■ ප්‍රියාශා හෙට්ටිහේවා

මෙරට තුළ සිදු කරන පී.සී.ආර්. සහ ඇන්ටිජන් (ක්ෂණික ප්‍රතිදේහජනක) පරීක්ෂණ සංඛ්‍යාව අඩු කරන ලෙස සෞඛ්‍ය අමාත්‍යාංශයෙන් උපදෙස් දී ඇති බැවින් ආසාදිතයන් වාර්තා වීම අවම වෙමින් ඇතැයි ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ උපසභාපති එස්.ඒ.යූ.පී. කුලතිලක පවසයි.

කොවිඩ් රෝගීන්ගේ පළමු පෙළ ආශ්‍රිතයන් පවා පරීක්ෂණ කටයුතු සඳහා යොමු නොකරන බවත් එසේ කිරීමෙන් රෝග ව්‍යාප්තිය ඉහළ යන බවත් ඔහු ‘අනිද්දා‘ට පැවසීය.

සෞඛ්‍ය වෛද්‍ය නිලධාරී කොට්ඨාසයක උපරිම පී.සී.ආර්. 100කට වඩා සිදු නොකරන ලෙස දැනුම් දීම් කර ඇති බවත් තවදුරටත් සෞඛ්‍ය අමාත්‍යාංශය සමග වාද කරමින් මෙම ගැටලු සම්බන්ධයෙන් මැදිහත් වීම පවා ඵලක් නොවන තත්ත්වයට පත්ව ඇති බවත් ඔහු ප්‍රකාශ කළේය.

මින් පෙර සෞඛ්‍ය වෛද්‍ය නිලධාරී කොට්ඨාසයක දිනකට පී.සී.ආර්. පරීක්ෂණ 600-700ත් අතර ප්‍රමාණයක් සිදු කළ බවත් දින කිහිපයක සිට සිදු කරනුයේ පී.සී.ආර්. පරීක්ෂණ 250ක් පමණ බවත් ඔහු පැවසීය.

සෞඛ්‍ය වෛද්‍ය නිලධාරී කොට්ඨාසයක ක්ෂණික ඇන්ටිජන් පරීක්ෂණ 100-200ත් අතර ප්‍රමාණයක් මින් පෙර සිදු කළ අතර මේ වන විට දිනකට සිදු කරන්නේ ඇන්ටිජන් පරීක්ෂණ 25-30ත් අතර ප්‍රමාණයක් බවත් ඔහු ප්‍රකාශ කළේය.
ඇන්ටිජන් පරීක්ෂණ සිදු කළ ප්‍රමාණයන් වාර්තා වීමේ ප්‍රමාදයක් පවතින බව සෞඛ්‍ය සේවා නියෝජ්‍ය අධ්‍යක්ෂ ජනරාල් විශේෂඥ වෛද්‍ය හේමන්ත හේරත් මින් පෙර දිනක ‘අනිද්දා‘ සමග පැවසීය.

නමුත් කුලතිලක මහතා පැවසුවේ, දෛනික පරීක්ෂණ සංඛ්‍යා පිළිබඳ දත්ත සෑම දිනක ම දිස්ත්‍රික් සෞඛ්‍ය සේවා කාර්යාල හරහා අදාළ අංශවලට යොමු කරන බවය.

පරීක්ෂණ සංඛ්‍යාව අඩු කිරීමෙන් ආසාදිතයින් අඩු බව පෙන්වීමට අමාත්‍යාංශය උත්සහ ගන්නා බවත් මෙමගින් රටපුරා ආසාදිතයින් ව්‍යාප්ත වීමේ බරපතළ අවදානමක් පවතින බවත් ඔහු පැවසීය.

රෝහල්වල පී.සී.ආර්. සිදු කිරීම ද මේ වන විට අවම මට්ටමක පවතින බව රජයේ හෙද නිලධාරීන්ගේ සංගමයේ සභාපති සමන් රත්නප්‍රිය පැවසීය.

සෞඛ්‍ය ප්‍රවර්ධන කාර්යාංශයේ දත්ත අනුව ඊයේ (සැප්තැම්බර් 7) දිනය තුළ සිදු කළ පී.සී.ආර්. පරීක්ෂණ සංඛ්‍යාව 9,977ක් වන අතර ඇන්ටිජන් පරීක්ෂණ සංඛ්‍යාව 3,324කි.

