ත්රිකුණාමලය වෙරළ තීරයේ අනවසරයෙන් බුදු පිළිමයක් ස්ථාපිත කිරීම ඇතුළු චෝදනා කිහිපයක් සම්බන්ධයෙන් පවරා ඇති නඩුවට අදාලව මීට පෙර අධිකරණය හමුවේ පෙනී නොසිටීම හේතුවෙන් බලංගොඩ කස්සප හිමිව නොවැම්බර් 17 දක්වා රක්ෂිත බන්ධනාගාරගත කිරීමට ත්රිකුණාමලය මහේස්ත්රාත් අධිකරණය අද (16) නියෝග කර ඇත.
පසුගිය නොවැම්බර් 11 වැනිදා නඩුව කැඳවූ අවස්ථාවේදී අධිකරණය හමුවේ පෙනී නොසිටීම හේතුවෙන් කස්සප හිමියන්ට එරෙහිව අත්අඩංගුවට ගැනීමේ වරෙන්තුවක් නිකුත් කර තිබිණි. කස්සප හිමිව ත්රිකුණාමලය ප්රධාන මහේස්ත්රාත් එම්.එස්.එම්. සම්සුදීන් මහතා හමුවට ඉදිරිපත් කළ අවස්ථාවේදී ඒ හිමියන් වෙනුවෙන් පෙනී සිටීමට නීතිඥවරයෙකු ඉදිරිපත් නොවීය. එහිදී කස්සප හිමියන් සිය නොපැමිණීම සම්බන්ධයෙන් අධිකරණය හමුවේ පෞද්ගලිකව කරුණු ඉදිරිපත් කළහ.
බුදුදහම ආරක්ෂා කිරීම සහ බුද්ධ ශාසනයේ අඛණ්ඩ පැවැත්ම සුරක්ෂිත කිරීමේ අරමුණ වෙනුවෙන් ජීවිත අවදානමක් සහිත මාරාන්තික උපවාසයක් ආරම්භ කර තිබූ බැවින් අධිකරණය හමුවේ පෙනී නොසිටීම ලෝකධර්මතාව යටතේ සාධාරණීකරණය කළ හැකි බව ඒ හිමියන් අධිකරණය හමුවේ කරුණු දක්වමින් පවසා ඇත.
කෙසේ වෙතත් අධිකරණය හමුවේ පෙනී නොසිටීම සම්බන්ධයෙන් කරුණු සලකා බැලූ මහේස්ත්රාත්වරයා කස්සප හිමියන් හෙට (17) දක්වා රක්ෂිත බන්ධනාගාරගත කිරීමට නියෝග කළ අතර, එදින යළි අධිකරණයට ඉදිරිපත් කරන ලෙස ද නියෝග කර තිබිණි. අදාල නඩු කටයුතු ත්රිකුණාමලය වරාය පොලිසිය විසිනි අධිකරණය හමුවේ ගොනු කර තිබිණි.


