෙතත් ඉන්පසු ජනමාධ්‍ය අමාත්‍ය කෙහෙළිය රඹුක්වැල්ල ප්‍රකාශ කර තිබුණේ වාහන ආනයන සඳහා අප්‍රේල් මාසයේදී ලංකා බැංකුව වාහන ආනයන සඳහා රුපියල් බිලියන 3.7ක් වටිනා ණයවර ලිපි විවෘත කර හමාර නිසා දැන් ආනයනය නතර කළ නොහැකි බවය.

එයට පුළුල් විරෝධයක් එල්ලවීමෙන් පසු ජුනි 11 වැනිදා ජනමාධ්‍ය අමාත්‍යවරයා කියා තිබුණේ අදාළ ආයතන සමඟ සාකච්ඡා කිරීමෙන් පසු ආනයනය කිරීමට නියමිතව තිබුණු වාහන අතරින් ලෑන්ඩ් කෲසර් 227ක ප්‍රමාණය ආනයනය පමණක් අත්හිටුවීමට එකඟ වූ බවය. ඒ අනුව ටොයොටා හයිලුක්ස් ඩබල් කැබ් 17ක්, ටොයොටා ලෑන්ඩ් කෲසර් වී8 රථයක්, ටොයොටා හයිලුක්ස් ඉන්ටකූලර් රථ 51ක් සහ ටොයොටා ඇම්බියුලන්ස් රථ 50ක් ආනයනය කිරීමට නියමිතය.■

■ අනුරංග ජයසිංහ

චීන රජය ශ්‍රී ලංකාවේ ප්‍රජාතන්ත්‍රවාදය ආපස්සට ගෙනයෑම සඳහා සහයෝගය දක්වන බව ඇමෙරිකානු කොංග්‍රසයේ විදේශ සම්බන්ධතා පිළිබඳ කමිටු සාකච්ඡාවකදී ඇමෙරිකානු රාජ්‍ය දෙපාර්තමේන්තුව වෙනුවෙන් අදහස් දක්වමින් එම දෙපාර්තමේන්තුවේ මානව හිමිකම් පිළිබඳ නිලධාරියෙකු වන ස්කොට් බස්බි ප්‍රකාශ කර ඇත.

ජුනි 09 වැනිදා විදේශ සම්බන්ධතා පිළිබඳ කමිටුවේ ආසියා-පැසිෆික් කලාපය පිළිබඳ අනුකමිටුව, කලාපයේ මානව හිමිකම් පිළිබඳ පැවැත්වූ සාකච්ඡාවේදී ඔහු ඒ බව ප්‍රකාශ කර ඇත.

එහිදී ඔහු වැඩිදුරටත් ප්‍රකාශ කර ඇත්තේ චීනය කලාපයේ මානව හිමිකම්වලට එරෙහි ක්‍රියාකාරකම් ප්‍රවර්ධනයට මැදිහත් වෙන බවය. හොංකොං පාලනය බිඳදැමීම, මියන්මාරයේ මිලිටරි කුමන්ත්‍රණයට සහයෝගය දීම, උතුරු කොරියාවට ආර්ථික සහයෝගය දීම චීනය සිදු කළ බවත් ශ්‍රී ලංකාවේ ප්‍රජාතන්ත්‍රීය පාලනය කඩාවැටීමට චීනය සහයෝගය දක්වන බවය. එවැනි රටවල මානව හිමිකම් වෙනුවෙන් මැදිහත්වීම ප්‍රජාතන්ත්‍රවාදයට වැදගත් වෙනවා මෙන්ම උපායමාර්ගික වශයෙන්ද ඇමෙරිකාවට වාසිදායක වන බව ඔහු කියා ඇත. එම රටවල ජනතාව තමන්ගේ රටවල රජයන්ගේ වගවීම වර්ධනය කිරීමට දිරිමත් වීම ඇමෙරිකාවට ආර්ථික සම්බන්ධතා අතින්ද වාසිදායක වන බවද, ඇමෙරිකා එක්සත් ජනපදය එක්සත් ජාතීන්ගේ මානව හිමිකම් කවුන්සිලය සමඟ වැඩි වශයෙන් ගනුදෙනු කරන බවද, ශ්‍රී ලංකාවට අදාල කවුන්සිල කමිටුවට නැවත සම්බන්ධ වීම ඊට උදාහරණයක් බවද ඔහු කියා ඇත.

