තරුණ ගැටලුවලට විසඳුම තොරතුරු තාක්ෂණ සුදුසුකම් ලද්දන් වැඩි කිරීමද? – රොහාන් සමරජීව 

සර්බියාවේ සහ නේපාලයේ තරුණ ජනයා විසින් පිහිටුවන ලද ආණ්ඩු ඇත. ශ්‍රී ලංකාවේ සහ බංග්ලාදේශයේ බලයේ සිටින ආණ්ඩුවලට තම දේශපාලන වාසනාව හිමි වී ඇත්තේ තරුණ ජනයාගේ නායකත්වයෙන් සිදු වූ නාගරික නැගිටීම් හේතුවෙනි. ඇමරිකා එක්සත් ජනපදයේ රිපබ්ලිකන් අපේක්ෂකයින් සෝදා පාලුවට ලක්කළ නිල් රැල්ලට බලය ලැබුණේ තරුණ ජනයාගෙනි. තරුණ ජනයාගේ වැඩි සහභාගීත්වයකින් තොරව කිසිදු ප්‍රගතියක් අත්කර ගත නොහැකි බව ශ්‍රී ලංකාවේ ජ්‍යෙෂ්ඨතම දේශපාලනඥයන් කිහිප දෙනෙකු ප්‍රකාශ කර තිබේ.

කොළඹ පැවති තරුණ ජනයාගේ සංවාද මණ්ඩපයකට (Youth Forum) මා සහභාගී වූ අතර, එහි දී තරුණ ජනයා මුහුණ දෙන ගැටලු ඉස්මතු කර දැක්වූවා සේ ම, ඔවුන් විසින් ම සොයාගත් විසඳුම් ද ඉදිරිපත් කෙරිණි. පාලන කටයුතු සම්බන්ධයෙන් තරුණ ජනයාට වඩාත් ප්‍රබල හඬක් ලබා දීමේ අවශ්‍යතාවය සහ ඔවුන් දේශපාලන හා ප්‍රතිපත්තිමය ප්‍රධාන  ප්‍රවාහයට එක් කර ගත යුතු බව මම දැඩිව විශ්වාස කරමි. මෙම විශ්වාසය විවිධ ආකාරවලින් ක්‍රියාවට නංවා ඇති අතර, මෑතක දී එය රූපවාහිනී වැඩසටහනක් සහ ඊට අදාළ සමාජ මාධ්‍ය ඔස්සේ ක්‍රියාත්මක කෙරිණි. එහි දී, මගේ පරම්පරාව විසින් විසඳුම් නොමැතිව ඉතිරි කර තැබූ ප්‍රතිපත්තිමය ගැටලුවක් පිළිබඳව, සෑම සතියක ම මම තරුණ පුද්ගලයෙකු සමඟ සාකච්ඡා කරමි.

නමුත් එම පාඨමාලා එහි සිටින්නේ හුදෙක් ඔහුගේ හෝ ඇයගේ වයස නිසා ම නොවේ. ඔවුන්ට ආරාධනා කර ඇත්තේ, සාක්ෂි මත පදනම් වූ සහ දැනුවත් දායකත්වයක් ලබා දීමට ඔවුන්ට හැකියාව ඇති නිසා හෝ බිම් මට්ටමේ තත්ත්වය පිළිබඳ අත්දැකීම් ඔවුන් සතුව ඇති නිසා ය. මෙම සාකච්ඡාව ඔවුන්ගේ අදහස් සහ නිගමනවලට සහාය වන සාක්ෂි දැඩි පරීක්ෂාවකට (pressure-test) ලක් කිරීමකි. ඉහත සංවාද මණ්ඩපයේ දී ඉදිරිපත් කෙරුණු විසඳුමක උදාහරණයක් මා විසින් විමසා බලන ලද්දේ මෙම පසුබිම තුළ යි.