රට වසා දැමූ අගෝස්තු 20 වන දා සිදු කළ පී.සී.ආර්. සංඛ්‍යාව 20,274ක් වන අතර ඇන්ටිජන් පරීක්ෂණ සංඛ්‍යාව 6,186කි.

එතැන් සිට ක්‍රමයෙන් පරීක්ෂණ සංඛ්‍යාව අවම කරමින් තිබෙන බව එම දත්ත අනුව පැහැදිලි වේ.■

■ ප්‍රියාශා හෙට්ටිහේවා

ගුරු වැටුප් විෂමතා සම්බන්ධයෙන් පැවැත්වූ රැස්වීම් සහ උද්ඝෝෂණවලට සහභාගිවූවන් පිළිබඳව තොරතුරු ලබාදෙන ලෙස අපරාධ පරීක්ෂණ දෙපාර්තමේන්තුව හෙවත් සීඅයිඩීය පොලිස් ස්ථානවලට දැනුම් දී තිබේ.

ගුරු විදුහල්පති මහජන රැස්වීම්, පෙළපාලි හා උද්ඝෝෂණ පැවැත්වූ ස්ථාන සහ දින, ඒවා සංවිධානය කළ පුද්ගලයින්ගේ නම් හා ලිපිනයන්, ඒවාට සහභාගිවී ඇති සංඛ්‍යාව, එම රැස්වීම්, පෙළපාලි හා උද්ඝෝෂණ පැවැත්වූ දිනයෙන් පසුව කොවිඩ් 19 ආසාදිතව මියගොස් ඇති හා ආසාදිත බවට පත්වී ඇති විදුහල්පතිවරුන්ගේ හා ගුරුවරුන්ගේ නම්, ලිපිනයන්, පදිංචි ප්‍රාදේශීය ලේකම් කොට්ඨාශය හා කලාප අධ්‍යාපන කාර්යාලය යන තොරතුරු ලබාදෙන ලෙස සීඅයිඩීය ඒ අනුව පොලිස් ස්ථාන වෙත දැනුම් ඇත.

සීඅයිඩීය කරන ලද එම දැනුම් දීම අනුව ඉහත තොරතුරුවලට අදාල තමන් සතු තොරතුරු ලබා දෙන ලෙස මූලස්ථාන පොලිස් ස්ථාන සිය ප්‍රදේශයේ ප්‍රාදේශීය ලේකම්වරුන්ට ලිඛිතව දැනුම් දීමක් කර ඇති අතර ඒ මගින් අවධාරණය කර ඇත්තේ මෙය කඩිනම් විමර්ශන අවශ්‍යතාවක් බවය. එමෙන්ම එම තොරතුරු ඇතුලත් වාර්තාවක් සැප්තැම්බර් 08 දිනට ප්‍රථම සීඅයිඩීය ඉල්ලා ඇති බවද ප්‍රාදේශීය ලේකම්වරුන්ට යවන ලද දැනුම් දීමේ පොලීසිය සඳහන් කර ඇත.■

■ ඉඳුවර බණ්ඩාර

වර්තමානයේ පවතින ජනාධිපතිවරයා තෝරා ගැනීමේ ඡන්ද ක්‍රමය මෙන්ම පාර්ලිමේන්තුව මගින් ජනාධිපතිවරයා තෝරා ගැනීමේ ක්‍රමයක් පිළිබඳවද ඉදිරි සංශෝධනවලදී සලකා බැලිය යුතු බව මහජන එක්සත් පෙරමුණ ඒ සම්බන්ධයෙන් සලකා බලන විශේෂ කාරක සභාවට සැප්තැම්බර් 06 දින දැනුම් දී ඇත.

ඒ බව එම පක්ෂය වෙනුවෙන් එහි උප ලේකම් රාජ්‍ය අමාත්‍ය සිසිර ජයකොඩි මැතිවරණ හා ඡන්ද විමසීම් ව්‍යුහය සහ නීති රීතිවල ප්‍රතිශංස්කරණ හඳුනා ගැනීමටත්, ඒ සම්බන්ධයෙන් අවශ්‍ය සංශෝධන ඉදිරිපත් කිරීමටත් පත්කරන ලද පාර්ලිමේන්තු විශේෂ කාරක සභාවේ හමුවේ ප්‍රකාශ කළ බව පාර්ලිමේන්තුවේ සන්නිවේදන ඒකකය නිවේදනය කර ඇත.