එම සාකච්ඡාවේදී අදහස් දැක්වූ ඇමෙරිකානු රාජ්‍ය දෙපාර්තමේන්තුවේ දකුණු ආසියානු කලාපය පිළිබඳ නිලධාරී ඩීන් තොම්ප්සන් මෙසේ පවසා ඇත.

‘ශ්‍රී ලංකාව ආසියාවේ පැරණිම ප්‍රජාතන්ත්‍රවාදය. එරට මැතිවරණ විශාල වශයෙන් සාධාරණ, නිදහස් සහ ප්‍රචණ්ඩකාරීත්වයෙන් තොර මැතිවරණ. ඉතිහාසයේ යම් ගැටලු තිබුණත්. අප ශ්‍රී ලංකාවේ ප්‍රජාතන්ත්‍රවාදීව පත් වූ නායකයන් සමඟ කටයුතු කිරීමට බැඳී සිටිනවා. එහෙත් එරට රාජ්‍ය පරිපාලන කටයුතු සඳහා මිලිටරිමය මැදිහත්වීම් වැඩි වීම සහ සිවිල් සමාජය සීමා කිරීම අභියෝගයක්.

චීන රජය තමන්ගේ ආර්ථික ශක්තිය සහ ලිහිල් බලයක් පාවිච්චි කරමින් කුඩා රටවල කටයුතුවලට මැදිහත්වෙනවා. කුඩා රටවල් වැඩි වශයෙන් මෙම බලපෑමට යටත්. දකුණු ආසියානු රටවල දේශපාලන බලවතුන්ගේ වුවමනාවන් සහ චීනයේ ආර්ථික වුවමනා එකිනෙකට ගැටගැහෙනවා. විශාල වශයෙන් පැතිර ගිය දේශපාලන සහ ආර්ථිකය දූෂණය මේ තත්වය ශක්තිමත් කරනවා. වෙනත් විකල්ප ආර්ථික මූලාශ්‍ර නැති නිසා ආර්ථික වශයෙන් චීන රජය මත යැපෙන දේශපාලන වටපිටාවක් නිර්මාණය වී තිබෙනවා. චීනය සමඟ දක්වන ආර්ථික සම්බන්ධතා නිසා බොහෝ රටවල ස්වාධීනත්වය සහ ආර්ථික වශයෙන් නිදහස් බව සීමා වී තිබෙනවා.

මෙයට ප්‍රතිචාර ලෙස ඇමෙරිකානු රජය උපක්‍රමික කටයුතු ගණනාවක් කරනවා. දකුණු ආසියාවේ කටයුතු සඳහා යූඑස්ඒඩ් සහ ඇමෙරිකානු රජය 2020 වර්ෂයේදී ඇමෙරිකානු ඩොලර් මිලියන 69ක් වැය කර තිබෙනවා.

බංග්ලාදේශය, භූතානය, මාලදිවයින, නේපාලය සහ ශ්‍රී ලංකාව වෙනුවෙන් දකුණු ආසියානු පරිපාලන වැඩසටහන යටතේ තවත් ඇමෙරිකානු ඩොලර් මිලියන 14ක් වැය කර තිබෙනවා. ප්‍රජාතන්ත්‍රවාදය ශක්තිමත් කිරීම, සිවිල් සමාජයේ සහභාගීත්වය වැඩි කිරීම මෙම වැඩසටහන්වල අරමුණ. දූෂණයට මෙන්ම විදේශ රටවල අනවශ්‍ය මැදිහත්වීම්වලට එරෙහි මහජන ප්‍රතිචාර ඉහළ නැංවීම එම වැඩසටහන්වල අරමුණ.’■