ආර්ථික ගෞරවය සහ තොරතුරු තාක්ෂණ සුදුසුකම්

තොරතුරු තාක්ෂණ සුදුසුකම් සහිත තරුණ ජනයාගේ සංඛ්‍යාව ඉහළ නැංවීම මගින්, ආර්ථික ගෞරවය නොමැති වීම පිළිබඳ ගැටලුව අර්ධ වශයෙන් විසඳීමට අපේක්ෂා කෙරිණි. මෙයින් පෙන්නුම් කෙරෙන්නේ තොරතුරු තාක්ෂණ (IT) සහ තොරතුරු තාක්ෂණය ආශ්‍රිත සේවා (ITES) ක්ෂේත්‍රයේ වත්මන් රැකියා වෙළඳපොළ තත්ත්වයන් පිළිබඳ නොදැනුවත්කම යි. මෙම ක්ෂේත්‍රයේ සේවා යෝජකයින් නියෝජනය කරන විවිධ ආයතනවල නායකයින් මෙම ගැටලුව පිළිබඳව දැනුවත් ය. ඔවුන් මේ පිළිබඳව නොදැන සිටිය නොහැකි ය. මන්ද යත්, නවක සේවකයින් බඳවා ගැනීම නවතා දමා, සීමාවාසික පුහුණු වැඩසටහන් (internships) අත්හිටුවා ඇත්තේ ඔවුන් විසින් ම වන බැවිනි. නමුත් ඉන්දියාවේ නායකයින් මෙන්, මොවුන් ප්‍රසිද්ධියේ අදහස් ප්‍රකාශ කර නොමැත:

” සමාගම් කෘත්‍රිම බුද්ධිය සමඟ ආරම්භක මට්ටමේ කේතන සහ මෘදුකාංග පරීක්ෂණ කටයුතු ස්වයංක්‍රීය කරන බැවින්, ඉන්දියාවේ මෑත කාලීන උපාධිධාරීන්ට තාක්ෂණ රැකියා සොයා ගැනීමට අමාරු විය හැකි බව, තාක්ෂණ සමාගම් කර්මාන්ත සඳහා රටේ විශාලතම ආයතනයේ (NASSCOM)ඉහළ ම විධායක නිලධාරියා Nikkei Asia වෙත පැවසීය.”

.“ඉන්දියාවේ මෘදුකාංග අපනයනකරුවන් නව ව්‍යාපාරික යථාර්ථයට අනුගත වන තෙක් මෙම බාධාව පැවතිය හැකි බව, ජාතික මෘදුකාංග සහ සේවා සමාගම් සංගමයේ (NASSCOM) සභාපති රාජේෂ් නම්බියාර් පැවසීය. තාක්ෂණික යටිතල පහසුකම් කළමනාකරණය වැනි ප්‍රධාන ආදායම් මාර්ගවල වැඩ බර අඩුවීම පියවා ගැනීම සඳහා, වෙනත් කරුණු අතර, සයිබර් ආරක්ෂාව (cybersecurity) සහ කෘත්‍රිම බුද්ධිය (AI) පිළිබඳ උපදේශන සේවා මෙන් ම, ඒවා ක්‍රියාත්මක කිරීම සහ නඩත්තු කිරීම වැනි ක්ෂේත්‍රවල නව අවස්ථා විවෘත කර ගැනීම ඊට ඇතුළත් වනු ඇත.” 

“තොරතුරු තාක්ෂණ සේවා සමාගමක් වන ‘කොග්නිසන්ට්‘ (Cognizant) හි හිටපු සභාපති සහ ඉන්දියාව සඳහා කළමනාකාර අධ්‍යක්ෂවරයෙකු වූ නම්බියාර් පවසන පරිදි, ව්‍යාපෘතියක් සඳහා යොදවන පුද්ගලයින් සංඛ්‍යාව මත නොව සැබෑ ප්‍රතිඵලය මත ආදායම් ආකෘති පදනම් වීමට පටන් ගැනීමත් සමඟ, උපාධිධාරීන් සඳහා වන ඉලක්ක ද වෙනස් වනු ඇත. මෙයින් ඇඟවෙන්නේ පරිගණක අධ්‍යයන විෂය නිර්දේශය යාවත්කාලීන කිරීමේ අවශ්‍යතාවක් පවතින බව යි. එසේ නොවුණහොත්, ගැළපෙන නිපුණතා නොමැති ඉංජිනේරු උපාධිධාරීන් දහස් ගණනක් ඉන්දියාවට සිටින තත්වයක් උදාවිය හැකිය.”