එමෙන්ම පාර්ලිමේන්තුවේ නියෝජිතයින් සංඛ්‍යාව පවතින ආකාරයටම 225ක් වියයුතු බවත්, ඉන් 140 දෙනෙකු කොට්ඨාශ ක්‍රමයටත්, 70 දෙනෙකු දිස්ත්‍රික් සමානුපාතික ක්‍රමයටත් ඉතිරි 15 දෙනා ජාතික ලැයිස්තුවෙන්ද තෝරා ගතයුතු බව රාජ්‍ය අමාත්‍ය සිසිර ජයකොඩි එම කාරක සභාවට දැනුම් දී ඇත.

එමෙන්ම එම කාරක සභාවට මහජන එක්සත් පෙරමුණේ නියෝජ්‍ය ලේකම් පාර්ලිමේන්තු මන්ත්‍රී යදාමිණි ගුණවර්ධන ප්‍රකාශ කර ඇත්තේ දේශපාලන බලපෑම්වලින් තොරව මැතිවරණ පැවැත්වීමේ කාලවකවානු හා දින නීතියෙන් නියම කළ යුතු බවය.

අමාත්‍ය දිනේෂ් ගුණවර්ධනගේ සභාපතිත්වයෙන් එම කාරක සභාව රැස්වී ඇති අතර එම කාරක සභා අවස්ථාවට නිමල් සිරිපාල ද සිල්වා, ඩග්ලස් දේවානන්දා, පවිත්‍රා වන්නිආරච්චි, අලි සබ්රි යන අමාත්‍යවරුන්ද මනෝ ගනේෂන්, මධුර විතානගේ හා සාගර කාරියවසම් යන මන්ත්‍රීවරුන්ද සහභාගි වී ඇත.■

■ ප්‍රියාශා හෙට්ටිහේවා

යුද්ධ හමුදාව මගින් සිදුකරන එන්නත්කරණ කටයුතුවලට අදාළ දත්ත නිවැරදි ආකාරයෙන් වාර්තා නොවන බව රජයේ වෛද්‍ය නිලධාරීන්ගේ සංගමයේ මධ්‍යම කාරකසභික වෛද්‍ය ප්‍රසාද් කොළඹගේ පවසයි.

සෞඛ්‍ය වෛද්‍ය නිලධාරී කාර්යාලවලට ලැබෙන එන්නත් සම්බන්ධ දත්ත නිසි පරිදි ගබඩා වන බවත් යුද්ධ හමුදාවෙන් දෙන එන්නත් සම්බන්ධව දත්ත නොලැබීමේ ගැටලුවක් පවතින බවත් වෛද්‍යවරයා ‘අනිද්දා‘ට පැවසීය.

තව ද වෛද්‍යවරයා පැවසුවේ, ප්‍රමාණවත් එන්නත් මාත්‍රා සංඛ්‍යාවක් තම කාර්යාලවලට නොලැබෙන බව සෞඛ්‍ය වෛද්‍ය නිලධාරී කාර්යාල දිගින් දිගට ම පැවසූ බවය.

සෞඛ්‍ය සේවා අධ්‍යක්ෂ ජනරාල්වරයාගෙන් මේ පිළිබඳව විමසූ විට ඔහුට නිවැරදි දත්ත නොලැබෙන බව ප්‍රකාශ කළ බව ද වෛද්‍යවරයා පැවසීය.

බොහෝ අවස්ථාවල සෞඛ්‍ය අංශ මගින් එන්නත් ලබා දෙන ස්ථානවල ජනතාව විශාල වශයෙන් ඒකරාශී වන අයුරු දැකගත හැකි අතර එන්නත් ප්‍රමාණවත් නොවී ගැටලුකාරී තත්ත්වයන් ද එම ස්ථානවල ඇති වූ බව වාර්තා විය.

ඒ සම්බන්ධයෙන් විමසූ විට වෛද්‍යවරයා පැවසුවේ, ”හැමවෙලාවෙ ම පෙන්නන්නේ සෞඛ්‍ය අංශයේ එන්නත් කිරීම් වැඩපිළිවෙළ අකාර්යක්ෂමයි කියලා. ඒ ගැන හොයල බැලුව ම අකාර්යක්ෂමතාවක් නෙමෙයි සිද්ධවෙලා තියෙන්නේ, එන්නත් ලබා ගන්න එන පිරිසට අවශ්‍ය එන්නත් ප්‍රමාණය සෞඛ්‍ය අමාත්‍යාංශය නිකුත් කරන්නේ නෑ. එන්නත් 3,000ක් ඕනෑ තැනට එන්නත් 400-500ක් වගේ නිකුත් කරන්නේ,” යනුවෙනි.