■ ඉඳුවර බණ්ඩාර

වී සහල්, සීනි, කිරිපිටි සහ බඩඉරිගු ගබඩා කිරීම සම්බන්ධයෙන් සියළු කරුණු දින හතක කාලයක් තුළ පාරිභෝගික කටයුතු පිළිබඳ අධිකාරියේ ලියාපදිංචි කරන ලෙස නියෝග පනවා ඇත.

ඒ අනුව සහල් නිෂ්පාදකයකු, වී හෝ සහල් රැස්කරන්නකු, ගබඩාකරුවකු, බෙදාහරින්නකු හෝ වී හෝ සහල් තොග වෙළෙන්දකු විසින් ඔවුන් සන්තකයේ, භාරයේ හෝ පාලනයේ ඇති සහල් ගුදම්, සයිලෝ, ගබඩා, බහලුම් හෝ වෙනත් සථාන පාරිභෝගික අධිකාරියේ දින 7ක් ඇතුලත ලියාපදිංචි කළ යුතු අතර ඒවාහි ඇති වී හෝ සහල් තොග පිළිබඳ විස්තරද ලබාදිය යුතුය.

මේ ආකාරයටම සීනි හා කිරිපිටි ආනයනකරුවන්, නිෂ්පාදකයින්, ගබඩාකරුවන්, රැස්කරන්නන්, බෙදාහරින්නන් හා තොග වෙළෙන්දන් ලියාපදිංචි වීම සහ සීනි හා කිරිපිටි පිළිබඳ තොරතුරු පාරිභෝගික කටයුතු පිළිබඳ අධිකාරියට ලබාදිය යුතුය.

බඩ ඉරිගු රැස්කරන්නන්, ගබඩාකරුවන්, බෙදාහරින්නන් හා තොග වෙළෙන්දන්ද ඉහත සඳහන් සිය තොරතුරු සමඟ පාරිභෝගික කටයුතු අධිකාරියේ ලියාපදිංචි විය යුතුය.

එසේ වුවද වී වගාකරුවකු හෝ බඩඉරිගු වගාකරුවකු සිය අස්වැන්න ගබඩා කර තබා ගැනීම ඊට අයත් වන්නේ නැත.

මීට අදාල නියෝග පාරිභෝගික අධිකාරියේ සභාපති විශ්‍රාමික මේජර් ජෙනරාල් ශාන්ත දිසානායක ජුනි 11 දින අංක 2231/23, 2231/24 හා 2231/25 යන අති විශේෂ ගැසට් පත්‍ර මගින් ප්‍රකාශයට පත්කර තිබේ.■

■ අරුණ ජයවර්ධන

මානව හිමිකම් සම්බන්ධයෙන් යහපාලන රජය යටතේ ශ්‍රී ලංකාව ලබාගත් සීමිත ප්‍රගතිය පවා නව රජය යටතේ වේගයෙන් ආපස්සට හැරවෙමින් පවතින බවත්, සිවිල් සමාජයට හා ස්වාධීන මාධ්‍යයන්ට ක්‍රියාත්මක වීමට තිබෙන ඉඩ වේගයෙන් වර්තමාන රජය යටතේ සංකෝචනය වෙමින් පවතින බවත්, සමස්තයක් ලෙස ලංකාවේ මානව හිමිකම් තත්වය බරපතළ ලෙස අවගමනය වෙමින් පවතින බවත් යුරෝපා සංගමය කියයි.

මේ බව සඳහන් වන්නේ, ශ්‍රී ලංකාවේ ජීඑස්පී ප්ලස් සහනය තාවකාලිකව අත්හිටුවීමට යෝජනා කරමින් ජුනි 9 වැනිදා යුරෝපා පාර්ලිමේන්තුවේදී සම්මත වූ යෝජනාවෙහිය.