හත් වසරකට පෙර 2019 දී ජාතික තොරතුරු තාක්ෂණ ව්‍යාපාර ක්‍රියාවලි කළමනාකරණ (IT BPM) ශ්‍රම බලකා සමීක්ෂණයේ ප්‍රතිඵල, තොරතුරු සහ සන්නිවේදන තාක්ෂණ  ඒජන්සිය (ICTA) විසින් නිකුත් කරන ලද අවස්ථාවේ තොරතුරු තාක්ෂණ (IT) උපාධිධාරීන් සංඛ්‍යාව ඉහළ නැංවීමේ “විසඳුම” තරමක් හෝ තේරුම් ගත හැකි වෙයි. එවිට පවා, දුර දක්නා නුවණක් ඇති අයට පෙනී ගියේ, ආයෝජන මණ්ඩලයට (BOI) අනුව තොරතුරු තාක්ෂණ (IT) සහ තොරතුරු තාක්ෂණ ආශ්‍රිත සේවා (ITES) ක්ෂේත්‍රයේ සිටින පුද්ගලයින් 175,000 දෙනාගෙන් බහුතරයකට රැකියා සපයන ව්‍යාපාර ක්‍රියාවලි බාහිරකරණ/ ව්‍යාපාර ක්‍රියාවලි කළමනාකරණ (BPO/BPM) කර්මාන්තය අවදානම් සහගත බව යි. දැන් සාම්ප්‍රදායික මෘදුකාංග සමාගම් ද බඳවා ගැනීම් සීමා කරමින් සිටී.

රැකියා ක්ෂේත්‍රය මත AIහි බලපෑම ඉහළ ගොස් ඇති 2026 වසරේ දීත්, මෙම විසඳුම තවදුරටත් ප්‍රවර්ධනය කිරීම තේරුම්ගත නොහැකි කරුණකි. ජාත්‍යන්තර සිදුවීම් පිළිබඳව යමෙකු අවධානයෙන් නොසිටිය ද, හැව්ලොක් සිටි හි පිහිටි HSBC බැංකුවේ ගෝලීය සේවා මධ්‍යස්ථානය වන සීමාසහිත HSBC ඉලෙක්ට්‍රොනික දත්ත සැකසුම් ලංකා සමාගම අදියර වශයෙන් වසා දමන බවට කෙරුණු නිවේදනය, යම් අනතුරු ඇඟවීමක් විය යුතුව තිබිණි..

අවශ්‍ය වන්නේ තොරතුරු තාක්ෂණ උපාධිධාරීන් බිහි කිරීමේ වේගය වැඩි කිරීම නොව, වර්තමාන සිසුන්ට උගන්වන දේ සම්බන්ධයෙන් හදිසි ප්‍රතිසංස්කරණ සිදු කිරීම යි. මෙම වෙනස ක්‍රියාවට නැංවීම සඳහා කර්මාන්ත ක්ෂේත්‍රය අධ්‍යාපනඥයින් සමඟ එක්ව කටයුතු කළ යුතුව ඇත.

වෙනස් ආකාරයකට කළ හැක්කේ කුමක්ද?

තරුණ පරපුරේ ගැටලු සහ අදහස් තීරණ ගන්නන් වෙතටත්, මාධ්‍ය වෙතටත්, විවිධ මාර්ග ඔස්සේ මහජනතාව වෙතටත් සන්නිවේදනය කිරීම අතිශයින් ම වැදගත් වේ. මේ වෙනුවෙන්, සංවාද මණ්ඩපයේ සංවිධායකවරුන්ට  අපගේ ස්තූතිය හිමි විය යුතු ය.

ඵලදායී සන්නිවේදනයක් සඳහා, ක්‍රමානුකූල ගුණාත්මක පර්යේෂණ ප්‍රමාණවත් විය හැකිය. මිනිසුන් මතක තබා ගන්නේ සහ යම් දෙයකට පෙළඹෙන්නේ සංඛ්‍යා මගින් නොව, කතන්දර මගිනි. නමුත් ප්‍රතිශත ලෙස ඉදිරිපත් කෙරෙන ප්‍රමාණාත්මක පර්යේෂණවල සොයාගැනීම් කෙරෙහි මාධ්‍ය අවධානය යොමු වීමට වැඩි ඉඩක් ඇත. උදාහරණයක් ලෙස, ප්‍රවෘත්ති වාර්තාවක මෙසේ සඳහන් විය: “සමීක්ෂණයට අනුව, ප්‍රතිචාර දැක්වූවන්ගෙන් සියයට 80ක් මූලික වශයෙන් තමන්ව හඳුනාගන්නේ ශ්‍රී ලාංකිකයන් ලෙස වන අතර, සියයට 73.7ක් දැඩි ජාතික අයත්වීමක්  (හෝ ජාතිය හා බැඳුණු බවක්) අත්විඳිති. කෙසේ වෙතත්, සියයට 49.1ක් ප්‍රකාශ කළේ අවස්ථාවක් ලැබුණහොත් තමන් ශ්‍රී ලංකාවෙන් පිටව යන බව යි.”