එයට හේතුව ලෙස වෛද්‍යවරයා පෙන්වා දුන්නේ වසංගත රෝග විද්‍යා ඒකකයෙන් එන්නත් නිකුත් කරන අතර එහිදී යුද්ධ හමුදාපතිවරයා සහ සෞඛ්‍ය අමාත්‍යාංශ ලේකම්වරයා එක්ව යුද්ධ හමුදාවට අවශ්‍ය එන්නත් ප්‍රමාණය නිකුත් කර ගන්නා බවත් ඉන්පසු ඉතිරි එන්නත් සෞඛ්‍ය අංශවලට බෙදා දෙන බවත් ය.

තව ද යුද්ධ හමුදා ප්‍රකාශකයෙකු ලබා දුන් එන්නත් ප්‍රමාණය ප්‍රකාශයට පත් කළත් නිවැරදි දත්ත ප්‍රකාශවීමක් එහිදී සිදු නොවන බව ද ඔහු පැවසීය.

යුද්ධ හමුදාව එන්නත්කරණ කටයුතු සිදුකිරීමේ ගැටලුවක් නොමැති බවත් එන්නත් ලබා දිය යුතු ප්‍රදේශ සහ එන්නත් ලැබිය යුතු පුද්ගලයන් තෝරාගැනීම විද්‍යාත්මක පදනමකින් තොරව සිදුවන බවත් ඒ හේතුවෙන් කොරෝනා මරණ සංඛ්‍යාව අවම කරගැනීමට පවා නොහැකිව ඇති බවත් ඔහු පැවසීය.

ඔහු පැවසුවේ අවුරුදු 60ට ඉහළ පිරිසට එන්නත් ලබා දී අවසන්ව නොමැති පසුබිමක අවුරුදු 20-30 වයස් කාණ්ඩ එන්නත් කිරීම ආරම්භ කර ඇති බවත්, සෞඛ්‍ය අමාත්‍යංශයේ විද්වත් කමිටුව මගින් එන්නත් ලබාදීම සම්බන්ධ තීරණ ගත යුතු බවත් හා කොවිඩ් මූලස්ථානයට අවශ්‍ය පරිදි තීරණ නොගත යුතු බවත්ය.

එන්නත් නිකුත් කරනුයේ කාටද යන කාරණය හෝ සෞඛ්‍ය සේවා අධ්‍යක්ෂ ජනරාල්වරයා නොදන්නා තත්ත්වයකට එන්නත්කරණ කටයුතු අයාලේ යන බවක් පෙනෙන්නට ඇතැයි ඔහු පැවසීය.

එන්නත් නිකුත් කිරීම සම්බන්ධයෙන් වන අර්බුදකාරී තත්ත්වය පිළිබඳව වසංගත රෝග විද්‍යා ඒකකයේ අධ්‍යක්ෂ විශේෂඥ වෛද්‍ය සමිත ගිනිගේගෙන් කළ විමසීමකදී ඔහු පැවසුවේ, තමාට මාධ්‍යට ප්‍රකාශ නිකුත් කළ නොහැකි බවත් සෞඛ්‍ය අමාත්‍යාංශයේ මාධ්‍ය ප්‍රකාශකවරයාගෙන් ඒ පිළිබඳව විමසන ලෙසත්ය.

සෞඛ්‍ය සේවා අධ්‍යක්ෂ ජනරාල්වරයා හෝ මාධ්‍ය ප්‍රකාශකවරයා සම්බන්ධ කරගැනීමට අප උත්සාහ කළ ද එය ව්‍යර්ථ විය.■

ඉඳුවර බණ්ඩාර

මේ වනවිට තර්ජනයට ලක්වී ඇති ඇෆ්ගනිස්ථානයේ ජනමාධ්‍යවේදීන්ට ජීවිතාරක්ෂාව සඳහා රැකවරණ ලබාදෙන ලෙස ශ්‍රී ලංකාවේ මාධ්‍ය සංවිධාන එකතුව ජනමාධ්‍ය ඇමතිවරයාට හා විදේශ කටයුතු ඇමතිවරයාට ලිපියක් යවමින් ඉල්ලා ඇත.