යුරෝපා සංගමයේ ප්‍රතිපත්ති සම්පාදක ආයතනය වන යුරෝපා පාර්ලිමේන්තුවේදී සම්මත වූ මේ යෝජනාවට පක්‍ෂව සාමාජිකයෝ 628ක් ඡන්දය දුන්හ. විරුද්ධව ඡන්දය දුන්නේ 15කි. 40ක් ඡන්දය දීමෙන් වැළකී සිටියෝය.

යහපාලන රජය යටතේ 2017 මැයි 19 වැනිදා ශ්‍රී ලංකාව ජීඑස්පී ප්ලස් බදු සහනය නැවතත් ලබාගත්තේ, (ඊට පෙර මහින්ද රාජපක්‍ෂ ආණ්ඩුව සමයේදී අඛණ්ඩව පිරිහෙමින් පැවති මානව හිමිකම් තත්වය නිසා ජීඑස්පී ප්ලස් සහනය ලංකාවට අහිමි කෙරිණි.) 1979 ත්‍රස්තවාදය වැළැක්වීමේ පනත ඉවත් කර ඒ වෙනුවට ජාත්‍යන්තර මානව හිමිකම් ප්‍රමිතියෙන් යුක්ත නව ත්‍රස්තවාදය වැළැක්වීමේ පනතක් සම්මත කරගන්නා බවටත්, මානව හිමිකම් සම්මුතීන්, කම්කරු, ළමා හා කාන්තා අයිතිවාසිකම් පිළිබඳ සම්මුතීන් ඇතුළු ජාත්‍යන්තර සම්මුතීන් 27ක් ඵලදායක ලෙස ක්‍රියාත්මක කරන බවටත් වූ පොරොන්දු මත බවද, යුරෝපා පාර්ලිමේන්තු යෝජනාවෙහි සඳහන් වෙයි.

2009 යුද ගැටුම් නිමවී අවුරුදු 12ක් ගත වන විටත්, වගවීම හා සංහිඳියාව සඳහා දේශීය වශයෙන් පියවර ගෙන ප්‍රතිඵල පෙන්වීමට ලංකාවේ රජය නැවත නැවතත් අසමත් වී ඇති බවද, ඒ නිසා අපරාධවලට දඬුවම් නොලැබ සිටීම හා වින්දිතයන් රටේ ආයතන කෙරෙහි දක්වන විශ්වාසය කඩවීම බලවත් වී ඇති බවද යෝජනාවෙන් කියැවෙයි.

යෝජනාවෙන් අවධාරණය කර ඇති තවත් කාරණයක් වන්නේ, ශ්‍රී ලංකා රජයේ සිවිල් ආයතන හා පරිපාලන කටයුතු මිලිටරීකරණයයි. ‘ආණ්ඩුවේ ආයතන හා පරිපාලන ක්‍රියාදාමය මිලිටරීකරණය වේගවත් කර ඇති බවට පැහැදිලි ලකුණු තිබේ. 2020 සිට අඩුගණනේ සේවයේ සිටින හෝ සිටි හමුදා හෝ බුද්ධි අංශයේ නිලධාරීන් 28 දෙනකුවත් රජයේ වැදගත් පරිපාලන තනතුරුවලට පත්කර ඇත. ඔවුන් අතරෙන් අඩු ගණනේ ජ්‍යෙෂ්ඨ හමුදා නිලධාරීහු දෙදෙනෙක් යුදගැටුමේ අවසාන කාල පරිච්ඡේදයේදී යුද අපරාධ හා මනුෂ්‍යත්වයට එරෙහි අපරාධ සම්බන්ධයෙන් එක්සත් ජාතීන්ගේ වාර්තාවලට අනුව චෝදනා ලබා ඇති අයයි.’ යනුවෙන් වාර්තාවේ දැක්වෙයි.