හොඳ සමීක්ෂණ පර්යේෂණයක ඇති ගැටළුව වන්නේ පිරිවැය යි. රට පුරා විසිරී සිටින නියෝජිත (අහඹු ලෙස තෝරාගත්) සාම්පලවලින් ප්‍රතිචාර ලබා ගැනීම වියදම් අධික කටයුත්තකි. බහු-ක්‍රමවේද පර්යේෂණ යහපත් වුව ද, නිසි ලෙස සිදු කරන ලද, ඒ සඳහා අහඹු නියැදි සමීක්ෂණ අත්‍යවශ්‍යය. පහසුව පෙරදැරි කර ලබාගත් සාම්පල (convenience samples) මත පදනම් වූ නිගමන සාකච්ඡාව දූෂිත කිරීම හැර වෙනත් යහපත් දෙයක් සිදු නොකරයි.. 

ගැටලු හඳුනාගත් පසු, විසඳුම් සකස් කළ යුතුය. විශේෂිත ක්ෂේත්‍රයේ තම ජීවිතයෙන් වැඩි කොටසක් ගත කර ඇති පුද්ගලයන්ට පවා මෙය පහසු කටයුත්තක් නොවේ. දැනටමත් සොයාගෙන ඇති දේ නැවත සොයා ගැනීමට වෙහෙසීම වළක්වා ගැනීමටත්, සෘජු හා වක්‍ර බලපෑම් අවබෝධ කර ගැනීමටත් ජාත්‍යන්තර අත්දැකීම් අධ්‍යයනය කළ යුතු ය. මතු වන විසඳුම්, විවිධ දෘෂ්ටිකෝණ සහිත විශේෂඥයින්ට සහ වෘත්තිකයන්ට ඒවා පිළිබඳ අදහස් දැක්වීමට ඉඩ දීම මගින් දැඩි පරීක්ෂාවකට (pressure-test) ලක් කළ යුතු ය. එසේ නොවුවහොත්, එහි ප්‍රතිඵල මැතිවරණ ප්‍රකාශනවල අඩංගු හිස් සහ බොහෝ අවස්ථාවල දී හානිකර  පොරොන්දුවලට වඩා වැඩි වෙනසක් නොවනු ඇත.

සමාජ වෙනසක් සඳහා තරුණ ජනයාගේ උද්‍යෝගය සහ ශක්තිය අත්‍යවශ්‍ය වේ. නමුත් ඔවුන්, තමන්ගේ ම ගැටලු සඳහා වුව ද, විසඳුම් සකස් කිරීමට විශේෂයෙන් සුදුසු නැත. ඒ සඳහා මූලික සුදුසුකම් වන්නේ විශේෂඥ දැනුම සහ අත්දැකීම් ය. තරුණ ජනයා පර්යේෂණවල නිරත වී සිටින තාක් දුරට සහ/හෝ, ක්ෂේත්‍ර මට්ටමේ අත්දැකීම් සහ අවබෝධය ප්‍රතිපත්ති සම්පාදන ක්‍රියාවලිය වෙත ගෙන ඒමට හැකි තාක් දුරට, එම ක්‍රියාවලියට ඔවුන් සම්බන්ධ කර ගත යුතු ය.

තොරතුරු තාක්ෂණ උපාධි හෝ සහතික පත්‍ර පාඨමාලා සඳහා නොමිලේ හෝ සහනාධාර සහිත අවස්ථා  සංඛ්‍යාව වැඩි කිරීම හොඳම විසඳුම ලෙස පෙනී යා හැකිය. නමුත් එම පාඨමාලා ප්‍රමිතියෙන් තොර නම් හෝ යල් පැන යමින් පවතී නම් කුමක් කළ හැකිද? තොරතුරු තාක්ෂණ (IT) සහ තොරතුරු තාක්ෂණය ආශ්‍රිත සේවා  (ITES) ක්ෂේත්‍රයේ වර්තමාන ප්‍රවණතා සහ අවශ්‍යතා පිළිබඳ නිසි අවබෝධයක් මගින් වෙනස් විසඳුමක් වෙත මග පෙන්වනු ඇත. වැරදි විසඳුම මගින් මුදල් මෙන් ම තරුණ ජනයාගේ ජීවිත වල වසර ගණනාවක් ද අපතේ යනු ඇත. එය වළක්වා ගැනීමට අවශ්‍ය අවබෝධය ලැබෙන්නේ, වයස කුමක් වුවත්, විශේෂඥ දැනුම සහ අත්දැකීම් ඇති අයගෙන් පමණකි.