වගකීම් සහගත භාවිතාවන් හා ප්‍රජාතන්ත්‍රවාදය ගැන ඇති කැපවීම පෙන්නුම් කරමින් මේ වනවිට රටවල් කිහිපයක් ඇෆ්ගන් මාධ්‍යවේදීන්ට ජීවිතාරක්ෂාව සඳහා එම රටවල රැකවරණ ලබාදී ඇති බවත්, ශ්‍රී ලංකාවද වසර කිහිපයක් තිස්සේ සරණාගතභාවය අපේක්ෂා කරන පිරිස්වලට රැකවරණ ලබාදී ඇති බවත්, එක්සත් ජාතීන්ගේ සරණාගතයින් පිළිබඳ මහා කොමසාරිස් කාර්යාලය සමඟ එළඹ ඇති ගිවිසුමට අනුව ඒ සඳහා හ්‍රී ලංකාවට අවස්ථාව උදාවී ඇති බවත් මාධ්‍ය සංවිධාන එකතුව එම ලිපියෙන් පෙන්වා දී ඇත.

විදේස් සංචාරක කණ්ඩායම් හා ක්‍රීඩා කණ්ඩායම් මෙරට සංචාරය කිරීමේදී අනුගමනය කරන සෞඛ්‍යාරක්ෂිත හා නිරෝධායන ක්‍රමවේද අනුගමනය කරමින් මෙම කටයුතු කළ හැකි බව එහි තවදුරටත් පෙන්වා දී ඇත.

මාධ්‍ය සංවිධාන යොමුකළ සම්පූර්ණ ලිපිය

■ ඉඳුවර බණ්ඩාර

පළාත් පාලන ආයතනවල සභික සංඛ්‍යාව අඩු කළ යුතු බව එම ආයතනවල මැතිවරණ ක්‍රමය සමාලෝචනය සඳහා පත්කළ කමිටුව ඒ සම්බන්ධයෙන් වූ පාර්ලිමේන්තු විශේෂ කාරක සභාවට දැනුම් දී ඇත.

එම කමිටුව සැප්තැම්බර් 02 දින පාර්ලිමේන්තු විශේෂ කාරක සභාව හමුවේ එම දැනුම් දීම කළ බව පාර්ලිමේන්තුවේ සන්නිවේදන අංශය නිවේදනය කරයි.

පළාත් පාලන ආයතනවල සභික සංඛ්‍යාවෙන් සියයට 70ක් කොට්ඨාශ පදනම මතද ඉතිරි සියයට 30ක ප්‍රමාණය සමානුපාතික ක්‍රමය මතද තෝරාපත් කළ යුතු බව එම කමිටුව නිර්දේශ කර ඇති අතර පළාත් පාලන ආයතනවල සභික සංඛ්‍යාව නිර්ණය කිරීම සඳහා පාර්ලිමේන්තුව සඳහා මන්ත්‍රීවරුන් තෝරා ගන්නා සමානුපාතික ක්‍රමය යොදා ගැනීම නිර්දේශ කර ඇත.

ජයග්‍රාහි පක්ෂ සඳහා ප්‍රසාද ආසන සංඛ්‍යාවක් හඳුන්වාදීම, පළාත් පාලන ආයතන නියෝජනයක් ලබා ගැනීම සඳහා කිසියම් පක්ෂයක් හෝ ස්වාධීන කණ්ඩායමක් වලංගු ඡන්ද සංඛ්‍යාවෙන් සියයට 2.5ක් හෝ ඊට වැඩි සංඛ්‍යාවක් ලබා ගැනීම, බහු මන්ත්‍රී කොට්ඨාශ සඳහා තෝරා ගන්නා ආකාරය වෙනස් කිරීම එම කමිටුව නිර්දේශ කර ඇති අනෙකුත් යෝජනා බව පාර්ලිමේන්තු සන්නිවේදන අංශයේ නිවේදනයේ සඳහන් වේ.#
පාර්ලිමේන්තු විශේෂ කාරක සභාවේ සභාපතිත්වය අමාත්‍ය දිනේෂ් ගුණවර්ධන දරන අතර සමාලෝචන කමිටුවේ සභාපතිවරයා ලෙස ඉඩම් අමාත්‍යාංශයේ ලේකම් ආර්ඒඒකේ රණවක කටයුතු කරයි. එහි සෙසු සාමාජිකයින් වන්නේ මහාචාර්ය සුදන්ත ලියනගේ හා හිටපු අමාත්‍යාංශ ලේකම් ජයලත් රවී දිසානායකය.■