පොලිස් අත්අඩංගුවේ සිටියදී මෙන්ම බන්ධනාගාරගතව සිටියදීද රැඳවුවන් මරාදමා ඇති බවද, 2021 මැයි මාසයේ පොලිස් අත්අඩංගුවේ සිටියදී මියයාම්, 2020 නොවැම්බර් මාසයේදී කොවිඩ් 19 තත්වයන් යටතේ වුවද, මහර බන්ධනාගාරයේ රැඳවුවන් 11 ඝාතනය කරමින් හා 117 දෙනකුට තුවාල සිදුකරමින් ආරක්‍ෂක නියාමකයන් විවෘතව වෙඩි තැබීම් ආදිය සිදුවූ බවද යෝජනාවෙහි සඳහන් වෙයි.

ත්‍රස්තවාදය වැළැක්වීමේ පනත අඛණ්ඩව යොදාගැනීමට බරපතළ ලෙස විරුද්ධ වන බව නැවතත් යෝජනාවෙන් අවධාරණය කැරෙන අතර, එම පනත නැවත විචාරය කිරීම හා ප්‍රතිස්ථාපනය කිරීම මෙන්ම, වහාම එම මර්දනකාරී පනත අවලංගු කිරීමට අදාළ පොරොන්දු ඉටුකරන ලෙසද ඉල්ලා සිටියි. ත්‍රස්තවාදය වැළැක්වීමේ පනත යටතේ නිසි කාර්ය පටිපාටිය අනුගමනයෙන් තොරව අත්තනෝමතිකව අත්අඩංගුවට ගෙන හා රඳවා තබාගෙන සිටින නීතිඥ හිජාස් හිස්බුල්ලා, කවිකාර අනාෆ් ජසීම් මෙන්ම සීඅයිඩීයේ හිටපු අධ්‍යක්‍ෂ ශානි අබේසේකර ඇතුළු නීතිඥයන්ට, සිවිල් සමාජ ක්‍රියාධරයන්ට, ලේඛකයන්ට, කවියන්ට වලංගු චෝදනා යටතේ සාධාරණ නඩු විභාගයක් ලබාදෙන ලෙසද, චෝදනා කිසිවක් නැතිනම් කොන්දේසි විරහිතව ඔවුන් මුදාහරින ලෙසද යෝජනාවෙන් අවධාරණය කැරෙයි.

2020 ඔක්තෝබර් 20 වැනිදා සම්මත කරගත් 20වැනි ආණ්ඩුක්‍රම ව්‍යවස්ථා සංශෝධනය ගැන සඳහන් කරමින් යෝජනාව කියන්නේ, එමගින් අධිකරණයේ ස්වාධීනත්වය පිරිහීම, පාර්ලිමේන්තුවේ පාලන බලතල අඩුකිරීම සහ ජනාධිපතිට ප්‍රමාණය ඉක්මවා ගිය බලයක් ඒකරාශි කරදීම ගැන බැරෑරුම් ලෙස අවධානය යොමු කරන බවයි.

යෝජනාවට අනුව, ජීඑස්පී ප්ලස් සහනය ලංකාවේ ආර්ථිකයට ඉතාම වැදගත් දායකත්වයක් කර තිබේ. එනිසා ලංකාවෙන් යුරෝපා සංගමය වෙත යුරෝ බිලියන 2.3ක අපනයන වර්ධනයක් සිදුවී ඇති බවද, යුරෝපා සංගමය ලංකාවේ දෙවැනි විශාලතම අපනයන වෙළෙඳපොළ බවට පත්වී ඇති බවද කියැවෙයි.

