No menu items!
24.9 C
Sri Lanka
16 November,2026

මව්බිම සහ සිලෝන් ටුඩේ සේවක ගැටලුවලට කඩිනම් මැදිහත්වීමක් කම්කරු කොමසාරිස් ජනරාල්ගෙන් මාධ්‍ය සංවිධාන ඉල්ලයි

Must read

මව්බිම සහ සිලෝන් ටුඩේ පුවත්පත්වල මාධ්‍යවේදීන් ඇතුළු සේවකයන් මුහුණ දී සිටින වැටුප් නොගෙවීම, සේවයෙන් ඉවත් කිරීම සහ සේවා ස්ථානයට ඇතුළුවීම අවහිර කිරීම ඇතුළු වෘත්තීය ගැටලු සම්බන්ධයෙන් කඩිනමින් මැදිහත් වන ලෙස මාධ්‍ය සංවිධාන හතක් කම්කරු කොමසාරිස් ජනරාල් නදීකා වටලියද්ද මහත්මියගෙන් ඉල්ලා තිබේ.

ශ්‍රී ලංකා වෘත්තීය ජනමාධ්‍යවේදීන්ගේ සංගමය ඇතුළු මාධ්‍ය සංවිධාන හතක නියෝජිතයන්ගේ අත්සනින් යුතුව නොවැම්බර් 16 වැනිදා යොමු කළ ලිපියක් මඟින් මෙම ඉල්ලීම ඉදිරිපත් කර ඇත.

සිලෝන් නිව්ස්පේපර්ස් ප්‍රයිවෙට් ලිමිටඩ් ආයතනයට අයත් මව්බිම සහ සිලෝන් ටුඩේ පුවත්පත්වල සේවකයන් මේ වන විට බරපතළ වෘත්තීය ගැටලු රැසකට මුහුණ දී සිටින බවට තම සංවිධාන එකමුතුවට වාර්තා වී ඇති බව අදාල ලිපියේ සඳහන් කර ඇත.

එහි දැක්වෙන්නේ කිසිදු සාධාරණ හේතු දැක්වීමකින් තොරව මාධ්‍යවේදීන් ඇතුළු සේවක පිරිසකගේ මාස ගණනාවක වැටුප් සහ සේවක අර්ථසාධක අරමුදල් දායක මුදල් නොගෙවීම, සේවකයන් රැකියාවලින් ඉවත් කිරීම සහ සේවක පාරිතෝෂික නොගෙවීම සම්බන්ධයෙන් ආයතන පාලනාධිකාරියට චෝදනා එල්ල වී ඇති බවයි. එමෙන්ම, දැනට රැකියා අහිමි කර නොමැති සේවකයන්ට පවා තම සේවා ස්ථානයට ඇතුළු වීම ආයතන පාලනාධිකාරිය විසින් බලහත්කාරයෙන් අවහිර කර ඇති බව ද මාධ්‍ය සංවිධාන පෙන්වා දී ඇත.

සේවකයන් ආයතනයට ඇතුළු වීම වැළැක්වීමේ මෙම ක්‍රියාමාර්ගය සම්බන්ධයෙන් කම්කරු දෙපාර්තමේන්තුව හෝ වෙනත් අදාළ රාජ්‍ය බලධාරියෙකු පූර්වයෙන් දැනුවත් කර නොමැති බවට ද එම ලිපියෙන් චෝදනා කර තිබේ. මෙම තත්ත්වය හේතුවෙන් මව්බිම සහ සිලෝන් ටුඩේ සේවකයන් මෙන්ම ඔවුන්ගේ පවුල් ද දැඩි ආර්ථික හා සමාජීය අසීරුතාවකට මුහුණ දී සිටින බව මාධ්‍ය සංවිධාන සඳහන් කරයි.

ඒ අනුව, අගතියට පත් මාධ්‍යවේදීන් ඇතුළු සේවක පිරිසට සාධාරණය ඉටු කිරීම සඳහා කම්කරු දෙපාර්තමේන්තුව නිල වශයෙන් කඩිනම් මැදිහත්වීමක් සිදු කරන ලෙස ඔවුහු ඉල්ලා සිටිති. එමෙන්ම මෙම ගැටලුව ඇතුළු ජනමාධ්‍ය කර්මාන්තයේ සේවකයන් මුහුණ දෙන අනෙකුත් වෘත්තීය ගැටලු කිහිපයක් සම්බන්ධයෙන් සාකච්ඡා කිරීම සඳහා කම්කරු කොමසාරිස් ජනරාල්වරිය සමඟ හමුවක් ලබා දෙන ලෙස ද ලිපියෙන් ඉල්ලීමක් කර තිබේ.

අදාළ පැමිණිල්ල පාර්ලිමේන්තු හෝ වෙනත් ආයතනික ක්‍රියාමාර්ගයක් ලෙස නොව, කම්කරු දෙපාර්තමේන්තුවේ මැදිහත්වීම ඉල්ලා ඉදිරිපත් කළ නිල ඉල්ලීමක් බව ද ලිපියේ සඳහන් කරුණු අනුව පැහැදිලි වේ.

මෙම ලිපියට ශ්‍රී ලංකා වෘත්තීය ජනමාධ්‍යවේදීන්ගේ සංගමයේ සභාපති රංග බණ්ඩාරනායක,  නිදහස් මාධ්‍ය ව්‍යාපාරයේ කැඳවුම්කරු සහ එහි වෘත්තීය සමිතියේ ලේකම් චන්ද්‍රසේකර දොඩාවත්ත, මාධ්‍ය සේවක වෘත්තීය සමිති සම්මේලනයේ ප්‍රධාන ලේකම් තරිඳු උඩුවරගෙදර, ශ්‍රී ලංකා මුස්ලිම් මාධ්‍ය සංසදයේ සභාපති එම්.බී.එම්. ෆයිරූස්, ශ්‍රී ලංකා දෙමළ මාධ්‍ය සංසදයේ සභාපති ශ්‍රී ගජන් සහ දකුණු ආසියානු මාධ්‍ය කාන්තාවෝ සංවිධානයේ භාරකරු හා සභාපති හනා ඊබ්‍රාහීම් සහ තරුණ ජනමාධ්‍යවේදීන්ගේ සංගමයේ සභාපති තරිඳු ජයවර්ධන යන මහත්ම මහත්මීන් අදාල ලිපියට අත්සන් තබා තිබේ.

- Advertisement -spot_img

පුවත්

LEAVE A REPLY

Please enter your comment!
Please enter your name here

- Advertisement -spot_img

අලුත් ලිපි