එහෙත්, ජීඑස්පී ප්ලස් සහනය ලංකාවට තවදුරටත් ලැබීම ස්වයංක්‍රියව සිදුවන්නක් නොවන බව කියන යෝජනාව, යුරෝපා කොමිසමෙන් හා එහි ‘යුරෝපා බාහිර ක්‍රියාකාරි සේවාවෙන්’ ඉල්ලා සිටින්නේ, ලංකාවේ වර්තමාන තත්වය ගැන තක්සේරුවක් කරන ලෙසත්, ලංකාවේ මානව හිමිකම් බැඳීම් වර්ධනය කිරීමට ජීඑස්පී ප්ලස් සහනය ලීවරයක් ලෙස යොදාගන්නා ලෙසත්ය.

ත්‍රස්තවාදය වැළැක්වීමේ පනත අහෝසි කිරීම හෝ ප්‍රතිස්ථාපනය කිරීම තවදුරටත් ලංකාවට අවධාරණය කරවන ලෙසත්, අවසාන විසඳුමක් ලෙස ලංකාවේ ජීඑස්පී ප්ලස් සහනය හා ප්‍රතිලාභ තාවකාලිකව අත්හිටුවීමට සාධාරණ හේතු තිබෙනවාදැයි තක්සේරු කරන ලෙසත්, හැකි ඉක්මනින් ඒ ගැන ගන්නා පියවර යුරෝපා පාර්ලිමේන්තුවට වාර්තා කරන ලෙසත් යෝජනාවෙන් අවධාරණය කර ඇත.

මීට සතියකට පෙර, අමෙරිකාවේ කොන්ග්‍රස් නියෝජිත මන්ත්‍රී මණ්ඩලයට ද ලංකාවේ මානව හිමිකම් කඩවීම් සම්බන්ධයෙන් වන යෝජනාවක් ඉදිරිපත් විය.■

■ ඉඳුවර බණ්ඩාර

පසුගිය කාලය තුළ ඝාතනයට ලක්වූයේ තර්ඩ් ක්ලාස් වැඩ කළ මාධ්‍යවේදීන් යැයි කියූ ප්‍රකාශය සම්බන්ධයෙන් සෞඛ්‍ය අමාත්‍යාංශයේ මාධ්‍ය ප්‍රකාශක වෛද්‍ය හේමන්ත හේරත් මාධ්‍ය සංවිධාන එකතුවෙන් සමාව ඉල්ලා ඇත.

ජුනි 07 වැනිදා මාධ්‍ය සංවිධාන එකතුව එම ප්‍රකාශය සම්බන්ධයෙන් ඔහු වෙත යවන ලද ලිපියට පිළිතුරු වශයෙන් සෞඛ්‍ය අමාත්‍යාංශයේ ලිපි ශීර්ෂයකින් ජුනි 08 වැනිදා මාධ්‍ය සංවිධාන වෙත ලිපියක් යොමු කරමින් වෛද්‍ය හේරත් මෙම සමාව ගැනීම කර ඇත.

නිල මාධ්‍ය සාකච්ඡාවකින් පසු මාධ්‍යවේදීන් සමඟ සිදුවූ අදහස් හුවමාරුවකදී කරන ලද එම ප්‍රකාශය මාධ්‍ය සංවිධාන නිර්වචනය කර ඇති අදහස ගම්‍ය කිරීම සඳහා කරන ලද්දක් නොවන බව අවධාරණය කරන බවත්, එවැනි අදහසක් ගම්‍ය වන ප්‍රකාශයක් කිරීමට මොනම ආකාරයේ අවශ්‍යතාවක් හෝ අභිප්‍රායක් නොතිබුණ බවත් එම ලිපියෙන් වෛද්‍ය හේරත් අවධාරණය කර ඇත.

එම ප්‍රකාශය හේතුවෙන් මාධ්‍යවේදීන්ට හෝ ඔවුන්ගේ පවුල්වල අයට කිසියම්ම හෝ සිත් තැවුලක් ඇතිවූයේ නම් අදාල සියලු දෙනා වෙත කොන්දේසි විරහිතව කනගාටුව ප්‍රකාශ කරන බව එහි සඳහන්ය.■